Sunday, June 30, 2019

                            ਵਿਚਲੀ ਗੱਲ
        ਬੱਕਰੀ ਦਾ ਦੁੱਧ ਤੇ ਸੱਪ ਵਾਲਾ ਸੁਰਮਾ
                            ਚਰਨਜੀਤ ਭੁੱਲਰ
ਬਠਿੰਡਾ : ਨਾ ਆਜੜੀ ਦੀ ਬੱਕਰੀ, ਨਾ ਸੱਪਾਂ ਦੀ ਪਟਾਰੀ। ਨਾ ਭਿਖਾਰੀ ਦੀ ਪੋਟਲੀ, ਨਾ ਮਾਂ ਦੀ ਗੁੱਤ ਵਿਚਾਰੀ। ਇਹੋ ਹੈ ਪੰਜਾਬ ਦਾ ਸੱਚ। ਗੱਲ ਦੀ ਸ਼ੁਰੂਆਤ ਥਰੀਕੇ ਪਿੰਡ ਤੋਂ। ਨੇੜੇ ਕਿਤੇ ਜੋਗੀਆਂ ਦੀ ਢਾਣੀ ਸੀ। ਸੱਪਾਂ ਦੀ ਪਟਾਰੀ ਚੁੱਕ, ਦੋ ਜੋਗੀ ਮੰਗਣ ਨਿਕਲੇ। ਅੱਗਿਓਂ ਟੱਕਰੇ ਛੈਲ ਛਬੀਲੇ। ਪਟਾਰੀ ਖੋਹ ਕੇ ਪੱਤਰੇ ਵਾਚ ਗਏ। ਜੋਗੀ ਪ੍ਰੇਸ਼ਾਨ ਨਹੀਂ, ਹੈਰਾਨ ਵੀ ਹੋਏ। ਕੌਣ ਨੇ ਜਿਨ੍ਹਾਂ ਸੱਪਾਂ ਨੂੰ ਹੱਥ ਪਾਇਆ। ਉਧਰ, ਜੋਗੀਆਂ ਦੀ ਢਾਣੀ ਪੁੱਜੇ ਗੱਭਰੂ। ਕਿੰਨੇ ਪੈਸੇ ਦਿਓਗੇ, ਲੱਗੇ ਸੱਪਾਂ ਦਾ ਸੌਦਾ ਕਰਨ। ਜਦੋਂ ਚਿੱਟਾ ਭੰਨ ਦੇਵੇ, ਉਦੋਂ ਨਾਗਾਂ ਨੂੰ ਵੀ ਹੱਥ ਪੈਂਦੇ ਨੇ। ਹੁਣ ਤਾਂ ਇਹੋ ਹੈ, ਪੰਜਾਬ ਦਾ ਸੱਚ। ਅੱਗੇ ਘੱਟ ਨਹੀਂ ਗੁਜ਼ਰੀ। ਜੋਗੀਆਂ ਨੇ ਮੁੰਡੇ ਘੇਰ ਲਏ। ਮਾਪਿਆਂ ਨੇ ਫਿਰ ਤਰਲੇ ਪਾਏ ,ਹੱਥ ਜੋੜੇ ਤਾਂ ਮੁੰਡਿਆਂ ਦਾ ਖਹਿੜਾ ਛੁੱਟਿਆ। ਜਦੋਂ ਗੱਲ ਮੁੱਕੀ ਤਾਂ ਬਜ਼ੁਰਗ ਜੋਗੀ ਨੇ ਮੱਤ ਦਿੱਤੀ। ‘ਕੱਲਾ ਕਾਨੂੰਨ ਨਹੀਂ, ਸੱਪਾਂ ਨੂੰ ਵੀ ਹੱਥ ’ਚ ਲੈਂਦੇ ਨੇ, ਬਚ ਕੇ ਰਿਹਾ ਕਰੋ ਭਾਈ। ਹੁਣ ਚੱਲੋ 70ਵੇਂ ਦਹਾਕੇ ‘ਚ, ਜਿਨ੍ਹਾਂ ਸੱਪਾਂ ਦੀਆਂ ਸਿਰੀਆਂ ਮਿੱਧੀਆਂ, ਉਹ ਵੀ ਖੇਤਾਂ ਦੇ ਪੁੱਤ ਸਨ। ਹਰੀ ਕ੍ਰਾਂਤੀ ਤਾਹੀਓਂ ਆਈ, ਭੁੱਖੇ ਵੀ ਰਜਾ ਦਿੱਤੇ। ਸੱਪ ਦੀ ਸਿਰੀ ਤੋਂ ਨੋਟ ਚੁੱਕਣੇ ਸੌਖੇ ਨਹੀਂ। ਚੇਤਿਓਂ ਬਾਹਰ ਹੈ, ‘ਚਿੱਟੀ‘ ਕ੍ਰਾਂਤੀ ਵਾਲੇ ਸੱਪਾਂ ‘ਤੇ ਅੱਖ ਰੱਖਣਗੇ। ਅਮੀਰ ਵਿਰਾਸਤ, ਰੱਜੀ-ਪੁੱਜੀ ਨੀਤ, ਕਦੇ ਇਹ ਪਛਾਣ ਪੰਜਾਬ ਦੀ ਸੀ।
              ਕਿਸੇ ਘਰੋਂ ਕਦੇ ਕੋਈ ਮੰਗਤਾ ਖਾਲੀ ਨਹੀਂ ਮੁੜਦਾ ਸੀ। ਗੱਲ ਥੋੜ੍ਹੀ ਪੁਰਾਣੀ ਐ। ਸ਼ਹਿਣੇ ਨੇੜੇ ਗਰੀਬ ਮੰਗਤੇ ਨੇ ਦਿਨ ਭਰ ਮੰਗਿਆ। ਹੱਥ ’ਚ ਸੁੱਕੀ ਰੋਟੀ, ਪੋਟਲੀ ਵਿਚ ਆਟਾ, ਜਿਉਂ ਹੀ ਪਿੰਡੋਂ ਬਾਹਰ ਆਇਆ। ਦੋ ਮੁੰਡਿਆਂ ਨੇ ਮੋਟਰਸਾਈਕਲ ਪਿੱਛੇ ਲਾ ਲਿਆ। ਮੰਗਤੇ ਦੀ ਆਟੇ ਵਾਲੀ ਪੋਟਲੀ ਖੋਹੀ। ਪਤਾ ਹੀ ਨਹੀਂ ਲੱਗਾ, ਕਦੋਂ ਫਰਾਰ ਹੋ ਗਏ। ਖਾਲੀ ਹੱਥ ਤੇ ਭਰੇ ਮਨ ਨਾਲ ਭਿਖਾਰੀ ਪਰਤ ਗਿਆ । ਦੱਸੋ ਕਿਥੇ ਰਪਟ ਲਿਖਾਈਏ, ਇਹੋ ਹੈ ਪੰਜਾਬ ਦਾ ਸੱਚ। ਗੱਲ ਬਟਾਲੇ ਵਾਲੀ ਵੀ ਬਹੁਤੀ ਪੁਰਾਣੀ ਨਹੀਂ। ਸ਼ਾਮ ਨੂੰ ਝੁੱਗੀ ਵੱਲ ਮੁੜਦਾ ਅਪਾਹਜ ਮੰਗਤਾ ਜਵਾਨ ਮੁੰਡੇ ਦੇ ਅੜਿੱਕੇ ਚੜ੍ਹ ਗਿਆ। ਮੰਗਤੇ ਦੇ ਪੈਸੇ ਖੋਹ ਕੇ ਭੱਜਣ ਲੱਗਾ ਮੁੰਡਾ ਰੱਬ ਬਣ ਕੇ ਬਹੁੜੇ ਲੋਕਾਂ ਨੇ ਫੜ ਲਿਆ ਤੇ ਪੈਸੇ ਵਾਪਸ ਕਰਾਏ। ਨਸ਼ੇ ਦਾ ਭੰਨਿਆ ਮੁੰਡਾ ਫਿਰ ਤਰਲੇ ਪਾਉਣ ਲੱਗਾ। ਕੁੱਤੀ ਚੋਰਾਂ ਨਾਲ ਰਲ ਗਈ ਐ। ਤਾਹੀਂ ਇਹ ਦਿਨ ਆਏ ਨੇ। ਭਲਾ ਤੁਸੀਂ ਦੱਸੋ, ਪੰਜਾਬ ਨੂੰ ਕੌਣ ਸਮਝਾਏ।‘ਚਿੱਟੇ’ ਨੇ ਕਾਲੇ ਕੱਛਿਆਂ ਵਾਲੇ ਭੁਲਾ ਦਿੱਤੇ। ਸਿਰਫ਼ ਨੌਂ ਦਿਨ ਪੁਰਾਣਾ ਵਾਕਿਆ ਸੁਣੋ। ਆਜੜੀ ਗੁਲਾਬ ਰਾਮ ਨਾਲ ਜੋ ਹੋਈ। ਨਵੀਂ ਉਮਰ ਦੇ ਮੁੰਡੇ ਆਏ। ਘੇਰਿਆ ਇੱਜੜ, ਬੱਕਰੀ ਚੁੱਕ ਲਈ।
              ਆਜੜੀ ਦਰਸ਼ਨ ਨਾਲ ਵੀ ਇਉਂ ਹੀ ਹੋਇਆ। ਅੱਠ ਜੂਨ ਨੂੰ ਮੋਟਰਸਾਈਕਲ ਵਾਲੇ ਆਏ। ਇੱਜੜ ਰੋਕਿਆ, ਬੱਕਰੀ ਚੁੱਕ ਕੇ ਪੱਤਰੇ ਵਾਚ ਗਏ। ਹੁਣ ਦੋਵਾਂ ਨੇ ਥਾਣਾ ਮੌੜ ’ਚ ਅਰਜ਼ੀ ਲਾਈ ਹੈ। ਭਲਾ ਦਾਈ ਕੋਲੋਂ ਪੇਟ ਲੁਕੇ ਨੇ, ਫਿਰ ਵੀ ਜਨਾਬ ਆਖਣ ਲੱਗੇ। ਗੁਲਾਬ ਰਾਮਾ ਹੁਲੀਆ ਦੱਸ। ਕਿਸੇ ਦੇ ਪੁੱਤ ਰੁਲ ਗਏ, ਕਿਸੇ ਦੇ ਮੇਮਣੇ, ਇਹੋ ਹੈ ਪੰਜਾਬ ਦਾ ਸੱਚ। ਚੋਣ ਮੇਲੇ ’ਚ ਲੀਡਰ ਰੁਲਦੇ ਨੇ। ਦਿੱਲੀਓਂ ਕੇਜਰੀਵਾਲ ਆਇਆ ਮੋਗਾ ਦੇ ਪਿੰਡ। ਇੱਕ ਮਾਂ-ਭੈਣ ਦਾ ਤਰਲਾ ਦਿਲ ਹਿਲਾਊ ਸੀ, ਹਉਕੇ ਧੂਹ ਪਾਉਣ ਵਾਲੇ। ਚੁੰਨੀਆਂ ਨਾਲ ਸਿਰ ਬੰਨ੍ਹੇ ਹੋਏ ਸਨ। ਨਸ਼ੇੜੀ ਪੁੱਤ ਨੇ ਮਾਂ ਤੇ ਭੈਣ ਦੀ ਗੁੱਤ ਨੂੰ ਵੀ ਨਹੀਂ ਬਖ਼ਸ਼ਿਆ। ਵਾਲਾਂ ਦਾ ਭਾਅ ਹੁਣ ਦੋ ਹਜ਼ਾਰ ਰੁਪਏ ਹੈ। ਮਾਂ ਦੇ ਤੁੰਗਲ ਨੂੰ ਖਤਰਾ। ਭੈਣ ਦੀ ਗੁੱਤ ਨੂੰ ਖ਼ਤਰਾ। ਪਹਿਲਾਂ ਮੁਗਲਾਂ, ਫਿਰ ਫਿਰੰਗੀ ਤੇ ਹੁਣ ਚਿੱਟੇ ਦਾ ਖ਼ਤਰੈ। ਭਗਵੰਤ ਮਾਨ ਆਖਦੈ, ਪੰਜਾਬ ‘ਚ ਤਾਂ ਪਖਾਨਿਆਂ ਨੂੰ ਵੀ ਖਤਰੈ। ਤਾਹੀਓਂ ਤਾਲੇ ਲਟਕਦੇ ਨੇ। ਨਸ਼ੇ ਦੀ ਲਤ ਲਈ ਮਾਂ-ਭੈਣ ਨੂੰ ਕੁੱਟਣਾ ਹੁਣ ਆਮ ਹੈ। ਸ਼ਹਿਰਾਂ ’ਚ ਕੁੱਤੇ ਤੇ ਸੂਰ ਵੀ ਚੋਰੀ ਹੁੰਦੇ ਨੇ।
               ਨਸ਼ਾ ਵਿਰੋਧੀ ਕੌਮਾਂਤਰੀ ਦਿਵਸ ਹੁਣੇ ਲੰਘਿਆ। ਨਸ਼ਿਆਂ ਦਾ ਲੱਕ ਟੁੱਟਿਆ ਨਹੀਂ। ਤਸਕਰ ਪੱਕੇ ਪੈਰੀਂ ਖੜ੍ਹੇ ਨੇ। ਜਿਨ੍ਹਾਂ ਦੇ ਰਾਜ ’ਚ ਪੈਰ-ਪੈਰ ‘ਤੇ ‘ਚਿੱਟਾ’ ਵਿਕਿਆ। ਉਹ ਰਾਜੇ ਨੂੰ ਗੁਟਕਾ ਸਾਹਿਬ ਦੀ ਸਹੁੰ ਦਾ ਚੇਤਾ ਕਰਾਉਂਦੇ ਨੇ। ਪੇਸ਼ ਹੈ ਮੁੱਖ ਮੰਤਰੀ ਦਾ ਰਿਪੋਰਟ ਕਾਰਡ। ਢਾਈ ਵਰ੍ਹਿਆਂ ’ਚ 26,254 ਪੁਲੀਸ ਕੇਸ ਦਰਜ ਕੀਤੇ, 31642 ਨਸ਼ਾ ਤਸਕਰ ਫੜੇ, 388 ਭਗੌੜੇ ਤਸਕਰ ਫੜੇ। 4.70 ਲੱਖ ਨਸ਼ਾ ਪੀੜਤਾਂ ਦਾ ਇਲਾਜ ਕਰਾਇਆ। ਗੌਰ ਨਾਲ ਵੇਖੋ। ਇਹੋ ਰਿਪੋਰਟ ਕਾਰਡ ਗੱਠਜੋੜ ਦਾ ਸੀ। ਜਿਨ੍ਹਾਂ ਦੇ ਤਨ ’ਤੇ ਲੱਗੀ, ਉਨ੍ਹਾਂ ਲਈ ਚਿੱਟਾ-ਨੀਲਾ ਇੱਕ ਬਰਾਬਰ। ਰਾਜਾ ਕੀ ਜਾਣੇ, ਸਰਿੰਜਾਂ ਦੀ ਮਾਰ। ਪੰਜਾਬ ਉੱਡ ਰਿਹੈ, ਘਰ-ਘਰ ਸੱਥਰ ਵਿੱਛ ਗਏ। ਜਵਾਨੀ ਵਿੰਨ੍ਹੀ ਪਈ ਐ। ਸ਼੍ਰੋਮਣੀ ਕਮੇਟੀ ਦੇ ਕੰਨਾਂ ’ਚ ਰੂੰ ਹੈ। ਤਖ਼ਤਾਂ ਵਾਲੇ ਕਦੋਂ ਬਣਨਗੇ ਜ਼ਮੀਰ ਦੇ ਜਥੇਦਾਰ। ਦਮਦਮੇ ਦੀ ਧਰਤੀ ਉਦੋਂ ਰੋਈ ਜਦੋਂ 14 ਵਰ੍ਹਿਆਂ ਦੀ ਕੁੜੀ ਨਸ਼ੇੜੀ ਬਣੀ। ਪੰਜਾਬ ਦੀ ਟੇਲ ’ਤੇ ਪੈਂਦੀ ਮੰਡੀ ਰਾਮਾਂ। ਸੱਤ ਧੀਆਂ ਚਿੱਟਾ ਲੈਂਦੀਆਂ ਨੇ। ਕਦੇ ਸੋਚਿਆ ਸੀ, ਭੈਣ ਭਰਾ ਇੱਕੋ ਸਰਿੰਜ ਵਰਤਣਗੇ। ਬਠਿੰਡਾ ਜ਼ਿਲ੍ਹੇ ’ਚ ਇਵੇਂ ਹੋਇਐ।
               ਤਸਕਰ ਡੱਬਵਾਲੀ ਬੈਠੇ ਨੇ। ਸਪਲਾਈ ’ਚ ਕੋਈ ਵਲ ਫੇਰ ਨਹੀਂ। ਤਿੰਨ ਸਾਲ ਪੁਰਾਣੀ ਗੱਲ ਚੇਤੇ ਆਈ। ਜਦੋਂ ਸੁਖਬੀਰ ਦੀ ਜਲ ਬੱਸ ਚੱਲੀ। ਉਦੋਂ ਤਸਕਰਾਂ ਨੇ ਪਾਣੀ ’ਚ ਲਿਫਾਫੇ ਚਲਾਏ ਸਨ। ਤਸਕਰਾਂ ਦੇ ਫੋਨ ਨੂੰ ਨਸ਼ੇੜੀ ਰੀਚਾਰਜ ਕਰਾਉਂਦੇ। ਬਦਲੇ ‘ਚ ਰਜਵਾਹੇ ’ਚ ਤੈਰਦਾ ਲਿਫਾਫਾ ਮਿਲਦਾ। ਪੁਲੀਸ ਤੋਂ ਬਚਣ ਲਈ ਨਵਾਂ ਤਰੀਕਾ ਸੀ। ਪੁਲੀਸ ਵੀ ਚਿੱਚੜ ਮਾਰਦੀ ਐ, ਝੋਟਾ ਨਹੀਂ, ਜਿਨ੍ਹਾਂ ਦੇ ਚਿੱਟੇ ’ਚ ਰੁੜ੍ਹ ਗਏ, ਕਿਹੜੇ ਹੌਸਲੇ ਨਾਲ ਆਖਣ, ਇਹ ਪੰਜਾਬ ਵੀ ਮੇਰਾ ਏ..! ਤਸਕਰਾਂ ਨੇ ਘਰ ਭਰੇ ਨੇ, ਸਰਿੰਜਾਂ ਨਾਲ ਸਿਵੇ। ਤਸਕਰਾਂ ਦੇ ਮੋਢਿਆਂ ’ਤੇ ਰਾਖੇ ਚੜ੍ਹੇ ਨੇ। ਪੰਜਾਬ ਦੇ ਵਿਹੜੇ ਸੁੱਖ ਹੁੰਦੀ ਤਾਂ ਹਵਾਈ ਅੱਡਿਆਂ ’ਤੇ ਭੀੜ ਨੀ ਹੋਣੀ ਸੀ। ਅੱਕੇ ਹੋਏ ਪਿੰਡ ਹੁਣ ਖੁਦ ਉੱਠੇ ਨੇ। ਕੋਟਲੀ (ਮੁਕਤਸਰ) ਦੇ ਤੀਹ ਜਵਾਨਾਂ ਨੇ ਠੀਕਰੀ ਪਹਿਰਾ ਸ਼ੁਰੂ ਕੀਤੈ। ਦੋ ਨਸ਼ੇੜੀ ਰੱਸੇ ਨਾਲ ਵੀ ਨੂੜੇ। ਕਈ ਪੁਲੀਸ ਨੂੰ ਫੜਾਏ। ਹਵਾ ਰੁਮਕੀ ਹੈ। ਜੱਸੀ ਬਾਗ ਵਾਲੀ ਦੇ ਲੋਕ ਸੜਕਾਂ ’ਤੇ ਉੱਤਰੇ। ਗੁੜੇ (ਜਗਰਾਓਂ) ਵਾਲਿਆਂ ਨੇ ਪਿੰਡ ਨਸ਼ਾ ਮੁਕਤ ਬਣਾਇਐ। ਪਿੰਡ ਸੀਹਾਂ ਦੌਦ (ਪਾਇਲ) ਦਾ ਪੰਚ ਚਰਨਪ੍ਰੀਤ ਨਸ਼ੇੜੀਆਂ ਦਾ ਇਲਾਜ ਕਰਾਉਂਦਾ ਫਿਰਦੈ।
              ਕਮਾਲੂ (ਮੌੜ) ਦੇ ਮੇਜਰ ਸਿੰਘ ਨੇ ਨਸ਼ਾ ਵਿਰੋਧੀ ਮੰਚ ਬਣਾਇਆ। ਮੰਚ ਵਾਲੇ 25 ਪਿੰਡਾਂ ਦੇ ਮੁੰਡੇ ਨਸ਼ਿਆਂ ਖ਼ਿਲਾਫ਼ ਕੂਕਦੇ ਨੇ। ਮੰਚ ਆਖਦੈ, ਨਸ਼ਾ ਗੁੜ ਵਾਂਗੂ ਵਿਕਦੈ। ਪੰਜਾਬ ਦੀ ਕੁੰਦਨ ਦੇਹੀ ਕਿਧਰ ਗਈ। ਕਿਧਰ ਗਏ ਉਹ ਸੂਰਮੇ। ਅਬਦਾਲੀ ਹਰਾ ਦਿੱਤੇ ਸਨ। ਦਿੱਲੀ ਲਾਹੌਰ ਸੜਕ ’ਤੇ ਖੜ੍ਹੇ। ਬਾਬਾ ਬੋਤਾ ਸਿਓਂ ਤੇ ਬਾਬਾ ਗਰਜਾ ਸਿਓਂ। ‘ਮੈਂ ਹਾਂ ਬਾਬਾ ਬੋਤਾ, ਰਾਹ ’ਚ ਖਲੋਤਾ, ਹੱਥ ’ਚ ਸੋਟਾ’। ਬਾਬਿਓ ਤੁਸੀਂ ਹੀ ਸੋਟਾ ਲੈ ਕੇ ਗੇੜਾ ਮਾਰ ਜਾਓ। ਬਾਬਰ ਹੱਥੋਂ ਨਿਕਲੇ ਫਿਰਦੇ ਨੇ। ਨਲੂਏ ਦੇ ਵਾਰਸਾਂ ’ਚ ਤੰਤ ਨਹੀਂ। ਬਾਬੇ ਨਾਨਕ ਨੇ ਨਾਮ ਦੀ ਖੁਮਾਰੀ ਦੱਸੀ। ਪੰਜਾਬ ਕਿਸੇ ਹੋਰ ਖੁਆਰ ’ਚ ਐ। ਅਖੀਰ ’ਚ ਛੱਜੂ ਰਾਮ ਦੀ ਨੇਕ ਸਲਾਹ, ’ਦੰਦਾਂ ’ਚੋਂ ਜੀਭ ਕੱਢੋ, ਸਰਕਾਰ ਨੂੰ ਛੱਡੋ, ਖੁਦ ਹੀ ਡਟੋ, ਨਾਲੇ ਭੁੱਲਿਓ ਨਾ, ‘ਮੁੰਡਾ ਤੇ ਰੰਬਾ ਜਿੰਨਾ ਚੰਡੀਏ, ਓਨਾ ਚੰਗਾ।’

Saturday, June 29, 2019

                                                        ਖੇਤੀ ਦੇ ਜਾਦੂਗਰ 
                               ਅਫ਼ਸਰੀ ਜ਼ੋਰ ’ਤੇ ਲਾਇਆ ਹਵਾ ’ਚ ਨਰਮਾ !
                                                           ਚਰਨਜੀਤ ਭੁੱਲਰ
ਬਠਿੰਡਾ : ਖੇਤੀ ਅਫਸਰਾਂ ਦੇ ਹੱਥ ਦੀ ਸਫਾਈ ਦਾ ਕ੍ਰਿਸ਼ਮਾ ਹੈ ਕਿ ਪੰਜਾਬ ’ਚ ਐਤਕੀਂ ਹਵਾ ’ਚ ਵੀ ਨਰਮਾ ਲਾ ਦਿੱਤਾ ਗਿਆ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਤੋਂ ਥਾਪੀ ਲੈਣ ਲਈ ਖੇਤੀ ਮਹਿਕਮੇ ਨੇ ਨਰਮੇ ਦੀ ਬੋਗਸ ਬਿਜਾਈ ਦਿਖਾ ਦਿੱਤੀ ਹੈ। ਬੀਟੀ ਬੀਜਾਂ ਦੀ ਵਿਕਰੀ ਦੇ ਅੰਕੜੇ ਏਨੀ ਹੁਸ਼ਿਆਰੀ ਨਾਲ ਘੁਮਾਏ ਗਏ ਹਨ ਕਿ ਸਭ ਦੰਗ ਰਹਿ ਗਏ ਹਨ। ਬੀਜ ਕੰਪਨੀਆਂ ਦੇ ਅਫਸਰਾਂ ਤੋਂ ਜਦੋਂ ਹਕੀਕਤ ਜਾਣੀ ਤਾਂ ਉਨ੍ਹਾਂ ਖੇਤੀ ਮਹਿਕਮੇ ਦੇ ‘ਸੱਚ’ ਨੂੰ ਬੇਪਰਦ ਕਰ ਦਿੱਤਾ। ਖੇਤੀ ਮਹਿਕਮਾ ਨੇ ਭੱਲ ਖੱਟਣ ਲਈ ਉਦੋਂ ਬਿਜਾਈ ਦੇ ਅੰਕੜਿਆਂ ਵਿਚ ਜਾਦੂਗਰੀ ਦਿਖਾਈ ਜਦੋਂ ਕਿਸਾਨਾਂ ਤੋਂ ਉਵੇਂ ਹੁੰਗਾਰਾ ਨਾ ਮਿਲਿਆ।ਖੇਤੀ ਵਿਭਾਗ ਦੇ ਡਾਇਰੈਕਟਰ ਸੁਤੰਤਰ ਐਰੀ ਆਖਦੇ ਹਨ ਕਿ ਪੰਜਾਬ ਵਿਚ ਐਤਕੀਂ 4.01 ਲੱਖ ਹੈਕਟੇਅਰ (ਕਰੀਬ 10 ਲੱਖ ਏਕੜ) ’ਚ ਨਰਮੇ ਦੀ ਬਿਜਾਂਦ ਹੋਈ ਹੈ। ਪੰਜਾਬੀ ਟ੍ਰਿਬਿਊਨ ਨੂੰ ਜੋ ਖੇਤੀ ਮਹਿਕਮੇ ਤਰਫ਼ੋਂ ਬੀਟੀ ਬੀਜਾਂ ਦੀ ਵਿਕਰੀ ਦੀ ਸੂਚੀ ਦਿੱਤੀ ਗਈ , ਉਸ ਅਨੁਸਾਰ ਪੰਜਾਬ ਵਿਚ 20.06 ਲੱਖ ਪੈਕਟਾਂ ਦੀ ਵਿਕਰੀ ਹੋਈ ਹੈ। ਪ੍ਰਤੀ ਏਕੜ ਵਿਚ ਨਰਮੇ ਦੀ ਬਿਜਾਂਦ ’ਚ ਢਾਈ ਪੈਕੇਟ ਬੀਜ ਪੈਂਦੇ ਹਨ ਜਿਸ ਦਾ ਮਤਲਬ ਹੈ ਕਿ ਪੰਜਾਬ ਵਿਚ 8.02 ਲੱਖ ਏਕੜ (3.20 ਲੱਖ ਹੈਕਟੇਅਰ) ’ਚ ਬਿਜਾਈ ਹੋਈ ਹੈ। ਮਹਿਕਮੇ ਦੀ ਬੀਜ ਵਿਕਰੀ ਸੂਚੀ ਹੀ ਸਿੱਧੇ ਤੌਰ ’ਤੇ 80 ਹਜ਼ਾਰ ਹੈਕਟੇਅਰ ਦਾ ਝੂਠ ਫੜ ਗਈ ਹੈ।
          ਖੇਤੀ ਮਹਿਕਮੇ ਦੀ ਸੂਚੀ ਅਨੁਸਾਰ ਪੰਜਾਬ ਵਿਚ ਸਭ ਤੋਂ ਵੱਧ ਰਾਸ਼ੀ ਕੰਪਨੀ ਦਾ ਬੀਜ ਵਿਕਿਆ ਜੋ ਕਿ 12.59 ਲੱਖ ਪੈਕਟ ਹੈ। ਰਾਸ਼ੀ ਕੰਪਨੀ ਦੇ ਸੀਨੀਅਰ ਅਧਿਕਾਰੀ ਵਰਿੰਦਰ ਸਿੰਘ ਮਾਨ ਨਾਲ ਗੱਲ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਪੰਜਾਬ ਵਿਚ ਰਾਸ਼ੀ ਕੰਪਨੀ ਦਾ 12.30 ਲੱਖ ਪੈਕੇਟ ਸੇਲ ਹੋਇਆ ਹੈ। ਇਵੇਂ ਹੀ ਯੂ.ਐਸ.ਐਗਰੀ ਕੰਪਨੀ ਦਾ ਮਹਿਕਮੇ ਨੇ 2.70 ਲੱਖ ਪੈਕਟ ਵਿਕਿਆ ਦੱਸਿਆ ਹੈ ਜਦੋਂ ਕਿ ਇਸ ਕੰਪਨੀ ਦੇ ਅਧਿਕਾਰੀ ਰਾਜੀਵ ਕੁਮਾਰ ਨੇ ਦੱਸਿਆ ਕਿ ਪੰਜਾਬ ਵਿਚ ਉਨ੍ਹਾਂ ਨੇ 2.35 ਲੱਖ ਪੈਕੇਟ ਵੇਚਿਆ ਹੈ। ਖੇਤੀ ਮਹਿਕਮੇ ਨੇ ਬਾਯਰ ਕੰਪਨੀ ਦੇ 1.59 ਲੱਖ ਪੈਕਟ ਵਿਕੇ ਦਿਖਾਏ ਹਨ ਜਦੋਂ ਕਿ ਇਸ ਕੰਪਨੀ ਦੇ ਸ੍ਰੀ ਜੋਤੀ ਮਿਸ਼ਰਾ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ ਪੰਜਾਬ ’ਚ 1.25 ਲੱਖ ਪੈਕਟ ਵਿਕੇ ਹਨ।ਅੱਗੇ ਚੱਲੀਏ ਤਾਂ ਮਹਿਕਮੇ ਨੇ ਨਿੳਜੂਵਿਡੂ ਕੰਪਨੀ ਦੇ 92,916 ਪੈਕੇਟਾਂ ਬੀਜਾਂ ਦੀ ਵਿਕਰੀ ਦਿਖਾਈ ਹੈ ਜਦੋਂ ਕਿ ਇਸ ਕੰਪਨੀ ਦੇ ਸ੍ਰੀ ਨਰਿੰਦਰ ਕੰਬੋਜ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੀ ਕੰਪਨੀ ਦੇ ਪੰਜਾਬ ਵਿਚ 81 ਹਜ਼ਾਰ ਪੈਕੇਟ ਵਿਕੇ ਹਨ। ਬੀਜ ਵਿਕਰੀ ਦੀ ਸੂਚੀ ਵਿਚ ਮਹਿਕਮੇ ਨੇ ਸ੍ਰੀ ਰਾਮ ਕੰਪਨੀ ਦੇ ਬੀਜਾਂ ਦੀ ਵਿਕਰੀ ਦਾ ਅੰਕੜਾ ਦੋ ਦੋ ਵਾਰੀ ਦੇ ਦਿੱਤਾ ਹੈ। ਇਸ ਕੰਪਨੀ ਨੇ 10,400 ਪੈਕਟ ਵੇਚਿਆ ਹੈ ਜਦੋਂ ਕਿ ਮਹਿਕਮੇ ਨੇ 21,142 ਹੋਰ ਪੈਕਟਾਂ ਦਾ ਅੰਕੜਾ ਵਧਾ ਦਿੱਤਾ।
                  ਜੇ.ਕੇ ਸੀਡਜ ਦੀ ਡਬਲ ਇੰਟਰੀ ਪਾ ਕੇ 11 ਹਜ਼ਾਰ ਪੈਕਟਾਂ ਦੀ ਗਿਣਤੀ ਵਧਾ ਦਿੱਤੀ। ਮਹਿਕਮੇ ਨੇ 69,300 ਪੈਕਟਾਂ ਨੂੰ ਅਦਰਜ ਕੈਟਾਗਿਰੀ ਵਿਚ ਪਾ ਰੱਖਿਆ ਹੈ ਜਿਸ ਦਾ ਸਰੋਤ ਨਹੀਂ ਦੱਸਿਆ ਗਿਆ। ਕੰਪਨੀ ਅਫਸਰਾਂ ਨੇ ਦੱਸਿਆ ਕਿ ਖੇਤੀ ਅਫਸਰਾਂ ਨੇ ਐਤਕੀਂ ਬੀਜਾਂ ਦੀ ਵਿਕਰੀ ਵਧਾ ਚੜ੍ਹਾ ਕੇ ਦਿਖਾਉਣ ਦਾ ਜ਼ੋਰ ਪਾਇਆ ਪ੍ਰੰਤੂ ਉਨ੍ਹਾਂ ਨੇ ਅਜਿਹਾ ਕਰਨ ਤੋਂ ਨਾਂਹ ਕਰ ਦਿੱਤੀ। ਤਹਿਕੀਕਾਤ ਵਿਚ 2.05 ਲੱਖ ਪੈਕਟਾਂ ਦੀ ਵਿਕਰੀ ਬੋਗਸ ਖੇਤੀ ਮਹਿਕਮੇ ਨੇ ਕਾਗ਼ਜ਼ਾਂ ਵਿਚ ਦਿਖਾ ਦਿੱਤੀ ਹੈ ਜਦੋਂ ਕਿ ਕੰਪਨੀਆਂ ਇਸ ਝੂਠ ਵਿਚ ਭਾਗੀਦਾਰ ਨਹੀਂ ਬਣੀਆਂ। ਮੋਟੇ ਅੰਦਾਜ਼ੇ ਅਨੁਸਾਰ ਹਕੀਕਤ ਵਿਚ ਪੰਜਾਬ ਵਿਚ ਨਰਮੇ ਦੀ ਬਿਜਾਂਦ ਕਰੀਬ 2.90 ਲੱਖ ਹੈਕਟੇਅਰ ਦੇ ਕਰੀਬ ਹੀ ਹੋਈ ਹੈ ਜਦੋਂ ਕਿ ਖੇਤੀ ਮਹਿਕਮੇ 4.01 ਲੱਖ ਹੈਕਟੇਅਰ ਬਿਜਾਈ ਦੀ ਗੱਲ ਆਖ ਰਿਹਾ ਹੈ। ਬਠਿੰਡਾ ਜ਼ਿਲ੍ਹੇ ਵਿਚ 1.40 ਲੱਖ ਹੈਕਟੇਅਰ ਰਕਬੇ ਵਿਚ ਨਰਮੇ ਦੀ ਬਿਜਾਂਦ ਦਿਖਾਈ ਗਈ ਹੈ ਜਦੋਂ ਕਿ ਹਕੀਕਤ ਵਿਚ ਰਕਬਾ 90 ਹਜ਼ਾਰ ਹੈਕਟੇਅਰ ਦੇ ਆਸ ਪਾਸ ਹੈ। ਜ਼ਿਲ੍ਹਾ ਖੇਤੀ ਅਫਸਰ ਗੁਰਦਿੱਤਾ ਸਿੰਘ ਦਾ ਕਹਿਣਾ ਸੀ ਕਿ ਪ੍ਰਤੀ ਏਕੜ ਪਿਛੇ 2 ਤੋਂ ਢਾਈ ਪੈਕਟ ਬੀਜ ਪੈਂਦਾ ਹੈ ਅਤੇ ਬਠਿੰਡਾ ਜ਼ਿਲ੍ਹੇ ਵਿਚ ਕਰੀਬ 11 ਹਜ਼ਾਰ ਹੈਕਟੇਅਰ ਰਕਬਾ ਕਰੰਡ ਵੀ ਹੋਇਆ ਹੈ।
               ਵੇਰਵਿਆਂ ਅਨੁਸਾਰ ਪਿਛਲੇ ਵਰੇ੍ਹ ਰਕਬਾ 2.74 ਲੱਖ ਹੈਕਟੇਅਰ ਸੀ ਅਤੇ ਉਸ ਪਹਿਲਾਂ 2.91 ਲੱਖ ਹੈਕਟੇਅਰ ਰਕਬਾ ਸੀ। ਪੰਜਾਬ ਵਿਚ ਕਿਸੇ ਵਕਤ ਸੱਤ ਲੱਖ ਹੈਕਟੇਅਰ ਰਕਬੇ ਵਿਚ ਨਰਮੇ ਦੀ ਬਿਜਾਂਦ ਰਹੀ ਹੈ। ਪਿੰਡ ਮੁਹਾਲਾਂ ਦੇ ਕਿਸਾਨ ਗੁਰਪਾਲ ਸਿੰਘ ਦਾ 5 ਏਕੜ ਨਰਮਾ ਗੜਿਆਂ ਦੀ ਮਾਰ ਹੇਠ ਆ ਗਿਆ ਅਤੇ ਇਸ ਕਿਸਾਨ ਨੇ ਹੁਣ ਵਾਹ ਕੇ ਝੋਨਾ ਲਾ ਦਿੱਤਾ ਹੈ। ਮਾਨਸਾ ਦੇ ਪਿੰਡ ਟਾਂਡੀਆਂ ਦੇ ਦਰਜਨਾਂ ਕਿਸਾਨਾਂ ਨੂੰ ਤਿੰਨ ਤਿੰਨ ਵਾਰ ਬਿਜਾਈ ਕਰਨੀ ਪਈ। ਪਿੰਡ ਭੰਮੇ ਕਲਾਂ ਦੇ ਕਿਸਾਨ ਮੋਹਨ ਸਿੰਘ ਨੇ ਦੱਸਿਆ ਕਿ ਝੁਨੀਰ ਇਲਾਕੇ ’ਚ 4 ਹਜ਼ਾਰ ਏਕੜ ਨਰਮਾ ਗੜੇਮਾਰੀ ਤੇ ਝੱਖੜ ਦੀ ਮਾਰ ਹੇਠ ਆਇਆ ਹੈ ਅਤੇ ਇਸ ਵਾਰ ਰਕਬਾ ਘਟਿਆ ਹੈ। ਬੀ.ਕੇ.ਯੂ (ਉਗਰਾਹਾਂ) ਦੇ ਜ਼ਿਲ੍ਹਾ ਪ੍ਰਧਾਨ ਸ਼ਿੰਗਾਰਾ ਸਿੰਘ ਮਾਨ ਕਹਿਣਾ ਸੀ ਕਿ ਖੇਤੀ ਮਹਿਕਮਾ ਧਰਾਤਲ ਦੇ ਕੰਮ ਨਹੀਂ ਕਰਦਾ ਅਤੇ ਅੰਕੜਿਆਂ ਨੂੰ ਘੁੰਮਾ ਕੇ ਖੇਤਾਂ ਵਿਚ ਟੀਂਡੇ  ਲਾ ਰਿਹਾ ਹੈ ਜਿਸ ਦੀ ਜਾਂਚ ਹੋਣੀ ਚਾਹੀਦੀ ਹੈ।
                 ਸੈਟੇਲਾਈਟ ਰਿਪੋਰਟ ਲੈ ਰਹੇ ਹਾਂ : ਪੰਨੂ 
ਖੇਤੀ ਮਹਿਕਮੇ ਦੇ ਸਕੱਤਰ ਕਾਹਨ ਸਿੰਘ ਪੰਨੂ ਨੇ ਆਖਿਆ ਕਿ ਥੋੜੇ ਦਿਨਾਂ ਤੱਕ ਨਰਮੇ ਦੀ ਬਿਜਾਂਦ ਬਾਰੇ ਸੈਟੇਲਾਈਟ (ਰਿਮੋਟ ਸੈਨਸਿੰਗ) ਰਿਪੋਰਟ ਆ ਜਾਣੀ ਹੈ ਜਿਸ ਤੋਂ ਸੱਚ ਸਾਹਮਣੇ ਆ ਜਾਵੇਗਾ। ਖੇਤੀ ਮਹਿਕਮੇ ਦੇ ਡਾਇਰੈਕਟਰ ਸੁਤੰਤਰ ਐਰੀ ਨੇ 4.01 ਲੱਖ ਹੈਕਟੇਅਰ ਵਿਚ ਨਰਮੇ ਦੀ ਬਿਜਾਈ ਦੀ ਗੱਲ ਆਖੀ ਅਤੇ ਦੱਸਿਆ ਕਿ ਇੱਕ ਏਕੜ ਵਿਚ ਦੋ ਪੈਕਟ ਬੀਜ ਪੈਂਦਾ ਹੈ। ਉਨ੍ਹਾਂ ਆਖਿਆ ਕਿ ਜ਼ਿਲ੍ਹਾ ਖੇਤੀ ਅਫਸਰਾਂ ਤੋਂ ਇਹ ਰਿਪੋਰਟ ਪ੍ਰਾਪਤ ਹੋਈ ਸੀ ਤੇ ਹੁਣ ਉਹ ਕਿਸਾਨ ਵਾਈਜ ਸਰਵੇ ਕਰ ਰਹੇ ਹਨ। ਉਹ ਬੀਜਾਂ ਦੀ ਵਿਕਰੀ ਤੇ ਰਕਬੇ ਵਿਚਲੇ ਫਰਕ ਬਾਰੇ ਸਪੱਸ਼ਟ ਨਾ ਦੱਸ ਸਕੇ।
















   





Monday, June 24, 2019

                        ਖ਼ਬਰ ਦਾ ਅਸਰ 
       ਕੁੰਡੀ ਵਾਲੇ ਅਫਸਰ ਘਿਰਨ ਲੱਗੇ
                         ਚਰਨਜੀਤ ਭੁੱਲਰ
ਬਠਿੰਡਾ  : ਪਾਵਰਕੌਮ ਨੇ ਆਖਰ ਬਿਜਲੀ ਸਪਲਾਈ ਨੂੰ ਕੁੰਡੀ ਲਾਉਣ ਵਾਲੇ ਵੱਡੇ ਅਫਸਰਾਂ ਨੂੰ ਪਾਵਰ ਦਿਖਾਉਣੀ ਸ਼ੁਰੂ ਕੀਤੀ ਹੈ। ਪਾਵਰਕੌਮ ਨੇ ਪੰਜਾਬ ਭਰ ਦੇ ਡਿਪਟੀ ਕਮਿਸ਼ਨਰਾਂ ਅਤੇ ਜ਼ਿਲ੍ਹਾ ਪੁਲੀਸ ਕਪਤਾਨਾਂ ਦੇ ਘਰਾਂ ਅਤੇ ਕੈਂਪ ਦਫ਼ਤਰਾਂ ਦੇ ਬਿਜਲੀ ਮੀਟਰਾਂ ਦੀ ਪੜਤਾਲ ਅਰੰਭ ਦਿੱਤੀ ਹੈ। ਪਾਵਰਕੌਮ ਦੇ ਵੰਡ ਵਿਭਾਗ ਤੇ ਐਨਫੋਰਸਮੈਂਟ ਤਰਫ਼ੋਂ ਸਾਂਝੀ ਪੜਤਾਲ ਕੀਤੀ ਜਾ ਰਹੀ ਹੈ। ਪੰਜਾਬ ਸਰਕਾਰ ਨੂੰ ਇਸ ਗੱਲੋਂ ਨਮੋਸ਼ੀ ਝੱਲਣੀ ਪਈ ਹੈ ਕਿ ਜ਼ਿਲ੍ਹਾ ਪੱਧਰ ਦੇ ਅਧਿਕਾਰੀ ਬਿਜਲੀ ਸਪਲਾਈ ਨੂੰ ਖੁਦ ਹੀ ਕੁੰਢੀ ਲਾ ਰਹੇ ਹਨ। ਸਰਕਾਰ ਨੇ ਇਸ ਦਾ ਸਖ਼ਤ ਨੋਟਿਸ ਲਿਆ ਹੈ। ਪਾਵਰਕੌਮ ਨੇ ਸਮੁੱਚੇ ਮਾਮਲੇ ਦੀ ਸੋਮਵਾਰ ਤੱਕ ਰਿਪੋਰਟ ਮੰਗੀ ਹੈ। ਦੱਸਣਯੋਗ ਹੈ ਕਿ ਪੰਜਾਬੀ ਟ੍ਰਿਬਿਊਨ ਵੱਲੋਂ ਪਾਵਰਕੌਮ ਨਾਲ ਜੁੜੇ ਬਿਜਲੀ ਸਬਸਿਡੀ, ਬਿਜਲੀ ਚੋਰੀ ਤੇ ਵੱਡੇ ਅਫਸਰਾਂ ਦੀ ਬਿਜਲੀ ਖਪਤ ਦੇ ਮਾਮਲੇ ਨੂੰ ਪੰਜ ਕਿਸ਼ਤਾਂ ਦੀ ਲੜੀ ਵਿਚ ਪ੍ਰਮੁਖਤਾ ਨਾਲ ਪ੍ਰਕਾਸ਼ਿਤ ਕੀਤਾ ਗਿਆ। ਪਾਵਰਕੌਮ ਦੀ ਜਾਗ ਇਸ ਮਗਰੋਂ ਖੁੱਲ੍ਹੀ ਹੈ। ਪੰਜਾਬ ਰਾਜ ਬਿਜਲੀ ਰੈਗੂਲੇਟਰੀ ਕਮਿਸ਼ਨ ਨੇ ਵੀ ਇਸ ਦਾ ਨੋਟਿਸ ਲਿਆ ਹੈ ਅਤੇ ਪੰਜਾਬ ਸਰਕਾਰ ਨੂੰ ਇਸ ਤੋਂ ਜਾਣੂ ਕਰਾਇਆ ਹੈ। ਐਨਫੋਰਸਮੈਂਟ ਦੇ ਅਫਸਰਾਂ ਦੀਆਂ ਟੀਮਾਂ ਦਾ ਗਠਨ ਕੀਤਾ ਗਿਆ ਹੈ ਜਿਨ੍ਹਾਂ ਵੱਲੋਂ ਦੋ ਦਿਨਾਂ ਵਿਚ ਡਿਪਟੀ ਕਮਿਸ਼ਨਰਾਂ ਅਤੇ ਐਸ.ਐਸ.ਪੀਜ਼ ਦੇ ਮੀਟਰਾਂ ਦੀ ਪੜਤਾਲ ਕੀਤੀ ਜਾਣੀ ਹੈ। ਉਸ ਮਗਰੋਂ ਸਮੁੱਚੀ ਰਿਪੋਰਟ ਤਿਆਰ ਕੀਤੀ ਜਾਣੀ ਹੈ।
         ਪੰਜਾਬੀ ਟ੍ਰਿਬਿਊਨ ਵੱਲੋਂ ਆਰ.ਟੀ.ਆਈ ਅਤੇ ਹੋਰਨਾਂ ਸਰੋਤਾਂ ’ਤੇ ਅਧਾਰਿਤ ਪਾਵਰਕੌਮ ਦੇ ਤੱਥ ਉਜਾਗਰ ਕੀਤੇ ਗਏ ਕਿ ਕਿਵੇਂ ਕਈ ਡਿਪਟੀ ਕਮਿਸ਼ਨਰਾਂ ਅਤੇ ਐਸ.ਐਸ.ਪੀਜ਼ ਦੇ ਘਰਾਂ ਦੀ ਬਿਜਲੀ ਖਪਤ ਜ਼ੀਰੋ ਯੂਨਿਟ ਆ ਰਹੀ ਹੈ ਅਤੇ ਕਿੰਨੇ ਅਧਿਕਾਰੀ ਲੰਮੇ ਸਮੇਂ ਤੋਂ ਬਿਜਲੀ ਬਿੱਲਾਂ ਦਾ ਭੁਗਤਾਨ ਨਹੀਂ ਕਰ ਰਹੇ। ਪਾਵਰਕੌਮ ਦੇ ਐਨਫੋਰਸਮੈਂਟ ਦੇ ਮੁੱਖ ਇੰਜਨੀਅਰ ਸ੍ਰੀ ਗੋਪਾਲ ਸ਼ਰਮਾ ਨੇ ਦੱਸਿਆ ਕਿ ਮੁਢਲੇ ਪੜਾਅ ’ਤੇ ਉਹ ਪੰਜਾਬੀ ਟ੍ਰਿਬਿਊਨ ਵਿਚ ਪ੍ਰਕਾਸ਼ਿਤ 11 ਅਫਸਰਾਂ ਦੇ ਮੀਟਰਾਂ ਦੀ ਪੜਤਾਲ ਕਰਾ ਰਹੇ ਹਨ ਜਿਨ੍ਹਾਂ ਵੱਲੋਂ ਅਧਿਕਾਰੀਆਂ ਨੂੰ ਹਦਾਇਤਾਂ ਕਰ ਦਿੱਤੀਆਂ ਹਨ ਅਤੇ ਸੋਮਵਾਰ ਤੱਕ ਰਿਪੋਰਟ ਮੰਗੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਪੰਜਾਬ ਸਰਕਾਰ ਤਰਫ਼ੋਂ ਇਸ ਦਾ ਨੋਟਿਸ ਲਿਆ ਗਿਆ ਹੈ ਅਤੇ ਜਾਂਚ ਟੀਮਾਂ ਨੇ ਵੀ ਪੜਤਾਲ ਵਿੱਢ ਦਿੱਤੀ ਹੈ। ਪਾਵਰਕੌਮ ਦੇ ਡਾਇਰੈਕਟਰ (ਵੰਡ) ਸ੍ਰੀ ਐਨ.ਕੇ.ਸ਼ਰਮਾ ਦਾ ਕਹਿਣਾ ਸੀ ਕਿ ਪੰਜਾਬ ਭਰ ਦੇ ਇਨ੍ਹਾਂ ਅਧਿਕਾਰੀਆਂ ਦੇ ਮੀਟਰਾਂ ਦੀ ਚੈਕਿੰਗ ਕਰਨ ਦੀ ਹਦਾਇਤ ਕੀਤੀ ਗਈ ਹੈ ਅਤੇ ਵੰਡ ਵਿਭਾਗ ਤੋਂ ਵੀ ਇਸ ਵਾਰੇ ਰਿਪੋਰਟ ਮੰਗੀ ਗਈ ਹੈ। ਮੀਟਰਾਂ ਦੀ ਚੈਕਿੰਗ ਐਨਫੋਰਸਮੈਂਟ ਤੋਂ ਕਰਾਈ ਜਾ ਰਹੀ ਹੈ। ਜਿਨ੍ਹਾਂ ਅਫਸਰਾਂ ਦੇ ਘਰਾਂ ਦੇ ਮੀਟਰ ਅੰਦਰ ਲੱਗੇ ਹੋਏ, ਉਹ ਮੀਟਰ ਬਾਹਰ ਕਢਾਏ ਜਾਣਗੇ। ਰਿਪੋਰਟ ਆਉਣ ਮਗਰੋਂ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।
                ਪਾਵਰਕੌਮ ਦੇ ਐਨਫੋਰਸਮੈਂਟ ਦੇ ਬਠਿੰਡਾ, ਜਲੰਧਰ ਅਤੇ ਅੰਮ੍ਰਿਤਸਰ ਦੇ 13 ਉੱਡਣ ਦਸਤਿਆਂ ਨੇ ਅੱਜ ਘਰੇਲੂ ਅਤੇ ਵਪਾਰਿਕ ਬਿਜਲੀ ਕੁਨੈਕਸ਼ਨਾਂ ਦੀ ਚੈਕਿੰਗ ਕੀਤੀ। ਅੱਜ ਪੂਰਾ ਦਿਨ ਚੱਲੀ ਚੈਕਿੰਗ ਵਿਚ 283 ਕੁਨੈਕਸ਼ਨ ਚੈੱਕ ਕੀਤੇ ਗਏ ਜਿਨ੍ਹਾਂ ਚੋਂ 72 ਕੇਸ ਬਿਜਲੀ ਚੋਰੀ ਦੇ ਫੜੇ ਗਏ। ਕਰੀਬ 16.61 ਲੱਖ ਰੁਪਏ ਦੀ ਬਿਜਲੀ ਚੋਰੀ ਦੇ ਕੇਸ ਫੜੇ ਗਏ ਹਨ। ਅਮਰਕੋਟ ਸਬ ਡਵੀਜ਼ਨ ਦੇ ਪਿੰਡ ਕਾਲੀਆ ਵਿਚ ਤਾਂ ਉੱਡਣ ਦਸਤੇ ਦਾ ਪਿੰਡ ਵਾਲਿਆਂ ਨੇ ਘਿਰਾਓ ਕਰ ਲਿਆ ਅਤੇ ਚੈਕਿੰਗ ਕਰਨ ਤੋਂ ਰੋਕਿਆ। ਸਟਾਫ ਨੂੰ ਬੰਦੀ ਵੀ ਬਣਾਇਆ ਗਿਆ ਅਤੇ ਤਿੰਨ ਵਜੇ ਛੱਡਿਆ ਪੰਜਾਬ ਰਾਜ ਬਿਜਲੀ ਰੈਗੂਲੇਟਰੀ ਕਮਿਸ਼ਨ ਦੀ ਚੇਅਰਪਰਸਨ ਕੁਸਮਜੀਤ ਕੌਰ ਸਿੱਧੂ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ ਧਿਆਨ ’ਚ ਜਿਉਂ ਹੀ ਇਹ ਮਾਮਲਾ ਆਇਆ,ਉਨ੍ਹਾਂ ਨੇ ਇਸ ਬਾਰੇ ਫੌਰੀ ਮੁੱਖ ਸਕੱਤਰ ਪੰਜਾਬ, ਡੀ.ਜੀ.ਪੀ ਅਤੇ ਪ੍ਰਮੁੱਖ ਸਕੱਤਰ (ਪਾਵਰ) ਨੂੰ ਪੂਰਾ ਮਾਮਲਾ ਭੇਜ ਦਿੱਤਾ ਹੈ। ਸਿੱਧੂ ਨੇ ਦੱਸਿਆ ਕਿ ਅਗਲੀ ਕਾਰਵਾਈ ਉਨ੍ਹਾਂ ਨੇ ਕਰਨੀ ਹੈ।
                ਧਨਾਢਾਂ ਨੂੰ ਸਬਸਿਡੀ ’ਤੇ ਮੰਥਨ ਸ਼ੁਰੂ
ਪੰਜਾਬ ਸਰਕਾਰ ਨੇ ਧਨਾਢ ਕਿਸਾਨਾਂ ਨੂੰ ਮਿਲਦੀ ਬਿਜਲੀ ਸਬਸਿਡੀ ’ਤੇ ਵੀ ਮੰਥਨ ਕਰਨਾ ਸ਼ੁਰੂ ਕਰ ਦਿੱਤਾ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਿਚ ਵਾਟਰ ਰੈਗੂਲੇਟਰੀ ਕਮਿਸ਼ਨ ਬਾਰੇ ਹੋਈ ਮੀਟਿੰਗ ਵਿਚ ਇਹ ਮਾਮਲਾ ਵੀ ਉੱਠਿਆ ਕਿ ਧਨਾਢ ਕਿਸਾਨਾਂ ਨੂੰ ਸਰਕਾਰ ਬਿਜਲੀ ਸਬਸਿਡੀ ਕਿਉਂ ਦੇਵੇ। ਪੰਚਾਇਤ ਮੰਤਰੀ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੇ ਦੱਸਿਆ ਕਿ ਮੀਟਿੰਗ ਵਿਚ ਇੱਕ ਸੁਝਾਓ ਦੇ ਰੂਪ ਵਿਚ ਇਹ ਗੱਲ ਵੀ ਆਈ ਸੀ। ਸੂਤਰ ਦੱਸਦੇ ਹਨ ਕਿ ਦੋ ਵਜ਼ੀਰਾਂ ਨੇ ਤਾਂ ਇਹ ਮਾਮਲਾ ਜ਼ੋਰਦਾਰ ਤਰੀਕੇ ਨਾਲ ਉਠਾਇਆ।
 
   






Sunday, June 23, 2019

                           ਵਿਚਲੀ ਗੱਲ  
             ਬੋਦੀ ਵਾਲੇ ਤਾਰੇ ਦੇ ਪੁਆੜੇ
                           ਚਰਨਜੀਤ ਭੁੱਲਰ
ਬਠਿੰਡਾ : ਦਿਮਾਗੀ ਬੁਖਾਰ ਬਿਹਾਰ ਨੂੰ ਚੜਿਐ। ਜੈਸਲਮੇਰ ਟਿੱਡੀ ਦਲ ਤੋਂ ਡਰਿਐ। ਕੇਰਲਾ ਨੂੰ ਨਿਪਾਹ ਵਾਈਰਸ ਨੇ ਫੜਿਐ। ਤਾਮਿਲ ਹੁਣ ਸੋਕੇ ’ਚ ਖੜ੍ਹਿਐ। ਕਰਜ਼ੇ ਨਾਲ ਪੰਜਾਬ ਮਰਿਐ। ਯੂ.ਪੀ ਵਾਲੇ ਯੋਗੀ ਨੂੰ ਗੁੱਸਾ ਬਹੁਤ ਚੜ੍ਹਿਐ। ਹਿੰਸਾ ਨਾਲ ਬੰਗਾਲ ਭਰਿਐ। ਦਿੱਲੀ ਪੁਲੀਸ ਦੇ ਧੱਕੇ ਗੁਰਸਿੱਖ ਚੜ੍ਹਿਐ। ਡੁੱਬਦੇ ਸੂਰਜ ਨੂੰ ਕੌਣ ਪਾਣੀ ਦਿੰਦੈ। ਬੋਦੀ ਵਾਲਾ ਤਾਰਾ ਜੋ ਮੁੜ ਚੜ੍ਹਿਐ। ਸੰਸਦ ’ਚ ਹੁਣ ਮੁੜ ਮੇਲਾ ਭਰਿਐ। ਦੇਖੋ ਤਾਂ ਸਹੀ, ਕੌਣ ਕੌਣ ਪੌੜੀ ਚੜ੍ਹਿਐ। ਇਨ੍ਹਾਂ ਸੁਆਲਾਂ ਨੂੰ ਛੱਡੋ, ਥੋਨੂੰ ਤਾਂ ਤੱਕਲ਼ੇ ਵਾਂਗੂ ਸਿੱਧਾ ਕਰਿਐ। ਪੀਰਾਂ ਦੇ ਚੇਲੇ ਬਿੜਕਾਂ ਲਈ ਜਾਂਦੇ ਨੇ। ਨਵਜੋਤ ਸਿੱਧੂ ਕਿਹੜੇ ਪਹਾੜੀਂ ਚੜ੍ਹਿਐ। ਬਾਕੀ ਤਾਂ ਛੱਡੋ, ਛੱਜੂ ਰਾਮਾ ਤੂੰ ਦੱਸ, ਤੈਨੂੰ ਕਾਹਦਾ ਚਾਅ ਚੜ੍ਹਿਐ। ਛੱਜੂ ਰਾਮ ਨੇ ਗੁਰਮੰਤਰ ਸਿੱਖ ਲਿਐ। ਮੀਂਹ ਆਵੇ, ਚਾਹੇ ਸੁਨਾਮੀ। ਇੱਕੋ ਗੱਲ ਆਖਦੈ ‘ਆਲ ਇਜ਼ ਵੈੱਲ’ (ਸਭ ਅੱਛਾ ਹੈ)। ਚੇਤਾ ਕਮਜ਼ੋਰ ਹੈ ਤਾਂ ਅਮੀਰ ਖਾਨ ਦੀ ਫਿਲਮ ‘ਥ੍ਰੀ ਇੰਡੀਅਟ’ ਦੁਬਾਰਾ ਦੇਖਣਾ। ਜਦੋਂ ਜ਼ਿੰਦਗੀ ‘ਆਊਟ ਆਫ਼ ਕੰਟਰੋਲ’ ਜਾਪੇ। ਦਿਲ ਤੇ ਪੋਲਾ ਜੇਹਾ ਹੱਥ ਰੱਖੋ, ਹੌਲੀ ਜੇਹੀ ਆਖੋ ‘ਆਲ ਇੰਜ ਵੈੱਲ’। ਮੁਜ਼ੱਫਰਪੁਰ (ਬਿਹਾਰ) ’ਚ ਦਿਮਾਗੀ ਬੁਖਾਰ ਠੱਲ ਨਹੀਂ ਰਿਹਾ। 136 ਬੱਚੇ ਜਾਨ ਗੁਆ ਬੈਠੇ ਨੇ। ਪਹਿਲਾਂ ਗੋਰਖਪੁਰ ’ਚ 60 ਬੱਚੇ ਮੌਤ ਦੇ ਮੂੰਹ ਪਏ ਸਨ। ਸੰਸਦ ’ਚ ਨਾਅਰੇ ਗੂੰਜੇ ਨੇ। ਮੁਜੱਫਰਪੁਰ ਦੇ ਸਿਵਿਆਂ ’ਚ ਵੈਣ।  ਕਿਹੜੇ ਮੂੰਹ ਨਾਲ ਕਹੀਏ। ਮਾਵਾਂ ਨੂੰ ਕਿ ਕਹੋ  ‘ਆਲ ਇਜ਼ ਵੈੱਲ’।
          ਜ਼ਿੰਦਗੀ ਸੁੱਕੀ ਕਿਵੇਂ ਲੰਘ ਜਾਊ। ਡਾਕਟਰਾਂ ਦਾ ਸੋਕਾ, ਕਿਤੇ ਖੇਤਾਂ ’ਚ ਸੋਕਾ। ਜਦੋਂ ਹਸਪਤਾਲ ਖੁਦ ਆਈ.ਸੀ.ਯੂ ’ਚ ਹੋਣ। ਫਿਰ ਮਹਾਤੜਾਂ ਲਈ ਕਿਥੇ ਮੌਕਾ। ਬੰਗਾਲੀ ਦੀਦੀ ਨੂੰ ਮੁੜ ਮੋਹ ਜਾਗਿਐ। ‘ਅੰਬਾਂ ਦੀ ਟੋਕਰੀ’ ਘੱਲੀ ਹੈ ਪ੍ਰਧਾਨ ਮੰਤਰੀ ਨੂੰ। ਮੋਦੀ ਨੂੰ ਅੰਬਾਂ ਕਿੰਨੇ ਕੁ ਮਿੱਠੇ ਲੱਗੇ। ਅਕਸ਼ੈ ਕੁਮਾਰ ਹੀ ਦੱਸ ਸਕਦੈ। ਵਾਜਪਾਈ ਵੀ ਅੰਬਾਂ ਦੇ ਸ਼ੌਂਕੀ ਸਨ। ਗਰੀਬ ਬੰਦੇ ਨੂੰ ਤਾਂ ਫਲ ਝੱਲਣਾ ਵੀ ਅੌਖੈ। ਬਾਗਾਂ ਚੋਂ ਲੀਚੀਂ ਕੀ ਖਾ ਲਈ, ਮੁਜ਼ੱਫਰਪੁਰ ਦੇ ਲਾਲ ਜਾਨਾਂ ਗੁਆ ਬੈਠੇ। ਸਾਧਵੀ ਪ੍ਰਗਿਆ ਦਾ ਢਿੱਡ ਬਿਨਾਂ ਗੱਲੋਂ ਦੁੱਖਿਆ। ਪੇਸ਼ੀ ਤੋਂ ਛੋਟ ਮਿਲ ਗਈ। ਹੁਣ ਨੌ ਬਰ ਨੌ ਹੈ। ਯੋਗ ਦਿਵਸ ’ਤੇ ਮਦਰਸਾ ਅਧਿਆਪਕ ‘ਜੈ ਸ੍ਰੀ ਰਾਮ’ ਆਖ ਦਿੰਦਾ, ਉਸ ਦਾ ਅੰਗ ਅੰਗ ਨਾ ਦੁੱਖਦਾ। ਘੱਟ ਗਿਣਤੀ ਸ਼ਸ਼ੋਪੰਜ ’ਚ ਹੈ। ‘ਜੈ ਸ੍ਰੀ ਰਾਮ’ ਆਖੇ ਜਾਂ ‘ਆਲ ਇਜ਼ ਵੈੱਲ’।ਪੰਜਾਬ ’ਚ ਹਾਲੇ ਸੋਕਾ ਤਾਂ ਨਹੀਂ, ਪੈਰ ਪੈਰ ’ਤੇ ਧੋਖਾ ਹੈ। ਟਾਵਾਂ ਦਿਨ ਸੁੱਕਾ ਲੰਘਦੈ। ਜਬਰ ਜਨਾਹ ਦੀ ਅੱਗ ਨੇ ਬਚਪਨ ਸੇਕਿਆ। ਧੂਰੀ ’ਚ ਚਾਰ ਸਾਲ ਦੀ ਬੱਚੀ ਸ਼ਿਕਾਰ ਬਣੀ। ਸੁਲਤਾਨਪੁਰ ਲੋਧੀ ’ਚ ਤਿੰਨ ਸਾਲ ਦੀ ਬੱਚੀ। ਪਥਰਾਲਾ ’ਚ ਚਾਰ ਸਾਲ ਦੀ ਬੱਚੀ। ਸੋਝੀ ਤੋਂ ਪਹਿਲਾਂ ਹੀ ਦਾਗ ਮਿਲ ਗਏ। ਮਾਪੇ ਕਿਵੇਂ ਕਹਿਣ ‘ਆਲ ਇਜ਼ ਵੈੱਲ’।
                ਮੁਕਤਸਰ ’ਚ ਜੋ ਵਾਪਰਿਆ, ਦਿਲ ਹਿਲਾਉਂਦਾ ਹੈ। ਮਾਈ ਭਾਗੋ ਦੀ ਸ਼ਰਮ ਮੰਨਦਾ। ਕਾਂਗਰਸੀ ਕੌਂਸਲਰ ਕਾਰਾ ਨਾ ਕਰਦਾ। ਮਹਿਲਾ ’ਤੇ ਭਰੇ ਬਾਜ਼ਾਰ ਤਸ਼ੱਦਦ ਕੀਤਾ। ਬੱਚੇ ਪਾਰਸ ਨੇ ਚੀਕ ਚਿਹਾੜੇ ’ਚ ਵੀਡੀਓ ਬਣਾ ਲਈ। ਦੋਸ਼ੀ ਸਲਾਖਾ ਪਿਛੇ ਹਨ ਤੇ ਮਹਿਲਾ ਹਸਪਤਾਲ ’ਚ। ਦਰਿੰਦਗੀ ਦੇਖ ਕੇ ਬੱਚੇ ’ਚ ਹਿੰਮਤ ਨਹੀਂ ਬਚੀ। ਕਹਿ ਸਕੇ ਕਿ ‘ਆਲ ਇਜ਼ ਵੈੱਲ’। ਦਿੱਲੀ ਪੁਲੀਸ ਦੇ ਲੰਮੇ ਹੱਥ ਗੁਰਸਿੱਖ ਪਿਉ ਪੁੱਤ ਨੂੰ ਲੱਗੇ ਹਨ। ਜ਼ਖਮ ਤਾਂ ਪੁਰਾਣੇ ਨਹੀਂ ਭੁੱਲੇ ਸਨ। ਯੂ.ਪੀ ਵਾਲੇ ਯੋਗੀ, ਪਰੰਪਰਾ ਹੀ ਭੁੱਲ ਬੈਠੇ ਹਨ। ਯਾਦ ਰੱਖਦੇ ਤਾਂ ਹਾਰਡ ਕੌਰ ਬਚ ਜਾਂਦੀ। ਨਾਲੇ ਮੀਡੀਆ ਵਾਲੇ ਸੱਜਣ। ਨਾ ਹੀ ਦੇਸ਼ ਧਰੋਹ ਵਾਲਾ ਚੈਪਟਰ ਮੁੜ ਖੁੱਲ੍ਹਦਾ। ਦੇਸ਼ ’ਚ ਸਰਕਾਰ ਬਦਲੀ ਹੈ, ਹਾਲਾਤ ਨਹੀਂ। ਐਂਕਰ ਸਾਥੀਓ.. ਆਓ ਮਿਲ ਕੇ ਬੋਲੋ ‘ਆਲ ਇਜ਼ ਵੈੱਲ’। ਕਸਾਈ ਦੋਵੇਂ ਹੱਥ ਜੋੜੀ ਖੜ੍ਹੇ ਹਨ। ਤੇੜਾ ਖੁਰਦ ਦੇ ਹਰਵੰਤ ਨੂੰ ਕੋਈ ਲੱਜ ਨਹੀਂ। ਤਾਹੀਓਂ ‘ਚਿੱਟਾ ਲਹੂ’ ਨਾਵਲ ਪੜ੍ਹ ਰਿਹੈ ਛੱਜੂ ਰਾਮ। ਪੂਰਾ ਪਰਿਵਾਰ ਟੋਟੇ ਟੋਟੇ ਕੀਤਾ। ਨਹਿਰ ’ਚ ਸੁੱਟ ਆਇਆ। ਇਸ਼ਕ ਦੇ ਭੂਤ ਨੇ ਹਰਵੰਤ ਨੂੰ ਯਮਰਾਜ ਬਣਾ ਦਿੱਤਾ।
                ਹੁਣ ਨਾਜਾਇਜ਼ ਸੰਬੰਧਾਂ ਕਰਕੇ ਕਤਲ ਵਧੇ ਹਨ। ਜ਼ਿੰਦਗੀ ਸਸਤੀ ਹੋਈ ਹੈ, ਨਾਲੇ ਜ਼ਮੀਰ ਵੀ। ਫਿਰੋਜ਼ਪੁਰ ਦੇ ਨਸ਼ੇੜੀ ਨੇ ਪਤਨੀ ਮਾਰ ਦਿੱਤੀ। ਸੌ ਰੁਪਏ ਨਹੀਂ ਦਿੱਤੇ ਸਨ। ਖਾਲੀ ਗਲਾਸ ਦੇਣ ਤੋਂ ਨਾਂਹ ਕੀਤੀ ਤਾਂ ਬੰਗਾ ਦੇ ਕਮਲਜੀਤ ਨੂੰ ਜਾਨ ਤੋਂ ਹੱਥ ਧੋਣੇ ਪਏ। ਕੇਂਦਰ ਆਖ ਰਿਹੈ, ਸਭ ਮਰਜ਼ਾਂ ਦੀ ਇੱਕੋ ਦਵਾ, ਯੋਗ ਕਰੋ, ਡੂੰਘਾ ਸਾਹ ਲੈ ਕੇ ਆਖੋ ‘ਆਲ ਇੰਜ ਵੈੱਲ’।  ਬਠਿੰਡਾ ’ਚ ਨਸ਼ੇ ’ਚ ਬੇਹੋਸ਼ ਲੜਕੀ ਆਖਰ ਚਲ ਵਸੀ। ਵੱਡੇ ਪਰਿਵਾਰ ਦੀ ਇੱਕ ਧੀ ਵੀ ਨਸ਼ਾ ਛੁਡਾਊ ਕੇਂਦਰ ’ਚ ਹੈ। ਧੀ ਸਮੁੱਚੇ ਪਿੰਡ ਦੀ ਹੁੰਦੀ। ਸਰਾਏਨਾਗਾ ’ਚ ਜਵਾਨ ਕੁੜੀ ਦੇ ਹੱਥ ਨਾ ਵੱਢੇ ਜਾਂਦੇ। ਲਹਿਰੇ ਦੀ ਧੀ ਅਣਵਿਆਹੀ ਮਾਂ ਨਾ ਬਣਦੀ। ਵਿਰਾਸਤ ਕੀ ਸੀ, ਹੋ ਕੀ ਰਿਹੈ। ਜਸਵੰਤ ਕੰਵਲ ਦਾ ਦੋਹਤਾ ਸੁਮੇਲ ਸਿੱਧੂ ਆਖਦੈ, ਢੁੱਡੀਕੇ ਆਇਓ, ਉਥੇ ਗੱਲ ਕਰਾਂਗੇ ਜਵਾਨੀ ਦੀ। ਗੰਨੇ ਵਾਲੇ ਕਿਸਾਨ ਬੋਲੇ ਨੇ, ਸਾਡੀ ਵੀ ਕਰਿਓ, ਸਰਕਾਰ ਨੇ 1028 ਕਰੋੜ ਹਾਲੇ ਤੱਕ ਨਹੀਂ ਦਿੱਤੇ। ਮਗਨਰੇਗਾ ਮਜ਼ਦੂਰ ਵੀ ਉੱਠੇ ਨੇ, ਸਾਨੂੰ ਨਾ ਭੁੱਲ ਜਾਇਓ। ਗਿਣਤੀ ’ਚ ਤਾਂ ਅਸੀਂ 25 ਕਰੋੜ ਹਾਂ, ਸੌ ਦਿਨ ਰੁਜ਼ਗਾਰ 46 ਲੱਖ ਨੂੰ ਹੀ ਮਿਲਿਐ।
             ਕੈਂਸਰ ਪੀੜਤ ਉੱਠਣੋਂ ਬੇਵੱਸ ਹਨ। ਆਖਦੇ ਨੇ, ‘ਅਸੀਂ ਕੀ ਮਾਂਹ ਮਾਰੇ ਐ, ਸਾਡਾ ਵੀ ਮੂੰਹ ਸਿਰ ਕਰੋ’। ਜਿਹੜੇ ਸਿਰ ਸੰਸਦ ’ਚ ਜੁੜੇ ਨੇ। ਉਹ ਆਖੀ ਜਾ ਰਹੇ ਨੇ ਕਹੋ ‘ਆਲ ਇਜ਼ ਵੈੱਲ’। ਅਕਾਲੀ ਆਖ ਰਹੇ ਹਨ। ਪੰਜਾਬ ’ਚ ‘ਆਲ ਇਜ਼ ਵੈੱਲ’ ਨਹੀਂ।  ਕਪਤਾਨ ਆਖ ਰਿਹੈ ਕਿ ਅਕਾਲੀ ਆਪਣੇ ਦਿਨ ਭੁੱਲਗੇ। ਟਿੱਡੀ ਦਲ ਨੇ ਜੈਸਲਮੇਰ ’ਤੇ ਸਰਜੀਕਲ ਸਟ੍ਰਾਈਕ ਕੀਤਾ। ਪਾਕਿਸਤਾਨੋਂ ਆਇਆ ਟਿੱਡੀ ਦਲ। ਚੁਰੂ ’ਚ ਗਰਮੀ ਨੇ ਰਿਕਾਰਡ ਤੋੜੇ ਨੇ। ਸੋਕਾ ਪ੍ਰਭਾਵਿਤ ਜ਼ਿਲ੍ਹਿਆਂ ਦਾ ਅੰਕੜਾ 103 ਤੇ ਜਾ ਪੁੱਜਾ। ਕੇਰਲਾ ’ਚ ਵੀਹ ਲੋਕਾਂ ਦੀ ਜਾਨ ਨਿਪਾਹ ਨੇ ਲਈ ਹੈ। ਮਹਾਂਰਾਸ਼ਟਰ ’ਚ ਚਾਰ ਵਰ੍ਹਿਆਂ ’ਚ 12,000 ਕਿਸਾਨ ਖੁਦਕੁਸ਼ੀ ਕਰ ਗਏ। 4000 ਅੌਰਤਾਂ ਦਾ ਵੀ ਰੌਲਾ ਪਿਆ। ਗੰਨੇ ਦੇ ਖੇਤਾਂ ਚੋਂ ਕੋਈ ਦਿਨ ਖੁੰਝੇ ਨਾ। ਬੱਚੇਦਾਨੀਆਂ ਹੀ ਕਢਵਾ ਸੁੱਟੀਆਂ। ਟੁੱਟੀ ਟਾਹਣੀ ਨੂੰ ਫਿਰ ਕੌਣ ਪੁੱਛਦੈ। ਅੌਰਤਾਂ ਨੂੰ ਡਰ ’ਚ ਹਰ ਹਰ ਕਰਨੈ ਪੈ ਰਿਹਾ। ਭਾਜਪਾਈ ਨਸੀਹਤ ਸੁਣੋ। ਹਰ ਹਰ ਤਾਂ ਕਰੋ, ਪਰ ਡਰ ’ਚ ਨਹੀਂ। ਮਨ ਫਿਰ ਨਾ ਟਿਕੇ ਤਾਂ ‘ਆਲ ਇਜ਼ ਵੈੱਲ’ ਆਖਣਾ।
     ਬਾਬਾ ਰਾਮਦੇਵ ਆਖਦੈ, ਚੋਣਾਂ ’ਚ ਆਲ ਵੈੱਲ ਹੋਣਾ ਸੀ, ਕਿਤੇ ਰਾਹੁਲ ਗਾਂਧੀ ਯੋਗ ਕਰ ਲੈਂਦੇ। ਠੀਕ ਇੱਕ ਮਹੀਨਾ ਪਹਿਲਾਂ ਚੋਣ ਨਤੀਜੇ ਆਏ। ਮੁਲਕ ਸੰਕਟਾਂ ’ਚ ਡੁੱਬਾ, ਸਿਆਸੀ ਪੀਰ ਜਸ਼ਨਾਂ ’ਚ। ਪੰਜ ਤਾਰਾ ਹੋਟਲ ਅਸ਼ੋਕਾ ’ਚ ਸਭ ਨੂੰ ਰਾਤਰੀ ਭੋਜ ਦਿੱਤਾ। ਮੇਨਕਾ ਗਾਂਧੀ ਦੀ ਖਾਣ ਨੂੰ ਵੱਢੀ ਰੂਹ ਨਹੀਂ ਕੀਤੀ। ਉਦੋਂ ਕੁਰਸੀ ਖੱੁਸਣ ਕਰਕੇ। ਅੱਜ ਸਾਈਂ ਕਰਕੇ। ਸੰਜੇ ਗਾਂਧੀ ਅੱਜ ਦੇ ਦਿਨ ਵਿਦਾ ਹੋਏ ਸਨ। ਝਟਕਾ ਤਾਂ ਡੋਨਾਲਡ ਟਰੰਪ ਨੂੰ ਵੀ ਲੱਗਿਐ। ਈਰਾਨ ਨੇ ਡਰੋਨ ਜੋ ਸੁੱਟ ਲਿਆ। ਮੋਦੀ ਵਾਂਗੂ ਟਰੰਪ ਨੇ ਵੀ ਚੋਣ ਮੇਲੇ ’ਚ ਮੁੜ ਬੜ੍ਹਕ ਮਾਰੀ ਐ। ਦੁਨੀਆ ਡਰੀ ਬੈਠੀ ਹੈ ਕਿ ਕਿਤੇ ਟਕੂਏ ਨਾ ਖੜਕਾ ਦੇਵੇ। ਡਰੋਂ ਨਾ, ਬੱਸ ਦਿਲ ’ਤੇ ਹੱਥ ਰੱਖੋ, ਜ਼ੋਰ ਦੀ ਆਖੋ ‘ਆਲ ਇਜ਼ ਵੈੱਲ’। ਫਿਰ ਬੇਸ਼ੱਕ ਅੰਬ ਖਾ ਲਿਓ ਤੇ ਚਾਹੇ ਲੀਚੀ।
 
     


Saturday, June 22, 2019

                             ਕਾਂਗੜ ਤੇ ਖਹਿਰਾ ਨੇ
            ਮੁਫ਼ਤੋ ਮੁਫ਼ਤੀ ’ਚ ਕਰਾਈ ਬੱਲੇ ਬੱਲੇ 
                                ਚਰਨਜੀਤ ਭੁੱਲਰ                 
ਬਠਿੰਡਾ : ਮਾਲ ਮੰਤਰੀ ਪੰਜਾਬ ਗੁਰਪ੍ਰੀਤ ਸਿੰਘ ਕਾਂਗੜ ਨੇ ‘ਬਿਜਲੀ ਸਬਸਿਡੀ’ ਛੱਡ ਕੇ ਸਿਆਸੀ ਮੁਹਾਜ਼ ’ਤੇ ਭੱਲ ਤਾਂ ਖੱਟ ਲਈ ਹੈ ਪਰ ਉਨ੍ਹਾਂ ਅੱਠ ਮਹੀਨੇ ਤੋਂ ਖੇਤੀ ਮੋਟਰਾਂ ਦਾ ਕੋਈ ਬਿੱਲ ਨਹੀਂ ਤਾਰਿਆ ਹੈ। ਇਵੇਂ ਪੰਜਾਬ ਏਕਤਾ ਪਾਰਟੀ ਦੇ ਪ੍ਰਧਾਨ ਸੁਖ ਪਾਲ ਖਹਿਰਾ ਵੀ ‘ਬਿਜਲੀ ਸਬਸਿਡੀ’ ਛੱਡਣ ਦੇ ਆਪਣੇ ਵਚਨਾਂ ’ਤੇ ਪੂਰੇ ਨਹੀਂ ਉੱਤਰੇ। ਖਹਿਰਾ ਪਰਿਵਾਰ ਕੋਲ ਕੁੱਲ 9 ਖੇਤੀ ਮੋਟਰਾਂ ਹਨ ਜਿਨ੍ਹਾਂ ’ਤੇ ਸਬਸਿਡੀ ਲੈ ਰਹੇ ਹਨ। ਪੰਜਾਬ ਭਰ ਦੇ ਅਜਿਹੇ 25 ਕਿਸਾਨ ਸ਼ਨਾਖ਼ਤ ਕੀਤੇ ਗਏ ਹਨ ਜਿਨ੍ਹਾਂ ਕੋਲ ਸਭ ਤੋਂ ਵੱਧ ਖੇਤੀ ਮੋਟਰਾਂ ਇੱਕੋ ਨਾਮ ’ਤੇ ਹਨ, ਉਨ੍ਹਾਂ ’ਚ ਸੁਖਪਾਲ ਖਹਿਰਾ ਵੀ ਸ਼ਾਮਿਲ ਹਨ।  ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਸਰਦੇ ਪੁੱਜਦਿਆਂ ਨੂੰ ‘ਬਿਜਲੀ ਸਬਸਿਡੀ’ ਛੱਡਣ ਦੀ ਅਪੀਲ ਕੀਤੀ ਸੀ। ਪਾਵਰਕੌਮ ਨੇ ਫਰਵਰੀ 2018 ਵਿਚ ਨੋਟੀਫਿਕੇਸ਼ਨ ਜਾਰੀ ਕਰਕੇ ਖੇਤੀ ਮੋਟਰਾਂ ਦਾ ਪ੍ਰਤੀ ਹਾਰਸ ਪਾਵਰ 403 ਰੁਪਏ ਤੈਅ ਕੀਤਾ। ਪੰਜਾਬ ਚੋਂ ਸਿਰਫ਼ 10 ਖੇਤੀ ਕੁਨੈਕਸ਼ਨ ‘ਬਿਜਲੀ ਸਬਸਿਡੀ’ ਤੋਂ ਮੁਕਤ ਹੋਏ ਹਨ। ਸੁਨੀਲ ਜਾਖੜ ਨੇ 9 ਮਈ 2017 ਨੂੰ ਲਿਖਤੀ ਸਹਿਮਤੀ ਦੇ ਕੇ ਸਬਸਿਡੀ ਛੱਡਣ ਦੀ ਪਹਿਲ ਕੀਤੀ। ਮੌਜੂਦਾ ਮਾਲ ਮੰਤਰੀ ਗੁਰਪ੍ਰੀਤ ਸਿੰਘ ਕਾਂਗੜ ਨੇ ਪਹਿਲੋਂ ਬਤੌਰ ਬਿਜਲੀ ਮੰਤਰੀ ਦੋ ਮੋਟਰਾਂ ਦੀ ਬਿਜਲੀ ਸਬਸਿਡੀ ਛੱਡਣ ਲਈ 29  ਸਤੰਬਰ 2018 ਨੂੰ ਲਿਖਤੀ ਸਹਿਮਤੀ ਦਿੱਤੀ।
                  ਗੁਰਪ੍ਰੀਤ ਕਾਂਗੜ ਨੇ ਖਾਤਾ ਨੰਬਰ ਏ.ਪੀ 19/40 ਅਤੇ ਉਨ੍ਹਾਂ ਦੀ ਧਰਮਪਤਨੀ ਸੁਖਪ੍ਰੀਤ ਕੌਰ ਨੇ ਖਾਤਾ ਨੰਬਰ ਏ.ਪੀ 19/183 ਤਹਿਤ ਖੇਤੀ ਮੋਟਰਾਂ ਦੀ ਸਬਸਿਡੀ ਤਿਆਗ ਦਿੱਤੀ। 7.5-7.5 ਹਾਰਸ ਪਾਵਰ ਦੀਆਂ ਦੋਵਾਂ ਮੋਟਰਾਂ ਦਾ ਬਿਜਲੀ ਬਿੱਲ ਪ੍ਰਤੀ ਮਹੀਨਾ 6044 ਰੁਪਏ ਬਣਦਾ ਹੈ ਅਤੇ ਛੇ ਮਹੀਨੇ ਦਾ ਦੋਵਾਂ ਮੋਟਰਾਂ ਦਾ ਕਰੀਬ 36,264 ਰੁਪਏ ਬਿੱਲ ਬਣਿਆ।  ਕਾਂਗੜ ਨੇ ਸਹਿਮਤੀ ਦੇ ਅੱਠ ਮਹੀਨੇ ਮਗਰੋਂ ਵੀ ਇਹ ਬਿੱਲ ਨਹੀਂ ਤਾਰਿਆ ਹੈ ਜਦੋਂ ਕਿ ਬਾਕੀ ਸਭਨਾਂ ਨੇ ਬਿੱਲ ਤਾਰੇ ਹਨ। ਖ਼ਜ਼ਾਨਾ ਮੰਤਰੀ ਮਨਪ੍ਰੀਤ ਬਾਦਲ ਨੇ ਤਿੰਨ ਮੋਟਰਾਂ ਦਾ 1.24 ਲੱਖ ਰੁਪਏ, ਸਹਿਕਾਰਤਾ ਮੰਤਰੀ ਸੁਖਜਿੰਦਰ ਰੰਧਾਵਾ ਨੇ ਦੋ ਮੋਟਰਾਂ ਦਾ 30,640 ਰੁਪਏ ,ਜਾਖੜ ਪਰਿਵਾਰ ਨੇ ਦੋ ਮੋਟਰਾਂ ਦਾ 72,750 ਰੁਪਏ ਤੇ ਮਹਿਰਾਜ ਦੇ ਕਮਲਜੀਤ ਦਿਓਲ ਨੇ ਵੀ ਆਪਣਾ ਬਿੱਲ ਭਰਿਆ ਹੈ। ਸਬ ਡਵੀਜ਼ਨ ਭਾਈਰੂਪਾ ਦੇ ਐਸ.ਡੀ.ਓ ਪ੍ਰਵੀਨ ਕੁਮਾਰ ਤਾਂ ਮੰਤਰੀ ਦੇ ਬਿੱਲਾਂ ਤੋਂ ਅਣਜਾਣ ਸਨ ਤੇ ਉਨ੍ਹਾਂ ਗੱਲ ਲੇਖਾਕਾਰ ’ਤੇ ਸੁੱਟ ਦਿੱਤੀ।ਮਾਲ ਮੰਤਰੀ ਗੁਰਪ੍ਰੀਤ ਕਾਂਗੜ ਦਾ ਕਹਿਣਾ ਸੀ ਕਿ ਪਾਵਰਕੌਮ ਨੇ ਹਾਲੇ ਤੱਕ ਕੋਈ ਬਿੱਲ ਨਹੀਂ ਭੇਜਿਆ ਹੈ ਪ੍ਰੰਤੂ ਉਨ੍ਹਾਂ ਖੁਦ ਹੁਣ ਬਿੱਲ ਵਾਰੇ ਪਤਾ ਕੀਤਾ ਹੈ । ਉਹ ਇੱਕ ਦੋ ਦਿਨਾਂ ’ਚ ਹੀ ਬਿੱਲਾਂ ਦੀ ਅਦਾਇਗੀ ਕਰ ਦੇਣਗੇ।
                 ਦੂਸਰੀ ਤਰਫ ਪਾਵਰਕੌਮ ਦੇ ਭਗਤਾ ਭਾਈਕਾ ਦੇ ਐਕਸੀਅਨ ਕਮਲਦੀਪ ਅਰੋੜਾ ਦਾ ਕਹਿਣਾ ਸੀ ਕਿ ਖੇਤੀ ਮੋਟਰਾਂ ਦਾ ਬਿੱਲ ਭੇਜਿਆ ਨਹੀਂ ਜਾਂਦਾ, ਖਪਤਕਾਰ ਖੁਦ ਹੀ ਭਰਦਾ ਹੈ। ਉਨ੍ਹਾਂ ਨਾਲ ਹੀ ਕਾਂਗੜ ਦੇ ਬਿੱਲਾਂ ਬਾਰੇ ਅਣਜਾਣਤਾ ਜ਼ਾਹਰ ਕੀਤੀ। ਦੱਸਣਯੋਗ ਹੈ ਕਿ ਸਭ ਤੋਂ ਪਹਿਲਾਂ ਸੁਖਪਾਲ ਖਹਿਰਾ ਨੇ ਬਿਜਲੀ ਸਬਸਿਡੀ ਛੱਡਣ ਦਾ ਜਨਤਿਕ ਐਲਾਨ ਕੀਤਾ ਸੀ ਪ੍ਰੰਤੂ ਉਨ੍ਹਾਂ ਨੇ ਅੱਜ ਤੱਕ ਬਿਜਲੀ ਸਬਸਿਡੀ ਛੱਡੀ ਨਹੀਂ ਹੈ। ਕਪੂਰਥਲਾ ਦੇ ਪਿੰਡ ਰਾਮਗੜ ਵਿਚ ਸੁਖਪਾਲ ਖਹਿਰਾ ਦੇ ਨਾਮ ’ਤੇ 4 ਟਿਊਬਵੈਲ ਕੁਨੈਕਸ਼ਨ, ਉਨ੍ਹਾਂ ਦੇ ਪਿਤਾ ਦੇ ਨਾਮ ਤੇ ਵੀ ਚਾਰ ਕੁਨੈਕਸ਼ਨ ਅਤੇ ਇੱਕ ਟਿਊਬਵੈੱਲ ਕੁਨੈਕਸ਼ਨ ਉਨ੍ਹਾਂ ਦੀ ਮਾਤਾ ਦੇ ਨਾਮ ’ਤੇ ਹੈ। ਭੁਲੱਥ ਸਬ ਡਵੀਜ਼ਨ ਨੇ ਖਹਿਰਾ ਪਰਿਵਾਰ ਨੂੰ ਸਬਸਿਡੀ ਬਾਰੇ 9 ਨੋਟਿਸ ਵੀ ਭੇਜੇ ਪ੍ਰੰਤੂ ਖਹਿਰਾ ਨੇ ਕੋਈ ਲਿਖਤੀ ਜੁਆਬ ਅੱਜ ਤੱਕ ਨਹੀਂ ਦਿੱਤਾ। ਵਿਧਾਇਕ ਸੁਖਪਾਲ ਖਹਿਰਾ ਦਾ ਪ੍ਰਤੀਕਰਮ ਸੀ ਕਿ ਉਨ੍ਹਾਂ ਨੇ ਤਿੰਨ ਸਾਲ ਪਹਿਲਾਂ ਪਾਵਰਕੌਮ ਚੇਅਰਮੈਨ ਨੂੰ ਪੱਤਰ ਭੇਜ ਕੇ ਸਬਸਿਡੀ ਛੱਡਣ ਦੀ ਸਹਿਮਤੀ ਦੇ ਦਿੱਤੀ ਸੀ ਪ੍ਰੰਤੂ ਪਾਵਰਕੌਮ ਨੇ ਅੱਜ ਤੱਕ ਕੋਈ ਹੁੰਗਾਰਾ ਨਹੀਂ ਭਰਿਆ।
                 ਦੂਸਰੀ ਤਰਫ ਕਰਤਾਰਪੁਰ ਡਵੀਜ਼ਨ ਦੇ ਐਕਸੀਅਨ ਦਵਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਖੇਤੀ ਬਿੱਲਾਂ ਵਾਲੇ ਨੌ ਨੋਟਿਸ ਖਹਿਰਾ ਪਰਿਵਾਰ ਨੂੰ ਭੇਜੇ ਸਨ, ਉਨ੍ਹਾਂ ਚੋਂ ਖਹਿਰਾ ਨੇ 4 ਨੋਟਿਸ ਰਸੀਵ ਕੀਤੇ ਸਨ। ਐਕਸੀਅਨ ਨੇ ਦੱਸਿਆ ਕਿ ਐਸ.ਡੀ.ਓ ਮੁਤਾਬਿਕ ਖਹਿਰਾ ਪਰਿਵਾਰ ਨੇ ਇਹ ਮੰਗ ਰੱਖ ਦਿੱਤੀ ਕਿ ਪਹਿਲਾਂ ਖੇਤੀ ਮੋਟਰਾਂ ਲਈ 24 ਘੰਟੇ ਬਿਜਲੀ ਸਪਲਾਈ ਦਿਓ, ਉਹ ਬਿੱਲ ਭਰਨ ਨੂੰ ਤਿਆਰ ਹਨ ਜਦੋਂ ਕਿ ਏਦਾਂ ਦੀ ਕੋਈ ਵਿਵਸਥਾ ਨਹੀਂ। ਦੱਸ ਦੇਈਏ ਕਿ ਬਾਦਲ ਪਰਿਵਾਰ ਕੋਲ ਵੀ ਤਿੰਨ ਖੇਤੀ ਕੁਨੈਕਸ਼ਨ ਹਨ ਜਿਨ੍ਹਾਂ ’ਤੇ ਸਬਸਿਡੀ ਮਿਲਦੀ ਹੈ। ਪੰਜਾਬ ਭਰ ’ਚ ਚਾਰ ਜਾਂ ਚਾਰ ਤੋਂ ਜਿਆਦਾ ਖੇਤੀ ਮੋਟਰਾਂ ਵਾਲੇ 10,128 ਕਿਸਾਨ ਸ਼ਨਾਖ਼ਤ ਹੋਏ ਹਨ। ਪੰਜਾਬ ਭਰ ਚੋਂ ਟੌਪ ਦੇ 25 ਅਜਿਹੇ ਕਿਸਾਨ ਸ਼ਨਾਖ਼ਤ ਕੀਤੇ ਗਏ ਹਨ, ਜਿਨ੍ਹਾਂ ਦੇ ਇੱਕੋ ਨਾਮ ’ਤੇ ਚਾਰ ਜਾਂ ਚਾਰ ਤੋਂ ਜਿਆਦਾ ਖੇਤੀ ਮੋਟਰਾਂ ਹਨ। ਉਪਰ ਦੇ 25 ਕਿਸਾਨਾਂ ਵਿਚ ਜਲੰਧਰ ਸਰਕਲ 8, ਕਪੂਰਥਲਾ ਦੇ 5, ਪਟਿਆਲਾ ਦੇ 4, ਨਵਾਂ ਸ਼ਹਿਰ ਤੇ ਮੁਹਾਲੀ ਦੇ ਦੋ ਦੋ, ਫਰੀਦਕੋਟ ਦੇ ਦੋ ਕਿਸਾਨ ਆਉਂਦੇ ਹਨ।
                ਜਲੰਧਰ ਦੇ ਪਿੰਡ ਬੁੱਧੀਆਣਾ ਦੇ ਕਿਸਾਨ ਮਹਿੰਦਰ ਸਿੰਘ ਦਾ ਪੰਜਾਬ ਚੋਂ ਪਹਿਲਾ ਨੰਬਰ ਹੈ ਜਿਸ ਦੇ ਨਾਮ ਤੇ 7 ਖੇਤੀ ਮੋਟਰਾਂ ਦੇ ਕੁਨੈਕਸ਼ਨ ਹਨ। ਜਲੰਧਰ ਕੈਂਟ ਦੇ ਪਿੰਡ ਅਰਜਨ ਦੇ ਕਿਸਾਨ ਅਜੀਤ ਸਿੰਘ ਕੋਲ ਛੇ ਮੋਟਰਾਂ ਹਨ। ਮੋਹਾਲੀ ਦੇ ਨਰੈਣਗੜ ਦੇ ਰਾਮ ਸਿੰਘ ਕੋਲ ਪੰਜ ਮੋਟਰਾਂ ਅਤੇ ਪਿੰਡ ਚੌਂਦਾ (ਪਟਿਆਲਾ) ਦੇ ਕਿਸਾਨ ਅੱਛਰ ਸਿੰਘ ਕੋਲ ਚਾਰ ਮੋਟਰਾਂ ਹਨ। ਚਰਚੇ ਹਨ ਕਿ ਖੇਤੀ ਸਬਸਿਡੀ ਦਾ ਵੱਡਾ ਲਾਹਾ ਵੱਡੇ ਕਿਸਾਨ ਲੈ ਰਹੇ ਹਨ।


Friday, June 21, 2019

                         ਪਾਵਰਫੁੱਲ 
      ਛੋਟਾਂ ਦੇ ਗੇੜ ਦਾ ਮੀਟਰਾਂ ਨੂੰ ਗੇੜਾ
                        ਚਰਨਜੀਤ ਭੁੱਲਰ
ਬਠਿੰਡਾ : ਛੋਟਾਂ ਦੇ ਗੇੜ ਨੇ ਆਮ ਲੋਕਾਂ ਦੇ ਮੀਟਰ ਘੁੰਮਾ ਦਿੱਤੇ ਹਨ। ਤਾਹੀਂ ਪੰਜਾਬ ਹੁਣ ‘ਬਿਜਲੀ ਟੈਕਸਾਂ’ ’ਚ ਨੰਬਰ ਵਨ ਬਣਿਆ ਹੈ। ਏਨਾ ਬਿਜਲੀ ਟੈਕਸ ਹੈ ਕਿ ਕੋਈ ਸੂਬਾ ਹੁਣ ਪੰਜਾਬ ਦੇ ਨੇੜੇ ਤੇੜੇ ਨਹੀਂ। ਵੱਡਿਆਂ ਨੂੰ ਛੋਟਾਂ, ਮਹਿੰਗੀ ਬਿਜਲੀ ਤੇ ਛੋਟੇ ਘਰਾਂ ਦੇ ਵੱਡੇ ਬਿਜਲੀ ਬਿੱਲਾਂ ਨੇ ਘਰੇਲੂ ਬਜਟ ਦਮੋਂ ਕੱਢੇ ਹਨ। ਪੰਜਾਬ ਬਿਜਲੀ ਤੋਂ 20 ਫੀਸਦੀ ਟੈਕਸ ਵਸੂਲਦਾ ਹੈ ਜਿਸ ’ਚ ਬਿਜਲੀ ਕਰ, ਬੁਨਿਆਦੀ ਢਾਂਚਾ ਵਿਕਾਸ ਫੰਡ, ਮਿਊਸਿਪਲ ਫੰਡ ਸ਼ਾਮਿਲ ਹਨ। ਗਊ ਸੈੱਸ ਇਸ ਤੋਂ ਵੱਖਰਾ ਹੈ। ਦੇਸ਼ ਦੇ ਕਿਸੇ ਸੂਬੇ ’ਚ ਬਿਜਲੀ ’ਤੇ ਏਨੇ ਟੈਕਸ ਨਹੀਂ। ਪੰਜਾਬੀ ਹਰ ਵਰੇ੍ਹ ਕਰੀਬ 3600 ਕਰੋੜ ਬਿਜਲੀ ਟੈਕਸਾਂ ਵਜੋਂ ਤਾਰਦੇ ਹਨ। ਪੰਜਾਬੀ ਟ੍ਰਿਬਿਊਨ ਵੱਲੋਂ ਸਭਨਾਂ ਸੂਬਿਆਂ ਅਤੇ ਯੂ.ਟੀਜ ਦੇ ਬਿਜਲੀ ਟੈਕਸਾਂ ਦਾ ਮੁਲਾਂਕਣ ਕੀਤਾ ਗਿਆ ਤਾਂ ਝੰਡੀ ਪੰਜਾਬ ਦੇ ਹਿੱਸੇ ਆਈ। ਪੰਜਾਬ ’ਚ ਹਰ ਕੈਟਾਗਿਰੀ ਦੇ 94.78 ਲੱਖ ਬਿਜਲੀ ਕੁਨੈਕਸ਼ਨ ਹਨ। ਵੱਡਾ ਝਟਕਾ ਘਰੇਲੂ ਖਪਤਕਾਰਾਂ ਨੂੰ ਲੱਗਾ ਹੈ। ਘਰੇਲੂ ਬਿਜਲੀ ਦੇ ਟੈਕਸਾਂ ਤੇ ਨਜ਼ਰ ਮਾਰੋ ਜਿਨ੍ਹਾਂ ਦੇ ਖਪਤਕਾਰਾਂ ਦੀ ਗਿਣਤੀ 68.63 ਲੱਖ ਬਣਦੀ ਹੈ। ਪੰਜਾਬ ’ਚ ਘਰੇਲੂ ਬਿਜਲੀ ’ਤੇ 20 ਫੀਸਦੀ ਟੈਕਸ ਹਨ। ਬਿਜਲੀ ਦੀ ਪ੍ਰਤੀ ਯੂਨਿਟ ਅੌਸਤਨ 6.53 ਪੈਂਦੀ ਹੈ ਜਿਸ ’ਤੇ 1.31 ਰੁਪਏ ਟੈਕਸ ਲੱਗਣ ਮਗਰੋਂ ਇਹ ਭਾਅ ਪ੍ਰਤੀ ਯੂਨਿਟ ਅੌਸਤਨ 7.84 ਰੁਪਏ ਬਣ ਜਾਂਦਾ ਹੈ।
                 ਘਰੇਲੂ ਬਿਜਲੀ ’ਤੇ ਹਰਿਆਣਾ ਤੇ ਤਾਮਿਲਨਾਡੂ ’ਚ 2 ਫੀਸਦੀ,ਪੱਛਮੀ ਬੰਗਾਲ ਤੇ ਗੁਜਰਾਤ ’ਚ ਇੱਕ ਫੀਸਦੀ ਟੈਕਸ ਹੈ। ਬਿਹਾਰ ’ਚ ਅੱਠ ਫੀਸਦੀ, ਮੱਧ ਪ੍ਰਦੇਸ਼ ’ਚ 15 ਫੀਸਦੀ, ਹਿਮਾਚਲ ’ਚ 4 ਫੀਸਦੀ ਤੇ ਰਾਜਸਥਾਨ ’ਚ 15 ਫੀਸਦੀ ਟੈਕਸ ਹੈ। ਪਾਂਡੀਚਰੀ, ਅੰਡੇਮਾਨ, ਮਿਜ਼ੋਰਮ, ਲਕਸ਼ਦੀਪ ਸਮੂਹ, ਦਾਦਰਾ ਐਂਡ ਨਗਰ ਹਵੇਲੀ ’ਚ ਕੋਈ ਬਿਜਲੀ ਟੈਕਸ ਨਹੀਂ। ਪੰਜਾਬ ’ਚ ਦਲਿਤ ਪਰਿਵਾਰਾਂ ਨੂੰ ਪ੍ਰਤੀ ਮਹੀਨਾ 200 ਯੂਨਿਟ ਤੱਕ ਬਿਜਲੀ ਬਿੱਲ ਮੁਆਫ਼ ਹਨ। ਫਿਰ ਵੀ ਗਰੀਬ ਲੋਕਾਂ ਦੇ ਗੇੜ ਚੋ ਗੱਲ ਬਾਹਰ ਹੈ। ਵਪਾਰਿਕ ਕੈਟਾਗਿਰੀ ਤੇ ਵੀ ਬਿਜਲੀ ਟੈਕਸ 20 ਫੀਸਦੀ ਹਨ ਜਦੋਂ ਕਿ ਗੁਜਰਾਤ ਨੂੰ ਛੱਡ ਕੇ ਬਾਕੀ ਸਭ ਸੂਬਿਆਂ ਚੋਂ ਪੰਜਾਬ ਨੰਬਰ ਵਨ ਹੈ। ਗੁਜਰਾਤ ’ਚ ਇਸ ਕੈਟਾਗਿਰੀ ਤੇ ਬਿਜਲੀ ਟੈਕਸ 20 ਫੀਸਦੀ ਹੈ। ਹਰਿਆਣਾ ’ਚ ਇਸ ਕੈਟਾਗਿਰੀ ਤੇ ਇੱਕ ਫੀਸਦੀ, ਬਿਹਾਰ ’ਚ 6 ਫੀਸਦੀ ਤੇ ਰਾਜਸਥਾਨ ’ਚ 7 ਫੀਸਦੀ ਹੈ। ਉਦਯੋਗਾਂ (ਲਾਰਜ ਸਕੇਲ) ’ਤੇ ਪੰਜਾਬ ’ਚ ਬਿਜਲੀ ਟੈਕਸ 20 ਫੀਸਦੀ ਹੀ ਹਨ ਜਦੋਂ ਕਿ ਹੋਰ ਕਿਸੇ ਸੂਬੇ ’ਚ ਏਨਾ ਟੈਕਸ ਨਹੀਂ। ਸਿਰਫ਼ ਛਤੀਸਗੜ ’ਚ ਇਸ ਕੈਟਾਗਿਰੀ ਤੇ 20 ਫੀਸਦੀ ਟੈਕਸ ਹੈ। ਹਰਿਆਣਾ ’ਚ ਇਸ ’ਤੇ 1 ਫੀਸਦੀ, ਰਾਜਸਥਾਨ ’ਚ 7 ਫੀਸਦੀ, ਬਿਹਾਰ ’ਚ 6 ਫੀਸਦੀ ਟੈਕਸ ਹੈ।
                 ਪੰਜਾਬ ’ਚ 2015-16 ਤੋਂ ਪੰਜਾਬ ਬੁਨਿਆਦੀ ਢਾਂਚਾ ਵਿਕਾਸ ਫੰਡ ਅਤੇ ਸਾਲ 2017-18 ਤੋਂ ਮਿਊਸਿਪਲ ਟੈਕਸ ਲਾਇਆ ਗਿਆ ਹੈ। ਨਾਲੋਂ ਨਾਲ ਗਊ ਟੈਕਸ ਵੀ ਵਸੂਲਿਆ ਜਾਣ ਲੱਗਾ ਹੈ। ਪੰਜਾਬ ਦੇ 37 ਫੀਸਦੀ ਖਪਤਕਾਰਾਂ ਨੂੰ ਬਿਜਲੀ ਸਬਸਿਡੀ ਮਿਲਦੀ ਹੈ ਜਦੋਂ ਕਿ ਬਿਜਲੀ ਟੈਕਸਾਂ ਤੇ ਇਨ੍ਹਾਂ ਛੋਟਾਂ ਦਾ ਬੋਝ ਆਮ ਖਪਤਕਾਰਾਂ ਨੂੰ ਚੁੱਕਣਾ ਪੈਂਦਾ ਹੈ। ਪਾਵਰਕੌਮ ਨੂੰ ਸਲਾਨਾ ਕਰੀਬ 31 ਹਜ਼ਾਰ ਕਰੋੜ ਦਾ ਮਾਲੀਆ ਮਿਲਦਾ ਹੈ ਅਤੇ ਚਾਲੂ ਮਾਲੀ ਵਰੇ੍ਹ ਦੌਰਾਨ ਪੰਜਾਬ ਸਰਕਾਰ ਨੇ 9674 ਕਰੋੜ ਦੀ ਬਿਜਲੀ ਸਬਸਿਡੀ ਦੇਣੀ ਹੈ। ਸਬਸਿਡੀ ਦੇ ਬੋਝ ਚੁੱਕਣ ਲਈ ਬਿਜਲੀ ਟੈਕਸ ਲਾਏ ਜਾ ਰਹੇ ਹਨ ਜਿਸ ਨਾਲ ਬਿਜਲੀ ਹੋਰ ਮਹਿੰਗੀ ਹੋ ਰਹੀ ਹੈ। ਤੱਥ ਗਵਾਹੀ ਭਰਦੇ ਹਨ ਕਿ ਬਿਜਲੀ ਟੈਕਸ ਹਟਾ ਦਿੱਤੇ ਜਾਣ ਤਾਂ ਦਰਜਨ ਸੂਬਿਆਂ ਤੋਂ ਪੰਜਾਬ ’ਚ ਘਰੇਲੂ ਬਿਜਲੀ ਸਸਤੀ ਹੋ ਜਾਣੀ ਹੈ। ਏਦਾਂ ਹੀ ਵੱਡੇ ਉਦਯੋਗਾਂ ਲਈ ਬਿਜਲੀ ਦੇਸ਼ ਦੇ 19 ਸੂਬਿਆਂ ਨਾਲੋਂ ਸਸਤੀ ਹੋ ਜਾਣੀ ਹੈ। ਘਰੇਲੂ ਖਪਤਕਾਰ ਪੰਜਾਬ ’ਚ ਪ੍ਰਤੀ ਯੂਨਿਟ ਬਿਜਲੀ ’ਤੇ 1.31 ਰੁਪਏ ਟੈਕਸ ਦਿੰਦਾ ਹੈ ਜਦੋਂ ਕਿ ਦਿੱਲੀ ਵਿਚ ਪ੍ਰਤੀ ਯੂਨਿਟ ਟੈਕਸ 36 ਪੈਸੇ ਹਨ ਅਤੇ ਹਰਿਆਣਾ ਵਿਚ ਇਹੋ ਟੈਕਸ 10 ਪੈਸੇ ਹੈ।
               ਛੋਟਾਂ ਤੇ ਨਜ਼ਰ ਮਾਰੀਏ ਤਾਂ ਇਕੱਲੇ ਵੱਡੇ ਉਦਯੋਗਾਂ ਨੂੰ 1578 ਕਰੋੜ ਸਲਾਨਾ ਦੀ ਛੋਟ ਮਿਲਦੀ ਹੈ ਜਦੋਂ ਕਿ ਖੇਤੀ ਸਬਸਿਡੀ ਲੈਣ ਵਾਲੇ ਬਹੁਤੇ ਧਨਾਢ ਕਿਸਾਨ ਹਨ। ਪਾਵਰਕੌਮ ਨੂੰ ਵੀ 30 ਫੀਸਦੀ ਮਾਲੀਆ ਪੰਜਾਬ ਸਰਕਾਰ ਦੀ ਸਬਸਿਡੀ ਤੋਂ ਪ੍ਰਾਪਤ ਹੁੰਦਾ ਹੈ। ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ ਦਾ ਪ੍ਰਤੀਕਰਮ ਸੀ ਕਿ ਵੱਡਾ ਝਟਕਾ ਬਿਜਲੀ ਮਜ਼ਦੂਰ ਪਰਿਵਾਰਾਂ ਨੂੰ ਦਿੰਦੀ ਹੈ। ਹਰ ਵਰੇ੍ਹ ਬਿਜਲੀ ਦਰਾਂ ਵਧ ਜਾਂਦੀਆਂ ਹਨ। ਪੁਰਾਣੇ ਬਿਲ ਹਾਲੇ ਖੜੇ ਹਨ ਜਿਸ ਕਰਕੇ ਮਜ਼ਦੂਰ ਡਿਫਾਲਟਰ ਹੋ ਗਏ ਹਨ। ਮਜ਼ਦੂਰ ਵੱਡੇ ਵੱਡੇ ਬਿਲ ਲੈ ਕੇ ਘੁੰਮ ਰਹੇ ਹਨ। ਸਰਕਾਰ ਦੱਸੇ ਕਿ ਉਹ ਕਿਧਰ ਜਾਣ।
ਬਿਜਲੀ ਟੈਕਸ : ਇੱਕ ਝਾਤ (ਫੀਸਦ ’ਚ)
ਰਾਜ        ਘਰੇਲੂ ਬਿਜਲੀ    ਵਪਾਰਿਕ ਕੈਟਾਗਿਰੀ  ਛੋਟੇ ਉਦਯੋਗ  ਵੱਡੇ ਉਦਯੋਗ
ਪੰਜਾਬ 20 20 20                20
ਹਰਿਆਣਾ             2 1                      1                  1
ਹਿਮਾਚਲ              4 8 10                17
ਰਾਜਸਥਾਨ           15 7 9                  7
ਗੁਜਰਾਤ                1 25 10                15
ਮੱਧ ਪ੍ਰਦੇਸ਼            15                     15 9                 15
ਪੱਛਮੀ ਬੰਗਾਲ        1 13 8                 15
ਬਿਹਾਰ                 8 6 6                  6
ਤਾਮਿਲਨਾਡੂ           2 5 5                 5










 






Thursday, June 20, 2019

                               ਪਾਵਰਫੁੱਲ 
        ਕੌਣ ਸਾਹਿਬ ਨੂੰ ਆਖੇ... ਬਿੱਲ ਭਰ ! 
                              ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ’ਚ ਵੱਡੇ ਅਫਸਰਾਂ ਦੇ ਬਿਜਲੀ ਬਿੱਲ ਛੋਟੇ ਹਨ। ਜਿਨ੍ਹਾਂ ਅਫਸਰਾਂ ਦੇ ਬਿੱਲ ਵੱਡੇ ਹਨ, ਉਹ ਬਿੱਲ ਤਾਰਦੇ ਨਹੀਂ। ਜ਼ਿਲ੍ਹੇ ਦੇ ਮਾਲਕਾਂ ਵੱਲ ਕੌਣ ਝਾਕੂ, ਪਾਵਰਕੌਮ ਦੇ ਅਫਸਰਾਂ ’ਚ ਏਨੀ ਹਿੰਮਤ ਨਹੀਂ। ਚੰਡੀਗੜ੍ਹ ਦੇ ਐਨ ਨਾਲ ਪੈਂਦੇ ਜ਼ਿਲ੍ਹਾ ਰੋਪੜ ਦੇ ਡਿਪਟੀ ਕਮਿਸ਼ਨਰ ਦੀ ਸਰਕਾਰੀ ਕੋਠੀ ਦੀ ਬਿਜਲੀ ਖਪਤ ਜ਼ੀਰੋ ਯੂਨਿਟ ਹੈ। ਗਰਮੀ ਹੋਵੇ ਤੇ ਚਾਹੇ ਸਰਦੀ, ਬਿਜਲੀ ਖਪਤ ਕਦੇ ਜ਼ੀਰੋ ਤੋਂ ਵਧੀ ਨਹੀਂ। ਇਵੇਂ ਰੋਪੜ ਦੇ ਐਸ.ਐਸ.ਪੀ ਦੀ ਕੋਠੀ ’ਚ ਬਿਜਲੀ ਖਪਤ ਜ਼ੀਰੋ ਯੂਨਿਟ ਹੈ। ਜੋ ਰੋਪੜ ਦੇ ਐਸ.ਪੀ (ਰਿਹਾਇਸ਼) ਦੇ ਨਾਮ ’ਤੇ ਬਿੱਲ ਆਉਂਦਾ ਹੈ, ਉਸ ਬਿੱਲ ਦਾ ਬਕਾਇਆ ਕਰੀਬ 1.46 ਲੱਖ ਤਾਰਿਆ ਨਹੀਂ ਗਿਆ। ਜੋ ਗਾਰਦ ਰੂਮ ਦੇ ਨਾਮ ’ਤੇ ਕੁਨੈਕਸ਼ਨ ਹੈ, ਉਸ ਦਾ ਬਕਾਏ 1.79 ਲੱਖ ਭਰੇ ਨਹੀਂ ਗਏ। ਪੰਜਾਬੀ ਟ੍ਰਿਬਿਊਨ ਵੱਲੋਂ ਸੂਚਨਾ ਦੇ ਅਧਿਕਾਰ ਕਾਨੂੰਨ ਅਤੇ ਹੋਰਨਾਂ ਸਰੋਤਾਂ ਤੋਂ ਪ੍ਰਾਪਤ ਵੇਰਵਿਆਂ ’ਚ ਇਹ ਤੱਥ ਉਭਰੇ ਹਨ। ਐਸ.ਐਸ.ਪੀ ਗੁਰਦਾਸਪੁਰ ਦੀ ਰਿਹਾਇਸ਼ ’ਚ ਚਾਰ ਮੀਟਰ ਲੱਗੇ ਹਨ ਜਿਨ੍ਹਾਂ ਚੋਂ ਇੱਕ ਮੀਟਰ ਦੀ ਬਿਜਲੀ ਖਪਤ ਜ਼ੀਰੋ ਯੂਨਿਟ ਤੋਂ ਟੱਪੀ ਨਹੀਂ ਜਦੋਂ ਕਿ ਦੂਸਰੇ ਮੀਟਰ ਦੀ 61 ਦਿਨਾਂ ਦੀ ਖਪਤ 66 ਯੂਨਿਟ ਆਈ ਹੈ। ਅੌਸਤਨ ਇੱਕ ਯੂਨਿਟ ਖਪਤ ਰੋਜ਼ਾਨਾ। ਤੀਸਰੇ ਮੀਟਰ ਦੀ ਸੂਈ ਵੀ ਜ਼ੀਰੋ ਤੇ ਅਟਕੀ ਹੋਈ ਹੈ ਅਤੇ ਇਵੇਂ ਹੀ ਚੌਥੇ ਮੀਟਰ ਦੀ ਮੌਜੂਦਾ ਖਪਤ 228 ਯੂਨਿਟ ਹੈ ਪ੍ਰੰਤੂ ਪਿਛਲੇ ਛੇ ਮਹੀਨਿਆਂ ਦੌਰਾਨ ਇੱਕ ਮਹੀਨੇ ’ਚ 1 ਯੂਨਿਟ ਅਤੇ ਦੂਸਰੇ ਮਹੀਨੇ ਵਿਚ ਇਹੋ ਖਪਤ ਪੰਜ ਯੂਨਿਟ ਦੀ ਰਹੀ।
         ਜ਼ਿਲ੍ਹਾ ਤਰਨਤਾਰਨ ਦੇ ਐਸ.ਐਸ.ਪੀ ਦੀ ਜੋ ਪਾਵਰ ਕਲੋਨੀ ਵਿਚਲੀ ਰਿਹਾਇਸ਼ ਹੈ, ਉਸ ਦੇ ਤਾਜ਼ਾ ਬਿੱਲ ਅਨੁਸਾਰ 64 ਦਿਨਾਂ ਦੀ ਬਿਜਲੀ ਖਪਤ (3 ਅਪਰੈਲ ਤੋਂ 6 ਜੂਨ ਤੱਕ) ਸਿਰਫ਼ 12 ਯੂਨਿਟ ਰਹੀ ਹੈ। ਹੁਸ਼ਿਆਰਪੁਰ ਦੇ ਐਸ.ਐਸ.ਪੀ (ਰਿਹਾਇਸ਼) ਮਾਲ ਰੋਡ, ਦਾ ਜੋ 23 ਫਰਵਰੀ ਤੋਂ 27 ਅਪਰੈਲ (63 ਦਿਨਾਂ) ਦਾ ਬਿੱਲ ਆਇਆ ਹੈ, ਉਸ ’ਚ ਸਿਰਫ਼ 74 ਯੂਨਿਟਾਂ ਦੀ ਖਪਤ ਹੈ। ਹੁਸ਼ਿਆਰਪੁਰ ਦੇ ਡਿਪਟੀ ਕਮਿਸ਼ਨਰ ਦੀ ਰਿਹਾਇਸ਼ ’ਤੇ 7.44 ਕਿਲੋਵਾਟ ਬਿਜਲੀ ਲੋਡ ਹੈ। ਰਿਹਾਇਸ਼ ਦੀ 3 ਅਪਰੈਲ ਤੋਂ 7 ਜੂਨ ਤੱਕ ਦੀ ਬਿਜਲੀ ਖਪਤ ਅੌਸਤਨ ਰੋਜ਼ਾਨਾ ਪੰਜ ਯੂਨਿਟਾਂ ਦੀ ਰਹੀ ਹੈ। ਰਿਹਾਇਸ਼ ਵਿਚਲੇ ਦੂਸਰੇ ਕੁਨੈਕਸ਼ਨ ਦੀ ਬਿਜਲੀ ਖਪਤ 120 ਦਿਨਾਂ ਦੀ 7231 ਯੂਨਿਟ ਰਹੀ ਹੈ। ਸੂਤਰ ਦੱਸਦੇ ਹਨ ਕਿ ਇਹ ਦੂਸਰਾ ਕੁਨੈਕਸ਼ਨ ਕੈਂਪ ਦਫ਼ਤਰ ਦਾ ਹੋ ਸਕਦਾ ਹੈ ਜਿਸ ਦਾ ਬਿੱਲ ਖ਼ਜ਼ਾਨੇ ਚੋਂ ਭਰਿਆ ਜਾਂਦਾ ਹੈ। ਵੇਰਵਿਆਂ ਅਨੁਸਾਰ ਕਮਿਸ਼ਨਰ ਜਲੰਧਰ ਦੀ ਰਿਹਾਇਸ਼ ਦਾ ਜੋ ਤਾਜ਼ਾ ਬਿਜਲੀ ਬਿੱਲ ਹੈ, ਉਸ ਅਨੁਸਾਰ ਰਿਹਾਇਸ਼ ਦੀ 8 ਅਪਰੈਲ ਤੋਂ 7 ਜੂਨ ਤੱਕ ਦੀ ਬਿਜਲੀ ਖਪਤ ਅੌਸਤਨ ਰੋਜ਼ਾਨਾ 4 ਯੂਨਿਟ ਦੀ ਰਹੀ ਹੈ। ਸੰਗਰੂਰ ਦੇ ਡਿਪਟੀ ਕਮਿਸ਼ਨਰ (ਰਿਹਾਇਸ਼) ਦਾ ਜੋ ਤਾਜ਼ਾ ਬਿੱਲ ਆਇਆ ਹੈ, ਉਸ ਅਨੁਸਾਰ 32 ਦਿਨਾਂ ਦੀ ਬਿਜਲੀ ਖਪਤ 86 ਯੂਨਿਟ ਰਹੀ ਹੈ।
                ਇਸੇ ਸਾਲ ’ਚ ਪਾਵਰਕੌਮ ਨੇ ਰਿਹਾਇਸ਼ ਦੇ ਦੋ ਵਾਰ ਬਿਜਲੀ ਮੀਟਰ ਬਦਲੇ ਹਨ ਅਤੇ ਇੱਕ ਦਫ਼ਾ ਪਾਵਰਕੌਮ ਇਸ ਖਪਤਕਾਰ ਨੂੰ ਹਜ਼ਾਰਾਂ ਰੁਪਏ ਰਿਫੰਡ ਵੀ ਕਰ ਚੁੱਕਾ ਹੈ। ਕਪੂਰਥਲਾ ਦੇ ਡਿਪਟੀ ਕਮਿਸ਼ਨਰ ਦਾ ਜੋ ਤਾਜ਼ਾ ਬਿੱਲ ਬਣਿਆ ਹੈ, ਉਸ ਅਨੁਸਾਰ 63 ਦਿਨਾਂ ਦੀ ਬਿਜਲੀ ਖਪਤ 118 ਯੂਨਿਟ ਰਹੀ ਹੈ। ਡਿਪਟੀ ਕਮਿਸ਼ਨਰਾਂ/ਐਸ.ਐਸ.ਪੀਜ਼ ਦੇ ਘੱਟ ਬਿਜਲੀ ਬਿੱਲਾਂ ਪਿਛੇ ਕਾਰਨ ਕੋਈ ਵੀ ਰਹੇ ਹੋਣ ਪ੍ਰੰਤੂ ਇਹ ਖਪਤ ਹੈਰਾਨ ਕਰਨ ਵਾਲੀ ਹੈ। ਸਰਕਾਰੀ ਸੂਤਰਾਂ ਦਾ ਪੱਖ ਹੈ ਕਿ ਜ਼ਿਲ੍ਹੇ ਦੀ ਜਿੰਮੇਵਾਰੀ ਹੋਣ ਕਰਕੇ ਬਹੁਤਾ ਸਮਾਂ ਦਫ਼ਤਰ ਜਾਂ ਫੀਲਡ ’ਚ ਗੁਜ਼ਰਦਾ ਹੈ ਜਿਸ ਕਰਕੇ ਘਰਾਂ ਦੀ ਖਪਤ ਘੱਟ ਰਹਿਣੀ ਸੁਭਾਵਿਕ ਹੈ। ਅੱਗੇ ਨਜ਼ਰ ਮਾਰਦੇ ਹਨ। ਡਿਪਟੀ ਕਮਿਸ਼ਨਰ ਅੰਮ੍ਰਿਤਸਰ ਦੀ ਰਿਹਾਇਸ਼ ’ਤੇ ਦੋ ਮੀਟਰ ਚੱਲਦੇ ਹਨ, ਇੱਕ ਦਾ ਬਿੱਲ 13.56 ਲੱਖ ਅਤੇ ਦੂਸਰੇ ਮੀਟਰ ਦਾ ਬਿੱਲ 1.62 ਲੱਖ ਰੁਪਏ ਬਕਾਇਆ ਖੜ੍ਹਾ ਹੈ। ਐਸ.ਐਸ.ਪੀ ਅੰਮ੍ਰਿਤਸਰ ਦੇ ਨਾਮ ਤੇ ਚੱਲਦੇ ਕੁਨੈਕਸ਼ਨ ਵੱਲ 4.87 ਲੱਖ ਦੇ ਬਕਾਏ ਖੜ੍ਹੇ ਹਨ। ਦੱਸਣਯੋਗ ਹੈ ਕਿ ਅਫਸਰਾਂ ਨੂੰ ਆਪਣੇ ਘਰਾਂ ਦਾ ਬਿਜਲੀ ਬਿੱਲ ਜੇਬ ਚੋਂ ਤਾਰਨਾ ਹੁੰਦਾ ਹੈ। ਤੱਥਾਂ ਅਨੁਸਾਰ ਫਰੀਦਕੋਟ ਦੇ ਐਸ.ਐਸ.ਪੀ ਦੀ ਰਿਹਾਇਸ਼ ਵੱਲ ਪਾਵਰਕੌਮ ਦੇ 6.43 ਲੱਖ ਦੇ ਬਕਾਏ ਖੜ੍ਹੇ ਹਨ ਜਦੋਂ ਕਿ ਫਾਜ਼ਿਲਕਾ ਦੇ ਡਿਪਟੀ ਕਮਿਸ਼ਨਰ ਦੀ ਰਿਹਾਇਸ਼ ਦੇ ਮੀਟਰ ਦੇ 2.88 ਲੱਖ ਦੇ ਬਕਾਏ ਤਾਰੇ ਨਹੀਂ ਗਏ ਹਨ।
               ਇਵੇਂ ਹੀ ਫਿਰੋਜ਼ਪੁਰ ਡੀ.ਸੀ (ਰਿਹਾਇਸ਼) ਵੱਲ 3.99 ਲੱਖ ਰੁਪਏ,ਐਸ.ਐਸ.ਪੀ ਮੋਗਾ (ਰਿਹਾਇਸ਼) ਵੱਲ 1.67 ਲੱਖ ਰੁਪਏ  ਅਤੇ ਐਸ.ਐਸ.ਪੀ ਫਾਜ਼ਿਲਕਾ (ਰਿਹਾਇਸ਼) ਵੱਲ 87,530 ਰੁਪਏ ਦਾ ਬਿਜਲੀ ਬਿੱਲ ਬਕਾਇਆ ਖੜ੍ਹਾ ਹੈ। ਬਠਿੰਡਾ ਦੇ ਡਿਪਟੀ ਕਮਿਸ਼ਨਰ (ਰਿਹਾਇਸ਼) ਦਾ 1.23 ਲੱਖ ਰੁਪਏ, ਕੈਂਪ ਦਫ਼ਤਰ ਦਾ 3.05 ਲੱਖ ਰੁਪਏ ਅਤੇ ਐਸ.ਐਸ.ਪੀ (ਰਿਹਾਇਸ਼) ਵੱਲ 1.14 ਲੱਖ ਰੁਪਏ ਦਾ ਬਿਜਲੀ ਬਿੱਲ ਬਕਾਇਆ ਖੜ੍ਹਾ ਹੈ।  ਇਸੇ ਤਰ੍ਹਾਂ ਹੀ ਪਟਿਆਲਾ ਦੇ ਡੀ.ਸੀ ਕੰਪਲੈਕਸ ਵੱਲ 97.28 ਲੱਖ ਰੁਪਏ, ਸੰਗਰੂਰ ਦੀ ਪੁਲੀਸ ਲਾਈਨ ਵੱਲ 69.76 ਲੱਖ ਰੁਪਏ, ਡਿਪਟੀ ਕਮਿਸ਼ਨਰ ਮਾਨਸਾ ਦੇ ਦਫ਼ਤਰ ਵੱਲ 3.71 ਲੱਖ ਰੁਪਏ, ਐਸ.ਐਸ.ਪੀ ਦਫ਼ਤਰ ਬਰਨਾਲਾ ਵੱਲ 6.94 ਲੱਖ ਆਦਿ ਦੇ ਬਕਾਏ ਖੜ੍ਹੇ ਹਨ। ਭਾਰਤੀ ਕਿਸਾਨ ਯੂਨੀਅਨ (ਕ੍ਰਾਂਤੀਕਾਰੀ) ਦੇ ਪ੍ਰਧਾਨ ਸੁਰਜੀਤ ਸਿੰਘ ਫੂਲ ਦਾ ਪ੍ਰਤੀਕਰਮ ਸੀ ਕਿ ਮਜ਼ਦੂਰਾਂ ਤੇ ਕਿਸਾਨਾਂ ਦੇ ਕੁਨੈਕਸ਼ਨ ਕੱਟਣ ’ਚ ਪਾਵਰਕੌਮ ਬਹੁਤ ਕਾਹਲ ਦਿਖਾਉਂਦਾ ਹੈ ਜਦੋਂ ਕਿ ਵੱਡਿਆਂ ਤੋਂ ਟਾਲ਼ਾ ਵੱਟਦਾ ਹੈ। ਪਾਵਰਕੌਮ ਅਧਿਕਾਰੀ ਹੁਣ ਵੱਡਿਆਂ ਤੋਂ ਸ਼ੁਰੂਆਤ ਕਰਨ।
                                          ਚੈਕਿੰਗ ਕਰਾਈ ਜਾਵੇਗੀ : ਮੁੱਖ ਇੰਜਨੀਅਰ    
ਪਾਵਰਕੌਮ ਦੇ ਮੁੱਖ ਇੰਜਨੀਅਰ (ਐਨਫੋਰਸਮੈਂਟ) ਸ੍ਰੀ ਗੋਪਾਲ ਸ਼ਰਮਾ ਦਾ ਕਹਿਣਾ ਸੀ ਕਿ ਘੱਟ ਬਿਜਲੀ ਖਪਤ ਵਾਲੇ ਕੋਈ ਖਾਸ ਕੇਸ ਨੋਟਿਸ ਵਿਚ ਨਹੀਂ ਆਏ ਹਨ। ਅਗਰ ਧਿਆਨ ਵਿਚ ਏਦਾਂ ਦਾ ਕੋਈ ਕੇਸ ਆਏਗਾ ਤਾਂ ਉਹ ਚੈਕਿੰਗ ਕਰਾਉਣਗੇ। ਹਾਲ ’ਚ ਹੀ ਉਨ੍ਹਾਂ ਨੇ ਪੁਲੀਸ ਸਟੇਸ਼ਨਾਂ ਦੀ ਚੈਕਿੰਗ ਕੀਤੀ ਹੈ ਜਿਸ ਵਿਚ ਕਈ ਚੋਰੀ ਦੇ ਫੜੇ ਹਨ। ਉਨ੍ਹਾਂ ਦੱਸਿਆ ਕਿ ਪਾਵਰਕੌਮ ਦੇ ਅਫਸਰਾਂ ਦੇ ਬਿਜਲੀ ਮੀਟਰ ਵੀ ਸਭ ਤੋਂ ਪਹਿਲਾਂ ਚੈੱਕ ਕੀਤੇ ਗਏ ਹਨ। ਅਧਿਕਾਰੀ ਤਾਂ ਸਮਾਜ ਦਾ ਸ਼ੀਸ਼ਾ ਹੁੰਦੇ ਹਨ, ਜਿਸ ਕਰਕੇ ਖੁਦ ਪਾਵਰਕੌਮ ਨੇ ਪਹਿਲਾਂ ਆਪਣੇ ਅਫਸਰਾਂ ਦੇ ਮੀਟਰਾਂ ਦੀ ਚੈਕਿੰਗ ਕਰਕੇ ਸ਼ੁਰੂਆਤ ਕੀਤੀ ਹੈ।
             

Wednesday, June 19, 2019

                                                          ਪਾਵਰਫੁੱਲ ਕੌਣ !
                                ਬਿਜਲੀ ਚੋਰੀ ਨਾਲ 800 ਕਰੋੜ ਦੀ ‘ਕੁੰਢੀ’
                                                           ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ’ਚ ਬਿਜਲੀ ਚੋਰੀ ਨੇ ਪਾਵਰਕੌਮ ਦੇ ਫਿਊਜ਼ ਉਡਾ ਰੱਖੇ ਹਨ। ਪਾਵਰਕੌਮ ਦੇ ਖਜ਼ਾਨੇ ਨੂੰ ਡਾਂਗਾਂ ਦੇ ਗਜ ਮਹਿੰਗੇ ਪੈ ਰਹੇ ਹਨ। ਪੰਜਾਬ ’ਚ ਰੋਜ਼ਾਨਾ ਅੌਸਤਨ 2.20 ਕਰੋੜ ਦੀ ਬਿਜਲੀ ਚੋਰੀ (ਸਮੇਤ ਵਪਾਰਿਕ ਘਾਟੇ) ਹੁੰਦੀ ਹੈ ਅਤੇ ਸਲਾਨਾ 800 ਕਰੋੜ ਰੁਪਏ ਦਾ ਰਗੜਾ ਪਾਵਰਕੌਮ ਨੂੰ ਲੱਗਦਾ ਹੈ। ਸਿਆਸੀ ਦਾਖਲ ਵੀ ਕਈ ਵਾਰੀ ਬਿਜਲੀ ਚੋਰਾਂ ਦੀ ਢਾਰਸ ਬਣ ਜਾਂਦਾ ਹੈ। ਪੰਜਾਬ ਦੇ ਪੇਂਡੂ ਫੀਡਰਾਂ ’ਤੇ ਅਪਰੈਲ ਤੋਂ ਦਸੰਬਰ 2018 ਤੱਕ ਦੇ ਵੰਡ ਘਾਟੇ 27.58 ਫੀਸਦੀ ਬਣਦੇ ਹਨ ਜਿਨ੍ਹਾਂ ’ਚ ਮੁੱਖ ਤੌਰ ’ਤੇ ਬਿਜਲੀ ਚੋਰੀ ਸ਼ਾਮਿਲ ਹੈ। ਅਨੁਮਾਨਿਤ ਸਲਾਨਾ 250 ਕਰੋੜ ਯੂਨਿਟ ਦਾ ਰਗੜਾ ਪਾਵਰਕੌਮ ਨੂੰ ਲੱਗਦਾ ਹੈ। ਇਨ੍ਹਾਂ ਚੋਂ 50 ਫੀਸਦੀ ਵੀ ਕਟੌਤੀ ਕਰ ਦੇਈਏ ਤਾਂ ਸਲਾਨਾ ਕਰੀਬ 800 ਕਰੋੜ ਦੀ ਬਿਜਲੀ ਚੋਰੀ ਹੋ ਜਾਂਦੀ ਹੈ।ਪੰਜਾਬੀ ਟ੍ਰਿਬਿਊਨ ਵੱਲੋਂ ਪਾਵਰਕੌਮ ਦੇ ਫੀਲਡ ਦਫ਼ਤਰਾਂ ਚੋਂ ਜੋ ਵੇਰਵੇ ਇਕੱਠੇ ਕੀਤੇ ਗਏ ਹਨ, ਉਨ੍ਹਾਂ ਮੁਤਾਬਿਕ 2017-18 (ਦਸੰਬਰ ਤੱਕ) ਦੇ ਮੁਕਾਬਲੇ 2018-19 (ਦਸੰਬਰ ਤੱਕ) ’ਚ ਪੰਜਾਬ ’ਚ ਬਿਜਲੀ ਚੋਰੀ ’ਚ ਮਾਮੂਲੀ ਕਮੀ (0.7) ਆਈ ਹੈ ਪ੍ਰੰਤੂ ਪਾਵਰਫੁੱਲ ਹਲਕਿਆਂ ਵਿਚ ਬਿਜਲੀ ਚੋਰੀ ਵਧੀ ਹੈ। ਸਮੁੱਚੇ ਪੰਜਾਬ ’ਚ ਪਾਵਰਕੌਮ ਦੇ 13.31 ਫੀਸਦੀ ਵੰਡ ਘਾਟੇ ਹਨ ਜਿਨ੍ਹਾਂ ’ਚ ਮੁੱਖ ਬਿਜਲੀ ਚੋਰੀ ਆਉਂਦੀ ਹੈ। ਜੋ ਇੱਕ ਵਰ੍ਹਾ ਪਹਿਲਾਂ 14.01 ਫੀਸਦੀ ਸਨ।
                  ਪਾਵਰਕੌਮ ਦੇ ਸਰਹੱਦੀ ਜ਼ੋਨ ’ਚ ਸਭ ਤੋਂ ਵੱਧ 26.51 ਫੀਸਦੀ ਬਿਜਲੀ ਘਾਟੇ ਹਨ ਜਿਥੇ ਸਭ ਤੋਂ ਵੱਧ ਬਿਜਲੀ ਚੋਰੀ ਹੈ।  ਸਰਕਲਾਂ ਦੇ ਨਜ਼ਰ ਮਾਰੀਏ ਤਾਂ ਤਰਨਤਾਰਨ ਸਰਕਲ ਦੀ ਝੰਡੀ ਹੈ ਜਿਥੇ 45.80 ਫੀਸਦੀ ਬਿਜਲੀ ਚੋਰੀ (ਵੰਡ ਘਾਟਾ) ਹੈ। ਪਾਵਰਕੌਮ ਦੀਆਂ ਡਵੀਜ਼ਨਾਂ ਚੋਂ ਸਭ ਤੋਂ ਵੱਧ ਬਿਜਲੀ ਚੋਰੀ ਭਿਖੀਵਿੰਡ ਡਵੀਜ਼ਨ ’ਚ ਹੈ ਜਿਥੇ 72.76 ਫੀਸਦੀ ਬਿਜਲੀ ਚੋਰੀ ਬਣਦੀ ਹੈ ਜਦੋਂ ਕਿ ਪੱਟੀ ਡਵੀਜ਼ਨ ’ਚ 63.63 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ। ਪੰਜਾਬ ’ਚ 20 ਡਵੀਜ਼ਨਾਂ ਅਜਿਹੀਆਂ ਹਨ ਜਿਥੇ ਬਿਜਲੀ ਚੋਰੀ (ਵੰਡ ਘਾਟਾ) 24.39 ਫੀਸਦੀ ਤੋਂ ਲੈ ਕੇ 72.76 ਫੀਸਦੀ ਤੱਕ ਹੈ। ਇਨ੍ਹਾਂ ਚੋਂ 11 ਡਵੀਜ਼ਨਾਂ ਵਿਚ ਬਿਜਲੀ ਚੋਰੀ 40 ਫੀਸਦੀ ਤੋਂ ਜਿਆਦਾ ਹੈ। ਸੂਤਰ ਆਖਦੇ ਹਨ ਕਿ ਚੋਣਾਂ ਮੌਕੇ ਬਿਜਲੀ ਚੋਰਾਂ ਨੂੰ ਖੁੱਲ੍ਹ ਮਿਲ ਜਾਂਦੀ ਹੈ ਅਤੇ ਪਾਵਰਕੌਮ ਦੇ ਅਫਸਰ ਬੇਵੱਸ ਹੋ ਜਾਂਦੇ ਹਨ।  ਭੁਗਤਣਾ ਮਗਰੋਂ ਆਮ ਖਪਤਕਾਰਾਂ ਨੂੰ ਪੈਂਦਾ ਹੈ ਜਿਨ੍ਹਾਂ ਨੂੰ ਬਿਜਲੀ ਚੋਰਾਂ ਦਾ ਭਾਰ ਵੀ ਚੁੱਕਣਾ ਪੈਂਦਾ ਹੈ। ਫਿਰੋਜ਼ਪੁਰ ਸਰਕਲ ਵਿਚ 33.54 ਫੀਸਦੀ ਬਿਜਲੀ ਚੋਰੀ (ਸਮੇਤ ਵੰਡ ਘਾਟੇ) ਪੌਣੇ ਵਰੇ੍ਹ ਦੌਰਾਨ ਹੋਈ ਹੈ। ਵੇਰਵਿਆਂ ਅਨੁਸਾਰ ਖੇਮਕਰਨ ਹਲਕੇ ’ਚ ਪੈਂਦੀ ਡਵੀਜ਼ਨ ਭਿਖੀਵਿੰਡ ’ਚ ਸਭ ਤੋਂ ਵੱਧ ਬਿਜਲੀ ਚੋਰੀ ਹੁੰਦੀ ਹੈ ਜਿਥੇ ਸਿਰਫ਼ 72.76 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ।
                 ਪੱਟੀ ਡਵੀਜ਼ਨ ’ਚ 63.63 ਫੀਸਦੀ ਅਤੇ ਪੱਛਮੀ ਅੰਮ੍ਰਿਤਸਰ ਡਵੀਜ਼ਨ ’ਚ 50.63 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ।ਵਿਧਾਨ ਸਭਾ ਹਲਕਾ ਰਾਮਪੁਰਾ ਫੂਲ ’ਚ ਪੈਂਦੀ ਭਗਤਾ ਭਾਈਕਾ ਡਵੀਜ਼ਨ ਦਾ ਪੰਜਾਬ ਚੋਂ ਇਸ ਮਾਮਲੇ ਵਿਚ ਚੌਥਾ ਨੰਬਰ ਹੈ ਜਿਥੇ 49.34 ਫੀਸਦੀ ਬਿਜਲੀ ਚੋਰੀ (ਸਮੇਤ ਵੰਡ ਘਾਟਾ) ਹੁੰਦੀ ਹੈ ਅਤੇ ਇਸ ਹਲਕੇ ਦੀ ਰਾਮਪੁਰਾ ਡਵੀਜ਼ਨ ’ਚ 35.95 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ। ਹਲਕਾ ਸ਼ੁਤਰਾਣਾ ਦੀ ਡਵੀਜ਼ਨ ਪਾਤੜਾ ਵਿਚ 47.87  ਫੀਸਦੀ ਅਤੇ ਡਵੀਜ਼ਨ ਜੀਰਾ ਵਿਚ 47.68 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ। ਡਵੀਜ਼ਨ ਲਹਿਰਾਗਾਗਾ ’ਚ 47.47 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ ਜਦੋਂ ਕਿ ਹਲਕਾ ਬਾਘਾਪੁਰਾਣਾ ਅਤੇ ਹਲਕਾ ਅਜਨਾਲਾ ਵਿਚ 45.92 ਫੀਸਦੀ (ਦੋਹਾਂ ’ਚ ਬਰਾਬਰ) ਬਿਜਲੀ ਚੋਰੀ ਹੋਈ ਹੈ। ਇਵੇਂ ਹਲਕਾ ਮਲੋਟ ਵਿਚ 40.03 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ। ਹਲਕਾ ਲੰਬੀ ’ਚ ਪਾਵਰਕੌਮ ਦੀ ਡਵੀਜ਼ਨ ਬਾਦਲ ਅਤੇ ਮਲੋਟ ਪੈਂਦੀ ਹੈ ਅਤੇ ਬਾਦਲ ਡਵੀਜ਼ਨ ਵਿਚ 27.61 ਫੀਸਦੀ ਬਿਜਲੀ ਚੋਰੀ ਹੋਈ ਹੈ ਜਦੋਂ ਕਿ ਇੱਕ ਸਾਲ ਪਹਿਲਾਂ ਇਹ ਦਰ 25.69 ਫੀਸਦੀ ਸੀ। ਜਲਾਲਾਬਾਦ ਵਿਚ ਬਿਜਲੀ ਚੋਰੀ ਦੀ ਦਰ 34.60 ਫੀਸਦੀ ਰਹੀ ਹੈ।
                ਇਵੇਂ ਹੀ ਸਿਟੀ ਬਰਨਾਲਾ ਵਿਚ 26.23 ਫੀਸਦੀ ਅਤੇ ਮੋਗਾ ਸਿਟੀ ਵਿਚ 26.59 ਫੀਸਦੀ ਬਿਜਲੀ ਚੋਰੀ ਹੁੰਦੀ ਹੈ। ਈਸਟ ਪਟਿਆਲਾ ਡਵੀਜ਼ਨ ’ਚ ਬਿਜਲੀ ਚੋਰੀ ਦੀ ਦਰ 25.80 ਫੀਸਦੀ ਹੈ। ਜ਼ੀਰਕਪੁਰ ਡਵੀਜ਼ਨ ’ਚ ਬਿਜਲੀ ਚੋਰੀ ਦੀ ਦਰ 11.84 ਫੀਸਦੀ ਤੋਂ ਵੱਧ ਕੇ 15.10 ਫੀਸਦੀ ਹੋ ਗਈ ਹੈ। ਗਿੱਦੜਬਹਾ ਡਵੀਜ਼ਨ ’ਚ ਵੀ ਬਿਜਲੀ ਚੋਰੀ 17.38 ਫੀਸਦੀ ਤੋਂ ਵੱਧ ਕੇ 21.59 ਫੀਸਦੀ ਹੋ ਗਈ ਹੈ। ਪਾਵਰਕੌਮ ਦੇ ਸਰਹੱਦੀ ਜ਼ੋਨ ਦੇ ਮੁੱਖ ਇੰਜਨੀਅਰ ਸ੍ਰੀ ਸੰਦੀਪ ਸੂਦ ਦਾ ਕਹਿਣਾ ਸੀ ਕਿ ਵੰਡ ਘਾਟਿਆਂ ਵਿਚ ਮੁੱਖ ਤੌਰ ’ਤੇ ਬਿਜਲੀ ਚੋਰੀ ਹੀ ਸਾਮਿਲ ਹੁੰਦੀ ਹੈ। ਪਿਛਲੇ 10 ਸਾਲਾਂ ਵਿਚ ਜੋ ਸਰਹੱਦੀ ਖੇਤਰ ਵਿਚ ਗਲਤ ਪਿਰਤਾਂ ਪਈਆਂ ਹਨ, ਉਨ੍ਹਾਂ ਨੂੰ ਤੋੜਨ ਲਈ ਉਹ ਯਤਨਸੀਲ ਹਨ। ਬਿਜਲੀ ਚੋਰੀ ਰੋਕਣ ਵਿਚ ਪੁਲੀਸ ਸਹਿਯੋਗ ਨਹੀਂ ਕਰਦੀ ਅਤੇ ਅਗਰ ਉਹ ਬਿਜਲੀ ਚੋਰਾਂ ਖਿਲਾਫ ਸਖਤੀ ਕਰਦੇ ਹਨ ਤਾਂ ਲਾਅ ਐਂਡ ਆਰਡਰ ਦੀ ਸਮੱਸਿਆ ਪੈਦਾ ਕਰ ਦਿੱਤੀ ਜਾਂਦੀ ਹੈ।
                   ਬਿਜਲੀ ਚੋਰੀ :  ਡਵੀਜ਼ਨਾਂ ’ਤੇ ਇੱਕ ਝਾਤ
ਹਲਕਾ :                    ਡਵੀਜ਼ਨ                  ਬਿਜਲੀ ਚੋਰੀ ਦੀ ਦਰ
ਖੇਮਕਰਨ                  ਭਿਖੀਵਿੰਡ                    72.76 ਫੀਸਦੀ
ਪੱਟੀ                          ਪੱਟੀ                         63.63 ਫੀਸਦੀ
ਅੰਮ੍ਰਿਤਸਰ ਪੱਛਮੀ    ਪੱਛਮੀ ਅੰਮ੍ਰਿਤਸਰ             50.63 ਫੀਸਦੀ
ਰਾਮਪੁਰਾ ਫੂਲ           ਭਗਤਾ ਭਾਈ ਕਾ              49.34 ਫੀਸਦੀ
ਸ਼ੁਤਰਾਣਾ                    ਪਾਤੜਾਂ                       47.87 ਫੀਸਦੀ
ਜ਼ੀਰਾ                        ਜ਼ੀਰਾ                        47.68 ਫੀਸਦੀ
ਲਹਿਰਾਗਾਗਾ          ਲਹਿਰਾਗਾਗਾ                  47.47 ਫੀਸਦੀ
ਬਾਘਾ ਪੁਰਾਣਾ         ਬਾਘਾ ਪੁਰਾਣਾ                   45.92 ਫੀਸਦੀ
ਅਜਨਾਲਾ               ਅਜਨਾਲਾ                       45.92 ਫੀਸਦੀ
ਮਲੋਟ                       ਮਲੋਟ                        40.03 ਫੀਸਦੀ
   






Tuesday, June 18, 2019

                          ਪਾਵਰਫੁੱਲ
   ਸਨਅਤੀ ਮਾਲਕਾਂ ਨੂੰ ਮੌਜਾਂ ਹੀ ਮੌਜਾਂ
                        ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਸਰਕਾਰ ਵੱਲੋਂ ਵੱਡੇ ਸਨਅਤੀ ਮਾਲਕਾਂ ਨੂੰ ਖੁੱਲ੍ਹੇ ਹੱਥ ਨਾਲ ਬਿਜਲੀ ਸਬਸਿਡੀ ਦੇ ਗੱਫੇ ਵਰਤਾਏ ਜਾ ਰਹੇ ਹਨ ਜਿਸ ਤੋਂ ਸਭ ਬੇਖ਼ਬਰ ਹਨ। ਦੂਸਰੀ ਤਰਫ਼ ਚਾਰੇ ਪਾਸੇ ਕਿਸਾਨੀ ਨੂੰ ਮੁਫ਼ਤ ਬਿਜਲੀ ਦੇਣ ਦੇ ਢੋਲ ਵਜਾਏ ਜਾ ਰਹੇ ਹਨ। ਵੱਡੇ ਸਨਅਤ ਮਾਲਕ ਚੁੱਪ ਚੁਪੀਤੇ ਬਿਜਲੀ ਸਬਸਿਡੀ ਦੀ ਸਹੂਲਤ ਮਾਣ ਰਹੇੇ ਹਨ। ਹੈਰਾਨੀ ਭਰੇ ਤੱਥ ਹਨ ਕਿ ਪੰਜਾਬ ਸਰਕਾਰ ਮੌਜੂਦਾ ਸਮੇਂ ਵੱਡੇ ਸਨਅਤ ਮਾਲਕਾਂ ਨੂੰ ਪ੍ਰਤੀ ਕੁਨੈਕਸ਼ਨ ਅੌਸਤਨ 19.05 ਲੱਖ ਰੁਪਏ ਸਲਾਨਾ ਬਿਜਲੀ ਸਬਸਿਡੀ ਦੇ ਰਹੀ ਹੈ ਜਦੋਂ ਕਿ ਕਿਸਾਨਾਂ ਨੂੰ ਪ੍ਰਤੀ ਕੁਨੈਕਸ਼ਨ ਬਿਜਲੀ ’ਤੇ ਸਿਰਫ਼ ਅੌਸਤਨ 44 ਹਜ਼ਾਰ ਰੁਪਏ ਸਲਾਨਾ ਸਬਸਿਡੀ ਮਿਲਦੀ ਹੈ। ਸਰਕਾਰ ਨੇ ਲੰਘੇ ਮਾਲੀ ਵਰੇ੍ਹ ਦੌਰਾਨ ਪੰਜਾਬ ਦੇ ਦਰਜਨ ਵੱਡੇ ਸਨਅਤਕਾਰਾਂ ਨੂੰ ਕਰੀਬ 95.10 ਕਰੋੜ ਦੀ ਬਿਜਲੀ ਸਬਸਿਡੀ ਦਿੱਤੀ ਹੈ। ਪੰਜਾਬੀ ਟ੍ਰਿਬਿਊਨ ਵੱਲੋਂ ਜਦੋਂ ਵੱਖ ਵੱਖ ਸਰਕਾਰੀ ਦਸਤਾਵੇਜ਼ਾਂ ਦੀ ਘੋਖ ਕੀਤੀ ਗਈ ਤਾਂ ਲੁਕਵੇਂ ਤੱਥ ਸਾਹਮਣੇ ਆਏ। ਪੰਜਾਬ ਵਿਚ ਇਸ ਵੇਲੇ ਹਰ ਕੈਟਾਗਿਰੀ ਦੇ 94.78 ਲੱਖ ਬਿਜਲੀ ਕੁਨੈਕਸ਼ਨ ਹਨ ਜਿਨ੍ਹਾਂ ਚੋਂ 1.27 ਲੱਖ ਸਨਅਤੀ ਕੁਨੈਕਸ਼ਨ ਹਨ ਜਿਨ੍ਹਾਂ ਨੂੰ ਪੰਜਾਬ ਸਰਕਾਰ ਵੱਲੋਂ ਸਲਾਨਾ ਕਰੀਬ 1990.38 ਕਰੋੜ ਦੀ ਬਿਜਲੀ ਸਬਸਿਡੀ ਦੇ ਰਹੀ ਹੈ। ਅੱਗੇ ਇਨ੍ਹਾਂ ਚੋਂ ਸਮਾਲ ਪਾਵਰ ਦੇ 87,802 ਬਿਜਲੀ ਕੁਨੈਕਸ਼ਨ ਹਨ ਜਿਨ੍ਹਾਂ ਨੂੰ ਸਿਰਫ਼ 176.60 ਕਰੋੜ ਸਲਾਨਾ ਦੀ ਬਿਜਲੀ ਸਬਸਿਡੀ ਮਿਲਦੀ ਹੈ।
                 ਮਤਲਬ ਸਮਾਲ ਪਾਵਰ ਸਨਅਤਾਂ ਨੂੰ ਸਲਾਨਾ ਪ੍ਰਤੀ ਕੁਨੈਕਸ਼ਨ ਅੌਸਤਨ 20,100 ਰੁਪਏ ਜਦੋਂ ਕਿ ਮੀਡੀਅਮ ਸਕੇਲ ਸਨਅਤਾਂ ਨੂੰ ਪ੍ਰਤੀ ਕੁਨੈਕਸ਼ਨ ਅੌਸਤਨ 75,500 ਰੁਪਏ ਸਲਾਨਾ ਦੀ ਬਿਜਲੀ ਸਬਸਿਡੀ ਮਿਲਦੀ ਹੈ। ਮੀਡੀਅਮ ਸਕੇਲ ਸਨਅਤਾਂ ਦੇ ਕੁਨੈਕਸ਼ਨਾਂ ਦੀ ਗਿਣਤੀ 31,235 ਬਣਦੀ ਹੈ। ਵੱਡਾ ਲਾਹਾ ਤਾਂ ਵੱਡੇ ਸਨਅਤੀ ਘਰਾਣਿਆਂ ਨੂੰ ਮਿਲਦਾ ਹੈ ਜਿਨ੍ਹਾਂ ਦੀ ਕੁਨੈਕਸ਼ਨਾਂ ਦੀ ਗਿਣਤੀ ਸਿਰਫ਼ 8223 ਬਣਦੀ ਹੈ ਜਦੋਂ ਕਿ ਇਨ੍ਹਾਂ ਨੂੰ ਸਲਾਨਾ ਬਿਜਲੀ ਸਬਸਿਡੀ 1578 ਕਰੋੜ ਰੁਪਏ ਦੀ ਮਿਲਦੀ ਹੈ ਜੋ ਕਿ ਪ੍ਰਤੀ ਕੁਨੈਕਸ਼ਨ ਅੌਸਤਨ 19.05 ਲੱਖ ਰੁਪਏ ਬਣਦੀ ਹੈ। ਤੱਥਾਂ ਤੋਂ ਸਾਫ ਹੈ ਕਿ ਸਿਰਫ਼ ਥੋੜੇ ਸਨਅਤਕਾਰਾਂ ਨੂੰ ਸਬਸਿਡੀ ਦਾ ਵੱਡਾ ਗੱਫਾ ਦਿੱਤਾ ਗਿਆ ਹੈ ਜਦੋਂ ਕਿ ਖੇਤੀ ਸੈਕਟਰ ਵਿਚ ਬਿਜਲੀ ਸਬਸਿਡੀ ਲੈਣ ਵਾਲੇ ਕੁਨੈਕਸ਼ਨਾਂ ਦੀ ਗਿਣਤੀ 13.80 ਲੱਖ ਬਣਦੀ ਹੈ ਜਿਨ੍ਹਾਂ ਨੂੰ ਪ੍ਰਤੀ ਕੁਨੈਕਸ਼ਨ ਅੌਸਤਨ ਸਿਰਫ਼ 44 ਹਜ਼ਾਰ ਰੁਪਏ ਸਲਾਨਾ ਬਿਜਲੀ ਸਬਸਿਡੀ ਮਿਲਦੀ ਹੈ। ਖੇਤੀ ਟਿਊਬਵੈਲਾਂ ਦੀ ਤਸਵੀਰ ਅੱਗੇ ਹੋਰ ਵੀ ਹਿਲਾਉਣ ਵਾਲੀ ਹੈ। ਖੇਤੀ ’ਚ ਵੀ ਧਨੀ ਕਿਸਾਨ ਇਸ ਸਬਸਿਡੀ ਦਾ ਫਾਇਦਾ ਚੁੱਕ ਰਹੇ ਹਨ।  ਵੇਰਵਿਆਂ ਅਨੁਸਾਰ ਪੰਜਾਬ ’ਚ ਅਜਿਹੇ 1.83 ਲੱਖ ਕਿਸਾਨ ਹਨ ਜਿਨ੍ਹਾਂ ਕੋਲ ਇੱਕ ਤੋਂ ਜਿਆਦਾ ਟਿਊਬਵੈਲ ਕੁਨੈਕਸ਼ਨ ਹਨ। ਪੰਜਾਬ ਵਿਚ ਅਜਿਹੇ 10,128 ਕਿਸਾਨਾਂ ਦਾ ਪਤਾ ਲੱਗਾ ਹੈ ਜਿਨ੍ਹਾਂ ਦੇ ਨਾਮ ’ਤੇ ਚਾਰ ਜਾਂ ਚਾਰ ਤੋਂ ਜਿਆਦਾ ਖੇਤੀ ਮੋਟਰਾਂ ਦੇ ਬਿਜਲੀ ਕੁਨੈਕਸ਼ਨ ਹਨ।
                 ਚਾਰ ਜਾਂ ਚਾਰ ਤੋਂ ਜਿਆਦਾ ਮੋਟਰਾਂ ਵਾਲੇ ਫਿਰੋਜ਼ਪੁਰ ਵਿਚ 1504, ਫਰੀਦਕੋਟ ਵਿਚ 1260 ਕਿਸਾਨ,ਕਪੂਰਥਲਾ ਵਿਚ 1088 ਕਿਸਾਨ ਅਤੇ ਮੁਕਤਸਰ ਵਿਚ 1032 ਕਿਸਾਨ ਹਨ। ਤਿੰਨ ਤਿੰਨ ਖੇਤੀ ਮੋਟਰਾਂ ਵਾਲੇ ਕਿਸਾਨਾਂ ਦੀ ਗਿਣਤੀ 29,322 ਬਣਦੀ ਹੈ ਅਤੇ ਅਜਿਹੇ ਕਿਸਾਨ ਫਿਰੋਜ਼ਪੁਰ ਵਿਚ 3213,ਫਰੀਦਕੋਟ ਵਿਚ 2907, ਗੁਰਦਾਸਪੁਰ ਵਿਚ 1797 ਅਤੇ ਮੁਕਤਸਰ ਵਿਚ 2334 ਕਿਸਾਨ ਹਨ। ਪੰਜਾਬ ਵਿਚ ਦੋ ਦੋ ਖੇਤੀ ਮੋਟਰਾਂ ਵਾਲੇ ਕਿਸਾਨਾਂ ਦੀ ਗਿਣਤੀ ਕਰੀਬ 1.42 ਲੱਖ ਬਣਦੀ ਹੈ। ਵੱਧ ਮੋਟਰਾਂ ਵਾਲੇ ਧਨਾਢ ਕਿਸਾਨ ਸਰਕਾਰੀ ਖ਼ਜ਼ਾਨੇ ਚੋਂ ਚੋਖਾ ਲਾਭ ਮਿਲ ਰਿਹਾ ਹੈ ਕਿਉਂਕਿ ਉਨ੍ਹਾਂ ਕੋਲ ਵਧੇਰੇ ਹਾਰਸ ਪਾਵਰ ਦੀਆਂ ਮੋਟਰਾਂ ਹਨ। ਪੰਜਾਬ ਸਰਕਾਰ ਵੱਲੋਂ ਸਾਲ 2019-20 ਦੌਰਾਨ ਕਰੀਬ 9674 ਕਰੋੜ ਦੀ ਅਨੁਮਾਨਿਤ ਸਬਸਿਡੀ ਹਰ ਕੈਟਾਗਿਰੀ ਨੂੰ ਬਿਜਲੀ ’ਤੇ ਦਿੱਤੀ ਜਾਣੀ ਹੈ। ਪਾਵਰਕੌਮ ਨੂੰ ਮਾਲੀ ਵਰੇ੍ਹ ਦੌਰਾਨ 31,762 ਕਰੋੜ ਰੁਪਏ ਦੀ ਆਮਦਨ ਹੋਣੀ ਹੈ। ਪੰਜਾਬ ਸਰਕਾਰ ਤੋਂ ਮਿਲਦੀ ਸਬਸਿਡੀ ਦੀ ਰਕਮ ਪਾਵਰਕੌਮ ਦੀ ਕੁੱਲ ਆਮਦਨ ਦਾ 30 ਫੀਸਦੀ ਬਣਦੀ ਹੈ। ਖੇਤੀ ਕੁਨੈਕਸ਼ਨਾਂ ’ਤੇ 6060,27 ਕਰੋੜ ਦੀ ਬਿਜਲੀ ਸਬਸਿਡੀ ਬਣਦੀ ਹੈ।
                ਕਾਂਗਰਸ ਸਰਕਾਰ ਵੱਲੋਂ ਸਨਅਤਾਂ ਨੂੰ ਪੰਜ ਵਰ੍ਹਿਆਂ ਲਈ ਪ੍ਰਤੀ ਯੂਨਿਟ ਪੰਜ ਰੁਪਏ ਦੇ ਹਿਸਾਬ ਨਾਲ ਬਿਜਲੀ ਦਿੱਤੀ ਜਾ ਰਹੀ ਹੈ। ਨਵੇਂ ਨਿਵੇਸ਼ ਲਈ ਮੀਡੀਅਮ ਤੇ ਲਾਰਜ ਸਕੇਲ ਸਨਅਤਾਂ ਨੂੰ ਸੱਤ ਵਰ੍ਹਿਆਂ ਲਈ ਬਿਜਲੀ ਕਰ ਤੋਂ ਸੌ ਫੀਸਦੀ ਛੋਟ ਦਿੱਤੀ ਜਾ ਰਹੀ ਹੈ। ਜੋ ਖਾਸ ਸਨਅਤੀ ਖੇਤਰ ਹਨ, ਉਨ੍ਹਾਂ ਵਿਚ ਇਹ ਛੋਟ 10 ਸਾਲਾਂ ਲਈ ਦਿੱਤੀ ਜਾਣੀ ਹੈ। ਇਸ ਵਕਤ 34.6 ਲੱਖ ਖਪਤਕਾਰ ਬਿਜਲੀ ਸਬਸਿਡੀ ਦਾ ਲਾਹਾ ਲੈ ਰਹੇ ਹਨ ਜੋ ਕਿ ਕੁੱਲ ਖਪਤਕਾਰਾਂ ਦਾ 37 ਫੀਸਦੀ ਬਣਦੇ ਹਨ। ਸਿਰਫ਼ ਜਨਰਲ ਕੈਟਾਗਿਰੀ ਦਾ ਘਰੇਲੂ ਖਪਤਕਾਰ ਇਸ ਤੋਂ ਵਾਂਝਾ ਹੈ ਜੋ ਬਾਕੀ ਸਭਨਾਂ ਦੀ ਬਿਜਲੀ ਸਬਸਿਡੀ ਦਾ ਬੋਝ ਵੱਖ ਵੱਖ ਟੈਕਸਾਂ ਦੇ ਰੂਪ ਵਿਚ ਚੁੱਕ ਰਿਹਾ ਹੈ। ਪੰਜਾਬ ਸਰਕਾਰ ਵੱਲੋਂ ਐਸ.ਸੀ,ਬੀ.ਸੀ ਅਤੇ ਬੀ.ਪੀ.ਐਲ ਖਪਤਕਾਰਾਂ ਨੂੰ ਪ੍ਰਤੀ ਕੁਨੈਕਸ਼ਨ ਸਲਾਨਾ ਦੀ ਅੌਸਤਨ 8400 ਰੁਪਏ ਬਿਜਲੀ ਸਬਸਿਡੀ ਦਿੱਤੀ ਜਾ ਰਹੀ ਹੈ ਜਿਨ੍ਹਾਂ ਦੇ ਕੁਨੈਕਸ਼ਨਾਂ ਦੀ ਗਿਣਤੀ 19.5 ਲੱਖ ਬਣਦੀ ਹੈ।
               ਪੀ.ਐਸ.ਈ.ਬੀ ਜੁਆਇੰਟ ਇੰਪਲਾਈਜ ਫੋਰਮ ਦੇ ਜਨਰਲ ਸਕੱਤਰ ਕਰਮ ਚੰਦ ਭਾਰਦਵਾਜ ਦਾ ਪ੍ਰਤੀਕਰਮ ਸੀ ਕਿ ਵੱਡੇ ਲੋਕਾਂ ਨੂੰ ਸਬਸਿਡੀ ਬੰਦ ਕੀਤੇ ਜਾਣ ਨਾਲ ਸਰਕਾਰ ’ਤੇ ਸਬਸਿਡੀ ਦਾ ਬੋਝ ਘਟੇਗਾ ਜਿਸ ਨਾਲ ਬਿਜਲੀ ਸਸਤੀ ਹੋਣ ਦੀ ਸੰਭਾਵਨਾ ਬਣੇਗੀ। ਬਿਜਲੀ ਸਬਸਿਡੀ ਆਮ ਕਿਸਾਨੀ ਨੂੰ ਮਿਲੇ ਅਤੇ ਪ੍ਰਾਈਵੇਟ ਕੰਪਨੀਆਂ ਨਾਲ ਹੋਏ ਬਿਜਲੀ ਖਰੀਦ ਸਮਝੌਤੇ ਵੀ ਰੀਵਿਊ ਹੋਣੇ ਚਾਹੀਦੇ ਹਨ। ਭਾਰਤੀ ਕਿਸਾਨ ਯੂਨੀਅਨ (ਉਗਰਾਹਾਂ) ਦੇ ਪ੍ਰਧਾਨ ਜੋਗਿੰਦਰ ਸਿੰਘ ਉਗਰਾਹਾਂ ਇਸ ਪੱਖ ’ਚ ਹਨ ਕਿ ਸਨਅਤੀ ਅਤੇ ਖੇਤੀ ਖੇਤਰ ਦੇ ਵੱਡੇ ਸਰਦੇ ਪੁੱਜਦੇ ਲੋਕਾਂ ਨੂੰ ਬਿਜਲੀ ਸਬਸਿਡੀ ਬੰਦ ਹੋਣੀ ਚਾਹੀਦੀ ਹੈ ਜਿਨ੍ਹਾਂ ਨੂੰ ਰਿਆਇਤਾਂ ਦੇਣ ਦੀ ਕੋਈ ਤੁਕ ਨਹੀਂ ਬਣਦੀ ਹੈ। ਬਿਜਲੀ ਸਬਸਿਡੀ ਦਾ ਆਮ ਕਿਸਾਨੀ ਨੂੰ ਵਧੇਰੇ ਫਾਇਦਾ ਦਿੱਤਾ ਜਾਣਾ ਚਾਹੀਦਾ ਹੈ।
                    ਸਨਅਤੀ ਵਿਕਾਸ ਦੇ ਮੱਦੇਨਜ਼ਰ ਰਿਆਇਤਾਂ : ਉਦਯੋਗ ਮੰਤਰੀ
ਉਦਯੋਗ ਮੰਤਰੀ ਸ੍ਰੀ ਸੁੰਦਰ ਸ਼ਾਮ ਅਰੋੜਾ ਦਾ ਕਹਿਣਾ ਸੀ ਕਿ ਪੰਜਾਬ ਵਿਚ ਸਨਅਤੀ ਨਿਵੇਸ਼ ਤੇ ਵਿਕਾਸ ਲਈ ਸਭ ਛੋਟੀ ਵੱਡੀ ਸਨਅਤ ਨੂੰ ਬਿਜਲੀ ਸਬਸਿਡੀ ਦੀ ਸਹੂਲਤ ਦਿੱਤੀ ਹੈ ਜਿਸ ਨਾਲ ਮਾਲੀਆ ਤੇ ਰੁਜ਼ਗਾਰ ਦੇ ਮੌਕੇ ਵਧੇ ਹਨ। ਬੰਦ ਸਨਅਤਾਂ ਚੱਲੀਆਂ ਹਨ ਅਤੇ ਪੁਰਾਣੀਆਂ ਸਨਅਤਾਂ ਨੇ ਬਿਜਲੀ ਲੋਡ ਵਧਾਏ ਹਨ। ਬਿਜਲੀ ਸਰਪਲੱਸ ਹੈ ਤੇ ਸਨਅਤਾਂ ’ਚ ਖਪਤ ਦੇ ਵਾਧੇ ਨਾਲ ਆਮਦਨ ਵੀ ਵਧੀ ਹੈ। ਸਨਅਤੀ ਵਿਕਾਸ ਨੂੰ ਮੁੱਖ ਰੱਖ ਕੇ ਰਿਆਇਤਾਂ ਦਿੱਤੀਆਂ ਹਨ।
             




Sunday, June 16, 2019

                             ਵਿਚਲੀ ਗੱਲ  
             ਬਾਪੂ ! ਤੂੰ ਲਕੀਰਾਂ ਨਾ ਫਰੋਲ..
                             ਚਰਨਜੀਤ ਭੁੱਲਰ
ਬਠਿੰਡਾ: ਹੋਇਆ ਇੰਜ ਇੱਕ ਲੰਘੀ ਰਾਤ। ਉੱਭੜਬਾਹੇ ਉੱਠ ਖਲੋਤਾ, ਕੰਨੀ ਪਈ ਗੱਲਬਾਤ। ਦੇਖ ਜਰਾ ਕੌਣ ਹਉਕੇ ਭਰਦਾ, ਪੁੱਛਿਆ ਮੈਨੂੰ ਕਾਇਨਾਤ। ਕੁੰਡਾ ਖੋਲ ਸਬਾਤ ਦਾ, ਖੋਲ੍ਹਿਆ ਜਦੋਂ ਸੰਦੂਕ। ਮਾਂ ਦੀ ਚੁੰਨੀ ਹੁਬਕੀ ਰੋਵੇ, ਅੰਦਰੋਂ ਨਿਕਲੀ ਹੂਕ। ਬਾਪ ਦੀ ਪੱਗ ਨਾਲ ਗੱਲਾਂ ਕਰਦੀ, ਚੁੰਨੀ ਦੁੱਖ ਵੰਡਾਵੇ। ਬੱਚਿਆਂ ਮੇਰਿਆਂ ਦਾ ਤੂੰ ਤਾਜ ਸੀ। ਵੇਲਾ ਕਿਧਰ ਗਿਆ ਜਦੋਂ ਤੇਰਾ ਰਾਜ ਸੀ। ਮਾਵਾ ਤੇਰਾ ਕਿਧਰ ਗੁਆਚਾ, ਦੱਸ ਤੂੰ ਪੱਗ ਦੀਏ ਲੀਰੇ। ਸ਼ਰਮ ਵਾਲੀ ਅੱਖ ਕਿਧਰ ਰਹਿ ਗਈ, ਦੱਸ ਤਾਂ ਸਹੀ ਜ਼ਮੀਰੇ। ਬਾਪ ਦੀ ਪੱਗ ਦਾ ਗੱਚ ਭਰਿਆ, ਵਿਚ ਹਨੇਰੇ ਮੈਂ ਵੀ ਡਰਿਆ। ਪੱਗ ਬਾਪ ਦੀ ਆਖਣ ਲੱਗੀ, ਤੂੰ ਵੀ ਲੱਜ ਦਾ ਘੁੰਡ ਬਣਦੀ ਸੀ, ਹੁਣ ਕਿਉਂ ਬਣਦੀ ਫਾਹਾ, ਲੀਰੋਂ ਲੀਰ ਤੈਨੂੰ ਕਰਨ ਬਾਜ਼ਾਰੀ, ਬੋਲਣ ਵਾਲੇ ਧਾਵਾ। ਸੁੰਨ ਹੋ ਗਿਆ, ਖੜ੍ਹਾ ਨਾ ਜਾਵੇ, ਮਨ ਨਾ ਝੱਲੇ ਦਾਬ। ਸੋਚਾਂ ਦੇ ਵਿਚ ਘੁੰਮਣ ਲੱਗਾ, ਆਪਣਾ ਦੇਸ਼ ਪੰਜਾਬ। ਛੱਜੂ ਰਾਮਾ, ਦੱਸ ਤੂੰ ਮੈਨੂੰ, ਕਾਹਤੋਂ ਏਹ ਆਇਆ ਖ਼ਾਬ। ਜਨਾਬ, ਅੱਜ ‘ਪਿਤਾ ਦਿਵਸ’ ਹੈ, ਮਿਲਿਆ ਏਹ ਜੁਆਬ। ‘ਪਿਤਾ ਦਿਵਸ’ ’ਤੇ ਹਰ ਉਸ ਬਾਪ ਨੂੰ ਸਲਾਮ, ਜੋ ਅੌਲਾਦ ਦੀ ਹੀ ਨਹੀਂ, ਸਮਾਜ ਦੀ ਉਡਾਰੀ ਬਣੇ। ਕੋਈ ਦਿਵਸ ਤੇ ਕੋਈ ਦਿਨ, ਭਾਵੇਂ ਹੁਣ ਧਰਵਾਸ ਨਹੀਂ ਬਣਦਾ। ਜ਼ਮਾਨੇ ਦਾ ਗੇੜ ਹੈ, ਉਂਜ ਤਾਂ ਬਾਪ ਨੂੰ ਕੌਣ ਯਾਦ ਕਰਦੇ, ਦਿਵਸ ਬਹਾਨੇ ਹੀ ਸਹੀ। ਚੋਣਾਂ ਮਗਰੋਂ ਭਮੱਤਰ ਜਾਣਾ, ਕੋਈ ਅਲੋਕਾਰੀ ਗੱਲ ਨਹੀਂ ਹੁੰਦੀ। ‘ਗਧੇ ਨੂੰ ਬਾਪ ਤੇ ਬਾਪ ਨੂੰ ਗਧਾ’ ਆਖਣ ਵਾਲੇ ਹੁਣ ਥੋਡੇ ਮਾਈ ਬਾਪ ਜੋ ਬਣੇ ਨੇ।
                 ਕਿਸੇ ਬਾਪ ਦੇ ਹਿੱਸੇ ਕੁਰਸੀ ਵਾਲੇ ਭਾਗ ਨਹੀਂ ਆਏ। ਤਾਹੀਓ, ਬਾਪ ਦੀ ਪੱਗ ਚੋਂ ਪੰਜਾਬ ਦਾ ਝਉਲਾ ਪੈਂਦੈ। ਗੱਲ ਅੱਗੇ ਫਿਰ ਤੋਰਾਂਗੇ। ਪਹਿਲਾਂ ਰੰਗ ਮੰਚ ਦੇ ਬਾਪ ਅਜਮੇਰ ਅੌਲਖ ਨੂੰ ਪ੍ਰਣਾਮ ਕਰਦੇ ਹਾਂ। ਤਿੰਨ ਧੀਆਂ ਹੀ ਨਹੀਂ, ਪੂਰਾ ਪਰਿਵਾਰ ਲੋਕ ਮੰਚ ਦੇ ਲੇਖੇ ਲਾਇਆ। ਤਿੰਨ ਵਰੇ੍ਹ ਪਹਿਲਾਂ ਅੱਜ ਦੇ ਦਿਨ ਅਲਵਿਦਾ ਆਖ ਗਏ ਸਨ। ਪਿੰਡ ਢੁੱਡੀਕੇ ਵਾਲੇ ਇਸ ਗੱਲੋਂ ਵਡਭਾਗੀ ਹਨ। ਜਸਵੰਤ ਕੰਵਲ ਇਸੇ ਮਹੀਨੇ ਜ਼ਿੰਦਗੀ ਦਾ ਸੈਂਕੜਾ ਮਾਰ ਰਹੇ ਹਨ। ਪੰਜਾਬੀ ਨਾਵਲ ਦੇ ਪਿਉ ਦੇ 100ਵੇਂ ਜਨਮ ਦਿਨ ਦੀ ਤਿਆਰੀ ਚੱਲ ਰਹੀ ਹੈ। ਆਓ, ਹੁਣ ਪੰਜਾਬ ਦਾ ਗੇੜਾ ਲਾਉਂਦੇ ਹਨ। ਅੌਹ ਦੇਖੋ, ਪੰਜਾਬ ਦਾ ਇੱਕ ਬਾਪ ਨਹਿਰ ’ਤੇ ਖੜ੍ਹਾ ਹੈ। ਪੁਲੀਸ ਦੇ ਲੰਮੇ ਹੱਥ ਪਿੰਡ ਪੰਜਾਬਾਂ (ਲੰਬੀ) ਤੱਕ ਪੁੱਜੇ। ਪੁੱਤ ਜਸਪਾਲ ਦੀ ਲਾਸ਼ ਕਿਸ ਨਹਿਰ ’ਚ ਰੁੜ੍ਹ ਗਈ। ਫਰੀਦਕੋਟ ਪੁਲੀਸ ਦੇ ਹੱਥ ਖਾਲੀ ਹਨ। ਪੁਲੀਸ ਹਿਰਾਸਤ ’ਚ ਮਰੇ ਜਸਪਾਲ ਦਾ ਭੋਗ ਵੀ ਅੱਜ ਹੈ। ਬਾਪ ਹਰਬੰਸ ਸਿੰਘ ਉਦੋਂ ਤੋਂ ਨਹਿਰਾਂ ’ਤੇ ਮਿੱਟੀ ਫਰੋਲ ਰਿਹਾ ਹੈ।
              ਪਿੰਡ ਗਾਜੀ ਸੁਲਾਰ (ਪਟਿਆਲਾ) ਪੈਲੀ ਦੇ ਸੰਕਟ ਦਾ ਪ੍ਰਨੋਟ ਹੈ। ਪਿੰਡ ਦੀ ਉਸ ਧੀਅ ਨੂੰ ‘ਪਿਤਾ ਦਿਵਸ’ ਧੂਹ ਪਾਉਂਦਾ ਹੈ ਜਿਸ ਦੀ ਡੋਲੀ ਤੋਂ ਪਹਿਲਾਂ ਬਾਪ ਤੁਰ ਗਿਆ। ਕਿਧਰੋਂ ਕੋਈ ਪੈਸਾ ਨਾ ਮਿਲਿਆ। ਬਰਾਤ ਆਈ, ਮਿਲਨੀ ਕੀਤੀ। ਡੰਗਰਾਂ ਵਾਲੇ ਵਾੜੇ ’ਚ ਅਗਨ ਭੇਟ ਹੋ ਗਿਆ। ਮੁੱਠੀ ਭਰ ਹੱਡੀਆਂ ਲੱਭੀਆਂ। ਪਿੰਡ ਘੋੜੇਨਾਬ (ਸੰਗਰੂਰ) ਦੇ ਇੱਕ ਬਾਪ ਦੀ ਰੂਹ ਬਹੁਤ ਕਲਪੀ। ਜਦੋਂ ਧੀ ਦੀ ਡੋਲੀ ਤੋਂ ਪਹਿਲਾਂ ਪੁੱਤ ਦੀ ਅਰਥੀ ਉੱਠੀ। ਪੰਜਵੀਂ ਭੈਣ ਦੀ ਬਰਾਤ ਆਈ, ਰਾਤ ਨੂੰ ਜਾਗੋ ਕੱਢੀ। ਸਭ ਨੂੰ ਜਗਾ ਕੇ ਖੁਦ ਸਦਾ ਲਈ ਸੌ ਗਿਆ। ਖੇਤਾਂ ਦੇ ਬਾਪ ਇਹ ਸਭ ਕੁਝ ਆਪਣੇ ਪਿੰਡੇ ਹੰਢਾ ਰਹੇ ਨੇ। ਚੁੰਨੀਆਂ ਦੇ ਰੰਗ ਚਿੱਟੇ ਹੀ ਕਿਉਂ ਨੇ, ਕਦੇ ਜਾਗੇ ਤਾਂ ਖੇਤਾਂ ਦੇ ਪੁੱਤ ਜਰੂਰ ਰੰਗਾਂ ਦਾ ਹਿਸਾਬ ਕਰਨਗੇ।
             ਪੰਜਾਬ ਦਾ ਅੌਹ ਬਾਪ ਵੀ ਦੇਖੋ, ਜੋ ਸ਼ਾਹੂਕਾਰ ਦੀ ਹੱਟ ਤੇ ਖੜ੍ਹੈ। ਬਾਪ ਦੀ ਸਰਦਾਰੀ ਸ਼ਾਹੂਕਾਰਾਂ ਦੇ ਪੈਰੀਂ ਪਈ ਐ। ਜਦੋਂ ਕਿਸਾਨ ਮਰਿਆ ਤਾਂ ਸ਼ਾਹੂਕਾਰ ਬਣਿਐ। ਹੱਟੀਆਂ ’ਚ ਬਾਪ ਦੀ ਪੱਗ ਰੁਲ ਰਹੀ ਹੈ। ਮਜਬੂਰੀ ਦਾ ਵਾਜੇ ਵਜਾਉਣਾ ਸ਼ੌਕ ਨਹੀਂ। ਸੰਤ ਰਾਮ ਉਦਾਸੀ ਦੇ ਬੋਲ ਚੇਤੇ ਪੈਂਦੇ ਨੇ, ‘ਮੇਰੀ ਦੁਖੀਏ ਬਾਪ ਦੀ ਸੋਚ ਬੁੱਢੀ, ਝੇਪ ਵਿਚ ਆ ਕੇ ਹਾਂਅ ਕਰ ਦਿੱਤੀ, ਆਪਣੇ ਕਰਜ਼ੇ ਦਾ ਸਮਝ ਕੇ ਸੂਦ ਮੈਨੂੰ, ਵੱਲ ਸੇਠ ਦੇ ਮੇਰੀ ਬਾਂਹ ਕਰ ਦਿੱਤੀ।’ ਵਕਤ ਦੀ ਘੁਲਾੜੀ ’ਚ ਬਾਂਹ ਮਜ਼ਦੂਰ ਦੀ ਵੀ ਆਈ ਹੈ। ਜੱਟ ਵੀ ਸੀਰੀ ਦੇ ਗੱਲ ਲੱਗਿਐ। ਜਿਵੇਂ ਬਾਪ ਦੀ ਪੱਗ ਨੇ ਚੁੰਨੀ ਗਿੱਲੀ ਕੀਤੀ ਹੈ। ਬੈਂਕਾਂ ਵਾਲਿਆਂ ਨੇ ਪੱਗ ਨੂੰ ਜੇਲ੍ਹ ਵਿਖਾਈ ਹੈ।
       ਜਦੋਂ ਪੱਗ ਕਦੇ ਥਾਣੇ ਤੇ ਕਦੇ ਕਚਹਿਰੀ ਰੁਲੇ। ਫਿਰ ਕਾਹਦੇ ‘ਪਿਤਾ ਦਿਵਸ’। ਝੱਖੜਾਂ ’ਚ ਬੁੱਢੇ ਰੁੱਖਾਂ ਨਾਲ ਏਦਾਂ ਹੀ ਬੀਤਦੀ ਹੈ। ਪਿਓ ਦਾਦਿਆਂ ਨੇ ਅੱਖੀਂ ਦੇਖੇ ਨੇ। ਅਣਗਿਣਤ ਝੱਖੜ ਤੇ ਉਨ੍ਹਾਂ ਦੇ ਦਿੱਤੇ ਜਖ਼ਮ। ਸੰਤਾਲੀ ਦੀ ਪਰਲੋ, ਦਿੱਲੀ ਦੇ ਦੰਗੇ, ਗੁਜਰਾਤ ਦੇ ਦੰਗੇ। ਪੁੱਤਾਂ ਨੇ ਬਾਪ ਜਲਦੇ ਵੇਖੇ ਨੇ। ਕਦੇ ਕੌੜੀਆਂ ਮਿਰਚਾਂ ਨਾਲ ਦਾਗ ਮਿਟੇ ਨੇ। ਸੁਰਜੀਤ ਪਾਤਰ ਤਾਹੀਂ ਲਿਖਦੈ, ‘ਓਹੀ ਛਿੱਟੇ ਖੂਨ ਦੇ, ਬਣ ਗਏ ਬਹਾਨਾ, ਸਾਡੀ ਪੱਗ ਨੂੰ ਪੈ ਗਿਆ, ਆਪਣਾ ਬਿਗਾਨਾ’। ਗੈਰਾਂ ’ਚ ਦਮ ਕਿਥੇ, ਪੱਗ ਆਪਣਿਆਂ ਨੇ ਉਛਾਲੀ। ਯਕੀਨ ਨਹੀਂ ਤਾਂ ਉਸ ਬਾਪ ਨੂੰ ਪੁੱਛੋ। ਜੋ ਤਰਨਤਾਰਨ ਦੇ ਨਸ਼ਾ ਛੁਡਾਊ ਕੇਂਦਰ ’ਚ ਬੈਠਾ ਹੈ। ਨਸ਼ੇ ’ਚ ਇੱਕ ਪੁੱਤ ਗੁਆ ਬੈਠਾ ਹੈ। ਦੂਸਰੇ ਨੂੰ ਲੈ ਕੇ ਘੁੰਮ ਰਿਹਾ ਹੈ। ਕਿਤੇ ਪਟਿਆਲੇ, ਕਦੇ ਫਰੀਦਕੋਟ। ਮੱਖੂ ਨੇੜਲੇ ਪਿੰਡ ਦਾ ਇਹ ਬਾਪ ਪੰਜਾਬ ਦਾ ਸੱਚ ਹੈ। ਪੈਲੀਆਂ ਦਾ ਮਾਣ ਸੀ, ਉਪਰੋਂ ਚੋਬਰ ਮੁੰਡਿਆਂ ਦਾ ਸਰੂਰ। ਹੁਣ ਆਖਦਾ ਹੈ, ਪਿੰਡ ਚੋਂ ਸਿਰ ਨੀਵਾਂ ਕਰਕੇ ਲੰਘਣਾ ਪੈਂਦਾ ਹੈ।
      ਪੰਜਾਬ ’ਚ ਪੰਜ ਮਿੰਟ ’ਚ ਨਸ਼ੇ ਦੀ ਡਲਿਵਰੀ ਹੈ। ਕਿਸਾਨ ਆਖਦਾ ਹੈ, ਕੈਪਟਨ ਦੇ ਰਾਜ ’ਚ ਨਸ਼ਾ ਹੋਰ ਵਧਿਐ। ਹਜ਼ਾਰਾਂ ਚਿਰਾਗ ਬੁੱਝਾਏ ਨੇ। ਅੱਤਵਾਦ ਤੋਂ ਵੱਧ ਇਸ ਨਸ਼ੇ ਨੇ। ਪੰਜਾਬ ’ਚ ਨਸ਼ਾ ਛੁਡਾਊਂ ਕੇਂਦਰਾਂ ਦੀ ਗਿਣਤੀ 128 ਹੋ ਗਈ ਹੈ। ਸਿਹਤ ਮਹਿਕਮੇ ਦੇ 81 ਓਟ ਸੈਂਟਰ ਵੱਖਰੇ। ‘ਪਟਿਆਲਾ ਸ਼ਾਹੀ’ ਪੱਗ ਕੁਝ ਤਾਂ ਸੋਚੇ। ਉਸ ਬਾਪ ਦੀ ਪੱਗ ਵੱਲ ਵੇਖੋ, ਜਿਸ ਦੀ ਧੀ ਜਬਰ ਜਨਾਹ ਨੇ ਝਪਟ ਲਈ। ਸਰੂਤੀ ਕਾਂਡ ਦਾ ਝੰਬਿਆਂ ਬਾਪ ਕਿਵੇਂ ਘਰੋਂ ਬਾਹਰ ਨਿਕਲੇ। ਬਾਪ ਸਿਰਫ਼ ਬੁਢਾਪਾ ਪੈਨਸ਼ਨ ਵਾਸਤੇ ਨਹੀਂ ਹੁੰਦੇ। ਬਿਨਾਂ ਦਾਗ ਤੋਂ ਲੋਈ ਬਾਪ ਦਾ ਮਾਣ ਹੁੰਦੀ ਹੈ। ਜ਼ਮਾਨੇ ਦਾ ਗੇੜ ਬਦਲਿਆ ਹੈ। ਸਰਵਣ ਪੁੱਤ ਨਹੀਂ, ਵਹਿੰਗੀ ਵੀ ਗੁਆਚੀ ਹੈ। ਰਾਤੋਂ ਰਾਤ ਬਿਰਧ ਆਸ਼ਰਮਾਂ ਦੀ ਗਿਣਤੀ ਨਹੀਂ ਵਧੀ।
                ਸੁਨਾਮ ਵਾਲਾ ਫਤਹਿਵੀਰ ਤਾਂ ਹੁਣ ਡਿੱਗਿਐ। ਕਿਸਾਨੀ ਤੇ ਜਵਾਨੀ ਤਾਂ ਕਦੋਂ ਦੀ ਬੋਰਵੈੱਲ ’ਚ ਡਿੱਗੀ ਹੋਈ ਹੈ। ਬਾਬੇ ਨਾਨਕ ਦੇ ਕਿਰਤੀ ਰੋਟੀ ਤੋਂ ਮੁਥਾਜ ਨੇ। ਭਗਤ ਸਿੰਘ ਤੇ ਕਰਤਾਰ ਸਰਾਭੇ ਦੇਸ਼ ਦੀ ਪੱਗ ਲਈ ਸ਼ਹੀਦ ਹੋਏ। ਜਿਨ੍ਹਾਂ ਪੰਥ ਸਾਜਿਆ ਤੇ ਸਰਬੰਸ ਵਾਰਿਆ। ਹਾਕਮ ਘੱਟੋ ਘੱਟ ਉਨ੍ਹਾਂ ਦੀ ਲੱਜ ਰੱਖ ਲੈਂਦੇ। ਲੰਘੀ ਚੋਣ ’ਚ ਖੁਦ ਹੀ ਨਹੀਂ, ਪੁੱਤ ਵੀ ਐਮ.ਪੀ ਬਣਾ ਲਏ। ਛੇ ਸੂਬੇ ਹਨ ਜਿਥੇ ਪਹਿਲਾਂ ਪਿਓ ਤੇ ਫਿਰ ਪੁੱਤ ਮੁੱਖ ਮੰਤਰੀ ਬਣੇ। ਰਾਸ਼ਟਰ ਪਿਤਾ ਮਹਾਤਮਾ ਗਾਂਧੀ ਦੀ 150 ਸਾਲਾ ਜਨਮ ਸ਼ਤਾਬਦੀ ਦੀ ਤਿਆਰੀ ਸ਼ੁਰੂ ਹੈ। ਸਾਧਵੀ ਪ੍ਰਗਿਆ ਨੇ ਗੋਡਸੇ ਨੂੰ ਦੇਸ਼ ਭਗਤ ਐਲਾਨ ਦਿੱਤਾ ਸੀ। ਛੱਜੂ ਰਾਮ ਪੱਗ ਦੇ ਪੇਚ ਲਾਈ ਜਾ ਰਿਹੈ। ਨਾਲੇ ਬੋਲੀ ਜਾ ਰਿਹੈ, ਸਲਾਹ ਮੇਰੀ ਚੁੰਨੀ ਦੇ ਲੜ ਬੰਨ ਲਓ.. ਹੱਕਾਂ ਲਈ ਅੱਕ ਚੱਭਣੇ ਪੈਂਦੇ ਨੇ, ਬਾਕੀ ਥੋਡੀ ਮਰਜੀ।
     


Sunday, June 9, 2019

                             ਵਿਚਲੀ ਗੱਲ       
      ਹੁਣ ਨਹੀਂ  ਖੁੱਲ੍ਹਦਾ ਗਲੀ ਵਾਲਾ ਬੂਹਾ...
                             ਚਰਨਜੀਤ ਭੁੱਲਰ
ਬਠਿੰਡਾ : ਜਿੱਤ ਦਾ ਸਰੂਰ ਏਨਾ ਵੱਡਾ ਸੀ। ਵੱਡੇ ਬਾਦਲ ਤਾਂ ਗਰੂਰ ਕਰ ਬੈਠੇ। ਮਰਨਾ ਮੁਹੰਮਦ ਸਦੀਕ ਦਾ ਹੋ ਗਿਆ। ਜਦੋਂ ਵੱਡੇ ਬਾਦਲ ਖੁੱਲ੍ਹ ਕੇ ਹੱਸੇ। ਫਿਰ ਚਿੜੀ ਵਿਚਾਰੀ ਕਿਸ ਨੂੰ ਦੱਸੇ। ਸਦੀਕ ਨੇ ਦੋਹੇਂ ਹੱਥ ਜੋੜੇ ਨੇ। ਹੁਣ ਨਾ ਛੇੜੋ ਪੁਰਾਣੇ ਕਿੱਸੇ। ਉਦੋਂ ਸਦੀਕ ਦਾ ਪਹਿਲਾ ਭਾਸ਼ਨ ਸੀ। ਅੱਗਿਓ ਅਸੈਂਬਲੀ ’ਚ ਟੱਕਰੇ ਵੱਡੇ ਬਾਦਲ। ਇੱਕ ਫਨਕਾਰ ਨਾਲ ਜੋ ਫਿਰ ਹੋਇਆ, ਉਸ ਨੂੰ ਭੁੱਲਣਾ ਅੌਖੇ। ਮੁਹੰਮਦ ਸਦੀਕ ਆਪਣੀ ਸੀਟ ਤੋਂ ਉੱਠੇ। ਜੋਦੜੀ ਵੱਡੇ ਬਾਦਲਾਂ ਦੇ ਚਰਨਾਂ ’ਚ ਕੀਤੀ। ਪਹਿਲੀ ਵਾਰ ਚੁਣ ਕੇ ਆਇਆ। ਗਲਤੀ ਮਾਫ਼ ਕਰਨਾ। ਬਾਦਲ ਸਾਹਿਬ, ਤੁਸੀਂ ਗਰੀਬਾਂ ਦੇ ਮਸੀਹਾ ਹੋ। ਜਨਾਬ ਨੇ ਜੋ ਕੁੱਪ ਕਲਾਂ ’ਚ ਕਾਲਜ ਐਲਾਨਿਆ ਸੀ, ਉਹ ਕਦੋਂ ਬਣੂ। ਅੱਗਿਓਂ ਵੱਡੇ ਬਾਦਲ ਅੰਦਰੋਂ ਹੱਸੇ। ਛੱਡੋ ਜੀ, ਤੁਸੀਂ ਗਾਣਾ ਸੁਣਾਓ। ਸਦੀਕ ਕੀ ਜਾਣੇ, ਵੱਡਿਆਂ ਦੀਆਂ ਬਾਤਾਂ। ਸਦੀਕ ਨੇ ਲਾਈ ਹੇਕ ‘ ਭਾਰਤ ਹੈ ਇੱਕ ਮੁੰਦਰੀ, ਵਿਚ ਨਗ ਪੰਜਾਬ ਦਾ’। ਝੋਲੀ ’ਚ ਦਾਦ ਪਏਗੀ, ਸਦੀਕ ਦੀ ਇਹ ਭੁੱਲ ਸੀ। ਅੱਗਿਓਂ ਵੱਡੇ ਬਾਦਲ ਮਜ਼ਾਹੀਆ ਲਹਿਜੇ ’ਚ ਫ਼ਰਮਾਏ। ਜਾਖੜ ਸਾਹਿਬ, ਤੁਸੀਂ ਗਾਉਣ ਵਾਲਾ ਤਾਂ ਲੈ ਆਏ, ਹੁਣ ਇੱਕ ਵੈਣ ਪਾਉਣ ਵਾਲਾ ਵੀ ਲੈ ਆਓ। ਅਕਾਲੀ ਤਾੜੀ ਤੇ ਤਾੜੀ ਮਾਰ ਕੇ ਹੱਸੇ। ਸਦੀਕ ਦਾ ਦਿਲ ਰੋਇਆ ਤੇ ਪ੍ਰੋ. ਮੋਹਨ ਸਿੰਘ ਦੀ ਰੂਹ। ਗੱਲ ਇਹ 29 ਜੂਨ 2012 ਦੀ ਹੈ। ਉਦੋਂ ਪਹਿਲੀ ਵਾਰ ਸਦੀਕ ਐਮ.ਐਲ.ਏ ਬਣੇ ਸੀ। ਸਦੀਕ ਹੁਣ ਐਮ.ਪੀ ਬਣੇ ਹਨ। ਪਾਰਲੀਮੈਂਟ ਦਾ ਪਹਿਲਾ ਸੈਸ਼ਨ ਵੀ ਜੂਨ ’ਚ ਹੈ।
                ਸਦੀਕ ਤਾਂ ਸੋਚਦਾ ਹੋਊ, ਆਹ ਪਿੱਛਿਓ ਮੋਢੇ ’ਤੇ ਹੱਥ ਕਿਹਨੇ ਰੱਖਿਆ। ਸਦੀਕ ਸਾਹਿਬ, ਏਹ ਤਾਂ ਰੱਬ ਦਾ ਬੰਦੈ ਛੱਜੂ ਰਾਮ। ਸੁਣੋ ਜਰੂਰ ਇਹਦੀ, ਕਰਿਓ ਮਨ ਦੀ। ਛੱਜੂ ਰਾਮ ਦਾ ਮਸ਼ਵਰਾ ਸੁਣੋ, ‘ਸੱਜਣਾ, ਅਸੈਂਬਲੀ ਨੂੰ ਭੁੱਲਜਾ, ਹੁਣ ਪਾਰਲੀਮੈਂਟ ਚੱਲਿਐ, ਉਥੇ ਸਵਾ ਸ਼ੇਰ ਟੱਕਰਨਗੇ, ਕਿਤੇ ਫਿਰ ਨਾ ਭੁੱਲ ਕਰ ਬੈਠੀ। ‘ਤਾੜੀ ਤੇ ਤਾੜੀ’ ਵੱਜੂ। ਭਗਵੰਤ ਮਾਨ ਦੀ ਗੱਲ ਹੋਰ ਐ। ਤੂੰ ਝੱਗਾ ਚੌੜ ਨਾ ਕਰਾ ਬੈਠੀ। ਤਿਆਰੀ ਕਰਕੇ ਜਾਈਂ। ਅਗਲਿਆਂ ਮੁਲਕ ਚਾਰਿਐ, ਤੂੰ ਅਦਬ ਨਾ ਗੁਆ ਬੈਠੀ। ਜਿੱਤ ਦੇ ਗਰੂਰ ਦਾ ਸੁਆਦ ਅਸੈਂਬਲੀ ’ਚ ਦੇਖ ਹੀ ਚੁੱਕਿਐ। ਖੈਰ, ਨਿਆਣੇ ਬੁੱਢੇ ਹੋ ਗਏ, ਜਦੋਂ ਦਾ ਮੁਹੰਮਦ ਸਦੀਕ ਗਾਉਂਦੈ। ਦੋਗਾਣਿਆ ਦਾ ਬਾਦਸ਼ਾਹ ਹੈ। ਮਾਨ ਮਰਾੜਾਂ ਵਾਲੇ ਦੇ ਗੀਤ। ਮੁਹੰਮਦ ਸਦੀਕ ਤੇ ਬੀਬਾ ਰਣਜੀਤ ਕੌਰ ਦੀ ਜੋੜੀ। ਫਿਰ ਚੱਲ ਸੋ ਚੱਲ। ਲੋਕ ਰਾਜ ਦੇ ਚੌਥੇ ਥੰਮ ਤੋਂ ਚੇਤਾ ਆਇਐ। ਸਦੀਕ ਦੇ ਉਸ ਗੀਤ ਦਾ। ਜਦੋਂ ਟੈਲੀਵਿਜ਼ਨ ਟਾਵੇਂ ਟਾਵੇਂ ਘਰਾਂ ’ਚ ਪੁੱਜੇ ਸਨ। ‘ਮੈਨੂੰ ਟੈਲੀਵਿਜ਼ਨ ਲੈ ਦੇ ਵੇ, ਤਸਵੀਰਾਂ ਬੋਲਦੀਆਂ’, ਗੀਤ ਬੜਾ ਮਕਬੂਲ ਹੋਇਆ ਸੀ। ਟੈਲੀਵਿਜ਼ਨ ਨੂੰ ‘ਬੁੱਧੂ ਬਾਕਸ’ (ਇੰਡੀਅਟ ਬਾਕਸ) ਵੀ ਆਖਦੇ ਨੇ। ਜਦੋਂ ਦੌਰ ਸ਼ੁਰੂ ਹੋਇਐ, ਉਦੋਂ ਗੂੰਗੇ ਬੋਲੇ ਦੀ ਅਵਾਜ਼ ਰੇਡੀਓ ਤੇ ਟੈਲੀਵਿਜ਼ਨ ਸਨ। ‘ ਬੀਵੀ ਸੇ ਜਿਆਦਾ ਬੀ.ਬੀ.ਸੀ ਸੇ ਪਿਆਰ’ ਇਹ ਖ਼ਾਸ ਰੇਡੀਓ ਪ੍ਰਸ਼ਾਰਨ ਦੀ ਟੀਸੀ ਸੀ। ਅੱਸੀਂਵੇ ਦਹਾਕੇ ’ਚ ਚੱਲਦੇ ਹਾਂ। ਚੇਤੇ ਕਰਿਓ, ਕੋਠੇ ਚੜ ਐਨਟੀਨੇ ਨੂੰ ਹਿਲਾਉਣਾ। ਸਕਰੀਨ ਤੇ ਤਾਰਿਆਂ ਦਾ ਚਕਰਾਉਣਾ। ‘ਰਮਾਇਣ’ ਤੇ ‘ਮਹਾਂਭਾਰਤ’ ਦਾ ਆਉਣਾ। ‘ਬੁਨਿਆਦ’ ਤੇ ‘ਹਮ ਲੋਗ’ ਵਰਗੇ ਸੀਰੀਅਲ। ਜਿਨ੍ਹਾਂ ’ਚ ਸਚਾਈ ਨੂੰ ਨੇੜਿਓਂ ਪਾਉਣਾ।
                 ਸਭ ਕੁਝ ਹੁਣ ਬਦਲਿਐ ਹੈ। ਹੁਣ ਤਾਂ ਏਦਾਂ ਲੱਗਦੈ ਕਿ ਜਿਵੇਂ ਚੈਨਲਾਂ ਦਾ ਰਾਹ ਕੋਈ ਬਿੱਲੀ ਕੱਟ ਗਈ ਹੋਵੇ। ਮੁਲਕ ’ਚ ਅੱਜ 908 ਪ੍ਰਾਈਵੇਟ ਸੈਟੇਲਾਈਟ ਟੀ.ਵੀ ਚੈਨਲ ਹਨ ਜਿਨ੍ਹਾਂ ਦੀ ਮਾਲਕੀ 350 ਕੰਪਨੀਆਂ ਕੋਲ ਹੈ। ਬਹੁਤੇ ਚੈਨਲਾਂ ਤੇ ਕਾਬਜ਼ ਸਿਆਸੀ ਤੇ ਸਨਅਤੀ ਘਰਾਣੇ ਹਨ। ਇਸ ਜ਼ਮਾਨੇ ਦਾ ਵੱਡਾ ਮਸਲਾ ਟੀ.ਆਰ.ਪੀ (ਟੈਲੀਵਿਜ਼ਨ ਰੇਟਿੰਗ ਪੁਆਇੰਟ) ਹੈ। ‘ਬੁੱਧੂ ਬਕਸੇ’ ਨੇ ਤਾਂ ਹੱਦ ਹੀ ਕਰ ਦਿੱਤੀ ਐ। ਸੀਰੀਅਲ ਹੁਣ ਘਰਾਂ ਨੂੰ ਜੋੜਦੇ ਨਹੀਂ, ਤੋੜਦੇ ਹਨ। ਚੈਨਲਾਂ ਦੇ ਕੈਮਰੇ ਪੇਂਡੂ ਭਾਰਤ ਤੋਂ ਹਟੇ ਹਨ।  ਪੀ.ਸਾਈਨਾਥ ਫਿਰ ਵੀ ਕਿਸਾਨ ਘਰਾਂ ’ਚ ਗੇੜੇ ਮਾਰਦਾ ਫਿਰਦੈ। ਰਵੀਸ਼ ਕੁਮਾਰ ਵੀ ਕੱਲਾ ਹੀ ਕਾਫਲੇ ’ਚ ਨਿਕਲਿਐ। ਵਿਰੋਧੀ ਆਗੂਆਂ ਨੇ ਚੈਨਲਾਂ ਦਾ ਬਾਈਕਾਟ ਕੀਤੈ। ਕਦੇ ਪੰਜਾਬ ’ਚ ਵੀ ‘ਕੇਬਲ ਮਾਫੀਏ’ ਦਾ ਰੌਲਾ ਪੈਂਦਾ ਹੁੰਦਾ ਸੀ। ਮੁਹੰਮਦ ਸਦੀਕ ਦਾ ਗਾਣਾ। ‘ਮੈਨੂੰ ਟੈਲੀਵਿਜ਼ਨ ਲੈ ਦੇ ਵੇ, ਤਸਵੀਰਾਂ ਬੋਲਦੀਆਂ।’ ਅੱਜ ਜਚਦਾ ਨਹੀਂ। ਤਸਵੀਰਾਂ ਅੱਜ ਬੋਲਦੀਆਂ ਨਹੀਂ। ਕਿਸਾਨ ਮਰ ਰਿਹੈ, ਮਜ਼ਦੂਰ ਜਰ ਰਿਹੈ, ਜਵਾਨ ਲੜ ਰਿਹੈ, ਰੁਜ਼ਗਾਰ ਲਈ। ਤਸਵੀਰਾਂ ਕਿਉਂ ਚੁੱਪ ਨੇ। ਪੰਜਾਬ ਦਰਸ਼ਨ ਤਾਂ ਕਰਕੇ ਦੇਖਣ। ਟੈਂਕੀਆਂ ਨੇ ਕਿਉਂ ਚੜਨਾ ਪੈ ਰਿਹਾ ਹੈ। ਬੇਰੁਜ਼ਗਾਰ ਪੈਟਰੋਲ ਲੈ ਕੇ ਚੜ੍ਹੇ ਨੇ। ਮੁਲਾਜ਼ਮ ਤਨਖ਼ਾਹਾਂ ਲਈ ਅੜੇ ਨੇ। ਆਜ਼ਾਦੀ ਘੁਲਾਟੀਏ ਵੀ ਟੈਂਕੀਆਂ ਤੋਂ ਲੜੇ ਨੇ। ਨਰੇਗਾ ਮਜ਼ਦੂਰ ਵੀ ਟੈਕੀਂ ’ਤੇ ਖੜ੍ਹੇ ਨੇ। ਨਿੱਕੇ ਨਿੱਕੇ ਕੰਮਾਂ ਖਾਤਰ ਟੈਂਕੀ ’ਤੇ ਚੜ੍ਹਨਾ ਪੈਂਦੇ। ਤਸਵੀਰਾਂ ਫਿਰ ਵੀ ਕਿਉਂ ਨਹੀਂ ਬੋਲਦੀਆਂ। ਤਸਵੀਰਾਂ ਇਕਸੁਰ ਨੇ। ਕਿਸੇ ਨੇ ਵਸ ’ਚ ਕਰ ਲਿਆ ਹੈ।
               ਪੇਂਡੂ ਪੰਜਾਬ ’ਚ ਡੇਢ ਸਾਲ ਦੀ ਬੱਚੀ ਨਾਲ ਤੇ 80 ਸਾਲ ਦੀ ਬਜ਼ੁਰਗ ਨਾਲ ਵੀ ਜਬਰ ਜਨਾਹ ਹੋ ਰਿਹੈ, ਕੌਮੀ ਤਸਵੀਰਾਂ ਦੀ ਚੁੱਪ ਫਿਰ ਵੀ ਨਹੀਂ ਟੁੱਟਦੀ। ਤਸਵੀਰਾਂ ਬੋਲਦੀਆਂ ਨਹੀਂ। ਹੁਣ ਘੋਲਦੀਆਂ ਨੇ, ਜ਼ਰਖੇਜ਼ ਮਨਾਂ ’ਚ ਜ਼ਹਿਰ। ਫਿਰਕੂ ਤੇ ਨਫ਼ਰਤ ਦਾ ਏਨਾ ਕਹਿਰ। ਠੂਹਾਂ ਵੀ ਸ਼ਰਮਿੰਦਾ ਹੈ। ਚੈਨਲਾਂ ਵਾਲੇ ਡਰਾਉਂਦੇ ਨੇ। ਐਂਕਰ ਬਣੀਆਂ ਤਸਵੀਰਾਂ ਨਹੀਂ ਦੱਸਦੀਆਂ। ਕਿੰਨੇ ਲੀਡਰਾਂ ਦੇ ਪੁੱਤ ਸਰਹੱਦਾਂ ’ਤੇ ਸ਼ਹੀਦ ਹੋਏ ਨੇ। ਮਰਨਾ ਚਿੱੜੀਆਂ ਦੇ ਹਿੱਸੇ ਹੀ ਕਿਉਂ ਆਇਆ। ਅੌਹ, ਛੱਜੂ ਰਾਮ ਵੱਲ ਵੇਖੋ, ਟੀਵੀ ਵੇਖ ਰਿਹੈ, ਕੰਨਾਂ ’ਚ ਰੂੰ ਪਾਈ ਐ ਤੇ ਸਿਰ ’ਤੇ ਹੈਲਮਟ ਲਿਐ। ਦੇਖ ਰਿਹੈ, ਗੱਲਾਂ ਦੇ ਗਲੱਕੜ ਬਣਦੇ। ਇਕੱਲਾ ਛੱਜੂ ਰਾਮ ਨਹੀਂ, ਮੁਲਕ ਹੀ ਦਹਿਲਿਐ। ਬਨੂੜ ਦੇ ਲੋਕ ਜਗਰਾਤੇ ਦੇ ਬਣਾਉਟੀ ਸ਼ੇਰ ਤੋਂ ਐਵੇਂ ਡਰ ਡਰ ਕੇ ਨਹੀਂ ਲੰਘੇ, ਮਨਾਂ ’ਚ ਸਹਿਮ ਬੈਠੇ ਹੋਏ ਨੇ। ਕੋਈ ਤਾਂ ਮੁਹੱਬਤਾਂ ਦੀ ਬਾਤ ਪਾਓ। ਜੀਵਨ ਧਾਰਾ ਨੂੰ ਖੰਡਰ ਨਾ ਬਣਾਓ। ਅੱਗ ਕੱਢਣ ਲਈ ਨੇਤਾ ਬਹੁਤ ਨੇ, ਤਸਵੀਰਾਂ ਤਾਂ ਰਹਿਮ ਕਰਨ। ਇਨ੍ਹਾਂ ਤਸਵੀਰਾਂ ਦੇ ਪੰਜਾਬ ਪੈਰੀਂ ਡਿਗਿਐ। ਪਹਿਲਾਂ ਹੀ ਜ਼ਹਿਰਾਂ ਬਹੁਤ ਨੇ, ਤੁਸੀਂ ਤਾਂ ਬਖ਼ਸ਼ੋ। ਸਾਡੇ ਕੋਲ ਬੁੱਢਾ ਨਾਲਾ ਹੈ। ਜ਼ਹਿਰਾਂ ਵਾਲੀਆਂ ਨਹਿਰਾਂ ਨੇ। ਮਿੱਤਰ ਕੀੜੇ ਵੀ ਖੇਤਾਂ ’ਚ ਪੈਰ ਪਾਉਣੋਂ ਡਰਦੇ ਨੇ। ਗੀਤਕਾਰ ਤੇ ਦੁਨਾਲੀ ਚੁਕਾਉਣ ਵਾਲੇ ਗਾਇਕ ਵੀ ਨੇ। ਕੈਂਸਰ ਦੇ ਭੰਨਿਆ ਨੂੰ ਦਵਾਈ ਦਿਵਾਉਣ ਵਾਲੇ ਕੋਈ ਨਹੀਂ।
                ਏਦਾਂ ਜਾਪਦੈ ਜਿਵੇਂ ਜ਼ਿੰਦਗੀ ਹੀ ‘ਅਨਟਰੇਸ’ ਹੋ ਗਈ ਹੋਵੇ। ਜਿਉਣੇ ਮੌੜ ਦੇ ਵਾਰਸ ਲੇਲ੍ਹੜੀਆਂ ਕੱਢ ਰਹੇ ਨੇ। ਸੁੱਚੇ ਸੂਰਮੇ ਦੇ ਵਾਰਸ ਸਲਫਾਸ ਭਾਲਦੇ ਫਿਰਦੇ ਨੇ। ਦੁੱਲਾ ਜੱਟ ਸ਼ਾਹੂਕਾਰਾਂ ਦੇ ਪੈਰ ਫੜੀ ਬੈਠਾ ਹੈ। ਹਵਾ ਖੁਸ਼ਕ ਚੱਲ ਰਹੀ ਹੈ। ਮੁੰਡੇ ਜਹਾਜ਼ ਚੜ੍ਹੀ ਜਾਂਦੇ ਨੇ। ਪੰਜਾਬ ਦੇ ਰਾਖੇ ਸ਼ਾਇਰੋ ਸ਼ਾਇਰੀ ਕਰੀ ਜਾ ਰਹੇ ਨੇ। ਲੋਕ ਖ਼ਜ਼ਾਨਾ ਭਰੀ ਜਾ ਰਹੇ ਨੇ। ਛੱਜੂ ਰਾਮ ਨੇ ਟਿੱਚਰ ਕੀਤੀ ਐ ‘ਉੱਚਾ ਲੰਮਾ ਗੱਭਰੂ , ਪੱਲੇ ਠੀਕਰੀਆਂ।’ ਏਨਾ ਮਾੜਾ ਹਾਲ ਤਾਂ ਨਹੀਂ ਖ਼ਜ਼ਾਨੇ ਦਾ ਛੱਜੂ ਰਾਮਾ।  ਉਦੋਂ ਵੇਲਾ ਭਲਾ ਸੀ ਜਦੋਂ ਪ੍ਰੋ. ਮੋਹਨ ਸਿੰਘ ਨੇ ਰੰਗਲੇ ਪੰਜਾਬ ਦੀ ਵਡਿਆਈ ਕੀਤੀ, ‘ਭਾਰਤ ਹੈ ਇੱਕ ਮੁੰਦਰੀ, ਵਿਚ ਨਗ ਪੰਜਾਬ ਦਾ’। ਅਸੈਂਬਲੀ ’ਚ ਇਸ ਰਚਨਾ ਦੀ ਖਿੱਲੀ ਉਡਾਉਣ ਵਾਲੇ ਜਾਣੂ ਹਨ। ਤਾਹੀਂ ਮਨੋਂ ਮਨੀਂ ਆਖਦੇ ਨੇ, ਪ੍ਰੋਫੈਸਰ ਸਾਹਿਬ ਕਿਹੜੇ ਜ਼ਮਾਨੇ ਦੀ ਗੱਲ ਕਰਦੇ ਹੋ। ਬਾਬੂ ਸਿੰਘ ਮਾਨ ਮਰਾੜਾਂ ਵਾਲਾ ਵੀ ਸੋਚੀ ਜਾ ਰਿਹੈ..ਹੁਣ ਤਸਵੀਰਾਂ ਬਾਰੇ ਕੀ ਲਿਖਾਂ।


       



Friday, June 7, 2019

                          ਵੀਜ਼ੇ ਹੀ ਵੀਜ਼ੇ
    ਟਿੱਬਿਆਂ ’ਚ ਪਾਸਪੋਰਟਾਂ ਦੀ ਹਨੇਰੀ ! 
                         ਚਰਨਜੀਤ ਭੁੱਲਰ
ਬਠਿੰਡਾ : ਬਠਿੰਡਾ ਖ਼ਿੱਤੇ ਦੇ ਟਿੱਬਿਆਂ ’ਚ ਹੁਣ ਪਾਸਪੋਰਟਾਂ ਦੀ ਹਨੇਰੀ ਉੱਠੀ ਹੈ। ਏਦਾ ਜਾਪਦਾ ਹੈ ਜਿਵੇਂ ਸਟੱਡੀ ਵੀਜ਼ੇ ਲੈਣ ਲਈ ਸਭ ਤੋਂ ਵੱਧ ਕਾਹਲਾ ਬਠਿੰਡਾ ਹੋਵੇ। ਵਿਦੇਸ਼ ਪੜਾਈ ਲਈ ਸਟੱਡੀ ਵੀਜ਼ੇ ਦੀ ਸਫਲ ਦਰ ਕਿੰਨੀ ਹੈ, ਵੱਖਰਾ ਮਾਮਲਾ ਹੈ ਪਰ ਨਵੇਂ ਪਾਸਪੋਰਟ ਬਣਾਉਣ ’ਚ ਬਠਿੰਡਾ ਖ਼ਿੱਤੇ ਨੇ ਪੰਜਾਬ ਨੂੰ ‘ਹਟ ਪਿੱਛੇ’ ਆਖ ਦਿੱਤਾ ਹੈ। ਇਕੱਲੇ ਬਠਿੰਡਾ ਜ਼ਿਲ੍ਹੇ ’ਚ ਹੁਣ ਅੌਸਤਨ ਸਵਾ ਸੌ ਨਵੇਂ ਪਾਸਪੋਰਟ ਪ੍ਰਤੀ ਦਿਨ ਬਣ ਰਹੇ ਹਨ ਜਦੋਂ ਕਿ ਸਾਲ 2018 ਵਿਚ ਪ੍ਰਤੀ ਦਿਨ ਅੌਸਤਨ 109 ਪਾਸਪੋਰਟ ਬਣਦੇ ਸਨ। ਪਿਛਾਂਹ ਚੱਲੀਏ ਤਾਂ ਸਾਲ 2012 ਵਿਚ ਬਠਿੰਡਾ ਜ਼ਿਲ੍ਹੇ ਵਿਚ ਪ੍ਰਤੀ ਦਿਨ ਦੀ ਅੌਸਤਨ ਸਿਰਫ 26 ਪਾਸਪੋਰਟਾਂ ਦੀ ਰਹੀ ਸੀ। ਕੋਈ ਵੇਲਾ ਸੀ ਜਦੋਂ ਪਛੜੇ ਖ਼ਿੱਤੇ ਕਰਕੇ ਬਿਗਾਨੇ ਇੱਥੋਂ ਦੇ ਲੋਕਾਂ ਨੂੰ ‘ਵਾਇਆ ਬਠਿੰਡਾ’ ਆਖ ਕੇ ਛੇੜਦੇ ਹੁੰਦੇ ਸਨ। ਹੁਣ ਵਿੱਦਿਅਕ ਤਰੱਕੀ ਅਤੇ ਪ੍ਰਵਾਸ ਦੇ ਰੁਝਾਨ ਨੇ ਬਿਗਾਨਿਆਂ ਦੀ ਮੜਕ ਭੰਨ ਦਿੱਤੀ ਹੈ। ਪੰਜਾਬ ’ਚ ਬਠਿੰਡਾ ਖ਼ਿੱਤਾ ਹੋਣ ਨਵੇਂ ਪਾਸਪੋਰਟ ਬਣਾਉਣ (ਰੀਨਿਊ ਸਮੇਤ) ’ਚ ਝੰਡੀ ਲੈਣ ਲੱਗਾ ਹੈ। ਪੰਜਾਬ ਪੁਲੀਸ ਤੋਂ ਸੂਚਨਾ ਦੇ ਅਧਿਕਾਰ ਕਾਨੂੰਨ ਤਹਿਤ ਜੋ ਵੇਰਵੇ ਮਿਲੇ ਹਨ, ਉਨ੍ਹਾਂ ਅਨੁਸਾਰ ਮਾਲਵਾ ਖ਼ਿੱਤੇ ਵਿਚ ਪਾਸਪੋਰਟ ਬਣਾਉਣ ਦਾ ਰੁਝਾਨ ਸਾਲ 2016 ਮਗਰੋਂ ਤੇਜ਼ੀ ਨਾਲ ਵਧਿਆ ਹੈ। ਸਭ ਤੋਂ ਵੱਧ ਨਵੇਂ ਪਾਸਪੋਰਟ ਸਟੱਡੀ ਵੀਜ਼ੇ ਵਾਲੇ ਮੁੰਡੇ ਬਣਾ ਰਹੇ ਹਨ।
                 ਬਠਿੰਡਾ ਜ਼ਿਲ੍ਹੇ ਵਿਚ ਸਾਲ 2014 ਤੋਂ ਫਰਵਰੀ 2019 ਤੱਕ 1.21 ਲੱਖ ਨਵੇਂ ਪਾਸਪੋਰਟ ਬਣੇ ਹਨ ਜਿਨ੍ਹਾਂ ਦੀ ਵੈਰੀਫਿਕੇਸ਼ਨ ਪੁਲੀਸ ਨੇ ਕੀਤੀ ਹੈ। ਇਸ ਕੈਲੰਡਰ ਵਰੇ੍ਹ ਦੇ ਪਹਿਲੇ ਡੇਢ ਮਹੀਨੇ ’ਚ 5627 ਨਵੇਂ ਪਾਸਪੋਰਟ ਬਣੇ ਹਨ ਜਿਸ ਦਾ ਮਤਲਬ ਹੈ ਕਿ ਰੋਜ਼ਾਨਾ 125 ਪਾਸਪੋਰਟ ਬਣੇ ਹਨ। ਸਾਲ 2018 ਵਿਚ ਇਸ ਜ਼ਿਲ੍ਹੇ ਵਿਚ 39891 ਪਾਸਪੋਰਟ ਬਣੇ ਹਨ ਜਦੋਂ ਕਿ ਸਾਲ 2017 ਵਿਚ 27716 ਪਾਸਪੋਰਟ ਬਣੇ ਸਨ। ਇਵੇਂ ਸਾਲ 2016 ਵਿਚ 17329 ਤੇ ਸਾਲ 2012 ਵਿਚ ਸਿਰਫ਼ 9684 ਪਾਸਪੋਰਟ ਬਣੇ ਸਨ। ਲੰਘੇ ਛੇ ਵਰ੍ਹਿਆਂ ਵਿਚ ਇਸ ਜ਼ਿਲ੍ਹੇ ਦੇ ਲੋਕਾਂ ਨੇ ਪਾਸਪੋਰਟ ਬਣਾਉਣ ’ਤੇ 18.15 ਕਰੋੜ ਰੁਪਏ ਖਰਚ ਕੀਤੇ ਹਨ। ਸਾਲ 2018 ਤੋਂ ਬਠਿੰਡਾ ਜ਼ਿਲ੍ਹੇ ਦੇ ਦੁਆਬੇ ਨੂੰ ਇਸ ਮਾਮਲੇ ਵਿਚ ਪਿਛਾਂਹ ਛੱਡ ਦਿੱਤਾ ਹੈ।ਨਵਾਂ ਸ਼ਹਿਰ ਵਿਚ ਇਸ ਕੈਲੰਡਰ ਵਰੇ੍ਹ ਦੇ ਡੇਢ ਮਹੀਨੇ ਵਿਚ 4148 ਪਾਸਪੋਰਟ ਬਣੇ ਹਨ ਜਦੋਂ ਕਿ ਸਾਲ 2018 ਵਿਚ 34315 ਪਾਸਪੋਰਟ ਬਣੇ ਸਨ ਜਦੋਂ ਕਿ ਬਠਿੰਡਾ ਜ਼ਿਲ੍ਹੇ ਵਿਚ 39891 ਬਣੇ ਹਨ। ਬਠਿੰਡਾ ਦੀ ਅਜੀਤ ਰੋਡ ਤਾਂ ਹੁਣ ‘ਆਈਲੈੱਟਸ’ ਦੀ ਰਾਜਧਾਨੀ ਬਣ ਗਈ ਹੈ। ਇੱਥੋਂ ਤੱਕ ਕਿ ਹੁਣ ਛੋਟੇ ਸ਼ਹਿਰਾਂ ਵਿਚ ਵੀ ਆਈਲੈੱਟਸ ਸੈਂਟਰਾਂ ਦਾ ਹੜ ਆ ਗਿਆ ਹੈ।
                ਨਰਮਾ ਪੱਟੀ ਦਾ ਕਿਸਾਨ ਖੇਤੀ ਵਿਚ ਟੁੱਟਿਆ ਹੈ। ਬੱਚਿਆਂ ਲਈ ਰੁਜ਼ਗਾਰ ਦੇ ਮੌਕੇ ਕਿਧਰੋਂ ਲੱਭਦੇ ਦਿਖਦੇ ਨਹੀਂ। ਜ਼ਮੀਨਾਂ ਵੇਚ ਕੇ ਸਟੱਡੀ ਵੀਜ਼ੇ ਲੈਣ ਨੂੰ ਵੀ ਕਿਸਾਨ ਖੇਤੀ ਨਾਲੋਂ ਚੰਗਾ ਸਮਝਣ ਲੱਗਾ ਹੈ। ਫਰੀਦਕੋਟ ਛੋਟਾ ਜ਼ਿਲ੍ਹਾ ਹੈ ਜਿਥੇ ਸਾਲ 2014 ਤੋਂ 15 ਫਰਵਰੀ 2019 ਤੱਕ 75429 ਨਵੇਂ ਪਾਸਪੋਰਟ (ਸਮੇਤ ਰੀਨਿਊ) ਬਣੇ ਹਨ। ਵਰ੍ਹਾ 2012 ਵਿਚ ਫਰੀਦਕੋਟ ਜ਼ਿਲ੍ਹੇ ਵਿਚ ਸਿਰਫ਼ 4639 ਪਾਸਪੋਰਟ ਬਣੇ ਸਨ ਜਦੋਂ ਕਿ ਸਾਲ 2018 ਦੇ ਇੱਕੋ ਵਰੇ੍ਹ ’ਚ ਇਸ ਜ਼ਿਲ੍ਹੇ ’ਚ 23,655 ਪਾਸਪੋਰਟ ਬਣੇ ਹਨ।  ਫਰੀਦਕੋਟ ਜ਼ਿਲ੍ਹੇ ’ਚ ਸਾਲ 2012 ਵਿਚ ਅੌਸਤਨ ਸਿਰਫ਼ 13 ਪਾਸਪੋਰਟ ਪ੍ਰਤੀ ਦਿਨ ਬਣਦੇ ਸਨ ਜਦੋਂ ਕਿ ਸਾਲ 2018 ਵਿਚ ਇਹ ਦਰ ਪ੍ਰਤੀ ਦਿਨ 65 ਦੀ ਹੋ ਗਈ ਹੈ। ਇਨ੍ਹਾਂ ਛੇ ਵਰ੍ਹਿਆਂ ’ਚ ਫਰੀਦਕੋਟ ਦੇ ਲੋਕਾਂ ਨੇ 11.16 ਕਰੋੜ ਰੁਪਏ ਨਵੇਂ ਪਾਸਪੋਰਟਾਂ ਦੀ ਇਕੱਲੀ ਫੀਸ ਤਾਰੀ ਹੈ।
                ਸਰਹੱਦੀ ਜ਼ਿਲ੍ਹਾ ਫਿਰੋਜ਼ਪੁਰ ਵੀ ਪਿਛੇ ਨਹੀਂ। ਛੇ ਵਰ੍ਹਿਆਂ ’ਚ ਇਸ ਜ਼ਿਲ੍ਹੇ ’ਚ 86,129 ਪਾਸਪੋਰਟ ਬਣੇ ਹਨ। ਇਕੱਲੇ ਸਾਲ 2018 ਵਿਚ ਫਿਰੋਜ਼ਪੁਰ ਜ਼ਿਲ੍ਹੇ ’ਚ 28,868 ਪਾਸਪੋਰਟ ਬਣੇ ਹਨ ਜਿਸ ਦਾ ਮਤਲਬ ਪ੍ਰਤੀ ਦਿਨ 79 ਪਾਸਪੋਰਟ ਬਣੇ। ਸਾਲ 2012 ਵਿਚ ਇਸ ਜ਼ਿਲ੍ਹੇ ਵਿਚ ਸਿਰਫ਼ 6124 ਪਾਸਪੋਰਟ ਬਣੇ ਸਨ। ਸਾਲ 2016 ਵਿਚ 9445  ਅਤੇ ਸਾਲ 2017 ਵਿਚ 25,329 ਪਾਸਪੋਰਟ ਬਣੇ। ਇਸ ਜ਼ਿਲ੍ਹੇ ਨੇ 12.91 ਨਵੇਂ ਪਾਸਪੋਰਟਾਂ ਦੀ ਛੇ ਸਾਲਾਂ ’ਚ ਫੀਸ ਭਰੀ। ਦੁਆਬੇ ਦੇ ਜ਼ਿਲ੍ਹਾ ਨਵਾਂ ਸ਼ਹਿਰ ਵਿਚ ਲੰਘੇ ਛੇ ਵਰ੍ਹਿਆਂ ਵਿਚ 1.38 ਲੱਖ ਨਵੇਂ ਪਾਸਪੋਰਟ ਬਣੇ ਹਨ। ਮੌਜੂਦਾ ਵਰੇ੍ਹ ਦੀ ਪ੍ਰਤੀ ਦਿਨ ਅੌਸਤਨ ਇਸ ਜ਼ਿਲ੍ਹੇ ਦੀ 92 ਪਾਸਪੋਰਟਾਂ ਦੀ ਨਿਕਲੀ ਹੈ ਜਦੋਂ ਕਿ ਸਾਲ 2012 ਵਿਚ ਇਹ ਦਰ 35 ਪਾਸਪੋਰਟਾਂ ਦੀ ਸੀ।
               ਕੇਂਦਰ ਸਰਕਾਰ ਨੇ ਨਵੇਂ ਰੁਝਾਨ ਦੇ ਮੱਦੇਨਜ਼ਰ ਪੰਜਾਬ ਦੇ ਅੱਠ ਸ਼ਹਿਰਾਂ ਵਿਚ ‘ਪੋਸਟ ਆਫਿਸ ਪਾਸਪੋਰਟ ਸੇਵਾ ਕੇਂਦਰ’ ਖੋਲ੍ਹ ਦਿੱਤੇ ਹਨ ਜਿਨ੍ਹਾਂ ਵਿਚ ਬਠਿੰਡਾ, ਸੰਗਰੂਰ, ਪਟਿਆਲਾ, ਮੋਗਾ,ਤਰਨਤਾਰਨ,ਫਗਵਾੜਾ,ਨਵਾਂ ਸ਼ਹਿਰ ਤੇ ਗੁਰਦਾਸਪੁਰ ਸ਼ਾਮਿਲ ਹੈ। ਪੰਜਾਬ ਵਿਚ ਹੁਣ ਸਟੱਡੀ ਵੀਜ਼ੇ ਦਾ ਵੱਡਾ ਬਿਜਨਿਸ਼ ਖੜ੍ਹਾ ਹੋ ਗਿਆ ਹੈ। ਨਵੇਂ ਪਾਸਪੋਰਟ ਦੀ ਫੀਸ ਜੋ ਪਹਿਲਾਂ ਇੱਕ ਹਜ਼ਾਰ ਰੁਪਏ ਸੀ, ਉਹ ਕਾਫ਼ੀ ਵਰ੍ਹੇ ਪਹਿਲਾਂ ਵਧ ਕੇ 1500 ਰੁਪਏ ਹੋ ਗਈ ਹੈ। ਪੁਲੀਸ ਦਾ ਵੀ ਬਹੁਤਾ ਸਮਾਂ ਹੁਣ ਨਵੇਂ ਪਾਸਪੋਰਟਾਂ ਦੀ ਵੈਰੀਫਿਕੇਸ਼ਨ ਵਿਚ ਲੰਘਦਾ ਹੈ।       
                                                  ਪੇਂਡੂ ਮਾਲਵੇ ’ਚ ਕਾਹਲ ਵਧੀ : ਸੰਘਾ
ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਦੇ ਪ੍ਰਿੰਸੀਪਲ ਤੇ ਸੈਨੇਟ ਮੈਂਬਰ ਡਾ. ਐੱਸ.ਐੱਸ.ਸੰਘਾ ਦਾ ਪ੍ਰਤੀਕਰਮ ਸੀ ਕਿ ਪੇਂਡੂ ਮਾਲਵੇ ’ਚ ਹੁਣ ਵਿਦੇਸ਼ ਪੜਾਈ ਦਾ ਰੁਝਾਨ ਤੇਜ਼ੀ ਨਾਲ ਵਧਿਆ ਹੈ। ਪਾਸਪੋਰਟਾਂ ਦੇ ਅੰਕੜੇ ’ਚ ਇਜਾਫਾ ਇਸੇ ਵਜ੍ਹਾ ਕਰਕੇ ਹੈ। ਜਵਾਨੀ ਸਟੱਡੀ ਵੀਜ਼ੇ ਚੋਂ ਭਵਿੱਖ ਤਲਾਸ਼ਣ ਲੱਗੀ ਹੈ ਅਤੇ ਮਾਪਿਆਂ ਨੂੰ ਵੀ ਹੋਰ ਕੋਈ ਰਾਹ ਨਹੀਂ ਦਿੱਖ ਰਿਹਾ ਹੈ।
   
                   


Thursday, June 6, 2019

                                               ਪਾਵਰ ਦਾ ਸੌਦਾ
            ਬਠਿੰਡਾ ’ਚ ‘ਕਲੀਨ ਚਿੱਟ’ ਘਪਲਾ ! 
                                               ਚਰਨਜੀਤ ਭੁੱਲਰ
ਬਠਿੰਡਾ : ਪਾਵਰਕੌਮ ਦੀ ਬਠਿੰਡਾ ਲੈਬ ’ਚ ‘ਕਲੀਨ ਚਿੱਟ’ ਘਪਲੇ ਦਾ ਧੂੰਆਂ ਉੱਠਿਆ ਹੈ ਜਿਸ ਤੋਂ ਅਫਸਰਾਂ ਨੂੰ ਭਾਜੜ ਪੈ ਗਈ ਹੈ। ਪਾਵਰਕੌਮ ਦੀ ਐਮ.ਈ (ਮੀਟਰਿੰਗ ਇੰਕੂਅਪ) ਲੈਬ ’ਚ ਕਿਵੇ ਅਫਸਰ/ਮੁਲਾਜ਼ਮ ਸੌਦੇਬਾਜ਼ੀ ਨਾਲ ਗੜਬੜ ਵਾਲੇ ਮੀਟਰਾਂ ਨੂੰ ਕਲੀਨ ਚਿੱਟ ਦਿੰਦੇ ਸਨ, ਇਹ ਸਭ ਇੱਕ ਆਡੀਓ ਸੀਡੀ ਨੇ ਬੇਪਰਦ ਕੀਤਾ ਹੈ। ਪਾਵਰਕੌਮ ਦੇ ਨਿਗਰਾਨ ਇੰਜੀਨੀਅਰ (ਐਮ.ਈ) ਜਲੰਧਰ ਦੀ ਟੀਮ ਨੇ ਅੱਜ ਬਠਿੰਡਾ ਦੀ ਐਮ.ਈ ਲੈਬ ਵਿਚ ਛਾਪਾ ਮਾਰਿਆ ਜਿਸ ਤੋਂ ਘਪਲੇ ਦੀ ਪੈੜ ਨੱਪੀ ਗਈ ਹੈ। ਪਾਵਰਕੌਮ ਇਸ ਗੱਲੋਂ ਫਿਕਰਮੰਦ ਹੋਇਆ ਹੈ ਕਿ ਕਿਤੇ ਇਸ ਘਪਲੇ ਦੀ ਲਪੇਟ ’ਚ ਪੂਰਾ ਪੰਜਾਬ ਹੀ ਨਾ ਹੋਵੇ। ਪਾਵਰਕੌਮ ਦੇ ਖ਼ਜ਼ਾਨੇ ਨੂੰ ਵੱਡਾ ਮਾਲੀ ਰਗੜਾ ਲੱਗਣ ਦਾ ਖ਼ਦਸ਼ਾ ਵੀ ਹੈ। ਨਿਗਰਾਨ ਇੰਜਨੀਅਰ ਜਲੰਧਰ ਨੇ ਅੱਜ ਕਰੀਬ ਛੇ ਘੰਟੇ ਬਠਿੰਡਾ ਲੈਬ ਵਿਚ ਪੜਤਾਲ ਕੀਤੀ ਅਤੇ ਲੈਬ ਦੇ ਇੰਚਾਰਜ ਅਫਸਰਾਂ ਅਤੇ ਮੁਲਾਜ਼ਮਾਂ ਦੇ ਬਿਆਨ ਵੀ ਕਲਮਬੱਧ ਕੀਤੇ। ਦੱਸਣਯੋਗ ਹੈ ਕਿ ਪਾਵਰਕੌਮ ਦੇ ਪੱਛਮੀ ਜ਼ੋਨ ਵਿਚ ਐਮ.ਈ ਲੈਬ ਦੀ ਇੱਕੋ ਬਠਿੰਡਾ ਡਵੀਜ਼ਨ ਹੈ। ਪੱਛਮੀ ਜ਼ੋਨ ਦੇ ਮੀਟਰਾਂ ਦੀ ਜਾਂਚ ਦਾ ਕੰਮ ਬਠਿੰਡਾ ਵਿਚ ਹੁੰਦਾ ਹੈ। 
            ਪਾਵਰਕੌਮ ਦੇ ਅਫਸਰਾਂ ਤੇ ਮੁਲਾਜਮਾਂ ਵੱਲੋਂ ਜੋ ਬਿਜਲੀ ਚੋਰੀ ਅਤੇ ਖਰਾਬ ਮੀਟਰ ਉਤਾਰੇ ਜਾਂਦੇ ਹਨ, ਉਨ੍ਹਾਂ ਦੀ ਚੈਕਿੰਗ ਇਸ ਲੈਬ ਵਿਚ ਕੀਤੀ ਜਾਂਦੀ ਹੈ। ਐਮ.ਈ ਲੈਬ ਬਠਿੰਡਾ ਦੇ ਕਾਰਜਕਾਰੀ ਇੰਜਨੀਅਰ ਸ੍ਰੀ ਵਿਕਾਸ ਗਰਗ ਨੇ ਦੱਸਿਆ ਕਿ ਅੱਜ ਜੋ ਚੈਕਿੰਗ ਟੀਮ ਆਈ ਸੀ, ਉਨ੍ਹਾਂ ਤਰਫ਼ੋਂ ਜੋ ਪੁੱਛਿਆ ਗਿਆ, ਉਸ ਬਾਰੇ ਬਿਆਨ ਦਰਜ ਕਰਾ ਦਿੱਤੇ ਗਏ ਹਨ। ਵੇਰਵਿਆਂ ਅਨੁਸਾਰ ਕੁਝ ਦਿਨ ਪਹਿਲਾਂ ਨਿਗਰਾਨ ਇੰਜਨੀਅਰ ਜਲੰਧਰ ਨੂੰ ਇੱਕ ਰਜਿਸਟਰਡ ਡਾਕ ਰਾਹੀਂ ਇੱਕ ਗੁਪਤ ਪੱਤਰ ਤੇ ਆਡੀਓ ਸੀਡੀ ਪ੍ਰਾਪਤ ਹੋਈ ਸੀ ਜਿਸ ਵਿਚ ਐਮ.ਈ ਲੈਬ ਦੇ ਇੱਕ ਜੂਨੀਅਰ ਇੰਜਨੀਅਰ ਵੱਲੋਂ ਪ੍ਰਾਈਵੇਟ ਮੀਟਰ ਰੀਡਰ ਨਾਲ ਸੌਦੇਬਾਜ਼ੀ ਕੀਤੀ ਜਾ ਰਹੀ ਹੈ। ਸੌਦੇਬਾਜ਼ੀ ਮਾਲਵਾ ਖ਼ਿੱਤੇ ਦੇ ਕਈ ਸ਼ਹਿਰਾਂ ਚੋਂ ਉਤਾਰੇ ਮੀਟਰਾਂ ਦੀ ਚੱਲ ਰਹੀ ਹੈ ਜੋ ਬਿਜਲੀ ਚੋਰੀ ਦੇ ਸ਼ੱਕ ਵਿਚ ਉਤਾਰੇ ਗਏ ਸਨ। ਸੀਡੀ ਵਿਚ ਜੇਈ ਵੱਲੋਂ ਪ੍ਰਤੀ ਮੀਟਰ ਭਾਅ ਤੈਅ ਕੀਤਾ ਜਾ ਰਿਹਾ ਸੀ। ਇਸ ਗੱਲਬਾਤ ਅਨੁਸਾਰ ਬਠਿੰਡਾ ਦੀ ਐਮਈ ਲੈਬ ਵਿਚ ਗੜਬੜ ਵਾਲੇ ਮੀਟਰ ਨੂੰ ‘ਕਲੀਨ ਚਿੱਟ’ ਦੇ 25 ਤੋਂ 30 ਹਜ਼ਾਰ ਰੁਪਏ ਪ੍ਰਤੀ ਮੀਟਰ ਲਏ ਜਾਂਦੇ ਹਨ।
             ਇੱਥੋਂ ਤੱਕ ਕਿ ਲੈਬ ਦੇ ਮੁਲਾਜ਼ਮ ‘ਹੋਮ ਸਰਵਿਸ’ ਵੀ ਦਿੰਦੇ ਸਨ। ਨਾਰਮਲ ਮੀਟਰ ਨੂੰ ਤੇਜ ਚੱਲਦਾ ਦਿਖਾਉਣ ਦੇ 20 ਹਜ਼ਾਰ ਰੁਪਏ ਲਏ ਜਾਂਦੇ ਹਨ ਜਿਸ ਨਾਲ ਖਪਤਕਾਰ ਨੂੰ ਬਿਲ ਭਰਨ ਦੀ ਰਕਮ ਵਿਚ ਛੋਟ ਮਿਲ ਜਾਂਦੀ ਹੈ। ਬਠਿੰਡਾ ਦੇ ਅਰਬਨ ਅਸਟੇਟ ਦੇ ਇੱਕ ਗੜਬੜ ਵਾਲੇ ਮੀਟਰ ਦੀ ਰਿਸ਼ਵਤ ਕਰੀਬ 2 ਲੱਖ ਰੁਪਏ ਤੱਕ ਵੀ ਮੰਗੀ ਗਈ ਹੈ। ਭਾਵੇਂ ਇਸ ਦੋ ਨੰਬਰ ਦੇ ਧੰਦੇ ਵਿਚ ਕਿੰਨੇ ਵੀ ਮੁਲਾਜ਼ਮਾਂ ਦੀ ਸ਼ਮੂਲੀਅਤ ਹੋਵੇ ਪੰ੍ਰੰਤੂ ਸਮੁੱਚੀ ਲੈਬ ਦੇ ਪ੍ਰਬੰਧਕ ਵੀ ਸ਼ੱਕ ਦੇ ਘੇਰੇ ਵਿਚ ਆ ਗਏ ਹਨ। ਬਠਿੰਡਾ ਲੈਬ ਵਿਚ ਇੱਕ ਐਕਸੀਅਨ ਤੋਂ ਇਲਾਵਾ 4 ਜੂਨੀਅਰ ਇੰਜਨੀਅਰ, ਇੱਕ ਲੇਖਾਕਾਰ, ਦੋ ਐਲਡੀਸੀ ਦੀ ਤਾਇਨਾਤੀ ਹੈ। ਲੈਬ ਦੇ ਸਟਾਫ ਦਾ ਕਹਿਣਾ ਹੈ ਕਿ ਕੰਮ ਬਹੁਤ ਜਿਆਦਾ ਹੈ ਜਦੋਂ ਕਿ ਸਟਾਫ ਘੱਟ ਹੈ। ਅੱਜ ਛਾਪੇਮਾਰੀ ਮੌਕੇ ਪਾਵਰਕੌਮ ਦੇ ਐਨਫੋਰਸਮੈਂਟ ਦੇ ਦੋ ਕਾਰਜਕਾਰੀ ਇੰਜਨੀਅਰਾਂ ਨੂੰ ਵੀ ਮੌਕੇ ਤੇ ਸੱਦਿਆ ਗਿਆ ਕਿਉਂਕਿ ਐਨਫੋਰਸਮੈਂਟ ਵੱਲੋਂ ਹੀ ਗੜਬੜ ਵਾਲੇ ਮੀਟਰ ਖਾਸ ਕਰਕੇ ਲੈਬ ਵਿਚ ਭੇਜੇ ਜਾਂਦੇ ਹਨ।
            ਸੂਤਰ ਦੱਸਦੇ ਹਨ ਕਿ ਇੱਕ ਦੋ ਦਿਨਾਂ ਵਿਚ ਇਸ ਦੀ ਰਿਪੋਰਟ ਤੇ ਐਕਸ਼ਨ ਬਾਹਰ ਆਉਣ ਦੀ ਉਮੀਦ ਹੈ। ਪੱਛਮੀ ਜ਼ੋਨ ਦੇ ਐਨਫੋਰਸਮੈਂਟ ਦੇ ਨਿਗਰਾਨ ਇੰਜਨੀਅਰ ਸ੍ਰੀ ਸੁਰੇਸ਼ ਗਰਗ ਦਾ ਕਹਿਣਾ ਸੀ ਕਿ ਪੜਤਾਲੀਆਂ ਅਫਸਰ ਨੇ ਅੱਜ ਉਨ੍ਹਾਂ ਦੇ ਐਕਸੀਅਨਾਂ ਦੀ ਵੀ ਪੜਤਾਲ ਵਿਚ ਮਦਦ ਲਈ ਹੈ ਅਤੇ ਪੜਤਾਲ ਨੂੰ ਪੂਰੀ ਤਰ੍ਹਾਂ ਗੁਪਤ ਰੱਖਿਆ ਗਿਆ ਹੈ। 
                               ਰਿਕਾਰਡ ਕਬਜ਼ੇ ’ਚ ਲਿਆ ਹੈ : ਭਾਰਦਵਾਜ 
ਪਾਵਰਕੌਮ ਦੇ ਨਿਗਰਾਨ ਇੰਜਨੀਅਰ (ਐਮ.ਈ ਲੈਬ) ਜਲੰਧਰ ਸ੍ਰੀ ਰਾਜ਼ੇਸ ਕੁਮਾਰ ਭਾਰਦਵਾਜ ਦਾ ਕਹਿਣਾ ਸੀ ਕਿ ਅੱਜ ਬਠਿੰਡਾ ਲੈਬ ਦਾ ਸਬੰਧਿਤ ਰਿਕਾਰਡ ਕਬਜ਼ੇ ਵਿਚ ਲਿਆ ਹੈ ਅਤੇ ਅਧਿਕਾਰੀਆਂ ਦੇ ਬਿਆਨ ਵੀ ਕਲਮਬੱਧ ਕੀਤੇ ਗਏ ਹਨ। ਕੁਝ ਊਣਤਾਈਆਂ ਸਾਹਮਣੇ ਆਈਆਂ ਹਨ ਅਤੇ ਦੋ ਤਿੰਨ ਦਿਨਾਂ ਵਿਚ ਉਹ ਉੱਚ ਅਧਿਕਾਰੀਆਂ ਨੂੰ ਆਪਣੀ ਰਿਪੋਰਟ ਸੌਂਪ ਦੇਣਗੇ। ਉਨ੍ਹਾਂ ਵਿਸਥਾਰ ਦੇਣ ਤੋਂ ਇਨਕਾਰ ਕੀਤਾ।

                     


Sunday, June 2, 2019

                        ਵਿਚਲੀ ਗੱਲ  
           ਢੋਲੇ ਦੀਆਂ ਲਾ ਬੰਦਿਆ...         
                        ਚਰਨਜੀਤ ਭੁੱਲਰ
ਬਠਿੰਡਾ : ਇੰਤਜ਼ਾਰ ਤਾਂ ਥੋੜਾ ਕਰੋ। ਬੇਚੈਨ ਨਹੀਂ ਹੋਣਾ, ਕਾਹਲੇ ਨਹੀਂ ਪੈਣਾ। ਡਰ ਭੈਅ ਕਾਹਦਾ, ਸਭ ਕਿਆਸ ਫਜ਼ੂਲ ਨੇ। ਭਖੇ ਜਿਆਦਾ ਹੋ, ਠੰਢੇ ਪਾਣੇ ਦੇ ਛਿੱਟੇ ਮਾਰੋ। ਬਿਰਾਜਮਾਨ ਤਾਂ ਕੁਰਸੀ ’ਤੇ ਹੋ ਲੈਣ ਦਿਓ। ਈਸ਼ਵਰ ਦੀ ਸਹੁੰ ਤੋਂ ਵੱਡਾ ਕੁਝ ਨਹੀਂ ਹੁੰਦਾ। ਸ਼ਰਧਾ ਸੰਵਿਧਾਨ ਦੀ ਵੀ ਛੋਟੀ ਨਹੀਂ। ਜਸ਼ਨ ਤੇ ਟਸ਼ਨ ਹੁਣੇ ਖਤਮ ਹੋਏ ਨੇ। ਨਰਿੰਦਰ ਮੋਦੀ ਇਕੱਲਾ ਨਹੀਂ। 57 ਮੰਤਰੀ ਵੀ ਹੁਣ ਊਰੀ ਵਾਂਗੂ ਘੁੰਮਣਗੇ। ਤੁਸੀਂ ਨਾ ਠੇਡੇ ਖਾਓਗੇ ਤੇ ਨਾ ਠੋਕਰਾਂ। ਸਹੁੰ ਜੋ ਸੱਚੀ ਉਨ੍ਹਾਂ ਖਾਧੀ ਹੈ। ਭਰੋਸਾ ਤਾਂ ਕਰੋ, ਸਿਰਫ਼ ਸੌ ਦਿਨ ਦਿਓ। ਨਵਾਂ ਭਾਰਤ ਬਣੇਗਾ। ਥੋਡੇ ਖਿਆਲਾਂ ਦਾ ਦੇਸ਼। ਵਕਤ ਤਾਂ ਦਿਓ, ਕੋਈ ਕਸਰ ਰਹੀ, ਫਿਰ ਉਲਾਂਭਾ ਦੇਣਾ। ਦਿਲ ਜੋ ਵੀ ਕਰਦੈ, ਖਾਓ ਪੀਓ। ਪਹਿਨੋ ਜੋ ਮਨ ਕਰਦੈ। ਸਾਨੂੰ ਹੁਣ ਕੰਮ ਕਰਨ ਦਿਓ। ਅਮਿਤ ਸਾਹ ਨਵੇਂ ਗ੍ਰਹਿ ਮੰਤਰੀ ਬਣੇ ਨੇ। ਇਕੱਲੇ ਨਾਮ ਦੇ ਸਾਹ ਨਹੀਂ। ਦਿਲ ਵੀ ਵੱਡਾ ਤੇ ਜਿਗਰਾ ਵੀ। ਇੱਕ ਖ਼ਬਰ ਸੁਣੋ ਪਹਿਲਾਂ। ਆਗਰਾ ਦੇ ਇੱਕ ਸਕੂਲ ’ਚ ਕਲਮਾਂ ਨਹੀਂ, ਬੱਚਿਆਂ ਨੂੰ ਚਾਕੂ ਵੰਡੇ ਗਏ ਹਨ। ਮੁੱਖ ਮਹਿਮਾਨ ਮਹਿਲਾ ਸਾਧਵੀ ਬਣੀ। ਬੱਚਿਆਂ ਦੇ ਹੱਥਾਂ ’ਚ ਚਾਕੂ ਸਨ। ਵੰਡਣ ਵਾਲਿਆਂ ਦੇ ਮਨਾਂ ’ਚ ਨਵੇਂ ਏਜੰਡੇ। ਨਵੇਂ ਸਿਪਾਹੀ ਪੈਦਾ ਕਰਨ ਦੇ। ਸਹੁੰ ਚੁੱਕ ਸਮਾਰੋਹ ਮਗਰੋਂ, ਪਹਿਲਾਂ ‘ਚਾਕੂ ਵੰਡ ਸਮਾਗਮ’ ਹੋਇਆ। ਇੱਕ ਪੁਰਾਣੀ ਗੱਲ ਚੇਤੇ ਆਈ। ਇਵੇਂ ਹੀ 20 ਸਾਲ ਪਹਿਲਾਂ ਹੋਇਆ। ਉਦੋਂ ਅਕਾਲੀ ਮੰਤਰੀ ਨੇ ਬਠਿੰਡਾ ਦੇ ਇੱਕ ਕਲੱਬ ਨੂੰ ਸਰਕਾਰੀ ਫੰਡ ਦਿੱਤੇ। ਤਲਵਾਰਾਂ ਖ੍ਰੀਦਣ ਲਈ। ਉਦੋਂ ਰੌਲ਼ੇ ਰੱਪੇ ਤੋਂ ਬੱਚਤ ਰਹੀ। ਨਵੇਂ ਪੁਰਾਣੇ ਤੇ ਪਾਓ ਮਿੱਟੀ, ਹੁਣ ਪੱਤਾ ਨਹੀਂ ਹਿਲੇਗਾ। ਅਮਿਤ ਸਾਹ ਆਖ ਰਿਹਾ.. ਮੈਂ ਹੂੰ ਨਾ।
                  ਸਾਧਵੀ ਨਿਰੰਜਨ ਨੇ ਵੀ ਵਜ਼ਾਰਤ ’ਚ ਮੁੜ ਅਲਖ ਜਗਾਈ ਹੈ। ਤਿੰਨ ਹੋਰ ਮੰਤਰੀ ਨੇ ਜੋ ਸਾਧਵੀ ਵਾਂਗ ਗ੍ਰਹਿਸਤੀ ਤੋਂ ਦੂਰ ਨੇ। ਪੰਜ ਉਹ ਮੰਤਰੀ ਬਣੇ ਨੇ, ਜਿਨ੍ਹਾਂ ਦੇ ਕੋਈ ਬਾਲ ਬੱਚਾ ਨਹੀਂ। ਪੂਰੇ ਦੇਸ਼ ਨੂੰ ਹੀ ਆਪਣਾ ਸਮਝਦੇ ਨੇ। ਇਨ੍ਹਾਂ ਚੋ ਇੱਕ ਨੇ, ਉੜੀਸਾ ਦੇ ਕਬਾਇਲੀ ਪ੍ਰਤਾਪ ਚੰਦਰ ਸਾਰੰਗੀ। ਜਦੋਂ ਸਾਰੰਗੀ ਨੇ ਸਹੁੰ ਚੁੱਕੀ। ਪੰਡਾਲ ਖੜ੍ਹਾ ਹੋ ਗਿਆ। ਸਾਦਗੀ ਏਨੀ ਕਿ ਝੌਂਪੜੀ ’ਚ ਟਿਕਾਣਾ, ਸਾਦਾ ਖਾਣਾ। ਇਵੇਂ 10 ਮੰਤਰੀ ਉਹ ਬਣੇ ਜਿਨ੍ਹਾਂ ਕੋਲ ਧੀਆਂ ਦਾ ਧੰਨ ਹੈ। ਸਹੁੰ ਚੁੱਕ ਸਮਾਗਮਾਂ ’ਚ ਸਭ ਆਏ। ਟਾਟਾ, ਅਡਾਨੀ,ਅਬਾਨੀ ਤੇ ਲਕਸ਼ਮੀ ਮਿੱਤਲ ਵੀ। ਸੋਨੀਆ ਗਾਂਧੀ ਵੀ ਆਪਣੇ ਮੁੰਡੇ ਨਾਲ ਆਈ। ਕਿਸੇ ਨੇ ਪੁੱਛਿਆ, ਕਿਤੇ ਯਸ਼ੋਦਰਾ ਬੇਨ ਨਹੀਂ ਦਿੱਖਦੀ। ਨਾ ਹੀ ਕਿਤੇ ਬਾਬਾ ਰਾਮਦੇਵ ਰੜਕਿਐ ਜਿਨ੍ਹਾਂ ਹੁਣੇ ਮਸ਼ਵਰਾ ਦਿੱਤਾ। ‘ਵਿਰੋਧੀ ਧਿਰ ਹੁਣ ਕਪਾਲ ਭਾਰਤੀ ਕਰੇ, ਤਣਾਓ ਹੋਏਗਾ ਛੂ ਮੰਤਰ।’  ‘ਦੀਦੀ’ ਤਾਂ ਬੱਸ ਰੱਬ ਨਾਲ ਰੱੁਸੀ ਰਹਿੰਦੀ ਹੈ। ਬੰਗਾਲ ’ਚ ਧਰਨੇ ’ਤੇ ਬੈਠ ਗਈ, ਜਸ਼ਨਾਂ ’ਚ ਨਹੀਂ ਆਈ। ਬੰਗਾਲ ਦੀ ਚੋਣ ਹਿੰਸਾ ’ਚ 53 ਭਾਜਪਾ ਵਰਕਰ ਮਰੇ। ਸਭਨਾਂ ਦੇ ਪਰਿਵਾਰਾਂ ਨੂੰ ਸਮਾਰੋਹਾਂ ਦਾ ਉਚੇਚਾ ਸੱਦਾ ਭੇਜਿਆ। ਪੁਲਵਾਮਾ ਦੀ 40 ਸ਼ਹੀਦਾਂ ਦੇ ਪਰਿਵਾਰਾਂ ਚੋਂ ਇੱਕਾ ਦੁੱਕਾ ਹੀ ਦਿਖੇ।
                ਉਧਰ, ਇਮਰਾਨ ਖਾਨ ਨਾਤਾ ਧੋਤਾ ਰਹਿ ਗਿਆ। ਐਮ.ਪੀ ਸਤੀਸ਼ ਗੌਤਮ ਦਾ ਐਲਾਨ ਸੁਣੋ, ‘ਅਲੀਗੜ੍ਹ ’ਵਰਸਿਟੀ ’ਚ ਲੱਗੀ ਜ਼ਿਨਾਹ ਦੀ ਤਸਵੀਰ ਪਾਕਿਸਤਾਨ ਭੇਜਾਂਗੇ’। ਉਦੋਂ ਦੇ ਪੰਜਾਬ ਦੇ ਕਿਸਾਨ ਕਾਹਲੇ ਪਏ ਨੇ। ਅਖੇ ਸਾਡੇ ਆਲੂ ਵੀ ਭੇਜ ਦਿਓ। ਗੱਲਾਂ ਕੀ ਕਰਦੇ ਹੋ, ਮੋਦੀ ਨੇ ਤਾਂ ਬੰੂਦ ਪਾਣੀ ਨਹੀਂ ਜਾਣ ਦੇਣਾ। ਐਤਕੀਂ ਨਵਾਂ ਮੰਤਰਾਲਾ ਬਣਾਇਆ ‘ਜਲ ਸ਼ਕਤੀ’। ਜਿਸ ਦੇ ਮੰਤਰੀ ਬਣੇ ਨੇ ਗਜੇਂਦਰ ਸਿੰਘ ਸੇਖਾਵਤ। ਯਾਦ ਆਇਆ, ਕਿਸਾਨ ਗਜੇਂਦਰ ਸਿੰਘ ਜੋ ਜੰਤਰ ਮੰਤਰ ਦੇ ਦਰੱਖਤ ’ਤੇ ਲਟਕ ਗਿਆ ਸੀ। ਉਦੋਂ ‘ਆਪ’ ਦੀ ਰੈਲੀ ਚੱਲ ਰਹੀ ਸੀ। ਮੋਦੀ ਨੂੰ ਗਹਿਰਾ ਸਦਮਾ ਲੱਗਾ ਸੀ। ਕਿਸਾਨ ਗਜੇਂਦਰ ਦੇ ਤਿੰਨ ਬੱਚਿਆਂ ਦੇ ਹਾਲ ਬੁਰੇ ਨੇ। ਮੁੜ ਕੋਈ ਨਾ ਬਹੁੜਿਆ। ਸੇਖਾਵਤ ਜੀ, ਕਦੇ ਤੁਸੀਂ ਹੀ ਗੇੜਾ ਮਾਰ ਆਇਓ।  ਕੌਮਾਂਤਰੀ ਕੰਡਿਆਲੀ ਤਾਰ ਨਾਲ ਖਹਿੰਦੇ ਪਿੰਡ ਗੱਟੀ ਨੰਬਰ-1 ਤੋਂ ਫੋਨ ਆਇਆ। ਕਾਲਾ ਸਿੰਘ ਬੋਲਦਾ.. ਨਵੇਂ ਮੰਤਰੀ ਦਾ ਅਡਰੈਸ ਦਿਓ। ਪਤਾ ਨਹੀਂ , ਕਦੋਂ ਸਕੂਲ ਦੀ ਛੱਤ ਡਿੱਗ ਪਏ।
                ਹਰਿਦੁਆਰ ਤੋਂ ਐਮ.ਪੀ ਰਮੇਸ਼ ਪੋਖਰਿਆਲ ਨੂੰ ਕੌਣ ਭੁਲਿਐ। ਚੇਤਾ ਕਮਜ਼ੋਰ ਹੈ ਤਾਂ ਬਦਾਮ ਗਿਰੀ ਖਾਓ। ਪੋਖਰਿਆਲ ਨੇ ਤਾਂ ਹੁਣੇ ਸਹੁੰ ਖਾਧੀ ਹੈ। ਉਨ੍ਹਾਂ ਦੇ ਦਿਮਾਗ ਦਾ ਮੁੱਲ ਹੁਣ ਪਿਐ। ਸਿੱਖਿਆ ਮਹਿਕਮਾ ਤਾਹੀਂ ਦਿੱਤੈ। ਪੋਖਰੀਆਲ ਇੰਝ ਫੁਰਮਾਏ ਸਨ.. ‘ ਸਾਇੰਸ ਕੀ ਰੀਸ ਕਰੂ ਜੋਤਸ਼ ਦੀ.. ਮਹਾਂਰਿਸ਼ੀ ਕਣਾਦ ਦੀ ਦਾਦ ਦਿਓ। ਜਿਨ੍ਹਾਂ ਲੱਖਾਂ ਸਾਲ ਪਹਿਲਾਂ ਨਿਊਕਲੀਅਰ ਟੈਸਟ ਕੀਤਾ। ਦੇਖਦੇ ਹਾਂ, ਹੁਣ ਉਚੇਰੀ ਸਿੱਖਿਆ ਦਾ ਕੀ ਬਣਦੈ। ਮਹਿਲਾ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਦਫ਼ਤਰ ਗਈ। ਅੱਗਿਓਂ ਛੇ ਫ਼ੀਸਦੀ ਤੋਂ ਹੇਠਾਂ ਡਿੱਗੀ ਆਰਥਿਕ ਵਿਕਾਸ ਦਰ ਨੇ ਸਲੂਟ ਮਾਰਿਆ। ਜਦੋਂ ਬੇਕਾਰੀ ਦਰ ਦਾ ਗਰਾਫ ਦੇਖਿਆ, ਨਿਰਮਲਾ ਦਾ ਸਿਰ ਚਕਰਾ ਗਿਆ।  ਬਲੱਡ ਪ੍ਰੈਸਰ ਤਾਂ ਰਾਹੁਲ ਗਾਂਧੀ ਦਾ ਵੀ ਵਧਿਐ। ਕੇਰਲਾ ਦੇ ਵਾਰਨਾਡ ’ਚ ਇੱਕ ਕਿਸਾਨ ਖੁਦਕੁਸ਼ੀ ਕਰ ਗਿਆ। ਧੰਨਵਾਦੀ ਦੌਰੇ ਤੋਂ ਪਹਿਲਾਂ ਹੀ ਬਦਸਗਨੀ ਹੋ ਗਈ। ਕੋਈ ਨੇੜਲਾ ਸੁਆਮੀ ਹੁੰਦਾ। ਸੋਨੀਆ ਜਰੂਰ ਆਖਦੀ, ਬਾਬਾ.. ਮੇਰੇ ਮੁੰਡੇ ਦਾ ਕੋਈ ਓਪਾਅ ਕਰਦੇ। ਛੱਜੂ ਰਾਮ ਨੇ ਵਿਚੇ ਘੋੜਾ ਦਬੱਲਿਐ.. ਅਖੇ ਚਾਚੀ, ਮੁੰਡਾ ਵਿਹਲਾ, ਵਿਆਹ ਕਰਦੇ।
                  ਛੱਜੂ ਰਾਮਾ..ਪੰਜਾਬ ਦੇ ਮੁੰਡੇ ਕਿਹੜਾ ਵਿਆਹ ਕਰਾ ਰਹੇ ਨੇ। ਸਭ ਆਖਦੇ ਨੇ, ਕੇਨੈਡਾ ਜਾ ਕੇ ਕਰਾਵਾਂਗੇ। ਵਿਦੇਸ਼ ਮੰਤਰੀ ਜੀ.. ਜਵਾਨੀ ਦਾ ਵੀ ਸੋਚੋ। ਪੰਜਾਬ ਤੋਂ ਜਹਾਜ਼ ਲੱਦੇ ਹੀ ਜਾਂਦੇ ਨੇ। ਸੱਚ, ਵਿਦੇਸ਼ ਤੋਂ ਮੋਦੀ ਜੀ ਯਾਦ ਆਏ। ਭੈਣੋ ਅੌਰ ਭਾਈਓ.. ‘ਵਿਸ਼ਵ ਦਰਸ਼ਨ’ ਦੀ ਬੌਣੀ 9 ਜੂਨ ਨੂੰ ਸ਼੍ਰੀ ਲੰਕਾ ਤੋਂ ਕਰਾਂਗੇ। ਪੰਜਾਬ ਦੇ ਚੌਕੀਦਾਰ ਆਖਦੇ ਨੇ, ਯਾਤਰਾ ਦੇ ਚਾਅ ’ਚ ਸਾਨੂੰ ਨਾ ਭੁੱਲ ਜਾਇਓ। ਪੰਜਾਬੀ ਲੋਕ ਇੱਕ ਤਾਂ ਕਾਹਲੇ ਬੜੇ ਨੇ। ਇਹੋ ਹੈ ਕਿ ਹੁਣੇ ਹੱਥਾਂ ’ਤੇ ਸਰੋਂ੍ਹ ਜੰਮ ਜਾਏ। ਜੈਸਲਮੇਰ ਦੇ ਕਿਸਾਨ ਕੂਕੇ ਨੇ.. ਪਾਕਿਸਤਾਨੋਂ ਟਿੱਡੀ ਦਲ ਚੱਲ ਪਿਐ, ਸਰੋਂ੍ਹ ਤਾਂ ਜਮਾਉਣੀ ਪੈਣੀ ਐ। ਟਿੱਡੀ ਦਲ ਦਾ ਹੱਲਾ ਖੇਤ ਖਾਲੀ ਕਰ ਦਿੰਦਾ ਹੈ। ਕਿਸਾਨ ਬੱਠਲ, ਪੀਪੇ ਤੇ ਢੋਲ ਖੜਕਾ ਰਹੇ ਨੇ, ਕਿਤੇ ਟਿੱਡੀ ਦਲ ਖੇਤਾਂ ’ਚ ਬੈਠ ਨਾ ਜਾਏ। ਪੰਜਾਬ ਵਾਲੇ ਵੀ ਡਰੇ ਨੇ। ਬਈ, ਇੱਕ ਤਾਂ ਤੁਸੀਂ ਯਕੀਨ ਨੀ ਕਰਦੇ। ਅਮਿਤ ਸਾਹ ਨੇ ਗ੍ਰਹਿ ਪ੍ਰਵੇਸ਼ ਕਰ ਲਿਆ ਹੈ। ਮਨ ਚੋਂ ਸਭ ਭਰਮ ਭੁਲੇਖੇ ਕੱਢ ਦਿਓ। ਕਿਸੇ ਟਿੱਡੀ ਦਲ ਦੀ ਕੀ ਮਜਾਲ।
                ਛੱਜੂ ਰਾਮ ਸਰੋਂ੍ਹ ਦੇ ਤੇਲ ਦੀ ਮਾਲਿਸ਼ ਕਰਾਈ ਜਾਂਦੈ। ਮਾੜੇ ਖਿਆਲ ਚੱਲ ਰਹੇ ਸੀ। ਚੇਤੇ ’ਚ ਨਾਅਰੇ ਗੂੰਜ ਰਹੇ ਨੇ। ਨਾਅਰਾ ਲਾ ਦਿੰਦਾ, ਮੁਹੰਮਦ ਬਰਕਤ ਥੱਪੜਾਂ ਤੋਂ ਬਚ ਜਾਂਦਾ। ਡਾ.ਅਰੁਣ ਗਡਰੇ ਨੇ ਕੁੱਟ ਖਾ ਲਈ, ਨਾਅਰਾ ਨਹੀਂ ਲਾਇਆ। ਨਾਅਰਿਆਂ ਨੂੰ ਛੱਡੋ, ਤੁਸੀਂ ਨਵੇਂ ਕੈਬਨਿਟ ਦੇ ਨਵੇਂ ਫੈਸਲੇ ਦੇਖੋ। ਕਿਸਾਨ ਮਾਲਾਮਾਲ, ਵਪਾਰੀ ਲਈ ਉਛਾਲ, ਵਿਦਿਆਰਥੀ ਤਬਕੇ ਲਈ ਧਮਾਲ। ਇਹ ਤਾਂ ਟੇ੍ਰਲਰ ਹੈ, ਫਿਲਮ ਬਾਕੀ ਹੈ ਪਿਆਰੇ। ਫਿਲਮੀ ਦੁਨੀਆ ਨਹੀਂ, ਯਥਾਰਥ ਦੇਖ ਸਰਕਾਰੇ। ਲੋਕ ਤਾਂ ਕੋਹਲੂ ਦੇ ਬੈਲ ਜਾਪਦੇ ਨੇ। ਇੱਕੋ ਥਾਂ ਘੁੰਮੀ ਜਾ ਰਹੇ ਹਨ ਜਿਨ੍ਹਾਂ ਨੂੰ ਇੰਝ ਲੱਗ ਰਿਹੈ ਕਿ ਉਹ ਅਗਾਂਹ ਤੁਰੀ ਜਾ ਰਹੇ ਨੇ.. ਵਿਕਾਸ ਤੇ ਤਰੱਕੀ ਹੋਣ ਦਾ ਭੁਲੇਖਾ ਪੈਂਦਾ ਹੈ। ਸਰਕਾਰ ਕੋਈ ਵੀ ਹੋਵੇ, ਲੋਕਾਂ ਨੂੰ ਝਉਲਾ ਪਾਇਆ ਜਾਂਦਾ ਹੈ, ਤਰੱਕੀ ਦਾ, ਬਦਲੇ ਦਿਨਾਂ ਦਾ, ਖੰਭ ਲੱਗਣ ਦਾ। ਲੋਕ ਵੋਟਾਂ ਪਾਉਂਦੇ ਨੇ।