Saturday, September 29, 2018

                       ਪਾਵਰਕੌਮ ਦੀ ਪਾਵਰ
   ਜਥੇਦਾਰ ਦੇ ‘ਮਹਿਲ’ ਦੀ ਹੋਏਗੀ ਬੱਤੀ ਗੁੱਲ
                            ਚਰਨਜੀਤ ਭੁੱਲਰ
ਬਠਿੰਡਾ : ਸਾਬਕਾ ਅਕਾਲੀ ਚੇਅਰਮੈਨ ਦਿਆਲ ਸਿੰਘ ਕੋਲਿਆਂਵਾਲੀ ਦੇ ਮਹਿਲ ਵਰਗੇ ਘਰ ਦੀ ਹੁਣ ਬੱਤੀ ਗੁੱਲ ਹੋਏਗੀ ਜਿਸ ਲਈ ਪਾਵਰਕੌਮ ਅਫ਼ਸਰਾਂ ਨੇ ਤਿਆਰੀ ਖਿੱਚ ਲਈ ਹੈ। ਕੋਲਿਆਂਵਾਲੀ ਪਰਿਵਾਰ ਕੋਲ ਜੋ ਆਖ਼ਰੀ ਘਰੇਲੂ ਬਿਜਲੀ ਕੁਨੈਕਸ਼ਨ ਬਚਿਆ ਹੈ, ਉਸ ਕੁਨੈਕਸ਼ਨ ਨੂੰ ਆਰਜ਼ੀ ਤੌਰ ’ਤੇ ਕੱਟਣ ਦੇ ਹੁਕਮ ਜਾਰੀ ਹੋ ਗਏ ਹਨ। ਪਾਵਰਕੌਮ ਦੀ ਅਬਲਖੁਰਾਣਾ ਸਬ ਡਵੀਜ਼ਨ ਨੇ ਸਾਬਕਾ ਚੇਅਰਮੈਨ ਦੀ ਰਿਹਾਇਸ਼ ’ਚ ਚੱਲਦੇ ਬਿਜਲੀ ਕੁਨੈਕਸ਼ਨ ਨੂੰ ਕੱਟਣ ਦੇ ਹੁਕਮ ਤਾਂ ਕਰ ਦਿੱਤੇ ਹਨ ਪ੍ਰੰਤੂ ਕੋਲਿਆਂ ਵਾਲੀ ਪਰਿਵਾਰ ਨੇ ਬਿਜਲੀ ਬਿੱਲ ਭਰਨ ਵਾਸਤੇ ਤਿੰਨ ਚਾਰ ਦਿਨਾਂ ਦੀ ਮੋਹਲਤ ਲਈ ਹੈ। ਇਹ ਆਖ਼ਰੀ ਕੁਨੈਕਸ਼ਨ ਵੀ ਬਿੱਲ ਨਾ ਭਰਨ ਕਰਕੇ ਡਿਫਾਲਟਰ ਸੂਚੀ ’ਚ ਪੈ ਗਿਆ ਹੈ। ਵੇਰਵਿਆਂ ਅਨੁਸਾਰ ਕੋਲਿਆਂਵਾਲੀ ਪਰਿਵਾਰ ਇਸ ਵੇਲੇ ਪਾਵਰਕੌਮ ਦਾ ਬਿਜਲੀ ਬਿੱਲਾਂ ਦਾ ਕਰੀਬ 10.81 ਲੱਖ ਰੁਪਏ ਦਾ ਡਿਫਾਲਟਰ ਹੈ। ਤਿੰਨ ਘਰੇਲੂ ਕੁਨੈਕਸ਼ਨ ਤਾਂ ਪਾਵਰਕੌਮ ਪਹਿਲਾਂ ਹੀ ਕੱਟ ਚੁੱਕਾ ਹੈ ਅਤੇ ਹੁਣ ਚੌਥੇ ਆਖ਼ਰੀ ਕੁਨੈਕਸ਼ਨ ਦੀ ਤਿਆਰੀ ਹੈ। ਇਹ ਚੌਥਾ ਕੁਨੈਕਸ਼ਨ (ਖਾਤਾ ਨੰਬਰ ਕੇਐਲ 21/660) ਦਿਆਲ ਸਿੰਘ ਕੋਲਿਆਂ ਵਾਲੀ ਦੇ ਨਾਮ ’ਤੇ ਚੱਲ ਰਿਹਾ ਹੈ ਜਿਸ ਦਾ ਲੋਡ 9.8 ਕਿੱਲੋਵਾਟ ਹੈ।
                  ਜੁਲਾਈ 2015 ਵਿਚ ਲੱਗੇ ਇਸ ਕੁਨੈਕਸ਼ਨ ਦਾ ਨਵੰਬਰ 2017 ਤੋਂ ਐਵਰੇਜ ਦੇ ਹਿਸਾਬ ਨਾਲ ਬਿੱਲ ਆ ਰਿਹਾ ਹੈ ਜਿਸ ਦਾ ਮਤਲਬ ਹੈ ਕਿ ਮੀਟਰ ਵਿਚ ਕੋਈ ਗੜਬੜ ਹੈ। ਕਰੀਬ ਚਾਰ ਪੰਜ ਮਹੀਨੇ ਤੋਂ ਇਸ ਕੁਨੈਕਸ਼ਨ ਦਾ ਬਿੱਲ ਨਹੀਂ ਭਰਿਆ  ਗਿਆ ਜੋ ਕਿ 81, 514 ਰੁਪਏ ਬਣ ਗਿਆ ਹੈ। ਕੋਲਿਆਂਵਾਲੀ ਪਰਿਵਾਰ ਦੇ ਬਿਜਲੀ ਬਿੱਲਾਂ ਦਾ ਕਿੱਸਾ ਅਜੀਬ ਜੇਹਾ ਹੈ ਜਿਸ ਨੇ ਪਾਵਰਕੌਮ ਅਫ਼ਸਰਾਂ ਦੀ ਹਰ ਚੁਸਤੀ ਫ਼ੇਲ੍ਹ ਕਰ ਦਿੱਤੀ ਹੈ। ਪਾਵਰਕੌਮ ਨੇ ਪਹਿਲੀ ਦਫ਼ਾ ਫਰਵਰੀ 2017 ਵਿਚ ਚੋਣ ਜ਼ਾਬਤੇ ਦੌਰਾਨ ਕੋਲਿਆਂਵਾਲੀ ਦੇ ਬੂਹੇ ਤੱਕ ਪੁੱਜਣ ਦੀ ਹਿੰਮਤ ਦਿਖਾਈ। ਸਾਬਕਾ ਚੇਅਰਮੈਨ ਦੀ ਰਿਹਾਇਸ਼ ’ਤੇ ਉਸ ਦੇ ਲੜਕੇ ਪਰਮਿੰਦਰ ਸਿੰਘ ਦੇ ਨਾਮ ਤੇ 17.19 ਕਿੱਲੋਵਾਟ ਵਾਲਾ ਬਿਜਲੀ ਮੀਟਰ (ਖਾਤਾ ਨੰਬਰ ਜੀਟੀ 32/60) ਚੱਲਦਾ ਸੀ ਜਿਸ ਵੱਲ ਕਰੀਬ 23 ਲੱਖ ਦਾ ਬਿਜਲੀ ਬਿੱਲਾਂ ਦਾ ਬਕਾਇਆ ਖੜ੍ਹਾ ਸੀ। ਇਹ ਬਿਜਲੀ ਮੀਟਰ ਫਰਵਰੀ 2012 ਵਿਚ ਲੱਗਾ ਸੀ ਜਿਸ ਦਾ ਜੂਨ 2015 ਤੋਂ ਐਵਰੇਜ ਬਿੱਲ ਹੀ ਆ ਰਿਹਾ ਸੀ। ਮਤਲਬ ਕਿ ਮੀਟਰ ਵਿਚ ਕੋਈ ਖ਼ਰਾਬੀ ਸੀ। ਜਦੋਂ ਪਾਵਰਕੌਮ ਨੇ ਸਖ਼ਤੀ ਕੀਤੀ ਤਾਂ ਇਸ ਪਰਿਵਾਰ ਨੇ ਛੇ ਕਿਸ਼ਤਾਂ ਵਿਚ 15.30 ਲੱਖ ਰੁਪਏ ਭਰ ਦਿੱਤੇ।
                 ਜਦੋਂ ਬਾਕੀ ਬਕਾਏ ਨਾ ਭਰੇ ਤਾਂ ਪਾਵਰਕੌਮ ਨੇ ਇਸ ਕੁਨੈਕਸ਼ਨ ਦਾ ਸਾਰੇ ਬਕਾਏ ਕੋਲਿਆਂਵਾਲੀ ਪਰਿਵਾਰ ਦੇ ਪੈਟਰੋਲ ਪੰਪ ਤੇ ਲੱਗੇ ਦੂਸਰੇ ਬਿਜਲੀ ਮੀਟਰ (ਖਾਤਾ ਨੰਬਰ ਕੇਐਲ 21/670) ਵਿਚ ਪਾ ਦਿੱਤੇ ਜਿਸ ਨਾਲ ਕੁੱਲ ਬਕਾਏ 14.51 ਲੱਖ ਬਣ ਗਏ। ਉਸ ਮਗਰੋਂ ਇਸ ਪਰਿਵਾਰ ਨੇ 7.30 ਲੱਖ ਰੁਪਏ ਦਾ ਬਿੱਲ ਭਰ ਦਿੱਤਾ ਅਤੇ ਕਰੀਬ 7.20 ਲੱਖ ਰੁਪਏ ਦੇ ਬਕਾਏ ਫਿਰ ਨਾ ਭਰੇ। ਪਾਵਰਕੌਮ ਨੇ ਪੈਟਰੋਲ ਪੰਪ ਵਾਲਾ ਬਿਜਲੀ ਕੁਨੈਕਸ਼ਨ ਵੀ ਜਨਵਰੀ 2018 ਵਿਚ ਕੱਟ ਦਿੱਤਾ। ਉਸ ਮਗਰੋਂ ਪਾਵਰਕੌਮ ਅਫ਼ਸਰਾਂ ਨੇ ਪੰਪ ਵਾਲੇ ਮੀਟਰ ਦੇ ਸਾਰੇ ਬਕਾਏ ਕੋਲਿਆਂ ਵਾਲੀ ਪਰਿਵਾਰ ਦੇ ਗੁਦਾਮਾਂ ਤੇ ਚੱਲਦੇ ਤੀਸਰੇ ਬਿਜਲੀ ਮੀਟਰ (ਕੇਐਲ 21/673) ਵਾਲੇ ਖਾਤੇ ਵਿਚ ਪਾ ਦਿੱਤੇ ਜੋ ਕਿ ਕਰੀਬ 9.78 ਲੱਖ ਬਣ ਗਏ।
       ਜਦੋਂ ਗੁਦਾਮਾਂ ਵਾਲੇ ਬਿਜਲੀ ਕੁਨੈਕਸ਼ਨ ਦਾ ਬਿੱਲ ਨਾ ਤਾਰਿਆ ਤਾਂ ਪਾਵਰਕੌਮ ਨੇ ਤੀਸਰਾ ਕੁਨੈਕਸ਼ਨ ਵੀ ਮਈ 2018 ਵਿਚ ਕੱਟ ਦਿੱਤਾ। ਹੁਣ ਇਹ ਬਕਾਇਆ ਸਮੇਤ ਚੌਥੇ ਕੁਨੈਕਸ਼ਨ ਦੇ ਕਰੀਬ 10.81 ਲੱਖ ਬਣ ਚੁੱਕਾ ਹੈ। ਕੱਟੇ ਗਏ ਤਿੰਨੋ ਕੁਨੈਕਸ਼ਨ ਪਰਮਿੰਦਰ ਸਿੰਘ ਦੇ ਨਾਮ ਤੇ ਹਨ ਜਦੋਂ ਕਿ ਚੌਥਾ ਤੇ ਆਖ਼ਰੀ ਕੁਨੈਕਸ਼ਨ ਦਿਆਲ ਸਿੰਘ ਦੇ ਨਾਮ ’ਤੇ ਹੈ ਜਿਸ ਦੇ ਕੱਟਣ ਦੀ ਤਿਆਰੀ ਹੈ। ਸੂਤਰ ਆਖਦੇ ਹਨ ਕਿ ਪਾਵਰਕੌਮ ਅਧਿਕਾਰੀ ਗਰੀਬ ਖਪਤਕਾਰ ਦਾ ਕੁਨੈਕਸ਼ਨ ਤਾਂ ਪਹਿਲ ਦੇ ਆਧਾਰ ਤੇ ਕੱਟ ਦਿੰਦੇ ਹਨ ਜਦੋਂ ਕਿ ਕੋਲਿਆਂ ਵਾਲੀ ਦਾ ਲੰਮੇ ਸਮੇਂ ਤੋਂ ਬਿੱਲ ਵੀ ਐਵਰੇਜ ਆ ਰਿਹਾ ਹੈ ਤੇ ਲੱਖਾਂ ਦੇ ਬਕਾਏ ਵਸੂਲਣ ਲਈ ਪਹਿਲਾਂ ਹੱਥ ਤੱਕ ਨਹੀਂ ਲਾਇਆ।
                               ਕੁਨੈਕਸ਼ਨ ਕੱਟਣ ਦੇ ਹੁਕਮ ਜਾਰੀ : ਐਸ.ਡੀ.ਓ
ਪਾਵਰਕੌਮ ਦੀ ਸਬ ਡਵੀਜ਼ਨ ਅਬਲਖੁਰਾਣਾ ਦੇ ਐਸ.ਡੀ.ਓ ਇਕਬਾਲ ਸਿੰਘ ਢਿੱਲੋਂ ਦਾ ਕਹਿਣਾ ਸੀ ਕਿ ਕੋਲਿਆਂ ਵਾਲੀ ਪਰਿਵਾਰ ਦੇ ਤਿੰਨ ਮੀਟਰਾਂ ਦਾ ਪਹਿਲਾਂ ਹੀ ਕਰੀਬ 10 ਲੱਖ ਦਾ ਬਕਾਇਆ ਖੜ੍ਹਾ ਹੈ ਅਤੇ ਹੁਣ ਚੌਥੇ ਕੁਨੈਕਸ਼ਨ ਦਾ ਬਕਾਇਆ ਵੀ ਵੱਖਰਾ 81,514 ਰੁਪਏ ਹੋ ਗਿਆ ਹੈ। ਉਨ੍ਹਾਂ ਦੱਸਿਆ ਕਿ ਆਰਜ਼ੀ ਕੁਨੈਕਸ਼ਨ ਕੱਟਣ ਦੇ ਲਿਖਤੀ ਹੁਕਮ ਜਾਰੀ ਕਰ ਦਿੱਤੇ ਗਏ ਹਨ ਪ੍ਰੰਤੂ ਖਪਤਕਾਰ ਨੇ ਸੋਮਵਾਰ ਤੱਕ ਬਿੱਲ ਭਰਨ ਦੀ ਮੁਹਲਤ ਲੈ ਲਈ ਹੈ। ਜੇ ਰਾਸ਼ੀ ਨਾ ਭਰੀ ਤਾਂ ਕੁਨੈਕਸ਼ਨ ਕੱਟ ਦਿੱਤਾ ਜਾਵੇਗਾ।

       


Wednesday, September 26, 2018

                               ਮਹਾਰਾਜੇ ਦੀ ਵਿਜੀਲੈਂਸ 
          ਕੋਲਿਆਂਵਾਲੀ ਨੂੰ ‘ਨੱਪਣ’ ਲਈ ਚੁੱਕਿਆ ਖੂੰਡਾ
                                   ਚਰਨਜੀਤ ਭੁੱਲਰ
ਬਠਿੰਡਾ : ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਹਲਕਾ ਲੰਬੀ ’ਚ ਰੈਲੀ ਕਰਨ ਤੋਂ ਪਹਿਲਾਂ ਸਾਬਕਾ ਅਕਾਲੀ ਚੇਅਰਮੈਨ ਅਤੇ ਜਥੇਦਾਰ ਦਿਆਲ ਸਿੰਘ ਕੋਲਿਆਂਵਾਲੀ ਨੂੰ ਜੇਲ੍ਹ ਦੀ ਹਵਾ ਖੁਆਉਣ ਦੇ ਰੌਂਅ ’ਚ ਜਾਪਦੇ ਹਨ। ਵਿਜੀਲੈਂਸ ਅਫ਼ਸਰਾਂ ਨੇ ਇਕਦਮ ਹੀ ਸਾਬਕਾ ਚੇਅਰਮੈਨ ਕੋਲਿਆਂਵਾਲੀ ਨੂੰ ਗ੍ਰਿਫ਼ਤਾਰ ਕਰਨ ਵਾਸਤੇ ਛਾਪੇਮਾਰੀ ਤੇਜ਼ ਕਰ ਦਿੱਤੀ ਹੈ। ਵਿਜੀਲੈਂਸ ਟੀਮ ਨੇ 21 ਸਤੰਬਰ ਤੋਂ ਮੁੜ ਕੋਲਿਆਂ ਵਾਲੀ ਦੇ ਪਰਿਵਾਰ ਅਤੇ ਰਿਸ਼ਤੇਦਾਰਾਂ ਤੋਂ ਇਲਾਵਾ ਉਨ੍ਹਾਂ ਦੇ ਨੇੜਲਿਆਂ ਦੀ ਘੇਰਾਬੰਦੀ ਸ਼ੁਰੂ ਕਰ ਦਿੱਤੀ ਹੈ। ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ 20 ਅਗਸਤ ਨੂੰ ਕੋਲਿਆਂਵਾਲੀ ਦੀ ਜ਼ਮਾਨਤ ਦੀ ਅਰਜ਼ੀ ਰੱਦ ਕਰ ਦਿੱਤੀ ਸੀ। ਉਸ ਮਗਰੋਂ ਵਿਜੀਲੈਂਸ ਅਧਿਕਾਰੀ ਚੁੱਪ ਹੋ ਗਏ ਸਨ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਜਿਉਂ ਹੀ ਹਲਕਾ ਲੰਬੀ ਵਿਚ ਰੈਲੀ ਕਰਨ ਦਾ ਐਲਾਨ ਕੀਤਾ ਤਾਂ ਉਸ ਮਗਰੋਂ ਹੀ ਵਿਜੀਲੈਂਸ ਦੀਆਂ ਟੀਮਾਂ ਨੇ ਕੋਲਿਆਂ ਵਾਲੀ ਦੀ ਤਲਾਸ਼ ਵਿਚ ਚੱਪਾ ਚੱਪਾ ਛਾਨਣਾ ਸ਼ੁਰੂ ਕਰ ਦਿੱਤਾ। ਅੱਜ ਵਿਜੀਲੈਂਸ ਟੀਮ ਨੇ ਕੋਲਿਆਂ ਵਾਲੀ ਵਿਚ ਮੁੜ ਛਾਪਾ ਮਾਰਿਆ। ਦੱਸਣਯੋਗ ਹੈ ਕਿ ਵਿਜੀਲੈਂਸ ਨੇ 30 ਜੂਨ 2018 ਨੂੰ ਵਿਜੀਲੈਂਸ ਥਾਣਾ ਮੋਹਾਲੀ ਵਿਖੇ ਕੋਲਿਆਂ ਵਾਲੀ ਖ਼ਿਲਾਫ਼ ਵਸੀਲਿਆਂ ਤੋਂ ਜ਼ਿਆਦਾ 1.71 ਕਰੋੜ ਦੀ ਸੰਪਤੀ ਬਣਾਏ ਜਾਣ ਦਾ ਕੇਸ ਦਰਜ ਕੀਤਾ ਸੀ।
                 ਅਮਰਿੰਦਰ ਸਿੰਘ ਨੇ ਚੋਣ ਪ੍ਰਚਾਰ ਦੌਰਾਨ ਲੰਬੀ ਰੈਲੀ ਵਿਚ ਸਟੇਜ ਤੋਂ ਕਾਂਗਰਸ ਸਰਕਾਰ ਬਣਨ ’ਤੇ ਸਭ ਤੋਂ ਪਹਿਲਾਂ ਕੋਲਿਆਂ ਵਾਲੀ ਨੂੰ ਰਵੀ ਸਿੱਧੂ ਵਾਂਗ ਸਲਾਖ਼ਾਂ ਪਿੱਛੇ ਭੇਜਣ ਦਾ ਐਲਾਨ ਕੀਤਾ ਸੀ। ਦੱਸਣਯੋਗ ਹੈ ਮੁੱਖ ਮੰਤਰੀ ਨੇ ਲੰਬੀ ਦੇ ਕਿੱਲਿਆਂ ਵਾਲੀ ਵਿਚ 7 ਅਕਤੂਬਰ ਨੂੰ  ਰੈਲੀ ਕਰਨ ਦਾ ਐਲਾਨ ਕੀਤਾ ਹੈ। ਭਾਵੇਂ ਵਿਜੀਲੈਂਸ ਇਸ ਪਿੱਛੇ ਕੋਈ ਸਿਆਸੀ ਸਖ਼ਤੀ ਹੋਣ ਤੋਂ ਇਨਕਾਰ ਕਰਦੀ ਹੈ ਪ੍ਰੰਤੂ ਹਕੀਕਤ ਵਿਚ ਜ਼ਿਲ੍ਹਾ ਪਰਿਸ਼ਦ ਅਤੇ ਸਮਿਤੀ ਦੀਆਂ ਵੋਟਾਂ ਪੈਣ ਮਗਰੋਂ ਹੀ ਵਿਜੀਲੈਂਸ ਮੁਸਤੈਦ ਹੋਇਆ ਹੈ।  ਸੂਤਰਾਂ ਅਨੁਸਾਰ ਵਿਜੀਲੈਂਸ ਟੀਮਾਂ ਨੇ 21 ਸਤੰਬਰ ਤੋਂ ਛਾਪੇਮਾਰੀ ਸ਼ੁਰੂ ਕੀਤੀ ਅਤੇ ਲੰਘੇ ਚਾਰ ਪੰਜ ਦਿਨਾਂ ਵਿਚ ਵਿਜੀਲੈਂਸ ਨੇ ਕੋਲਿਆਂ ਵਾਲੀ ਦੇ ਘਰ, ਉਸ ਦੀਆਂ ਦੋ ਭੈਣਾਂ ਦੇ ਘਰ ਪਿੰਡ ਢੋਲੇਵਾਲ (ਮੋਗਾ) ਅਤੇ ਸ਼ੁਕਰਚੱਕ (ਤਰਨਤਾਰਨ) ਵਿਚ ਛਾਪੇ ਮਾਰੇ ਹਨ। ਇਸੇ ਤਰ੍ਹਾਂ ਕੋਲਿਆਂ ਵਾਲੀ ਦੇ ਰਿਸ਼ਤੇਦਾਰਾਂ ਦੇ ਘਰ ਚੱਕ ਮੇਘਾ ਸਿੰਘ ਵਿਆਨ (ਫ਼ਾਜ਼ਿਲਕਾ) ਅਤੇ ਉਸ ਦੀ ਲੜਕੀ ਦੇ ਘਰ ਝੰਡੂਵਾਲਾ (ਫ਼ਿਰੋਜ਼ਪੁਰ) ਵਿਚ ਛਾਪੇ ਮਾਰੇ ਹਨ। ਕੋਲਿਆਂ ਵਾਲੀ ਦੇ ਪੀ.ਏ ਰਹੇ ਗੁਰਮੀਤ ਸਿੰਘ ਅਤੇ ਨਿਰਮਲ ਸਿੰਘ ਦੇ ਕੋਲਿਆਂ ਵਾਲੀ ਘਰ ਵਿਚ ਅਤੇ ਇੱਕ ਹੋਰ ਪੀਏ ਲਵਜੀਤ ਸਿੰਘ ਦੇ ਘਰ ਪੱਕੀ ਟਿੱਬੀ ਵਿਖੇ ਵੀ ਕੋਲਿਆਂ ਵਾਲੀ ਦੀ ਤਲਾਸ਼ ਕੀਤੀ ਹੈ।
                 ਕੋਲਿਆਂ ਵਾਲੀ ਦੇ ਦੋ ਦੋਸਤ ਪਿੰਡ ਮਿੱਡਾ ਦੇ ਸਾਬਕਾ ਸਰਪੰਚ ਬਗ਼ੀਚਾ ਸਿੰਘ ਅਤੇ ਕੱਟਿਆਂ ਵਾਲੀ ਦੇ ਸਾਬਕਾ ਸਰਪੰਚ ਰਛਪਾਲ ਸਿੰਘ ਦੇ ਘਰ ਵੀ ਵਿਜੀਲੈਂਸ ਗੇੜਾ ਲਾ ਕੇ ਆਈ ਹੈ। ਵਿਜੀਲੈਂਸ ਨੇ ਹੁਣ ਕੋਲਿਆਂ ਵਾਲੀ ਦੇ ਨੇੜਲਿਆਂ ਦੀ ਸ਼ਨਾਖ਼ਤ ਕੀਤੀ ਹੈ ਜਿਸ ਦੇ ਸਬੰਧ ਵਿਚ ਪੰਜਾਬ ਤੋਂ ਇਲਾਵਾ ਗੁਆਂਢੀ ਸੂਬਿਆਂ ਵਿਚ ਵੀ ਛਾਪੇਮਾਰੀ ਦੀ ਸੰਭਾਵਨਾ ਹੈ। ਸੂਤਰ ਦੱਸਦੇ ਹਨ ਕਿ ਵਿਜੀਲੈਂਸ ਨੂੰ ਕੋਲਿਆਂ ਵਾਲੀ ਦੇ ਬਾਲਾਸਰ (ਹਰਿਆਣਾ) ਵਿਚ ਛੁਪੇ ਹੋਣ ਦੀ ਵੀ ਭਿਣਕ ਪਈ ਹੈ। ਦੱਸਣਯੋਗ ਹੈ ਕਿ ਹਾਈਕੋਰਟ ਚੋਂ ਜ਼ਮਾਨਤ ਰੱਦ ਹੋਣ ਮਗਰੋਂ ਕੋਲਿਆਂ ਵਾਲੀ ਰੂਪੋਸ਼ ਹੋ ਗਏ ਹਨ ਅਤੇ ਇਸੇ ਕਰਕੇ ਉਹ ਸਮਿਤੀ ਚੋਣਾਂ ਵਿਚ ਕਿਧਰੇ ਨਜ਼ਰ ਨਹੀਂ ਪਏ। ਵਿਜੀਲੈਂਸ ਨੇ ਕੋਲਿਆਂ ਵਾਲੀ ਦੇ ਬੈਂਕ ਖਾਤੇ ਵੀ ਸੀਲ ਕਰ ਦਿੱਤੇ ਹਨ ਅਤੇ ਹੁਣ ਆਮਦਨ ਕਰ ਵਿਭਾਗ ਤੋਂ ਰਿਕਾਰਡ ਮੰਗਿਆ ਹੈ। ਵਿਜੀਲੈਂਸ ਵੱਲੋਂ ਹੁਣ ਕੋਲਿਆਂ ਵਾਲੀ ਦੇ ਮਲੋਟ ਵਿਚਲੇ ਨੇੜਲੇ ਦੋਸਤਾਂ ਨੂੰ ਵੀ ਤਲਬ ਕਰਨ ਦੀ ਵਿਉਂਤ ਹੈ। ਵਿਜੀਲੈਂਸ ਨੇ ਕੋਲਿਆਂ ਵਾਲੀ ਦੀ ਭਾਲ ਲਈ ਪ੍ਰਾਈਵੇਟ ਸੂਹੀਏ ਵੀ ਛੱਡੇ ਹਨ ਪ੍ਰੰਤੂ ਹਾਲੇ ਤੱਕ ਵਿਜੀਲੈਂਸ ਅਫ਼ਸਰ ਉਸ ਦੀ ਪੈੜ ਨੱਪਣ ਵਿਚ ਨਕਾਮ ਰਹੇ ਹਨ। ਸੂਤਰ ਦੱਸਦੇ ਹਨ ਕਿ ਉੱਪਰੋਂ ਇਸ਼ਾਰਾ ਮਿਲਣ ਮਗਰੋਂ ਹੀ ਵਿਜੀਲੈਂਸ ਨੇ ਰਫ਼ਤਾਰ ਫੜੀ ਹੈ।
                      ਛਾਪੇ ਮਾਰੇ ਜਾ ਰਹੇ ਹਨ : ਐਸ.ਐਸ.ਪੀ
ਬਠਿੰਡਾ ਰੇਂਜ ਦੇ ਐਸ.ਐਸ.ਪੀ (ਵਿਜੀਲੈਂਸ) ਪਰਮਜੀਤ ਸਿੰਘ ਵਿਰਕ ਦਾ ਕਹਿਣਾ ਸੀ ਕਿ ਹਾਈਕੋਰਟ ਚੋਂ ਜ਼ਮਾਨਤ ਰੱਦ ਹੋਣ ਤੋਂ ਹੀ ਕੋਲਿਆਂ ਵਾਲੀ ਦੀ ਤਲਾਸ਼ ਵਿਚ ਛਾਪੇਮਾਰੀ ਕੀਤੀ ਜਾ ਰਹੀ ਹੈ। ਕੋਲਿਆਂ ਵਾਲੀ ਦੇ ਪਰਵਾਰਿਕ ਮੈਂਬਰਾਂ ਅਤੇ ਨੇੜਲਿਆਂ ਦੇ ਘਰਾਂ ’ਚ ਵਿਜੀਲੈਂਸ ਟੀਮਾਂ ਨੇ ਭਾਲ ਕੀਤੀ ਹੈ ਕਿਉਂਕਿ ਕਾਨੂੰਨੀ ਤੌਰ ਤੇ ਉਸ ਦੀ ਗ੍ਰਿਫ਼ਤਾਰੀ ਲਈ ਵਿਜੀਲੈਂਸ ਕੰਮ ਕਰ ਰਹੀ ਹੈ ਜਿਸ ਦਾ ਹੋਰ ਕੋਈ ਲਾਗਾ ਤੇਗ਼ਾ ਨਹੀਂ ਹੈ।
                        ਹਰ ਹੀਲੇ ਕਾਰਵਾਈ ਹੋਵੇਗੀ : ਜਾਖੜ
ਕਾਂਗਰਸ ਪ੍ਰਧਾਨ ਸੁਨੀਲ ਜਾਖੜ ਦਾ ਕਹਿਣਾ ਸੀ ਕਿ ਚੋਣ ਪ੍ਰਚਾਰ ਦੌਰਾਨ ਅਮਰਿੰਦਰ ਸਿੰਘ ਨੇ ਲੰਬੀ ਵਿਚ ਵਾਅਦਾ ਕੀਤਾ ਸੀ ਕਿ ਪੰਜਾਬ ਨੂੰ ਲੁੱਟਣ ਵਾਲੇ ਬਖ਼ਸ਼ੇ ਨਹੀਂ ਜਾਣਗੇ ਜਿਸ ਕਰਕੇ ਕੋਲਿਆਂ ਵਾਲੀ ਖ਼ਿਲਾਫ਼ ਕਾਨੂੰਨ ਮੁਤਾਬਿਕ ਕਾਰਵਾਈ ਹਰ ਹੀਲੇ ਹੋਵੇਗੀ। ਜਾਖੜ ਨੇ ਆਖਿਆ ਕਿ 7 ਅਕਤੂਬਰ ਨੂੰ ਕਿੱਲਿਆਂ ਵਾਲੀ ਵਿਚ ਰੈਲੀ ਹੋਵੇਗੀ ਪ੍ਰੰਤੂ ਹੁਣ ਹੜ੍ਹਾਂ ਨੂੰ ਵੀ ਨਜ਼ਰ ਵਿਚ ਰੱਖਿਆ  ਜਾ ਰਿਹਾ ਹੈ।

   



   






Saturday, September 22, 2018

                           ਜਥੇਦਾਰ ਦਾ ਪੁੱਤਰ 
       ਪਸ਼ੂ ਮੇਲਿਆਂ ਦੇ ਕਾਰੋਬਾਰ ਚੋਂ ‘ਆਊਟ’
                             ਚਰਨਜੀਤ ਭੁੱਲਰ
ਬਠਿੰਡਾ  :  ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਦੇ ਪੁੱਤਰ ਤੇ ਸਾਬਕਾ ਅਕਾਲੀ ਚੇਅਰਮੈਨ ਮਨਜਿੰਦਰ ਸਿੰਘ ਬਿੱਟੂ ਨੇ ਐਤਕੀਂ ਪਸ਼ੂ ਮੇਲਿਆਂ ਦਾ ਕਾਰੋਬਾਰ ਛੱਡ ਦਿੱਤਾ ਹੈ। ਪਸ਼ੂ ਮੇਲਿਆਂ ਦੇ ਠੇਕੇ ਕਰਕੇ ਜਥੇਦਾਰ ਦੇ ਪਰਿਵਾਰ ਨੂੰ ਸੋਸ਼ਲ ਮੀਡੀਆ ’ਤੇ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ। ਜਸਟਿਸ ਰਣਜੀਤ ਸਿੰਘ ਦੀ ਰਿਪੋਰਟ ਵਿਧਾਨ ਸਭਾ ਵਿਚ ਪੇਸ਼ ਹੋਣ ਮਗਰੋਂ ਸ਼੍ਰੋਮਣੀ ਅਕਾਲੀ ਦਲ ਤੋਂ ਇਲਾਵਾ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਖ਼ਿਲਾਫ਼ ਵੀ ਮੁਤਵਾਜ਼ੀ ਜਥੇਦਾਰ ਖੁੱਲ੍ਹ ਕੇ ਬੋਲਣ ਲੱਗੇ ਸਨ। ਸਾਬਕਾ ਚੇਅਰਮੈਨ ਮਨਜਿੰਦਰ ਸਿੰਘ ਬਿੱਟੂ ਨੇ ਵਰ੍ਹਾ 2018-19 ਦੇ ਪੰਜਾਬ ਦੇ ਪਸ਼ੂ ਮੇਲਿਆਂ ਦਾ ਠੇਕਾ ਲੈਣ ਲਈ ਸਰਕਾਰੀ ਤੌਰ ’ਤੇ ਪਹੁੰਚ ਕੀਤੀ ਸੀ ਪ੍ਰੰਤੂ ਐਤਕੀਂ ਉਨ੍ਹਾਂ ਨੂੰ ਇਹ ਕਾਰੋਬਾਰ ਨਹੀਂ ਮਿਲਿਆ ਹੈ। ਪੇਂਡੂ ਵਿਕਾਸ ਤੇ ਪੰਚਾਇਤ ਵਿਭਾਗ ਤੋਂ ਆਰ.ਟੀ.ਆਈ ਤਹਿਤ ਪ੍ਰਾਪਤ ਰਿਕਾਰਡ ਅਨੁਸਾਰ ਇਸ ਗੱਲ ਦੀ ਪੁਸ਼ਟੀ ਹੋਈ ਹੈ ਕਿ ਜਥੇਦਾਰ ਗਿਆਨੀ ਗੁਰਬਚਨ ਸਿੰਘ ਦੇ ਲੜਕੇ ਮਨਜਿੰਦਰ ਸਿੰਘ ਬਤੌਰ ਹਿੱਸੇਦਾਰ ਪਸ਼ੂ ਮੇਲਿਆਂ ਦੇ ਠੇਕੇ ਲੈਣ ਦਾ ਕਾਰੋਬਾਰ ਕਰਦੇ ਰਹੇ ਹਨ।
                 ਹਾਲਾਂਕਿ ਉਹ ਇਹ ਕਾਰੋਬਾਰ ਨਿਯਮਾਂ ਅਨੁਸਾਰ ਅਤੇ ਸਰਕਾਰੀ ਖ਼ਜ਼ਾਨੇ ਨੂੰ ਠੇਕੇ ਦੀ ਪੂਰੀ ਰਾਸ਼ੀ ਤਾਰ ਕੇ ਕਰ ਰਹੇ ਸਨ ਪ੍ਰੰਤੂ ਜਥੇਦਾਰ ਦੇ ਪਰਿਵਾਰ ਚੋਂ ਹੋਣ ਕਰਕੇ ਉਨ੍ਹਾਂ ’ਤੇ ਨੈਤਿਕ ਨਜ਼ਰੀਏ ਤੋਂ ਉਂਗਲ ਉੱਠ ਰਹੀ ਸੀ। ਸਰਕਾਰੀ ਤੱਥਾਂ ਅਨੁਸਾਰ ਪੰਚਾਇਤ ਵਿਭਾਗ ਨੇ ਐਤਕੀਂ ਪਸ਼ੂ ਮੇਲਿਆਂ ਦਾ ਕਾਰੋਬਾਰ ‘ਸਦਾਬ ਰਵਿੰਦਰ ਐਂਡ ਕੰਪਨੀ, ਰਾਜਪੁਰਾ’ ਨੂੰ 72.02 ਕਰੋੜ ਵਿਚ ਦਿੱਤਾ ਹੈ। ਰਵਿੰਦਰ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਕਾਰੋਬਾਰ ’ਚ ਮਨਜਿੰਦਰ ਸਿੰਘ ਨਹੀਂ ਹੈ। ਪੰਚਾਇਤ ਵਿਭਾਗ ਕੋਲ ਸਾਲ 2018-19 ਦੇ ਪਸ਼ੂ ਮੇਲਿਆਂ ਦਾ ਠੇਕਾ ਲੈਣ ਲਈ ਸਾਬਕਾ ਚੇਅਰਮੈਨ ਮਨਜਿੰਦਰ ਸਿੰਘ ਬਿੱਟੂ ਨੇ 9  ਜੁਲਾਈ 2018 ਨੂੰ  ਸਕਿਉਰਿਟੀ ਦਾ ਡਰਾਫ਼ਟ ਜਮ੍ਹਾ ਕਰਾਇਆ ਸੀ ਅਤੇ ਉਨ੍ਹਾਂ ਦੇ ਹਾਜ਼ਰੀ ਸਫ਼ੇ ’ਤੇ ਲੜੀ ਨੰਬਰ ਛੇ ’ਚ ਦਸਤਖ਼ਤ ਵੀ ਹਨ। ਕੁੱਲ 12 ਵਿਅਕਤੀਆਂ ਨੇ ਡਰਾਫ਼ਟ ਜਮ੍ਹਾ ਕਰਾਏ ਸਨ ਜਿਨ੍ਹਾਂ ਚੋਂ ਕੰਮ ਰਵਿੰਦਰ ਐਂਡ ਕੰਪਨੀ ਨੂੰ ਅਲਾਟ ਹੋਇਆ ਹੈ।  ਪਿਛਲੇ ਮਾਲੀ ਵਰੇ੍ਹ ਦੌਰਾਨ ਪੰਚਾਇਤ ਵਿਭਾਗ ਨੇ ਪੰਜਾਬ ਦੇ ਪਸ਼ੂ ਮੇਲਿਆਂ ਦਾ 1 ਜੁਲਾਈ 2017 ਤੋਂ 30 ਜੂਨ 2018 ਤੱਕ ਦਾ ਠੇਕਾ ‘ਯੂਨਾਈਟਿਡ ਕੈਟਲ ਫੇਅਰ ਆਰਗੇਨਾਈਜ਼ਰ’ ਨੂੰ 105.50 ਕਰੋੜ ਵਿਚ ਦਿੱਤਾ ਸੀ ਜਿਸ ਵਿਚ ਸਾਬਕਾ ਚੇਅਰਮੈਨ ਮਨਜਿੰਦਰ ਸਿੰਘ ਵੀ ਹਿੱਸੇਦਾਰ ਸੀ।
                ਪੰਜਾਬੀ ਟ੍ਰਿਬਿਊਨ ਕੋਲ 3 ਅਗਸਤ 2017 ਨੂੰ ਪੰਚਾਇਤ ਮਹਿਕਮੇ ਨਾਲ ਹੋਏ ਐਗਰੀਮੈਂਟ ਦੀ ਕਾਪੀ ਵੀ ਮੌਜੂਦ ਹੈ ਜਿਸ ’ਤੇ ਬਤੌਰ ਹਿੱਸੇਦਾਰ ਬਿੱਟੂ ਦੇ ਦਸਤਖ਼ਤ ਵੀ ਹਨ। ਪੰਜਾਬ ਵਿਚ ਕਰੀਬ 45 ਸ਼ਹਿਰਾਂ ’ਚ ਹਰ ਮਹੀਨੇ 42 ਪਸ਼ੂ ਮੇਲੇ ਲੱਗਦੇ ਹਨ ਜਿਨ੍ਹਾਂ ਚੋਂ ਮੌੜ, ਰਾਮਪੁਰਾ ਤੇ ਧਨੌਲੇ ਦੇ ਵੱਡੇ ਮੇਲੇ ਹਨ।  ਪੰਜਾਬ ਕੈਟਲ ਫੇਅਰਜ਼ (ਰੈਗੂਲੇਸ਼ਨ) ਐਕਟ 1967 ਤਹਿਤ ਪਸ਼ੂ ਮੇਲਿਆਂ ਵਿਚ ਪਸ਼ੂਆਂ ਦੀ ਖ਼ਰੀਦੋ ਤੇ ਚਾਰ ਫ਼ੀਸਦੀ ਫ਼ੀਸ ਵਸੂਲੀ ਜਾਂਦੀ ਹੈ। ਪਹਿਲਾਂ ਸਰਕਾਰ ਫ਼ੀਸ ਵਸੂਲਦੀ ਸੀ ਪ੍ਰੰਤੂ ਪਿਛਲੀ ਸਰਕਾਰ ਨੇ ਮੇਲਿਆਂ ਨੂੰ ਠੇਕੇ ਤੇ ਦੇਣਾ ਸ਼ੁਰੂ ਕੀਤਾ ਸੀ।  ਮਾਲਵਾ ਯੂਥ ਫੈਡਰੇਸ਼ਨ ਦੇ ਪ੍ਰਧਾਨ ਲੱਖਾ ਸਧਾਣਾ ਦਾ ਪ੍ਰਤੀਕਰਮ ਸੀ ਕਿ ਪਸ਼ੂ ਮੇਲਿਆਂ ਚੋਂ ਖ਼ਰੀਦ ਕੀਤਾ ਕਾਟੂ ਮਾਲ ਡੇਰਾ ਬੱਸੀ ਦੇ ਬੱੁਚੜਖ਼ਾਨਿਆਂ ਵਿਚ ਸਪਲਾਈ ਹੁੰਦਾ ਹੈ। ਬੇਸ਼ੱਕ ਕਾਨੂੰਨੀ ਤੌਰ ’ਤੇ ਕੱੁਝ ਗ਼ਲਤ ਨਹੀਂ ਪ੍ਰੰਤੂ ਬੱੁਚੜਖ਼ਾਨਿਆਂ ਨੂੰ ਸਪਲਾਈ ਹੋਣ ਵਾਲੇ ਕਾਰੋਬਾਰ ਨਾਲ ਜੁੜਨਾ ਨੈਤਿਕ ਤੌਰ ’ਤੇ ਜਥੇਦਾਰ ਦੇ ਪਰਿਵਾਰ ਲਈ ਠੀਕ ਨਹੀਂ। ਉਨ੍ਹਾਂ ਆਖਿਆ ਕਿ ਪਸ਼ੂ ਮੇਲਿਆਂ ਦਾ ਕਾਰੋਬਾਰ ਵੀ ਹੁਣ ਕੁਰੱਪਸ਼ਨ ਦਾ ਅੱਡਾ ਹੈ।
                 ਕੰਮ ਕਰਨਾ ਕੋਈ ਪਾਪ ਨਹੀਂ ਹੈ : ਮਨਜਿੰਦਰ ਬਿੱਟੂ
ਸਾਬਕਾ ਚੇਅਰਮੈਨ ਮਨਜਿੰਦਰ ਸਿੰਘ ਬਿੱਟੂ ਦਾ ਕਹਿਣਾ ਸੀ ਕਿ ਉਹ ਪਸ਼ੂ ਮੇਲਿਆਂ ਦੇ ਠੇਕਿਆਂ ਦੇ ਕੰਮ ਵਿਚ ਲੰਮੇ ਸਮੇਂ ਤੋਂ ਹਨ ਅਤੇ ਪਿਛਲੇ ਵਰੇ੍ਹ ਵੀ ਉਨ੍ਹਾਂ ਬਤੌਰ ਹਿੱਸੇਦਾਰ ਕਾਰੋਬਾਰ ਲਿਆ ਸੀ। ਉਨ੍ਹਾਂ ਨੂੰ ਲੰਘੇ ਮਾਲੀ ਸਾਲ ਦੌਰਾਨ ਵੱਡਾ ਮਾਲੀ ਘਾਟਾ ਝੱਲਣਾ ਪਿਆ ਹੈ ਜਿਸ ਕਰਕੇ ਐਤਕੀਂ ਕੰਮ ਨਹੀਂ ਲਿਆ। ਉਹ ਤਾਂ ਪਸ਼ਆਂੂ ਦੀ ਖ਼ਰੀਦੋ ਫ਼ਰੋਖ਼ਤ ’ਤੇ ਸਿਰਫ਼ ਚਾਰ ਫ਼ੀਸਦੀ ਸਰਕਾਰੀ ਫ਼ੀਸ ਵਸੂਲਦੇ ਸਨ ਅਤੇ ਇਸ ਤੋਂ ਬਿਨਾਂ ਹੋਰ ਕਿਸੇ ਤਰ੍ਹਾਂ ਦਾ ਵੀ ਲਾਗਾ ਤੇਗ਼ਾ ਨਹੀਂ ਹੁੰਦਾ। ਉਹ ਕਾਨੂੰਨ ਮੁਤਾਬਿਕ ਸਰਕਾਰ ਨੂੰ ਅਦਾਇਗੀ ਕਰਦੇ ਹਨ। ਕੰਮ ਕਰਨਾ ਕੋਈ ਪਾਪ ਨਹੀਂ, ਠੱਗੀ ਮਾਰਨਾ ਮਾੜਾ ਹੈ।







Friday, September 21, 2018

                                                            ਸਾਬਕਾ ਵਿਧਾਇਕ
                                         ਨੋਟਾਂ ਦੀ ਪੰਡ ਨੇ ਕੀਤੇ ਵਾਰੇ ਨਿਆਰੇ
                                                              ਚਰਨਜੀਤ ਭੁੱਲਰ
ਬਠਿੰਡਾ : ਸਿਆਸੀ ਮੈਦਾਨ ’ਚ ਘੱਟ ਹੀ ਚਿੱਤ ਹੋਏ ਸਾਬਕਾ ਵਿਧਾਇਕਾਂ ਨੇ ਸਰਕਾਰੀ ਖ਼ਜ਼ਾਨੇ ਦੀ ਪਿੱਠ ਜ਼ਰੂਰ ਲਾ ਦਿੱਤੀ ਹੈ। ਉਨ੍ਹਾਂ ਦੇ ਘਰਾਂ ’ਚ ਪੈਨਸ਼ਨ ਦੇ ਰੂਪ ’ਚ ਨੋਟਾਂ ਦਾ ਮੀਂਹ ਵਰ੍ਹਦਾ ਹੈ। ਦੂਸਰੀ ਤਰਫ਼ ਪੰਜਾਬ ਦੇ ਬਜ਼ੁਰਗਾਂ ਦਾ ਮਾਮੂਲੀ ਪੰਜ ਸੌ ਰੁਪਏ ਦੀ ਬੁਢਾਪਾ ਪੈਨਸ਼ਨ ਨੇ ਬੁਢਾਪਾ ਰੋਲ ਰੱਖਿਆ ਹੈ। ਇੱਧਰ ਸਾਬਕਾ ਵਿਧਾਇਕਾਂ ਦੇ ਪੈਨਸ਼ਨ ਨੇ ਹੀ ਵਾਰੇ ਨਿਆਰੇ ਕਰ ਰੱਖੇ ਹਨ। ਪੰਜਾਬ ਦੇ ਕਰੀਬ ਸਵਾ ਦੋ ਸੌ ਸਾਬਕਾ ਵਿਧਾਇਕ ਪੈਨਸ਼ਨ ਲੈ ਰਹੇ ਹਨ। ਹੁਣ ਪੈਨਸ਼ਨ ਰਾਸ਼ੀ ਏਨੀ ਹੈ ਕਿ ਇੱਕ ਵਾਰੀ ਵਿਧਾਇਕ ਬਣਨ ਵਾਲੇ ਨੇਤਾ ਦੀ ਉਮਰ ਭਰ ਲਈ ਲਾਟਰੀ ਲੱਗ ਜਾਂਦੀ ਹੈ। ਸਿਰਫ਼ ਇੱਕ ਦਫ਼ਾ ਜੋ ਵਿਧਾਇਕ ਰਹੇ ਹਨ, ਉਨ੍ਹਾਂ ਨੂੰ ਬਤੌਰ ਸਾਬਕਾ ਵਿਧਾਇਕ ਹੁਣ ਸਭ ਭੱਤਿਆਂ ਸਮੇਤ 75,150 ਰੁਪਏ ਪੈਨਸ਼ਨ ਮਿਲਦੀ ਹੈ, ਜੋ ਬਾਕੀ ਸਹੂਲਤ, ਉਹ ਵੱਖ ਹਨ। ਸਰਕਾਰੀ ਵੇਰਵਿਆਂ ਅਨੁਸਾਰ ਸਾਬਕਾ ਮੁੱਖ ਮੰਤਰੀ ਬੀਬੀ ਰਜਿੰਦਰ ਕੌਰ ਭੱਠਲ ਨੂੰ ਬਤੌਰ ਸਾਬਕਾ ਵਿਧਾਇਕਾ ਇਸ ਵੇਲੇ 3.25 ਲੱਖ ਰੁਪਏ ਪ੍ਰਤੀ ਮਹੀਨਾ ਪੈਨਸ਼ਨ ਮਿਲਦੀ ਹੈ ਜਦੋਂ ਕਿ ਹੁਣ ਪਲੈਨਿੰਗ ਬੋਰਡ ਦੀ ਵਾਈਸ ਚੇਅਰਮੈਨ ਵਜੋਂ ਵੱਖਰੀ ਤਨਖ਼ਾਹ ਤੇ ਭੱਤੇ ਮਿਲਣਗੇ। ਬੀਬੀ ਭੱਠਲ ਛੇ ਵਾਰ ਵਿਧਾਇਕ ਬਣੇ ਹਨ।
                  ਮੰਡੀ ਬੋਰਡ ਦੇ ਚੇਅਰਮੈਨ ਲਾਲ ਸਿੰਘ ਵੀ ਛੇ ਵਾਰ ਵਿਧਾਇਕ ਰਹੇ ਹਨ ਅਤੇ ਉਨ੍ਹਾਂ ਨੂੰ ਵੀ ਸਵਾ ਤਿੰਨ ਲੱਖ ਰੁਪਏ ਪ੍ਰਤੀ ਮਹੀਨਾ ਪੈਨਸ਼ਨ ਮਿਲਦੀ ਹੈ। ਸਾਬਕਾ ਮੰਤਰੀ ਸਰਵਨ ਸਿੰਘ ਫਿਲੌਰ ਵੀ 3.25 ਲੱਖ ਰੁਪਏ ਪੈਨਸ਼ਨ ਲੈ ਰਹੇ ਹਨ ਜਦੋਂ ਕਿ ਬਲਵਿੰਦਰ ਸਿੰਘ ਭੂੰਦੜ ਪੰਜ ਵਾਰ ਵਿਧਾਇਕ ਰਹਿਣ ਕਰਕੇ ਇਸ ਵੇਲੇ 2.75 ਲੱਖ ਰੁਪਏ ਪ੍ਰਤੀ ਮਹੀਨਾ ਲੈ ਰਹੇ ਹਨ। ਰਾਜ ਸਭਾ ਮੈਂਬਰ ਸੁਖਦੇਵ ਸਿੰਘ ਢੀਂਡਸਾ ਪੰਜਾਬ ਦੇ ਖ਼ਜ਼ਾਨੇ ਚੋਂ 2.25 ਲੱਖ ਰੁਪਏ ਪੈਨਸ਼ਨ ਲੈ ਰਹੇ ਹਨ। ਭੂੰਦੜ ਤੇ ਢੀਂਡਸਾ ਨੂੰ ਬਤੌਰ ਰਾਜ ਸਭਾ ਮੈਂਬਰ ਵੱਖਰੀ ਤਨਖ਼ਾਹ ਤੇ ਭੱਤੇ ਮਿਲ ਰਹੇ ਹਨ। ਸਾਬਕਾ ਵਿਧਾਇਕ ਹਰੀ ਸਿੰਘ ਜ਼ੀਰਾ, ਗੁਲਜ਼ਾਰ ਸਿੰਘ ਰਣੀਕੇ ਅਤੇ ਰਣਜੀਤ ਸਿੰਘ ਬ੍ਰਹਮਪੁਰਾ ਵੀ ਪ੍ਰਤੀ ਮਹੀਨਾ 2.25 ਲੱਖ ਰੁਪਏ ਪੈਨਸ਼ਨ ਲੈ ਰਹੇ ਹਨ। ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਪ੍ਰਤਾਪ ਸਿੰਘ ਬਾਜਵਾ ਤਿੰਨ ਵਾਰ ਵਿਧਾਇਕ ਰਹੇ ਹਨ ਜਿਸ ਕਰਕੇ ਉਨ੍ਹਾਂ ਨੂੰ ਪ੍ਰਤੀ ਮਹੀਨਾ 1.75 ਲੱਖ ਰੁਪਏ ਪੈਨਸ਼ਨ ਮਿਲਦੀ ਹੈ ਜਦੋਂ ਕਿ ਐਮ.ਪੀ ਵਜੋਂ ਤਨਖ਼ਾਹ ਤੇ ਭੱਤੇ ਵੱਖਰੇ ਮਿਲਦੇ ਹਨ। ਜੋ ਵਿਧਾਇਕ ਇੱਕ ਵਾਰ ਐਮ.ਪੀ ਵੀ ਰਹਿ ਜਾਂਦੇ ਹਨ, ਉਨ੍ਹਾਂ ਨੂੰ ਡਬਲ ਗੱਫਾ ਮਿਲਦਾ ਹੈ।
                ਪੰਜਾਬ ਦੇ ਨੌ ਸਾਬਕਾ ਵਿਧਾਇਕ ਅਜਿਹੇ ਹਨ, ਜੋ ਲੋਕ ਸਭਾ ਅਤੇ ਰਾਜ ਸਭਾ ਤੋਂ ਵੀ ਪੈਨਸ਼ਨ ਲੈ ਰਹੇ ਹਨ ਤੇ ਸਾਬਕਾ ਵਿਧਾਇਕ ਵਾਲੀ ਪੈਨਸ਼ਨ ਵੀ ਲੈ ਰਹੇ ਹਨ। ਸਰਕਾਰੀ ਸੂਚਨਾ ਅਨੁਸਾਰ ਵਿਧਾਨ ਸਭਾ ਵੱਲੋਂ ਹਰ ਸਾਬਕਾ ਵਿਧਾਇਕ ਦੀ ਪੈਨਸ਼ਨ ਫਿਕਸ ਕੀਤੀ ਗਈ ਹੈ ਅਤੇ ਉਹ ਖ਼ਜ਼ਾਨੇ ਜਾਂ ਬੈਂਕ ਚੋਂ ਪ੍ਰਾਪਤ ਕਰਦੇ ਹਨ। ਪੰਜਾਬ ਰਾਜ ਵਿਧਾਨ ਮੰਡਲ ਮੈਂਬਰਜ਼ (ਪੈਨਸ਼ਨ ਅਤੇ ਡਾਕਟਰੀ ਸਹੂਲਤਾਂ ਵਿਨਿਯਮ) ਐਕਟ 1977 ਅਤੇ ਪੰਜਾਬ ਰਾਜ ਵਿਧਾਨ ਮੰਡਲ ਮੈਂਬਰਜ਼ (ਪੈਨਸ਼ਨ ਅਤੇ ਡਾਕਟਰੀ ਸਹੂਲਤਾਂ ਵਿਨਿਯਮ) ਨਿਯਮ, 1984 ਦੀ ਧਾਰਾ 3(1 ਅਧੀਨ ) ਪੈਨਸ਼ਨ ਨਿਸ਼ਚਿਤ ਕੀਤੀ ਜਾਂਦੀ ਹੈ। ਪੰਜਾਬ ਸਰਕਾਰ ਨੇ 26 ਅਕਤੂਬਰ 2016 ਨੂੰ ਪੈਨਸ਼ਨ ਵਿਚ ਵਾਧਾ ਕਰਕੇ ਹਰ ਸਾਬਕਾ ਵਿਧਾਇਕ ਨੂੰ ਪਹਿਲੀ ਟਰਮ ਲਈ 15 ਹਜ਼ਾਰ ਰੁਪਏ ਮੱੁਢਲੀ ਤਨਖ਼ਾਹ, 50 ਫ਼ੀਸਦੀ ਮਰਜ਼ੀ ਡੀ.ਏ ਅਤੇ 234 ਫ਼ੀਸਦੀ (ਮੌਜੂਦਾ) ਮਹਿੰਗਾਈ ਭੱਤੇ ਮੁਤਾਬਿਕ ਬਣਦੀ ਪੈਨਸ਼ਨ ਦਿੱਤੀ ਜਾ ਰਹੀ ਹੈ। ਇੱਕ ਤੋਂ ਜ਼ਿਆਦਾ ਦਫ਼ਾ ਵਿਧਾਇਕ ਬਣਨ ਵਾਲਿਆਂ ਨੂੰ ਪ੍ਰਤੀ ਟਰਮ 10 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਮੱੁਢਲੀ ਪੈਨਸ਼ਨ ਸਮੇਤ ਭੱਤੇ ਵੱਖਰੀ ਦਿੱਤੀ ਜਾਂਦੀ ਹੈ।
                  ਇਸ ਲਿਹਾਜ਼ ਨਾਲ ਦੋ ਵਾਰ ਵਿਧਾਇਕ ਬਣਨ ਵਾਲਾ ਵਿਅਕਤੀ ਸਵਾ ਲੱਖ ਰੁਪਏ ਅਤੇ ਤਿੰਨ ਵਾਰ ਵਿਧਾਇਕ ਬਣਨ ਵਾਲਾ ਪੌਣੇ ਦੋ ਲੱਖ ਰੁਪਏ ਪ੍ਰਤੀ ਮਹੀਨਾ ਪੈਨਸ਼ਨ ਦਾ ਹੱਕਦਾਰ ਬਣਦਾ ਹੈ। ਚਾਰ ਵਾਰ ਵਿਧਾਇਕ ਬਣਨ ਵਾਲਿਆਂ ਨੂੰ ਸਵਾ ਦੋ ਲੱਖ, ਪੰਜ ਵਾਰੀ ਦੇ ਸਾਬਕਾ ਵਿਧਾਇਕ ਨੂੰ ਪੌਣੇ ਤਿੰਨ ਲੱਖ, ਛੇ ਵਾਰੀ ਦੇ ਨੂੰ 3.25 ਲੱਖ , ਸੱਤ ਵਾਰੀ ਦੇ ਨੂੰ 3.75 ਲੱਖ, ਅੱਠ ਵਾਰੀ ਦੇ ਨੂੰ 4.25 ਲੱਖ ਅਤੇ ਨੌ ਵਾਰੀ ਵਿਧਾਇਕ ਬਣਨ ਵਾਲੇ ਨੇਤਾ ਨੂੰ 4.75 ਲੱਖ ਰੁਪਏ ਪੈਨਸ਼ਨ ਮਿਲਦੀ ਹੈ। ਜਦੋਂ ਕਿਤੇ ਪੈਨਸ਼ਨ ਵਿਚ ਵਾਧਾ ਹੋਵੇਗਾ ਤਾਂ ਇਹ ਪੈਨਸ਼ਨ ਹੋਰ ਛੜੱਪੇ ਮਾਰ ਕੇ ਵਧੇਗੀ। ਪੰਜਾਬ ਦੇ ਦਰਜਨਾਂ ਸਾਬਕਾ ਵਿਧਾਇਕ ਤਿੰਨ ਤਿੰਨ ਵਾਰੀ ਐਮ.ਐਲ.ਏ ਰਹੇ ਹਨ। ਦੋ ਦੋ ਵਾਰ ਵਿਧਾਇਕ ਰਹਿਣ ਵਾਲੇ ਨੇਤਾ ਤਾਂ ਕਾਫ਼ੀ ਗਿਣਤੀ ਵਿਚ ਹਨ। ਸਾਬਕਾ ਵਿਧਾਇਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਕ ਜੀਆਂ ਨੂੰ ਜੀਵਨ ਭਰ  ਲਈ ਸਿਹਤ ਸਹੂਲਤ ਦਿੱਤੀ ਜਾਂਦੀ ਹੈ ਜੋ ਅਣਲਿਮਟਿਡ ਹੈ। ਪੰਜਾਬ ਸਰਕਾਰ ਹਰ ਵਰੇ੍ਹ ਅੌਸਤਨ ਕਰੀਬ ਇੱਕ ਕਰੋੜ ਰੁਪਏ ਸਾਬਕਾ ਵਿਧਾਇਕਾਂ ਦੇ ਇਲਾਜ ਤੇ ਖ਼ਰਚ ਕਰਦੀ ਹੈ। ਸਾਬਕਾ ਵਿਧਾਇਕਾਂ ਦਾ ਤਰਕ ਹੈ ਕਿ ਉਹ ਨਿਯਮਾਂ ਅਨੁਸਾਰ ਹੀ ਪੈਨਸ਼ਨ ਲੈ ਰਹੇ ਹਨ ਅਤੇ ਸਿਆਸੀ ਜੀਵਨ ਵਿਚ ਨਿੱਤ ਦੇ ਖ਼ਰਚਿਆਂ ਦੇ ਸਾਹਮਣੇ ਇਹ ਪੈਨਸ਼ਨ ਵੱਡੀ ਨਹੀਂ ਹੈ।
                            ਬਾਦਲ ਨੂੰ ਮਿਲੇਗੀ 5.26 ਲੱਖ ਰੁਪਏ ਪੈਨਸ਼ਨ !
ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਭਵਿੱਖ ’ਚ ਜਦੋਂ ਵੀ ਸਿਆਸਤ ਤੋਂ ਸੇਵਾ ਮੁਕਤ ਹੋਏ ਤਾਂ ਉਨ੍ਹਾਂ ਦਾ ਸਿਆਸੀ ਸੰਨਿਆਸ ਖ਼ਜ਼ਾਨੇ ਨੂੰ ਸਭ ਤੋਂ ਮਹਿੰਗਾ ਪਵੇਗਾ। ਸਾਬਕਾ ਮੁੱਖ ਮੰਤਰੀ ਬਾਦਲ ਦਸ ਵਾਰੀ ਵਿਧਾਇਕ ਰਹੇ ਹਨ ਅਤੇ ਮੌਜੂਦਾ ਵਿਧਾਇਕ ਵੀ ਹਨ। ਸਿਆਸਤ ਤੋਂ ਸੇਵਾ ਮੁਕਤ ਹੋਣ ਦੀ ਸੂਰਤ ਵਿਚ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਪ੍ਰਤੀ ਮਹੀਨਾ 5.26 ਲੱਖ ਰੁਪਏ ਪੈਨਸ਼ਨ ਮਿਲੇਗੀ ਜੋ ਆਪਣੇ ਆਪ ਵਿਚ ਰਿਕਾਰਡ ਹੋਵੇਗੀ।
           




Tuesday, September 18, 2018

                          ਪੁਰਾਣਾ ਵਹੀ ਖਾਤਾ
       ਕਰੋੜਾਂ ਦੇ ਫ਼ੰਡਾਂ ਦਾ ਕੌਣ ਹਿਸਾਬ ਦੇਊ ?
                           ਚਰਨਜੀਤ ਭੁੱਲਰ
ਬਠਿੰਡਾ : ਗੱਠਜੋੜ ਸਰਕਾਰ ਦੌਰਾਨ ਪੰਜਾਬ ਵਿਧਾਨ ਸਭਾ ਦੇ ਸਪੀਕਰ ਤਰਫ਼ੋਂ ਅਖ਼ਤਿਆਰੀ ਕੋਟੇ ਚੋਂ ਵੰਡੇ ਗਏ ਕਰੀਬ 10 ਕਰੋੜ ਦੇ ਫ਼ੰਡਾਂ ਦਾ ਕੋਈ ਹਿਸਾਬ ਕਿਤਾਬ ਨਹੀਂ ਹੈ। ਉਦੋਂ ਦੇ ਸਪੀਕਰ ਡਾ.ਚਰਨਜੀਤ ਸਿੰਘ ਅਟਵਾਲ ਨੇ ਪੰਜ ਵਰ੍ਹਿਆਂ (2012-13 ਤੋਂ 2016-17) ਦੌਰਾਨ ਕਰੀਬ 10 ਕਰੋੜ ਰੁਪਏ ਦੇ ਫ਼ੰਡ ਵੰਡੇ ਸਨ ਜਿਨ੍ਹਾਂ ਦੇ ਖ਼ਰਚੇ ਜਾਣ ਦਾ ਕੋਈ ਥਹੁ ਪਤਾ ਨਹੀਂ ਲੱਗਾ ਹੈ। ਦਿਲਚਸਪ ਤੱਥ ਹਨ ਕਿ ਤਤਕਾਲੀ ਸਪੀਕਰ ਨੇ ਸਾਲ 2012-13 ਵਿਚ ਆਪਣੇ ਅਖ਼ਤਿਆਰੀ ਕੋਟੇ ਚੋਂ 2 ਕਰੋੜ ਦੇ ਫ਼ੰਡਾਂ ਦੀਆਂ 158 ਗਰਾਂਟਾਂ ਦੀ ਵੰਡ ਕੀਤੀ ਸੀ ਪ੍ਰੰਤੂ ਛੇ ਵਰ੍ਹਿਆਂ ਮਗਰੋਂ ਵੀ ਅੱਜ ਤੱਕ ਇਨ੍ਹਾਂ ਗਰਾਂਟਾਂ ਦਾ ‘ਵਰਤੋਂ ਸਰਟੀਫਿਕੇਟ’ ਵਿਧਾਨ ਸਭਾ ਕੋਲ ਨਹੀਂ ਪੁੱਜਾ ਹੈ। ਵਿਧਾਨ ਸਭਾ ਸਕੱਤਰੇਤ ਤੋਂ ਆਰਟੀਆਈ ’ਚ ਪ੍ਰਾਪਤ ਵੇਰਵਿਆਂ ਅਨੁਸਾਰ ਵਿਧਾਨ ਸਭਾ ਦੇ ਸਪੀਕਰ ਅਤੇ ਡਿਪਟੀ ਸਪੀਕਰ ਨੂੰ ਹਰ ਵਰੇ੍ਹ ਅਖ਼ਤਿਆਰੀ ਕੋਟੇ ਦੇ ਦੋ ਦੋ ਕਰੋੜ ਰੁਪਏ ਫ਼ੰਡ ਸਲਾਨਾ ਪ੍ਰਾਪਤ ਹੁੰਦੇ ਹਨ। ਸਪੀਕਰ ਨੂੰ ਪੰਜ ਵਰ੍ਹਿਆਂ ਦੌਰਾਨ ਅਖ਼ਤਿਆਰੀ ਕੋਟੇ ਦੇ 10 ਕਰੋੜ ਦੇ ਫ਼ੰਡ ਪ੍ਰਾਪਤ ਹੋਏ ਸਨ ਅਤੇ ਇਹ ਪੂਰੇ ਦੇ ਪੂਰੇ ਫ਼ੰਡ ਪੰਜ ਵਰ੍ਹਿਆਂ ਦੌਰਾਨ ਵੰਡੇ ਗਏ ਹਨ।
                ਦੱਸਣਯੋਗ ਹੈ ਕਿ ਵਿਧਾਨ ਸਭਾ ਦੇ ਇਸ ਸਮੇਂ ਦੌਰਾਨ 20 ਮਾਰਚ 2012 ਤੋਂ 27 ਮਾਰਚ 2017 ਤੱਕ ਸਪੀਕਰ ਡਾ.ਚਰਨਜੀਤ ਸਿੰਘ ਅਟਵਾਲ ਰਹੇ ਹਨ। ਉਨ੍ਹਾਂ ਨੇ ਅਖ਼ਤਿਆਰੀ ਕੋਟੇ ਦੇ ਫ਼ੰਡ ਤਾਂ ਵੰਡ ਦਿੱਤੇ ਪ੍ਰੰਤੂ ਇਨ੍ਹਾਂ ਫ਼ੰਡਾਂ ਨੂੰ ਖ਼ਰਚ ਕੀਤੇ ਜਾਣ ਦਾ ਸਰਕਾਰੀ ਤੌਰ ’ਤੇ ਕੋਈ ਇਲਮ ਨਹੀਂ ਹੈ। ਡਿਪਟੀ ਕਮਿਸ਼ਨਰਾਂ ਵੱਲੋਂ ਇਨ੍ਹਾਂ ਗਰਾਂਟਾਂ ਦੇ ਖ਼ਰਚ ਹੋਣ ਮਗਰੋਂ ‘ਵਰਤੋਂ ਸਰਟੀਫਿਕੇਟ’ ਪੰਜਾਬ ਵਿਧਾਨ ਸਭਾ ਨੂੰ ਭੇਜਣੇ ਹੁੰਦੇ ਹਨ। ਸਰਕਾਰੀ ਤੱਥਾਂ ਅਨੁਸਾਰ ਤਤਕਾਲੀ ਸਪੀਕਰ ਨੇ ਪੰਜ ਵਰ੍ਹਿਆਂ ਦੌਰਾਨ 10 ਕਰੋੜ ਰੁਪਏ ਦੀਆਂ 633 ਗਰਾਂਟਾਂ ਦੀ ਵੰਡ ਕੀਤੀ ਜਿਨ੍ਹਾਂ ਚੋਂ ਸਿਰਫ਼ 12 ਗਰਾਂਟਾਂ ਦੇ ‘ਵਰਤੋਂ ਸਰਟੀਫਿਕੇਟ’ ਹੁਣ ਤੱਕ ਵਿਧਾਨ ਸਭਾ ਨੂੰ ਪ੍ਰਾਪਤ ਹੋਏ ਹਨ ਜਦੋਂ ਕਿ ਬਾਕੀ 621 ਗਰਾਂਟਾਂ ਦਾ ਸਰਕਾਰੀ ਤੌਰ ’ਤੇ ਵਿਧਾਨ ਸਭਾ ਨੂੰ ਕੋਈ ਪਤਾ ਨਹੀਂ ਹੈ। ਉਦੋਂ ਦੇ ਸਪੀਕਰ ਨੇ ਸਾਲ 2013-14 ’ਚ 127 ਗਰਾਂਟਾਂ ਵੰਡੀਆਂ ਜਿਨ੍ਹਾਂ ਚੋਂ ਸਿਰਫ਼ 10 ਗਰਾਂਟਾਂ ਦੇ ਵਰਤੋਂ ਸਰਟੀਫਿਕੇਟ ਪ੍ਰਾਪਤ ਹੋਏ ਹਨ। ਸਾਲ 2014-15 ’ਚ ਵੰਡੀਆਂ 120 ਗਰਾਂਟਾਂ ਚੋਂ ਸਿਰਫ਼ ਇੱਕ ਗਰਾਂਟ ਦਾ ਵਰਤੋਂ ਸਰਟੀਫਿਕੇਟ ਹਾਸਲ ਹੋਇਆ ਹੈ।
                 ਇਵੇਂ ਸਾਲ 2015-16 ’ਚ ਵੰਡੀਆਂ 91 ਗਰਾਂਟਾਂ ਚੋਂ ਵੀ ਸਿਰਫ਼ ਇੱਕ ਗਰਾਂਟ ਦਾ ਯੂ.ਸੀ ਮਿਲਿਆ ਹੈ। ਆਖ਼ਰੀ ਵਰੇ੍ਹ ’ਚ ਵੰਡੀਆਂ 136 ਗਰਾਂਟਾਂ ਦਾ ਯੂ.ਸੀ ਵੀ ਬਕਾਇਆ ਪਏ ਹਨ। ਡਿਪਟੀ ਕਮਿਸ਼ਨਰਾਂ ਨੂੰ ਫ਼ੌਰੀ ਇਨ੍ਹਾਂ ਫ਼ੰਡਾਂ ਦੀ ਘੋਖ ਕਰਨੀ ਬਣਦੀ ਹੈ ਅਤੇ ਇਨ੍ਹਾਂ ਦੀ ਵਰਤੋਂ ਸਰਟੀਫਿਕੇਟ ਹਾਸਲ ਕਰਨੇ ਬਣਦੇ ਹਨ। ਸੂਤਰ ਇਨ੍ਹਾਂ ਫ਼ੰਡਾਂ ਤੇ ਹੁਣ ਉਂਗਲ ਉਠਾਉਣ ਲੱਗੇ ਹਨ। ਚਰਚੇ ਹਨ ਕਿ ਕਿਤੇ ਇਹ ਸਰਕਾਰੀ ਫ਼ੰਡ ਖੂਹ ਖਾਤੇ ਤਾਂ ਨਹੀਂ ਪੈ ਗਏ ਹਨ। ਗੱਠਜੋੜ ਸਰਕਾਰ ਸਮੇਂ ਦੇ ਡਿਪਟੀ ਸਪੀਕਰ ਵੱਲੋਂ ਵੀ ਪੰਜ ਵਰ੍ਹਿਆਂ ਦੌਰਾਨ 10 ਕਰੋੜ ਦੇ ਫ਼ੰਡਾਂ ਦੀਆਂ 1705 ਗਰਾਂਟਾਂ ਵੰਡੀਆਂ ਗਈਆਂ ਸਨ ਜਿਨ੍ਹਾਂ ਚੋਂ 741 ਗਰਾਂਟਾਂ ਦਾ ਕੋਈ ਥਹੁ ਪਤਾ ਨਹੀਂ ਹੈ। ਪੰਜਾਬ ਸਰਕਾਰ ਨੇ ਹੁਣ ਸਪੀਕਰ ਦਾ ਅਖ਼ਤਿਆਰੀ ਕੋਟਾ ਵਧਾ ਕੇ ਤਿੰਨ ਕਰੋੜ ਰੁਪਏ ਸਲਾਨਾ ਕਰ ਦਿੱਤਾ ਹੈ। ਮੌਜੂਦਾ ਸਪੀਕਰ ਨੇ ਸਾਲ 2017-18 ਦੌਰਾਨ 161 ਗਰਾਂਟਾਂ ਅਤੇ ਡਿਪਟੀ ਸਪੀਕਰ ਨੇ 110 ਗਰਾਂਟਾਂ ਵੰਡੀਆਂ ਹਨ। ਉਨ੍ਹਾਂ ਦੇ ਯੂ.ਸੀ ਵੀ ਪੈਂਡਿੰਗ ਹਨ।
                ਲਗਾਤਾਰ ਪੱਤਰ ਲਿਖ ਰਹੇ ਹਾਂ : ਮਿਸ਼ਰਾ
ਵਿਧਾਨ ਸਭਾ ਪੰਜਾਬ ਦੀ ਸਕੱਤਰ ਸ਼ਸ਼ੀ ਲਖਨਪਾਲ ਮਿਸ਼ਰਾ ਦਾ ਕਹਿਣਾ ਸੀ ਕਿ ਡਿਪਟੀ ਕਮਿਸ਼ਨਰਾਂ ਤਰਫ਼ੋਂ ਅਖ਼ਤਿਆਰੀ ਫ਼ੰਡਾਂ ਦੇ ਯੂ.ਸੀ ਨਹੀਂ ਭੇਜੇ ਜਾ ਰਹੇ ਹਨ ਜਿਸ ਕਰਕੇ ਉਹ ਸਮੇਂ ਸਮੇਂ ਤੇ ਡਿਪਟੀ ਕਮਿਸ਼ਨਰ ਨੂੰ ਪੱਤਰ ਲਿਖਦੇ ਆ ਰਹੇ ਹਨ। ਆਡਿਟ ਇਤਰਾਜ਼ ਵੀ ‘ਵਰਤੋਂ ਸਰਟੀਫਿਕੇਟ’ ਨਾ ਮਿਲਣ ਕਰਕੇ ਉੱਠਦੇ ਹਨ ਪ੍ਰੰਤੂ ਉਨ੍ਹਾਂ ਕੋਲ ਪੱਤਰ ਲਿਖਣ ਤੋਂ ਸਿਵਾਏ ਕੋਈ ਚਾਰਾ ਨਹੀਂ ਹੈ। ਦੂਸਰੀ ਤਰਫ਼ ਡਾ.ਅਟਵਾਲ ਨੂੰ ਵਾਰ ਵਾਰ ਫ਼ੋਨ ਕੀਤੇ ਪ੍ਰੰਤੂ ਉਨ੍ਹਾਂ ਫ਼ੋਨ ਨਹੀਂ ਚੁੱਕਿਆ।
                           ‘ਵਰਤੋਂ ਸਰਟੀਫਿਕੇਟ’ ਪ੍ਰਸ਼ਾਸਨ ਨੇ ਦੇਣੇ ਸਨ : ਅਟਵਾਲ
ਤਤਕਾਲੀ ਸਪੀਕਰ ਡਾ.ਚਰਨਜੀਤ ਅਟਵਾਲ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਅਖਤਿਆਰੀ ਕੋਟੇ ਤਹਿਤ ਗਰਾਂਟਾਂ ਦੇ ਚੈੱਕ ਵੰਡੇ ਸਨ ਅਤੇ ਜਿਨ੍ਹਾਂ ਦੇ ‘ਵਰਤੋਂ ਸਰਟੀਫਿਕੇਟ’ ਦੇਣ ਦੀ ਜਿੰਮੇਵਾਰੀ ਪ੍ਰਸ਼ਾਸਨ ਦੀ ਸੀ ਜਿਸ ’ਚ ਉਨ੍ਹਾਂ ਦਾ ਕੋਈ ਵੀ ਰੋਲ ਨਹੀਂ ਹੈ। ਉਨ੍ਹਾਂ ਨੇ ਨਿਯਮਾਂ ਅਨੁਸਾਰ ਸਭ ਗਰਾਂਟਾਂ ਸਹੀ ਵੰਡ ਕੀਤੀ ਜਿਸ ਵਿਚ ਕੁਝ ਵੀ ਗਲਤ ਨਹੀਂ। ਮੇਰੇ ਤੋਂ ਪਹਿਲੇ ਸਪੀਕਰਾਂ ਦੇ ਯੂ.ਸੀ ਪੈਂਡਿੰਗ ਹੋਣਗੇ ਅਤੇ ਸਪੀਕਰ ਦਾ ਯੂ.ਸੀ ਦੇੇਣ ’ਚ ਕੋਈ ਰੋਲ ਨਹੀਂ ਹੁੰਦਾ ਹੈ।




Sunday, September 16, 2018

                     ਜੰਗਲ ’ਚ ਮੰਗਲ 
 ਪੰਜ ਨੌਜਵਾਨਾਂ ਨੇ ਬਦਲ ਦਿੱਤਾ ਮੁਹਾਂਦਰਾ
                       ਚਰਨਜੀਤ ਭੁੱਲਰ
ਬਠਿੰਡਾ : ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਸੁੱਖਾ ਸਿੰਘ ਵਾਲਾ ਦੇ ਪੰਜ ਨੌਜਵਾਨਾਂ ਨੇ ਸੱਚਮੁੱਚ ਜੰਗਲ ’ਚ ਮੰਗਲ ਲਾ ਦਿੱਤਾ ਹੈ। ਜਦੋਂ ਇਨ੍ਹਾਂ ਨੌਜਵਾਨਾਂ ਦੇ ਮਨਾਂ ’ਚ ਉਬਾਲ ਉੱਠਿਆਂ ਤਾਂ ਉਹ ਪੰਜ ਉਂਗਲਾਂ ਨਹੀਂ, ਇੱਕ ਪੰਜਾ ਬਣ ਕੇ ਪਿੰਡ ’ਚ ਤੁਰੇ। ਦੇਖਦੇ ਦੇਖਦੇ ਤਿੰਨ ਵਰ੍ਹਿਆਂ ’ਚ ਪੂਰੇ ਪਿੰਡ ਦਾ ਮੁਹਾਂਦਰਾ ਬਦਲ ਦਿੱਤਾ। ‘ਸਵੱਛ ਭਾਰਤ’ ਦੇਖਣਾ ਹੋਵੇ ਤਾਂ ਇਸ ਪਿੰਡ ਚੋਂ ਝਲਕਦਾ ਹੈ। ਪਹਿਲਾਂ ਲੱਤਾਂ ਖਿੱਚਣ ਵਾਲੇ ਜਵਾਨਾਂ ਦੇ ਦੁਆਲੇ ਹੋਏ। ਪਿੰਡ ਦਾ ਨਕਸ਼ਾ ਬਦਲਿਆ ਦਿੱਖਿਆ ਤਾਂ ਸਭ ਸੰਗੀ ਸਾਥੀ ਬਣ ਗਏ। ਪਛੜੀ ਬੈਲਟ ’ਚ ਪੈਂਦਾ ਇਹ ਪਿੰਡ ਹੁਣ ਮਹਿਕਾਂ ਛੱਡਣ ਲੱਗਾ ਹੈ। ਨੌਜਵਾਨ ਪਾਲ ਸਿੰਘ ਸਿੱਧੂ ਨੇ ਪਹਿਲਾਂ ਸਰਕਾਰੀ ਨੌਕਰੀ ਛੱਡ ਦਿੱਤੀ। ਇੱਕੋ ਸੁਪਨਾ ਦੇਖਿਆ ਕਿ ਪਿੰਡ ਚੋਂ ਖ਼ੁਸ਼ਬੋ ਹੀ ਖ਼ੁਸ਼ਬੋ ਉੱਠੇ। ਵੇਰਵਿਆਂ ਅਨੁਸਾਰ ਪਿੰਡ ਸੁੱਖਾ ਸਿੰਘ ਵਾਲਾ ’ਚ ਕਰੀਬ 150 ਘਰ ਹਨ। ਪਹਿਲਾਂ ਨੌਜਵਾਨ ਪਾਲ ਸਿੰਘ ਸਿੱਧੂ ਪਿੰਡ ਚੋਂ ਗੰਦ ਦਾ ਢੇਰ ਕੱਢਣ ਲਈ ਕੁੱਦਿਆ। ਉਸ ਨੇ ਆਪਣੀ ਮਾਂ ਸੁਰਜੀਤ ਕੌਰ ਅਤੇ ਬਾਪ ਕਰਮ ਸਿੰਘ ਦੀ ਯਾਦ ਵਿਚ ਪਿੰਡ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ ਵਿਚ ਇੱਕ ਹਰਾ ਭਰਾ ਪਾਰਕ ਬਣਾਇਆ, ਪੂਰੇ ਸਕੂਲ ਕੈਂਪਸ ਨੂੰ ਘਾਹ ਨਾਲ ਲੱਦ ਦਿੱਤਾ। ਉਸ ਮਗਰੋਂ ਪਿੰਡ ਦਾ ਗੁਰਸੇਵਕ ਸਿੰਘ ,ਹਰਦੀਪ ਸਿੰਘ,ਅੰਮ੍ਰਿਤਪਾਲ ਸਿੰਘ ਅਤੇ ਅਵਤਾਰ ਸਿੰਘ ਪੱਪੂ ਉਸ ਨਾਲ ਜੁੜ ਗਏ। ਪੰਜਾ ਬਣਨ ਦੀ ਦੇਰ ਸੀ ਕਿ ਉੱਡਦੀ ਧੂੜ ਬੈਠ ਗਈ।
                   ਇਨ੍ਹਾਂ ਨੌਜਵਾਨਾਂ ਨੇ ਪੂਰੇ ਪਿੰਡ ’ਚ ਹਰ ਘਰ ਨੂੰ ਇੱਕੋ ਜੇਹਾ ਸਫ਼ੈਦ ਰੰਗ ਕੀਤਾ ਹੈ। ਉਸ ਤੋਂ ਪਹਿਲਾਂ ਖ਼ੁਦ ਨੌਜਵਾਨਾਂ ਨੇ ਕੰਧਾਂ ਨੂੰ ਪਲੱਸਤਰ ਵਗ਼ੈਰਾ ਕਰਾਇਆ। ਲੋਕਾਂ ਨੇ ਸਿਫ਼ਤ ਕਰਨੀ ਸ਼ੁਰੂ ਕੀਤੀ ਅਤੇ ਮਾਲੀ ਇਮਦਾਦ ਲਈ ਹੱਥ ਖ਼ੋਲ ਦਿੱਤਾ। ਹੁਣ ਤੱਕ ਕਰੀਬ ਛੇ ਲੱਖ ਖ਼ਰਚੇ ਜਾ ਚੁੱਕੇ ਹਨ। ਨੌਜਵਾਨਾਂ ਨੇ ਪੂਰੇ ਪਿੰਡ ’ਚ ਹਰ ਗਲੀ ਵਿਚ ਸਜਾਵਟੀ ਅਤੇ ਛਾਂਦਾਰ ਦਰਖ਼ਤ ਲਾ ਦਿੱਤੇ ਹਨ। ਚਾਰ ਚੁਫੇਰੇ ਹੁਣ ਫ਼ੁਲ ਮਹਿਕਣ ਲੱਗੇ ਹਨ। ਤਿਤਲੀਆਂ ਤੇ ਭੰਵਰਿਆਂ ਪਿੱਛੇ ਹੁਣ ਛੋਟੇ ਛੋਟੇ ਬੱਚੇ ਦੌੜਨ ਲੱਗੇ ਹਨ। ਜੇ.ਸੀ.ਬੀ ਮਸ਼ੀਨਾਂ ਨਾਲ ਪੂਰੇ ਪਿੰਡ ਦਾ ਗੰਦ ਹੂੰਝ ਕੇ ਕੂੜਾਦਾਨ ਰੱਖ ਦਿੱਤੇ ਗਏ ਹਨ। ਪਿੰਡ ਨੂੰ ਆਉਣ ਵਾਲੀ ਮੁੱਖ ਲਿੰਕ ਸੜਕ ਜੋ ਕਰੀਬ ਡੇਢ ਕਿੱਲੋਮੀਟਰ ਹੈ, ਉਸ ਉੱਪਰ ਦਰਖ਼ਤ ਹੀ ਦਰਖ਼ਤ ਲਾ ਦਿੱਤੇ ਹਨ ਜਿਨ੍ਹਾਂ ਦੀ ਇੱਕ ਦਰੱਖਤੀ ਕੰਧ ਬਣਾਉਣ ਦਾ ਸੁਪਨਾ ਹੈ। ਸਜਾਵਟੀ ਗੇਟ ਬਣਾ ਦਿੱਤੇ ਹਨ। ਪਿੰਡ ਦੇ ਬਦਬੂ ਮਾਰਦੇ ਛੱਪੜ ਨੂੰ ਵੀ ਇਨ੍ਹਾਂ ਨੌਜਵਾਨਾਂ ਨੇ ਹੱਥ ਪਾਇਆ। ਉਸ ਦਾ ਪਾਣੀ ਬਦਲ ਕੇ ਚਾਰੇ ਪਾਸੇ ਕੰਧਾਂ ਕੱਢ ਦਿੱਤੀਆਂ ਅਤੇ ਇੱਕ ਕਿਸ਼ਤੀ ਛੱਡ ਦਿੱਤੀ ਹੈ। ਸ਼ਾਮ ਵਕਤ ਇੱਕ ਘੰਟਾ ਕੋਈ ਵੀ ਮੁਫ਼ਤ ਬੋਟਿੰਗ ਕਰ ਸਕਦਾ ਹੈ।  ਨੌਜਵਾਨ ਹਰਦੀਪ ਸਿੰਘ ਨੇ ਦੱਸਿਆ ਕਿ ਛੱਪੜ ’ਤੇ ਸ਼ਾਮ ਨੂੰ ਮੇਲਾ ਭਰ ਜਾਂਦਾ ਹੈ। 27 ਹਜ਼ਾਰ ਰੁਪਏ ਨਾਲ ਇਨ੍ਹਾਂ ਨੌਜਵਾਨਾਂ ਨੇ ਛੱਪੜ ਵਿਚ ਮੱਛੀਆਂ ਛੱਡ ਦਿੱਤੀਆਂ ਹਨ ਜਿਨ੍ਹਾਂ ਤੋਂ ਹੋਣ ਵਾਲੀ ਕਮਾਈ ਪਿੰਡ ਤੇ ਲਾਈ ਜਾਵੇਗੀ।
                 ਨੌਜਵਾਨ ਅੰਮ੍ਰਿਤਪਾਲ ਸਿੰਘ ਨੇ ਦੱਸਿਆ ਕਿ ਹਰ ਦਸ ਦਿਨਾਂ ਮਗਰੋਂ ਦੇਰ ਸ਼ਾਮ ਉਹ ਪਾਣੀ ਦੇ ਟੈਂਕਰ ਭਰ ਕੇ ਪੂਰੇ ਪਿੰਡ ਨੂੰ ਧੋਂਦੇ ਹਨ ਅਤੇ ਸਫ਼ਾਈ ਕਰਦੇ ਹਨ। ਲੋਕਾਂ ਵਿਚ ਏਨੀ ਸੋਝੀ ਆ ਗਈ ਹੈ ਕਿ ਉਹ ਗੰਨਾ ਚੂਪ ਕੇ ਹੁਣ ਛਿਲਕਾ ਗਲੀ ਵਿਚ ਨਹੀਂ ਸੁੱਟਦੇ। ਉਂਜ, ਨੌਜਵਾਨਾਂ ਨੇ ਗੰਦ ਸੁੱਟਣ ਤੋਂ ਰੋਕਣ ਲਈ ਦੋ ਹਜ਼ਾਰ ਰੁਪਏ ਜੁਰਮਾਨਾ ਵੀ ਰੱਖਿਆ ਹੈ। ਗੁਰਸੇਵਕ ਸਿੰਘ ਨੇ ਦੱਸਿਆ ਕਿ ਚਾਰ ਚੁਫੇਰੇ ਹਰਿਆਲੀ ਅਤੇ ਫੁੱਲਾਂ ਦਾ ਏਨਾ ਅਸਰ ਹੋਇਆ ਹੈ ਕਿ ਪਿੰਡ ਦੇ ਲੋਕ ਤਣਾਓ ਮੁਕਤ ਹੋ ਗਏ ਹਨ ਤੇ ਸਭਨਾਂ ਦੇ ਚਿਹਰੇ ਹੁਣ ਫੁੱਲਾਂ ਵਾਂਗ ਖਿੜੇ ਦਿੱਸਦੇ ਹਨ। ਪਾਲ ਸਿੰਘ ਸਿੱਧੂ ਨੇ ਦੱਸਿਆ ਕਿ ਪਿੰਡ ਦੀ ਨੌਜਵਾਨ ਪੀੜੀ ਹੁਣ ਚੰਗੇ ਰਾਹ ਪੈ ਗਈ ਹੈ। ਤੱਤੇ ਸੁਭਾਅ ਵਾਲੇ ਵੀ ਹੁਣ ਮਿੱਠਤ ਨਾਲ ਗੱਲ ਕਰਨ ਲੱਗੇ ਹਨ। ਹੁਣ ਸਭ ਸਹਿਯੋਗ ਦੇ ਰਹੇ ਹਨ। ਨੌਜਵਾਨਾਂ ਦੇ ਉੱਦਮ ਅਤੇ ਹਰਿਆਲੀ ਨੇ ਪਿੰਡ ਨੂੰ ਖੇੜਾ ਬਖ਼ਸ਼ ਦਿੱਤਾ ਹੈ। ਇਨ੍ਹਾਂ ਜਵਾਨਾਂ ਨੇ ਪਿੰਡ ਵਿਚ ਮਿਰਚਾਂ ਲਾਈਆਂ ਹਨ ਜੋ ਬੇਜ਼ਮੀਨੇ ਲੋਕਾਂ ਨੂੰ ਮੁਫ਼ਤ ਤੋੜਨ ਦੀ ਸੁਵਿਧਾ ਦਿੱਤੀ ਹੈ। 50 ਹਜ਼ਾਰ ਦੀ ਲਾਗਤ ਨਾਲ ਇੱਕ ਫਾਗਿੰਗ ਮਸ਼ੀਨ ਖ਼ਰੀਦੀ ਗਈ ਹੈ ਅਤੇ ਹਰ ਹਫ਼ਤੇ ਪੂਰੇ ਪਿੰਡ ’ਚ ਮੱਛਰਾਂ ਤੋਂ ਬਚਾਓ ਲਈ ਫਾਗਿੰਗ ਕੀਤੀ ਜਾਂਦੀ ਹੈ।
                  ਪੱਥਰ ਦੇ ਮੇਜ਼ ਕੁਰਸੀਆਂ ਵੀ ਪਿੰਡ ਦੀ ਸੋਭਾ ਵਧਾ ਰਹੇ ਹਨ। ਨਹਿਰੂ ਯੁਵਾ ਕੇਂਦਰ ਬਠਿੰਡਾ ਦੇ ਕੋਆਰਡੀਨੇਟਰ ਜਗਜੀਤ ਸਿੰਘ ਮਾਨ ਦਾ ਕਹਿਣਾ ਸੀ ਕਿ ਨੌਜਵਾਨਾਂ ਨੇ ਆਪਣੀ ਤਾਕਤ ਦਾ ਲੋਹਾ ਮਨਵਾਇਆ ਹੈ। ਅਵਤਾਰ ਸਿੰਘ ਪੱਪੂ ਜੋ ਕਿੱਤੇ ਵਜੋਂ ਪਲੰਬਰ ਹੈ, ਨੇ ਵੱਧ ਚੜ ਕੇ ਕੰਮ ਕੀਤਾ ਹੈ। ਉਸ ਦਾ ਕਹਿਣਾ ਹੈ ਕਿ ਲੋਕਾਂ ਦੇ ਸੁਭਾਅ ਬਦਲੇ ਹਨ  ਅਤੇ ਹੁਣ ਕਿਸੇ ਦੇ ਮੱਥੇ ਤੇ ਝੁਰੜੀ ਨਹੀਂ ਪੈਂਦੀ। ਕਿਧਰੋਂ ਵੀ ਇਨ੍ਹਾਂ ਨੌਜਵਾਨਾਂ ਨੇ ਸਰਕਾਰੀ ਮਦਦ ਨਹੀਂ ਲਈ ਹੈ। ਅੰਮ੍ਰਿਤਪਾਲ ਨੇ ਦਾਅਵੇ ਨਾ ਆਖਿਆ ਕਿ ਪਿੰਡ ਵਿਚ ਕਿਤੇ ਵੀ ਗੋਬਰ ਨਹੀਂ ਦਿੱਖੇਗਾ। ਪਿੰਡ ਵਿਚ ਦੋ ਨਰਸਰੀਆਂ ਹਨ ਅਤੇ ਹੁਣ ਇਸ ਪਿੰਡ ਚੋਂ ਨਸ਼ਿਆਂ ਦੀ ਬੋਅ ਨਹੀਂ, ਫੁੱਲਾਂ ਦੀ ਖ਼ੁਸ਼ਬੋ ਉੱਠ ਰਹੀ ਹੈ। ਪਿੰਡ ’ਚ ਨਾ ਸ਼ਰਾਬ ਦਾ ਠੇਕਾ ਹੈ ਅਤੇ ਨਾ ਹੀ 10 ਸਾਲ ਤੋਂ ਕਦੇ ਤੰਬਾਕੂ ਵਿਕਿਆ ਹੈ। ਇੱਕ ਜੇ.ਈ ਨੇ ਪਿੰਡ ਦੇਖ ਕੇ 5100 ਰੁਪਏ ਦਾ ਇਨਾਮ ਦੇ ਦਿੱਤਾ। ਕਿਸੇ ਸਰਕਾਰੀ ਦਰਬਾਰ ਦੇ ਪਿੰਡ ਨਜ਼ਰ ਨਹੀਂ ਪਿਆ ਹੈ।



Saturday, September 15, 2018

                       ਬੇਅਦਬੀ ਮਾਮਲਾ 
   ਮੋਦੀ ਡੇਰਾ ਸਿਰਸਾ ’ਤੇ ‘ਮਿਹਰਬਾਨ’
                        ਚਰਨਜੀਤ ਭੁੱਲਰ
ਬਠਿੰਡਾ : ਕੇਂਦਰ ਦੀ ਭਾਜਪਾ ਸਰਕਾਰ ਹੁਣ ਆਗਾਮੀ ਚੋਣਾਂ ਦੀ ਨਜ਼ਰ ਤੋਂ ਡੇਰਾ ਸਿਰਸਾ ’ਤੇ ਮਿਹਰ ਦੀ ਨਜ਼ਰ ਰੱਖਣ ਲੱਗੀ ਹੈ। ਸੀ.ਬੀ.ਆਈ ਦਾ ਬੇਅਦਬੀ ਮਾਮਲੇ ’ਚ ਡੇਰਾ ਪੈਰੋਕਾਰਾਂ ਪ੍ਰਤੀ ਨਰਮ ਗੋਸ਼ਾ ਸਿਆਸੀ ਇਸ਼ਾਰੇ ਦੀ ਸ਼ਾਹਦੀ ਭਰਦਾ ਹੈ। ਬੇਅਦਬੀ ਮਾਮਲੇ ’ਚ ਡੇਰਾ ਸਿਰਸਾ ਦੇ ਤਿੰਨ ਪੈਰੋਕਾਰਾਂ ਦੀ ਜ਼ਮਾਨਤ ਹੋ ਜਾਣ ਤੋਂ ਸਾਫ਼ ਹੈ ਕਿ ਕੇਂਦਰ ਸਰਕਾਰ ਆਗਾਮੀ ਚੋਣਾਂ ਕਰਕੇ ਡੇਰਾ ਸਿਰਸਾ ’ਤੇ ਨਰਮ ਪੈ ਗਈ ਪਈ ਹੈ। ਡੇਰਾ ਮੁਖੀ ਦੇ ਜੇਲ੍ਹ ਜਾਣ ਮਗਰੋਂ ਡੇਰਾ ਪੈਰੋਕਾਰਾਂ ਦਾ ਵੱਡਾ ਰੋਸਾ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਪ੍ਰਤੀ ਹੈ। ਮੋਦੀ ਸਰਕਾਰ ਵੱਲੋਂ ਹੁਣ ਰੁਖ਼ ’ਚ ਕੀਤੀ ਤਬਦੀਲੀ ਦੇ ਚੋਗੇ ਨੂੰ ਡੇਰਾ ਕਿੰਨਾ ਕੁ ਚੁਗੇਗਾ, ਇਹ ‘ਮਿਸ਼ਨ 2019’ ’ਚ ਸਾਫ਼ ਹੋਵੇਗਾ। ਵੇਰਵਿਆਂ ਅਨੁਸਾਰ ਰਾਜਸਥਾਨ ਚੋਣਾਂ ਸਿਰ ’ਤੇ ਹਨ ਅਤੇ ਡੇਰਾ ਸਿਰਸਾ ਦੇ ਰਾਜਸਥਾਨ ਦੇ ਦਰਜਨਾਂ ਅਸੈਂਬਲੀ ਹਲਕਿਆਂ ਡੇਰਾ ਪੈਰੋਕਾਰ ਹਨ। ਅਹਿਮ ਸੂਤਰ ਦੱਸਦੇ ਹਨ ਕਿ ਰਾਜਸਥਾਨ ਸਰਕਾਰ ਨੇ ਵੀ ਭਾਜਪਾ ਹਾਈਕਮਾਨ ਨੂੰ ਆਗਾਮੀ ਚੋਣਾਂ ਦੇ ਮੱਦੇਨਜ਼ਰ ਡੇਰਾ ਸਿਰਸਾ ਦੇ ਸਿਆਸੀ ਵਜ਼ਨ ਤੋਂ ਜਾਣੂ ਕਰਾਇਆ ਹੈ। ਜਦੋਂ ਕਿ ਇਸ ਵੇਲੇ ਪੰਜਾਬ ਵਿਚ ਬੇਅਦਬੀ ਦਾ ਮਾਮਲਾ ਪੂਰੀ ਤਰ੍ਹਾਂ ਭਖਿਆ ਹੋਇਆ ਹੈ, ਠੀਕ ਉਸ ਵੇਲੇ ਕੇਂਦਰ ਸਰਕਾਰ ਡੇਰਾ ਸਿਰਸਾ ਨਾਲ ਮੁੜ ਸਿਆਸੀ ਤਾਲਮੇਲ ਬਿਠਾ ਰਹੀ ਹੈ ਤਾਂ ਜੋ ਮੌਕੇ ਦਾ ਲਾਹਾ ਲਿਆ ਜਾ ਸਕੇ।
                ਪੰਜਾਬ ਪੁਲੀਸ ਦੀ ਵਿਸ਼ੇਸ਼ ਜਾਂਚ ਟੀਮ (ਸਿੱਟ) ਤਰਫ਼ੋਂ ਬੇਅਦਬੀ ਮਾਮਲੇ ਦੀ ‘ਗੁਪਤ ਰਿਪੋਰਟ’ ਸੀ.ਬੀ.ਆਈ ਨੂੰ ਸੌਂਪ ਦਿੱਤੀ ਗਈ ਸੀ। ਸਿੱਟ ਨੇ 11 ਜੂਨ ਨੂੰ ਫੜੇ 10 ਡੇਰਾ ਪੈਰੋਕਾਰਾਂ ਨੂੰ ਮੋਗਾ ਅਦਾਲਤ ਵਿਚ ਪੇਸ਼ ਕਰ ਦਿੱਤਾ ਸੀ। ਸੀ.ਬੀ.ਆਈ ਨੇ ਫ਼ਰੀਦਕੋਟ ਜੇਲ੍ਹ ਵਿਚ ਬੰਦ 10 ਡੇਰਾ ਪੈਰੋਕਾਰਾਂ ਚੋਂ ਮੁੱਖ ਹਰਮਿੰਦਰ ਬਿੱਟੂ, ਸੁਖਜਿੰਦਰ ਸੰਨ੍ਹੀ ਅਤੇ ਸ਼ਕਤੀ ਸਿੰਘ ਦੀ 6 ਜੁਲਾਈ ਨੂੰ ਗ੍ਰਿਫ਼ਤਾਰੀ ਪਾਈ ਅਤੇ ਪੁੱਛਗਿੱਛ ਕੀਤੀ। ਹੁਣ ਇਹ ਤਿੰਨੋਂ ਪੈਰੋਕਾਰ ਨਾਭਾ ਜੇਲ੍ਹ ਵਿਚ ਬੰਦ ਹਨ। ਤਫ਼ਤੀਸ਼ੀ ਮਾਹਿਰਾਂ ਨੇ ਦੱਸਿਆ ਕਿ ਸੀਬੀਆਈ ਤਰਫ਼ੋਂ 6 ਸਤੰਬਰ ਤੱਕ ਫੜੇ ਪੈਰੋਕਾਰਾਂ ਦਾ ਅਦਾਲਤ ਵਿਚ ਚਲਾਨ ਪੇਸ਼ ਕੀਤਾ ਜਾਣਾ ਸੀ ਜੋ ਕਿ ਸਮੇਂ ਸਿਰ ਨਹੀਂ ਕੀਤਾ ਗਿਆ ਜਿਸ ਦਾ ਕਾਨੂੰਨੀ ਤੌਰ ਤੇ ਡੇਰਾ ਪੈਰੋਕਾਰਾਂ ਨੂੰ ਫ਼ਾਇਦਾ ਮਿਲ ਗਿਆ ਅਤੇ ਉਨ੍ਹਾਂ ਦੀਆਂ ਜ਼ਮਾਨਤਾਂ ਅਦਾਲਤ ਨੇ ਮਨਜ਼ੂਰ ਕਰ ਦਿੱਤੀਆਂ। ਪੰਜਾਬ ਪੁਲੀਸ ਦੀ ਸਿੱਟ ਟੀਮ ਦੇ ਅਧਿਕਾਰੀ ਜ਼ਮਾਨਤਾਂ ਮਨਜ਼ੂਰ ਹੋਣ ਤੋਂ ਹੈਰਾਨੀ ਵਿਚ ਹਨ ਅਤੇ ਕੈਪਟਨ ਸਰਕਾਰ ਨੂੰ ਵੀ ਇਹ ਵੱਡਾ ਹਲੂਣਾ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਅਗਰ ਸੀਬੀਆਈ ਦੀ ਤਫ਼ਤੀਸ਼ ਅਧੂਰੀ ਸੀ ਤਾਂ ਵੀ ਅਦਾਲਤ ਵਿਚ ਚਲਾਨ ਪੇਸ਼ ਕਰਕੇ ਮਗਰੋਂ ਸਪਲੀਮੈਂਟਰੀ ਚਲਾਨ ਦੇ ਸਕਦੀ ਸੀ। ਏਦਾ ਦਾ ਕੱੁਝ ਨਹੀਂ ਹੋਇਆ।
                 ਸੂਤਰ ਦੱਸਦੇ ਹਨ ਕਿ ਸਿੱਟ ਤਰਫ਼ੋਂ ਸੀਬੀਆਈ ਨੂੰ ‘ਗੁਪਤ ਜਾਂਚ ਰਿਪੋਰਟ’ ਦੇਣ ਸਮੇਂ ਇਹ ਨੁਕਤਾ ਸਾਂਝਾ ਕੀਤਾ ਗਿਆ ਕਿ ਇਸ ਮਾਮਲੇ ’ਚ ਹੁਣ ਹਰਸ਼ ਧੂਰੀ,ਪ੍ਰਦੀਪ ਕਲੇਰ ਅਤੇ ਸੰਦੀਪ ਬਰੇਟਾ ਨੂੰ ਗ੍ਰਿਫ਼ਤਾਰ ਕਰਨਾ ਬਣਦਾ ਹੈ ਪ੍ਰੰਤੂ ਸੀਬੀਆਈ ਇਸ ਰਾਹ ਹੀ ਨਹੀਂ ਪਈ। ਵੱਡਾ ਨੁਕਤਾ ਇਹ ਵੀ ਹੈ ਕਿ ਸੀਬੀਆਈ ਨੇ ਡੇਰਾ ਮੁਖੀ ਦੇ ਪੀ.ਏ ਰਾਕੇਸ਼ ਦਿੜ੍ਹਬਾ ਨੂੰ ਪੁੱਛਗਿੱਛ ਵਿਚ ਸ਼ਾਮਿਲ ਹੀ ਨਹੀਂ ਕੀਤਾ ਜਿਸ ਦੀਆਂ ਹਦਾਇਤਾਂ ’ਤੇ ਬੇਅਦਬੀ ਕਾਂਡ ਨੂੰ ਅੰਜਾਮ ਦਿੱਤਾ ਗਿਆ। ਸੂਤਰਾਂ ਅਨੁਸਾਰ ਰਾਕੇਸ਼ ਦਿੜ੍ਹਬਾ ਇਸ ਵੇਲੇ ਅੰਬਾਲਾ ਜੇਲ੍ਹ ਵਿਚ ਪੰਚਕੂਲਾ ਹਿੰਸਾ ਮਾਮਲੇ ਵਿਚ ਬੰਦ ਹੈ ਜਿਸ ਨੂੰ ਸੀਬੀਆਈ ਪ੍ਰੋਡਕਸ਼ਨ ਵਰੰਟ ’ਤੇ ਲਿਆ ਸਕਦੀ ਸੀ ਪ੍ਰੰਤੂ ਸੀ.ਬੀ.ਆਈ ਦੇ ਅਧਿਕਾਰੀ ਅੰਬਾਲੇ ਦੇ ਰਾਹ ਹੀ ਨਹੀਂ ਪਏ। ਸਿੱਟ ਦੀ ਜਾਂਚ ਤੋਂ ਪਹਿਲਾਂ ਵੀ ਸੀ.ਬੀ.ਆਈ ਨੇ ਪੌਣੇ ਤਿੰਨ ਵਰੇ੍ਹ ਜਾਂਚ ਢਿੱਲੀ ਹੀ ਰੱਖੀ। ਪੰਜਾਬ ਪੁਲੀਸ ਦੇ ਸੀਨੀਅਰ ਅਧਿਕਾਰੀ ਦਾ ਪ੍ਰਤੀਕਰਮ ਸੀ ਕਿ ਸੀਬੀਆਈ ਨੇ ਬੇਅਦਬੀ ਮਾਮਲੇ ਦੀ ਜਾਂਚ ਨੂੰ ਪੁੱਠਾ ਗੇੜਾ ਦੇ ਦਿੱਤਾ ਹੈ।
               ਇਵੇਂ ਹੀ ਸੀਬੀਆਈ ਨੇ ਫ਼ਰੀਦਕੋਟ ਜੇਲ੍ਹ ਵਿਚ ਬੰਦ ਹੋਰ 7 ਡੇਰਾ ਪੈਰੋਕਾਰਾਂ ਦੀ ਬੇਅਦਬੀ ਮਾਮਲੇ ਵਿਚ ਗ੍ਰਿਫ਼ਤਾਰੀ ਪਾਉਣ ਤੋਂ ਪਾਸਾ ਵੱਟਿਆ ਜਿਨ੍ਹਾਂ ਨੂੰ ਸਿੱਟ ਨੇ ਬੇਅਦਬੀ ਮਾਮਲੇ ਵਿਚ ਬਰਾਬਰ ਦਾ ਦੋਸ਼ੀ ਮੰਨਿਆ ਸੀ। ਸੀ.ਬੀ.ਆਈ ਅਫ਼ਸਰਾਂ ਨੇ ਫ਼ਰੀਦਕੋਟ ਜੇਲ੍ਹ ਵਿਚ ਬੰਦ ਇਨ੍ਹਾਂ 7 ਪੈਰੋਕਾਰਾਂ ਤੋਂ ਰਸਮੀ ਪੁੱਛਗਿੱਛ ਕਰਕੇ ਪੱਲਾ ਝਾੜ ਲਿਆ। ਸਿੱਟ ਨੇ 10 ਡੇਰਾ ਪੈਰੋਕਾਰਾਂ ਨੂੰ ਜਿਸ ਮੋਗਾ ਦੇ ਪੁਰਾਣੇ ਕੇਸ ਵਿਚ ਗ੍ਰਿਫ਼ਤਾਰ ਕੀਤਾ ਸੀ, ਉਸ ਵਿਚ ਮੋਗਾ ਅਦਾਲਤ ਚੋਂ ਕੱੁਝ ਪੈਰੋਕਾਰਾਂ ਦੀਆਂ ਜ਼ਮਾਨਤ ਦੀਆਂ ਦਰਖਾਸਤਾਂ ਰੱਦ ਵੀ ਹੋ ਚੁੱਕੀਆਂ ਹਨ। ਭਾਵੇਂ ਹੁਣ ਸੀਬੀਆਈ ਅਦਾਲਤ ਚੋਂ ਤਿੰਨ ਪ੍ਰੇਮੀਆਂ ਦੀਆਂ ਜ਼ਮਾਨਤਾਂ ਹੋ ਗਈਆਂ ਹਨ ਪ੍ਰੰਤੂ ਪੁਰਾਣੇ ਕੇਸ ਵਿਚ ਜ਼ਮਾਨਤ ਨਾ ਹੋਣ ਕਰਕੇ ਫ਼ਿਲਹਾਲ ਉਨ੍ਹਾਂ ਨੂੰ ਜੇਲ੍ਹ ਵਿਚ ਰਹਿਣਾ ਪਵੇਗਾ।
                         ਕੇਂਦਰ ਦੀ ਭੂਮਿਕਾ ਸ਼ੱਕੀ : ਜਾਖੜ
ਕਾਂਗਰਸ ਪ੍ਰਧਾਨ ਸੁਨੀਲ ਜਾਖੜ ਦਾ ਕਹਿਣਾ ਸੀ ਕਿ ਕੇਂਦਰ ਸਰਕਾਰ ਵਿਚ ਸ਼੍ਰੋਮਣੀ ਅਕਾਲੀ ਦਲ ਭਾਈਵਾਲ ਹੈ ਜੋ ਆਪਣਾ ਰਸੂਖ ਵਰਤ ਕੇ ਅਜਿਹੀ ਚਾਲ ਚੱਲ ਰਿਹਾ ਹੈ। ਕੇਂਦਰ ਦੀ ਬੇਅਦਬੀ ਮਾਮਲਿਆਂ ਵਿਚ ਭੂਮਿਕਾ ਨੇ ਲੋਕਾਂ ਦੇ ਖਦਸ਼ੇ ਸੱਚ ਕਰ ਦਿੱਤੇ ਹਨ ਪ੍ਰੰਤੂ ਕਾਂਗਰਸ ਸਰਕਾਰ ਬੇਅਦਬੀ ਮਾਮਲੇ ਵਿਚ ਕਿਸੇ ਵੀ ਦੋਸ਼ੀ ਨੂੰ ਬਖਸ਼ੇਗੀ ਨਹੀਂ ਅਤੇ ਲੋਕਾਂ ਨਾਲ ਪੂਰਨ ਨਿਆਂ ਕੀਤਾ ਜਾਵੇਗਾ।
                                 ਏਦਾ ਦੀ ਕੋਈ ਗੱਲ ਨਹੀਂ : ਸਾਂਪਲਾ
ਭਾਜਪਾ ਦੇ ਕੇਂਦਰੀ ਮੰਤਰੀ ਵਿਜੇ ਸਾਂਪਲਾ ਦਾ ਕਹਿਣਾ ਸੀ ਕਿ ਏਦਾ ਦੀ ਕੋਈ ਵੀ ਗੱਲ ਨਹੀਂ ਹੈ ਅਤੇ ਕੇਂਦਰ ਤੇ ਹਰਿਆਣਾ ਸਰਕਾਰ ਨੇ ਤਾਂ ਆਪਣੀ ਬਣਦੀ ਨਿਰਪੱਖ ਡਿਊਟੀ ਨਿਭਾਈ ਹੈ। ਉਨ੍ਹਾਂ ਆਖਿਆ ਕਿ ਕਾਂਗਰਸ ਸਰਕਾਰ ਨੇ ਡੇਢ ਵਰੇ੍ਹ ਦੌਰਾਨ ਬੇਅਦਬੀ ਮਾਮਲੇ ਵਿਚ ਕੋਈ ਕਾਰਵਾਈ ਨਹੀਂ ਕੀਤੀ ਅਤੇ ਹੁਣ ਆਪਣੇ ਦਾਗ ਛੁਪਾਉਣ ਲਈ ਕਾਂਗਰਸੀ ਨੇਤਾ ਛਿੱਕੜ ਉਛਾਲੀ ਕਰ ਰਹੇ ਹਨ।

   



Friday, September 14, 2018

                       ਬਾਦਲਾਂ ਦੇ ਕਾਲਜ
      ਨਹਿਰੀ ਕਲੋਨੀ ’ਚ ਲਾਇਆ ‘ਮੋਘਾ’
                         ਚਰਨਜੀਤ ਭੁੱਲਰ
ਗਿੱਦੜਬਾਹਾ : ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਪ੍ਰਾਈਵੇਟ ਸਕੂਲਾਂ-ਕਾਲਜਾਂ ਨੇ ਨਹਿਰ ਮਹਿਕਮੇ ਦੀ ਸਰਕਾਰੀ ਕਲੋਨੀ ’ਚ ‘ਮੋਘਾ’ ਲਾ ਲਿਆ ਹੈ। ਸਾਬਕਾ ਮੁੱਖ ਮੰਤਰੀ ਬਾਦਲ ਦੀ ਚੇਅਰਮੈਨੀ ਵਾਲੇ ਗਿੱਦੜਬਾਹਾ ’ਚ ਤਿੰਨ ਕਾਲਜ ਹਨ ਜਦੋਂ ਕਿ ਇੱਕ ਪ੍ਰਾਈਵੇਟ ਸਕੂਲ ਹੈ। ਅਕਾਲੀ ਹਕੂਮਤ ਦੌਰਾਨ ਇਨ੍ਹਾਂ ਪ੍ਰਾਈਵੇਟ ਸਕੂਲਾਂ ਕਾਲਜਾਂ ਦੇ ਪ੍ਰਿੰਸੀਪਲਾਂ ਅਤੇ ਸਟਾਫ਼ ਨੂੰ ਨਹਿਰੀ ਕਲੋਨੀ ਵਿਚ ਚਾਰ ਸਰਕਾਰੀ ਕੋਠੀਆਂ ਅਤੇ ਛੇ ਸਰਕਾਰੀ ਕੁਆਰਟਰ ਅਲਾਟ ਕੀਤੇ ਗਏ ਜਦੋਂ ਕਿ ਪੰਜਾਬ ’ਚ ਹੋਰਨਾਂ ਪ੍ਰਾਈਵੇਟ ਕਾਲਜਾਂ ਨੂੰ ਇਹ ਸੁਵਿਧਾ ਕਿਧਰੇ ਨਹੀਂ ਹੈ। ਰਾਜਸਥਾਨ ਫੀਡਰ ਮੰਡਲ ਫ਼ਿਰੋਜ਼ਪੁਰ ਨੇ ਇਹ ਅਲਾਟਮੈਂਟ ਲੋਕ ਹਿਤ ਵਿਚ ਕੀਤੀ ਹੈ ਜਦੋਂ ਇਹ ਕੋਠੀਆਂ ਅਤੇ ਕੁਆਰਟਰ ਨਹਿਰੀ ਮਹਿਕਮੇ ਦੇ ਸਟਾਫ਼ ਲਈ ਰਾਖਵੇਂ ਸਨ। ਵੇਰਵਿਆਂ ਅਨੁਸਾਰ ਗਿੱਦੜਬਾਹਾ ਦੀ ਨਹਿਰ ਕਲੋਨੀ ਵਿਚ ਸਰਕਾਰੀ ਕੋਠੀ ਨੰਬਰ 1-ਬੀ ਮਾਲਵਾ ਸਕੂਲ ਗਿੱਦੜਬਾਹਾ ਦੇ ਨਾਮ ਤੇ ਕਾਫ਼ੀ ਪੁਰਾਣੀ ਅਲਾਟ ਹੋਈ ਹੈ ਜਿਸ ਵਿਚ ਹੁਣ ਸਕੂਲ ਦੇ ਮੌਜੂਦਾ ਪਿੰ੍ਰਸੀਪਲ ਰਹਿ ਰਹੇ ਹਨ ਜਦੋਂ ਕਿ ਕੋਠੀ ਨੰਬਰ 3-ਬੀ ਵਿਚ ਗੁਰੂ ਗੋਬਿੰਦ ਸਿੰਘ ਕਾਲਜ ਆਫ਼ ਐਜੂਕੇਸ਼ਨ ਫ਼ਾਰ ਵੁਮੈਨ ਗਿੱਦੜਬਾਹਾ ਦੇ ਪ੍ਰਿੰਸੀਪਲ ਰਹਿ ਰਹੇ ਹਨ।  ਕੋਠੀ ਨੰਬਰ 4 ਬੀ ਗੁਰੂ ਗੋਬਿੰਦ ਸਿੰਘ ਕਾਲਜ ਆਫ਼ ਮੈਨੇਜਮੈਂਟ ਦੇ ਨਾਮ ਤੇ ਅਲਾਟ ਹੈ ਜਿਸ ਵਿਚ ਹੁਣ ਪ੍ਰਿੰਸੀਪਲ ਤਰੁਨ ਕਾਲੀਆ ਰਹਿ ਰਹੇ ਹਨ। ਇਸੇ ਤਰ੍ਹਾਂ ਕੋਠੀ ਨੰਬਰ 5-ਬੀ ਵਿਚ ਮਾਲਵਾ ਸਕੂਲ ਦੇ ਤੀਰ-ਅੰਦਾਜ਼ੀ ਦੇ ਕੋਚ ਦੀ ਰਿਹਾਇਸ਼ ਹੈ।
                  ਇਸੇ ਤਰ੍ਹਾਂ ਗੁਰੂ ਗੋਬਿੰਦ ਸਿੰਘ ਕਾਲਜ ਆਫ਼ ਐਜੂਕੇਸ਼ਨ ਫ਼ਾਰ ਵੁਮੈਨ ਦੇ ਪ੍ਰਿੰਸੀਪਲ ਦੇ ਨਾਮ ’ਤੇ ਕੁਆਰਟਰ ਨੰਬਰ 27-ਐਸ ਅਲਾਟ ਕੀਤਾ ਗਿਆ ਹੈ। ਨਹਿਰ ਮਹਿਕਮੇ ਨੇ ਇਸ ਤੋਂ ਬਿਨਾਂ ਬਾਦਲਾਂ ਦੇ ਪ੍ਰਾਈਵੇਟ ਕਾਲਜਾਂ ਦੇ ਸਟਾਫ਼ ਲਈ ਹੋਰ ਪੰਜ ਸਰਕਾਰੀ ਕੁਆਰਟਰ ਅਲਾਟ ਕੀਤੇ ਹਨ ਜਿਨ੍ਹਾਂ ਵਿਚ ਮਾਲਵਾ ਸਕੂਲ ਗਿੱਦੜਬਾਹਾ ਦੇ ਅਧਿਆਪਕ ਰਹਿ ਰਹੇ ਹਨ। ਨਹਿਰੀ ਕਲੋਨੀ ਰਾਜਸਥਾਨ ਫੀਡਰ ਦੀ ਹੈ ਅਤੇ ਰਾਜਸਥਾਨ ਸਰਕਾਰ ਦੀ ਮਾਲਕੀ ਹੈ। 20 ਅਕਤੂਬਰ 2009 ਨੂੰ ਅਲਾਟ ਕੀਤੇ ਸਰਕਾਰੀ ਕੁਆਰਟਰ ਨੰਬਰ ਐਸ-17 ਦੇ ਪੱਤਰ ਵਿਚ ਲਿਖਿਆ ਗਿਆ ਹੈ ਕਿ ਸਰਕਾਰੀ ਕੁਆਰਟਰ ਅਲਾਟ ਕਰਨ ਵਾਸਤੇ ਨਹਿਰ ਮਹਿਕਮੇ ਦੇ ਐਸ.ਡੀ.ਓ ਨੇ ਸਿਫ਼ਾਰਸ਼ ਕੀਤੀ ਹੈ ਜਦੋਂ ਕਿ ਰਾਜਸਥਾਨ ਫੀਡਰ ਦੇ ਐਕਸੀਅਨ ਨੇ ਲੋਕ ਹਿਤ ਵਿਚ ਅਲਾਟਮੈਂਟ ਦੇ ਹੁਕਮ ਜਾਰੀ ਕੀਤੇ ਹਨ। ਏਦਾ ਹੀ ਸਾਰੇ ਕੇਸਾਂ ਵਿਚ ਹੋਇਆ ਹੈ। ਇਹ ਸਾਰੀ ਜਗ੍ਹਾ ਰਾਜਸਥਾਨ ਸਰਕਾਰ ਦੀ ਹੈ ਜੋ ਕਿ ਕਰੀਬ 20 ਏਕੜ ਬਣਦੀ ਹੈ। ਅਲਾਟਮੈਂਟ ਦਾ ਹੱਕ ਵੀ ਰਾਜਸਥਾਨ ਸਰਕਾਰ ਹੀ ਰੱਖਦੀ ਹੈ।  ਦੱਸਦੇ ਹਨ ਕਿ ਜਦੋਂ ਰਾਜਸਥਾਨ ਫੀਡਰ ਦੀ ਉਸਾਰੀ ਹੋਈ ਸੀ ਤਾਂ ਸਾਲ 1958-59 ਵਿਚ ਗਿੱਦੜਬਾਹਾ ਵਿਚ ਨਹਿਰੀ ਕਲੋਨੀ ਬਣੀ ਸੀ।
                 ਨਹਿਰ ਕਲੋਨੀ ਦੇ ਕਰੀਬ ਅੱਧੀ ਦਰਜਨ ਕੁਆਰਟਰ ਤਾਂ ਕੰਡਮ ਹਾਲਤ ਵਿਚ ਹਨ। ਕਲੋਨੀ ਵਿਚ ਸੱਤ ਕੋਠੀਆਂ ਹਨ ਜਿਨ੍ਹਾਂ ਚੋਂ ਚਾਰ ਕੋਠੀਆਂ ਬਾਦਲਾਂ ਦੀ ਚੇਅਰਮੈਨੀ ਵਾਲੇ ਸਕੂਲਾਂ ਕਾਲਜਾਂ ਦੇ ਪਿੰ੍ਰਸੀਪਲਾਂ ਅਤੇ ਸਟਾਫ਼ ਨੂੰ ਅਲਾਟ ਕੀਤੀਆਂ ਹਨ ਅਤੇ ਛੇ ਕੁਆਰਟਰ ਅਲਾਟ ਕੀਤੇ ਹਨ। ਪ੍ਰਤੀ ਕੋਠੀ 1035 ਰੁਪਏ ਪ੍ਰਤੀ ਮਹੀਨਾ ਅਤੇ ਪ੍ਰਤੀ ਕੁਆਰਟਰ ਕਰੀਬ 800 ਰੁਪਏ ਕਿਰਾਇਆ ਲਿਆ ਜਾਂਦਾ ਹੈ। ਗੁਰੂ ਗੋਬਿੰਦ ਸਿੰਘ ਕਾਲਜ ਆਫ਼ ਐਜੂਕੇਸ਼ਨ ਫ਼ਾਰ ਵੋਮੈਨ ਦੇ ਪ੍ਰਿੰਸੀਪਲ ਗੁਰਮੇਲ ਸਿੰਘ ਦਾ ਪ੍ਰਤੀਕਰਮ ਸੀ ਕਿ ਇਹ ਪੁਰਾਣੀ ਅਲਾਟਮੈਂਟ ਹੀ ਹੈ ਅਤੇ ਕਾਲਜ ਨੇ ਪੱਲਿਓ ਖ਼ਰਚ ਕਰਕੇ ਕੋਠੀਆਂ ਨੂੰ ਮੁਰੰਮਤ ਕੀਤਾ ਹੈ। ਇਸੇ ਤਰ੍ਹਾਂ ਮਾਲਵਾ ਸਕੂਲ ਦੇ ਪ੍ਰਿੰਸੀਪਲ ਸ੍ਰੀ ਕ੍ਰਿਸ਼ਨ ਯਾਦਵ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੀ ਰਿਹਾਇਸ਼ ਨਹਿਰੀ ਕਲੋਨੀ ਵਿਚ ਹੈ। ਉਨ੍ਹਾਂ ਹੋਰ ਵੇਰਵੇ ਫ਼ੋਨ ’ਤੇ ਦੇਣ ਤੋਂ ਇਨਕਾਰ ਕਰ ਦਿੱਤਾ।
                       ਅਲਾਟਮੈਂਟ ਫ਼ੌਰੀ ਰੱਦ ਹੋਵੇ : ਸੂਬਾ ਪ੍ਰਧਾਨ
ਸਿੰਚਾਈ ਮਹਿਕਮੇ ਦੀ ਰੈਵਨਿਊ ਯੂਨੀਅਨ ਦੇ ਸੂਬਾ ਪ੍ਰਧਾਨ ਗੁਰਸ਼ਰਨਜੀਤ ਸਿੰਘ ਹੁੰਦਲ ਦਾ ਕਹਿਣਾ ਸੀ ਕਿ ਸਰਕਾਰਾਂ ਨੇ ਸੱਤਾ ਦੀ ਦੁਰਵਰਤੋਂ ਕਰਕੇ ਪ੍ਰਾਈਵੇਟ ਅਦਾਰਿਆਂ ਨੂੰ ਫ਼ਾਇਦਾ ਦੇਣ ਖ਼ਾਤਰ ਅਲਾਟਮੈਂਟ ਕੀਤੀ ਹੈ ਜੋ ਕਿ ਰੱਦ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਆਖਿਆ ਕਿ ਨਿਯਮਾਂ ਅਨੁਸਾਰ ਬਕਾਇਦਾ ਅਲਾਟਮੈਂਟ ਕਮੇਟੀ ਬਣਦੀ ਹੈ ਜੋ ਮਹਿਕਮੇ ਦੇ ਮੁਲਾਜ਼ਮਾਂ ਨੂੰ ਹੀ ਕੈਟਾਗਰੀ ਵਾਈਜ਼ ਕੋਠੀਆਂ/ਕੁਆਰਟਰ ਅਲਾਟ ਕਰ ਸਕਦੀ ਹੈ। ਪ੍ਰਾਈਵੇਟ ਕਾਲਜਾਂ ਲਈ ਕੋਈ ਵਿਵਸਥਾ ਨਹੀਂ ਹੈ।
                       ਮਾਮਲੇ ਦੀ ਘੋਖ ਕਰਾਂਗੇ : ਧਾਲੀਵਾਲ
ਰਾਜਸਥਾਨ ਫੀਡਰ ਦੀ ਡਵੀਜ਼ਨ ਫ਼ਿਰੋਜ਼ਪੁਰ ਦੇ ਐਕਸੀਅਨ ਸ੍ਰੀ ਦਲਬੀਰ ਸਿੰਘ ਧਾਲੀਵਾਲ ਦਾ ਕਹਿਣਾ ਸੀ ਕਿ ਇਹ ਅਲਾਟਮੈਂਟ ਉਨ੍ਹਾਂ ਤੋਂ ਪਹਿਲਾਂ ਦੀ ਹੈ ਅਤੇ ਉਹ ਰਿਕਾਰਡ ਚੈੱਕ ਕਰਕੇ ਇਸ ਦੀ ਘੋਖ ਕਰਨਗੇ। ਉਨ੍ਹਾਂ ਆਖਿਆ ਕਿ ਹੋ ਸਕਦਾ ਹੈ ਕਿ ਕੋਠੀਆਂ ਦੀ ਸਾਂਭ ਸੰਭਾਲ ਦੇ ਨਜ਼ਰੀਏ ਤੋਂ ਅਲਾਟਮੈਂਟ ਕੀਤੀ ਗਈ ਹੋਵੇ।
           








Saturday, September 8, 2018

                           ਬਦਲੇ ਤੇਵਰ..
      ਬਾਦਲਾਂ ਦੀਆਂ ਬੱਸਾਂ ’ਤੇ ਚੱਲੇਗਾ ‘ਖੂੰਡਾ’ ?
                          ਚਰਨਜੀਤ ਭੁੱਲਰ
ਬਠਿੰਡਾ : ਕੈਪਟਨ ਸਰਕਾਰ ਹੁਣ ‘ਵੱਡੇ ਘਰਾਂ’ ਦੀਆਂ ਬੱਸਾਂ ਨੂੰ ਘੇਰਾ ਪਾਉਣ ਲੱਗੀ ਹੈ ਜਿਨ੍ਹਾਂ ’ਚ ਬਾਦਲ ਪਰਿਵਾਰ ਦੀ ਟਰਾਂਸਪੋਰਟ ਨਿਸ਼ਾਨੇ ’ਤੇ ਹੈ। ਕਾਂਗਰਸ ਸਰਕਾਰ ਨਵੇਂ ਬਣੇ ਸਿਆਸੀ ਮਾਹੌਲ ’ਚ ਬਾਦਲਾਂ ਦੀ ਟਰਾਂਸਪੋਰਟ ਦੀ ਅਜਾਰੇਦਾਰੀ ਨੂੰ ਤੋੜਨਾ ਚਾਹੁੰਦੀ ਹੈ। ਭਾਵੇਂ ਕੈਪਟਨ ਦੇ ਰਾਜ ਭਾਗ ਦੌਰਾਨ ਹੁਣ ਤੱਕ ਬਾਦਲਾਂ ਦੀ ਟਰਾਂਸਪੋਰਟ ਦਾ ਵਾਲ ਵਿੰਗਾ ਨਹੀਂ ਹੋਇਆ ਪ੍ਰੰਤੂ ਹੁਣ ਸਰਕਾਰ ਦੇ ਤੇਵਰ ਬਦਲੇ ਹੋਏ ਜਾਪਦੇ ਹਨ। ਤਾਹੀਓ ਟਰਾਂਸਪੋਰਟ ਮਹਿਕਮੇ ਨੇ ਬੱਸਾਂ ਦੀ ਨਵੇਂ ਸਿਰਿਓਂ ਸਮਾਂ ਸੂਚੀ ਤਿਆਰ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਹਾਲਾਂ ਕਿ ਫਰਵਰੀ 2018 ਵਿਚ ਵੀ ਏਦਾ ਦਾ ਹੰਭਲਾ ਵੱਜਿਆ ਸੀ ਪ੍ਰੰਤੂ ਉਦੋਂ ਬਾਦਲ ਪਰਿਵਾਰ ਨੇ ਟਰਾਂਸਪੋਰਟ ਅਫ਼ਸਰਾਂ ਨੇ ਨੱਕ ਮੋੜ ਦਿੱਤੇ ਸਨ। ਰਿਜਨਲ ਟਰਾਂਸਪੋਰਟ ਅਥਾਰਿਟੀ ਫ਼ਿਰੋਜ਼ਪੁਰ ਨੇ ਪੰਜਾਬ ਰੋਡਵੇਜ਼ ਅਤੇ ਪੀ. ਆਰ. ਟੀ. ਸੀ ਨੂੰ 30 ਅਗਸਤ ਨੂੰ ਪੱਤਰ ਜਾਰੀ ਕੀਤਾ ਹੈ ਕਿ ਅਗਰ ਰੋਡਵੇਜ਼ ਅਤੇ ਪੀ.ਆਰ.ਟੀ.ਸੀ ਆਪਣੀਆਂ ਬੱਸਾਂ ਦੀ ਸਮਾਂ ਸੂਚੀ ਵਿਚ ਕੋਈ ਤਬਦੀਲੀ ਚਾਹੁੰਦੇ ਹਨ ਤਾਂ ਇੱਕ ਹਫ਼ਤੇ ਵਿਚ ਸਮਾਂ ਸੂਚੀ ਦੀ ਤਬਦੀਲੀ ਦੀ ਤਜਵੀਜ਼ ਪੇਸ਼ ਕੀਤੀ ਜਾਵੇ।
                   ਇਸੇ ਤਰ੍ਹਾਂ ਰਿਜਨਲ ਟਰਾਂਸਪੋਰਟ ਅਥਾਰਿਟੀ ਪਟਿਆਲਾ ਨੇ ਵੀ ਇਸੇ ਦਿਨ ਹੀ ਪੱਤਰ ਲਿਖਿਆ ਕਿ ਸਟੇਟ ਟਰਾਂਸਪੋਰਟ ਕਮਿਸ਼ਨਰ ਨੇ ਸਟੇਜ ਕੈਰਿਜ ਰੂਟਾਂ ਦੇ ਟਾਈਮ ਟੇਬਲਾਂ ਨੂੰ ਠੀਕ ਕਰਨ ਦੇ ਹੁਕਮ ਕੀਤੇ ਹਨ ਜਿਸ ਕਰਕੇ ਜਿੱਥੇ ਵੀ ਸਰਕਾਰੀ ਬੱਸਾਂ ਦੀ ਸਮਾਂ ਸੂਚੀ ਵਿਚ ਸੋਧ ਦੀ ਲੋੜ ਹੈ ਤਾਂ ਉਸ ਬਾਰੇ ਦੱਸਿਆ ਜਾਵੇ।  ਰਿਜਨਲ ਟਰਾਂਸਪੋਰਟ ਅਥਾਰਿਟੀ ਪਟਿਆਲਾ ਨੇ ਤਾਂ ਸਮਾਂ ਸੂਚੀ ਨਵੇਂ ਸਿਰਿਓਂ ਤਿਆਰ ਕਰਨ ਲਈ ਸੁਣਵਾਈ ਦੀਆਂ ਤਾਰੀਕਾਂ ਵੀ ਐਲਾਨ ਦਿੱਤੀਆਂ ਹਨ ਜਿਸ ਮੁਤਾਬਿਕ 17 ਸਤੰਬਰ ਤੋਂ 24 ਸਤੰਬਰ ਤੱਕ ਸੁਣਵਾਈ ਦਾ ਸਮਾਂ ਨਿਸ਼ਚਿਤ ਕੀਤਾ ਗਿਆ ਹੈ। ਸੂਤਰ ਦੱਸਦੇ ਹਨ ਕਿ ਲੰਘੇ ਇੱਕ ਦਹਾਕੇ ਤੋਂ ਬਾਦਲਾਂ ਸਮੇਤ ਵੱਡੇ ਘਰਾਣਿਆਂ ਦੀ ਟਰਾਂਸਪੋਰਟ ਨੂੰ ਬੱਸ ਅੱਡਿਆਂ ’ਤੇ ਟਾਈਮ ਦੇ ਗੱਫੇ ਦਿੱਤੇ ਹੋਏ ਹਨ ਜਿਸ ਦਾ ਵੱਡਾ ਨੁਕਸਾਨ ਸਰਕਾਰੀ ਟਰਾਂਸਪੋਰਟ ਨੂੰ ਹੁੰਦਾ ਹੈ। ਵੱਡੇ ਘਰਾਣੇ ਦੀ ਹਰ ਬੱਸ ਨੂੰ ਬੱਸ ਅੱਡੇ ਤੇ ਸਵਾਰੀ ਚੁੱਕਣ ਲਈ ਦਸ ਦਸ ਜਾਂ ਫਿਰ 12-12 ਮਿੰਟ ਮਿਲਦੇ ਹਨ। ਕਾਂਗਰਸ ਨੇ ਚੋਣਾਂ ਵੇਲੇ ਇਕਸਾਰ ਟਾਈਮ ਟੇਬਲ ਦਾ ਵਾਅਦਾ ਵੀ ਕੀਤਾ ਸੀ। ਅੌਰਬਿਟ ਅਤੇ ਡੱਬਵਾਲੀ ਬੱਸ ਕੰਪਨੀ ਦੇ ਲੁਧਿਆਣਾ, ਜਲੰਧਰ ਅਤੇ ਸੰਗਰੂਰ ਲਈ ਕਰੀਬ 34 ਰੂਟ ਬਠਿੰਡਾ ਤੋਂ ਹੀ ਚੱਲਦੇ ਹਨ। ਪਟਿਆਲਾ ਚੰਡੀਗੜ੍ਹ ਦੇ ਰੂਟ ਵੱਖਰੇ ਹਨ।
                 ਬਠਿੰਡਾ ਬਰਨਾਲਾ ਰੂਟ ਤੇ ਬਠਿੰਡਾ ਬੱਸ ਅੱਡੇ ਚੋਂ ਕਰੀਬ 193 ਰੂਟ (ਆਮ ਬੱਸਾਂ ਦੇ) ਚੱਲਦੇ ਹਨ ਜਿਨ੍ਹਾਂ ਚੋਂ ਦਰਜਨ ਆਮ ਬੱਸਾਂ ਨੂੰ ਤਾਂ ਸਿਰਫ਼ ਦੋ ਦੋ ਮਿੰਟ ਦਾ ਸਮਾਂ ਅਤੇ 62 ਬੱਸਾਂ ਨੂੰ ਸਿਰਫ਼ ਤਿੰਨ ਤਿੰਨ ਮਿੰਟ ਹੀ ਅੱਡੇ ਵਿਚ ਸਵਾਰੀ ਚੁੱਕਣ ਲਈ ਮਿਲਦੇ ਹਨ। ਵੱਡੇ ਘਰਾਣੇ ਨੂੰ ਦਸ ਦਸ ਮਿੰਟ ਵੀ ਮਿਲ ਰਹੇ ਹਨ। ਜਦੋਂ ਫਰਵਰੀ ਮਹੀਨੇ ’ਚ ਆਰਟੀਏ ਫ਼ਿਰੋਜ਼ਪੁਰ ਨੇ ਸਮਾਂ ਸੂਚੀ ਵਿਚ ਸੋਧ ਕੀਤੀ ਤਾਂ ਮੁੜ ਵੱਡੇ ਘਰਾਂ ਨੂੰ ਗੱਫੇ ਮਿਲ ਗਏ। ਮਿਸਾਲ ਦੇ ਤੌਰ ਤੇ ਫ਼ਰੀਦਕੋਟ ਕੋਟਕਪੂਰਾ ਦੇ 176 ਰੂਟਾਂ ਦਾ ਸਮਾਂ ਨਿਸ਼ਚਿਤ ਕੀਤਾ ਗਿਆ ਜਿਨ੍ਹਾਂ ’ਚ 22 ਰੂਟ ਡੱਬਵਾਲੀ ਅਤੇ ਅੌਰਬਿਟ ਟਰਾਂਸਪੋਰਟ ਦੇ ਹਨ ਅਤੇ ਇਨ੍ਹਾਂ ਨੂੰ ਬਾਕੀਆਂ ਨਾਲੋਂ ਵੱਧ ਸਮਾਂ      ਦਿੱਤਾ ਗਿਆ। ਦੱਸਣਯੋਗ ਹੈ ਕਿ ਪੀ.ਆਰ.ਟੀ.ਸੀ ਤਰਫ਼ੋਂ ਕਰੀਬ ਦੋ ਮਹੀਨੇ ਪਹਿਲਾਂ ਟਰਾਂਸਪੋਰਟ ਵਿਭਾਗ ਦੇ ਪ੍ਰਮੁੱਖ ਸਕੱਤਰ ਨੂੰ ਪੱਤਰ ਲਿਖਿਆ ਗਿਆ ਕਿ ਸਮਾਂ ਸੂਚੀ ਵਿਚ ਸੋਧ ਕਰਕੇ ਸਮਾਂ ਇਕਸਾਰ ਕੀਤਾ ਜਾਵੇ, ਟਾਈਮ ਟੇਬਲ ਤੇ ਹਰ ਰੂਟ ਨਾਲ ਬੱਸ ਦਾ ਪਰਮਿਟ ਨੰਬਰ ਅਤੇ ਉਸ ਦਾ ਅਸਲੀ ਰੂਟ ਲਿਖਿਆ ਜਾਵੇ। ਉਦੋਂ ਟਰਾਂਸਪੋਰਟ ਵਿਭਾਗ ਨੇ ਆਰਟੀਏਜ ਨੂੰ ਪੱਤਰ ਤਾਂ ਜਾਰੀ ਕੀਤਾ ਸੀ ਪ੍ਰੰਤੂ ਉਹ ਪੱਤਰ ਠੰਢੇ ਬਸਤੇ ਵਿਚ ਪੈ ਗਿਆ।
                 ਕਰੀਬ ਇੱਕ ਮਹੀਨਾ ਪਹਿਲਾਂ ਮੁੜ ਪੀਆਰਟੀਸੀ ਨੇ ਹਕੀਕਤ ਤੋਂ ਜਾਣੂ ਕਰਾ ਦਿੱਤਾ ਜਿਸ ਮਗਰੋਂ ਹੁਣ ਸਟੇਟ ਟਰਾਂਸਪੋਰਟ ਕਮਿਸ਼ਨਰ ਨੇ 20 ਅਗਸਤ ਨੂੰ ਪੱਤਰ ਜਾਰੀ ਕੀਤਾ ਹੈ ਜਿਸ ਤੇ ਹੁਣ ਪ੍ਰਕਿਰਿਆ ਸ਼ੁਰੂ ਹੋਈ ਹੈ। ਪੀ.ਆਰ.ਟੀ.ਸੀ ਕੋਲ ਇਸ ਵੇਲੇ ਕਰੀਬ 1150 ਅਤੇ ਪੰਜਾਬ ਰੋਡਵੇਜ਼ ਕੋਲ ਕਰੀਬ 1800 ਬੱਸਾਂ ਹਨ। ਪੰਜਾਬ ਰੋਡਵੇਜ਼ ਐਂਪਲਾਈਜ ਯੂਨੀਅਨ (ਆਜ਼ਾਦ) ਦੇ ਜਨਰਲ ਸਕੱਤਰ ਨਛੱਤਰ ਸਿੰਘ ਦਾ ਕਹਿਣਾ ਸੀ ਕਿ ਸਰਕਾਰ ਸੰਜੀਦਾ ਹੈ ਤਾਂ ਅਦਾਲਤੀ ਹੁਕਮਾਂ ਮੁਤਾਬਿਕ ਬੱਸਾਂ ਦੇ ਪਰਮਿਟ ਰੱਦ ਕਰੇ ਅਤੇ ਉਸ ਮਗਰੋਂ ਸਮਾਂ ਸੂਚੀ ਤਿਆਰ ਕਰੇ। ਹੁਣ ਤਾਂ ਭਰੋਸਾ ਨਹੀਂ ਰਿਹਾ ਕਿ ਕੈਪਟਨ ਸਰਕਾਰ ਵੀ ਸਰਕਾਰੀ ਬੱਸ ਸੇਵਾ ਦੇ ਭਲੇ ਬਾਰੇ ਸੋਚੇਗੀ। ਉਨ੍ਹਾਂ ਆਸ ਪ੍ਰਗਟ ਕੀਤੀ ਕਿ ਜੇ ਸਮਾਂ ਸੂਚੀ ਇਕਸਾਰ ਬਣ ਜਾਵੇ ਤਾਂ ਚੰਗਾ ਹੈ।
                        ਹੁਣ ਉਮੀਦ ਬੱਝੀ ਹੈ : ਐਮ.ਡੀ 
ਪੀ.ਆਰ.ਟੀ.ਸੀ ਦੇ ਮੈਨੇਜਿੰਗ ਡਾਇਰੈਕਟਰ ਸ੍ਰੀ ਮਨਜੀਤ ਸਿੰਘ ਨਾਰੰਗ ਦਾ ਕਹਿਣਾ ਸੀ ਕਿ ਟਰਾਂਸਪੋਰਟ ਅਫ਼ਸਰਾਂ ਨੇ ਹੁਣ ਟਾਈਮ ਟੇਬਲ ਇਕਸਾਰ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ ਅਤੇ ਉਨ੍ਹਾਂ ਤੋਂ ਵੀ ਤਜਵੀਜ਼ ਮੰਗ ਲਈ ਹੈ। ਆਰਟੀਏਜ ਤਰਫ਼ੋਂ ਮੀਟਿੰਗਾਂ ਲਈ ਤਰੀਕਾਂ ਵੀ ਨਿਸ਼ਚਿਤ ਕੀਤੀਆਂ ਗਈਆਂ ਹਨ ਅਤੇ ਹੁਣ ਕੱੁਝ ਆਸ ਵੀ ਬੱਝੀ ਹੈ। ਉਨ੍ਹਾਂ ਦੱਸਿਆ ਕਿ ਇਕਸਾਰ ਟਾਈਮ ਟੇਬਲ ਬਣਨ ਨਾਲ ਸਰਕਾਰੀ ਟਰਾਂਸਪੋਰਟ ਦੀ ਆਮਦਨ ਵਧੇਗੀ।


















Friday, September 7, 2018

                           ਸਿਆਸੀ ਚੋਗਾ
          ਮੋਦੀ ਦੀ ‘ਖੀਰ’ ਬਣੀ ‘ਦਲ਼ੀਆ’ !
                          ਚਰਨਜੀਤ ਭੁੱਲਰ
ਬਠਿੰਡਾ : ਮੋਦੀ ਸਰਕਾਰ ਦੀ ਉਜਵਲਾ ਸਕੀਮ ਦੀ ‘ਖੀਰ’ ਪੰਜਾਬ ’ਚ ‘ਦਲ਼ੀਆ’ ਬਣ ਗਈ ਹੈ। ਤਾਹੀਓਂ ਕੇਂਦਰ ਸਰਕਾਰ ਦੀ ‘ਉਜਵਲਾ ਸਕੀਮ’ ਪੰਜਾਬ ’ਚ ਹਨੇਰੇ ’ਚ ਡੁੱਬੀ ਹੈ। ‘ਉਜਵਲਾ ਸਕੀਮ’ ਤਹਿਤ ਪੰਜਾਬ ’ਚ 9.96 ਲੱਖ ਦਲਿਤ ਪਰਿਵਾਰਾਂ ਨੂੰ ਗੈਸ ਕੁਨੈਕਸ਼ਨਾਂ ਦਾ ਚੋਗ਼ਾ ਪਾਇਆ ਗਿਆ ਜਿਨ੍ਹਾਂ ਚੋਂ ਹੁਣ ਕਰੀਬ ਪੌਣੇ ਪੰਜ ਲੱਖ ਪਰਿਵਾਰਾਂ ਨੇ ਰਸੋਈ ਗੈਸ ਲੈਣ ਤੋਂ ਹੱਥ ਖੜ੍ਹੇ ਕਰ ਦਿੱਤੇ ਹਨ। ਤੇਲ ਕੰਪਨੀਆਂ ਹੁਣ ‘ਉਜਵਲਾ ਸਕੀਮ’ ਦੀ ਚਮਕ ਲਈ ਹਰ ਹੀਲਾ ਵਸੀਲਾ ਕਰਨ ਲੱਗੀਆਂ ਹਨ। ਨਤੀਜੇ ਵਜੋਂ ਇਸ ਸਕੀਮ ਦੀ ਗੈਸ ਦੀ ਬੋਗਸ ਵਿੱਕਰੀ ਦਿਖਾਏ ਜਾਣ ਦੇ ਵੀ ਚਰਚੇ ਹਨ। ਪੰਜਾਬ ਵਿਚ ਤਾਂ ਪਹਿਲਾਂ ਹੀ 100 ਘਰਾਂ ਪਿੱਛੇ 106 ਰਸੋਈ ਗੈਸ ਦੇ ਕੁਨੈਕਸ਼ਨ ਹਨ ਅਤੇ ਉੱਪਰੋਂ ਪੰਜਾਬ ਵਿਚ ‘ਉਜਵਲਾ ਸਕੀਮ’ ਤਹਿਤ 9.96 ਲੱਖ ਗੈਸ ਕੁਨੈਕਸ਼ਨ ਦੇ ਦਿੱਤੇ ਜਿਨ੍ਹਾਂ ਦੀ ਜ਼ਮੀਨੀ ਹਕੀਕਤ ਮੇਲ ਨਹੀਂ ਖਾ ਰਹੀ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਪਹਿਲੀ ਮਈ 2016 ਨੂੰ ‘ਪ੍ਰਧਾਨ ਮੰਤਰੀ ਉਜਵਲਾ ਸਕੀਮ’ ਲਾਂਚ ਕੀਤੀ ਸੀ ਜਿਸ ਤਹਿਤ ਦਲਿਤ ਪਰਿਵਾਰਾਂ ਨੂੰ ਗੈਸ ਕੁਨੈਕਸ਼ਨ ਦਿੱਤੇ ਜਾਣੇ ਸਨ। ਪੂਰੇ ਮੁਲਕ ਵਿਚ 8 ਕਰੋੜ ਗੈਸ ਕੁਨੈਕਸ਼ਨ ਦੇਣ ਦਾ ਟੀਚਾ ਹੈ।
                   ਕੁਨੈਕਸ਼ਨ ਮੁਫ਼ਤ ਵਿਚ ਦੇਣ ਦਾ ਪ੍ਰਚਾਰ ਹੋਇਆ ਸੀ ਜਿਸ ਵਿਚ ਇੱਕ ਚੁੱਲ੍ਹਾ,ਭਰਿਆ ਗੈਸ ਸਿਲੰਡਰ,ਰੈਗੂਲੇਟਰ ਅਤੇ ਪਾਈਪ ਸ਼ਾਮਿਲ ਹੈ। ਮਗਰੋਂ ਜਦੋਂ ਦਲਿਤ ਪਰਿਵਾਰਾਂ ਨੂੰ ਪਤਾ ਲੱਗਾ ਹੈ ਕਿ ਗੈਸ ਸਬਸਿਡੀ ਵਾਲੀ ਰਾਸ਼ੀ ਸਰਕਾਰ ਦਿੱਤੇ ਕੁਨੈਕਸ਼ਨ ਦੀ ਕਿਸ਼ਤ ਵਜੋਂ ਵਸੂਲ ਕਰੇਗੀ ਤਾਂ ਉਨ੍ਹਾਂ ਸਕੀਮ ਤੋਂ ਮੂੰਹ ਹੀ ਮੋੜ ਲਿਆ। ਭਾਵੇਂ 5 ਸਤੰਬਰ 2018 ਤੱਕ ਪੰਜਾਬ ’ਚ ਇਸ ਸਕੀਮ ਤਹਿਤ 9.96 ਲੱਖ ਕੁਨੈਕਸ਼ਨ ਇਸ ਸਕੀਮ ਤਹਿਤ ਜਾਰੀ ਹੋ ਚੁੱਕੇ ਹਨ ਪ੍ਰੰਤੂ 18 ਜੁਲਾਈ 2018 ਤੱਕ ਇਨ੍ਹਾਂ ਕੁਨੈਕਸ਼ਨਾਂ ਦੀ ਗਿਣਤੀ 7.80 ਲੱਖ ਸੀ। ਕੇਂਦਰੀ ਪੈਟਰੋਲੀਅਮ ਮੰਤਰਾਲੇ ਵੱਲੋਂ 18 ਜੁਲਾਈ ਤੱਕ ਜਾਰੀ ਕੀਤੇ 7.80 ਲੱਖ ਕੁਨੈਕਸ਼ਨਾਂ ਦਾ ਮੁਲਾਂਕਣ ਕੀਤਾ ਗਿਆ ਤਾਂ ਪੰਜਾਬ ਦੇ 3.78 ਲੱਖ ਦਲਿਤ ਪਰਿਵਾਰਾਂ ਨੇ ਦੂਸਰੀ ਦਫ਼ਾ ਗੈਸ ਸਿਲੰਡਰ ਭਰਵਾਇਆ ਹੀ ਨਹੀਂ ਜਦੋਂ ਕਿ ਤੀਸਰੀ ਦਫ਼ਾ ਸਿਲੰਡਰ ਨਾ ਭਰਾਉਣ ਵਾਲੇ ਪਰਿਵਾਰਾਂ ਦੀ ਗਿਣਤੀ ਵੱਧ ਕੇ 4.74 ਲੱਖ ਹੋ ਗਈ। ਸੂਤਰ ਦੱਸਦੇ ਹਨ ਕਿ ਜਦੋਂ ਇਨ੍ਹਾਂ ਪਰਿਵਾਰਾਂ ਨੇ ਸਿਲੰਡਰ ਭਰਾਉਣੇ ਬੰਦ ਕਰ ਦਿੱਤੇ ਤਾਂ ਕੇਂਦਰ ਸਰਕਾਰ ਦੇ ਪੈਰਾਂ ਹੇਠੋਂ ਜ਼ਮੀਨ ਨਿਕਲ ਗਈ।
                  ਦੱਸਦੇ ਹਨ ਕਿ ਗੈਸ ਏਜੰਸੀਆਂ ਤੇ ਡੰਡਾ ਚਾੜ੍ਹਿਆ ਗਿਆ ਕਿ ਉਹ ‘ਉਜਵਲਾ ਸਕੀਮ’ ਦੀ ਵਿੱਕਰੀ ਨੂੰ ਘਟਣ ਨਾ ਦੇਣ। ਸੂਤਰ ਦੱਸਦੇ ਹਨ ਕਿ ਬਹੁਤੀਆਂ ਗੈਸ ਏਜੰਸੀਆਂ ਵੱਲੋਂ ਬੋਗਸ ਵਿੱਕਰੀ ਦਿਖਾਈ ਜਾ ਰਹੀ ਹੈ। ਫਿਰ ਵੀ ਪੌਣੇ ਪੰਜ ਲੱਖ ਪਰਿਵਾਰ ਨੇ ਮੋਦੀ ਸਰਕਾਰ ਦੇ ਰਸੋਈ ਕੁਨੈਕਸ਼ਨਾਂ ’ਤੇ ਰੋਟੀ ਪਕਾਉਣੀ ਬੰਦ ਕਰ ਦਿੱਤੀ ਹੈ। ਲੋਕ ਸਭਾ ਚੋਣਾਂ ਦਾ ਸਮਾਂ ਦੂਰ ਨਹੀਂ ਜਿਸ ਕਰਕੇ ਹੁਣ ਧੜਾਧੜ ਕੁਨੈਕਸ਼ਨ ਦੇਣੇ ਜਾਰੀ ਹਨ। ਪਹਿਲੀ ਅਪਰੈਲ 2018 ਤੋਂ ਛੇ ਮਹੀਨਿਆਂ ਲਈ ਕੁਨੈਕਸ਼ਨ ਧਾਰਕਾਂ ਤੋਂ ਕੁਨੈਕਸ਼ਨ ਦੀ ਕਿਸ਼ਤ ਸਬਸਿਡੀ ਵਿਚ ਨਾ ਕੱਟਣ ਦੀ ਹਦਾਇਤ ਕਰ ਦਿੱਤੀ ਗਈ ਹੈ। ਦਿਲਚਸਪ ਤੱਥ ਹਨ ਕਿ ਪੰਜਾਬ ਵਿਚ 7 ਮਾਰਚ 2018 ਤੱਕ ‘ਉਜਵਲਾ ਸਕੀਮ’ ਦੇ 3.76 ਲੱਖ ਕੁਨੈਕਸ਼ਨ ਸਨ। ਲੰਘੇ ਛੇ ਮਹੀਨਿਆਂ ਵਿਚ ਪੰਜਾਬ ਵਿਚ ਇਸ ਸਕੀਮ ਤਹਿਤ 6.19 ਲੱਖ ਕੁਨੈਕਸ਼ਨ ਵੰਡ ਦਿੱਤੇ ਗਏ ਹਨ। ਹੁਣ ਤਾਂ ਇੱਕ ਇੱਕ ਪਰਿਵਾਰ ਨੂੰ ਦੋ ਦੋ ਕੁਨੈਕਸ਼ਨ ਵੀ ਦਿੱਤੇ ਜਾ ਰਹੇ ਹਨ। ਸ਼ਾਇਦ ਪੰਜਾਬ ਵਿਚ ਉਨ੍ਹੇ ਦਲਿਤ ਪਰਿਵਾਰ ਨਾ ਹੋਣ, ਜਿਨ੍ਹੇ ਕੁਨੈਕਸ਼ਨ ਵੰਡ ਦਿੱਤੇ ਹਨ।
                   ਪੰਜਾਬ ਵਿਚ ਕਰੀਬ 797 ਗੈਸ ਏਜੰਸੀਆਂ ਹਨ। ਵੱਡੀ ਜਾਂਚ ਹੋਵੇ ਤਾਂ ਇਸ ਸਕੀਮ ਵਿਚ ਵੱਡਾ ਘਾਲਾ ਮਾਲਾ ਸਾਹਮਣੇ ਆ ਸਕਦਾ ਹੈ। ਕੇਂਦਰ ਸਰਕਾਰ ਕੋਲ ਹੁਣ ਤੱਕ ਦੇਸ਼ ਭਰ ਚੋਂ ‘ਉਜਵਲਾ ਸਕੀਮ’ ਵਿਚ ਬੇਨਿਯਮੀਆਂ ਦੇ 152 ਕੇਸ ਪੁੱਜ ਚੁੱਕੇ ਹਨ। ਆਲ ਇੰਡੀਆ ਐਲਪੀਜੀ ਡਿਸਟ੍ਰੀਬਿਊਟਰਜ਼ ਫੈਡਰੇਸ਼ਨ ਪੰਜਾਬ ਦੇ ਸੂਬਾ ਪ੍ਰਧਾਨ ਗੁਰਪਾਲ ਸਿੰਘ ਮਾਨ ਦਾ ਪ੍ਰਤੀਕਰਮ ਸੀ ਕਿ ਪੰਜਾਬ ਵਿਚ ਜ਼ਮੀਨ ਸੱਚ ਜਾਣੇ ਬਿਨਾਂ ਵੱਡੇ ਪੱਧਰ ਤੇ ਇਸ ਸਕੀਮ ਤਹਿਤ ਕੁਨੈਕਸ਼ਨ ਦਿੱਤੇ ਗਏ ਹਨ। ਗੈਸ ਸਿਲੰਡਰ ਦੀ ਕੀਮਤ ਜੋ ਸਕੀਮ ਸ਼ੁਰੂ ਕਰਨ ਸਮੇਂ 560 ਰੁਪਏ ਸੀ, ਉਹ ਵਧ ਕੇ ਹੁਣ 840 ਰੁਪਏ ਹੋ ਗਈ ਹੈ। ਦਿਹਾੜੀਦਾਰ ਪਰਿਵਾਰਾਂ ਲਈ ਮਹਿੰਗੀ ਗੈਸ ਵਿੱਤੋਂ ਬਾਹਰ ਹੈ ਜਿਸ ਵਜੋਂ ਬਹੁਤੇ ਪਰਿਵਾਰਾਂ ਨੇ ਮੁੜ ਸਿਲੰਡਰ ਹੀ ਨਹੀਂ ਭਰਾਏ। ਦੂਸਰੀ ਤਰਫ਼ ਸਰਕਾਰੀ ਪੱਖ ਜਾਣਨ ਲਈ ਵਾਰ ਵਾਰ ‘ਉਜਵਲਾ ਸਕੀਮ’ ਦੇ ਦੋ ਨੋਡਲ ਅਫ਼ਸਰਾਂ ਨੂੰ ਫ਼ੋਨ ਕੀਤਾ ਪ੍ਰੰਤੂ ਉਨ੍ਹਾਂ ਚੁੱਕਿਆ ਨਹੀਂ।
                      ਦਲਿਤ ਪਰਿਵਾਰਾਂ ਨੂੰ ਗੁੰਮਰਾਹ ਕੀਤਾ : ਭਗਵੰਤ ਮਾਨ
ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਦਾ ਪ੍ਰਤੀਕਰਮ ਸੀ ਕਿ ਮੋਦੀ ਸਰਕਾਰ ਨੇ ਦਲਿਤ ਪਰਿਵਾਰਾਂ ਨੂੰ ਗੁੰਮਰਾਹ ਕੀਤਾ ਹੈ। ਮੁਫ਼ਤ ਆਖ ਕੇ ਵੰਡੇ ਕੁਨੈਕਸ਼ਨਾਂ ਦੀ ਰਾਸ਼ੀ ਲੋਨ ਵਜੋਂ ਖਪਤਕਾਰਾਂ ਤੇ ਪਾ ਦਿੱਤੀ ਗਈ ਹੈ ਜਿਸ ਦੀ ਕਿਸ਼ਤ ਸਬਸਿਡੀ ਚੋਂ ਕੱਟੀ ਜਾਣ ਲੱਗੀ ਹੈ। ਉਨ੍ਹਾਂ ਆਖਿਆ ਕਿ ਮੋਦੀ ਸਰਕਾਰ ਆਪਣੀ ਭੱਲ ਖ਼ਾਤਰ ਫਰਜੀਵਾੜਾ ਕਰ ਰਹੀ ਹੈ ਜਦੋਂ ਕਿ ਇਸ ਸਕੀਮ ਦੀ ਸਚਾਈ ਪ੍ਰਧਾਨ ਮੰਤਰੀ ਦੇ ਸੁਪਨਿਆਂ ਨਾਲ ਮੇਲ ਨਹੀਂ ਖਾ ਰਹੀ ਹੈ।

Wednesday, September 5, 2018

                             ਕਰਤਾਰੀ ਮਿਸ਼ਨ 
           ਵਿੱਦਿਆ ਦੇ ਮੰਦਰਾਂ ਦੇ ਸੱਚੇ ਪੁਜਾਰੀ
                              ਚਰਨਜੀਤ ਭੁੱਲਰ
ਬਠਿੰਡਾ : ਮੁੱਖ ਅਧਿਆਪਕ ਸੁਖਰਾਮ ਲਈ ਸਕੂਲ ਤੋਂ ਵੱਡਾ ਕੋਈ ਮੰਦਰ ਨਹੀਂ। ਉਸ ਨੇ ਸ਼ਾਗਿਰਦਾਂ ਲਈ ਜ਼ਿੰਦਗੀ ਦੇ ਸਭ ਸੁੱਖ ਆਰਾਮ ਤਿਆਗ ਦਿੱਤੇ ਹਨ। ਇਕੱਲਾ ਅਧਿਆਪਕ ਦਿਵਸ ਨਹੀਂ ਬਲਕਿ ਉਸ ਦਾ ਹਰ ਦਿਨ ਬੱਚਿਆਂ ਦੇ ਲੇਖੇ ਹੈ। ਲੁਧਿਆਣਾ ਦੇ ਪਿੰਡ ਭਾਮੀਆਂ ਖ਼ੁਰਦ ਦੇ ਸਰਕਾਰੀ ਸਕੂਲ ਦਾ ਗੇਟ ਪਿੰਡ ਦੇ ਗੁਰੂ ਘਰ ਨਾਲੋਂ ਪਹਿਲਾਂ ਖੁੱਲ੍ਹਦਾ ਹੈ। ਸੁਖਰਾਮ ਲਈ ਸਕੂਲ ਸਵੇਰ ਚਾਰ ਵਜੇ ਸ਼ੁਰੂ ਹੋ ਜਾਂਦਾ ਹੈ। ਸਕੂਲ ਬੰਦ ਹੋਣ ਦਾ ਕੋਈ ਸਮਾਂ ਨਹੀਂ। ਉਹ ਇਕੱਲੀ ਰਸਮੀ ਸਿੱਖਿਆ ਨਹੀਂ ਦਿੰਦਾ। ਜ਼ਿੰਦਗੀ ਦੀ ਪਹਿਲੀ ਕੱਚੀ ’ਚ ਬੱਚਿਆਂ ’ਚ ਇਖ਼ਲਾਕ ਦੀ ਨੀਂਹ ਵੀ ਰੱਖ ਰਿਹਾ ਹੈ। ਇਸ ਸਕੂਲ ’ਚ 204 ਬੱਚੇ ਪੜ੍ਹਦੇ ਹਨ ਤੇ ਸੁਖਰਾਮ ਕਰੀਬ ਦਸ ਵਰ੍ਹਿਆਂ ਤੋਂ ਇੱਥੇ ਪੜ੍ਹਾ ਰਿਹਾ ਹੈ।ਪ੍ਰਤੀਬੱਧਤਾ ਹੀ ਹੈ ਕਿ ਉਹ ਸਵੇਰੇ ਚਾਰ ਵਜੇ ਸਕੂਲ ਦਾ ਤਾਲਾ ਖੋਲ੍ਹਦਾ ਹੈ। ਮੁੱਖ ਅਧਿਆਪਕ ਸੁੱਖ ਰਾਮ ਪੂਰੇ ਕੈਂਪਸ ਵਿਚ ਝਾੜੂ ਲਾਉਂਦਾ ਹੈ। 5.30 ਵਜੇ ਸਵੇਰੇ ਬੱਚੇ ਆਉਣੇ ਸ਼ੁਰੂ ਹੁੰਦੇ ਹਨ। ਧਾਰਮਿਕ ਸੰਗੀਤ ਵੱਜਦਾ ਹੈ ਅਤੇ ਛੇ ਵਜੇ ਯੋਗ ਅਭਿਆਸ ਹੁੰਦਾ ਹੈ। ਉਹ ਸਕੂਲ ਤੋਂ ਪਹਿਲਾਂ ਬੱਚਿਆਂ ਨੂੰ ਰਚਨਾਤਮਿਕ ਕੰਮ ਕਰਾਉਂਦਾ ਹੈ। ਸੁੱਖ ਰਾਮ ਦੱਸਦਾ ਹੈ ਕਿ ਛੁੱਟੀ ਮਗਰੋਂ ਉਹ ਸਕੂਲ ਦੇ ਪਖਾਨੇ ਖ਼ੁਦ ਸਾਫ਼ ਕਰਦਾ ਹੈ। ਉਹ ਖ਼ੁਦ ਝੁੱਗੀ ’ਚ ਪਲਿਆ ਹੈ ਅਤੇ ਜ਼ਿੰਦਗੀ ਨੇ ਬੁਰਾ ਵਕਤ ਦੇਖਿਆ।
                   ਸਕੂਲੀ ਬੱਚਿਆਂ ਦੇ ‘ਪੜੋ੍ਹ ਪੰਜਾਬ’ ਦੇ ਨਤੀਜੇ ਸੌ ਫ਼ੀਸਦੀ ਹਨ ਅਤੇ ਸੁੰਦਰ ਲਿਖਾਈ ਤੇ ਪੇਂਟਿੰਗ ਵਿਚ ਮੋਹਰੀ ਹਨ। ਉਸ ਲਈ ਸਕੂਲ ਹੀ ਮੰਦਰ ਤੇ ਗੁਰਦੁਆਰਾ ਹੈ ਜੋ ਉਸ ਦੀ ਕਰਮਭੂਮੀ ਹੈ। ਸਕੂਲ ’ਚ ਝਾੜੂ ਲਾਉਣ ਨਾਲ ਸਕੂਨ ਮਿਲਦਾ ਹੈ। ਸੁਖਰਾਮ ਨੂੰ ਸਟੇਟ ਅਵਾਰਡ ਵੀ ਮਿਲ ਚੁੱਕਾ ਹੈ। ਡਿਪਟੀ ਡੀ.ਈ.ਓ ਲੁਧਿਆਣਾ ਚਰਨਜੀਤ ਜਲਾਲਣ ਨੇ ਉਸ ਨੂੰ ਚਾਨਣ ਮੁਨਾਰਾ ਦੱਸਿਆ। ਪਟਿਆਲਾ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲ ਗੋਬਿੰਦਪੁਰਾ ਦਾ ਹਿੰਦੀ ਅਧਿਆਪਕ ਨਵਦੀਪ ਸਿੰਘ ‘ਸਵੱਛ ਭਾਰਤ’ ਦਾ ਸੱਚਾ ਪਹਿਰੇਦਾਰ ਹੈ। ਉਹ ਸਕੂਲ ਦੇ ਪਖਾਨੇ ਖ਼ੁਦ ਸਾਫ਼ ਕਰਦਾ ਹੈ ਅਤੇ ਸਕੂਲ ਦੇ ਚੌਗਿਰਦਾ ਗਵਾਹੀ ਭਰਦਾ ਹੈ। ਉਹ ਦਾਨੀ ਸੱਜਣਾਂ ਦੀ ਇਮਦਾਦ ਨਾਲ ਸਕੂਲੀ ਲੋੜਾਂ ਪੂਰੀਆਂ ਕਰ ਰਿਹਾ ਹੈ। ਬਲਾਕ ਰਾਜਪੁਰਾ ਦੇ ਸਰਕਾਰੀ ਐਲੀਮੈਂਟਰੀ ਸਕੂਲ ਨਲਾਸ ਚੋਂ ਸੇਵਾ ਮੁਕਤ ਹੋਏ ਸ਼ਸ਼ੀ ਭੂਸ਼ਨ ਦਾ ਜਜ਼ਬਾ ਵੀ ਛੋਟਾ ਨਹੀਂ। ਉਹ ਸੇਵਾ ਮੁਕਤੀ ਮਗਰੋਂ ਸਕੂਲ ਇਸ ਮਕਸਦ ਨਾਲ ਜਾਂਦਾ ਹੈ ਕਿ ਕਿਤੇ ਮਿਹਨਤ ਨਾਲ ਉੱਚਾ ਚੁੱਕਿਆ ਪਾਣੀ ਮੁੜ ਨੀਵਾਂ ਨਾਲ ਚੱਲਿਆ ਜਾਵੇ। ਉਹ ਆਖਦਾ ਹੈ ਕਿ ਸਕੂਲ ਹੀ ਅਸਲ ਮੰਦਰ ਹੈ ਜਿਸ ’ਚ ਹੁਣ ਵੀ ਉਹ ਮਿਸ਼ਨ ਦੇ ਤੌਰ ’ਤੇ ਬੱਚਿਆਂ ਨੂੰ ਪੜਾ ਰਿਹਾ ਹੈ।
                  ਜਦੋਂ ਉਸ ਨੂੰ ਅਧਿਆਪਕਾਂ ਦੀ ਤੋਟ ਨੇ ਘਰ ਨਹੀਂ ਬੈਠਣ ਦਿੱਤਾ ਜਿਸ ਕਰਕੇ ਉਸ ਨੇ ਮੁੜ ਸਕੂਲ ਆਉਣਾ ਸ਼ੁਰੂ ਕਰ ਦਿੱਤਾ। ਉਸ ਨੇ ਮਰਤੇ ਦਮ ਤੱਕ ਸਕੂਲ ਆਉਣ ਦਾ ਪ੍ਰਣ ਕੀਤਾ ਹੈ। ਰਾਜਪੁਰਾ ਬਲਾਕ ਦੇ ਪ੍ਰਾਇਮਰੀ ਸਕੂਲ ਜੱਬੋਮਾਜਰਾ ਦੀ ਅਧਿਆਪਕਾ ਰਾਜ ਕੁਮਾਰੀ ਢਾਈ ਵਰੇ੍ਹ ਪਹਿਲਾਂ ਸੇਵਾ ਮੁਕਤ ਹੋਈ ਪ੍ਰੰਤੂ ਉਸ ਨੇ ਬੱਚਿਆਂ ਤੇ ਲੋਕਾਂ ਨੂੰੰ ਭਿਣਕ ਨਹੀਂ ਪੈਣ ਦਿੱਤੀ। ਉਸ ਦਾ ਪਿੰਡ ਅਤੇ ਸਕੂਲ ’ਚ ਏਨਾ ਮੋਹ ਹੈ ਕਿ ਪਿੰਡ ਵਾਸੀ ਇਹੋ ਆਖਦੇ ਹਨ ਕਿ ‘ਤੁਹਾਨੂੰ ਸੇਵਾ ਮੁਕਤੀ ਮਗਰੋਂ ਵੀ ਜਾਣ ਨਹੀਂ ਦੇਣਾ’। ਉਸ ਨੇ ਸੇਵਾ ਮੁਕਤੀ ਨੂੰ ਗੁਪਤ ਰੱਖ ਲਿਆ। ਸਕੂਲ ਵਿਚ 105 ਬੱਚੇ ਹਨ ਅਤੇ ਕੋਈ ਬੱਚੇ ਕਦੇ ਗ਼ੈਰਹਾਜ਼ਰ ਨਹੀਂ ਹੋਇਆ। ਗ਼ੈਰਹਾਜ਼ਰ  ਬੱਚਿਆਂ ਦੇ ਮਾਪਿਆਂ ਦੀ ਉਹ ਜੁਆਬ ਤਲਬੀ ਕਰਦੀ ਹੈ। ਹਰ ਖ਼ੁਸ਼ੀ ਗ਼ਮੀ, ਉਸ ਨੂੰ ਪਹਿਲਾਂ ਬੁਲਾਇਆ ਜਾਂਦਾ ਹੈ। ਉਹ ਆਖਦੀ ਹੈ ਕਿ ਬੱਚਿਆਂ ਤੋਂ ਵੱਡੀ ਕੋਈ ਸੇਵਾ ਨਹੀਂ ਜਿਸ ਕਰਕੇ ਉਹ ਆਖ਼ਰੀ ਸਾਹ ਤੱਕ ਸਕੂਲ ਵਿਚ ਸੇਵਾ ਕਰੇਗੀ। ਉਹ ਅੰਬਾਲਾ ਤੋਂ ਰੋਜ਼ਾਨਾ ਆਟੋ ’ਚ ਆਉਂਦੀ ਹੈ। ਮਾਨਸਾ ਦੇ ਸੀਨੀਅਰ ਸੈਕੰਡਰੀ ਸਕੂਲ ਹੋਡਲਾ ਕਲਾਂ ਦਾ ਅਧਿਆਪਕ ਕਰਨੈਲ ਵੈਰਾਗੀ ਹਫ਼ਤੇ ਚੋਂ ਦੋ ਦਿਨ ਸਕੂਲ ਸਮੇਂ ਮਗਰੋਂ ਬੱਚਿਆਂ ਦੇ ਘਰਾਂ ਵਿਚ ਜਾਂਦਾ ਹੈ।
                 ਮਾਪਿਆਂ ਨੂੰ ਫੀਡ ਬੈਕ ਦਿੰਦਾ ਹੈ ਅਤੇ ਬੱਚਿਆਂ ਦੀਆਂ ਮੁਸ਼ਕਲਾਂ ਜਾਣਦਾ ਹੈ। ਪਹਿਲਾਂ ਉਹ ਸਰਦੀਆਂ ਦੇ ’ਚ ਬੱਚਿਆਂ ਦੇ ਘਰੋਂ ਘਰੀਂ ਜਾ ਕੇ ਸਵੇਰੇ ਚਾਰ ਵਜੇ ਕੁੰਡੇ ਖੜਕਾ ਕੇ ਬੱਚਿਆਂ ਨੂੰ ਪੜ੍ਹਨ ਲਈ ਜਗਾਉਂਦਾ ਸੀ ਪ੍ਰੰਤੂ ਹੁਣ ਉਹ  ਬੁਢਲਾਡਾ ਰਹਿਣ ਲੱਗਾ ਹੈ। ਬੁਢਲਾਡਾ ਦੇ ਪਿੰਡ ਜੀਤਸਰ ਦੇ ਸਕੂਲ ਦੇ ਅਧਿਆਪਕ ਸਤਪਾਲ ਸਿੰਘ ਨੇ ਸਕੂਲ ਵਿਚ ਅੰਗਰੇਜ਼ੀ ਮਾਧਿਅਮ ਸ਼ੁਰੂ ਕੀਤਾ ਹੈ। ਲਾਗਲੇ ਪਿੰਡਾਂ ਦੇ ਲੋਕ ਆਪਣੇ ਬੱਚਿਆਂ ਨੂੰ ਸਪੈਸ਼ਲ ਬੱਸ ਲਗਾ ਕੇ ਇਸ ਸਰਕਾਰੀ ਸਕੂਲ ਵਿਚ ਪੜ੍ਹਨ ਲਈ ਭੇਜਦੇ ਹਨ। ਬਠਿੰਡਾ ਦੇ ਪਿੰਡ ਲੱਖੀ ਜੰਗਲ ਦੇ ਸਕੂਲ ਅਧਿਆਪਕ ਕੁਲਵਿੰਦਰ ਸਿੰਘ ਨੇ ਪੱਲਿਓਂ ਖਰਚਾ ਕਰਕੇ ਸਕੂਲ ਦਾ ਮੁਹਾਂਦਰਾ ਬਦਲ ਦਿੱਤਾ। ਉਸ ਨੇ ਬੱਚਿਆਂ ਲਈ ਵਿਸ਼ੇਸ਼ ਬੱਘੀ ਲਗਾ ਦਿੱਤੀ ਹੈ ਤੇ ਗ਼ੈਰਹਾਜ਼ਰ ਬੱਚਿਆਂ ਨੂੰ ਅਧਿਆਪਕ ਖ਼ੁਦ ਘਰੋਂ ਲੈ ਕੇ ਆਉਂਦਾ ਹੈ।
                          ਇੱਕ ਸੇਵਾਦਾਰ ਇਹ ਵੀ..
ਪਿੰਡ ਕਬੂਲਪੁਰ (ਪਟਿਆਲਾ) ਦੇ ਸਕੂਲ ਦੇ ਸੇਵਾਦਾਰ ਦੀ ਸੇਵਾ ’ਚ ਕੋਈ ਕਮੀ ਨਹੀਂ। ਦਸ ਵਰੇ੍ਹ ਪਹਿਲਾਂ ਸੇਵਾ ਮੁਕਤ ਹੋਇਆ ਪ੍ਰੰਤੂ ਅੱਜ ਵੀ ਸਕੂਲ ਵਿਚ ਸੇਵਾ ਨਿਭਾ ਰਿਹਾ ਹੈ। ਆਖ਼ਰੀ ਸਾਹ ਤੱਕ ਸਕੂਲ ਸੇਵਾ ਦਾ ਜਜ਼ਬਾ ਹੈ। ਮੁਕਤਸਰ ਤੋਂ 17 ਵਰੇ੍ਹ ਪਹਿਲਾਂ ਅਮੀਰ ਸਿੰਘ ਬਤੌਰ ਬਲਾਕ ਸਿੱਖਿਆ ਅਫ਼ਸਰ ਸੇਵਾ ਮੁਕਤ ਹੋਇਆ। ਘਰ ਬੈਠਣ ਦੀ ਥਾਂ ਉਹ ਸ਼ਹਿਰ ਦੀ ਬੈਂਕ ਅੱਗੇ ਮੇਜ਼ ਕੁਰਸੀ ਲਾ ਕੇ ਬੈਠ ਗਿਆ। ਕਦੇ ਕਿਸੇ ਨੂੰ ਫਾਰਮ ਭਰਨ ਦੀ ਦਿੱਕਤ ਨਹੀਂ ਆਉਣ ਦਿੱਤੀ। ਹੁਣ ਉਸ ਨੂੰ ਅਧਰੰਗ ਹੋ ਗਿਆ ਹੈ।

Tuesday, September 4, 2018

                        ਸਿਆਸੀ ਚੁੱਪ
    ਦਾਸ ਲੋਚਦਾ ਪਾਸ਼ ਦੀ ਪੱਤ ਰਹਿ ਜੇ...
                        ਚਰਨਜੀਤ ਭੁੱਲਰ
ਬਠਿੰਡਾ : ਸਾਬਕਾ ਐਮ.ਪੀ ਗੁਰਦਾਸ ਬਾਦਲ ਹੁਣ ਆਪਣੇ ਭਰਾ ਪ੍ਰਕਾਸ਼ ਸਿੰਘ ਬਾਦਲ ਖ਼ਿਲਾਫ਼ ਬੇਅਦਬੀ ਮਾਮਲੇ ’ਤੇ ਮੂੰਹ ਖੋਲ੍ਹਣ ਨੂੰ ਤਿਆਰ ਨਹੀਂ। ਜਦੋਂ ਬੇਅਦਬੀ ਮਾਮਲੇ ’ਤੇ ਸਾਬਕਾ ਮੁੱਖ ਮੰਤਰੀ ਬਾਦਲ ਸਭਨਾਂ ਧਿਰਾਂ ਦੇ ਨਿਸ਼ਾਨੇ ’ਤੇ ਹਨ ਤਾਂ ਉਦੋਂ ਇਸ ਬਿਪਤਾ ਦੀ ਘੜੀ ’ਚ ਦਾਸ ਨੇ ਆਪਣੇ ਭਰਾ ਪਾਸ਼ ਪ੍ਰਤੀ ਇੱਕ ਲਫ਼ਜ਼ ਵੀ ਨਹੀਂ ਬੋਲਣਾ ਚਾਹੁੰਦੇ ਹਨ। ਬਾਦਲ ਪਰਿਵਾਰ ’ਚ ਸਿਆਸੀ ਲਕੀਰਾਂ ਕਿਸੇ ਤੋਂ ਗੁੱਝੀਆਂ ਨਹੀਂ ਪ੍ਰੰਤੂ ਇਹੋ ਜਾਪਦਾ ਹੈ ਕਿ ਇਹ ਲਕੀਰ ‘ਦਾਸ’ ਅਤੇ ‘ਪਾਸ਼’ ਦੇ ਮੋਹ ’ਚ ਵਲ ਨਹੀਂ ਪਾ ਸਕੀ। ਮਾਮਲਾ ਜਦੋਂ ਸ੍ਰੀ ਗੁਰੂ ਗੰ੍ਰਥ ਸਾਹਿਬ ਜੀ ਦੀ ਬੇਅਦਬੀ ਨਾਲ ਜੁੜਿਆ ਹੋਇਆ ਹੈ ਤਾਂ ਗੁਰਦਾਸ ਬਾਦਲ ਨੇ ਇਸ ਮਾਮਲੇ ’ਤੇ ਚੁੱਪ ਵੱਟਣ ’ਚ ਹੀ ਭਲੀ ਸਮਝੀ। ਪਤਾ ਲੱਗਾ ਹੈ ਕਿ ਕਰੀਬ 10 ਦਿਨਾਂ ਮਗਰੋਂ ਸਾਬਕਾ ਮੁੱਖ ਮੰਤਰੀ ਬਾਦਲ ਅੱਜ ਆਪਣੇ ਪਿੰਡ ਬਾਦਲ ਪਰਤਣ ਲੱਗੇ ਹਨ। ਜਸਟਿਸ ਰਣਜੀਤ ਸਿੰਘ ਕਮਿਸ਼ਨ ਦੀ ਰਿਪੋਰਟ ਮਗਰੋਂ ਬਾਦਲ ਪਰਿਵਾਰ ਨੂੰ ਵਿਰੋਧੀ ਧਿਰਾਂ ਅਤੇ ਪੰਜਾਬ ਦੇ ਲੋਕਾਂ ਨੇ ਕਟਹਿਰੇ ’ਚ ਖੜ੍ਹਾ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।
                  ਪੰਜਾਬੀ ਟ੍ਰਿਬਿਊਨ ਤਰਫ਼ੋਂ ਇਸ ਗੰਭੀਰ ਮਸਲੇ ’ਤੇ ਸਾਬਕਾ ਐਮ.ਪੀ ਗੁਰਦਾਸ ਸਿੰਘ ਬਾਦਲ ਦਾ ਪ੍ਰਤੀਕਰਮ ਜਾਣਨਾ ਚਾਹਿਆ ਤਾਂ ਉਨ੍ਹਾਂ ਨੇ ‘ਇੱਕ ਚੁੱਪ ਸੌ ਸੁੱਖ’ ਦੀ ਨੀਤੀ ਅਪਣਾ ਲਈ। ਉਨ੍ਹਾਂ ਨਾ ਕੱੁਝ ਚੰਗਾ ਆਖਿਆ ਅਤੇ ਨਾ ਹੀ ਕੱੁਝ ਮਾੜਾ। ਗੁਰਦਾਸ ਬਾਦਲ ਨੂੰ ਜਦੋਂ ਪਹਿਲਾਂ ਕਾਂਗਰਸ ਸਰਕਾਰ ਦੀ ਹੁਣ ਤੱਕ ਦੀ ਕਾਰਗੁਜ਼ਾਰੀ ਬਾਰੇ ਪੁੱਛਿਆ ਤਾਂ ਦਾਸ ਨੇ ਆਖਿਆ ਕਿ ‘ਪੰਜਾਬ ਦੇ ਲੋਕਾਂ ਤੋਂ ਪੁੱਛੋ’। ਜਦੋਂ ਜਸਟਿਸ ਰਣਜੀਤ ਸਿੰਘ ਕਮਿਸ਼ਨ ਦੀ ਰਿਪੋਰਟ ਬਾਰੇ ਪੁੱਛਿਆ ਤਾਂ ਉਨ੍ਹਾਂ ਆਖਿਆ ਕਿ ‘ ਮੈਂ ਤਾਂ ਸਿਆਸਤ ਦਾ ਕੰਮ ਹੀ ਛੱਡ ਦਿੱਤਾ’। ਜਦੋਂ ਕਮਿਸ਼ਨ ਦੀ ਰਿਪੋਰਟ ਬਾਰੇ ਦੁਬਾਰਾ ਜਾਣਨਾ ਚਾਹਿਆ ਤਾਂ ਗੁਰਦਾਸ ਬਾਦਲ ਨੇ ਪੂਰੀ ਤਰ੍ਹਾਂ ਗੱਲ ਤੋਂ ਟਾਲ਼ਾ ਵੱਟ ਲਿਆ ਅਤੇ ਆਖਿਆ ‘ਮੇਰੀ ਤਾਂ ਹੁਣ ਨੱਬੇ ਸਾਲ ਦੀ ਉਮਰ ਹੋ ਗਈ ਹੈ, ਹੁਣ ਮੈਂ ਕਿਸੇ ਚੋਣ ’ਚ ਨਹੀਂ ਜਾਣਾ, ਮੈਂ ਤਾਂ ਰਿਟਾਇਰ ਹੋ ਗਿਆ ਹਾਂ।’ ਦੱਸਣਯੋਗ ਹੈ ਕਿ ਮਨਪ੍ਰੀਤ ਬਾਦਲ ਦੇ ਸਿਆਸੀ ਰਾਹ ਵੱਖ ਹੋਣ ਮਗਰੋਂ ਗੁਰਦਾਸ ਬਾਦਲ ਭਾਵੇਂ ਸਿਆਸੀ ਮੈਦਾਨ ’ਚ ਆਪਣੇ ਭਰਾ ਖ਼ਿਲਾਫ਼ ਵਿਚਰੇ ਪ੍ਰੰਤੂ ਇੱਕ ਦੂਜੇ ਨੇ ਆਪਣੇ ਮੋਹ ਦੀ ਲੱਜ ਨੂੰ ਕੋਈ ਆਂਚ ਨਹੀਂ ਆਉਣ ਦਿੱਤੀ।
                  ਗੁਰਦਾਸ ਬਾਦਲ ਦੇ ਪ੍ਰਤੀਕਰਮ ਦੇਣ ਦੇ ਨਜ਼ਰੀਏ ਤੋਂ ਸਾਫ਼ ਜਾਪਿਆ ਕਿ ਉਹ ਬੇਅਦਬੀ ਮਾਮਲੇ ’ਤੇ ਕੋਈ ਟਿੱਪਣੀ ਨਹੀਂ ਕਰਨਾ ਚਾਹੁੰਦੇ। ਏਦਾ ਮਹਿਸੂਸ ਹੁੰਦਾ ਹੈ ਕਿ ਦਾਸ ਇਸ ਮਾਮਲੇ ’ਤੇ ਆਪਣੇ ਭਰਾ ਦੇ ਜ਼ਖਮ ਕੁਰੇਦਣਾ ਨਹੀਂ ਚਾਹੁੰਦੇ। ਸਿਆਸੀ ਵਖਰੇਵੇਂ ਜਿੰਨੇ ਮਰਜ਼ੀ ਹੋਣ, ਸਰੀਰਕ ਦੁੱਖ ਸੁੱਖ ’ਚ ਦਾਸ ਤੇ ਪਾਸ਼ ਨੇ ਕਦੇ ਵੀ ਰਿਸ਼ਤਿਆਂ ਦੀ ਲਛਮਣ ਰੇਖਾ ਨਹੀਂ ਉਲੰਘੀ। ਜਦੋਂ ਮਨਪ੍ਰੀਤ ਬਾਦਲ ਸਿਆਸੀ ਤੌਰ ਤੇ ਅਲੱਗ ਹੋਇਆ ਤਾਂ ਉਦੋਂ ਵੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਸਭ ਤੋਂ ਵੱਡਾ ਦੁੱਖ ਭਰਾ ਨਾਲੋਂ ਟੁੱਟ ਜਾਣ ਨੂੰ ਦੱਸਿਆ ਸੀ। ਦੱਸਣਯੋਗ ਹੈ ਕਿ ਸਾਬਕਾ ਐਮ.ਪੀ ਗੁਰਦਾਸ ਬਾਦਲ ਆਪਣੇ ਲੜਕੇ ਮਨਪ੍ਰੀਤ ਬਾਦਲ ਦੇ ਚੋਣ ਹਲਕੇ ਵਿਚ ਚੋਣਾਂ ਸਮੇਂ ਵਿਚਰਦੇ ਰਹੇ ਹਨ ਪ੍ਰੰਤੂ ਹੁਣ ਕਦੇ ਨਜ਼ਰ ਨਹੀਂ ਪਏ ਹਨ।  ਉਨ੍ਹਾਂ ਦੀ ਨੂੰਹ ਵੀਨੂੰ ਬਾਦਲ ਜਦੋਂ ਵੀ ਸਮਾਂ ਮਿਲੇ , ਬਠਿੰਡਾ ਸ਼ਹਿਰ ਦੇ ਸਮਾਗਮਾਂ ਵਿਚ ਸ਼ਮੂਲੀਅਤ ਕਰਦੇ ਹਨ। ਗੁਰਦਾਸ ਬਾਦਲ ਦਾ ਪੋਤਾ ਅਰਜਨ ਬਾਦਲ ਵੀ ਆਪਣੇ ਬਾਪ ਦੇ ਹਲਕੇ ਵਿਚ ਵਿਚਰਦਾ ਰਿਹਾ ਹੈ। ਗੁਰਦਾਸ ਬਾਦਲ ਨੇ ਦੱਸਿਆ ਕਿ ਅਰਜਨ ਦੇ ਪੋਲੋ ਖੇਡਦੇ ਦੇ ਪੈਰ ਵਿਚ ਮੋਚ ਵਗੈਰਾ ਆ ਗਈ ਸੀ ਅਤੇ ਉਹ ਹੁਣ ਵਾਪਸ ਪੜ੍ਹਨ ਵਾਸਤੇ ਅਮਰੀਕਾ ਚਲਾ ਗਿਆ ਹੈ।


Monday, September 3, 2018

                                                         ਵਿਰਸੇ ਦੇ ਸ਼ੇਰ ਬੱਗੇ 
                                ਨੌਜਵਾਨਾਂ ਦੀ ਜਿੱਦ ਨੇ ਖੰਡਰਾਂ ’ਚ ਪਾਈ ਜਾਨ
                                                          ਚਰਨਜੀਤ ਭੁੱਲਰ
ਬਠਿੰਡਾ  : ਬਠਿੰਡਾ ਜ਼ਿਲ੍ਹੇ ਦੇ ਕਸਬਾ ਫੂਲ ’ਚ ਜਵਾਨੀ ਦੀ ਜ਼ਿੱਦ ਨੇ ਅਤੀਤ ਦੀ ਇੱਕ ਨਿਸ਼ਾਨੀ ਨੂੰ ਬਚਾ ਲਿਆ। ਜਦੋਂ ਨੌਜਵਾਨਾਂ ਦੀ ਟੋਲੀ ਨੂੰ ਜਨੂੰਨ ਚੜ੍ਹਿਆ ਤਾਂ ਉਨ੍ਹਾਂ ਨੇ ਟਾਊਨ ਦੇ ‘ਕਿਲਾ ਮੁਬਾਰਕ’ ਦੇ ਖੰਡਰ ਨਾਲ ਮੱਥਾ ਲਾ ਲਿਆ। ਗੌਰਵਮਈ ਇਤਿਹਾਸ ਤੋਂ ਨਵਾਂ ਪੋਚ ਕਿਤੇ ਵਿਰਵਾ ਨਾ ਰਹਿ ਜਾਏ, ਪੰਦਰਾਂ ਨੌਜਵਾਨਾਂ ਨੇ ਕਰੀਬ ਛੇ ਮਹੀਨੇ ਪਹਿਲਾਂ ਆਪੋ ਆਪਣੀ ਜੇਬ ’ਚ ਹੱਥ ਮਾਰਿਆ। ਸਿਰਫ਼ 80 ਰੁਪਏ ਜੇਬਾਂ ਚੋਂ ਨਿਕਲੇ। ਕਰੋੜਾਂ ਦੇ ਖ਼ਰਚੇ ਅੱਗੇ ਇਨ੍ਹਾਂ ਨੌਜਵਾਨਾਂ ਨੂੰ ਅੱਸੀ ਰੁਪਏ ਕੋਈ ਛੋਟੀ ਦੌਲਤ ਨਾ ਜਾਪੇ। ਅੰਦਰਲੇ ਠਾਠਾਂ ਮਾਰਦੇ ਜਜ਼ਬੇ ਨੇ ਨੌਜਵਾਨਾਂ ਨੂੰ ਨਵੇਂ ਮਿਸ਼ਨ ਦੇ ਰਾਹੀ ਬਣਾ ਦਿੱਤਾ। ਫਿਰ ਕੀ ਸੀ ਕਿ ਪੂਰੇ ਟਾਊਨ ’ਚ ਢੋਲ ਵੱਜ ਗਏ ਕਿ ‘ਕੱਲ੍ਹ ਦੇ ਨਿਆਣੇ’ ਹੁਣ ਵੱਡੇ ਸਿਆਣੇ ਬਣਦੇ ਨੇ। ਬਿਨਾਂ ਸਰਕਾਰੀ ਇਮਦਾਦ ਤੇ ਬਿਨਾਂ ਵੱਡੀ ਢਾਰਸ ਤੋਂ ਇਨ੍ਹਾਂ ਨੌਜਵਾਨਾਂ ਨੇ ‘ਕਿਲਾ ਮੁਬਾਰਕ’ ਦਾ ਮੁਹਾਂਦਰਾ ਬਦਲ ਦਿੱਤਾ। ਤੈਰਵੀਂ ਨਜ਼ਰ ਮਾਰੀਏ ਤਾਂ ਬਾਬਾ ਫੂਲ ਨੇ 1712 ’ਚ ਕਸਬਾ ਫੂਲ ’ਚ ਕੱਚੇ ਕਿਲੇ ਦਾ ਨਿਰਮਾਣ ਕਰਾਇਆ ਜਿੱਥੇ ਅੱਜ ਵੀ ਫੂਲ ਘਰਾਣੇ ਦੇ ਸੱਤ ਚੁੱਲ੍ਹੇ ਹਨ। ਰਿਆਸਤ ਨਾਭਾ ਦਾ ਜ਼ਿਲ੍ਹਾ ਮੁਕਾਮ ਫੂਲ ਰਿਹਾ ਹੈ। ਰਾਜਾ ਹੀਰਾ ਸਿੰਘ ਨਾਭਾ ਕਿਲੇ ਅੰਦਰ ਖੁੱਲ੍ਹਾ ਦਰਬਾਰ ਲਾਉਂਦੇ ਸਨ ਤੇ ਰਾਣੀਆਂ ਦੀ ਠਹਿਰ ਕਿਲੇ ਅੰਦਰ ਹੁੰਦੀ ਸੀ।
                     ਚਰਚੇ ਰਹੇ ਹਨ ਕਿ ਕਿਲੇ ਅੰਦਰਲੇ ਖੂਹ ਦਾ ਪਾਣੀ ਨਾਭੇ ਜਾਇਆ ਕਰਦਾ ਸੀ। ਵਕਤ ਦੀ ਗਰਦਿਸ਼ ’ਚ ਸਭ ਕੱੁਝ ਗੁਆਚ ਗਿਆ। ਕਿਲਾ ਖੰਡਰ ਬਣ ਗਿਆ ਤੇ ਮੁੱਖ ਗੇਟ ਦੇ ਦਰਵਾਜ਼ੇ ’ਤੇ ਆਰਜ਼ੀ ਪਖਾਨੇ ਬਣਾ ਦਿੱਤੇ ਤੇ ਚਾਰੇ ਪਾਸੇ ਰੇਹੜੀਆਂ ਨੇ ਰਾਹ ਰੋਕ ਦਿੱਤੇ। ਵਰ੍ਹਿਆਂ ਤੋਂ ਕਿਲੇ ਅੰਦਰ ਸਿਵਾਏ ਨਸ਼ੇੜੀਆਂ ਤੋਂ ਕੋਈ ਗਿਆ ਨਹੀਂ ਸੀ। ਵੱਡੇ ਵੱਡੇ ਚਬੂਤਰੇ ਖੁਰ ਰਹੇ ਸਨ। ਨੌਜਵਾਨ ਹੁਸਨ ਸ਼ਰਮਾ ਨੂੰ ਕਿਲਾ ਮੁਬਾਰਕ ਦੇ ਬੰਦੇ ਦਰਵਾਜ਼ੇ ਚੁਭਨ ਲੱਗੇ। ਉਸ ਨੇ ਦੋਸਤਾਂ ਨੂੰ ਆਪਣੇ ਮਨ ਦੀ ਦੱਸੀ। ਦੇਖਦਿਆਂ ਦੇਖਦਿਆਂ ਜਦੋਂ ਨੌਜਵਾਨਾਂ ਦੇ ਦਿਲ ਖੁੱਲ੍ਹ ਗਏ ਤਾਂ ਇਸ ਕਿਲੇ ਦੇ ਗੇਟ ਖੁੱਲ੍ਹਣ ’ਚ ਵੀ ਦੇਰੀ ਨਾ ਲੱਗੀ। ਜਨੂੰਨ ਦੇ ਟੋਏ ਵਿਚ ਲਾਈ ਛਲਾਂਗ ਨੇ ਇਨ੍ਹਾਂ ਨੌਜਵਾਨਾਂ ਨੂੰ ਏਡੀ ਥਾਪੀ ਦਿੱਤੀ ਕਿ ਟਿੱਚਰਾਂ ਕਰਨ ਵਾਲੇ ਵੀ ਉਨ੍ਹਾਂ ਦੇ ਉੱਦਮ  ਨੂੰ ਸਲਾਮ ਕਰਨ ਲੱਗੇ। ਹੁਸ਼ਨ ਸ਼ਰਮਾ ਨੇ ਦੱਸਿਆ ਕਿ ਜਦੋਂ ਖੰਡਰ ਹੋ ਰਹੀ ਵਿਰਾਸਤ ਝੱਲੀ ਨਾ ਗਈ ਤਾਂ ਉਨ੍ਹਾਂ ਨੇ 80 ਰੁਪਏ ਇਕੱਠੇ ਕਰਕੇ ਮਿਸ਼ਨ ਦੀ ਸ਼ੁਰੂਆਤ ਕੀਤੀ। ਫਿਰ ਇੱਕ ਘੰਟੇ ’ਚ ਉਨ੍ਹਾਂ ਪੂਰੇ ਬਾਜ਼ਾਰ ਦਾ ਚੱਕਰ ਲਾਇਆ। 22 ਹਜ਼ਾਰ ਇਕੱਠੇ ਹੋ ਗਏ। ਗੇਟ ਅੱਗਿਓਂ ਪਹਿਲਾਂ ਨਜਾਇਜ਼ ਕਬਜ਼ੇ ਹਟਾਉਣੇ ਪਹਿਲੀ ਪ੍ਰੀਖਿਆ ਸੀ।
           ਮੁੱਖ ਗੇਟ ’ਤੇ ਪਖਾਨੇ ਬਣੇ ਹੋਏ ਸਨ। ਗੇਟ ਖੋਲ੍ਹਿਆ ਤਾਂ ਅੰਦਰ ਨਰਕ ਦੀ ਤਸਵੀਰ ਦਿੱਖੀ। ਬਦਬੋ ਨੇ ਰਾਹ ਰੋਕੇ ਪ੍ਰੰਤੂ ਸਭਨਾਂ ਨੌਜਵਾਨਾਂ ਨੇ ਹੱਥੀ ਸਭ ਗੰਦ ਨੂੰ ਕੱਢਿਆ। ਕਰੀਬ 400 ਤੋਂ ਉੱਪਰ ਟਰਾਲੀ ਗੰਦਾ ਮਲਬਾ ਨਿਕਲਿਆ। 21 ਮਾਰਚ 2018 ਨੂੰ ਅਰੰਭੇ ਕੰਮ ਦਾ ਹੁਣ ਫਲ ਦਿੱਖਣ ਲੱਗਾ ਹੈ। ਨੌਜਵਾਨ ਅਮਰਿੰਦਰ ਤੇ ਗੋਪਾਲ ਸ਼ਰਮਾ ਨੇ ਦੱਸਿਆ ਕਿ ਜਦੋਂ ਮਲਬਾ ਚੁੱਕਦੇ ਸਨ ਤਾਂ ਸੱਪ ਹੋਰ ਜਾਨਵਰ ਵੱਡੀ ਗਿਣਤੀ ਵਿਚ ਨਿਕਲੇ। ‘ਵੱਡੀ ਚੁਣੌਤੀ ਸੀ ਤੇ ਕੋਈ ਰਾਹ ਮੋਕਲਾ ਨਹੀਂ ਸੀ, ਵਿਰੋਧ ਵੀ ਉੱਠਿਆ ਤੇ ਵਿਭਾਗਾਂ ਦੇ ਝਮੇਲੇ ਵੀ’ , ਪ੍ਰਭ ਅਵਿਨਾਸ਼ ਦਾ ਇਹ ਪ੍ਰਤੀਕਰਮ ਸੀ। ਅੰਦਰ ਏਨੀ ਗੰਦਗੀ ਸੀ ਕਿ ਖੜ੍ਹਾ ਹੋਣਾ ਮੁਸ਼ਕਲ ਸੀ। ਬੀਂਡੀ ਜੁੜੇ ਇਨ੍ਹਾਂ ਜਵਾਨਾਂ ਦੀ ਹਿੰਮਤ ਵਜੋਂ ਕਿਲੇ ਦਾ ਚਿਹਰਾ ਮੋਹਰਾ ਬਦਲਣ ਲੱਗਾ ਹੈ।  ਕਿਲਾ ਮੁਬਾਰਕ ਦਾ ਮੁੱਖ ਗੇਟ ਸੰਵਰ ਗਿਆ ਹੈ ਤੇ ਕਿਧਰੇ ਕੋਈ ਰਸਤੇ ਵਿਚ ਨਜਾਇਜ਼ ਕਬਜ਼ਾ ਨਹੀਂ। ਚਬੂਤਰੇ ਡਿਗਣੋਂ ਬਚਾ ਲਏ ਹਨ। ਮਲਬੇ ਚੋਂ ਦੋ ਖ਼ਜ਼ਾਨੇ ਦੇ ਗੇਟ ਲੱਭੇ ਜਿਨ੍ਹਾਂ ਨੂੰ ਮੁੜ ਦੋ ਖ਼ਜ਼ਾਨੇ ਵਾਲੇ ਕਮਰਿਆਂ ਨੂੰ ਲਗਾ ਦਿੱਤਾ ਹੈ। ਨੌਜਵਾਨ ਰਾਹੁਲ ਤਲਵਾੜ ਤੇ ਜਸਕਰਨ ਢਿੱਲੋਂ ਨੇ ਦੱਸਿਆ ਕਿ ਕਿਲਾ ਨਸ਼ੇੜੀਆਂ ਦਾ ਅੱਡਾ ਬਣਿਆ ਹੋਇਆ ਸੀ ਅਤੇ ਉਨ੍ਹਾਂ ਨੇ ਨਸ਼ੇੜੀਆਂ ਦਾ ਇੱਕ ਟਿਕਾਣਾ ਵੀ ਖ਼ਤਮ ਕੀਤਾ।
                ਇਨ੍ਹਾਂ ਨੌਜਵਾਨਾਂ ਨੇ ਕਿਸੇ ਰੱਫੜ ਤੋਂ ਬਚਾਓ ਲਈ ‘ਫੂਲਕੀਆਂ ਰਿਆਸਤ ਵੈੱਲਫੇਅਰ ਸੁਸਾਇਟੀ’ ਬਣਾ ਲਈ ਹੈ ਅਤੇ ਹਰ ਦਾਨੀ ਸੱਜਣ ਨੂੰ ਬਕਾਇਦਾ ਰਸੀਦ ਦਿੱਤੀ ਜਾਂਦੀ ਹੈ। ਮੋਹਰੀ ਨੌਜਵਾਨ ਹੁਸਨ ਸ਼ਰਮਾ ਤੇ ਦਰਸ਼ਨ ਸ਼ਰਮਾ ਨੇ ਦੱਸਿਆ ਕਿ ਜਦੋਂ ਨਿਊਜ਼ੀਲੈਂਡ ਤੋਂ ਪਿੰ੍ਰਸ ਮਾਨ ਨੇ 25 ਹਜ਼ਾਰ ਭੇਜ ਦਿੱਤੇ ਅਤੇ ਪਿੰਡ ਦਿਆਲਪੁਰਾ ਭਾਈਕਾ ਦੇ ਲੋਕਾਂ ਨੇ 1.05 ਲੱਖ ਦਿੱਤੇ ਤਾਂ ਉਨ੍ਹਾਂ ਨੂੰ ਲੱਗਾ ਕਿ ਖੁੱਭਿਆ ਗੱਡਾ ਹੁਣ ਕੱਢਣਾ ਕੋਈ ਅੌਖਾ ਨਹੀਂ। ਨੌਜਵਾਨ ਦੱਸਦੇ ਹਨ ਕਿ ਪੰਜ ਮਹੀਨੇ ਤੋਂ ਕਿੱਲੇ ਅੰਦਰ ਮਿਸਤਰੀ ਲੱਗੇ ਹੋਏ ਹਨ ਅਤੇ ਕੋਸ਼ਿਸ਼ ਹੈ ਕਿ ਮੂਲ ਢਾਂਚਾ ਸੁਰੱਖਿਅਤ ਰੱਖਿਆ ਜਾ ਸਕੇ। ਉਹ ਖ਼ੁਦ ਸਾਰਾ ਕੰਮ ਹੱਥੀਂ ਕਰਦੇ ਹਨ ਅਤੇ ਭੱਠੇ ਤੋਂ ਖ਼ੁਦ ਇੱਟਾਂ ਭਰ ਦੇ ਲਿਆਉਂਦੇ ਹਨ। ਹੁਣ ਤੱਕ ਇਨ੍ਹਾਂ ਨੌਜਵਾਨਾਂ ਨੇ ਛੇ ਲੱਖ ਰੁਪਏ ਇਕੱਠੇ ਕੀਤੇ ਹਨ ਜਿਨ੍ਹਾਂ ਚੋਂ 5.89 ਲੱਖ ਖ਼ਰਚ ਕੀਤੇ ਜਾ ਚੁੱਕੇ ਹਨ। ਇੱਕ ਰੇਹੜੀ ਵਾਲੇ ਨੇ ਵੀ ਇਨ੍ਹਾਂ ਨੌਜਵਾਨਾਂ ਨੂੰ ਦਸ ਰੁਪਏ ਦਾ ਨੋਟ ਦਿੱਤਾ ਅਤੇ ਇੱਕ ਵੀਲ ਚੇਅਰ ਵਾਲਾ ਅਪਾਹਜ 50 ਰੁਪਏ ਦਾ ਨੋਟ ਦੇ ਕੇ ਗਿਆ।
                 ਪੁਰਾਤਤਵ ਵਿਭਾਗ ਦੇ ਅਧਿਕਾਰੀ ਵੀ ਕਿਲੇ ਦਾ ਗੇੜਾ ਮਾਰ ਗਏ ਹਨ ਅਤੇ ਐਸਟੀਮੇਟ ਬਣਾਏ ਹਨ। ਨੌਜਵਾਨ ਵਿੱਕੀ ਚਹਿਲ ਤੇ ਰਾਜ ਸਿੱਧੂ ਦਾ ਪ੍ਰਤੀਕਰਮ ਸੀ ਕਿ ਲੀਡਰ ਤੇ ਅਫ਼ਸਰ ਸ਼ਾਬਾਸ਼ ਤਾਂ ਦੇ ਰਹੇ ਹਨ ਪ੍ਰੰਤੂ ਕਿਸੇ ਨੇ ਇਸ ਮਿਸ਼ਨ ’ਚ ਕੋਈ ਧੇਲਾ ਨਹੀਂ ਦਿੱਤਾ। ਸਾਰੇ ਨੌਜਵਾਨ ਕਾਲਜਾਂ ’ਚ ਪੜ੍ਹਦੇ ਹਨ ਅਤੇ ਖਿਡਾਰੀ ਵੀ ਹਨ। ਪੜਾਈ ਤੋਂ ਬਚਦਾ ਸਮਾਂ ਵਿਰਾਸਤ ਲੇਖੇ ਲਾ ਰਹੇ ਹਨ। ਇਨ੍ਹਾਂ ਨੌਜਵਾਨਾਂ ਦਾ ਵਿਰੋਧ ਵੀ ਉੱਠਿਆ ਪ੍ਰੰਤੂ ਇਨ੍ਹਾਂ ਨੇ ਨਿਗ੍ਹਾ ਸਿੱਧੀ ਰੱਖੀ ਜਿਸ ਮਗਰੋਂ ਖੁੰਡ ਚਰਚਾ ਵੀ ਖ਼ਤਮ ਹੋ ਗਈ। ਹੁਸਨ ਸ਼ਰਮਾ ਆਖਦਾ ਹੈ ਕਿ ਉਹ ਇਸ ਕਾਰਜ ਨੂੰ ਤਣ ਪਤਣ ਲਾਉਣਗੇ, ਚਾਹੇ ਕਿਸੇ ਵੀ ਦਰ ’ਤੇ ਜਾਣਾ ਪਵੇ। ਇਨ੍ਹਾਂ ਨੌਜਵਾਨਾਂ ਨੇ ਪਹਿਲਾਂ ਪਿੰਡ ਦੀ ਡਿਸਪੈਂਸਰੀ ਦਾ ਮੁਹਾਂਦਰਾ ਬਦਲਿਆ ਹੈ ਅਤੇ ਟਾਊਨ ਚੋਂ ਨਸ਼ੇੜੀਆਂ ਦੇ ਦੋ ਹੋਰ ਅੱਡੇ ਵੀ ਜੜ੍ਹੋਂ ਉਖਾੜੇ ਹਨ। ‘ਉੱਡਤਾ ਪੰਜਾਬ’ ਵਾਲਿਆਂ ਲਈ ਇਹ ਜਵਾਨ ਰਾਹ ਦਸੇਰਾ ਹਨ। ਹਲਕਾ ਬਿਜਲੀ ਮੰਤਰੀ ਗੁਰਪ੍ਰੀਤ ਕਾਂਗੜ ਦਾ ਹੈ ਪ੍ਰੰਤੂ ਉਨ੍ਹਾਂ ਤਰਫ਼ੋਂ ਵੀ ਕੋਈ ਪੈਸਾ ਹਾਲੇ ਤੱਕ ਨਹੀਂ ਮਿਲਿਆ।



Sunday, September 2, 2018

                               ਪ੍ਰਿੰਸੀਪਲ ਦੀ ਪੱਗ
       ਅਕਾਲੀਆਂ ਨੇ ਲਾਹੀ, ਕਮਿਸ਼ਨ ਨੇ ਸਜਾਈ
                                ਚਰਨਜੀਤ ਭੁੱਲਰ
ਬਠਿੰਡਾ  :  ਗੱਠਜੋੜ ਸਰਕਾਰ ਮੌਕੇ ਅਕਾਲੀ ਲੀਡਰਾਂ ਵੱਲੋਂ ਸਕੂਲ ਪ੍ਰਿੰਸੀਪਲ ਦਲਜੀਤ ਸਿੰਘ ਦੀ ਸ਼ਰੇਆਮ ਕੁੱਟਮਾਰ ਕਰਕੇ ਜਨਤਿਕ ਤੌਰ ’ਤੇ ਲਾਹੀ ਪੱਗ ਦੀ ਲਾਜ ਹੁਣ ਜਾਂਚ ਕਮਿਸ਼ਨ ਨੇ ਰੱਖੀ ਹੈ। ਜਸਟਿਸ ਮਹਿਤਾਬ ਸਿੰਘ ਗਿੱਲ ਕਮਿਸ਼ਨ ਨੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਭਗਤਾ ਭਾਈ ਦੇ ਤਤਕਾਲੀ ਪ੍ਰਿੰਸੀਪਲ ਦਲਜੀਤ ਸਿੰਘ ’ਤੇ ਅਕਾਲੀਆਂ ਵੱਲੋਂ ਦਰਜ ਕੀਤੇ ਦੋ ਪੁਲੀਸ ਕੇਸਾਂ ਨੂੰ ਰੱਦ ਕਰਨ ਦੀ ਸਿਫ਼ਾਰਸ਼ ਕੀਤੀ ਹੈ। ਇੱਥੋਂ ਤੱਕ ਕਿ ਗਿੱਲ ਕਮਿਸ਼ਨ ਨੇ ਨਗਰ ਪੰਚਾਇਤ ਭਗਤਾ ਦੇ ਤਤਕਾਲੀ ਪ੍ਰਧਾਨ ਰਾਕੇਸ਼ ਕੁਮਾਰ ਖ਼ਿਲਾਫ਼ ਧਾਰਾ 182 ਤਹਿਤ ਕਾਰਵਾਈ ਕਰਨ ਦੇ ਹੁਕਮ ਜਾਰੀ ਕੀਤੇ ਹਨ। ਇਸੇ ਤਰ੍ਹਾਂ ਭਗਤਾ ਭਾਈ ਦੇ ਤਤਕਾਲੀ ਬਲਾਕ ਵਿਕਾਸ ਤੇ ਪੰਚਾਇਤ ਅਫ਼ਸਰ ਅਤੇ ਪ੍ਰਧਾਨ ਰਾਕੇਸ਼ ਕੁਮਾਰ ਤੋਂ ਮੁਆਵਜ਼ੇ ਲੈਣ ਲਈ ਪ੍ਰਿੰਸੀਪਲ ਦਲਜੀਤ ਸਿੰਘ ਨੂੰ ਹੱਕਦਾਰ ਪਾਇਆ ਹੈ। ਵੇਰਵਿਆਂ ਅਨੁਸਾਰ ਜਦੋਂ ਪ੍ਰਿੰਸੀਪਲ ਦਲਜੀਤ ਸਿੰਘ ਨੇ ਸਰਕਾਰੀ ਸਕੂਲ ਵਿਚ ਕੁਸ਼ਤੀ ਵਿੰਗ ਦੇ ਨਾਮ ਤੇ ਨਸ਼ਿਆਂ ਦੇ ਪਸਾਰੇ ਅਤੇ ਜਾਅਲੀ ਬਿੱਲ ਰੋਕਣ ਦਾ ਮੁੱਦਾ ਉਠਾਇਆ ਤਾਂ 4 ਅਪਰੈਲ 2015 ਨੂੰ ਪ੍ਰਿੰਸੀਪਲ ’ਤੇ ਜਨਤਿਕ ਤੌਰ ਤੇ ਅਕਾਲੀ ਆਗੂਆਂ ਵੱਲੋਂ ਹਮਲਾ ਹੋਇਆ ਅਤੇ ਉਸ ਦੀ ਪੱਗ ਉਤਾਰ ਦਿੱਤੀ ਗਈ।
                 ਥਾਣਾ ਦਿਆਲਪੁਰਾ ਵਿਚ ਅਕਾਲੀ ਆਗੂਆਂ ਅਤੇ ਕੱੁਝ ਮੁਲਾਜ਼ਮਾਂ ਖ਼ਿਲਾਫ਼ ਐਫ.ਆਈ.ਆਰ ਨੰਬਰ 35 ਹੋਈ ਸੀ।  ਜਦੋਂ ਇਸ ਕੇਸ ਵਿਚ ਬਹੁਤ ਪਛੜ ਕੇ 30 ਮਈ 2016 ਨੂੰ ਚਲਾਨ ਪੇਸ਼ ਕੀਤਾ ਗਿਆ ਤਾਂ ਪ੍ਰਿੰਸੀਪਲ ਦੇ ਰਾਹ ਰੋਕਣ ਲਈ ਚਲਾਨ ਤੋਂ ਪਹਿਲਾਂ  ਹੀ ਥਾਣਾ ਦਿਆਲਪੁਰਾ ਵਿਚ ਐਫ.ਆਈ.ਆਰ ਨੰਬਰ 37 ਦਰਜ ਕਰ ਦਿੱਤੀ ਗਈ। ਬੀਡੀਪੀਓ ਭਗਤਾ ਸੁਖਵਿੰਦਰ ਸਿੰਘ ਨੇ ਉਦੋਂ ਸਕੂਲ ਮਾਮਲਿਆਂ ਦੀ ਪੜਤਾਲ ਕਰਕੇ ਪ੍ਰਿੰਸੀਪਲ ਨੂੰ ਦੋਸ਼ੀ ਪਾਇਆ ਅਤੇ ਨਗਰ ਪੰਚਾਇਤ ਦੇ ਪ੍ਰਧਾਨ ਰਾਕੇਸ਼ ਕੁਮਾਰ ਨੇ ਪ੍ਰਿੰਸੀਪਲ ’ਤੇ ਕੇਸ ਦਰਜ ਕਰਾ ਦਿੱਤਾ। ਪ੍ਰਿੰਸੀਪਲ ਦਲਜੀਤ ਸਿੰਘ ਭਗਤਾ ਦੀ ਹਮਾਇਤ ਵਿਚ ਜਨਤਿਕ ਧਿਰਾਂ ਉੱਤਰ ਆਈਆਂ ਅਤੇ ਅਨਿਆਂ ਵਿਰੋਧੀ ਕਮੇਟੀ ਦਾ ਗਠਨ ਹੋਇਆ। ਕਰੀਬ ਸਵਾ ਸਾਲ ਜਨਤਿਕ ਲੜਾਈ ਚੱਲਦੀ ਰਹੀ। ਇਸੇ ਦੌਰਾਨ ਹਾਕਮ ਧਿਰ ਨੇ ਪ੍ਰਿੰਸੀਪਲ ਦਲਜੀਤ ਸਿੰਘ ਸਮੇਤ 23 ਜਣਿਆ’ਤੇ ਐਫ.ਆਈ.ਆਰ ਨੰਬਰ 56 ਦਰਜ ਕਰਾ ਦਿੱਤੀ। ਇਲਜ਼ਾਮ ਲਾਇਆ ਗਿਆ ਕਿ ਇਨ੍ਹਾਂ ਨੇ ਧਰਨਾ ਮੁਜ਼ਾਹਰਾ ਕੀਤਾ ਅਤੇ ਡਿਊਟੀ ਵਿਚ ਵਿਘਨ ਪਾਇਆ। ਪ੍ਰਿੰਸੀਪਲ ਦਲਜੀਤ ਸਿੰਘ ਨੇ ਉਸ ਖ਼ਿਲਾਫ਼ ਹੋਏ ਦਰਜ ਕੇਸਾਂ ਨੂੰ ਰੱਦ ਕਰਨ ਸਬੰਧੀ ਜਾਂਚ ਕਮਿਸ਼ਨ ਕੋਲ ਦਰਖਾਸਤ ਦੇ ਦਿੱਤੀ।
         ਜਾਂਚ ਕਮਿਸ਼ਨ ਨੇ ਪ੍ਰਿੰਸੀਪਲ ਦਲਜੀਤ ਸਿੰਘ ਖ਼ਿਲਾਫ਼ ਦਰਜ ਐਫ.ਆਈ.ਆਰ ਨੰਬਰ 37 ਮਿਤੀ 8 ਮਾਰਚ 2016 ਅਤੇ ਐਫ.ਆਈ.ਆਰ ਨੰਬਰ 56 ਮਿਤੀ 13 ਮਈ 2015 ਨੂੰ ਹੁਣ ਰੱਦ ਕਰਨ ਦੀ ਸਿਫ਼ਾਰਸ਼ ਕਰ ਦਿੱਤੀ ਹੈ ਅਤੇ ਰਿਪੋਰਟ ਵਿਚ ਕਮਿਸ਼ਨ ਨੇ ਇਨ੍ਹਾਂ ਕੇਸਾਂ ਨੂੰ ਬਦਲਾਖੋਰੀ ਤਹਿਤ ਦਰਜ ਕੀਤੇ ਜਾਣ ਦੀ ਪੁਸ਼ਟੀ ਕੀਤੀ ਹੈ। ਇਨ੍ਹਾਂ ਰਿਪੋਰਟਾਂ ਵਿਚ ਸਾਬਕਾ ਅਕਾਲੀ ਮੰਤਰੀ ’ਤੇ ਵੀ ਉਂਗਲ ਉਠਾਈ ਗਈ ਹੈ। ਇਸੇ ਦੌਰਾਨ ਸਿੱਖਿਆ ਵਿਭਾਗ ਪੰਜਾਬ ਨੇ ਵੀ ਪ੍ਰਿੰਸੀਪਲ ਦਲਜੀਤ ਸਿੰਘ ਖ਼ਿਲਾਫ਼ ਵੀ ਕਾਰਵਾਈ ਕਰ ਦਿੱਤੀ ਸੀ  ਅਤੇ ਹੁਣ ਸਿੱਖਿਆ ਵਿਭਾਗ ਨੇ ਨਵੇਂ ਫ਼ੈਸਲੇ ਤਹਿਤ ਪ੍ਰਿੰਸੀਪਲ ਦਲਜੀਤ ਸਿੰਘ ਖ਼ਿਲਾਫ਼ ਜਾਰੀ ਦੋਸ਼ ਸੂਚੀ ਨੂੰ ਵੀ ਦਫ਼ਤਰ ਦਾਖਲ ਕਰ ਦਿੱਤਾ ਹੈ। ਜਾਂਚ ਕਮਿਸ਼ਨ ਕੋਲ ਕਾਫ਼ੀ ਗਿਣਤੀ ਵਿਚ ਜਨਤਿਕ ਆਗੂਆਂ ਨੇ ਬਿਆਨ ਕਲਮਬੱਧ ਕਰਾਏ ਸਨ। ਇਨ੍ਹਾਂ ਕੇਸਾਂ ਮਗਰੋਂ ਦਲਜੀਤ ਸਿੰਘ ਸੇਵਾ ਮੁਕਤ ਹੋ ਗਏ ਸਨ।
                  ਸਾਬਕਾ ਪ੍ਰਿੰਸੀਪਲ ਦਲਜੀਤ ਸਿੰਘ ਦਾ ਕਹਿਣਾ ਸੀ ਕਿ ਜਾਂਚ ਕਮਿਸ਼ਨ ਨੇ ਸਾਬਤ ਕਰ ਦਿੱਤਾ ਹੈ ਕਿ ਅਕਾਲੀ ਸਰਕਾਰ ਨੇ ਉਦੋਂ ਝੂਠੇ ਕੇਸ ਦਰਜ ਕੀਤੇ ਸਨ ਅਤੇ ਇਸ ਰਿਪੋਰਟ ਨੇ ਉਨ੍ਹਾਂ ਦੀ ਪੱਗ ਦੀ ਲਾਜ ਰੱਖ ਲਈ ਹੈ। ਉਨ੍ਹਾਂ ਆਖਿਆ ਕਿ ਉਹ ਅਦਾਲਤ ਵਿਚ ਚੱਲ ਰਹੇ ਕੇਸਾਂ ਵਿਚ ਵੱਡੇ ਅਕਾਲੀ ਨੇਤਾ ਖ਼ਿਲਾਫ਼ ਆਖ਼ਰੀ ਦਮ ਤੱਕ ਲੜਾਈ ਲੜਨਗੇ। ਐਡਵੋਕੇਟ ਐਨ.ਕੇ.ਜੀਤ,ਡੀ.ਟੀ.ਐਫ ਆਗੂ ਰੇਸ਼ਮ ਸਿੰਘ ਅਤੇ ਅਨਿਆਂ ਵਿਰੋਧੀ ਕਮੇਟੀ ਦੇ ਆਗੂ ਰਾਤੇਸ਼ ਕੁਮਾਰ ਦਾ ਕਹਿਣਾ ਸੀ ਕਿ ਜਾਂਚ ਕਮਿਸ਼ਨ ਨੇ ਅਕਾਲੀ ਸਰਕਾਰ ਸਮੇਂ ਦਰਜ ਕੀਤੇ ਗਏ ਕੇਸਾਂ ਦਾ ਸੱਚ ਉਜਾਗਰ ਕਰ ਦਿੱਤਾ ਹੈ ਅਤੇ ਕਮਿਸ਼ਨ ਨੇ ਲੋਕ ਪੱਖ ਧਿਰਾਂ ਦੇ ਸੰਘਰਸ਼ ਤੇ ਵੀ ਮੋਹਰ ਲਾਈ ਹੈ।



Saturday, September 1, 2018

                             ਬੇਅਦਬੀ ਮਾਮਲਾ
          ਤਸੀਹਾ ਘਰਾਂ ’ਚ ਪਰਖਿਆ ਇਮਾਨ
                             ਚਰਨਜੀਤ ਭੁੱਲਰ
ਬਠਿੰਡਾ  :  ਪੁਲੀਸ ਤਸ਼ੱਦਦ ਨੇ ਦਰਜਨਾਂ ਬੇਕਸੂਰਾਂ ਨੂੰ ਨਕਾਰਾ ਬਣਾ ਦਿੱਤਾ ਹੈ ਜਿਨ੍ਹਾਂ ਦੀ ਹੁਣ ਜ਼ਿੰਦਗੀ ਉੱਖੜ ਗਈ ਹੈ। ਤਸੀਹਾ ਘਰਾਂ ’ਚ ਉਨ੍ਹਾਂ ਦਾ ਇਮਾਨ ਪਰਖਿਆ ਗਿਆ। ਜ਼ਮੀਰਾਂ ਦੇ ਸੱਚੇ ਉਹ ਪੁਲੀਸ ਦੀ ਕੁੱਟ ਝੱਲ ਗਏ ਪ੍ਰੰਤੂ ਹੁਣ ਉਨ੍ਹਾਂ ਦੇ ਸਰੀਰਾਂ ’ਚ ਬੱਜ ਪੈ ਗਿਆ। ਜਦੋਂ ਫ਼ਰੀਦਕੋਟ ਦੇ ਪਿੰਡ ਬੁਰਜ ਜਵਾਹਰ ਸਿੰਘ ਵਾਲਾ ਦੇ ਗੁਰੂ ਘਰ ਚੋਂ ਪਹਿਲੀ ਜੂਨ 2015 ਨੂੰ ਸ੍ਰੀ ਗੁਰੂ ਗੰ੍ਰਥ ਸਾਹਿਬ ਦੇ ਸਰੂਪ ਚੋਰੀ ਹੋ ਗਏ ਤਾਂ ਉਦੋਂ ਹੀ ਪੁਲੀਸ ਦਾ ਝੱਖੜ ਬੇਕਸੂਰ ਲੋਕਾਂ ’ਤੇ ਝੱੁਲਣਾ ਸ਼ੁਰੂ ਹੋ ਗਿਆ। ਜਸਟਿਸ ਰਣਜੀਤ ਸਿੰਘ ਕਮਿਸ਼ਨ ਤੇ ਉਸ ਤੋਂ ਪਹਿਲਾਂ ਵਿਸ਼ੇਸ਼ ਜਾਂਚ ਟੀਮ (ਸਿੱਟ) ਨੇ ਬੇਅਦਬੀ ਮਾਮਲਿਆਂ ਦੇ ਅਸਲ ਮੁਲਜ਼ਮਾਂ ਨੂੰ ਬੇਨਕਾਬ ਕਰ ਦਿੱਤਾ ਹੈ। ਹੁਣ ਉਨ੍ਹਾਂ ਬੇਕਸੂਰਾਂ ਨੂੰ ਕੌਣ ਇਨਸਾਫ਼ ਦੇਵੇਗਾ ਜਿਨ੍ਹਾਂ ਨੂੰ ਪੁਲੀਸ ਤਸੀਹਾ ਘਰਾਂ ’ਚ ਝੰਬਦੀ ਰਹੀ। ਬੁਰਜ ਜਵਾਹਰ ਸਿੰਘ ਵਾਲਾ ਦੇ ਗੁਰੂ ਘਰ ਦਾ ਗੰ੍ਰਥੀ ਗੋਰਾ ਸਿੰਘ ਦਾ ਇਮਾਨ ਪਰਖਣ ਲਈ ਹਰ ਤਰ੍ਹਾਂ ਦੇ ਤਸੀਹੇ ਦਿੱਤੇ ਗਏ। ਉਸ ਨੇ ਜ਼ਮੀਰ ਅੱਗੇ ਹਥਿਆਰ ਨਾ ਸੁੱਟੇ। ਉਸ ਨੇ ਆਪਣੇ ਪਿੰਡੇ ਤਿੰਨ ਵਰੇ੍ਹ ਪੁਲੀਸ ਦਾ ਹਰ ਜ਼ੁਲਮ ਝੱਲਿਆ। ਗੋਰਾ ਸਿੰਘ ਆਖਦਾ ਹੈ ਕਿ ਗੁਰੂ ਦੇ ਸਰੂਪ ਚੋਰੀ ਹੋਣ ਮਗਰੋਂ ਉਹ ਮਾਨਸਿਕ ਤੌਰ ’ਤੇ ਟੁੱਟ ਚੁੱਕਾ ਸੀ। ਉੱਪਰੋਂ ਪੁਲੀਸ ਨੇ ਕਟਹਿਰੇ ’ਚ ਖੜ੍ਹਾ ਕਰ ਦਿੱਤਾ।
                   ਤਸੀਹਾ ਘਰ ’ਚ ਕਦੇ ਪੁਲੀਸ ਨੇ ਉਸ ਨੂੰ ਕਰੰਟ ਲਗਾਇਆ ਅਤੇ ਕਦੇ ਪਾਣੀ ’ਚ ਡਬੋਇਆ। ਏਨੀ ਬੇਰਹਿਮੀ ਨਾਲ ਤਸ਼ੱਦਦ ਕੀਤਾ ਕਿ ਉਸ ਦਾ ਗਲ਼ਾ ਖ਼ਰਾਬ ਹੋ ਚੁੱਕਾ ਹੈ ਅਤੇ ਸਰੀਰ ਦੀ ਪੀੜ ਰਾਤਾਂ ਨੂੰ ਅੱਖ ਨਹੀਂ ਲੱਗਣ ਦਿੰਦੀ। ਦੋ ਵਾਰ ਪੁਲੀਸ ਗੁਜਰਾਤ ਅਤੇ ਦੋ ਵਾਰੀ ਦਿੱਲੀ ਲੈ ਕੇ ਗਈ। ਉਹ ਨਾਰਕੋ ਟੈੱਸਟ ਸਮੇਤ ਹਰ ਪ੍ਰੀਖਿਆ ਚੋਂ ਖਰਾ ਨਿਕਲਿਆ। ਹਰ ਏਜੰਸੀ ਨੂੰ ਪੂਰਾ ਸਾਥ ਦਿੱਤਾ। ਉਸ ਦੀ ਪਤਨੀ ਸਵਰਨਜੀਤ ਕੌਰ ਦੱਸਦੀ ਹੈ ਕਿ ਉਸ ਨੂੰ ਪੁਲੀਸ ਨੇ ਏਨੇ ਤਸੀਹੇ ਦਿੱਤੇ ਕਿ ਫ਼ੌਰੀ ਅਪਰੇਸ਼ਨ ਕਰਾਉਣਾ ਪਿਆ। ਪੁਲੀਸ ਨੇ ਕਦੇ ਕਰੰਟ ਦੇ ਝਟਕੇ ਦਿੱਤੇ ਅਤੇ ਬਰਫ਼ ਮੂੰਹ ਤੇ ਰੱਖੀ। ਚਾਰ ਮਹੀਨੇ ਤਾਂ ਮੰਜੇ ਚੋਂ ਉੱਠਿਆ ਹੀ ਨਹੀਂ ਗਿਆ। ਲੋਕਾਂ ਨੇ ਪੈਸੇ ਇਕੱਠੇ ਕਰਕੇ ਦੋਵਾਂ ਦਾ ਇਲਾਜ ਕਰਾਇਆ। ਗੰ੍ਰਥੀ ਦੱਸਦਾ ਹੈ ਕਿ ਉਸ ਦਾ ਘਰ ਡਿੱਗ ਚੁੱਕਾ ਹੈ ਅਤੇ 60 ਹਜ਼ਾਰ ਦਾ ਬੈਂਕ ਤੋਂ ਲਿਆ ਕਰਜ਼ਾ ਵੀ ਵਕੀਲਾਂ ਦੀਆਂ ਫ਼ੀਸਾਂ ਵਿਚ ਚਲਾ ਗਿਆ। ਇੱਕ ਬੱਚਾ ਪੁਲੀਸ ਸਹਿਮ ਰਹਿਣ ਕਰਕੇ ਪ੍ਰੀਖਿਆ ਚੋਂ ਫ਼ੇਲ੍ਹ ਹੋ ਗਿਆ।
        ਗੋਰਾ ਸਿੰਘ ਤਸੱਲੀ ਜ਼ਾਹਿਰ ਕਰਦਾ ਹੈ ਕਿ ਬੇਅਦਬੀ ਦੇ ਅਸਲ ਦੋਸ਼ੀ ਜੱਗ ਜ਼ਾਹਿਰ ਹੋ ਗਏ ਹਨ ਪ੍ਰੰਤੂ ਗਿਲਾ ਕਰਦਾ ਹੈ ਕਿ ਪੁਲੀਸ ਨੇ ਬਿਨਾਂ ਕਸੂਰੋਂ ਹੀ ਉਨ੍ਹਾਂ ਨੂੰ ਜ਼ਿੰਦਗੀ ਭਰ ਦਾ ਰੋਗੀ ਬਣਾ ਦਿੱਤਾ। ਗੁਰੂ ਘਰ ਦੀ ਪ੍ਰਬੰਧਕੀ ਕਮੇਟੀ ਦੇ ਪ੍ਰਧਾਨ ਰਣਜੀਤ ਸਿੰਘ ’ਤੇ ਏਨਾ ਤਸ਼ੱਦਦ ਹੋਇਆ ਕਿ ਉਹ ਬਾਂਹਾਂ ਨਾਲ ਹੁਣ ਕੱੁਝ ਵੀ ਭਾਰਾ ਨਹੀਂ ਚੁੱਕ ਸਕਦਾ। ਉਸ ਨੂੰ ਫ਼ਿਰੋਜ਼ਪੁਰ ਦੇ ਤਸੀਹਾ ਘਰ ਵਿਚ 36 ਘੰਟੇ ਪੁਲੀਸ ਤਸੀਹੇ ਦਿੰਦੀ ਰਹੀ। ਉਸ ਨੂੰ ਕਦੇ ਪੁੱਠਾਂ ਲਮਕਾਇਆ ਅਤੇ ਕਦੇ ਨੱਕ ਵਿਚ ਪਾਣੀ ਪਾਇਆ। ਉਸ ਦੀ ਮਾਂ ਨੂੰ ਅਧਰੰਗ ਹੋ ਗਿਆ ਤੇ ਸਦਮੇ ’ਚ ਉਹ ਜਹਾਨੋਂ ਚਲੀ ਗਈ। ਉਸ ਨੇ ਰੋਸ ਵਜੋਂ ਗੁਰੂ ਘਰ ਦੀ ਪ੍ਰਧਾਨਗੀ ਤੋਂ ਅਸਤੀਫ਼ਾ ਦੇ ਦਿੱਤਾ। ਫ਼ਿਰੋਜ਼ਪੁਰ ਦੇ ਤਸੀਹਾ ਘਰ ’ਚ ਪੁਲੀਸ ਨੇ ਪਿੰਡ ਦੇ ਨੌਜਵਾਨ ਗੁਰਜੀਤ ਸਿੰਘ ਨੂੰ ਤਿੰਨ ਦਿਨ ਤਸੀਹੇ ਦਿੱਤੇ। ਲੋਕਾਂ ਨੇ ਦੱਸਿਆ ਕਿ ਇੱਕ ਹੋਰ ਵਿਅਕਤੀ ਤਾਂ ਪੁਲੀਸ ਤਸ਼ੱਦਦ ਮਗਰੋਂ ਦਿਮਾਗ਼ੀ ਤੌਰ ਤੇ ਸੁੱਧ ਬੁੱਧ ਖੋਹ ਬੈਠਾ ਹੈ। ਪਿੰਡ ਦੇ ਹਰਬੰਸ ਸਿੰਘ ਨੂੰ ਏਨੇ ਤਸੀਹੇ ਦਿੱਤੇ ਗਏ ਕਿ ਉਸ ਤੋਂ ਪੈਰ ਖ਼ਰਾਬ ਹੋ ਗਏ ਹਨ ਅਤੇ ਠੀਕ ਚੱਲਿਆ ਨਹੀਂ ਜਾਂਦਾ ਹੈ।
                  ਪਿੰਡ ’ਚ ਇੱਕ ਵਿਅਕਤੀ ਸਿਲਾਈ ਕਢਾਈ ਦਾ ਕੰਮ ਸਿਖਾਉਂਦਾ ਸੀ, ਉਹ ਪੁਲੀਸ ਮਾਰ ਮਗਰੋਂ ਪਿੰਡ ਹੀ ਛੱਡ ਗਿਆ। ਸਿੰਘਾਪੁਰ ਤੋਂ ਆਏ ਪਿੰਡ ਦੇ ਬਾਸ਼ਿੰਦੇ ਗੁਰਜੀਤ ਸਿੰਘ ਨੂੰ ਵੀ ਪੁਲੀਸ ਨੇ ਤਸੀਹਿਆਂ ਦੀ ਸੌਗਾਤ ਦੇ ਦਿੱਤੀ। ਲੋਕ ਆਖਦੇ ਹਨ ਕਿ ਉਨ੍ਹਾਂ ਨੇ ਤਿੰਨ ਵਰੇ੍ਹ ਬਹੁਤ ਸਹਿਮ ਤੇ ਦੁੱਖ ਝੱਲੇ। ਜਸਟਿਸ ਰਣਜੀਤ ਸਿੰਘ ਕਮਿਸ਼ਨ ਦੀ ਰਿਪੋਰਟ ਮਗਰੋਂ ਪਿੰਡ ਦੇ ਲੋਕਾਂ ਦੀਆਂ ਆਂਦਰਾਂ ਠੰਢੀਆਂ ਹੋਈਆਂ ਹਨ। ਨਿਹੱਥੇ ਲੋਕ ਇਸ ਗੱਲੋਂ ਪ੍ਰੇਸ਼ਾਨ ਹਨ ਕਿ ਉਨ੍ਹਾਂ ਨੂੰ ਕਾਹਦੀ ਸਜ਼ਾ ਦਿੱਤੀ ਗਈ ਤੇ ਹੁਣ ਉਨ੍ਹਾਂ ਨੂੰ ਇਨਸਾਫ਼ ਕੌਣ ਦੇਵੇਗਾ। ਪੰਜਗਰਾਈਂ ਦੇ ਰੁਪਿੰਦਰ ਸਿੰਘ ਅਤੇ ਜਸਵਿੰਦਰ ਸਿੰਘ ਨੇ ਪੁਲੀਸ ਤਸ਼ੱਦਦ ਦਾ ਹਰ ਰੂਪ ਦੇਖਿਆ ਹੈ। ਪੀੜਾਂ ਦੇ ਝੱਖੜ ਵਿਚ ਵੀ ਉਹ ਡੋਲੇ ਨਹੀਂ। ਉਨ੍ਹਾਂ ਦੀ ਮਾਲੀ ਇਮਦਾਦ ਲਈ ਵਿਦੇਸ਼ ਬੈਠੇ ਪੰਜਾਬੀਆਂ ਨੇ ਵੀ ਹੱਥ ਨਹੀਂ ਘੁੱਟਿਆ। ਪੰਜਗਰਾਈਂ ਦੇ ਜੋ ਹੋਰ ਅਮਨ ਵਗ਼ੈਰਾ ਨੌਜਵਾਨ ਪੁਲੀਸ ਦੀ ਕੁੱਟ ਨੇ ਭੰਨ ਸੁੱਟੇ, ਉਨ੍ਹਾਂ ਦੀ ਹੁਣ ਕੌਣ ਬਾਂਹ ਫੜੂ। ਬਰਗਾੜੀ ਦੇ ਗੰ੍ਰਥੀ ਸੁਖਪਾਲ ਸਿੰਘ ਦੇ ਲੜਕੇ ਗੁਰਮੁਖ ਸਿੰਘ ਨੇ ਵੀ ਤਸ਼ੱਦਦ ਦਾ ਹਰ ਘਿਣਾਉਣਾ ਚਿਹਰਾ ਵੇਖਿਆ।
                  ਬਰਗਾੜੀ ਦੇ ਗੁਰੂ ਘਰ ਦੇ ਸਾਰੇ ਮੁਲਾਜ਼ਮਾਂ ਨੂੰ ਲੰਮਾ ਸਮਾਂ ਮਾਨਸਿਕ ਪ੍ਰੇਸ਼ਾਨੀ ਵਿਚੋਂ ਲੰਘਣਾ ਪਿਆ। ਗੁਰੂ ਘਰ ਦੇ ਗੰ੍ਰਥੀ ਬੁੱਧ ਸਿੰਘ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਸੀਬੀਆਈ ਦੋ ਦਫ਼ਾ ਦਿੱਲੀ ਲਿਜਾ ਚੁੱਕੀ ਹੈ। ਪੜਤਾਲਾਂ ਨੇ ਸੁਰਤ ਭੱੁਲਾ ਦਿੱਤੀ ਹੈ। ਕੋਟਕਪੂਰਾ ਗੋਲੀ ਕਾਂਡ ’ਚ ਜ਼ਖਮੀ ਹੋਏ ਅਜੀਤ ਸਿੰਘ ਦੀ ਹਾਲਤ ਅਪਾਹਜਾਂ ਵਰਗੀ ਹੋ ਗਈ ਹੈ। ਸਰਕਾਰ ਨੇ ਉਨ੍ਹਾਂ ਨੂੰ ਮਾਲੀ ਮਦਦ ਤਾਂ ਦੇ ਦਿੱਤੀ ਹੈ ਪ੍ਰੰਤੂ ਉਸ ਦੀ ਲੱਤ ਕਮਜ਼ੋਰ ਹੋ ਗਈ ਹੈ ਅਤੇ ਪੈਰ ਠੀਕ ਕੰਮ ਨਹੀਂ ਕਰ ਰਿਹਾ ਹੈ। ਅਜੀਤ ਸਿੰਘ ਦੱਸਦਾ ਹੈ ਕਿ ਪੁਲੀਸ ਦੀ ਗੋਲੀ ਨੇ ਜ਼ਿੰਦਗੀ ਭਰ ਦਾ ਸਦਮਾ ਲਾ ਦਿੱਤਾ ਹੈ। ਏਦਾ ਦੇ ਹੋਰ ਕਾਫ਼ੀ ਨੌਜਵਾਨ ਹਨ ਜਿਨ੍ਹਾਂ ਨੂੰ ਪੁਲੀਸ ਨੇ ਬਿਨਾਂ ਕਸੂਰੋਂ ਗ਼ਸ਼ੀਆਂ ਪਾ ਦਿੱਤੀਆਂ ਸਨ ਜਿਨ੍ਹਾਂ ਦੀ ਹੁਣ ਵੀ ਕਿਧਰੇ ਸੁਣਵਾਈ ਨਹੀਂ ਹੋਈ।