ਕੀ ਮਾਣ ਰੱਖੇਗਾ 
                                     ਸੋਹਣਾ ਪਿੰਡ ਜਲਾਲ ਮੇਰਾ..! 
                                                         ਚਰਨਜੀਤ ਭੁੱਲਰ    

ਜਲਾਲ (ਬਠਿੰਡਾ): ਫ਼ਰੀਦਕੋਟ ਸੰਸਦੀ ਹਲਕੇ ਦਾ ਇਹ ਪਿੰਡ ਜਲਾਲ ਕਲੀਆਂ ਦੇ ਬਾਦਸ਼ਾਹ ਮਰਹੂਮ ਕੁਲਦੀਪ ਮਾਣਕ ਦੀ ਜਨਮ ਭੂਮੀ ਹੈ। ਜਦੋਂ ਕੁਲਦੀਪ ਮਾਣਕ ਹੇਕ ਲਾਈ, ‘ਸੋਹਣਾ ਪਿੰਡ ਜਲਾਲ ਮੇਰਾ’, ਤਾਂ ਇਸ ਪਿੰਡ ਦੀ ਮਾਣ ’ਚ ਹਿੱਕ ਚੌੜੀ ਹੋਈ ਸੀ। ਹੁਣ ਜਲਾਲ ਪਿੰਡ ਨਵੇਂ ਸਿਆਸੀ ਰੌਂਅ ਵਿਚ ਹੈ ਕਿਉਂਕਿ ਹਲਕਾ ਫ਼ਰੀਦਕੋਟ ਤੋਂ ‘ਆਪ’ ਉਮੀਦਵਾਰ ਕਰਮਜੀਤ ਅਨਮੋਲ ਪਿੰਡ ਜਲਾਲ ਦਾ ਦੋਹਤਾ ਹੈ ਅਤੇ ਮਰਹੂਮ ਕੁਲਦੀਪ ਮਾਣਕ ਦਾ ਸਕਾ ਭਾਣਜਾ। ਪਿੰਡ ਜਲਾਲ ਆਪਣੇ ਦੋਹਤੇ ਦਾ ਮਾਣ ਰੱਖਦਾ ਹੈ ਜਾਂ ਨਹੀਂ, ਇਹ ਚੋਣ ਨਤੀਜੇ ਦੱਸਣਗੇ ਪ੍ਰੰਤੂ ਇਸ ਪਿੰਡ ’ਤੇ ‘ਆਪ’ ਉਮੀਦਵਾਰ ਉਨਾਂ ਹੀ ਮਾਣ ਕਰਦਾ ਹੈ ਜਿਨ੍ਹਾਂ ਕੁਲਦੀਪ ਮਾਣਕ ਕਰਦੇ ਸਨ। ਪਿੰਡ ਜਲਾਲ ਦੀ ਕਰੀਬ 5500 ਵੋਟ ਹੈ ਅਤੇ ਇਹ ਪਿੰਡ ਰਵਾਇਤੀ ਤੌਰ ’ਤੇ ਪੰਥਕ ਸਫ਼ਾ ਦੇ ਪੱਖ ਵਿਚ ਭੁਗਤਦਾ ਰਿਹਾ ਹੈ। 

         ਲੰਘੀ ਅਸੈਂਬਲੀ ਚੋਣ 2022 ਵਿਚ ਪਿੰਡ ਜਲਾਲ ਚੋਂ ‘ਆਪ’ ਨੂੰ 1871 ਵੋਟਾਂ , ਅਕਾਲੀ ਦਲ ਨੂੰ 1401 ਅਤੇ ਕਾਂਗਰਸ ਨੂੰ 1071 ਵੋਟਾਂ ਮਿਲੀਆਂ ਸਨ। ਪਿੰਡ ਵਿਚ ‘ਆਪ’ ਦੇ ਦੋ ਧੜੇ ਹਨ। ਪਿੰਡ ਜਲਾਲ ਦਾ ਵਸਨੀਕ ਅਤੇ ਟਰਾਂਸਪੋਰਟ ਪ੍ਰਿਥੀਪਾਲ ਸਿੰਘ ਜਲਾਲ ਆਖਦਾ ਹੈ ਕਿ ਭਾਵੇਂ ਅਕਾਲੀ ਦਲ ਨੂੰ ਇਸ ਪਿੰਡ ਚੋਂ ਵੋਟ ਵੱਧ ਮਿਲਦੀ ਰਹੀ ਹੈ ਪ੍ਰੰਤੂ ਇਸ ਵਾਰ ਪਿੰਡ ਜਲਾਲ ਆਪਣੇ ਦੋਹਤੇ ਦਾ ਮਾਣ ਰੱਖੇਗਾ। ਪਿਛਲੇ ਦਿਨਾਂ ਵਿਚ ਕਰਮਜੀਤ ਅਨਮੋਲ ਨੇ ਜਲਾਲ ਪਿੰਡ ਦਾ ਗੇੜਾ ਲਾਇਆ ਹੈ ਅਤੇ ਲੋਕਾਂ ਨੇ ਭਰਵਾਂ ਸਵਾਗਤ ਵੀ ਕੀਤਾ। ਕੁਲਦੀਪ ਮਾਣਕ ਨੇ ਖ਼ੁਦ ਵੀ ਆਜ਼ਾਦ ਉਮੀਦਵਾਰ ਵਜੋਂ 1996 ਵਿਚ ਲੋਕ ਸਭਾ ਦੀ ਬਠਿੰਡਾ ਹਲਕੇ ਤੋਂ ਚੋਣ ਲੜੀ ਸੀ ਅਤੇ ਉਨ੍ਹਾਂ ਨੂੰ 23,090 (3.42 ਫ਼ੀਸਦੀ) ਵੋਟਾਂ ਮਿਲੀਆਂ ਸਨ। 

        ਉਹ ਚੋਣ ਹਾਰ ਗਏ ਸਨ ਪ੍ਰੰਤੂ ਉਨ੍ਹਾਂ ਨੇ ਆਪਣੇ ਪਿੰਡ ਜਲਾਲ ਦਾ ਦੁਨੀਆ ਵਿਚ ਝੰਡਾ ਬੁਲੰਦ ਕੀਤਾ। ਕੁਲਦੀਪ ਮਾਣਕ ਦੀ 30 ਨਵੰਬਰ 2011 ਨੂੰ ਮੌਤ ਹੋ ਗਈ ਸੀ ਅਤੇ 2 ਦਸੰਬਰ ਨੂੰ ਉਨ੍ਹਾਂ ਨੂੰ ਪਿੰਡ ਦੇ ਕਬਰਸਤਾਨ ਵਿਚ ਦਫ਼ਨਾਇਆ ਗਿਆ ਸੀ। ਕੁਲਦੀਪ ਮਾਣਕ ਦਾ ਭਤੀਜਾ ਡਾ. ਦਿਲਬਾਗ ਬਾਗ਼ੀ ਆਪਣੀ ਭੂਆ ਦੇ ਮੁੰਡੇ ਕਰਮਜੀਤ ਅਨਮੋਲ ਦੇ ਚੋਣ ਪ੍ਰਚਾਰ ’ਚ ਡਟਿਆ ਹੋਇਆ ਹੈ। ਕਰਮਜੀਤ ਅਨਮੋਲ ਨੇ ਆਪਣੀ ਸਕੂਲੀ ਪੜਾਈ ਦੇ ਤਿੰਨ ਵਰ੍ਹੇ ਪਿੰਡ ਜਲਾਲ ਦੇ ਸਕੂਲ ਚੋਂ ਮੁਕੰਮਲ ਕੀਤੇ ਹਨ। ‘ਆਪ’ ਆਗੂ ਬੂਟਾ ਸਿੰਘ ਜਲਾਲ ਆਖਦਾ ਹੈ ਕਿ ਪਿੰਡ ਵਾਲੇ ਕਰਮਜੀਤ ਅਨਮੋਲ ਨੂੰ ਵੋਟ ਪਾ ਕੇ ਮਰਹੂਮ ਮਾਣਕ ਦਾ ਮਾਣ ਰੱਖਣਗੇ। ਉਹ ਆਖਦਾ ਹੈ ਕਿ ਪਿੰਡ ਵਿਚ ਕੁਲਦੀਪ ਮਾਣਕ ਦੀ ਕੋਈ ਯਾਦਗਾਰ ਨਹੀਂ ਬਣੀ ਹੈ ਅਤੇ ਉਹ ਚੋਣਾਂ ਮਗਰੋਂ ਪਿੰਡ ਵਿਚ ਯਾਦਗਾਰ ਬਣਾਉਣ ਲਈ ਉਪਰਾਲਾ ਕਰਨਗੇ। 

         ਕਰਮਜੀਤ ਅਨਮੋਲ ਨੇ ਵੀ ਇਸ ਬਾਰੇ ਵਾਅਦਾ ਕੀਤਾ ਹੈ। ਡਾ.ਦਿਲਬਾਗ ਬਾਗ਼ੀ ਆਖਦਾ ਹੈ ਕਿ ਇਨ੍ਹਾਂ ਚੋਣਾਂ ਵਿਚ ਪਿੰਡ ਜਲਾਲ ਕਰਮਜੀਤ ਅਨਮੋਲ ਨੂੰ ਵੋਟ ਪਾ ਕੇ ਮੁੱਲ ਮੋੜੇਗਾ।ਕਰਮਜੀਤ ਅਨਮੋਲ ਇਨ੍ਹਾਂ ਪਿੰਡਾਂ ਨਾਲ ਆਪਣੀ ਅਪਣੱਤ ਜ਼ਾਹਰ ਕਰਦਾ ਹੈ ਅਤੇ ਖ਼ਾਸ ਤੌਰ ’ਤੇ ਪਿੰਡ ਜਲਾਲ ਦਾ ਦੋਹਤਾ ਹੋਣ ਦਾ ਜ਼ਿਕਰ ਉਹ ਫ਼ਰੀਦਕੋਟ ਸੰਸਦੀ ਹਲਕ ਵਿਚ ਕਰਦਾ ਹੈ। ਜਦੋਂ ਉਸ ਨੂੰ ਬਾਹਰੀ ਉਮੀਦਵਾਰ ਦੱਸਿਆ ਜਾਂਦਾ ਹੈ ਤਾਂ ਮੋੜਵੇਂ ਰੂਪ ਵਿਚ ਉਹ ਹਲਕੇ ਦਾ ਦੋਹਤਾ ਹੋਣ ਦੀ ਦਲੀਲ ਦਿੰਦਾ ਹੈ। ਕੁਲਦੀਪ ਮਾਣਕ ਦੇ ਪਰਿਵਾਰ ਦੇ ਬਾਕੀ ਮੈਂਬਰ ਬਾਹਰ ਹੀ ਰਹਿੰਦੇ ਹਨ ਪਰ ਕਰਮਜੀਤ ਅਨਮੋਲ ਦੇ ਸਕੂਲ ਦੇ ਕਈ ਜਮਾਤੀ ਵੀ ਚੋਣ ਪ੍ਰਚਾਰ ਵਿਚ ਕੁੱਦੇ ਹੋਏ ਹਨ। ਕੁਲਦੀਪ ਮਾਣਕ ਦਾ ਘਰ ਨੂੰ ਜਿੰਦਰਾ ਵੱਜਿਆ ਹੋਇਆ ਹੈ ਅਤੇ ਉਨ੍ਹਾਂ ਦਾ ਭਤੀਜਾ ਜ਼ਰੂਰ ਰਹਿ ਰਿਹਾ ਹੈ।

                                      ਸਿਆਸੀ ਉਡਾਣ ਦੀ ਪਿੰਡ ਜਲਾਲ ਤੋਂ..

ਕਰਮਜੀਤ ਅਨਮੋਲ ਆਖਦਾ ਹੈ ਕਿ ਮੇਰਾ ਬਚਪਨ ਪਿੰਡ ਜਲਾਲ ਵਿਚ ਬੀਤਿਆ ਹੈ ਅਤੇ ਇਸ ਪਿੰਡ ਦੀਆਂ ਗਲੀਆਂ ਵਿਚ ਖੇਡ ਕੇ ਵੱਡਾ ਹੋਇਆ ਹਾਂ। ਸਕੂਲੀ ਪੜਾਈ ਪਿੰਡ ਜਲਾਲ ਤੋਂ ਕੀਤੀ ਹੈ ਅਤੇ ਇੱਥੋਂ ਤੱਕ ਕਿ ਮੈਂ ਪਹਿਲੀ ਹੇਕ ਵੀ ਆਪਣੇ ਮਾਮੇ ਦੇ ਹਰਮੋਨੀਅਮ ਤੋਂ ਪਿੰਡ ਜਲਾਲ ’ਚ ਲਾਈ। ਉਹ ਆਖਦਾ ਹੈ ਕਿ ਉਹ ਸਿਆਸਤ ਦੀ ਉਡਾਣ ਵੀ ਉਹ ਆਪਣੇ ਨਾਨਕੇ ਪਿੰਡ ਤੋਂ ਭਰ ਰਿਹਾ ਹੈ। ਉਹ ਆਖਦਾ ਹੈ ਕਿ ਫ਼ਰੀਦਕੋਟ ਹਲਕੇ ਦੋਹਤਾ ਹੋਣ ਦੇ ਨਾਤੇ ਵੀ ਮੇਰਾ ਮਾਣ ਸਤਿਕਾਰ ਰੱਖੇਗਾ।