Saturday, December 31, 2016

                          ਮਕਾਨ ਘੱਟ, ਚੈੱਕ ਵੱਧ
           ਲੰਬੀ ਹਲਕੇ ਵਿਚ 'ਹੋਮ ਸਕੈਂਡਲ'
                              ਚਰਨਜੀਤ ਭੁੱਲਰ
ਬਠਿੰਡਾ : ਮੁੱਖ ਮੰਤਰੀ ਪੰਜਾਬ ਦੇ ਹਲਕਾ ਲੰਬੀ ਵਿਚ ਐਨ ਚੋਣਾਂ ਤੋਂ ਪਹਿਲਾਂ 'ਹੋਮ ਸਕੈਂਡਲ' ਹੋ ਰਿਹਾ ਹੈ। ਹਲਕੇ ਦੇ ਕਈ ਪਿੰਡਾਂ ਵਿਚ ਉਨੇ ਮਕਾਨ ਨਹੀਂ ਹਨ ਜਿੰਨੇ ਮਕਾਨਾਂ ਨੂੰ ਮੁਰੰਮਤ ਲਈ ਪੈਸੇ ਵੰਡ ਦਿੱਤੇ ਹਨ। ਇੱਕ ਇੱਕ ਘਰ ਨੂੰ ਤਿੰਨ ਤਿੰਨ ਚੈੱਕ ਵੰਡੇ ਗਏ ਹਨ। ਪੰਜਾਬ ਦਾ ਇਹ ਇਕਲੌਤਾ ਹਲਕਾ ਹੈ ਜਿਥੇ ਘਰਾਂ ਦੀ ਮੁਰੰਮਤ ਲਈ ਪੰਦਰਾਂ ਪੰਦਰਾਂ ਹਜ਼ਾਰ ਦੇ ਚੈੱਕ ਵੰਡੇ ਗਏ ਹਨ। ਮੁੱਖ ਮੰਤਰੀ ਦੇ ਅਖ਼ਤਿਆਰੀ ਕੋਟੇ ਅਤੇ ਛੋਟੀਆਂ ਬੱਚਤਾਂ ਚੋਂ ਇਹ ਪੈਸਾ ਖ਼ਰਚਿਆ ਜਾ ਰਿਹਾ ਹੈ। ਕਰੀਬ 45 ਕਰੋੜ ਰੁਪਏ ਹਲਕਾ ਲੰਬੀ ਵਿਚ ਮਕਾਨਾਂ ਦੀ ਮੁਰੰਮਤ ਅਤੇ ਉਸਾਰੀ ਲਈ ਵੰਡੇ ਗਏ ਹਨ ਜਿਨ•ਾਂ ਚੋਂ ਕਰੀਬ 22 ਕਰੋੜ ਰੁਪਏ ਸੇਮ ਦਾ ਬਹਾਨਾ ਘੜ ਕੇ ਮੁਰੰਮਤ ਲਈ ਵੰਡੇ ਗਏ ਹਨ। ਆਰ.ਟੀ.ਆਈ ਸੂਚਨਾ ਅਨੁਸਾਰ ਲੰਬੀ ਦੇ ਪਿੰਡ ਸਿੰਘੇਵਾਲਾ ਵਿਚ 564 ਮਕਾਨਾਂ ਨੂੰ ਮੁਰੰਮਤ ਲਈ 15-15 ਹਜ਼ਾਰ ਦਿੱਤੇ ਗਏ ਹਨ ਜਦੋਂ ਕਿ ਤਾਜ਼ਾ ਵੋਟਰ ਸੂਚੀ ਅਨੁਸਾਰ ਇਸ ਪਿੰਡ ਵਿਚ ਕੁੱਲ ਘਰਾਂ ਦੀ ਗਿਣਤੀ 372 ਹੈ। ਇਸ ਪਿੰਡ ਦੇ ਕਿਸਾਨ ਆਗੂ ਗੁਰਪਾਸ ਸਿੰਘ ਦਾ ਪ੍ਰਤੀਕਰਮ ਸੀ ਕਿ ਪਿੰਡ ਦੇ ਲੋੜਵੰਦ ਰਹਿ ਗਏ ਜਦੋਂ ਕਿ ਸਰਦੇ ਪੁੱਜਦੇ ਚੈੱਕ ਲੈ ਗਏ ਹਨ। ਸਰਕਾਰੀ ਤੱਥਾਂ ਅਨੁਸਾਰ ਪਿੰਡ ਮਿੱਡੂਖੇੜਾ ਵਿਚ ਕੁੱਲ 407 ਮਕਾਨ ਹਨ ਜਦੋਂ ਕਿ ਮੁਰੰਮਤ ਵਾਸਤੇ ਪੈਸੇ 448 ਘਰਾਂ ਨੂੰ ਦਿੱਤਾ ਗਿਆ ਹੈ।
                         ਬਹਾਨਾ ਇਹੋ ਕਿ ਸੇਮ ਕਾਰਨ ਲੋਕਾਂ ਦੇ ਮਕਾਨ ਤਿੜਕ ਗਏ ਹਨ ਤੇ ਮੁਰੰਮਤ ਦੀ ਲੋੜ ਹੈ। ਡਰੇਨੇਜ਼ ਮਹਿਕਮੇ ਦੇ ਤੱਥ ਆਖਦੇ ਹਨ ਕਿ ਪਿੰਡ ਮਿਡੂਖੇੜਾ ਵਿਚ 2901 ਏਕੜ ਰਕਬੇ ਚੋਂ ਹੁਣ ਸਿਰਫ਼ 220 ਏਕੜ ਵਿਚ ਸੇਮ ਦੀ ਸਮੱਸਿਆ ਹੈ ਇਵੇਂ ਪਿੰਡ ਮਹਿਣਾ ਵਿਚ ਕੁੱਲ ਮਕਾਨਾਂ ਦੀ ਗਿਣਤੀ 758 ਹੈ ਜਦੋਂ ਕਿ ਖ਼ਜ਼ਾਨੇ ਚੋਂ ਮੁਰੰਮਤ ਲਈ ਪੈਸਾ 850 ਘਰਾਂ ਲਈ 1.27 ਕਰੋੜ ਜਾਰੀ ਕੀਤਾ ਗਿਆ ਹੈ। ਪਿੰਡ ਹਾਕੂਵਾਲਾ ਵਿਚ 353 ਮਕਾਨ ਹਨ ਅਤੇ ਸਾਰੇ ਮਕਾਨਾਂ ਦੀ ਮੁਰੰਮਤ ਖਾਤਰ ਪੈਸਾ ਦੇ ਦਿੱਤਾ ਗਿਆ ਹੈ। ਸੂਤਰ ਦੱਸਦੇ ਹਨ ਕਿ ਇਸ ਪਿੰਡ ਵਿਚ ਇੱਕ ਧਨਾਢ ਪਰਿਵਾਰ ਦੀ ਕੋਠੀ ਦੀ ਮੁਰੰਮਤ ਲਈ ਤਿੰਨ ਚੈੱਕ ਦਿੱਤੇ ਗਏ ਹਨ। ਪਿੰਡ ਵਣਾਂਵਾਲਾ ਅਨੂੰ ਵਿਚ 388 ਘਰ ਹਨ ਜਦੋਂ ਕਿ ਮੁਰੰਮਤ ਦਾ ਪੈਸਾ 498 ਘਰਾਂ ਨੂੰ ਦਿੱਤਾ ਗਿਆ ਹੈ। ਪਿੰਡ ਮਿਠੜੀ ਵਿਚ ਕੋਠੀਆਂ ਵਾਲੇ ਦੋ ਭਰਾਵਾਂ ਨੂੰ ਪੰਦਰਾਂ ਪੰਦਰਾਂ ਹਜ਼ਾਰ ਦੇ ਚੈੱਕ ਦਿੱਤੇ ਗਏ ਹਨ ਜਦੋਂ ਕਿ ਮਜ਼ਦੂਰ ਇਨ•ਾਂ ਤੋਂ ਵਾਂਝੇ ਹਨ। ਏਦਾ ਡੇਢ ਦਰਜਨ ਪਿੰਡਾਂ ਵਿਚ ਹੋਇਆ ਹੈ। ਸਰਕਾਰੀ ਸੂਚਨਾ ਅਨੁਸਾਰ ਬਲਾਕ ਲੰਬੀ ਦੇ 55 ਪਿੰਡਾਂ ਦੇ 17494 ਘਰਾਂ ਨੂੰ ਪੈਸਾ ਵੰਡਿਆ ਗਿਆ ਹੈ। ਏਦਾ ਜਾਪਦਾ ਹੈ ਕਿ ਜਿਵੇਂ ਪੂਰੇ ਬਲਾਕ ਦੇ ਘਰਾਂ ਦੀ ਖਸਤਾ ਹਾਲਤ ਹੋਵੇ। ਬਾਕੀ ਪੰਜਾਬ ਦੇ ਪਿੰਡਾਂ ਵਿਚ ਮੁਰੰਮਤ ਵਾਸਤੇ ਪੈਸਾ ਨਹੀਂ ਮਿਲ ਰਿਹਾ ਹੈ।
                       ਪੇਂਡੂ ਵਿਕਾਸ ਤੇ ਪੰਚਾਇਤ ਵਿਭਾਗ ਨੇ 7 ਨਵੰਬਰ ਨੂੰ ਇੱਕੋ ਦਿਨ ਵਿਚ 9.50 ਕਰੋੜ ਰੁਪਏ ਭੇਜੇ ਸਨ ਜਦੋਂ ਕਿ 13 ਪਿੰਡਾਂ ਦੇ 2312 ਘਰਾਂ ਨੂੰ 3.72 ਕਰੋੜ ਰੁਪਏ 30 ਸਤੰਬਰ ਨੂੰ ਭੇਜੇ ਗਏ ਸਨ। ਹੁਣ ਐਨ ਚੋਣਾਂ ਤੋਂ ਪਹਿਲਾਂ ਇਹ ਚੈੱਕ ਵੰਡੇ ਗਏ ਹਨ ਅਤੇ ਕਈ ਪਿੰਡਾਂ ਵਿਚ ਗਰੀਬ ਲੋਕਾਂ ਨੇ ਰੌਲਾ ਰੱਪਾ ਵੀ ਪਾਇਆ ਹੈ।  ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਸੂਬਾ ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ ਦਾ ਪ੍ਰਤੀਕਰਮ ਸੀ ਕਿ ਹਲਕਾ ਲੰਬੀ ਵਿਚ ਗਰੀਬਾਂ ਦੇ ਬਹਾਨੇ ਹਾਕਮ ਧਿਰ ਨੇ 'ਆਪਣਿਆਂ' ਨੂੰ ਚੈੱਕ ਦੇ ਦਿੱਤੇ ਹਨ ਜਿਸ ਦੀ ਉੱਚ ਪੱਧਰੀ ਜਾਂਚ ਹੋਣੀ ਚਾਹੀਦੀ ਹੈ। ਉਨ•ਾਂ ਆਖਿਆ ਕਿ ਮਕਾਨ ਮੁਰੰਮਤ ਦੇ ਨਾਂਅ ਹੇਠ ਵੋਟਾਂ ਦੀ ਖਰੀਦੋ ਫਰੋਖਤ ਹੋ ਰਹੀ ਹੈ।
                                  ਗਲਤ ਚੈੱਕ ਵਾਪਸ ਲਏ ਜਾਣਗੇ : ਡਿਪਟੀ ਕਮਿਸ਼ਨਰ
ਡਿਪਟੀ ਕਮਿਸ਼ਨਰ ਮੁਕਤਸਰ ਸ੍ਰੀ ਸੁਮੀਤ ਜਾਰੰਗਲ ਦਾ ਕਹਿਣਾ ਸੀ ਕਿ ਸੇਮ ਪ੍ਰਭਾਵਿਤ ਪਿੰਡਾਂ ਵਾਸਤੇ ਜ਼ਿਲ•ੇ ਨੂੰ 45 ਕਰੋੜ ਰੁਪਏ ਮਕਾਨਾਂ ਦੀ ਮੁਰੰਮਤ ਵਾਸਤੇ ਮਿਲੇ ਹਨ ਜੋ ਲੋੜਵੰਦ ਪਰਿਵਾਰਾਂ ਨੂੰ ਦਿੱਤੇ ਜਾ ਰਹੇ ਹਨ। ਉਨ•ਾਂ ਤਰਕ ਦਿੱਤਾ ਕਿ ਕਈ ਵਾਰੀ ਇੱਕੋ ਮਕਾਨ ਦੇ ਵੱਖੋ ਵੱਖਰੇ ਕਮਰੇ ਵਿਚ ਦੋ ਦੋ ਪਰਿਵਾਰ ਰਹਿ ਰਹੇ ਹੁੰਦੇ ਹਨ ਜਿਸ ਕਰਕੇ ਮੁਰੰਮਤ ਵਾਲੇ ਮਕਾਨਾਂ ਦੀ ਗਿਣਤੀ ਵਧੀ ਹੈ। ਅਗਰ ਕਿਤੇ ਨਿਯਮਾਂ ਤੋਂ ਉਲਟ ਕਿਸੇ ਨੂੰ ਪੈਸਾ ਚਲਾ ਗਿਆ ਹੈ ਤਾਂ ਉਹ ਵਾਪਸ ਲਿਆ ਜਾਵੇਗਾ।

Saturday, December 24, 2016

                                ਘਾਲਾ-ਮਾਲਾ
             ਚੱਟ ਗਏ ਖ਼ਜ਼ਾਨੇ,ਲੰਬੀ ਦੇ ਪਖਾਨੇ
                               ਚਰਨਜੀਤ ਭੁੱਲਰ
ਬਠਿੰਡਾ :  ਮੁੱਖ ਮੰਤਰੀ ਦੇ ਹਲਕਾ ਲੰਬੀ ਦੇ ਪਖਾਨੇ ਖ਼ਜ਼ਾਨੇ ਨੂੰ ਚੱਟ ਗਏ ਹਨ। ਚੋਣਾਂ ਤੋਂ ਪਹਿਲਾਂ ਲੰਬੀ ਹਲਕੇ ਦੇ ਘਰ ਘਰ ਵਿਚ ਪਖਾਨੇ ਬਣ ਰਹੇ ਹਨ। ਪੰਜਾਬ ਵਿਚ ਪ੍ਰਤੀ ਪਖਾਨਾ 15 ਹਜ਼ਾਰ ਰੁਪਏ ਦਿੱਤੇ ਗਏ ਹਨ ਜਦੋਂ ਕਿ ਲੰਬੀ ਹਲਕੇ ਵਿਚ ਇਸੇ ਪਖਾਨੇ ਲਈ 28,400 ਰੁਪਏ ਦਿੱਤੇ ਜਾ ਰਹੇ ਹਨ। ਸਰਕਾਰੀ ਖ਼ਜ਼ਾਨੇ ਚੋਂ ਇਕੱਲੇ ਇਸ ਵੀ.ਆਈ.ਪੀ ਹਲਕੇ ਖਾਤਰ ਸੇਮ ਦਾ ਬਹਾਨਾ ਘੜ ਕੇ 22 ਕਰੋੜ ਰੁਪਏ ਵਾਧੂ ਜਾਰੀ ਕੀਤੇ ਗਏ ਹਨ। ਹਾਲਾਂ ਕਿ ਪੰਜਾਬ ਦੇ ਦੂਸਰੇ ਸੇਮ ਪ੍ਰਭਾਵਿਤ ਪਿੰਡਾਂ ਨੂੰ ਵੀ ਪ੍ਰਤੀ ਪਖਾਨਾ 15 ਹਜ਼ਾਰ ਹੀ ਮਿਲ ਰਹੇ ਹਨ। ਪੰਜਾਬ ਭਰ ਵਿਚ 4,18,384 ਘਰਾਂ ਵਿਚ ਪਖਾਨੇ ਬਣ ਰਹੇ ਹਨ ਜਿਸ ਤੋਂ ਸਭ ਤੋਂ ਜਿਆਦਾ ਪਖਾਨੇ ਜ਼ਿਲ•ਾ ਮੁਕਤਸਰ ਵਿਚ 55,169 ਬਣਨੇ ਹਨ ਜਿਨ•ਾਂ ਚੋਂ ਕਰੀਬ 30 ਹਜ਼ਾਰ ਪਖਾਨੇ ਇਕੱਲੇ ਲੰਬੀ ਹਲਕੇ ਵਿਚ ਬਣ ਰਹੇ ਹਨ। ਵੇਰਵਿਆਂ ਅਨੁਸਾਰ ਸਵੱਛ ਭਾਰਤ ਮਿਸ਼ਨ ਤਹਿਤ ਪ੍ਰਤੀ ਪਖਾਨਾ 15 ਹਜ਼ਾਰ ਦੀ ਰਾਸ਼ੀ ਪ੍ਰਵਾਨਿਤ ਹੈ ਜਿਸ ਵਿਚੋਂ 9 ਹਜ਼ਾਰ ਰੁਪਏ ਕੇਂਦਰ ਸਰਕਾਰ ਦੇ ਰਹੀ ਹੈ ਜਦੋਂ ਕਿ ਬਾਕੀ ਤਿੰਨ ਹਜ਼ਾਰ ਰਾਜ ਸਰਕਾਰ ਅਤੇ ਤਿੰਨ ਹਜ਼ਾਰ ਰੁਪਏ ਲਾਭਪਾਤਰੀ ਨੇ ਪਾਉਣੇ ਹਨ। ਪੰਜਾਬ ਸਰਕਾਰ ਨੇ ਆਪਣੀ ਅਤੇ ਲਾਭਪਾਤਰੀ ਦੀ ਹਿੱਸੇਦਾਰੀ ਵਾਲੀ ਪ੍ਰਤੀ ਪਖਾਨਾ 6 ਹਜ਼ਾਰ ਰੁਪਏ ਦੀ ਰਾਸ਼ੀ ਲਈ ਵਿਸ਼ਵ ਬੈਂਕ ਤੋਂ ਕਰਜ਼ਾ ਚੁੱਕਿਆ ਹੈ।
                        ਹਲਕਾ ਲੰਬੀ ਦਾ ਕੇਸ ਵੱਖਰਾ ਹੈ ਜਿਥੇ ਕਿ ਪੰਜਾਬ ਸਰਕਾਰ ਇਸ ਰਾਸ਼ੀ ਤੋਂ ਬਿਨ•ਾਂ ਪ੍ਰਤੀ ਪਖਾਨਾ 13,400 ਰੁਪਏ ਹੋਰਨਾਂ ਫੰਡਾਂ ਵਿਚੋਂ ਦੇ ਰਹੀ ਹੈ। ਮਲੋਟ ਡਵੀਜ਼ਨ ਨੂੰ ਪਖਾਨੇ ਉਸਾਰਨ ਵਾਸਤੇ 44 ਕਰੋੜ ਰੁਪਏ ਮਿਲ ਚੁੱਕੇ ਹਨ ਜਿਸ ਚੋਂ 22 ਕਰੋੜ ਹਲਕਾ ਲੰਬੀ ਲਈ ਵਾਧੂ ਫੰਡ ਦਿੱਤੇ ਗਏ ਹਨ। ਲੰਬੀ ਦੇ ਗਰੀਬ ਲੋਕਾਂ ਨੂੰ ਹੁਣ ਚੋਣਾਂ ਮੌਕੇ ਪਖਾਨੇ ਬਣਾ ਕੇ ਦੇਣ ਦੀ ਮੁਹਿੰਮ ਨੇ ਤੇਜੀ ਫੜੀ ਹੈ। ਕਈ ਪਿੰਡਾਂ ਵਿਚ ਤਾਂ ਕਾਗ਼ਜ਼ਾਂ ਵਿਚ ਹੀ ਪਖਾਨੇ ਬਣ ਗਏ ਹਨ ਜਾਂ ਫਿਰ ਪਖਾਨਾ ਬਣਾਉਣ ਦੇ ਨਾਮ ਹੇਠ ਸਿਰਫ਼ ਲਿਪਾਪੋਚੀ ਹੋਈ ਹੈ। ਪੰਜਾਬ ਦੇ 8469 ਪਿੰਡਾਂ ਵਿਚ ਮਿਸ਼ਨ ਸਵੱਛ ਪੰਜਾਬ ਤਹਿਤ 4.18 ਲੱਖ ਪਖਾਨੇ ਬਣ ਰਹੇ ਹਨ ਜਿਸ ਦਾ ਮਤਲਬ ਹੈ ਕਿ ਪ੍ਰਤੀ ਪਿੰਡ ਔਸਤਨ 49 ਪਖਾਨੇ ਬਣਨੇ ਹਨ। ਹਲਕਾ ਲੰਬੀ ਦੇ ਹਰ ਪਿੰਡ ਵਿਚ ਔਸਤਨ 425 ਪਖਾਨੇ ਬਣ ਰਹੇ ਹਨ। ਸੂਤਰ ਆਖਦੇ ਹਨ ਕਿ ਪਖਾਨਿਆਂ ਦੀ ਉਸਾਰੀ ਵਿਚ ਵੱਡਾ ਘਾਲਾ ਮਾਲਾ ਹੋਇਆ ਹੈ ਜਿਸ ਦੀ ਪੜਤਾਲ ਹੋਣੀ ਚਾਹੀਦੀ ਹੈ। ਬਹੁਤੇ ਘਰਾਂ ਵਿਚ ਸਿਰਫ਼ ਪਖਾਨੇ ਬਣਾਏ ਜਾਣ ਦੀ ਖਾਨਾਪੂਰਤੀ ਹੀ ਕੀਤੀ ਗਈ ਹੈ ਅਤੇ ਬਹੁਤਾ ਪੈਸਾ ਗੋਲ ਹੀ ਕੀਤਾ ਗਿਆ ਹੈ।
                         ਜਨ ਸਿਹਤ ਵਿਭਾਗ ਦੇ ਮਲੋਟ ਡਵੀਜ਼ਨ ਦੇ ਐਕਸੀਅਨ ਸ੍ਰੀ ਹਰਦੀਪ ਸਿੰਘ ਔਜਲਾ ਦਾ ਕਹਿਣਾ ਸੀ ਕਿ ਸੇਮ ਵਾਲਾ ਇਲਾਕਾ ਹੋਣ ਕਰਕੇ ਪਖਾਨੇ ਬਣਾਉਣ ਲਈ 22 ਕਰੋੜ ਰੁਪਏ ਦਾ ਜਿਆਦਾ ਖਰਚਾ ਹੋਇਆ ਹੈ। ਉਨ•ਾਂ ਆਖਿਆ ਕਿ 60 ਫੀਸਦੀ ਪਖਾਨੇ ਮੁਕੰਮਲ ਹੋ ਗਏ ਹਨ ਅਤੇ ਕਿਧਰੇ ਵੀ ਕੋਈ ਗੜਬੜ ਨਹੀਂ ਹੋਈ ਹੈ।  ਇੱਕ ਸੀਨੀਅਰ ਅਧਿਕਾਰੀ ਦਾ ਪ੍ਰਤੀਕਰਮ ਸੀ ਕਿ ਲੰਬੀ ਦੀ ਤਰ•ਾਂ ਪੰਜਾਬ ਦੇ ਬਾਕੀ ਸੇਮ ਪ੍ਰਭਾਵਿਤ ਪਿੰਡਾਂ ਨੂੰ ਪਖਾਨੇ ਬਣਾਉਣ ਲਈ ਲੰਬੀ ਦੀ ਤਰ•ਾਂ ਵੱਖਰੀ ਰਾਸ਼ੀ ਨਹੀਂ ਮਿਲੀ ਹੈ। ਮੁਕਤਸਰ ਡਵੀਜ਼ਨ ਦੇ ਐਕਸੀਅਨ ਯਾਦਵਿੰਦਰ ਸਿੰਘ ਢਿੱਲੋਂ ਦਾ ਕਹਿਣਾ ਸੀ ਕਿ ਉਨ•ਾਂ ਦੀ ਡਵੀਜ਼ਨ ਨੂੰ ਪ੍ਰਤੀ ਪਖਾਨਾ 15 ਹਜ਼ਾਰ ਦੀ ਰਾਸ਼ੀ ਹੀ ਮਿਲੀ ਹੈ ਅਤੇ 22,606 ਪਖਾਨਿਆਂ ਲਈ ਕਰੀਬ 7 ਕਰੋੜ ਦੀ ਰਾਸ਼ੀ ਪ੍ਰਾਪਤ ਹੋ ਚੁੱਕੀ ਹੈ। ਵੇਰਵਿਆਂ ਅਨੁਸਾਰ ਸੰਗਰੂਰ ਜ਼ਿਲ•ੇ ਨੂੰ ਪ੍ਰਤੀ ਪਿੰਡ ਔਸਤਨ 40 ਪਖਾਨੇ ਮਿਲੇ ਹਨ ਜਦੋਂ ਕਿ ਮਾਨਸਾ ਜ਼ਿਲ•ੇ ਨੂੰ ਪ੍ਰਤੀ ਪਿੰਡ ਔਸਤਨ 101 ਪਖਾਨੇ ਮਿਲੇ ਹਨ। ਬਠਿੰਡਾ ਜ਼ਿਲ•ੇ ਦੇ 173 ਪਿੰਡਾਂ ਵਿਚ 18,985 ਪਖਾਨੇ ਬਣ ਰਹੇ ਹਨ ਜਦੋਂ ਕਿ ਫਰੀਦਕੋਟ ਦੇ 195 ਪਿੰਡਾਂ ਵਿਚ 15467 ਪਖਾਨੇ ਬਣਨੇ ਹਨ।

Tuesday, December 20, 2016

                               'ਆਪ' ਦਾ ਪੈਂਤੜਾ  
          ਹਲਕਾ ਲੰਬੀ ਤੋਂ ਚੋਣ ਲੜੇਗਾ ਜਰਨੈਲ ?
                                 ਚਰਨਜੀਤ ਭੁੱਲਰ
ਬਠਿੰਡਾ  :  ਆਮ ਆਦਮੀ ਪਾਰਟੀ ਦੇ ਦਿੱਲੀ ਤੋਂ ਵਿਧਾਇਕ ਜਰਨੈਲ ਸਿੰਘ ਹਲਕਾ ਲੰਬੀ ਤੋਂ ਚੋਣ ਲੜਨਗੇ ? ਵਿਧਾਇਕ ਜਰਨੈਲ ਸਿੰਘ ਨੂੰ ਲੰਬੀ ਦੇ ਚੋਣ ਮੈਦਾਨ ਵਿਚ ਉਤਾਰਨ ਦਾ ਫੈਸਲਾ ਲੱਗਭਗ ਹੋ ਚੁੱਕਾ ਹੈ। ਸੂਤਰਾਂ ਦੀ ਮੰਨੀਏ ਤਾਂ 'ਆਪ' ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ 28 ਦਸੰਬਰ ਜਰਨੈਲ ਸਿੰਘ ਦੇ ਨਾਮ ਦਾ ਐਲਾਨ ਕਰਨਗੇ। ਹਲਕਾ ਲੰਬੀ ਦੇ ਪਿੰਡ ਕੋਲਿਆਂ ਵਾਲੀ ਵਿਚ 'ਆਪ' ਦੀ 28 ਦਸੰਬਰ ਨੂੰ ਰੈਲੀ ਹੋ ਰਹੀ ਹੈ ਜਿਸ ਵਿਚ 'ਆਪ' ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਪੁੱਜ ਰਹੇ ਹਨ। ਪਿਛਲੇ ਕੁਝ ਸਮੇਂ ਤੋਂ ਵਿਧਾਇਕ ਜਰਨੈਲ ਸਿੰਘ ਵਲੋਂ ਮਾਲਵਾ ਖਿੱਤੇ ਵਿਚ ਚੋਣ ਪ੍ਰਚਾਰ ਦੀ ਕਮਾਨ ਸੰਭਾਲੀ ਹੋਈ ਸੀ। 'ਆਪ' ਆਗੂ ਜਰਨੈਲ ਸਿੰਘ ਪੱਛਮੀ ਦਿੱਲੀ ਤੋਂ ਵਿਧਾਇਕ ਹਨ ਅਤੇ ਅਪਰੈਲ 2009 ਵਿਚ ਤਤਕਾਲੀ ਕੇਂਦਰੀ ਗ੍ਰਹਿ ਮੰਤਰੀ ਪੀ.ਚਿੰਦਬਮਰ ਤੇ ਜੁੱਤੀ ਸੁੱਟੇ ਜਾਣ ਮਗਰੋਂ ਉਹ ਚਰਚਾ ਵਿਚ ਆਏ ਸਨ। ਜਰਨੈਲ ਸਿੰਘ ਨੇ ਦਿੱਲੀ ਦੰਗਿਆ ਦੇ ਰੋਸ ਵਜੋਂ ਇਹ ਕਦਮ ਚੁੱਕਿਆ ਸੀ।
                     'ਆਪ' ਦੇ ਲੀਡਰਸ਼ਿਪ ਵਲੋਂ ਸਿੱਖ ਚਿਹਰਾ ਲੰਬੀ ਵਿਚ ਉਤਾਰੇ ਜਾਣ ਤੋਂ ਪਿਛਲੇ ਕੁਝ ਦਿਨਾਂ ਤੋਂ ਵਿਚਾਰ ਵਟਾਂਦਰਾ ਹੋ ਰਿਹਾ ਸੀ। ਪਿਛਲੇ ਦਿਨਾਂ ਵਿਚ ਮਜੀਠਾ ਹਲਕੇ ਤੋਂ ਐਡਵੋਕੇਟ ਹਿੰਮਤ ਸਿੰਘ ਸ਼ੇਰਗਿੱਲ ਨੂੰ ਉਮੀਦਵਾਰ ਵਜੋਂ ਐਲਾਨਣ ਲਈ ਖੁਦ ਅਰਵਿੰਦ ਕੇਜਰੀਵਾਲ ਮਜੀਠਾ ਆਏ ਸਨ। ਸੂਤਰ ਦੱਸਦੇ ਹਨ ਕਿ 'ਆਪ' ਕਨਵੀਨਰ ਅਰਵਿੰਦ ਕੇਜਰੀਵਾਲ ਵਲੋਂ ਲੰਬੀ ਹਲਕੇ ਤੋਂ ਜਰਨੈਲ ਸਿੰਘ ਨੂੰ ਉਮੀਦਵਾਰ ਐਲਾਨਣ ਦੀ ਸੰਭਾਵਨਾ ਹੈ। ਸੂਤਰ ਆਖਦੇ ਹਨ ਕਿ ਅਗਰ ਲੰਬੀ ਤੋਂ ਜਰਨੈਲ ਸਿੰਘ ਮੈਦਾਨ ਵਿਚ ਉਤਰਦੇ ਹਨ ਤਾਂ ਮੁਕਾਬਲਾ ਕਾਫੀ ਦਿਲਚਸਪ ਬਣ ਜਾਣਾ ਹੈ। ਕਾਂਗਰਸ ਪਾਰਟੀ ਤਰਫੋਂ ਵੀ ਹਾਲੇ ਤੱਕ ਹਲਕਾ ਲੰਬੀ ਤੋਂ ਆਪਣੇ ਉਮੀਦਵਾਰ ਦਾ ਐਲਾਨ ਨਹੀਂ ਕੀਤਾ ਗਿਆ ਹੈ ਅਤੇ ਕਾਂਗਰਸ ਨੇ ਗੁਰਮੀਤ ਸਿੰਘ ਖੁਡੀਆਂ ਅਤੇ ਰਾਜਾ ਵੜਿੰਗ ਨੂੰ ਆਪਣਾ ਉਮੀਦਵਾਰ ਬਣਾਉਣ ਦਾ ਮੂਡ ਬਣਾਇਆ ਹੈ। ਉਂਜ ਤਾਂ ਸ਼੍ਰੋਮਣੀ ਅਕਾਲੀ ਦਲ ਨੇ ਵੀ ਆਪਣੇ ਉਮੀਦਵਾਰ ਦਾ ਐਲਾਨ ਨਹੀਂ ਕੀਤਾ ਹੈ ਪਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਹੀ ਇਸ ਹਲਕੇ ਤੋਂ ਉਮੀਦਵਾਰ ਹੋਣਗੇ।
                       'ਆਪ' ਦੇ ਕਨਵੀਨਰ ਗੁਰਪ੍ਰੀਤ ਘੁੱਗੀ ਅਤੇ ਜਰਨੈਲ ਸਿੰਘ ਨੇ ਫੋਨ ਨਹੀਂ ਚੁੱਕਿਆ  ਜਦੋਂ ਕਿ ਇੱਕ ਸੀਨੀਅਰ ਆਗੂ ਨੇ ਨਾਮ ਗੁਪਤ ਰੱਖਣ ਦੀ ਸ਼ਰਤ ਤੇ ਜਰਨੈਲ ਸਿੰਘ ਦੀ ਲੰਬੀ ਤੋਂ ਉਮੀਦਵਾਰੀ ਦੀ ਪੁਸ਼ਟੀ ਕੀਤੀ। 'ਆਪ' ਵਲੋਂ 28 ਦਸੰਬਰ ਨੂੰ ਪਿੰਡ ਕੋਲਿਆਂ ਵਾਲੀ ਵਿਚ ਮਹਾਂ ਰੈਲੀ ਕੀਤੀ ਜਾ ਰਹੀ ਹੈ ਜਿਸ ਦੀ ਤਿਆਰੀ ਮੌਕੇ ਹੀ ਰੱਫੜ ਪੈ ਗਿਆ ਹੈ। ਸ਼੍ਰੋਮਣੀ ਅਕਾਲੀ ਦਲ ਦੇ ਜ਼ਿਲ•ਾ ਪ੍ਰਧਾਨ ਦਿਆਲ ਸਿੰਘ ਕੋਲਿਆਂ ਵਾਲੀ ਤੇ 'ਆਪ' ਆਗੂਆਂ ਨੇ ਇਲਜ਼ਾਮ ਲਾਏ ਹਨ ਕਿ ਉਸ ਵਲੋਂ ਰੈਲੀ ਵਿਚ ਅੜਿੱਕੇ ਖੜ•ੇ ਕੀਤੇ ਜਾ ਰਹੇ ਹਨ ਅਤੇ 'ਆਪ' ਆਗੂਆਂ ਨੂੰ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ। ਕੋਲਿਆਂ ਵਾਲੀ ਇਸ ਗੱਲੋਂ ਇਨਕਾਰ ਕਰਦੇ ਹਨ। ਉਨ•ਾਂ ਦਾ ਕਹਿਣਾ ਹੈ ਕਿ ਉਨ•ਾਂ ਨੇ ਸਿਰਫ ਏਨਾ ਆਖਿਆ ਸੀ ਕਿ ਰੈਲੀ ਸਟੇਡੀਅਮ ਵਿਚ ਕਰਨ ਦੀ ਥਾਂ ਕਿਤੇ ਹੋਰ ਜਗ•ਾ ਕਰ ਲਵੋ ਕਿਉਂਕਿ ਸਟੇਡੀਅਮ ਵਿਚ ਉਸਾਰੀ ਦਾ ਕੰਮ ਚੱਲ ਰਿਹਾ ਹੈ। ਸੂਤਰ ਦੱਸਦੇ ਹਨ ਕਿ 'ਆਪ' ਵਲੋਂ ਪਿੰਡ ਕੋਲਿਆਂ ਵਾਲੀ ਵਿਚ ਵੱਡਾ ਇਕੱਠ ਕਰਕੇ ਪੂਰੇ ਮਾਲਵੇ ਨੂੰ ਹਲੂਣਾ ਦੇਣ ਦੀ ਰਣਨੀਤੀ ਬਣਾਈ ਹੈ। 

Saturday, December 17, 2016

                                                                  ਘੁੱਗੀ ਦਾ ਫਿਲਮੀ ਹੱਲਾ
                                       'ਕਾਤਲ ਕਦੇ ਗੌਡ ਦੇ ਮੈਸੰਜਰ ਨਹੀਂ ਹੋ ਸਕਦੇ'
                                                                      ਚਰਨਜੀਤ ਭੁੱਲਰ
ਬਠਿੰਡਾ  : ਆਮ ਆਦਮੀ ਪਾਰਟੀ ਦੇ ਕਨਵੀਨਰ ਗੁਰਪ੍ਰੀਤ ਸਿੰਘ ਵੜੈਚ ਉਰਫ ਘੁੱਗੀ ਦੀ ਨਵੀਂ ਪੰਜਾਬੀ ਫਿਲਮ 'ਮੋਟਰ ਮਿੱਤਰਾਂ ਦੀ' ਤੋਂ ਨਵਾਂ ਕਲੇਸ਼ ਖੜ•ਾ ਹੋਣ ਦਾ ਡਰ ਬਣ ਗਿਆ ਹੈ। ਜਦੋਂ ਚੋਣ ਜ਼ਾਬਤੇ ਮਗਰੋਂ ਚੋਣਾਂ ਦਾ ਪ੍ਰਚਾਰ ਸ਼ੁਰੂ ਹੋ ਜਾਵੇਗਾ ਤਾਂ ਉਦੋਂ ਹੀ 30 ਦਸੰਬਰ ਨੂੰ ਇਹ ਫਿਲਮ ਰਲੀਜ਼ ਹੋਣੀ ਹੈ ਜੋ ਕਿ ਡੇਰਾਵਾਦ ਖ਼ਿਲਾਫ਼ ਹੈ। 'ਆਪ' ਦੇ ਕਨਵੀਨਰ ਗੁਰਪ੍ਰੀਤ ਘੁੱਗੀ ਦਾ ਫਿਲਮ ਵਿਚਲਾ ਡਾਇਲਾਗ 'ਕਾਤਲ ਕਦੇ ਗੌਡ ਦੇ ਮੈਸੰਜਰ ਨਹੀਂ ਹੋ ਸਕਦੇ' ਨਵੀਂ ਨਰਾਜ਼ਗੀ ਸਹੇੜ ਸਕਦਾ ਹੈ। ਇਸ ਪੰਜਾਬੀ ਫਿਲਮ ਦਾ ਟ੍ਰੇਲਰ ਲਾਂਚ ਹੋ ਚੁੱਕਾ ਹੈ ਜਿਸ ਨੂੰ ਯੂ ਟਿਊਬ ਤੇ 14.69 ਲੱਖ ਲੋਕ ਵੇਖ ਚੁੱਕੇ ਹਨ। ਫਿਲਮ ਦੇ ਨਿਰਦੇਸ਼ਕ ਅਮਿਤੋਜ ਮਾਨ ਹਨ ਅਤੇ ਸਿਤਾਰੇ ਵਿਰਕਮ ਰਾਂਝਾ,ਹੈਪੀ ਰਾਏਕੋਟੀ,ਯੋਗਰਾਜ ਅਤੇ ਗੁਰਪ੍ਰੀਤ ਘੁੱਗੀ ਆਦਿ ਹਨ। ਨਵੀਂ ਪੰਜਾਬੀ ਫਿਲਮ ਡੇਰਾਵਾਦ ਨੂੰ ਨੰਗਾ ਕਰਦੀ ਹੈ ਅਤੇ ਡੇਰਿਆਂ ਦਾ ਅੰਦਰਲਾ ਸੱਚ ਦਿਖਾਉਂਦੀ ਹੈ। ਭਾਵੇਂ ਇਸ ਫਿਲਮ ਨੂੰ ਕਿਸੇ ਇੱਕ ਵਿਸ਼ੇਸ਼ ਡੇਰੇ ਤੇ ਕੇਂਦਰਿਤ ਨਹੀਂ ਕੀਤਾ ਗਿਆ ਪਰ ਇਸ ਫਿਲਮ ਦੇ ਡਾਇਲਾਗ ਅਤੇ ਬਣਤਰ ਕਿਸੇ ਇੱਕ ਡੇਰੇ ਦੀ ਨਰਾਜ਼ਗੀ ਦਾ ਕਾਰਨ ਬਣ ਸਕਦੀ ਹੈ। ਉਸ ਡੇਰੇ ਦਾ ਪੰਜਾਬ ਵਿਚ ਵੱਡਾ ਵੋਟ ਬੈਂਕ ਹੈ।
                     ਦੂਸਰੀ ਤਰਫ਼ ਪੰਥਕ ਧਿਰਾਂ ਨੇ ਡੇਰਾਵਾਦ ਖ਼ਿਲਾਫ਼ ਬਣੀ ਇਸ ਫਿਲਮ ਦਾ ਸਵਾਗਤ ਕੀਤਾ ਹੈ। ਸਿਆਸੀ ਮਾਹਿਰ ਆਖਦੇ ਹਨ ਕਿ ਇਹ ਫਿਲਮ 'ਆਪ' ਨੂੰ ਡੇਰਾ ਵੋਟਰਾਂ ਤੋਂ ਦੂਰ ਅਤੇ ਪੰਥਕ ਵੋਟ ਦੇ ਨੇੜੇ ਵੀ ਸਕਦੀ ਹੈ। ਫਿਲਮ ਵਿਚ ਯੋਗਰਾਜ ਨੂੰ ਡੇਰਾ ਮੁਖੀ ਦਿਖਾਇਆ ਗਿਆ ਹੈ ਅਤੇ ਫਿਲਮ ਵਿਚ ਉਸ ਦੀ ਲੜਕੀਆਂ ਨਾਲ ਨੇੜਤਾ ਦਿਖਾਈ ਗਈ ਹੈ। ਇਹ ਫਿਲਮ ਬਣ ਤਾਂ ਕਾਫ਼ੀ ਪਹਿਲਾਂ ਸਮਾਂ ਚੁੱਕੀ ਸੀ ਪਰ ਰਲੀਜ਼ ਚੋਣਾਂ ਵਿਚ ਹੋ ਰਹੀ ਹੈ। 'ਆਪ' ਦੇ ਕਨਵੀਨਰ ਗੁਰਪ੍ਰੀਤ ਘੁੱਗੀ ਦਾ ਕਹਿਣਾ ਸੀ ਕਿ ਪੰਜਾਬੀ ਫਿਲਮ 'ਮੋਟਰ ਮਿੱਤਰਾਂ ਦੀ' ਡੇਰਾਵਾਦ ਖ਼ਿਲਾਫ਼ ਹੈ ਜਿਸ ਦਾ ਪੰਜਾਬ ਵਿਚ ਕਾਫ਼ੀ ਉਭਾਰ ਹੋ ਚੁੱਕਾ ਹੈ। ਉਨ•ਾਂ ਆਖਿਆ ਕਿ ਉਸ ਨੇ ਬਤੌਰ ਆਰਟਿਸਟ ਇਸ ਫਿਲਮ ਵਿਚ ਕੰਮ ਕੀਤਾ ਹੈ ਅਤੇ ਇਸ ਫਿਲਮ ਵਿਚ ਕਿਸੇ ਵਿਅਕਤੀ ਵਿਸ਼ੇਸ਼ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਗਿਆ ਹੈ। ਉਨ•ਾਂ ਆਖਿਆ ਕਿ ਅਗਰ ਕਿਸੇ ਤਰਫ਼ੋਂ ਕੋਈ ਪ੍ਰਤੀਕਰਮ ਹੈ ਤਾਂ ਉਹ ਫਿਲਮ ਦੇ ਨਿਰਦੇਸ਼ਕ ਅਤੇ ਨਿਰਮਾਤਾ ਨਾਲ ਗੱਲ ਕਰ ਸਕਦੇ ਹਨ। ਸੂਤਰ ਆਖਦੇ ਹਨ ਕਿ 'ਆਪ' ਵਲੋਂ ਚੋਣਾਂ ਮੌਕੇ ਗੁਰਪ੍ਰੀਤ ਘੁੱਗੀ ਦੀ 'ਅਰਦਾਸ' ਵਰਗੀ ਫਿਲਮ ਪਿੰਡਾਂ ਵਿਚ ਦਿਖਾਈ ਜਾ ਸਕਦੀ ਹੈ।
                    ਇਸੇ ਦੌਰਾਨ ਯੂਨਾਈਟਿਡ ਅਕਾਲੀ ਦਲ ਦੇ ਜਨਰਲ ਸਕੱਤਰ ਭਾਈ ਗੁਰਦੀਪ ਸਿੰਘ ਬਠਿੰਡਾ ਦਾ ਕਹਿਣਾ ਸੀ ਕਿ ਉਨ•ਾਂ ਦਾ ਸਿਆਸੀ ਤੌਰ ਤੇ ਗੁਰਪ੍ਰੀਤ ਘੁੱਗੀ ਨਾਲ ਤਾਂ ਕੋਈ ਲੈਣਾ ਦੇਣਾ ਨਹੀਂ ਹੈ ਪਰ ਡੇਰਾਵਾਦ ਖ਼ਿਲਾਫ਼ ਬਣੀ ਇਸ ਫਿਲਮ ਦੀ ਉਹ ਸ਼ਲਾਘਾ ਕਰਦੇ ਹਨ ਅਤੇ ਇਸ ਤਰਾਂ ਦੀਆਂ ਫਿਲਮਾਂ ਬਣਨੀਆਂ ਚਾਹੀਦੀਆਂ ਹਨ। ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਜ਼ਿਲ•ਾ ਪ੍ਰਧਾਨ ਪਰਮਿੰਦਰ ਸਿੰਘ ਬਾਲਿਆਂ ਵਾਲੀ ਦਾ ਪ੍ਰਤੀਕਰਮ ਸੀ ਕਿ ਪੰਜਾਬ ਵਿਚ ਡੇਰਾਵਾਦ ਨੇ ਬਿਖੇੜੇ ਖੜ•ੇ ਕੀਤੇ ਹਨ ਅਤੇ ਡੇਰਿਆਂ ਵਿਚ ਹੁੰਦੇ ਗਲਤ ਕੰਮਾਂ ਨੂੰ ਕੋਈ ਫਿਲਮ ਉਜਾਗਰ ਕਰਦੀ ਹੈ ਤਾਂ ਇਹ ਚੰਗੀ ਗੱਲ ਹੈ। ਡੇਰਿਆਂ ਦੀ ਅੰਦਰਲੀ ਗੱਲ ਬਾਹਰ ਆਉਣੀ ਚਾਹੀਦੀ ਹੈ।
                     ਮੁਤਵਾਜ਼ੀ ਜਥੇਦਾਰ ਭਾਈ ਬਲਜੀਤ ਸਿੰਘ ਦਾਦੂਵਾਲ ਨੇ ਖੁੱਲ• ਕੇ ਆਖਿਆ ਕਿ ਫਿਲਮਾਂ ਤਾਂ ਸਮਾਜ ਦਾ ਸ਼ੀਸ਼ਾ ਦਿਖਾਉਂਦੀਆਂ ਹਨ ਅਤੇ ਡੇਰਾਵਾਦ ਦਾ ਪਾਖੰਡ ਬੇਪਰਦ ਹੋਣਾ ਚਾਹੀਦਾ ਹੈ। ਉਹ ਸਲਾਘਾ ਕਰਦੇ ਹਨ ਕਿ ਇਸ ਫਿਲਮ ਰਾਹੀਂ ਡੇਰਾਵਾਦ ਦਾ ਸੱਚ ਦਿਖਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਹੈ। ਉਨ•ਾਂ ਆਖਿਆ ਕਿ ਫਿਲਮ ਦਾ ਡਾਇਲਾਗ 'ਕਾਤਲ ਕਦੇ ਗੌਡ ਦੇ ਮੈਸੰਜਰ ਨਹੀਂ ਹੋ ਸਕਦੇ' ਵੀ ਬਿਲਕੁਲ ਸੱਚ ਹੈ ਜਿਸ ਦਾ ਕਿਸੇ ਡੇਰੇ ਨੂੰ ਗੁੱਸਾ ਨੂੰ ਨਹੀਂ ਕਰਨਾ ਚਾਹੀਦਾ ਹੈ। ਜਦੋਂ ਇਸ ਪੱਤਰਕਾਰ ਨੇ ਇੱਕ ਡੇਰੇ ਦੇ ਆਗੂ ਨਾਲ ਗੱਲ ਕੀਤੀ ਤਾਂ ਉਨ•ਾਂ ਆਖਿਆ ਕਿ ਉਨ•ਾਂ ਨੇ ਇਸ ਫਿਲਮ ਦਾ ਟ੍ਰੇਲਰ ਨਹੀਂ ਦੇਖਿਆ ਹੈ, ਟ੍ਰੇਲਰ ਦੇਖਣ ਮਗਰੋਂ ਹੀ ਟਿੱਪਣੀ ਕੀਤੀ ਜਾ ਸਕਦੀ ਹੈ। 

Thursday, December 15, 2016

                                  ਬਾਦਲਾਂ ਦਾ ਚੋਗਾ
               ਪੁਲੀਸ ਦੇ ਲਾਈ 'ਸਿਆਸੀ ਫੀਤੀ'
                                 ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਚੋਣਾਂ ਤੋਂ ਪਹਿਲਾਂ ਕਰੀਬ ਅੱਠ ਹਜ਼ਾਰ ਸਿਪਾਹੀ 'ਸਿਆਸੀ ਫੀਤੀ' ਦਾ ਚੋਗਾ ਚੁਗਣਗੇ।  ਇਨ•ਾਂ ਦੇ ਮੋਢਿਆਂ ਤੇ ਫੀਤੀ ਤਾਂ ਹੌਲਦਾਰ ਵਾਲੀ ਸਜਾ ਦਿੱਤੀ ਹੈ ਪ੍ਰੰਤੂ ਇਨ•ਾਂ ਨੂੰ ਖ਼ਜ਼ਾਨੇ ਚੋਂ ਤਨਖਾਹ ਸਿਪਾਹੀ ਵਾਲੀ ਹੀ ਮਿਲੇਗੀ। ਮਤਲਬ ਹੈ ਕਿ ਸਰਕਾਰ ਨੇ ਇਨ•ਾਂ ਨੂੰ ਹੌਲਦਾਰ (ਲੋਕਲ ਰੈਂਕ) ਦੇਣਾ ਹੈ। ਹਾਕਮ ਧਿਰ ਨੇ ਵਿਧਾਨ ਸਭਾ ਚੋਣਾਂ 2012 ਤੋਂ ਐਨ ਪਹਿਲਾਂ ਵੀ ਥੋਕ ਵਿਚ ਏਦਾ ਹੀ ਲੋਕਲ ਰੈਂਕ ਦਿੱਤੇ ਸਨ। ਹੁਣ ਚੋਣ ਜ਼ਾਬਤੇ ਤੋਂ ਐਨ ਪਹਿਲਾਂ ਪੁਲੀਸ ਨੂੰ ਖੁਸ਼ ਕਰਨ ਖਾਤਰ ਫੀਤੀ ਦਾ ਚੋਗਾ ਪਾਇਆ ਹੈ। ਇਵੇਂ ਹੀ ਕਰੀਬ ਇੱਕ ਹਜ਼ਾਰ ਹੌਲਦਾਰਾਂ ਦੇ ਮੋਢੇ ਤੇ ਏ.ਐਸ.ਆਈ ਦਾ ਸਟਾਰ ਲਾਇਆ ਹੈ ਪਰ ਇਹ ਸਟਾਰ ਵਾਲੇ ਏ.ਐਸ.ਆਈ ਖ਼ਜ਼ਾਨੇ ਚੋਂ ਤਨਖਾਹ ਹੌਲਦਾਰ ਵਾਲੀ ਹੀ ਲੈਣਗੇ। ਵੇਰਵਿਆਂ ਅਨੁਸਾਰ ਬਠਿੰਡਾ, ਮਾਨਸਾ ਅਤੇ ਮੁਕਤਸਰ ਦੇ 1375 ਸਿਪਾਹੀਆਂ (16 ਸਾਲਾਂ ਵਾਲੇ) ਨੂੰ ਹੌਲਦਾਰ ਦੀ ਫੀਤੀ ਲਾਈ ਹੈ। ਇਨ•ਾਂ ਤੋਂ ਇਲਾਵਾ ਟਰੇਨਿੰਗ ਕਰ ਰਹੇ 313 ਸਿਪਾਹੀਆਂ ਨੂੰ ਵੀ ਪੱਕੇ ਹੌਲਦਾਰ ਬਣਾਇਆ ਹੈ। ਇਵੇਂ ਹੀ 150 ਹੌਲਦਾਰਾਂ ਨੂੰ ਪੱਕਾ ਏ.ਐਸ.ਆਈ ਅਤੇ 79 ਪੱਕੇ ਸਬ ਇੰਸਪੈਕਟਰ ਬਣਾਏ ਹਨ। ਚੋਣ ਜ਼ਾਬਤੇ ਦੇ ਡਰੋਂ ਹਾਕਮ ਧਿਰ ਹੁਣ ਨਿਯਮਾਂ ਨੂੰ ਵੀ ਦਾਅ ਤੇ ਲਾ ਰਹੀ ਹੈ।
                         ਟਰੇਨਿੰਗ ਕਰਨ ਵਾਲੇ ਇਨ•ਾਂ ਸਿਪਾਹੀਆਂ ਅਤੇ ਹੌਲਦਾਰਾਂ ਦੀ ਟਰੇਨਿੰਗ ਪੂਰੀ ਹੋਣ ਤੋਂ ਪਹਿਲਾਂ ਹੀ ਅਗਲੀ ਤਰੱਕੀ ਕਰ ਦਿੱਤੀ ਗਈ ਹੈ ਜਦੋਂ ਕਿ ਇਨ•ਾਂ ਦਾ ਸੀ-ਵਨ ਬਣੀ ਨਹੀਂ ਹੈ। ਸਰਕਾਰ ਨੇ ਕਾਹਲੀ ਨਾਲ ਐਲੋਕੇਸ਼ਨ ਕੀਤੀ ਹੈ ਸੂਤਰ ਦੱਸਦੇ ਹਨ ਕਿ ਨਿਯਮਾਂ ਅਨੁਸਾਰ ਜਦੋਂ ਵੀ ਕੋਈ ਸਿਪਾਹੀ ਜਾਂ ਹੌਲਦਾਰ ਆਦਿ ਆਪਣੀ ਟਰੇਨਿੰਗ ਮੁਕੰਮਲ ਕਰਦਾ ਹੈ ਤਾਂ ਉਸ ਦੀ ਸੀ-ਵਨ,ਡੀ-ਵਨ (ਸੀਨੀਆਰਤਾ ਲਿਸਟ) ਬਣਦੀ ਹੈ ਜਿਸ ਦੇ ਅਧਾਰ ਤੇ ਪੰਜਾਬ ਪੁਲੀਸ ਵਲੋਂ ਐਲੋਕੇਸ਼ਨ ਕੀਤੀ ਜਾਂਦੀ ਹੈ। ਇਸ ਐਲੋਕੇਸ਼ਨ ਮਗਰੋਂ ਵਿਭਾਗੀ ਤਰੱਕੀ ਕਮੇਟੀ ਵਲੋਂ ਇਨ•ਾਂ ਐਲੋਕੇਸ਼ਨ ਦੇ ਅਧਾਰ ਤੇ ਹੀ ਮੁਲਾਜ਼ਮਾਂ ਨੂੰ ਤਰੱਕੀ ਦਿੱਤੀ ਜਾਂਦੀ ਹੈ। ਹੁਣ ਇੰਜ ਹੋਇਆ ਹੈ ਕਿ ਟਰੇਨਿੰਗ ਮੁਕੰਮਲ ਹੋਣ ਤੋਂ ਪਹਿਲਾਂ ਹੀ ਐਲੋਕੇਸ਼ਨ ਕਰ ਦਿੱਤੀ ਗਈ ਹੈ। ਸਰਕਾਰੀ ਸੂਤਰ ਦੱਸਦੇ ਹਨ ਕਿ ਸਰਕਾਰ ਨੂੰ ਕਾਹਲੀ ਹੈ ਕਿ ਚੋਣ ਜ਼ਾਬਤੇ ਤੋਂ ਪਹਿਲਾਂ ਪਹਿਲਾਂ ਫੀਤੀਆਂ ਅਤੇ ਸਟਾਰ ਮੁਲਾਜ਼ਮਾਂ ਦੇ ਲਾਉਣੇ ਹਨ।
                       ਦੱਸਣਯੋਗ ਹੈ ਕਿ ਪੰਜਾਬ ਸਰਕਾਰ ਨੇ ਕੁਝ ਵਰ•ੇ ਪਹਿਲਾਂ ਲੋਕਲ ਰੈਂਕ ਦੇਣਾ ਬੰਦ ਵੀ ਕਰ ਦਿੱਤਾ ਸੀ ਪਰ ਹੁਣ ਚੋਣਾਂ ਤੋਂ ਪਹਿਲਾਂ ਲੋਕਲ ਰੈਂਕ ਦੇਣਾ ਮੁੜ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਸੂਤਰਾਂ ਅਨੁਸਾਰ ਹੁਣ ਅੱਠ ਹਜ਼ਾਰ ਸਿਪਾਹੀਆਂ ਦੇ ਹੌਲਦਾਰੀ ਦੀ ਫੀਤੀ ਲਾਈ ਹੈ, ਉਨ•ਾਂ ਸਿਪਾਹੀਆਂ ਵਲੋਂ ਲੋੜੀਦਾ ਬੀ-ਵਨ ਟੈਸਟ ਪਾਸ ਨਹੀਂ ਕੀਤਾ ਹੋਇਆ ਹੈ। ਸੂਤਰ ਆਖਦੇ ਹਨ ਕਿ ਪਿਛਲੇ ਸਮੇਂ ਤੋਂ ਪੁਲੀਸ ਘੁੱਟਣ ਮਹਿਸੂਸ ਕਰਦੀ ਆ ਰਹੀ ਹੈ ਅਤੇ ਹਾਕਮ ਧਿਰ ਪ੍ਰਤੀ ਰੋਹ ਵੀ ਪੁਲੀਸ ਅੰਦਰ ਵਧਿਆ ਹੈ। ਹਾਕਮ ਧਿਰ ਨੇ ਇਸ ਰੋਹ ਨੂੰ ਠੰਢਾ ਕਰਨ ਵਾਸਤੇ ਅੱਜ ਜਲੰਧਰ ਵਿਚ 'ਫੀਤੀ ਵੰਡ ਸਮਾਗਮ' ਕੀਤਾ ਹੈ। ਏ.ਡੀ.ਜੀ.ਪੀ (ਪ੍ਰਸ਼ਾਸਨ) ਦਿਨਕਰ ਗੁਪਤਾ ਦਾ ਪੱਖ ਲੈਣ ਲਈ ਵਾਰ ਵਾਰ ਫੋਨ ਕੀਤਾ ਪਰ ਉਨ•ਾਂ ਫੋਨ ਅਟੈਂਡ ਨਹੀਂ ਕੀਤਾ।

Tuesday, December 13, 2016

                                             ਚੋਣ ਦੰਗਲ
                   ਚਾਰ ਹਜ਼ਾਰ 'ਅਕਾਲੀ' ਕਲੱਬ ਬਣਾਏ !
                                          ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਸਰਕਾਰ ਨੇ ਅਗਾਮੀ ਚੋਣਾਂ ਤੋਂ ਐਨ ਪਹਿਲਾਂ ਕਰੀਬ ਚਾਰ ਹਜ਼ਾਰ ਨੌਜਵਾਨ ਕਲੱਬ ਖੜ•ੇ ਕਰ ਦਿੱਤੇ ਹਨ ਜਿਨ•ਾਂ ਨੂੰ ਹੁਣ ਧੜਾਧੜ ਸਪੋਰਟਸ ਕਿੱਟਾਂ ਦੀ ਵੰਡ ਕੀਤੀ ਜਾ ਰਹੀ ਹੈ। ਜੋ ਪੁਰਾਣੇ ਪੇਂਡੂ ਕਲੱਬ ਹਨ, ਉਨ•ਾਂ ਨੂੰ ਛੱਡ ਕੇ ਪਹਿਲਾਂ ਹਾਕਮ ਧਿਰ ਨੇ 'ਆਪਣੇ' ਨੌਜਵਾਨ ਕਲੱਬ ਬਣਾਏ ਹਨ, ਹੁਣ ਇਨ•ਾਂ ਕਲੱਬਾਂ ਨੂੰ ਕਿੱਟਾਂ ਦੀ ਵੰਡ ਜਾਰੀ ਹੈ। ਇਨ•ਾਂ ਯੁਵਕ ਕਲੱਬਾਂ ਨੂੰ ਦਸਮੇਸ਼ ਕਲੱਬ ਦਾ ਨਾਮ ਦਿੱਤਾ ਗਿਆ ਹੈ। ਵਰਿ•ਆਂ ਤੋਂ ਕੰਮ ਕਰਨ ਵਾਲੇ ਪੇਂਡੂ ਕਲੱਬ ਹੁਣ ਖੂੰਜੇ ਲਾ ਦਿੱਤੇ ਗਏ ਹਨ ਜਦੋਂ ਕਿ ਰਾਤੋਂ ਰਾਤ ਬਣੇ ਕਲੱਬਾਂ ਦੀ ਚੌਧਰ ਕਾਇਮ ਕਰ ਦਿੱਤੀ ਗਈ ਹੈ। ਫਿਰੋਜ਼ਪੁਰ ਤੇ ਫਾਜਿਲਕਾ ਜ਼ਿਲ•ੇ ਵਿਚ ਨਵੇਂ ਕਲੱਬ ਬਣਾਉਣ ਦੇ ਮਾਮਲੇ ਵਿਚ ਸਾਰੇ ਰਿਕਾਰਡ ਤੋੜ ਦਿੱਤੇ ਗਏ ਹਨ।ਵੇਰਵਿਆਂ ਅਨੁਸਾਰ ਫਿਰੋਜ਼ਪੁਰ ਵਿਚ ਹੁਣ ਥੋੜੇ ਸਮੇਂ ਵਿਚ ਹੀ 577 ਨਵੇਂ ਕਲੱਬ ਬਣਾ ਦਿੱਤੇ ਗਏ ਹਨ ਜਦੋਂ ਕਿ ਇਸ ਜ਼ਿਲ•ੇ ਵਿਚ 603 ਕਲੱਬ ਪਹਿਲਾਂ ਹੀ ਸਨ। ਜ਼ਿਲ•ੇ ਵਿਚ ਨੌਜਵਾਨ ਕਲੱਬਾਂ ਦੀ ਗਿਣਤੀ 1180 ਹੋ ਗਈ ਹੈ ਜੋ ਨਹਿਰੂ ਯੁਵਾ ਕੇਂਦਰ ਨਾਲ ਜੁੜੇ ਹੋਏ ਹਨ, ਉਹ ਕਲੱਬ ਵੱਖਰੇ ਹਨ। ਇਵੇਂ ਹੀ ਜ਼ਿਲ•ਾ ਫਾਜਿਲਕਾ ਦੇ ਪਿੰਡਾਂ ਵਿਚ 572 ਨਵੇਂ ਕਲੱਬ ਬਣਾ ਦਿੱਤੇ ਗਏ ਹਨ ਜਦੋਂ ਕਿ ਪਹਿਲਾਂ ਇਸ ਜ਼ਿਲ•ੇ ਵਿਚ 67 ਕਲੱਬ ਸਨ। ਸੂਤਰ ਦੱਸਦੇ ਹਨ ਕਿ ਇਹ ਨਵੇਂ ਕਲੱਬ ਅਕਾਲੀ ਪੱਖੀ ਹਨ। ਖੇਡ ਵਿਭਾਗ ਵਲੋਂ ਪੰਜਾਬ ਭਰ ਵਿਚ 75 ਕਰੋੜ ਰੁਪਏ ਦੀਆਂ ਸਪੋਰਟਸ ਕਿੱਟਾਂ ਦੀ ਵੰਡ ਕੀਤੀ ਜਾ ਰਹੀ ਹੈ। ਇਨ•ਾਂ ਕਿੱਟਾਂ ਦੀ ਗੁਣਵਤਾ ਨੂੰ ਲੈ ਕੇ ਪਹਿਲਾਂ ਹੀ ਉਂਗਲ ਉੱਠੀ ਹੈ।
                         ਜ਼ਿਲ•ਾ ਸਪੋਰਟਸ ਅਫਸਰ ਫਾਜਿਲਕਾ ਸ੍ਰੀ ਬਲਵੰਤ ਸਿੰਘ ਦਾ ਕਹਿਣਾ ਸੀ ਕਿ ਸਪੋਰਟਸ ਕਿੱਟਾਂ ਦੀ ਵੰਡ ਕੀਤੀ ਜਾ ਰਹੀ ਹੈ ਅਤੇ ਲਾਭਪਾਤਰੀਆਂ ਦੀ ਚੋਣ ਲਈ ਬਕਾਇਦਾ ਕਮੇਟੀ ਬਣੀ ਹੋਈ ਹੈ। ਖੇਡ ਕਿੱਟਾਂ ਕੇਵਲ ਰਜਿਸਟਰਡ ਕਲੱਬਾਂ ਨੂੰ ਦਿੱਤੀਆਂ ਜਾ ਰਹੀਆਂ ਹਨ ਅਤੇ ਕੋਈ ਪੱਖਪਾਤ ਨਹੀਂ ਕੀਤਾ ਜਾਂਦਾ ਹੈ। ਦੱਸਣਯੋਗ ਹੈ ਕਿ ਨਵੇਂ ਕਲੱਬ ਯੁਵਕ ਸੇਵਾਵਾਂ ਵਿਭਾਗ ਪੰਜਾਬ ਨਾਲ ਰਜਿਸਟਰਡ ਕੀਤਾ ਜਾ ਰਿਹਾ ਹੈ। ਯੁਵਕ ਸੇਵਾਵਾਂ ਵਿਭਾਗ ਦੇ ਪੰਜਾਬ ਵਿਚ ਪਹਿਲਾਂ 6991 ਯੁਵਕ ਭਲਾਈ ਕਲੱਬ ਸਨ। ਹੁਣ ਪੰਜਾਬ ਵਿਚ 3861 ਨਵੇਂ ਕਲੱਬ ਬਣਾ ਦਿੱਤੇ ਗਏ ਹਨ ਜਿਸ ਨਾਲ ਕਲੱਬਾਂ ਦੀ ਕੁੱਲ ਗਿਣਤੀ 10,852 ਹੋ ਗਈ ਹੈ। ਵੇਰਵੇ ਮਿਲੇ ਹਨ ਕਿ ਜ਼ਿਲ•ਾ ਫਾਜਿਲਕਾ ਤੇ ਫਿਰੋਜ਼ਪੁਰ ਤੋਂ ਇਲਾਵਾ ਹਲਕਾ ਲੰਬੀ ਦੇ ਇੱਕ ਇੱਕ ਪਿੰਡ ਕਈ ਕਈ ਕਲੱਬ ਬਣਾ ਦਿੱਤੇ ਗਏ ਹਨ। ਜ਼ਿਲ•ਾ ਮੁਕਤਸਰ ਵਿਚ 121 ਕਲੱਬ ਨਵੇਂ ਬਣਾਏ ਗਏ ਹਨ ਜਦਕਿ ਇਸ ਜ਼ਿਲ•ੇ ਵਿਚ 165 ਕਲੱਬ ਪੁਰਾਣੇ ਸਨ। ਜ਼ਿਲ•ਾ ਖੇਡ ਅਫਸਰ ਮੁਕਤਸਰ ਸੁਨੀਲ ਕੁਮਾਰ ਦਾ ਕਹਿਣਾ ਸੀ ਕਿ ਹਰ ਹਲਕੇ ਨੂੰ ਡੇਢ ਡੇਢ ਸੌ ਸਪੋਰਟਸ ਕਿੱਟਾਂ ਦਿੱਤੀਆਂ ਗਈਆਂ ਹਨ ਅਤੇ ਕੋਈ ਵੀ ਰਜਿਸਟਰਡ ਕਲੱਬ ਇਹ ਕਿੱਟ ਲੈ ਸਕਦਾ ਹੈ। ਸੂਤਰ ਆਖਦੇ ਹਨ ਕਿ ਹਲਕਾ ਇੰਚਾਰਜ ਅਤੇ ਵਿਧਾਇਕ ਦੀ ਸਿਫਾਰਸ਼ ਤੇ ਹੀ ਕਿੱਟ ਦਿੱਤੀ ਜਾਂਦੀ ਹੈ। ਹਲਕਾ ਮੁਕਤਸਰ ਤੇ ਗਿੱਦੜਬਹਾ ਵਿਚ ਵੀ ਨਵੇਂ ਕਲੱਬ ਬਣਾਏ ਗਏ ਹਨ। ਬਠਿੰਡਾ ਜ਼ਿਲ•ੇ ਵਿਚ 171 ਕਲੱਬ ਨਵੇਂ ਬਣੇ ਜਦੋਂ ਕਿ ਪਟਿਆਲਾ ਵਿਚ 303 ਕਲੱਬ ਨਵੇਂ ਬਣੇ ਹਨ।
                     ਇਵੇਂ ਹੀ ਬਰਨਾਲਾ ਵਿਚ 150 ਕਲੱਬ,ਸੰਗਰੂਰ ਵਿਚ 59,ਤਰਨਤਾਰਨ ਵਿਚ 492,ਗੁਰਦਾਸਪੁਰ ਵਿਚ 247 ਅਤੇ ਕਪੂਰਥਲਾ ਵਿਚ 161 ਨਵੇਂ ਕਲੱਬ ਬਣਾਏ ਗਏ ਹਨ। ਜ਼ਿਲ•ਾ ਮੋਗਾ ਤੇ ਪਠਾਨਕੋਟ ਵਿਚ ਕੋਈ ਨਵਾਂ ਕਲੱਬ ਨਹੀਂ ਬਣਿਆ ਹੈ। ਨੈਸ਼ਨਲ ਅਵਾਰਡੀ ਸਰਬਜੀਤ ਸਿੰਘ ਜੇਠੂਕੇ ਦਾ ਪ੍ਰਤੀਕਰਮ ਸੀ ਕਿ ਜੋ ਵਰਿ•ਆਂ ਤੋਂ ਅਸਲ ਵਿਚ ਪਿੰਡਾਂ ਵਿਚ ਸੇਵਾ ਦੀ ਭਾਵਨਾ ਨਾਲ ਕੰਮ ਕਰ ਰਹੇ ਕਲੱਬ ਹਨ, ਉਨ•ਾਂ ਦੀ ਥਾਂ ਸਿਆਸੀ ਕਲੱਬ ਬਣਾ ਕੇ ਉਨ•ਾਂ ਨੂੰ ਰਿਊੜੀਆਂ ਵੰਡੀਆਂ ਜਾ ਰਹੀਆਂ ਹਨ ਜਿਸ ਨਾਲ ਜਿਥੇ ਪੇਂਡੂ ਨੌਜਵਾਨਾਂ ਵਿਚ ਵੰਡੀਆਂ ਪੈਣਗੀਆਂ, ਉਥੇ ਪੁਰਾਣੇ ਕਲੱਬਾਂ ਦਾ ਹੌਸਲਾ ਵੀ ਡਿੱਗੇਗਾ। ਦੱਸਣਯੋਗ ਹੈ ਕਿ ਜਦੋਂ ਵੀ ਚੋਣਾਂ ਆਉਂਦੀਆਂ ਹਨ ਤਾਂ ਪਿੰਡਾਂ ਵਿਚ ਕਲੱਬ ਖੜ•ੇ ਕਰ ਦਿੱਤੇ ਜਾਂਦੇ ਹਨ। ਸੂਤਰ ਆਖਦੇ ਹਨ ਕਿ ਜਿਨ•ਾਂ ਪਿੰਡਾਂ ਵਿਚ ਨੌਜਵਾਨ ਕਲੱਬ ਹਾਕਮ ਧਿਰ ਤੋਂ ਬਾਹਰ ਹਨ, ਉਨ•ਾਂ ਪਿੰਡਾਂ ਵਿਚ ਨਵੇਂ ਕਲੱਬ ਬਣਾਉਣ ਤੇ ਜ਼ੋਰ ਦਿੱਤਾ ਗਿਆ ਹੈ। 'ਆਪ' ਦੇ ਉਭਾਰ ਮਗਰੋਂ ਨੌਜਵਾਨਾਂ ਵੱਲ ਹਾਕਮ ਧਿਰ ਨੇ ਜਿਆਦਾ ਧਿਆਨ ਕੇਂਦਰਿਤ ਕੀਤਾ ਹੈ। ਪੱਖ ਜਾਣਨ ਲਈ ਖੇਡ ਵਿਭਾਗ ਪੰਜਾਬ ਦੇ ਡਾਇਰੈਕਟਰ ਨੂੰ ਫੋਨ ਕੀਤਾ ਜਿਨ•ਾਂ ਫੋਨ ਅਟੈਂਡ ਨਹੀਂ ਕੀਤਾ।

Monday, December 12, 2016

                                   'ਕਾਲੀ' ਕਰਤੂਤ
                   ਸ਼ਰਮ ਵਿਚ ਡੁੱਬਾ ਵਿਰਕ ਕਲਾਂ
                                   ਚਰਨਜੀਤ ਭੁੱਲਰ
ਬਠਿੰਡਾ  : ਬਠਿੰਡਾ ਜ਼ਿਲ•ੇ ਦਾ ਪਿੰਡ ਵਿਰਕ ਕਲਾਂ ਹੁਣ ਸ਼ਰਮ ਵਿਚ ਡੁੱਬਿਆ ਹੋਇਆ ਹੈ। ਕੋਈ ਵੀ ਮੂੰਹ ਖੋਲ•ਣ ਨੂੰ ਤਿਆਰ ਨਹੀਂ ਹੈ। ਹਰ ਨਿਆਣੇ ਸਿਆਣੇ ਨੇ ਚੁੱਪ ਵੱਟੀ ਹੋਈ ਹੈ। ਅਕਾਲੀ ਸਰਪੰਚ ਦੇ ਪਰਿਵਾਰ ਦੀ ਦਹਿਸ਼ਤ ਦਾ ਡਰ ਵੀ ਹਰ ਚਿਹਰੇ ਤੇ ਹੈ। ਦੱਸਣਯੋਗ ਹੈ ਕਿ ਸ਼ੁੱਕਰਵਾਰ ਵਾਲੇ ਦਿਨ ਅਕਾਲੀ ਸਰਪੰਚ ਜਗਦੇਵ ਸਿੰਘ ਦੇ ਲੜਕੇ ਲਖਵਿੰਦਰ ਸਿੰਘ ਉਰਫ ਲੱਖਾ ਨੇ ਪੁਲੀਸ ਦੇ ਹੌਲਦਾਰ ਦੀ ਪਹਿਲਾਂ ਕੁੱਟਮਾਰ ਕੀਤੀ ਅਤੇ ਮਗਰੋਂ ਹੌਲਦਾਰ ਨੂੰ ਨਿਰਵਸਤਰ ਕਰਕੇ ਪਿੰਡ ਵਿਚ ਟਰਾਲੀ ਤੇ ਬਿਠਾ ਕੇ ਘੁੰਮਾਇਆ। ਜ਼ਿਲ•ਾ ਪੁਲੀਸ ਨੇ ਤਾਂ ਆਪਣੀ ਤਰਫ਼ੋਂ ਕਾਰਵਾਈ ਕਰ ਦਿੱਤੀ ਹੈ ਪਰ ਪਿੰਡ ਇਸ 'ਕਾਲੇ ਕਾਰੇ' ਨੂੰ ਪਿੰਡ ਦੇ ਮੱਥੇ ਤੇ ਦਾਗ ਮੰਨ ਰਿਹਾ ਹੈ। ਪਿੰਡ ਵਾਲੇ ਦੱਸਦੇ ਹਨ ਕਿ ਲਖਵਿੰਦਰ ਸਿੰਘ ਤੇ ਪਹਿਲਾਂ ਵੀ ਕਈ ਕੇਸ ਦਰਜ ਹਨ। ਪਿੰਡ ਵਿਰਕ ਕਲਾਂ ਵਿਚ ਹੀ ਅੱਜ ਹਵਾਈ ਅੱਡਾ ਦਾ ਉਦਘਾਟਨ ਹੋਇਆ ਹੈ ਜਿਸ ਦਾ ਪੂਰੇ ਪਿੰਡ ਨੂੰ ਕਈ ਦਿਨਾਂ ਤੋਂ ਚਾਅ ਸੀ। ਉਦਘਾਟਨ ਤੋਂ ਪਹਿਲਾਂ ਹੀ ਪਿੰਡ ਵਿਚ ਇਹ ਭਾਣਾ ਵਰਤ ਗਿਆ ਜਿਸ ਨੇ ਪਿੰਡ ਦੀ ਖੁਸ਼ੀ ਦੇ ਰੰਗ ਵਿਚ ਭੰਗ ਪਾ ਦਿੱਤੀ ਹੈ। ਪਿੰਡ ਵਿਰਕ ਕਲਾਂ ਵਿਚ ਕਰੀਬ 2050 ਵੋਟਾਂ ਹਨ ਅਤੇ ਇਸ ਪਿੰਡ ਨੇ ਕਦੇ ਵੀ ਏਦਾ ਦੇ ਦਿਨ ਨਹੀਂ ਵੇਖੇ ਸਨ। ਪਿੰਡ ਦੇ ਮੌਜੂਦਾ ਅਕਾਲੀ ਸਰਪੰਚ ਜਗਦੇਵ ਸਿੰਘ ਨੇ ਆਪਣੇ ਵਿਰੋਧੀ ਅਕਾਲੀ ਨਿੰਦਰ ਸਿੰਘ ਨੂੰ 178 ਵੋਟਾਂ ਦੇ ਫਰਕ ਨਾਲ ਹਰਾਇਆ ਸੀ। ਪੁਲੀਸ ਨੇ ਅਕਾਲੀ ਸਰਪੰਚ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਸਰਪੰਚ ਦੇ ਘਰ ਇਕੱਲੇ ਡੰਗਰ ਬਚੇ ਹਨ ਅਤੇ ਬਾਕੀ ਪਰਿਵਾਰ ਫਰਾਰ ਹੈ।
                        ਅਕਾਲੀ ਸਰਪੰਚ ਜਗਦੇਵ ਸਿੰਘ ਦੇ ਦੋ ਲੜਕੇ ਲਖਵਿੰਦਰ ਸਿੰਘ ਅਤੇ ਪਰਗਟ ਸਿੰਘ ਹਨ ਜੋ ਕਿ ਬਹੁਤ ਥੋੜਾ ਪੜੇ ਹੋਏ ਹਨ। ਕਰੀਬ 25 ਏਕੜ ਪੈਲੀ ਦੇ ਮਾਲਕ ਜਗਦੇਵ ਸਿੰਘ ਦੇ ਲੜਕੇ ਲਖਵਿੰਦਰ ਸਿੰਘ ਨੇ ਕੁਝ ਅਰਸਾ ਪਹਿਲਾਂ ਪਿੰਡ ਦੇ ਗੁਰਲਾਭ ਸਿੰਘ ਦੇ ਸੱਟਾਂ ਮਾਰੀਆਂ ਸਨ ਜਿਸ ਸਬੰਧ ਵਿਚ ਲਖਵਿੰਦਰ ਸਿੰਘ ਤੇ ਧਾਰਾ 307 ਤਹਿਤ ਕੇਸ ਦਰਜ ਹੋਇਆ ਸੀ। ਅਕਾਲੀ ਸਰਪੰਚ ਜਗਦੇਵ ਸਿੰਘ ਖੁਦ ਪਿਛਲੇ ਦਿਨਾਂ ਵਿਚ ਹਸਪਤਾਲ ਦਾਖਲ ਰਿਹਾ ਹੈ ਅਤੇ ਉਸ ਨੂੰ ਲੀਵਰ ਤੇ ਗੁਰਦਿਆਂ ਦੀ ਸਰੀਰਕ ਤਕਲੀਫ਼ ਹੈ। ਪਿੰਡ ਦੇ ਲੋਕਾਂ ਨੇ ਦੱਸਿਆ ਕਿ ਲਖਵਿੰਦਰ ਲੱਖਾ ਇੱਕ ਦੋ ਦਫ਼ਾ ਪਿੰਡ ਵਿਚ ਕੁੱਟਿਆ ਵੀ ਗਿਆ ਹੈ। ਲੱਖਾ ਦੀ ਪਿੰਡ ਵਿਚ ਏਨੀ ਦਹਿਸ਼ਤ ਹੈ ਕਿ ਕੋਈ ਵੀ ਇਸ ਘਟਨਾ ਤੇ ਟਿੱਪਣੀ ਕਰਨ ਨੂੰ ਤਿਆਰ ਨਹੀਂ ਹੈ। ਕਈ ਮੋਹਤਬਾਰ ਲੋਕਾਂ ਨੇ ਬੀਤੇ ਕੱਲ ਤੋਂ ਹੀ ਫੋਨ ਬੰਦ ਕੀਤੇ ਹੋਏ ਹਨ। ਅੱਜ ਇਸ ਪੱਤਰਕਾਰ ਨੇ ਪਿੰਡ ਦੇ ਕਈ ਮੋਹਤਬਾਰਾਂ ਨਾਲ ਗੱਲ ਕੀਤੀ ਪਰ ਹਰ ਕਿਸੇ ਨੇ ਆਪਣਾ ਨਾਮ ਜੱਗ ਜ਼ਾਹਰ ਕਰਨ ਤੋਂ ਗੁਰੇਜ਼ ਕੀਤੀ। ਵਿਰਕ ਕਲਾਂ ਦੇ ਇੱਕ ਬਜ਼ੁਰਗ ਨੇ ਦੱਸਿਆ ਕਿ ਅਕਾਲੀ ਨੇਤਾ ਸਰਪੰਚ ਦੇ ਘਰ ਆਉਂਦੇ ਜਾਂਦੇ ਰਹੇ ਹਨ ਪਰ ਸਰਪੰਚ ਦੇ ਮੁੰਡੇ ਕਰਕੇ ਆਮ ਪਿੰਡ ਦੇ ਲੋਕ ਇਨ•ਾਂ ਨਾਲ ਪੰਗਾ ਲੈਣ ਤੋਂ ਡਰਦੇ ਹਨ। ਪਿੰਡ ਦੇ ਇੱਕ ਹੋਰ ਵਿਅਕਤੀ ਨੇ ਆਖਿਆ ਕਿ ' ਜਦੋਂ ਪੁਲੀਸ ਹੌਲਦਾਰ ਨੂੰ ਹੀ ਨਿਰਵਸਤਰ ਕਰ ਦਿੱਤਾ, ਤਾਂ ਆਮ ਆਦਮੀ ਦਾ ਕੀ ਵੱਟੀਦਾ ਹੈ।'
                      ਬਹੁਤੇ ਲੋਕਾਂ ਦੀ ਗੱਲਬਾਤ ਤੋਂ ਲੱਗਾ ਕਿ ਅੰਦਰੋਂ ਅੰਦਰੀ ਲੋਕ ਇਸ ਘਟਨਾ ਤੋਂ ਸ਼ਰਮਸਾਰ ਹਨ ਪਰ ਉਹ ਦਹਿਸ਼ਤ ਹੋਣ ਕਰਕੇ ਖੁੱਲ• ਕੇ ਬੋਲਣ ਨੂੰ ਤਿਆਰ ਨਹੀਂ ਹਨ।ਪਿੰਡ ਦੇ ਲੋਕਾਂ ਨੇ ਅੱਜ ਸਰਪੰਚ ਅਤੇ ਉਸ ਦੇ ਸੀਰੀ ਦੇ ਘਰ ਭੁੱਖੇ ਖੜ•ੇ ਪਸ਼ੂਆਂ ਨੂੰ ਹਰਾ ਚਾਰਾ ਪੁਆਇਆ। ਅੱਜ ਸਵੇਰ ਤੋਂ ਹੀ ਦੋ ਪਰਿਵਾਰ ਗਾਇਬ ਹੋ ਗਏ ਹਨ। ਪਿੰਡ ਵਿਰਕ ਕਲਾਂ ਦੇ ਪੰਚਾਇਤ ਮੈਂਬਰ ਗੁਰਮੀਤ ਸਿੰਘ ਦਾ ਕਹਿਣਾ ਸੀ ਕਿ ਪਿੰਡ ਵਿਚ ਹਵਾਈ ਅੱਡਾ ਅੱਜ ਚਾਲੂ ਹੋ ਗਿਆ ਹੈ ਜਿਸ ਨਾਲ ਪਿੰਡ ਹੁਣ ਦੇਸ਼ ਦੇ ਨਕਸ਼ੇ ਤੇ ਚਮਕ ਪਵੇਗਾ। ਉਨ•ਾਂ ਹੋਰ ਕੋਈ ਵੀ ਟਿੱਪਣੀ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਪਿੰਡ ਦੇ ਬਹੁਤੇ ਲੋਕਾਂ ਦਾ ਇਹ ਵੀ ਕਹਿਣਾ ਸੀ ਕਿ 'ਸਾਡੇ ਹਵਾਈ ਅੱਡੇ ਵਾਲੇ ਚਾਅ ਤਾਂ ਹੌਲਦਾਰ ਵਾਲੀ ਘਟਨਾ ਨੇ ਹੀ ਮਾਰ ਦਿੱਤੇ।' ਵੇਖਿਆ ਗਿਆ ਕਿ ਪਿੰਡ ਵਿਚ ਸਹਿਮ ਹੈ ਅਤੇ ਹਵਾਈ ਅੱਡੇ ਕਰਕੇ ਪਿੰਡ ਦੀ ਜੂਹ ਵਿਚ ਵੱਡੇ ਨੇਤਾ ਵੀ ਪੁੱਜੇ ਹੋਏ ਸਨ ਅਤੇ ਪੁਲੀਸ ਅਫਸਰ ਵੀ। ਹੁਣ ਪਿੰਡ ਵਾਲੇ ਪੁਲੀਸ ਦੀ ਪ੍ਰਤੀਕ੍ਰਿਆ ਵੱਖ ਦੇਖ ਰਹੇ ਹਨ।
                                                  ਪੁਲੀਸ ਨੇ ਗੁੱਸੇ ਵਿਚ ਗੱਡੀ ਭੰਨੀ
ਬਠਿੰਡਾ ਪੁਲੀਸ ਨੇ ਅੱਜ ਪਿੰਡ ਵਿਰਕ ਕਲਾਂ ਦੇ ਅਕਾਲੀ ਸਰਪੰਚ ਜਗਦੇਵ ਸਿੰਘ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਜਦਕਿ ਉਸ ਦਾ ਲੜਕਾ ਅਤੇ ਸੀਰੀ ਫਰਾਰ ਹਨ। ਥਾਣਾ ਸਦਰ ਬਠਿੰਡਾ ਦੀ ਪੁਲੀਸ ਨੇ ਐਫ.ਆਈ.ਨੰਬਰ 99 ਤਹਿਤ ਅਕਾਲੀ ਸਰਪੰਚ ਜਗਦੇਵ ਸਿੰਘ, ਉਸਦੇ ਲੜਕੇ ਲਖਵਿੰਦਰ ਸਿੰਘ ਅਤੇ ਸੀਰੀ ਬੋਘੜ ਸਿੰਘ ਤੇ ਧਾਰਾ 365, 353, 186, 332,382 ਤਹਿਤ ਕੇਸ ਦਰਜ ਕਰ ਲਿਆ ਹੈ। ਦੱਸਣਯੋਗ ਹੈ ਕਿ ਸ਼ੁੱਕਰਵਾਰ ਦੀ ਸ਼ਾਮ ਨੂੰ ਅਕਾਲੀ ਸਰਪੰਚ ਦੇ ਲੜਕੇ ਲਖਵਿੰਦਰ ਸਿੰਘ ਅਤੇ ਉਸ ਦੇ ਸੀਰੀ ਬੋਘੜ ਸਿੰਘ ਨੇ ਗਸ਼ਤ ਕਰ ਰਹੇ ਹੌਲਦਾਰ ਮਲਕੀਤ ਸਿੰਘ ਅਤੇ ਹੋਮਗਾਰਡ ਜਵਾਨ ਰਜਿੰਦਰ ਸਿੰਘ ਨੂੰ ਮਾਮੂਲੀ ਤਕਰਾਰ ਮਗਰੋਂ ਘੇਰ ਲਿਆ ਸੀ। ਹੌਲਦਾਰ ਦੀ ਕੁੱਟਮਾਰ ਕਰਨ ਮਗਰੋਂ ਟਰਾਲੀ ਵਿਚ ਬਿਠਾ ਕੇ ਪਿੰਡ ਵਿਚ ਘੁੰਮਾਇਆ ਸੀ। ਹੋਮਗਾਰਡ ਜਵਾਨ ਭੱਜਣ ਵਿਚ ਸਫਲ ਹੋ ਗਿਆ ਸੀ। ਹੌਲਦਾਰ ਮਲਕੀਤ ਸਿੰਘ ਬੀਤੇ ਕੱਲ ਸਿਵਲ ਹਸਪਤਾਲ ਬਠਿੰਡਾ ਵਿਚ ਦਾਖਲ ਕਰਾਇਆ ਗਿਆ ਸੀ। ਅੱਜ ਸਵੇਰ ਤੋਂ ਹੀ ਮਲਕੀਤ ਸਿੰਘ ਹਸਪਤਾਲ ਤੋਂ ਗਾਇਬ ਹੈ। ਹੌਲਦਾਰ ਮਲਕੀਤ ਸਿੰਘ ਨੇ ਗੁਪਤ ਸਰੋਤ ਰਾਹੀਂ ਇਸ ਪੱਤਰਕਾਰ ਨਾਲ ਗੱਲਬਾਤ ਕੀਤੀ।
                   ਪੁਲੀਸ ਚੌਂਕੀ ਤਾਇਨਾਤ ਪੀੜਤ ਮਲਕੀਤ ਸਿੰਘ ਨੇ ਦੱਸਿਆ ਕਿ ਉਸ ਨੇ ਦੋ ਮਹੀਨੇ ਪਹਿਲਾਂ ਲਖਵਿੰਦਰ ਲੱਖਾ ਨੂੰ ਕੁੱਟਮਾਰ ਦੇ ਮਾਮਲੇ ਵਿਚ ਗ੍ਰਿਫ਼ਤਾਰ ਕੀਤਾ ਸੀ ਜਿਸ ਦੀ ਉਹ ਖੁੰਧਕ ਰੱਖ ਰਿਹਾ ਸੀ। ਉਹ ਹਵਾਈ ਅੱਡੇ ਦੇ ਉਦਘਾਟਨ ਦੀ ਵੀ.ਆਈ.ਪੀ ਡਿਊਟੀ ਦੌਰਾਨ ਜਦੋਂ ਪਿੰਡ ਵਿਚ ਗਸ਼ਤ ਕਰ ਰਿਹਾ ਸੀ ਤਾਂ ਲੱਖੇ ਤੇ ਉਸ ਦੇ ਸੀਰੀ ਨੇ ਉਸ ਦੀ ਪਹਿਲਾਂ ਵਰਦੀ ਪਾੜ ਦਿੱਤੀ ਅਤੇ ਫਿਰ ਬੁਨੈਣ ਵਗੈਰਾ ਵੀ ਪਾੜ ਦਿੱਤੀ। ਮਲਕੀਤ ਸਿੰਘ ਨੇ ਦੱਸਿਆ ਕਿ ਉਸ ਨੂੰ ਟਰਾਲੀ ਵਿਚ ਬਿਠਾ ਕੇ ਪਿੰਡ ਵਿਚੋਂ ਦੀ ਲੱਖਾ ਘਰ ਲੈ ਗਿਆ ਜਿਥੇ ਉਹ ਬੇਹੋਸ਼ ਹੋ ਗਿਆ। ਅਕਾਲੀ ਸਰਪੰਚ ਨੇ ਵੀ ਉਸ ਦੀ ਕੁੱਟਮਾਰ ਕੀਤੀ। ਲੱਖਾ ਤੇ ਸੀਰੀ ਮੌਕੇ ਤੇ ਹੀ ਭੱਜ ਗਏ ਸਨ ਅਤੇ ਉਹ ਖੁਦ ਅੱਖ ਬਚਾ ਕੇ ਭੱਜ ਆਇਆ ਅਤੇ ਅੱਗਿਓ ਉਸ ਨੂੰ ਐਸ.ਐਚ.ਓ ਹਰਨੇਕ ਸਿੰਘ ਮਿਲ ਗਿਆ।
                   ਸੂਤਰਾਂ ਅਨੁਸਾਰ ਜਦੋਂ ਪੁਲੀਸ ਨੂੰ ਘਟਨਾ ਦਾ ਪਤਾ ਲੱਗਾ ਤਾਂ ਪੁਲੀਸ ਮੁਲਾਜ਼ਮਾਂ ਨੇ ਗੁੱਸੇ ਵਿਚ ਅਕਾਲੀ ਸਰਪੰਚ ਦੇ ਘਰ ਖੜ•ੀ ਨਵੀਂ ਵਰਨਾ ਗੱਡੀ ਵੀ ਭੰਨ ਦਿੱਤੀ। ਨਵੀ ਕਾਰ ਨੰਬਰ ਪੀ.ਬੀ 30 ਆਰ 5118 ਦੇ ਫਰੰਟ ਵਾਲੇ ਸ਼ੀਸ਼ੇ ਤੇ ਸੁਖਬੀਰ ਬਾਦਲ ਦੀ ਫੋਟੋ ਵਾਲਾ 'ਪਰਾਊਡ ਟੂ ਬੀ ਅਕਾਲੀ' ਵਾਲਾ ਸਟਿੱਕਰ ਵੀ ਲੱਗਾ ਹੋਇਆ ਸੀ। ਪੁਲੀਸ ਨੇ ਸਟਿੱਕਰ ਵਾਲਾ ਸ਼ੀਸ਼ਾ ਭੰਨ ਦਿੱਤਾ ਅਤੇ ਚਾਰੇ ਪਾਸੇ ਗੱਡੀ ਤੇ ਡੈਂਟ ਪਾ ਦਿੱਤੇ। ਪਤਾ ਲੱਗਾ ਹੈ ਕਿ ਲਖਵਿੰਦਰ ਲੱਖਾ ਤੇ ਕਰੀਬ 10 ਪੁਲੀਸ ਕੇਸ ਦਰਜ ਹਨ ਜੋ ਕਿ ਇਰਾਦਾ ਕਤਲ,ਅਗਵਾ ਅਤੇ ਕੁੱਟਮਾਰ ਆਦਿ ਕਰਨ ਦੇ ਹਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦਾ ਕਹਿਣਾ ਸੀ ਕਿ ਸਰਪੰਚ ਜਗਦੇਵ ਸਿੰਘ ਇਸ ਮਾਮਲੇ ਵਿਚ ਗ੍ਰਿਫਤਾਰ ਕਰ ਲਿਆ ਹੈ ਅਤੇ ਦੋ ਮੁਲਜ਼ਮ ਫਰਾਰ ਹਨ।
                    ਸਰਪੰਚ ਜਗਦੇਵ ਸਿੰਘ ਦੇ ਦੋ ਲੜਕੇ ਲਖਵਿੰਦਰ ਸਿੰਘ ਤੇ ਪ੍ਰਗਟ ਸਿੰਘ ਹਨ। 25 ਏਕੜ ਦਾ ਮਾਲਕ ਜਗਦੇਵ ਸਿੰਘ ਕੁਝ ਸਮਾਂ ਪਹਿਲਾਂ ਹੀ ਸਰੀਰਕ ਤਕਲੀਫ ਕਾਰਨ ਹਸਪਤਾਲ ਚੋਂ ਡਿਸਚਾਰਜ ਹੋਇਆ ਹੈ। ਕਈ ਅਕਾਲੀ ਨੇਤਾਵਾਂ ਦੇ ਜਗਦੇਵ ਸਿੰਘ ਦੇ ਘਰ ਆਉਣ ਜਾਣ ਰਿਹਾ ਹੈ ਅਤੇ ਜਗਦੇਵ ਸਿੰਘ ਨੇ ਆਪਣੇ ਵਿਰੋਧੀ ਨਿੰਦਰ ਸਿੰਘ ਨੂੰ 178 ਵੋਟਾਂ ਦੇ ਫਰਕ ਨਾਲ ਹਰਾਇਆ ਸੀ। ਐਸ.ਐਸ.ਪੀ ਸਵੱਪਨ ਸ਼ਰਮਾ ਦਾ ਕਹਿਣਾ ਸੀ ਕਿ ਸਰਪੰਚ ਦੀ ਗ੍ਰਿਫਤਾਰੀ ਹੋ ਚੁੱਕੀ ਹੈ ਜਦੋਂ ਕਿ ਬਾਕੀ ਦੋ ਮੁਲਜ਼ਮਾਂ ਦੀ ਗ੍ਰਿਫਤਾਰੀ ਲਈ ਛਾਪੇ ਮਾਰੇ ਜਾ ਰਹੇ ਹਨ ਅਤੇ ਸ਼ਾਮ ਤੱਕ ਗ੍ਰਿਫਤਾਰੀ ਸੰਭਵ ਹੋ ਸਕਦੀ ਹੈ। ਦੱਸਣਯੋਗ ਹੈ ਕਿ ਕਰੀਬ 15 ਦਿਨ ਪਹਿਲਾਂ ਹੀ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਰੈਲੀ ਦੇ ਦੌਰਾਨ ਇੱਕ ਮੰਤਰੀ ਵਲੋਂ ਪੁਲੀਸ ਮੁਲਾਜ਼ਮਾਂ ਨਾਲ ਗਾਲੀ ਗਲੋਚ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਸੀ। ਵਿਰਕ ਕਲਾਂ ਦੀ ਘਟਨਾ ਨੇ ਪੁਲੀਸ ਵਿਚ ਹਾਕਮ ਧਿਰ ਖ਼ਿਲਾਫ਼ ਰੋਹ ਨੂੰ ਹੋਰ ਤਿੱਖਾ ਕਰ ਦਿੱਤਾ ਹੈ। 
                            ਭਲੇ ਸਰਪੰਚ ਹਾਰੇ   
         ਪਿੰਡਾਂ ਵਿਚ ਬੁਲਾਏ ਜਾਣਗੇ 'ਬੱਕਰੇ'
                              ਚਰਨਜੀਤ ਭੁੱਲਰ
ਬਠਿੰਡਾ  : ਪੰਜਾਬ ਵਿਚ ਐਤਕੀਂ ਪੰਚਾਇਤਾਂ ਨੇ ਸ਼ਰਾਬ ਦੇ ਠੇਕੇ ਬੰਦ ਕਰਾਉਣ ਤੋਂ ਤੌਬਾ ਕਰ ਲਈ ਹੈ ਜਿਸ ਨਾਲ ਨਸ਼ਾ ਵਿਰੋਧੀ ਮੁਹਿੰਮ ਨੂੰ ਸੱਟ ਵੱਜੀ ਹੈ। ਪੰਜਾਬ ਭਰ ਚੋਂ ਸਿਰਫ਼ 60 ਪੰਚਾਇਤਾਂ ਨੇ ਐਤਕੀਂ ਮਾਲੀ ਵਰ•ਾ 2017-18 ਲਈ ਆਪੋ ਆਪਣੇ ਪਿੰਡ ਵਿਚ ਸ਼ਰਾਬ ਦਾ ਠੇਕਾ ਨਾ ਖੋਲ•ਣ ਸਬੰਧੀ ਮਤੇ ਪਾਸ ਕੀਤੇ ਹਨ। ਗੱਲ ਉਭਰੀ ਹੈ ਕਿ ਸਰਕਾਰ ਵਲੋਂ ਪਿੰਡਾਂ ਵਿਚ ਗ਼ੈਰਕਨੂੰਨੀ ਠੇਕਿਆਂ ਨੂੰ ਦਿੱਤੀ 'ਖੁੱਲ•ੀ ਛੁੱਟੀ' ਨੇ ਪੰਚਾਇਤਾਂ ਦੇ ਹੌਸਲੇ ਤੌੜ ਦਿੱਤੇ ਹਨ। ਕਾਫ਼ੀ ਅਰਸੇ ਮਗਰੋਂ ਏਦਾ ਹੋਇਆ ਹੈ ਕਿ ਠੇਕਿਆਂ ਖ਼ਿਲਾਫ਼ ਕੁੱਦਣ ਵਾਲੀਆਂ ਪੰਚਾਇਤਾਂ ਦੀ ਗਿਣਤੀ ਘਟੀ ਹੈ। ਮਤੇ ਪਾਉਣ ਵਿਚ ਮੋਹਰੀ ਰਹਿਣ ਵਾਲੇ ਜ਼ਿਲ•ਾ ਸੰਗਰੂਰ ਵਿਚ ਵੀ ਪੰਚਾਇਤਾਂ ਗ਼ੈਰਕਨੂੰਨੀ ਸ਼ਰਾਬ ਦੀ ਵਿਕਰੀ ਤੋਂ ਦੁੱਖੀ ਹਨ। ਕਰ ਅਤੇ ਆਬਕਾਰੀ ਵਿਭਾਗ ਪੰਜਾਬ ਕੋਲ ਹੁਣ ਤੱਕ ਪੰਜਾਬ ਭਰ ਚੋਂ ਕਰੀਬ 60 ਪੰਚਾਇਤੀ ਮਤੇ ਪੁੱਜੇ ਹਨ ਜਿਨ•ਾਂ ਨੇ ਠੇਕੇ ਬੰਦ ਕਰਾਉਣ ਦਾ ਬੀੜਾ ਚੁੱਕਿਆ ਹੈ। ਜ਼ਿਲ•ਾ ਬਠਿੰਡਾ ਵਿਚ ਐਤਕੀਂ ਸਿਰਫ਼ ਪਿੰਡ ਬਦਿਆਲਾ ਦੀ ਪੰਚਾਇਤ ਠੇਕਾ ਬੰਦ ਕਰਾਉਣ ਲਈ ਮੈਦਾਨ ਵਿਚ ਕੁੱਦੀ ਹੈ ਜਦੋਂ ਕਿ ਪਿਛਲੇ ਸਾਲ ਦਰਜਨ ਦੇ ਕਰੀਬ ਪੰਚਾਇਤਾਂ ਨੇ ਮਤੇ ਪਾਸ ਕੀਤੇ ਸਨ। ਕਰ ਅਤੇ ਆਬਕਾਰੀ ਅਫਸਰ ਵਿਕਰਮ ਠਾਕੁਰ ਦਾ ਪ੍ਰਤੀਕਰਮ ਸੀ ਕਿ ਸਿਰਫ਼ ਇੱਕ ਪੰਚਾਇਤ ਦਾ ਮਤਾ ਆਇਆ ਹੈ ਅਤੇ ਪੰਚਾਇਤਾਂ ਦੀ ਰੁਚੀ ਘਟਣ ਦੇ ਕਾਰਨ ਵਾਰੇ ਕੁੱਝ ਪਤਾ ਨਹੀਂ ਹੈ।
                      ਸੰਗਰੂਰ ਦੇ ਪਿੰਡ ਬੜੀ,ਭੈਣੀ ਕਲਾਂ,ਦੀਦਾਰਗੜ,ਟਿੱਬਾ ਅਤੇ ਹਰੀਗੜ• ਆਦਿ ਪਿੰਡਾਂ ਨੇ ਠੇਕਿਆਂ ਖਿਲਾਫ ਐਤਕੀਂ ਮਤੇ ਪਾਸ ਕੀਤੇ ਹਨ। ਪਿਛਲੇ ਵਰੇ• ਸੰਗਰੂਰ ਜ਼ਿਲ•ੇ ਵਿਚ 59 ਪੰਚਾਇਤਾਂ ਨੇ ਮਤੇ ਪਾਸ ਕੀਤੇ ਸਨ ਜਦੋਂ ਕਿ ਐਤਕੀਂ ਗਿਣਤੀ 20 ਦੇ ਕਰੀਬ ਦੱਸੀ ਜਾ ਰਹੀ ਹੈ। ਤੱਥਾਂ ਅਨੁਸਾਰ ਸਾਲ 2015 ਵਿਚ ਪੰਜਾਬ ਭਰ ਚੋਂ 232 ਪੰਚਾਇਤਾਂ ਨੇ ਠੇਕਿਆਂ ਖ਼ਿਲਾਫ਼ ਮਤੇ ਪਾਸ ਕੀਤੇ ਸਨ ਜਿਨ•ਾਂ ਚੋਂ 163 ਪੰਚਾਇਤਾਂ ਦੇ ਮਤੇ ਪ੍ਰਵਾਨ ਕਰਕੇ ਠੇਕੇ ਬੰਦ ਕਰ ਦਿੱਤੇ ਗਏ ਸਨ। ਇਵੇਂ ਹੀ ਪੰਜਾਬ ਵਿਚ ਸਾਲ 2014 ਦੌਰਾਨ 135 ਪਿੰਡਾਂ ਨੇ ਠੇਕੇ ਬੰਦ ਕਰਾਉਣ ਵਾਸਤੇ ਪੰਚਾਇਤਾਂ ਮੈਦਾਨ ਵਿਚ ਉਤਰੀਆ ਸਨ ਜਿਨ•ਾਂ ਚੋਂ 89 ਪਿੰਡਾਂ ਦੇ ਠੇਕੇ ਬੰਦ ਕੀਤੇ ਗਏ ਸਨ। ਸਾਲ 2013 ਵਿਚ 128 ਪੰਚਾਇਤਾਂ ਨੇ ਮਤਾ ਪਾਸ ਕੀਤੇ ਸਨ ਪਰ ਠੇਕੇ ਬੰਦ ਸਿਰਫ਼ 22 ਪਿੰਡਾਂ ਵਿਚ ਕੀਤੇ ਗਏ ਸਨ। ਉਸ ਤੋਂ ਪਹਿਲਾਂ ਸਾਲ 2012 ਵਿਚ ਪੰਜਾਬ ਦੇ 127 ਪਿੰਡਾਂ ਨੇ ਮਤੇ ਪਾਸ ਕੀਤੇ ਸਨ ਪਰ 32 ਪੰਚਾਇਤਾਂ ਦੇ ਮਤੇ ਪ੍ਰਵਾਨ ਕੀਤੇ ਗਏ ਸਨ।  ਸਾਲ 2011 ਵਿਚ 89 ਪਿੰਡਾਂ ਨੇ ਮਤੇ ਪਾਸ ਕੀਤੇ ਪਰ ਠੇਕੇ ਬੰਦ ਸਿਰਫ਼ 32 ਪਿੰਡਾਂ ਵਿਚ ਹੋਏ ਸਨ। ਰੁਝਾਨ ਦੇਖੀਏ ਤਾਂ ਪਿਛਲੇ ਵਰਿ•ਆਂ ਤੋਂ ਮਤਿਆਂ ਦੀ ਗਿਣਤੀ ਵੱਧਦੀ ਰਹੀ ਹੈ ਜਦਕਿ ਐਤਕੀਂ ਉਲਟਾ ਰੁਝਾਨ ਸ਼ੁਰੂ ਹੋ ਗਿਆ ਹੈ।
                     ਸਾਇੰਨਟੈਫਿਕ ਅਵੇਰਸਨੈਸ ਫੋਰਮ ਪੰਜਾਬ ਦੇ ਪ੍ਰਧਾਨ ਡਾ.ਏ.ਐਸ.ਮਾਨ (ਸੰਗਰੂਰ) ਦਾ ਪ੍ਰਤੀਕਰਮ ਸੀ ਕਿ ਉਹ ਕਈ ਵਰਿ•ਆਂ ਤੋਂ ਸ਼ਰਾਬਬੰਦੀ ਲਈ ਪ੍ਰੇਰ ਕੇ ਪੰਚਾਇਤਾਂ ਤੋਂ ਮਤੇ ਪਵਾ ਰਹੇ ਹਨ ਪਰ ਇਸ ਵਾਰ ਪੰਚਾਇਤਾਂ ਨੇ ਇਹੋ ਫੀਡ ਬੈਕ ਦਿੱਤੀ ਹੈ ਕਿ ਸਰਕਾਰ ਨੇ ਤਾਂ ਘਰਾਂ ਵਿਚ ਵੀ ਗ਼ੈਰਕਨੂੰਨੀ ਬਰਾਂਚਾਂ ਖੋਲ ਦਿੱਤੀਆਂ ਹਨ ਅਤੇ ਤਸਕਰਾਂ ਨੂੰ ਹੱਲਾਸ਼ੇਰੀ ਮਿਲ ਰਹੀ ਹੈ। ਡਾ.ਮਾਨ ਦਾ ਕਹਿਣਾ ਸੀ ਕਿ ਸਿਆਸੀ ਧਿਰਾਂ ਚੋਣ ਮੈਨੀਫੈਸਟੋ ਵਿਚ ਸ਼ਰਾਬਬੰਦੀ ਦਾ ਅਹਿਦ ਲੈਣ। ਇਵੇਂ ਹੀ ਕੁਝ ਸਰਪੰਚਾਂ ਦਾ ਪ੍ਰਤੀਕਰਮ ਸੀ ਕਿ 'ਮਤੇ ਪਾ ਕੇ ਕੀ ਕਰਾਂਗੇ, ਸਰਕਾਰ ਤਾਂ ਘਰ ਘਰ ਸ਼ਰਾਬ ਰਖਾਈ ਬੈਠੀ ਹੈ।' ਦੱਸਣਯੋਗ ਹੈ ਕਿ ਗ਼ੈਰਕਨੂੰਨੀ ਸ਼ਰਾਬ ਕਾਰਨ ਪੰਜਾਬ ਵਿਚ ਕਿੰਨੇ ਹਾਦਸੇ ਵਾਪਰ ਚੁੱਕੇ ਹਨ ਅਤੇ ਨੌਬਤ ਕਤਲੋਗਾਰਦ ਤੱਕ ਪੁੱਜੀ ਹੈ।
                      ਪੰਜਾਬ ਦੇ ਕਰੀਬ 200 ਤੋਂ ਜਿਆਦਾ ਪਿੰਡਾਂ ਵਿਚ ਐਤਕੀ ਹਾਲੇ ਤੱਕ ਸ਼ਰਾਬ ਦੇ ਠੇਕਿਆਂ ਦੀ ਬੋਲੀ ਨਹੀਂ ਹੋਈ ਹੈ ਜਿਥੇ ਸ਼ਰੇਆਮ ਠੇਕੇ ਖੁੱਲੇ• ਹੋਏ ਹਨ। ਪੰਜਾਬ ਪੰਚਾਇਤੀ ਰਾਜ ਐਕਟ 1994 ਦੀ ਧਾਰਾ 40 (1) ਤਹਿਤ ਕੋਈ ਵੀ ਪੰਚਾਇਤ ਆਪਣੇ ਪਿੰਡ ਵਿਚ ਸ਼ਰਾਬ ਦਾ ਠੇਕਾ ਨਾ ਖੋਲ•ੇ ਜਾਣ ਦਾ ਫੈਸਲਾ ਲੈ ਸਕਦੀ ਹੈ। ਪੰਚਾਇਤੀ ਮਤਾ ਦੋ ਤਿਹਾਈ ਬਹੁਮਤ ਨਾਲ ਪਾਸ ਹੋਣਾ ਲਾਜ਼ਮੀ ਹੈ ਅਤੇ ਪਿੰਡ ਵਿਚ ਪਿਛਲੇ ਦੋ ਸਾਲਾਂ ਦੌਰਾਨ ਕੋਈ ਆਬਕਾਰੀ ਜੁਰਮ ਨਹੀਂ ਹੋਣਾ ਚਾਹੀਦਾ ਹੈ। ਹਰ ਪੰਚਾਇਤ ਨੇ 30 ਸਤੰਬਰ ਤੱਕ ਇਹ ਮਤਾ ਸਰਕਾਰ ਨੂੰ ਭੇਜਣਾ ਹੁੰਦਾ ਹੈ।

Sunday, December 4, 2016

                                  ਮੰਗੋ ਹਿਸਾਬ
                  ਵਜ਼ੀਰਾਂ ਕੋਲ ਕਰੋੜਾਂ ਦਾ ਸੋਨਾ
                                 ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਦੇ ਵਜ਼ੀਰਾਂ ਕੋਲ 4.19 ਕਰੋੜ ਦਾ ਸੋਨਾ ਹੈ ਜਦੋਂ ਕਿ ਮਹਿਲਾ ਵਿਧਾਇਕਾਂ ਕੋਲ 2.80 ਕਰੋੜ ਦੇ ਗਹਿਣੇ ਹਨ। ਉਧਰ ਕੇਂਦਰੀ ਮਹਿਲਾ ਵਜ਼ੀਰਾਂ ਕੋਲ 8.11 ਕਰੋੜ ਦਾ ਸੋਨਾ ਹੈ ਜਿਨ•ਾਂ ਚੋਂ 6.02 ਕਰੋੜ ਦੇ ਗਹਿਣੇ ਇਕੱਲੇ ਹਰਸਿਮਰਤ ਕੌਰ ਬਾਦਲ ਕੋਲ ਹਨ। ਕੇਂਦਰ ਸਰਕਾਰ ਦੇ ਨਵੇਂ ਫੈਸਲੇ ਮਗਰੋਂ ਇਨ•ਾਂ ਵਜ਼ੀਰਾਂ ਅਤੇ ਵਿਧਾਇਕਾਂ ਨੂੰ ਇਸ ਜਵੈਲਰੀ ਦਾ ਹਿਸਾਬ ਕਿਤਾਬ ਦੇਣਾ ਪਵੇਗਾ। ਹਾਲਾਂਕਿ ਇਨ•ਾਂ ਵਜ਼ੀਰਾਂ ਤੇ ਵਿਧਾਇਕਾਂ ਨੇ ਚੋਣ ਲੜਨ ਸਮੇਂ ਹੀ ਸੋਨੇ ਦੇ ਵੇਰਵੇ ਨਸ਼ਰ ਕੀਤੇ ਹਨ ਪਰ ਹੁਣ ਇਨ•ਾਂ ਦੇ ਸਬੂਤ ਵਗੈਰਾ ਜੁਟਾਉਣੇ ਪੈ ਸਕਦੇ ਹਨ। ਸਰਕਾਰੀ ਤੱਥਾਂ ਤੇ ਯਕੀਨ ਕਰੀਏ ਤਾਂ ਪੰਜਾਬ ਦੇ ਵਜ਼ੀਰ ਤੋਤਾ ਸਿੰਘ ਅਤੇ ਅਜੀਤ ਸਿੰਘ ਕੋਹਾੜ ਕੋਲ ਸੋਨੇ ਦਾ ਕੋਈ ਗਹਿਣਾ ਨਹੀਂ ਹੈ। ਵੇਰਵਿਆਂ ਅਨੁਸਾਰ ਪੰਜਾਬ ਦੇ ਵਜ਼ੀਰਾਂ ਚੋਂ ਸਭ ਤੋਂ ਵੱਧ ਸੋਨਾ ਲੋਕ ਨਿਰਮਾਣ ਮੰਤਰੀ ਜਨਮੇਜਾ ਸਿੰਘ ਸੇਖੋਂ ਕੋਲ ਹੈ ਜਿਸ ਦੀ ਕੀਮਤ ਕਰੀਬ 1.02 ਕਰੋੜ ਰੁਪਏ ਬਣਦੀ ਹੈ। ਉਨ•ਾਂ ਕੋਲ ਖੁਦ 22.70 ਲੱਖ ਅਤੇ ਬਾਕੀ ਸੋਨਾ ਪਤਨੀ ਕੋਲ ਹੈ। ਮੁੱਖ ਮੰਤਰੀ ਪੰਜਾਬ ਪ੍ਰਕਾਸ਼ ਸਿੰਘ ਬਾਦਲ ਕੋਲ ਸਿਰਫ਼ 3.42 ਲੱਖ ਰੁਪਏ ਦਾ ਸੋਨਾ ਹੈ ਜਦੋਂ ਕਿ ਉਪ ਮੁੱਖ ਮੰਤਰੀ ਕੋਲ 6.02 ਕਰੋੜ ਦਾ ਸੋਨਾ ਹੈ ਜਿਸ ਚੋਂ ਉਨ•ਾਂ ਕੋਲ ਖੁਦ 7.25 ਲੱਖ ਦਾ ਸੋਨਾ ਹੈ ਅਤੇ ਬਾਕੀ ਗਹਿਣੇ ਉਨ•ਾਂ ਦੀ ਪਤਨੀ ਦੇ ਹਨ।
                     ਵਜ਼ੀਰ ਬਿਕਰਮ ਸਿੰਘ ਮਜੀਠੀਆ ਕੋਲ 50.70 ਲੱਖ ਦਾ ਅਤੇ ਆਦੇਸ਼ਪ੍ਰਤਾਪ ਸਿੰਘ ਕੈਰੋਂ ਕੋਲ 18 ਲੱਖ ਦਾ ਸੋਨਾ ਹੈ। ਇਵੇਂ ਹੀ ਸੁਰਜੀਤ ਕੁਮਾਰ ਜਿਆਣੀ ਕੋਲ 51 ਲੱਖ ਦਾ ਸੋਨਾ ਹੈ ਜਿਸ ਚੋਂ ਡੇਢ ਕਿਲੋ ਸੋਨਾ ਉਨ•ਾਂ ਦੀ ਪਤਨੀ ਦਾ ਹੈ। ਤੱਥਾਂ ਅਨੁਸਾਰ ਵਜ਼ੀਰ ਚੁੰਨੀ ਲਾਲ ਭਗਤ ਕੋਲ 50 ਹਜ਼ਾਰ ,ਸਿਕੰਦਰ ਸਿੰਘ ਮਲੂਕਾ ਕੋਲ 28.75 ਲੱਖ, ਸੁਰਜੀਤ ਰੱਖੜਾ ਕੋਲ 45.50 ਲੱਖ, ਪਰਮਿੰਦਰ ਢੀਂਡਸਾ ਕੋਲ 46.96 ਲੱਖ, ਡਾ. ਦਲਜੀਤ ਚੀਮਾ ਕੋਲ 23.50 ਲੱਖ ਅਤੇ ਅਨਿਲ ਜੋਸ਼ੀ ਕੋਲ 15 ਲੱਖ ਦਾ ਸੋਨਾ ਹੈ। ਪੰਜਾਬ ਵਿਚ ਕਰੀਬ 13 ਮਹਿਲਾ ਵਿਧਾਇਕ ਹਨ ਜਿਨ•ਾਂ ਚੋਂ ਸਭ ਤੋਂ ਜਿਆਦਾ ਸੋਨਾ ਡਾ.ਨਵਜੋਤ ਕੌਰ ਸਿੱਧੂ ਕੋਲ 53 ਲੱਖ ਦਾ ਹੈ। ਦੂਸਰਾ ਨੰਬਰ ਵਨਿੰਦਰ ਕੌਰ ਲੂਬਾ ਦਾ ਹੈ ਜਿਨ•ਾਂ ਕੋਲ 50.97 ਲੱਖ ਦਾ ਸੋਨਾ ਹੈ। ਉਨ•ਾਂ ਕੋਲ ਖੁਦ 1 ਕਿਲੋ 470 ਗਰਾਮ ਸੋਨਾ ਹੈ ਅਤੇ ਦੋ ਡਾਇਮੰਡ ਦਾ ਸੈੱਟ ਹਨ। ਵਿਧਾਇਕ ਹਰਪ੍ਰੀਤ ਕੌਰ ਮੁਖਮੈਲਪੁਰ ਅਤੇ ਕਰਨ ਕੌਰ ਮੁਕਤਸਰ ਕੋਲ 42-42 ਲੱਖ ਦਾ ਸੋਨਾ ਹੈ। ਬੀਬੀ ਰਜਿੰਦਰ ਕੌਰ ਭੱਠਲ ਕੋਲ ਸਿਰਫ਼ ਪੰਜ ਲੱਖ ਦੇ ਗਹਿਣੇ ਹਨ ਜਦੋਂ ਕਿ ਬੀਬੀ ਜਗੀਰ ਕੌਰ ਕੋਲ 20 ਲੱਖ ਰੁਪਏ ਦੀ ਕੀਮਤ ਦਾ 900 ਗਰਾਮ ਸੋਨਾ ਹੈ। ਸਭ ਤੋਂ ਘੱਟ ਸੋਨਾ ਰਾਜਵਿੰਦਰ ਕੌਰ ਭਾਗੀਕੇ ਕੋਲ 1.96 ਲੱਖ ਅਤੇ ਸੀਮਾ ਦੇਵੀ ਕੋਲ 1.30 ਲੱਖ ਦਾ ਹੈ।
                     ਪ੍ਰਧਾਨ ਮੰਤਰੀ ਦਫਤਰ ਦੇ ਤਾਜ਼ਾ ਵੇਰਵਿਆਂ ਅਨੁਸਾਰ ਕੇਂਦਰੀ ਮਹਿਲਾ ਵਜ਼ੀਰਾਂ ਚੋਂ ਹਰਸਿਮਰਤ ਕੌਰ ਬਾਦਲ ਦੀ ਝੰਡੀ ਹੈ ਜਦੋਂ ਕਿ ਮੇਨਕਾ ਗਾਂਧੀ ਕੋਲ 1.24 ਕਰੋੜ ਦਾ ਸੋਨਾ ਹੈ। ਮੇਨਕਾ ਗਾਂਧੀ ਕੋਲ 3.41 ਕਿਲੋ ਸੋਨਾ ਅਤੇ 85 ਕਿਲੋ ਸਿਲਵਰ ਹੈ। ਸਮਿਰਤੀ ਇਰਾਨੀ ਕੋਲ 12.36 ਲੱਖ ਦੇ ਗਹਿਣੇ ਹਨ ਅਤੇ ਸੁਸ਼ਮਾ ਸਵਰਾਜ ਕੋਲ 30.48 ਲੱਖ ਦੇ ਗਹਿਣੇ ਹਨ। ਉਮਾ ਭਾਰਤੀ ਕੋਲ 6 ਕਿਲੋ ਸੋਨੇ ਚਾਂਦੀ ਦੇ ਬਰਤਨ ਤੇ ਭਗਵਾਨ ਦੇ ਗਹਿਣੇ ਹਨ ਜਿਨ•ਾਂ ਦੀ ਕੀਮਤ 35 ਲੱਖ ਰੁਪਏ ਬਣਦੀ ਹੈ। ਕੇਂਦਰੀ ਵਜ਼ੀਰ ਸ੍ਰੀਮਤੀ ਨਿਰਮਲਾ ਸਿਥਰਮਨ ਕੋਲ 7.87 ਲੱਖ ਦੇ ਗਹਿਣੇ ਹਨ। ਸੂਤਰ ਆਖਦੇ ਹਨ ਕਿ ਇਨ•ਾਂ ਵਜ਼ੀਰਾਂ ਅਤੇ ਵਿਧਾਇਕਾਂ ਨੂੰ ਆਪਣੇ ਸਬੂਤ ਨਸ਼ਰ ਕਰਨੇ ਚਾਹੀਦੇ ਹਨ।

Saturday, December 3, 2016

                                  ਕਾਲਾ ਧਨ
                  ਗਰੀਬਾਂ ਦੇ ਖਾਤੇ ਹੋਏ 'ਫੁੱਲ' !
                                ਚਰਨਜੀਤ ਭੁੱਲਰ
ਬਠਿੰਡਾ  : ਪੰਜਾਬ ਦੇ ਗਰੀਬ ਲੋਕਾਂ ਦੇ ਜਨ ਧਨ ਖਾਤਿਆਂ ਵਿਚ ਅਚਾਨਕ ਕਰੀਬ 900 ਕਰੋੜ ਰੁਪਏ ਜਮ•ਾ ਹੋ ਗਏ ਹਨ ਜਿਸ ਤੋਂ ਕਈ ਸ਼ੱਕ ਖੜ•ੇ ਹੋ ਗਏ ਹਨ। ਨੋਟਬੰਦੀ ਮਗਰੋਂ ਇੱਕ ਹਫਤੇ ਵਿਚ ਏਡੀ ਵੱਡੀ ਰਾਸ਼ੀ ਗਰੀਬਾਂ ਦੇ ਖਾਤਿਆਂ ਵਿਚ ਆਈ ਹੈ ਜਿਸ ਵਾਰੇ ਆਮਦਨ ਕਰ ਵਿਭਾਗ ਨੂੰ 'ਕਾਲਾ ਧਨ' ਹੋਣ ਦਾ ਸ਼ੱਕ ਹੈ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੀ ਇਨ•ਾਂ ਬੈਂਕ ਖਾਤਿਆਂ ਤੇ ਸ਼ੱਕ ਜ਼ਾਹਰ ਕਰ ਚੁੱਕੇ ਹਨ। ਸੂਤਰ ਆਖਦੇ ਹਨ ਕਿ ਧਨਾਢ ਲੋਕਾਂ ਨੇ ਗਰੀਬ ਲੋਕਾਂ ਦੇ ਇਨ•ਾਂ ਬੈਂਕ ਖਾਤਿਆਂ ਦੀ ਦੁਰਵਰਤੋਂ ਕੀਤੀ ਹੈ। ਪੰਜਾਬ ਵਿਚ ਜਨ ਧਨ ਯੋਜਨਾ ਦੇ 51.24 ਲੱਖ ਬੈਂਕ ਖਾਤੇ ਹਨ ਜੋ 'ਜ਼ੀਰੋ ਬੈਲੇਂਸ' ਤੇ ਖੋਲ•ੇ ਗਏ ਸਨ। ਇਨ•ਾਂ ਚੋਂ 30.47 ਲੱਖ ਬੈਂਕ ਖਾਤੇ ਪੇਂਡੂ ਖੇਤਰ ਦੇ ਹਨ ਜਦੋਂ ਕਿ 20.76 ਲੱਖ ਖਾਤੇ ਸ਼ਹਿਰੀ ਖੇਤਰ ਵਿਚ ਹਨ ਕੇਂਦਰੀ ਵਿੱਤ ਮੰਤਰਾਲੇ ਦੇ ਤਾਜ਼ਾ ਵੇਰਵਿਆਂ ਅਨੁਸਾਰ ਨੋਟਬੰਦੀ ਮਗਰੋਂ ਪੰਜਾਬ ਵਿਚ 9 ਨਵੰਬਰ ਨੂੰ ਜਨ ਧੰਨ ਯੋਜਨਾ ਦੇ 51.07 ਲੱਖ ਬੈਂਕ ਖਾਤੇ ਸਨ ਜਿਨ•ਾਂ ਵਿਚ 1737 ਕਰੋੜ ਰੁਪਏ ਜਮ•ਾ ਸਨ। 23 ਨਵੰਬਰ ਨੂੰ ਜਨ ਧਨ ਖਾਤਿਆਂ ਦੀ ਗਿਣਤੀ ਵੱਧ ਕੇ 51.24  ਲੱਖ ਹੋ ਗਈ। ਮਤਲਬ ਕਿਂ 17 ਹਜ਼ਾਰ ਖਾਤੇ ਨੋਟਬੰਦੀ ਦੌਰਾਨ ਨਵੇਂ ਖੁੱਲ•ੇ ਹਨ।
                   23 ਨਵੰਬਰ ਨੂੰ ਜਨ ਧਨ ਦੇ ਖਾਤਿਆਂ ਵਿਚ ਜਮ•ਾ ਰਾਸ਼ੀ 2673 ਕਰੋੜ ਰੁਪਏ ਸਨ। ਜਿਸ ਤੋਂ ਸਾਫ ਹੈ ਕਿ ਨੋਟਬੰਦੀ ਮਗਰੋਂ ਦੋ ਹਫਤਿਆਂ ਵਿਚ ਹੀ ਇਨ•ਾਂ ਖਾਤਿਆਂ ਵਿਚ 936 ਕਰੋੜ ਰੁਪਏ ਜਮ•ਾ ਹੋ ਗਏ ਹਨ। ਨੋਟਬੰਦੀ ਮਗਰੋਂ ਪਹਿਲੇ ਹਫਤੇ ਦੌਰਾਨ ਭਾਵ 16 ਨਵੰਬਰ ਤੱਕ ਜਨ ਧਨ ਖਾਤਿਆਂ ਵਿਚ 641 ਕਰੋੜ ਰੁਪਏ ਜਮ•ਾ ਹੋਏ ਜਦੋਂ ਕਿ 16 ਨਵੰਬਰ ਤੋਂ 23 ਨਵੰਬਰ ਤੱਕ ਇਨ•ਾਂ ਖਾਤਿਆਂ ਵਿਚ 295 ਕਰੋੜ ਰੁਪਏ ਜਮ•ਾ ਹੋਏ ਹਨ। ਪਤਾ ਲੱਗਾ ਹੈ ਕਿ ਆਉਂਦੇ ਦਿਨਾਂ ਵਿਚ ਆਮਦਨ ਕਰ ਮਹਿਕਮੇ ਵਲੋਂ ਇਨ•ਾਂ ਬੈਂਕ ਖਾਤਿਆਂ ਦੀ ਛਾਣਬੀਣ ਕੀਤੀ ਜਾਣੀ ਹੈ। ਕੇਂਦਰੀ ਵੇਰਵਿਆਂ ਅਨੁਸਾਰ ਪੰਜਾਬ ਵਿਚ ਅੱਠ ਲੱਖ ਜਨ ਧਨ ਖਾਤੇ ਖਾਲੀ ਵੀ ਖੜਕ ਰਹੇ ਹਨ ਜਿਨ•ਾਂ ਵਿਚ ਕੋਈ ਪੈਸਾ ਨਹੀਂ ਹੈ। ਦੱਸਣਯੋਗ ਹੈ ਕਿ ਪ੍ਰਧਾਨ ਮੰਤਰੀ ਜਨ ਧਨ ਯੋਜਨਾ ਤਹਿਤ ਗਰੀਬ ਲੋਕਾਂ ਦੇ ਬੈਂਕ ਵਿਚ 'ਜ਼ੀਰੋ ਬੈਲੈਂਸ' ਤੇ ਖਾਤੇ ਖੋਲ•ੇ ਗਏ ਸਨ ਜਿਸ ਤਹਿਤ ਲੋਕਾਂ ਨੂੰ ਇੰਸੋਰੈਂਸ ਵਗੈਰਾ ਦੀ ਸਹੂਲਤ ਵੀ ਦਿੱਤੀ ਗਈ ਹੈ। ਬਠਿੰਡਾ ਦੇ ਸਮਾਜਿਕ ਕਾਰਕੁੰਨ ਸਾਧੂ ਰਾਮ ਕੁਸਲਾ ਦਾ ਪ੍ਰਤੀਕਰਮ ਸੀ ਕਿ ਬਹੁਤੇ ਧਨਾਢ ਤੇ ਸਿਆਸੀ ਲੋਕਾਂ ਨੇ ਆਪਣਾ 'ਕਾਲਾ ਧਨ' ਇਨ•ਾਂ ਗਰੀਬ ਲੋਕਾਂ ਦੇ ਖਾਤਿਆਂ ਵਿਚ ਰੱਖਿਆ ਹੈ ਜਿਸ ਦੀ ਜਾਂਚ ਹੋਣੀ ਚਾਹੀਦੀ ਹੈ।
                     ਆਮ ਲੋਕ ਤਾਂ ਨੋਟਬੰਦੀ ਮਗਰੋਂ ਪ੍ਰੇਸ਼ਾਨ ਹੋਏ ਹਨ ਅਤੇ ਉਨ•ਾਂ ਦੇ ਖੀਸੇ ਖਾਲੀ ਹੋਏ ਹਨ। ਉੱਚ ਪੱਧਰੀ ਪੜਤਾਲ ਕਰਕੇ ਪੈਸੇ ਦੇ ਅਸਲ ਮਾਲਕਾਂ ਦੀ ਭਾਲ ਕੀਤੀ ਜਾਣੀ ਚਾਹੀਦੀ ਹੈ। ਆਮਦਨ ਕਰ ਮਹਿਕਮੇ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਜਿਨ•ਾਂ ਲੋਕਾਂ ਨੇ ਜਨ ਧਨ ਖਾਤਿਆਂ ਨੂੰ ਕਾਲਾ ਧੰਨ ਰੱਖਣ ਵਾਸਤੇ ਵਰਤਿਆ ਹੈ, ਉਨ•ਾਂ ਨੂੰ ਐਕਸ਼ਨ ਦਾ ਸਾਹਮਣਾ ਕਰਨਾ ਪਵੇਗਾ। ਜਿਨ•ਾਂ ਬੈਂਕ ਖਾਤਾਧਾਰਕਾਂ ਨੇ ਦੂਸਰਿਆਂ ਨੂੰ ਆਪਣੇ ਖਾਤਿਆਂ ਵਿਚ ਪੈਸਾ ਰੱਖਣ ਦੀ ਇਜਾਜ਼ਤ ਦਿੱਤੀ ਹੈ, ਉਨ•ਾਂ ਤੇ ਵੀ ਕਾਨੂੰਨੀ ਕਾਰਵਾਈ ਹੋਵੇਗੀ। ਕੋਈ ਵੀ ਅਧਿਕਾਰੀ ਇਸ ਮਾਮਲੇ ਤੇ ਸਰਕਾਰੀ ਤੌਰ ਤੇ ਟਿੱਪਣੀ ਕਰਨ ਨੂੰ ਤਿਆਰ ਨਹੀਂ ਹੋਇਆ। ਸੂਤਰ ਦੱਸਦੇ ਹਨ ਕਿ ਬਠਿੰਡਾ ਖ਼ਿੱਤੇ ਦੇ ਇੱਕ ਧਨਾਢ ਨੇ ਆਪਣੇ ਪ੍ਰੋਜੈਕਟਾਂ ਵਿਚ ਕੰਮ ਕਰਦੇ ਮਜ਼ਦੂਰਾਂ ਦੇ ਖਾਤਿਆਂ ਨੂੰ ਵਰਤਿਆ ਹੈ ਜਿਸ ਦੀ ਕਿਧਰੋਂ ਪੁਸ਼ਟੀ ਨਹੀਂ ਹੋ ਸਕੀ ਹੈ।

Monday, November 28, 2016

                                 ਕੌਣ ਰੋਕੂ
                  ਢਾਈ ਸੌ ਕੈਦੀ ਫਰਾਰ ਹੋਏ !
                              ਚਰਨਜੀਤ ਭੁੱਲਰ
ਬਠਿੰਡਾ :   ਪੰਜਾਬ ਦੀਆਂ ਜੇਲ•ਾਂ ਚੋਂ ਔਸਤਨ ਹਰ ਮਹੀਨੇ ਦੋ ਕੈਦੀ ਫਰਾਰ ਹੋ ਰਹੇ ਹਨ। ਲੰਘੇ ਦਸ ਵਰਿ•ਆਂ ਵਿਚ ਜੇਲ•ਾਂ ਚੋਂ 243 ਕੈਦੀ ਤੇ ਬੰਦੀ ਫਰਾਰ ਹੋ ਚੁੱਕੇ ਹਨ। ਇਨ•ਾਂ ਵਰਿ•ਆਂ ਵਿਚ ਕੈਦੀ ਤੇ ਬੰਦੀ ਸੱਤ ਦਫ਼ਾ ਜੇਲ• ਤੋੜ ਕੇ ਫਰਾਰ ਹੋਏ ਹਨ। ਜੇਲ• ਵਿਭਾਗ ਪੰਜਾਬ ਨੇ ਕਦੇ ਵੀ ਇਨ•ਾਂ ਮਾਮਲਿਆਂ ਨੂੰ ਬਹੁਤੀ ਸੰਜੀਦਗੀ ਨਾਲ ਨਹੀਂ ਲਿਆ ਹੈ। ਭਾਵੇਂ ਅੱਜ ਨਾਭਾ ਜੇਲ• ਦੀ ਘਟਨਾ ਨੇ ਪੂਰਾ ਸਿਸਟਮ ਲਿਆਇਆ ਹੈ ਪਰ ਪੰਜਾਬ ਸਰਕਾਰ ਨੇ ਪਿਛਲੇ ਵਰਿ•ਆਂ ਦੀਆਂ ਘਟਨਾਵਾਂ ਤੋਂ ਕਦੇ ਸਬਕ ਨਹੀਂ ਲਿਆ ਸੀ। ਦੇਸ਼ ਭਰ ਵਿਚ ਇਨ•ਾਂ ਦਸ ਵਰਿ•ਆਂ ਵਿਚ 108 ਵਾਰਦਾਤਾਂ ਜੇਲ• ਤੋੜਨ ਦੀਆਂ ਵਾਪਰੀਆਂ ਹਨ ਅਤੇ 4815 ਬੰਦੀ ਤੇ ਕੈਦੀ ਫਰਾਰ ਹੋਏ ਹਨ। ਪੰਜਾਬ ਵਿਚ ਸਾਲ 2015 ਵਿਚ ਵੀ ਜੇਲ• ਤੋੜ ਕੇ ਫਰਾਰ ਹੋਣ ਦੀ ਇੱਕ ਵਾਰਦਾਤ ਵਾਪਰੀ ਸੀ। ਕੇਂਦਰੀ ਗ੍ਰਹਿ ਮੰਤਰਾਲੇ ਦੇ ਵੇਰਵਿਆਂ ਅਨੁਸਾਰ ਸਾਲ 2005 ਤੋਂ ਸਾਲ 2015 ਤੱਕ ਪੰਜਾਬ ਚੋਂ 243 ਬੰਦੀ ਤੇ ਕੈਦੀ ਜੇਲ•ਾਂ ਚੋਂ ਫਰਾਰ ਹੋਏ ਹਨ। ਅਕਾਲੀ ਭਾਜਪਾ ਗਠਜੋੜ ਸਰਕਾਰ ਦੇ ਨੌ ਵਰਿ•ਆਂ ਦੌਰਾਨ ਜੇਲ•ਾਂ ਚੋਂ 189 ਬੰਦੀ ਫਰਾਰ ਹੋਏ ਹਨ। ਜਦੋਂ ਸਾਲ 2007 ਵਿਚ ਗਠਜੋੜ ਸਰਕਾਰ ਬਣੀ ਸੀ ਤਾਂ ਉਦੋਂ ਇੱਕੋ ਵਰੇ• ਵਿਚ 36 ਕੈਦੀ ਤੇ ਬੰਦੀ ਫਰਾਰ ਹੋਏ ਸਨ ਅਤੇ ਉਸ ਮਗਰੋਂ ਸਾਲ 2010 ਵਿਚ ਵੀ 39 ਜਣੇ ਫਰਾਰ ਹੋਏ ਸਨ।
                     ਸਾਲ 2014 ਅਤੇ ਸਾਲ 2015 ਵਿਚ ਅੱਧੀ ਦਰਜਨ ਕੈਦੀ ਤੇ ਹਵਾਲਾਤੀ ਫਰਾਰ ਹੋਏ ਹਨ। ਸਭ ਤੋਂ ਜਿਆਦਾ ਸਾਲ 2012 ਵਿਚ ਜੇਲ• ਤੋੜ ਕੇ ਫਰਾਰ ਹੋਣ ਦੀਆਂ ਤਿੰਨ ਵਾਰਦਾਤਾਂ ਹੋਈਆਂ ਹਨ ਅਤੇ ਇਸੇ ਵਰੇ• ਵਿਚ 11 ਬੰਦੀ ਫਰਾਰ ਹੋਏ ਹਨ। ਰੋਜ਼ਪੁਰ ਜੇਲ• ਚੋਂ ਲੰਘੇ ਦਸ ਵਰਿ•ਆਂ ਵਿਚ ਅੱਧੀ ਦਰਜਨ ਬੰਦੀ ਫਰਾਰ ਹੋਏ ਹਨ। ਸਾਲ 2003 ਵਿਚ ਇਸ ਜੇਲ• ਚੋਂ ਬਾਂਸ ਦੀ ਮਦਦ ਨਾਲ ਹੀਰਾ ਲਾਲ ਤੇ ਸੋਨੂੰ ਹਵਾਲਾਤੀ ਫਰਾਰ ਹੋ ਗਏ ਸਨ ਜਦੋਂ ਕਿ ਸਾਲ 1984 ਵਿਚ ਵੀ ਇਸ ਜੇਲ• ਚੋਂ ਇੱਕ ਖਾੜਕੂ ਅਤੇ ਉਸ ਦੇ ਦੋ ਸਾਥੀ ਬਾਂਸ ਦੀ ਮਦਦ ਨਾਲ ਜੇਲ• ਚੋਂ ਫਰਾਰ ਹੋਏ ਸਨ। ਨਾਭੇ ਦੀ ਖੁੱਲ•ੀ ਜੇਲ• ਚੋਂ ਵੀ ਤਿੰਨ ਵਰਿ•ਆਂ ਦੌਰਾਨ ਤਿੰਨ ਬੰਦੀ ਫਰਾਰ ਹੋਏ ਹਨ। ਗੁਰਦਾਸਪੁਰ ਜੇਲ• ਚੋਂ ਸਾਲ 2012 ਵਿਚ ਤਿੰਨ ਬੰਦੀ ਰਾਤ ਨੂੰ ਕਰੀਬ ਢਾਈ ਵਜੇ ਸਲਾਖਾ ਕੱਟ ਕੇ ਫਰਾਰ ਹੋ ਗਏ ਸਨ।  ਹਾਲਾਂਕਿ ਜੇਲ•ਾਂ ਵਿਚ ਸੀ.ਸੀ.ਟੀ.ਵੀ ਕੈਮਰੇ ਵੀ ਲਾਏ ਹਨ ਪ੍ਰੰਤੂ ਫਰਾਰੀ ਦੇ ਮਾਮਲਿਆਂ ਵਿਚ ਕੋਈ ਕਮੀ ਨਹੀਂ ਆਈ ਹੈ। ਸੂਤਰ ਦੱਸਦੇ ਹਨ ਕਪੂਰਥਲਾ ਅਤੇ ਫਰੀਦਕੋਟ ਜੇਲ• ਵਿਚ ਤਾਂ ਬੰਦੀਆਂ ਨੇ ਬੈਰਕਾਂ ਵਿਚਲੇ ਸੀ.ਸੀ.ਟੀ.ਵੀ ਕੈਮਰੇ ਹੀ ਤੋੜ ਦਿੱਤੇ ਸਨ।
                    ਸਾਬਕਾ ਐਡੀਸ਼ਨਲ ਐਡਵੋਕੇਟ ਜਨਰਲ ਸ੍ਰੀ ਛਿੰਦਰਪਾਲ ਸਿੰਘ ਬਰਾੜ ਦਾ ਕਹਿਣਾ ਸੀ ਕਿ ਅਸਲ ਵਿਚ ਜੇਲ• ਪ੍ਰਸ਼ਾਸਨ ਦੀ ਕੋਤਾਹੀ ਕਾਰਨ ਅਜਿਹੇ ਮਾਮਲੇ ਵਾਪਰਦੇ ਹਨ ਜਿਨ•ਾਂ ਨੂੰ ਸਖਤੀ ਬਿਨ•ਾਂ ਰੋਕਣਾ ਮੁਸ਼ਕਲ ਹੈ। ਉਨ•ਾਂ ਆਖਿਆ ਕਿ ਨਵੀਂ ਤਕਨਾਲੋਜੀ ਦੀ ਮਦਦ ਵੀ ਲਈ ਜਾਣੀ ਚਾਹੀਦੀ ਹੈ। ਉਨ•ਾਂ ਆਖਿਆ ਕਿ ਜੇਲ•ਾਂ ਦੇ ਸੁਰੱਖਿਆ ਪ੍ਰਬੰਧਾਂ ਨੂੰ ਵੀ ਮਜ਼ਬੂਤ ਬਣਾਏ ਜਾਣ ਦੀ ਲੋੜ ਹੈ। ਦੱਸਣਯੋਗ ਹੈ ਕਿ ਪੰਜਾਬ ਸਰਕਾਰ ਨੇ ਹੁਣ ਨਵੀਆਂ ਜੇਲ•ਾਂ ਵੀ ਬਣਾਈਆਂ ਹਨ ਜਿਨ•ਾਂ ਵਿਚ ਬਠਿੰਡਾ,ਮੁਕਤਸਰ ਅਤੇ ਅੰਮ੍ਰਿਤਸਰ ਜੇਲ• ਵੀ ਸ਼ਾਮਿਲ ਹਨ।
                                                  ਬੁੱਢਾ ਅਸਲਾ, ਬੁੱਢੀ ਗਾਰਦ
ਜੇਲ•ਾਂ ਦੀ ਰਾਖੀ ਲਈ ਹਥਿਆਰ ਵੀ ਬੁੱਢੇ ਹਨ ਤੇ ਜੇਲ• ਗਾਰਦ ਵੀ। ਤਾਹੀਓ ਜੇਲ•ਾਂ ਦੀ ਸੁਰੱਖਿਆ ਤੇ ਉਂਗਲ ਉਠਣ ਲੱਗੀ ਹੈ। ਸਾਲ 1992 ਤੋਂ ਮਗਰੋਂ ਜੇਲ•ਾਂ ਵਿਚ ਗਾਰਦ ਦੀ ਨਵੀਂ ਭਰਤੀ ਨਹੀਂ ਹੋਈ ਹੈ। ਪੰਜਾਬ ਸਰਕਾਰ ਵਲੋਂ ਨਵੇਂ ਹਥਿਆਰ ਹੀ ਨਹੀਂ ਦਿੱਤੇ ਗਏ ਹਨ। ਜੋ ਅਸਲਟਾ ਜੇਲ•ਾਂ ਵਿਚ ਹਨ, ਉਹ ਪੁਲੀਸ ਤੋਂ ਉਧਾਰੀਆਂ ਲਈਆਂ ਹਨ। ਕਈ ਜੇਲ•ਾਂ ਵਿਚ ਤਾਂ ਮਾਸਕਟ ਰਾਈਫਲਾਂ ਹਨ ਅਤੇ ਬਹੁਤੀਆਂ ਜੇਲ•ਾਂ ਵਿਚ ਪੁਰਾਣੀਆਂ ਥ੍ਰੀ ਨਟ ਥ੍ਰੀ ਰਫ਼ਲਾਂ ਹਨ ਜੋ ਕੰਡਮ ਹਾਲਤ ਵਿਚ ਹਨ। ਬਠਿੰਡਾ,ਫਰੀਦਕੋਟ, ਮਾਨਸਾ ਅਤੇ ਫਿਰੋਜ਼ਪੁਰ ਜੇਲ•ਾਂ ਵਿਚ ਜਿਆਦਾ ਥ੍ਰੀ ਨਟ ਥ੍ਰੀ ਰਫ਼ਲਾਂ ਹੀ ਹਨ। ਇਨ•ਾਂ ਜੇਲ•ਾਂ ਵਲੋਂ ਨਵੇਂ ਅਸਲੇ ਦੀ ਮੰਗ ਕੀਤੀ ਗਈ ਹੈ ਜਿਸ ਤੇ ਸਰਕਾਰ ਨੇ ਗੌਰ ਨਹੀਂ ਕੀਤੀ ਹੈ।
ਬਠਿੰਡਾ,ਫਰੀਦਕੋਟ ਅਤੇ ਮੁਕਤਸਰ ਵਿਚ ਨਵੀਆਂ ਜੇਲ•ਾਂ ਤਾਂ ਬਣ ਗਈਆਂ ਹਨ ਪਰ ਇਨ•ਾਂ ਜੇਲ•ਾਂ ਵਿਚ ਹਥਿਆਰ ਪੁਰਾਣੇ ਹੀ ਹਨ। ਜੇਲ•ਾਂ ਚੋਂ ਟਾਵਰਾਂ ਤੇ ਹੋਮਗਾਰਡ ਜਵਾਨ ਤਾਇਨਾਤ ਕੀਤੇ ਹੋਏ ਹਨ ਜਿਨ•ਾਂ ਕੋਲ ਐੋਸ.ਐਲ.ਆਰ ਰਫ਼ਲਾਂ ਹਨ ਜਦੋਂ ਕਿ ਬਾਕੀ ਗਾਰਦ ਤੋਂ ਥ੍ਰੀ ਨਟ ਥ੍ਰੀ ਰਫ਼ਲਾਂ ਹੀ ਹਨ।
                      ਇਵੇਂ ਜੋ ਜੇਲ•ਾਂ ਵਿਚ ਪੈਸਕੋ ਦੇ ਮੁਲਾਜ਼ਮਾਂ ਦੀ ਤਾਇਨਾਤੀ ਕੀਤੀ ਗਈ ਹੈ, ਉਨ•ਾਂ ਨੂੰ ਡੰਡੇ ਦਿੱਤੇ ਹੋਏ ਹਨ। ਨਿਯਮਾਂ ਅਨੁਸਾਰ ਇਨ•ਾਂ ਮੁਲਾਜ਼ਮਾਂ ਨੂੰ ਜੇਲ• ਪ੍ਰਸ਼ਾਸਨ ਤਰਫ਼ੋਂ ਅਸਲਾ ਨਹੀਂ ਦਿੱਤਾ ਜਾ ਸਕਦਾ ਹੈ। ਉਂਜ ਵੀ ਪੈਸਕੋ ਮੁਲਾਜ਼ਮਾਂ ਦੀ ਤਨਖਾਹ ਕਾਫੀ ਘੱਟ ਹੈ ਜੋ ਕਿ ਕੋਈ ਖਤਰਾ ਮੁੱਲ ਲੈਣ ਤੋਂ ਡਰਦੇ ਹਨ। ਇੱਕ ਜੇਲ• ਅਧਿਕਾਰੀ ਨੇ ਦੱਸਿਆ ਕਿ ਜੋ ਮੌਜੂਦਾ ਜੇਲ• ਗਾਰਦ ਹੈ, ਉਹ ਸੇਵਾ ਮੁਕਤੀ ਨੇੜੇ ਹੈ।         ਉਨ•ਾਂ ਦੱਸਿਆ ਕਿ ਨਵੇਂ ਗੈਂਗਸਟਰਾਂ ਦਾ ਮੁਕਾਬਲਾ ਇਹ ਪੁਰਾਣੇ ਮੁਲਾਜ਼ਮ ਕਰਨੋਂ ਬੇਵੱਸ ਹਨ। ਸੂਤਰ ਦੱਸਦੇ ਹਨ ਕਿ ਤਾਹੀਂ ਨੌਜਵਾਨ ਗੈਂਗਸਟਰਾਂ ਦੇ ਜੇਲ•ਾਂ ਵਿਚ ਹੌਸਲੇ ਵਧ ਜਾਂਦੇ ਹਨ। ਮਾਨਸਾ ਜੇਲ• ਵਿਚ ਥ੍ਰੀ ਨਟ ਥ੍ਰੀ ਰਫ਼ਲਾਂ ਹਨ। ਫਰੀਦਕੋਟ ਜੇਲ• ਦੇ ਸੁਪਰਡੈਂਟ ਬਲਕਾਰ ਸਿੰਘ ਭੁੱਲਰ ਦਾ ਕਹਿਣਾ ਸੀ ਕਿ ਹੋਮਗਾਰਡ ਜਵਾਨਾਂ ਕੋਲ ਐੋਸ.ਐਲ.ਆਰ ਹਨ ਜਦੋਂ ਕਿ ਜ਼ਿਲ•ਾ ਪੁਲੀਸ ਤੋਂ ਵੀ ਪਿਛਲੇ ਸਮੇਂ ਦੌਰਾਨ ਅਸਲਾ ਲਿਆ ਗਿਆ ਹੈ। ਉਨ•ਾਂ ਦੱਸਿਆ ਕਿ ਸਮੇਂ ਸਮੇਂ ਤੇ ਹਥਿਆਰਾਂ ਦੀ ਮੰਗ ਵੀ ਮੁੱਖ ਦਫ਼ਤਰ ਨੂੰ ਭੇਜੀ ਗਈ ਹੈ। ਵੇਰਵਿਆਂ ਅਨੁਸਾਰ ਬਠਿੰਡਾ ਜੇਲ• ਨੂੰ ਵੀ ਨਵੇਂ ਹਥਿਆਰ ਨਹੀਂ ਮਿਲੇ ਹਨ ਅਤੇ ਇਸ ਜੇਲ• ਕੋਲ 22 ਥ੍ਰੀ ਨਟ ਥ੍ਰੀ ਰਫ਼ਲਾਂ ਹੀ ਹਨ।
                    ਜੇਲ• ਗਾਰਦ ਐਸੋਸੀਏਸ਼ਨ ਨੇ ਦੱਸਿਆ ਕਿ ਜੇਲ•ਾਂ ਵਿਚ ਕਰੀਬ ਤਿੰਨ ਹਜ਼ਾਰ ਮੁਲਾਜ਼ਮਾਂ ਦੀ ਲੋੜ ਹੈ ਕਿਉਂਕਿ ਪਿਛਲੇ ਸਮੇਂ ਵਿਚ ਸੇਵਾ ਮੁਕਤੀ ਜਿਆਦਾ ਹੋਈ ਹੈ ਅਤੇ ਨਵੀਂ ਭਰਤੀ ਨਹੀਂ ਹੋਈ ਹੈ। ਪੰਜਾਬ ਵਿਚ ਅੱਧੀ ਦਰਜਨ ਜੇਲ•ਾਂ ਕੋਲ ਤਾਂ ਮਾਸਕਟ ਰਾਈਫਲਾਂ ਹੀ ਹਨ ਜੋ ਕਾਫ਼ੀ ਪੁਰਾਣੀਆਂ ਹਨ। ਕਾਫ਼ੀ ਜੇਲ•ਾਂ ਵਿਚ ਪੁਲੀਸ ਦੀਆਂ ਉਧਾਰੀਆਂ ਏ.ਕੇ 47 ਰਾਈਫਲਾਂ ਹਨ। ਫਿਰੋਜ਼ਪੁਰ ਜੇਲ• ਵਿਚ 8 ਟਾਵਰ ਹਨ ਅਤੇ ਇਸ ਜੇਲ• ਕੋਲ ਵੀ ਥ੍ਰੀ ਨਟ ਥ੍ਰੀ ਰਾਈਫਲਾਂ ਹਨ। ਸਬ ਜੇਲ• ਮੋਗਾ ਅਤੇ ਫਾਜਿਲਕਾ ਕੋਲ ਵੀ ਇਹੋ ਰਾਈਫਲਾਂ ਹੀ ਹਨ। ਸੰਗਰੂਰ ਜੇਲ• ਜੋ ਪਹਿਲਾਂ ਸੱਤ ਮਸਕਟ ਰਫ਼ਲਾਂ ਸਨ, ਜੋ ਹੁਣ ਜਮ•ਾਂ ਕਰਾ ਦਿੱਤੀਆਂ ਗਈਆਂ ਹਨ ਅਤੇ ਬਦਲੇ ਵਿਚ ਕੋਈ ਨਵਾਂ ਅਸਲਾ ਨਹੀਂ ਮਿਲਿਆ ਹੈ। ਹਾਲਾਂਕਿ ਜੇਲ•ਾਂ ਵਿਚ ਪਿਛਲੇ ਸਮੇਂ ਦੌਰਾਨ ਗੈਂਗਸਟਰਾਂ ਦੀ ਗਿਣਤੀ ਵਧੀ ਹੈ। ਜੇਲ•ਾਂ ਕੋਲ ਤਾਂ ਸਰਕਾਰੀ ਵਾਹਨ ਵੀ ਨਹੀਂ ਹਨ। ਜੋ ਜੇਲ•ਾਂ ਕੋਲ ਪੁਰਾਣੀਆਂ ਜਿਪਸੀਆਂ ਸਨ, ਉਹ ਕੰਡਮ ਹੋ ਚੁੱਕੀਆਂ ਹਨ। 

Tuesday, November 15, 2016

                            ਬਠਿੰਡਾ ਏਅਰਪੋਰਟ 
        ਹੁਣ ਨਾ ਭੁੱਲ ਜਾਣਾ ਸ਼ਹੀਦੇ ਆਜ਼ਮ ਨੂੰ
                             ਚਰਨਜੀਤ ਭੁੱਲਰ
ਬਠਿੰਡਾ : ਹੁਣ ਬਠਿੰਡਾ ਦੇ ਹਵਾਈ ਅੱਡੇ ਦਾ ਨਾਮ ਸ਼ਹੀਦ ਭਗਤ ਸਿੰਘ ਦੇ ਨਾਮ ਤੇ ਰੱਖਣ ਦਾ ਮਸਲਾ ਉਭਰਿਆ ਹੈ। ਹਾਲਾਂਕਿ ਮੋਹਾਲੀ ਏਅਰਪੋਰਟ ਦਾ ਨਾਮ ਸ਼ਹੀਦੇ ਆਜਮ ਦੇ ਨਾਮ ਤੇ ਰੱਖਣ ਵਿਚ ਸਰਕਾਰ ਫੇਲ• ਹੋਈ ਹੈ ਪਰ ਹੁਣ ਬਠਿੰਡਾ ਹਵਾਈ ਅੱਡੇ ਦੇ ਨਾਮਕਰਨ ਦਾ ਮਾਮਲਾ ਉਠਿਆ ਹੈ। ਕੇਂਦਰੀ ਸ਼ਹਿਰੀ ਹਵਾਬਾਜ਼ੀ ਮੰਤਰੀ ਨੇ 4 ਦਸੰਬਰ ਨੂੰ ਬਠਿੰਡਾ ਏਅਰਪੋਰਟ ਦਾ ਉਦਘਾਟਨ ਕਰਨਾ ਹੈ। ਉਸ ਤੋਂ ਪਹਿਲਾਂ ਇਸ ਹਵਾਈ ਅੱਡੇ ਦੇ ਨਾਮ ਦਾ ਮਸਲਾ ਉਠਿਆ ਹੈ। ਬਠਿੰਡਾ ਦੇ ਪਿੰਡ ਵਿਰਕ ਕਲਾਂ ਦੀ ਇਸ ਹਵਾਈ ਅੱਡੇ ਲਈ 37 ਏਕੜ ਜ਼ਮੀਨ ਐਕੂਆਇਰ ਹੋਈ ਹੈ ਜਿਥੋਂ ਦੀ ਪੰਚਾਇਤ ਅਤੇ ਕਲੱਬ ਨੇ ਸ਼ਹੀਦ ਭਗਤ ਸਿੰਘ ਦੇ ਨਾਮ ਤੇ ਏਅਰਪੋਰਟ ਦਾ ਨਾਮ ਰੱਖਣ ਦੀ ਮੰਗ ਉਠਾ ਕੇ ਪਹਿਲ ਕੀਤੀ ਹੈ ਜਿਸ ਦੀ ਹਮਾਇਤ ਸਭਨਾਂ ਧਿਰਾਂ ਨੇ ਕੀਤੀ ਹੈ। ਪਿੰਡ ਵਿਰਕ ਕਲਾਂ ਦੇ ਸਰਪੰਚ ਜਗਦੇਵ ਸਿੰਘ ਨੇ ਮੁੱਖ ਮੰਤਰੀ ਪੰਜਾਬ ਤੋਂ ਮੰਗ ਕੀਤੀ ਹੈ ਕਿ ਹਵਾਈ ਅੱਡੇ ਦਾ ਨਾਮਕਰਨ ਸ਼ਹੀਦ ਭਗਤ ਸਿੰਘ ਦੇ ਨਾਮ ਤੇ ਕੀਤਾ ਜਾਵੇ ਅਤੇ ਪੰਚਾਇਤ ਚਾਹੁੰਦੀ ਹੈ ਕਿ ਸ਼ਹੀਦੇ ਆਜ਼ਮ ਦੇ ਨਾਮ ਤੇ ਹਵਾਈ ਅੱਡਾ ਹੋਵੇ। ਉਨ•ਾਂ ਦੱਸਿਆ ਕਿ ਉਨ•ਾਂ ਨੇ ਚਾਰ ਪੰਜ ਸਾਲ ਪਹਿਲਾਂ ਡਿਪਟੀ ਕਮਿਸ਼ਨਰ ਨੂੰ ਪੱਤਰ ਭੇਜੇ ਸਨ ਕਿ ਹਵਾਈ ਅੱਡੇ ਦੇ ਨਾਮ ਨਾਲ ਵਿਰਕ ਕਲਾਂ ਲਿਖਿਆ ਜਾਵੇ ਪ੍ਰੰਤੂ ਇਹ ਮੰਗ ਅਣਗੌਲੀ ਹੋ ਗਈ ਸੀ।
                    ਵਿਰਕ ਕਲਾਂ ਦੇ ਸ਼ਹੀਦ ਭਗਤ ਸਿੰਘ ਸਪੋਰਟਸ ਕਲੱਬ ਦੇ ਪ੍ਰਧਾਨ ਜਸਪਾਲ ਸਿੰਘ ਦਾ ਕਹਿਣਾ ਸੀ ਕਿ ਉਨ•ਾਂ ਨੂੰ ਪਹਿਲਾਂ ਮੋਹਾਲੀ ਏਅਰਪੋਰਟ ਦਾ ਨਾਮ ਸ਼ਹੀਦੇ ਆਜ਼ਮ ਦੇ ਨਾਮ ਤੇ ਹੋਣ ਦੀ ਉਮੀਦ ਸੀ ਪ੍ਰੰਤੂ ਅਜਿਹਾ ਹੋ ਨਹੀਂ ਸਕਿਆ ਜਿਸ ਕਰਕੇ ਹੁਣ ਸਰਕਾਰ ਬਠਿੰਡਾ ਏਅਰਪੋਰਟ ਨੂੰ ਸ਼ਹੀਦ ਭਗਤ ਸਿੰਘ ਏਅਰਪੋਰਟ ਵਿਚ ਤਬਦੀਲ ਕਰੇ। ਪਿੰਡ ਦੇ ਕਿਸਾਨਾਂ ਦਾ ਕਹਿਣਾ ਸੀ ਕਿ ਏਅਰਪੋਰਟ ਲਈ ਐਕੁਆਇਰ ਕੀਤੀ ਜ਼ਮੀਨ ਦਾ ਕਿਸਾਨਾਂ ਨੂੰ ਪ੍ਰਤੀ ਏਕੜ ਸਿਰਫ਼ 8 ਲੱਖ ਰੁਪਏ ਮੁਆਵਜ਼ਾ ਦਿੱਤਾ ਗਿਆ ਸੀ ਜਦੋਂ ਕਿ ਥੋੜੀ ਦੂਰ ਤੇ ਪੈਂਦੇ ਪਿੰਡ ਘੁੱਦਾ ਵਿਚ ਕਿਸਾਨਾਂ ਨੂੰ ਜ਼ਮੀਨ ਦਾ ਮੁਆਵਜ਼ਾ 28 ਲੱਖ ਰੁਪਏ ਦਿੱਤਾ ਗਿਆ ਸੀ। ਉਨ•ਾਂ ਆਖਿਆ ਕਿ ਮੁਆਵਜ਼ੇ ਵਿਚ ਮਾਰ ਪਾ ਦਿੱਤੀ ਗਈ ਜਿਸ ਕਰਕੇ ਘੱਟੋ ਘੱਟ ਹੁਣ ਸਰਕਾਰ ਏਅਰਪੋਰਟ ਦਾ ਨਾਮ ਸ਼ਹੀਦੇ ਆਜ਼ਮ ਦੇ ਨਾਮ ਤੇ ਰੱਖ ਕੇ ਲੋਕਾਂ ਦੀ ਮੰਗ ਮੰਨ ਲਵੇ। ਇਸੇ ਦੌਰਾਨ ਸ਼ਹੀਦ ਭਗਤ ਸਿੰਘ ਦੇ ਭਾਣਜੇ ਪ੍ਰੋ.ਜਗਮੋਹਨ ਸਿੰਘ ਨੇ ਆਖਿਆ ਕਿ ਸਰਕਾਰ ਨੇ ਮੋਹਾਲੀ ਏਅਰਪੋਰਟ ਦੇ ਨਾਮਕਰਨ ਸਬੰਧੀ ਵਿਧਾਨ ਸਭਾ ਵਿਚ ਮਤਾ ਵੀ ਪਾਸ ਕੀਤਾ ਅਤੇ ਫਿਰ ਵੀ ਸਰਕਾਰ ਸ਼ਹੀਦੇ ਆਜਮ ਦੇ ਨਾਮ ਤੇ ਏਅਰਪੋਰਟ ਦਾ ਨਾਮ ਨਹੀਂ ਰੱਖ ਸਕੀ ਜੋ ਕਿ ਇੱਕ ਵਾਅਦਾਖਿਲਾਫੀ ਹੈ। ਉਨ•ਾਂ ਆਖਿਆ ਕਿ ਘੱਟੋ ਘੱਟ ਸਰਕਾਰ ਹੁਣ ਬਠਿੰਡਾ ਏਅਰਪੋਰਟ ਦੇ ਮਾਮਲੇ ਵਿਚ ਹੀ ਇਹ ਵਾਅਦਾ ਨਿਭਾ ਦੇਵੇ।
                     ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਦਾ ਪ੍ਰਤੀਕਰਮ ਸੀ ਕਿ ਵਿਰਕ ਕਲਾਂ ਦੇ ਲੋਕਾਂ ਦੀਆਂ ਭਾਵਨਾਵਾਂ ਦਾ ਸਰਕਾਰ ਨੂੰ ਸਤਿਕਾਰ ਕਰਨਾ ਚਾਹੀਦਾ ਹੈ ਅਤੇ ਉਨ•ਾਂ ਵਲੋਂ ਉਠਾਈ ਮੰਗ ਦਾ ਉਹ ਸਮਰਥਨ ਕਰਦੇ ਹਨ। ਉਨ•ਾਂ ਆਖਿਆ ਕਿ ਉਹ ਮੋਹਾਲੀ ਏਅਰਪੋਰਟ ਦੇ ਨਾਮਕਰਨ ਦੇ ਮਾਮਲੇ ਤੇ ਵੀ ਡਟੇ ਹੋਏ ਹਨ। ਦੱਸਣਯੋਗ ਹੈ ਕਿ ਬਠਿੰਡਾ ਏਅਰਪੋਰਟ 30 ਅਕਤੂਬਰ 2012 ਨੂੰ ਮੁਕੰਮਲ ਹੋ ਗਿਆ ਸੀ ਅਤੇ ਪਿਛਲੇ ਸਮੇਂ ਦੌਰਾਨ ਕਿਸੇ ਹਵਾਈ ਕੰਪਨੀ ਨੇ ਇੱਥੋਂ ਉਡਾਣ ਵਾਸਤੇ ਹਾਮੀ ਨਹੀਂ ਭਰੀ ਸੀ। ਪੰਜਾਬ ਸਰਕਾਰ ਵਲੋਂ ਇਸ ਹਵਾਈ ਅੱਡੇ ਤੇ 40 ਕਰੋੜ ਰੁਪਏ ਖਰਚ ਕੀਤੇ ਜਾ ਚੁੱਕੇ ਹਨ। ਹੁਣ ਵੀ ਰੋਜ਼ਾਨਾ ਦਾ ਔਸਤਨ 85 ਹਜ਼ਾਰ ਰੁਪਏ ਖਰਚਾ ਪੈ ਰਿਹਾ ਹੈ। ਨੇਤਾ ਚਰਨਜੀਤ ਚੰਨੀ ਦਾ ਕਹਿਣਾ ਸੀ ਕਿ ਬਠਿੰਡਾ ਏਅਰਪੋਰਟ ਕੇਂਦਰ ਦੀ ਯੂ.ਪੀ.ਏ ਸਰਕਾਰ ਦੀ ਦੇਣ ਹੈ ਅਤੇ ਉਨ•ਾਂ ਤਰਫ਼ੋਂ ਤਾਂ ਮੋਹਾਲੀ ਏਅਰਪੋਰਟ ਦਾ ਨਾਮ ਸ਼ਹੀਦੇ ਆਜਮ ਦੇ ਨਾਮ ਤੇ ਰੱਖਣ ਲਈ ਉਪਰਾਲੇ ਕੀਤੇ ਗਏ ਸਨ ਪ੍ਰੰਤੂ ਕੇਂਦਰ ਤੇ ਰਾਜ ਦੀ ਮੌਜੂਦਾ ਸਰਕਾਰ ਨੇ ਕੋਈ ਧਿਆਨ ਨਹੀਂ ਦਿੱਤਾ। ਉਨ•ਾਂ ਆਖਿਆ ਕਿ ਪੰਜਾਬ ਸਰਕਾਰ ਘੱਟੋ ਘੱਟ ਹੁਣ ਬਠਿੰਡਾ ਏਅਰਪੋਰਟ ਦਾ ਨਾਮਕਰਨ ਹੀ ਸ਼ਹੀਦੇ ਆਜ਼ਮ ਭਗਤ ਸਿੰਘ ਦੇ ਨਾਮ ਤੇ ਕਰ ਦੇਵੇ।
                                   ਕੇਂਦਰ ਨੂੰ ਲਿਖਤੀ ਰੂਪ ਵਿਚ ਭੇਜਿਆ ਜਾਵੇ : ਵਲਟੋਹਾ
ਸ਼੍ਰੋਮਣੀ ਅਕਾਲੀ ਦਲ ਦੇ ਬੁਲਾਰੇ ਵਿਰਸਾ ਸਿੰਘ ਵਲਟੋਹਾ ਦਾ ਪ੍ਰਤੀਕਰਮ ਸੀ ਕਿ ਮੋਹਾਲੀ ਕੌਮਾਂਤਰੀ ਏਅਰਪੋਰਟ ਦਾ ਨਾਮ ਸ਼ਹੀਦੇ ਆਜ਼ਮ ਦੇ ਨਾਮ ਤੇ ਬਿਲਕੁੱਲ ਰੱਖਿਆ ਜਾਣਾ ਹੈ ਜਿਸ ਵਾਰੇ ਕੇਂਦਰ ਨੇ ਹਰੀ ਝੰਡੀ ਦਿੱਤੀ ਹੋਈ ਹੈ। ਉਨ•ਾਂ ਆਖਿਆ ਕਿ ਅਗਰ ਬਠਿੰਡਾ ਏਅਰਪੋਰਟ ਦੇ ਮਾਮਲੇ ਵਿਚ ਵੀ ਲੋਕ ਇਹੋ ਚਾਹੁੰਦੇ ਹਨ ਤਾਂ ਉਹ ਲਿਖਤੀ ਰੂਪ ਵਿਚ ਕੇਂਦਰ ਨੂੰ ਮੰਗ ਭੇਜ ਦੇਣ ਅਤੇ ਅਕਾਲੀ ਦਲ ਸਭਨਾਂ ਦੇ ਜਜ਼ਬਾਤਾਂ ਦੀ ਕਦਰ ਕਰਦਾ ਹੈ।

Saturday, November 12, 2016

                              ਬਾਦਲਾਂ ਦਾ ਹਲਕਾ  
       ਸਰਕਾਰੀ ਯਾਤਰਾ ਤੋਂ ਲੋਕਾਂ ਨੇ ਮੂੰਹ ਮੋੜੇ
                               ਚਰਨਜੀਤ ਭੁੱਲਰ
ਬਠਿੰਡਾ : ਬਾਦਲਾਂ ਦੇ ਹਲਕੇ ਵਿਚ ਹੁਣ ਸਰਕਾਰੀ ਤੀਰਥ ਯਾਤਰਾ ਫੇਲ• ਹੋਣ ਲੱਗੀ ਹੈ। ਬਠਿੰਡਾ-ਮਾਨਸਾ ਦੇ ਲੋਕਾਂ ਨੇ ਇਸ ਯਾਤਰਾ ਤੋਂ ਮੂੰਹ ਮੋੜ ਲਏ ਹਨ। ਲੰਘੇ ਸਵਾ ਮਹੀਨੇ ਵਿਚ ਕਰੀਬ 150 ਬੱਸਾਂ ਨੂੰ ਕੈਂਸਲ ਕਰਨ ਦੀ ਨੌਬਤ ਆਈ ਜਿਸ ਚੋਂ ਨਵੰਬਰ ਮਹੀਨੇ ਦੌਰਾਨ ਹੀ 60 ਬੱਸਾਂ ਨੂੰ ਮੌਕੇ ਤੇ ਰੱਦ ਕਰਨਾ ਪਿਆ। ਬਹੁਤੇ ਪਿੰਡਾਂ ਚੋਂ ਜਦੋਂ ਲੋਕਾਂ ਨੇ ਤੀਰਥ ਯਾਤਰਾ ਲਈ ਹੁੰਗਾਰਾ ਨਾ ਭਰਿਆ ਤਾਂ ਜ਼ਿਲ•ਾ ਪ੍ਰਸ਼ਾਸਨ ਨੇ ਬੱਸਾਂ ਕੈਂਸਲ ਕਰ ਦਿੱਤੀਆਂ। ਅਗਸਤ ਮਹੀਨੇ ਤੋਂ ਸ੍ਰੀ ਅੰਮ੍ਰਿਤਸਰ ਸਾਹਿਬ ਲਈ ਸਰਕਾਰੀ ਤੀਰਥ ਯਾਤਰਾ ਸ਼ੁਰੂ ਕੀਤੀ ਗਈ ਸੀ ਜਿਸ ਤਹਿਤ ਰੋਜ਼ਾਨਾ 80 ਬੱਸਾਂ ਸ਼ੁਰੂ ਕੀਤੀਆਂ ਗਈਆਂ ਸਨ। ਮੋਟੇ ਅੰਦਾਜ਼ੇ ਅਨੁਸਾਰ ਰੋਜ਼ਾਨਾ 20 ਤੋਂ 30 ਫੀਸਦੀ ਬੱਸਾਂ ਕੈਂਸਲ ਹੋ ਰਹੀਆਂ ਹਨ। ਪੀ.ਆਰ.ਟੀ.ਸੀ ਇਸ ਗੱਲੋਂ ਖੁਸ਼ ਹੈ ਕਿ ਉਨ•ਾਂ ਨੂੰ ਬੱਸਾਂ ਕੈਂਸਲ ਹੋਣ ਦੀ ਸੂਰਤ ਵਿਚ ਰੂਟ ਤੇ ਚੱਲਣ ਦਾ ਮੌਕਾ ਮਿਲਣ ਲੱਗਾ ਹੈ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੇ ਅਗਸਤ ਮਹੀਨੇ ਵਿਚ ਬਰਨਾਲਾ ਤੋਂ ਸ੍ਰੀ ਦਰਬਾਰ ਸਾਹਿਬ ਲਈ ਤੀਰਥ ਯਾਤਰਾ ਸ਼ੁਰੂ ਕੀਤੀ ਸੀ। ਸੂਤਰ ਦੱਸਦੇ ਹਨ ਕਿ ਹੁਣ ਬਹੁਤੇ ਲੋਕ ਸਰਕਾਰੀ ਖਰਚੇ ਤੇ ਤੀਰਥ ਯਾਤਰਾ ਕਰਨ ਤੋਂ ਪਾਸਾ ਵੱਟਣ ਲੱਗ ਪਏ ਹਨ। ਚਰਚੇ ਇਹ ਵੀ ਹਨ ਕਿ ਯਾਤਰੀਆਂ ਨੂੰ ਤੀਰਥ ਯਾਤਰਾ ਦੌਰਾਨ ਕੋਈ ਰਿਫਰੈਸਮੈਂਟ ਨਹੀਂ ਦਿੱਤੀ ਜਾਂਦੀ ਹੈ ਜਦੋਂ ਕਿ ਸਾਲਾਸਰ ਯਾਤਰਾ ਵਾਲੇ ਯਾਤਰੀਆਂ ਨੂੰ ਖਾਣਾ ਅਤੇ ਰਿਫਰੈਸਮੈਂਟ ਦਿੱਤੀ ਜਾਂਦੀ ਹੈ।
                     ਵੇਰਵਿਆਂ ਅਨੁਸਾਰ ਅਕਤੂਬਰ ਮਹੀਨੇ ਵਿਚ 86 ਬੱਸਾਂ ਇਕੱਲੇ ਬਠਿੰਡਾ ਜ਼ਿਲ•ੇ ਵਿਚ ਕੈਂਸਲ ਕਰਨੀਆਂ ਪਈਆਂ ਹਨ। ਤਲਵੰਡੀ ਸਾਬੋ ਹਲਕੇ ਦੀਆਂ ਨਵੰਬਰ ਮਹੀਨੇ ਵਿਚ 16 ਬੱਸਾਂ ਅਤੇ ਅਕਤੂਬਰ ਮਹੀਨੇ ਵਿਚ 20 ਬੱਸਾਂ ਕੈਂਸਲ ਕਰਨੀਆਂ ਪਈਆਂ ਜਦੋਂ ਕਿ ਬਠਿੰਡਾ ਸ਼ਹਿਰੀ ਹਲਕੇ ਦੀਆਂ ਨਵੰਬਰ ਵਿਚ 20 ਅਤੇ ਅਕਤੂਬਰ ਮਹੀਨੇ ਵਿਚ 23 ਬੱਸਾਂ ਕੈਂਸਲ ਕਰਨੀਆਂ ਪਈਆਂ। ਇੱਕ ਅਧਿਕਾਰੀ ਨੇ ਦੱਸਿਆ ਕਿ ਸਰਕਾਰ ਨੂੰ ਹੁਣ ਪਿੰਡਾਂ ਚੋਂ ਯਾਤਰੀ ਨਹੀਂ ਲੱਭ ਰਹੇ ਹਨ।  ਭੁੱਚੋ ਹਲਕੇ ਦੀਆਂ ਨਵੰਬਰ ਵਿਚ 8 ਅਤੇ ਅਕਤੂਬਰ ਵਿਚ 17 ਬੱਸਾਂ ਕੈਂਸਲ ਕਰਨੀਆਂ ਪਈਆਂ ਹਨ। ਇਵੇਂ ਹੀ ਮੌੜ ਹਲਕੇ ਦੀਆਂ ਅਕਤੂਬਰ ਨਵੰਬਰ ਵਿਚ 28 ਬੱਸਾਂ ਰੱਦ ਕਰਨੀਆਂ ਪਈਆਂ ਹਨ। ਇਸ ਹਲਕੇ ਵਿਚ ਚਿੰਤਪੁਰਨੀ ਵਾਲੀਆਂ ਦੋ ਬੱਸਾਂ ਅਤੇ ਭੁੱਚੋ ਹਲਕੇ ਵਿਚ ਸਾਲਾਸਰ ਵਾਲੀਆਂ 2 ਬੱਸਾਂ ਰੱਦ ਕਰਨੀਆਂ ਪਈਆਂ ਸਨ। ਬਠਿੰਡਾ ਜ਼ਿਲ•ੇ ਚੋਂ ਰੋਜ਼ਾਨਾ 8 ਅਤੇ ਮਾਨਸਾ ਚੋਂ ਰੋਜ਼ਾਨਾ ਪੰਜ ਬੱਸਾਂ ਸ੍ਰੀ ਦਰਬਾਰ ਸਾਹਿਬ ਵਾਸਤੇ ਦਿੱਤੀਆਂ ਗਈਆਂ ਹਨ। ਬਠਿੰਡਾ ਜ਼ਿਲ•ੇ ਚੋਂ ਸਾਲਾਸਰ ਦੀ ਥਾਂ ਹੁਣ ਚਿੰਤਪੁਰਨੀ ਲਈ ਤੀਰਥ ਯਾਤਰਾ ਸ਼ੁਰੂ ਕੀਤੀ ਗਈ ਹੈ। ਮਾਨਸਾ ਜ਼ਿਲ•ੇ ਦੀਆਂ ਅੱਜ ਪੰਜ ਬੱਸਾਂ ਨੂੰ ਰੱਦ ਕਰਨਾ ਪਿਆ ਹੈ ਜਦੋਂ ਕਿ ਨਵੰਬਰ ਮਹੀਨੇ ਵਿਚ ਪਹਿਲਾਂ ਵੀ ਪੰਜ ਬੱਸਾਂ ਕੈਂਸਲ ਕੀਤੀਆਂ ਗਈਆਂ ਹਨ।
                      ਇਸ ਜ਼ਿਲ•ੇ ਵਿਚ 30 ਸਤੰਬਰ ਤੋਂ ਸ੍ਰੀ ਅੰਮ੍ਰਿਤਸਰ ਲਈ ਤੀਰਥ ਯਾਤਰਾ ਬੰਦ ਕਰ ਦਿੱਤੀ ਗਈ ਸੀ ਅਤੇ ਹੁਣ 30 ਅਕਤੂਬਰ ਤੋਂ ਮੁੜ ਸ਼ੁਰੂ ਕੀਤੀ ਗਈ ਹੈ। ਇਸ ਜ਼ਿਲ•ੇ ਵਿਚ ਸਾਲਾਸਰ ਵਾਲੀ ਯਾਤਰਾ ਵੀ ਕਰੀਬ ਡੇਢ ਮਹੀਨੇ ਤੋਂ ਬੰਦ ਹੈ। ਪਤਾ ਲੱਗਾ ਹੈ ਕਿ ਸਾਲਾਸਰ ਦੀ ਸਿਰਸੇ ਵਾਲੀ ਧਰਮਸਾਲਾ ਦੇ ਪ੍ਰਬੰਧਕਾਂ ਨੇ ਪੀ.ਆਰ.ਟੀ.ਸੀ ਨੂੰ ਲਿਖਤੀ ਪੱਤਰ ਭੇਜ ਦਿੱਤਾ ਸੀ ਕਿ ਮਾਨਸਾ ਵਾਲੇ ਯਾਤਰੀ ਰੌਲਾ ਜਿਆਦਾ ਪਾਉਂਦੇ ਹਨ ਜਿਸ ਕਰਕੇ ਉਹ ਇਸ ਜ਼ਿਲ•ੇ ਦੇ ਯਾਤਰੀਆਂ ਦੀ ਰਿਹਾਇਸ਼ ਅਤੇ ਖਾਣੇ ਦਾ ਪ੍ਰਬੰਧ ਕਰਨ ਤੋਂ ਅਸਮਰੱਥ ਹਨ। ਜ਼ਿਲ•ਾ ਪ੍ਰਸ਼ਾਸਨ ਮਾਨਸਾ ਨੇ ਉਸ ਮਗਰੋਂ ਇਹ ਯਾਤਰਾ ਬੰਦ ਕਰ ਦਿੱਤੀ ਸੀ। ਡਿਪਟੀ ਕਮਿਸ਼ਨਰ ਬਠਿੰਡਾ ਡਾ.ਬਸੰਤ ਗਰਗ ਦਾ ਕਹਿਣਾ ਸੀ ਕਿ ਜ਼ਿਲ•ੇ ਵਿਚ ਤੀਰਥ ਯਾਤਰਾ ਤੇ ਜਾਣ ਲਈ ਬੱਸਾਂ ਦੀ ਪੂਰੀ ਮੰਗ ਹੈ ਅਤੇ ਕਿਸੇ ਹਲਕੇ ਵਿਚ ਵੀ ਇਹ ਮੰਗ ਘਟੀ ਨਹੀਂ ਹੈ। ਦੂਸਰੀ ਤਰਫ਼ ਸਰਕਾਰੀ ਵੇਰਵੇ ਬੱਸਾਂ ਕੈਂਸਲ ਹੋਣ ਦੀ ਗਵਾਹ ਭਰ ਰਹੇ ਹਨ।
                    ਸ਼੍ਰੋਮਣੀ ਅਕਾਲੀ ਦਲ ਦੀ ਕੋਰ ਕਮੇਟੀ ਦੇ ਮੈਂਬਰ ਸ੍ਰੀ ਬਲਕਾਰ ਸਿੰਘ ਗੋਨਿਆਣਾ ਦਾ ਕਹਿਣਾ ਸੀ ਕਿ ਜੀਰੀ ਦਾ ਸੀਜਨ ਹੋਣ ਕਰਕੇ ਪਿੰਡਾਂ ਦੇ ਕਿਸਾਨ ਅਤੇ ਮਜ਼ਦੂਰ ਪੂਰੀ ਤਰ•ਾਂ ਰੁੱਝੇ ਹੋਏ ਸਨ ਜਿਸ ਕਰਕੇ ਥੋੜਾ ਬਹੁਤਾ ਅਸਰ ਪਿਆ ਹੈ ਪ੍ਰੰਤੂ ਹੁਣ ਮੁੜ ਪਿੰਡਾਂ ਚੋਂ ਬੱਸਾਂ ਦੀ ਮੰਗ ਆਉਣ ਲੱਗੀ ਹੈ। ਸੂਤਰ ਦੱਸਦੇ ਹਨ ਕਿ ਮਾਲਵਾ ਖ਼ਿੱਤੇ ਦੇ ਦੂਸਰੇ ਜ਼ਿਲਿ•ਆਂ ਵਿਚ ਵੀ ਬੱਸਾਂ ਰੱਦ ਹੋਈਆਂ ਹਨ। ਦੱਸਣਯੋਗ ਹੈ ਕਿ ਪੰਜਾਬ ਸਰਕਾਰ ਵਲੋਂ ਸ੍ਰੀ ਦਰਬਾਰ ਸਾਹਿਬ ਦੀ ਯਾਤਰਾ ਤੇ 31 ਦਸੰਬਰ ਤੱਕ 27 ਕਰੋੜ ਰੁਪਏ ਖਰਚ ਕੀਤੇ ਜਾਣੇ ਹਨ। 

Thursday, November 3, 2016

                                  ਪੇਂਡੂ ਬੱਸ ਸੇਵਾ
           ਸਰਕਾਰੀ ਬੱਸਾਂ ਤੇ ਹੁਣ 'ਅਕਾਲੀ ਰੰਗ'
                                  ਚਰਨਜੀਤ ਭੁੱਲਰ
ਬਠਿੰਡਾ  : ਪੀ.ਆਰ.ਟੀ.ਸੀ ਹੁਣ ਕਰਜ਼ਾ ਲੈ ਕੇ ਹਾਕਮ ਧਿਰ ਦਾ 'ਪੇਂਡੂ ਬੱਸ ਸੇਵਾ' ਦਾ ਸੁਪਨਾ ਪੂਰਾ ਕਰੇਗੀ ਤਾਂ ਜੋ ਚੋਣਾਂ ਤੋਂ ਪਹਿਲਾਂ ਕਰੀਬ 60 ਪੇਂਡੂ ਰੂਟਾਂ ਤੇ ਬੱਸਾਂ ਚਾਲੂ ਕੀਤੀਆਂ ਜਾ ਸਕਣ। ਹਾਕਮ ਧਿਰ ਦੇ ਵਿਧਾਇਕਾਂ ਅਤੇ ਹਲਕਾ ਇੰਚਾਰਜਾਂ ਤਰਫ਼ੋਂ ਇਨ•ਾਂ ਬੱਸਾਂ ਦੇ 'ਆਫ਼ ਦੀ ਰਿਕਾਰਡ' ਰੂਟ ਤਿਆਰ ਕੀਤੇ ਗਏ ਸਨ। ਇਨ•ਾਂ ਮੁਤਾਬਿਕ ਹੀ ਪੀ.ਆਰ.ਟੀ.ਸੀ ਨੇ ਬੱਸ ਪਰਮਿਟ ਅਪਲਾਈ ਕੀਤੇ ਸਨ। ਬਾਦਲਾਂ ਦੇ ਹਲਕੇ ਵਿਚ ਤਾਂ ਪੀ.ਆਰ.ਟੀ.ਸੀ ਨੇ 'ਪੇਂਡੂ ਬੱਸ ਸੇਵਾ' ਚਾਲੂ ਕਰਨ ਵਾਸਤੇ ਸੱਤ ਬੱਸਾਂ ਭੇਜ ਵੀ ਦਿੱਤੀਆਂ ਹਨ ਜਿਨ•ਾਂ ਚੋਂ ਚਾਰ ਬੱਸਾਂ ਬੁਢਲਾਡਾ ਡਿਪੂ ਨੇ ਲਿੰਕ ਸੜਕਾਂ ਤੇ ਚਲਾ ਦਿੱਤੀਆਂ ਹਨ। ਪੰਜਾਬ ਸਰਕਾਰ ਨੇ ਪੀ. ਆਰ. ਟੀ.ਸੀ ਦੀ ਕਰੀਬ ਡੇਢ ਕਰੋੜ ਰੁਪਏ ਦੀ ਪਰਮਿਟ ਫੀਸ (ਪ੍ਰਤੀ ਕਿਲੋਮੀਟਰ) ਵੀ ਮੁਆਫ਼ ਕਰ ਦਿੱਤੀ ਹੈ। ਪੀ.ਆਰ.ਟੀ.ਸੀ ਵਲੋਂ ਚੋਣਾਂ ਕਰਕੇ ਹੱਥੋਂ ਹੱਥੀ 'ਪੇਂਡੂ ਬੱਸ ਸੇਵਾ' ਦਾ ਕਾਰਜ ਨੇਪਰੇ ਚਾੜਿ•ਆ ਜਾ ਰਿਹਾ ਹੈ। ਖਾਸ ਗੱਲ ਇਹ ਹੈ ਕਿ ਕਾਰਪੋਰੇਸ਼ਨ ਤਰਫ਼ੋਂ ਇਨ•ਾਂ ਨਵੀਆਂ ਬੱਸਾਂ ਨੂੰ ਅਕਾਲੀ ਦਲ ਵਾਲੇ ਰੰਗ (ਨੀਲਾ ਤੇ ਕੇਸਰੀ) ਵਿਚ ਰੰਗਿਆ ਗਿਆ ਹੈ। ਪਹਿਲਾਂ ਕਾਰਪੋਰੇਸ਼ਨ ਕੋਲ ਇੱਕੋ ਰੰਗ ਦੀਆਂ ਚਿੱਟੀਆਂ ਜਾਂ ਫਿਰ ਨੀਲੇ ਰੰਗ ਦੀਆਂ ਬੱਸਾਂ ਹੁੰਦੀਆਂ ਸਨ ਪ੍ਰੰਤੂ ਹੁਣ 'ਪੇਂਡੂ ਬੱਸ ਸੇਵਾ' ਵਾਲੀਆਂ ਬੱਸਾਂ ਤੇ ਨੀਲਾ ਅਤੇ ਕੇਸਰੀ ਰੰਗ ਕੀਤਾ ਗਿਆ ਹੈ।
                     ਵੇਰਵਿਆਂ ਅਨੁਸਾਰ ਕਾਰਪੋਰੇਸ਼ਨ ਨੇ 'ਪੇਂਡੂ ਬੱਸ ਸੇਵਾ' ਤਹਿਤ ਕਿਲੋਮੀਟਰ ਸਕੀਮ ਤਹਿਤ ਬੱਸਾਂ ਚਲਾਉਣ ਲਈ ਦੋ ਦਫ਼ਾ ਟੈਂਡਰ ਵੀ ਕੀਤੇ ਸਨ ਪ੍ਰੰਤੂ ਕਿਲੋਮੀਟਰ ਸਕੀਮ ਤਹਿਤ ਸਿਰਫ਼ 7 ਬੱਸਾਂ ਹੀ ਮਿਲੀਆਂ ਹਨ ਜਦੋਂ ਕਿ ਕਾਰਪੋਰੇਸ਼ਨ ਨੇ ਪੰਜਾਬ ਵਿਚ 106 ਰੂਟਾਂ ਦੇ ਪਰਮਿਟ ਹਾਸਲ ਕੀਤੇ ਹਨ। ਪੀ.ਆਰ.ਟੀ.ਸੀ ਨੇ ਹੁਣ ਮੁਢਲੇ ਪੜਾਅ ਤੇ 60 ਨਵੀਆਂ ਬੱਸਾਂ 'ਪੇਂਡੂ ਬੱਸ ਸੇਵਾ' ਵਾਸਤੇ ਖਰੀਦਣ ਦਾ ਫੈਸਲਾ ਕਰ ਲਿਆ ਹੈ ਜਿਸ ਵਾਸਤੇ ਕਰੀਬ 8.10 ਕਰੋੜ ਰੁਪਏ ਦਾ ਸਟੇਟ ਬੈਂਕ ਆਫ਼ ਪਟਿਆਲਾ ਤੋਂ ਲੋਨ ਲਿਆ ਜਾਣਾ ਹੈ। ਕਾਰਪੋਰੇਸ਼ਨ ਨੇ ਪ੍ਰਤੀ ਬੱਸ 13.50 ਲੱਖ ਦੀ ਕੀਮਤ ਫਾਈਨਲ ਕਰ ਦਿੱਤੀ ਹੈ ਅਤੇ ਭਲਕੇ ਕੰਪਨੀ ਨੂੰ ਬੱਸਾਂ ਦਾ ਆਰਡਰ ਦਿੱਤਾ ਜਾਣਾ ਹੈ। ਕਾਰਪੋਰੇਸ਼ਨ ਨੂੰ ਜੋ ਕਿਲੋਮੀਟਰ ਸਕੀਮ ਤਹਿਤ ਸੱਤ ਬੱਸਾਂ ਪ੍ਰਾਪਤ ਹੋਈਆਂ ਹਨ, ਉਨ•ਾਂ ਨੂੰ ਬਠਿੰਡਾ ਮਾਨਸਾ ਜ਼ਿਲ•ੇ ਵਿਚ ਭੇਜ ਦਿੱਤਾ ਗਿਆ ਹੈ। ਇਨ•ਾਂ ਬੱਸਾਂ ਨੂੰ ਪ੍ਰਤੀ ਕਿਲੋਮੀਟਰ 7 ਰੁਪਏ ਤੋਂ ਇਲਾਵਾ ਡੀਜ਼ਲ ਵੱਖਰਾ ਦਿੱਤਾ ਜਾਣਾ ਹੈ। ਬੁਢਲਾਡਾ ਡਿਪੂ ਦੇ ਜਨਰਲ ਮੈਨੇਜਰ ਸ੍ਰੀ ਐਮ.ਪੀ.ਸਿੰਘ ਦਾ ਕਹਿਣਾ ਸੀ ਕਿ 'ਪੇਂਡੂ ਬੱਸ ਸੇਵਾ' ਤਹਿਤ ਚਾਰ ਬੱਸਾਂ ਪ੍ਰਾਪਤ ਹੋਈਆਂ ਹਨ ਜਿਨ•ਾਂ ਨੂੰ ਆਰਜ਼ੀ ਤੌਰ ਤੇ ਪੁਰਾਣੇ ਰੂਟਾਂ ਤੇ ਚਲਾ ਦਿੱਤਾ ਗਿਆ ਹੈ। ਪਰਮਿਟ ਮਿਲਣ ਮਗਰੋਂ ਨਵੇਂ ਪੇਂਡੂ ਰੂਟਾਂ ਤੇ ਚਲਾਇਆ ਜਾਵੇਗਾ।
                     ਸੂਤਰਾਂ ਅਨੁਸਾਰ ਹਰ ਅਸੈਂਬਲੀ ਹਲਕੇ ਵਿਚ ਦੋ ਦੋ ਬੱਸਾਂ ਦਿੱਤੀਆਂ ਜਾਣੀਆਂ ਹਨ। ਕਾਰਪੋਰੇਸ਼ਨ ਨੇ ਹਾਕਮ ਧਿਰ ਦੀ ਖੁਸ਼ੀ ਲਈ ਹੁਣ ਖੁਦ ਹੀ 'ਪੇਂਡੂ ਬੱਸ ਸੇਵਾ' ਤਹਿਤ ਬੱਸਾਂ ਚਲਾਉਣ ਦਾ ਫੈਸਲਾ ਕਰ ਲਿਆ ਹੈ। ਸੂਤਰ ਆਖਦੇ ਹਨ ਕਿ ਇਨ•ਾਂ 'ਪੇਂਡੂ ਰੂਟਾਂ' ਦੀ ਨਿਸ਼ਾਨਦੇਹੀ ਸਿਆਸੀ ਲੋਕਾਂ ਨੇ ਕੀਤੀ ਹੈ ਜੋ ਕਾਰਪੋਰੇਸ਼ਨ ਲਈ ਮਾਲੀ ਤੌਰ ਤੇ ਘਾਟੇ ਵਾਲੇ ਸੌਦਾ ਹਨ। ਲੋਕ ਸਭਾ ਚੋਣਾਂ ਤੋਂ ਪਹਿਲਾਂ ਬਠਿੰਡਾ ਜ਼ਿਲ•ੇ ਵਿਚ ਜੋ ਬੱਸਾਂ ਦੋ ਨੰਬਰ ਵਿਚ ਬਿਨ•ਾਂ ਪਰਮਿਟ ਤੋਂ ਚਲਾਈਆਂ ਗਈਆਂ ਸਨ, ਉਨ•ਾਂ ਚੋਂ ਕੁਝ ਤਾਂ ਬੰਦ ਹੋ ਗਈਆਂ ਸਨ ਜਦੋਂ ਕਿ ਬਾਕੀ ਰੂਟਾਂ ਤੇ ਇਹ ਬੱਸਾਂ ਘਾਟਾ ਝੱਲ ਰਹੀਆਂ ਹਨ।  ਬਠਿੰਡਾ ਡਿਪੂ ਦੇ ਸੂਤਰਾਂ ਨੇ ਦੱਸਿਆ ਕਿ ਦੋ ਦਿਨਾਂ ਵਿਚ 'ਪੇਂਡੂ ਬੱਸ ਸੇਵਾ' ਤਹਿਤ ਕੁਝ ਬੱਸਾਂ ਮਿਲਣੀਆਂ ਹਨ ਜਿਨ•ਾਂ ਨੂੰ ਪੇਂਡੂ ਰੂਟਾਂ ਤੇ ਚਾਲੂ ਕੀਤਾ ਜਾਣਾ ਹੈ।
                                           ਬੱਸਾਂ ਖੁਦ ਖਰੀਦ ਰਹੇ ਹਾਂ : ਐਮ.ਡੀ
ਪੀ.ਆਰ.ਟੀ.ਸੀ ਦੇ ਮੈਨੇਜਿੰਗ ਡਾਇਰੈਕਟਰ ਰਵਿੰਦਰ ਸਿੰਘ ਦਾ ਕਹਿਣਾ ਸੀ ਕਿ 'ਪੇਂਡੂ ਬੱਸ ਸੇਵਾ' ਲਈ ਸਰਕਾਰ ਨੇ ਪ੍ਰਤੀ ਕਿਲੋਮੀਟਰ ਪਰਮਿਟ ਫੀਸ ਮੁਆਫ਼ ਕਰ ਦਿੱਤੀ ਹੈ ਜੋ ਕਿ ਡੇਢ ਕਰੋੜ ਰੁਪਏ ਬਣਦੀ ਹੈ। ਉਨ•ਾਂ ਆਖਿਆ ਕਿ ਡੇਢ ਮਹੀਨੇ ਵਿਚ ਕਿਲੋਮੀਟਰ ਸਕੀਮ ਤਹਿਤ 50 ਬੱਸਾਂ 'ਪੇਂਡੂ ਬੱਸ ਸੇਵਾ' ਤਹਿਤ ਚਾਲੂ ਕਰ ਦਿੱਤੀਆਂ ਜਾਣੀਆਂ ਹਨ। ਇਹ ਬੱਸਾਂ ਖੁਦ ਕਾਰਪੋਰੇਸ਼ਨ ਖਰੀਦ ਕਰ ਰਹੀ ਹੈ ਅਤੇ 20 ਬੱਸਾਂ ਦਾ ਅਲਾਟ ਹਫਤੇ ਤੱਕ ਮਿਲ ਜਾਣਾ ਹੈ। 

Saturday, October 29, 2016

                                      ਵਿਸ਼ਵ ਕਬੱਡੀ ਕੱਪ
                    ਐਤਕੀਂ ਪਰਨੀਤੀ ਲਾਏਗੀ ਠੁਮਕੇ
                                       ਚਰਨਜੀਤ ਭੁੱਲਰ
ਬਠਿੰਡਾ  : ਐਤਕੀਂ ਵਿਸ਼ਵ ਕਬੱਡੀ ਕੱਪ 'ਤੇ ਬਾਲੀਵੁੱਡ ਅਦਾਕਾਰਾ ਪਰੀਨੀਤੀ ਚੋਪੜਾ ਦੇ ਜਲਵੇ ਦਿਖਣਗੇ ਅਤੇ ਇਹ ਜਲਵਾ ਖਜ਼ਾਨੇ ਨੂੰ ਲੱਖਾਂ ਵਿਚ ਪਵੇਗਾ। ਚੋਣਾਂ ਕਰਕੇ ਐਤਕੀਂ ਕਬੱਡੀ ਕੱਪ ਦੇ ਉਦਘਾਟਨੀ ਤੇ ਸਮਾਪਤੀ ਸਮਾਰੋਹਾਂ ਵਿਚ ਰੰਗੀਨੀ ਦਿਖਣ ਨੂੰ ਮਿਲੇਗੀ। ਇਨ•ਾਂ ਸਮਾਰੋਹਾਂ ਤੇ ਸਰਕਾਰ ਸਵਾ ਚਾਰ ਕਰੋੜ ਰੁਪਏ ਖਰਚ ਕਰ ਰਹੀ ਹੈ। ਮੁੰਬਈ ਦੀ ਫੈਰਿਸਵੀਲ ਕੰਪਨੀ ਇਨ•ਾਂ ਸਮਾਰੋਹਾਂ ਦੇ ਇੰਤਜ਼ਾਮ ਕਰੇਗੀ। ਖੇਡ ਵਿਭਾਗ ਪੰਜਾਬ ਨੇ ਇਸ ਕੰਪਨੀ ਨੂੰ ਕੰਮ ਅਲਾਟ ਕਰ ਦਿੱਤਾ ਹੈ ਅਤੇ 3 ਨਵੰਬਰ ਨੂੰ ਛੇਵੇਂ ਵਿਸ਼ਵ ਕਬੱਡੀ ਕੱਪ ਦਾ ਰੋਪੜ ਵਿਚ ਉਦਘਾਟਨ ਹੋਵੇਗਾ। ਬਾਲੀਵੁੱਡ ਸਟਾਰ ਪ੍ਰਿਅੰਕਾ ਚੋਪੜਾ ਨੇ ਚੌਥੇ ਵਿਸ਼ਵ ਕਬੱਡੀ ਕੱਪ ਮੌਕੇ ਬਠਿੰਡਾ ਵਿਚ 12 ਮਿੰਟ ਦੀ ਪੇਸ਼ਕਾਰੀ ਕੀਤੀ ਸੀ ਅਤੇ ਐਤਕੀਂ ਪ੍ਰਿਅੰਕਾ ਚੋਪੜਾ ਦੀ ਭੈਣ ਪ੍ਰਨੀਤੀ ਚੋਪੜਾ ਆਪਣੇ ਰੰਗ ਦਿਖਾਏਗੀ। ਵੇਰਵਿਆਂ ਅਨੁਸਾਰ ਉਦਘਾਟਨੀ ਸਮਾਰੋਹਾਂ ਵਿਚ ਨਵੀਂ ਤਕਨਾਲੋਜੀ ਦੇ ਰੰਗ ਵੀ ਦਿਖਣਗੇ। ਕਰੀਬ 30 ਹਜ਼ਾਰ ਦਰਸ਼ਕਾਂ ਨੂੰ ਰਿਸਟ ਬੈਂਡ ਦਿੱਤੇ ਜਾਣਗੇ। ਕੰਟਰੋਲ ਰੂਮ ਚੋਂ ਸਵਿੱਚ ਆਨ ਹੋਣ ਤੇ ਪੂਰੀ ਦਰਸ਼ਕ ਗੈਲਰੀ ਲਾਈਟਿੰਗ ਨਾਲ ਭਰ ਜਾਵੇਗੀ ਅਤੇ ਰਿਸਟ ਬੈਂਡ ਚਮਕ ਛੱਡਣਗੇ।
                  ਇਵੇਂ ਹੀ ਉਦਘਾਟਨੀ ਸਮਾਰੋਹਾਂ ਵਿਚ ਡਰੋਨ (ਉੱਡਣ ਵਾਲੇ ਮਿੰਨੀ ਜਹਾਜ਼) ਵੀ ਸਟੇਡੀਅਮ ਵਿਚ ਆਪਣਾ ਜਲਵਾ ਦਿਖਾਉਣਗੇ। ਇਨ•ਾਂ ਸਮਾਰੋਹਾਂ ਦੀ ਐਂਕਰਿੰਗ ਅਰਜਨ ਬਾਜਵਾ ਕਰਨਗੇ। ਉਦਘਾਟਨੀ ਸਮਾਰੋਹਾਂ ਵਿਚ ਗਾਇਕ ਗਿੱਪੀ ਗਰੇਵਾਲ,ਜਸਪਿੰਦਰ ਨਰੂਲਾ,ਨੂਰਾ ਸਿਸਟਰਜ਼ ਤੋਂ ਇਲਾਵਾ ਕਾਮੇਡੀ ਕਲਾਕਾਰ ਭਾਰਤੀ ਪੁੱਜ ਰਹੀ ਹੈ। ਸਮਾਪਤੀ ਸਮਾਰੋਹ ਉਪ ਮੁੱਖ ਮੰਤਰੀ ਦੇ ਹਲਕਾ ਜਲਾਲਾਬਾਦ ਵਿਚ ਹੋਣਗੇ। ਸਮਾਪਤੀ ਸਮਾਰੋਹਾਂ ਮੌਕੇ ਗਾਇਕ ਸੈਰੀ ਮਾਨ ਅਤੇ ਗਾਇਕਾ ਮਿਸ ਪੂਜਾ ਤੋਂ ਇਲਾਵਾ ਹਰਸ਼ਦੀਪ ਕੌਰ ਦੀ ਪੇਸ਼ਕਾਰੀ ਹੋਵੇਗੀ ਅਤੇ ਸਤਿੰਦਰ ਸੱਤੀ ਐਂਕਰਿੰਗ ਕਰੇਗੀ। ਫੈਰਿਸਵੀਲ ਕੰਪਨੀ ਦੀ ਐਮ.ਡੀ ਸ਼ੁਭਰਾ ਭਾਰਦਵਾਜ ਨੇ ਪੰਜਾਬੀ ਟ੍ਰਿਬਿਊਨ ਨੂੰ ਦੱਸਿਆ ਕਿ ਉਦਘਾਟਨੀ ਸਮਾਰੋਹਾਂ ਵਿਚ ਪ੍ਰਨੀਤੀ ਚੋਪੜਾ ਇੱਕ ਘੰਟੇ ਦੀ ਪੇਸ਼ਕਾਰੀ ਕਰੇਗੀ ਅਤੇ ਇਨ•ਾਂ ਸਮਾਰੋਹਾਂ ਵਿਚ ਨਵੀਂ ਤਕਨਾਲੋਜੀ ਦਾ ਕਮਾਲ ਵੀ ਵੇਖਣ ਨੂੰ ਮਿਲੇਗਾ ਜੋ ਭਾਰਤ ਵਿਚ ਪਹਿਲੀ ਦਫ਼ਾ ਹੋਵੇਗਾ। ਉਨ•ਾਂ ਦੱਸਿਆ ਕਿ ਐਤਕੀਂ ਸਮਾਰੋਹਾਂ ਵਿਚ ਕਾਫ਼ੀ ਕੁਝ ਨਵਾਂ ਵੇਖਣ ਨੂੰ ਮਿਲੇਗਾ।
                  ਦੱਸਣਯੋਗ ਹੈ ਕਿ ਕਈ ਵਰਿ•ਆਂ ਤੋਂ ਵਿਸ਼ਵ ਕਬੱਡੀ ਕੱਪ ਦੇ ਸਮਾਰੋਹਾਂ ਦਾ ਪ੍ਰਬੰਧ ਫੈਰਿਸਵੀਲ ਕੰਪਨੀ ਹੀ ਕਰ ਰਹੀ ਹੈ। ਪਿਛਲੇ ਵਰੇ• ਸਾਲ 2015 ਵਿਚ ਸ੍ਰੀ ਗੁਰੂ ਗਰੰਥ ਸਾਹਿਬ ਜੀ ਦੇ ਬੇਅਦਬੀ ਦੇ ਮਾਮਲੇ ਕਰਕੇ ਕਬੱਡੀ ਕੱਪ ਮੁਲਤਵੀ ਕਰ ਦਿੱਤਾ ਗਿਆ ਸੀ। ਪਿਛਲੇ ਵਿਸ਼ਵ ਕਬੱਡੀ ਕੱਪਾਂ ਵਿਚ ਬਾਲੀਵੁੱਡ ਸਟਾਰ ਸਾਹਰੁਖ ਖਾਨ ਅਤੇ ਅਕਸ਼ੈ ਕੁਮਾਰ ਵੀ ਸ਼ਮੂਲੀਅਤ ਕਰ ਚੁੱਕੇ ਹਨ। ਐਤਕੀਂ ਚੋਣਾਂ ਨੇੜੇ ਹਨ ਜਿਸ ਕਰਕੇ ਸਰਕਾਰ ਨੌਜਵਾਨਾਂ ਨੂੰ ਖੁਸ਼ ਕਰਨ ਲਈ ਕੋਈ ਕਸਰ ਬਾਕੀ ਨਹੀਂ ਛੱਡ ਰਹੀ ਹੈ। ਸਟੇਡੀਅਮਾਂ ਵਿਚ ਵੱਧ ਤੋਂ ਵੱਧ ਭੀੜ ਜੁਟਾਉਣ ਲਈ ਪਿੰਡਾਂ ਚੋਂ ਲੋਕਾਂ ਨੂੰ ਬੱਸਾਂ ਤੇ ਲਿਆਉਣ ਦੀ ਯੋਜਨਾ ਬਣੀ ਹੈ। ਇਹ ਕਬੱਡੀ ਕੱਪ ਪੰਜਾਬ ਦੇ 14 ਸ਼ਹਿਰਾਂ ਵਿਚ ਹੋਵੇਗਾ ਅਤੇ 17 ਨਵੰਬਰ ਨੂੰ ਸਮਾਪਤੀ ਹੋਵੇਗੀ। ਖਿਡਾਰੀਆਂ ਲਈ ਇਨਾਮੀ ਰਾਸ਼ੀ 7 ਕਰੋੜ ਰੁਪਏ ਰੱਖੀ ਗਈ ਹੈ। ਇਸ ਕਬੱਡੀ ਕੱਪ ਦਾ ਬਜਟ ਕਰੀਬ 19 ਕਰੋੜ ਰੁਪਏ ਹੋਵੇਗਾ। ਵਿਸ਼ੇਸ਼ ਗੱਲ ਇਹ ਹੋਵੇਗੀ ਕਿ ਐਤਕੀਂ ਪਾਕਿਸਤਾਨੀ ਟੀਮ ਕਬੱਡੀ ਕੱਪ ਵਿਚ ਨਹੀਂ ਦਿਖੇਗੀ ਜਦੋਂ ਕਿ ਸ੍ਰੀ ਲੰਕਾ ਦੀ ਕਬੱਡੀ ਟੀਮ ਪਹਿਲੀ ਦਫਾ ਕਬੱਡੀ ਕੱਪ ਵਿਚ ਸ਼ਮੂਲੀਅਤ ਕਰੇਗੀ।

Tuesday, October 25, 2016

                           ਵਜ਼ਾਰਤ ਚੋਂ ਝੰਡੀ
       ਹਰਸਿਮਰਤ ਕੋਲ ਛੇ ਕਰੋੜ ਦੇ ਗਹਿਣੇ !
                            ਚਰਨਜੀਤ ਭੁੱਲਰ
ਬਠਿੰਡਾ : ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਕੋਲ ਕਰੀਬ ਛੇ ਕਰੋੜ ਦੇ ਗਹਿਣੇ ਹਨ ਜਿਸ ਨੇ ਪੂਰੀ ਕੇਂਦਰੀ ਵਜ਼ਾਰਤ ਨੂੰ ਇਸ ਮਾਮਲੇ ਵਿਚ ਪਛਾੜ ਦਿੱਤਾ ਹੈ। ਕੇਂਦਰੀ ਮੰਤਰੀ ਬੀਬਾ ਬਾਦਲ ਨੇ ਲੰਘੇ ਮਾਲੀ ਵਰੇ• 2015-16 ਦੌਰਾਨ ਇੱਕੋ ਸਾਲ ਵਿਚ ਕਰੀਬ 62 ਲੱਖ ਰੁਪਏ ਦੇ ਗਹਿਣੇ ਖ਼ਰੀਦੇ ਹਨ ਜਾਂ ਫਿਰ ਇਸ ਜਵੈਲਰੀ ਦੀ ਕੀਮਤ ਵਧੀ ਹੈ। ਕੇਂਦਰੀ ਵਜ਼ਾਰਤ ਵਿਚ ਨੌ ਮਹਿਲਾਵਾਂ ਮੰਤਰੀ ਵਜੋਂ ਸ਼ਾਮਲ ਹਨ ਜਿਨ•ਾਂ ਚੋਂ ਕੋਈ ਵੀ ਮਹਿਲਾ ਮੰਤਰੀ ਗਹਿਣਿਆਂ ਦੇ ਮਾਮਲੇ ਵਿਚ ਕੇਂਦਰੀ ਮੰਤਰੀ ਬੀਬਾ ਬਾਦਲ ਦੇ ਨੇੜੇ ਤੇੜੇ ਵੀ ਨਹੀਂ ਹੈ। ਮੁੱਖ ਮੰਤਰੀ ਪੰਜਾਬ ਪ੍ਰਕਾਸ਼ ਸਿੰਘ ਬਾਦਲ ਦੀ ਨੂੰਹ ਹਰਸਿਮਰਤ ਕੌਰ ਬਾਦਲ ਦੀ 'ਜਵੈਲਰੀ' ਵਿਚ ਲੰਘੇ ਇੱਕ ਵਰ•ੇ ਵਿਚ ਵਾਧਾ ਹੋਇਆ ਹੈ ਜਦੋਂ ਕਿ ਬਾਕੀ ਕਿਸੇ ਮਹਿਲਾ ਮੰਤਰੀ ਦੇ 'ਗਹਿਣੇ' ਲੰਘੇ ਵਰਿ•ਆਂ ਵਿਚ ਵਧੇ ਨਹੀਂ ਹਨ। ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਵਲੋਂ ਪ੍ਰਧਾਨ ਮੰਤਰੀ ਦਫ਼ਤਰ ਵਿਚ ਜੋ ਸਾਲ 2015-16 ਦੀ ਤਾਜ਼ਾ ਰਿਟਰਨ ਦਾਖਲ ਕੀਤੀ ਗਈ ਹੈ, ਉਸ ਅਨੁਸਾਰ ਹੁਣ ਕੇਂਦਰੀ ਮੰਤਰੀ ਬੀਬਾ ਬਾਦਲ ਕੋਲ 6.02 ਕਰੋੜ ਦੇ ਗਹਿਣੇ ਹਨ ਜਦੋਂ ਕਿ ਸਾਲ 2014-15 ਦੌਰਾਨ ਕੇਂਦਰੀ ਮੰਤਰੀ ਕੋਲ 5.40 ਕਰੋੜ ਰੁਪਏ ਦੀ 'ਜਵੈਲਰੀ' ਸੀ। ਰਿਟਰਨ ਅਨੁਸਾਰ ਕੁਝ ਜਵੈਲਰੀ ਤਾਂ ਬੀਬਾ ਬਾਦਲ ਨੂੰ ਮਰਹੂਮ ਸੁਰਿੰਦਰ ਕੌਰ ਬਾਦਲ ਤੋਂ ਵਿਰਾਸਤ ਵਿਚ ਪ੍ਰਾਪਤ ਹੋਈ ਹੈ।
                        ਬੀਬਾ ਬਾਦਲ ਨੇ ਜਦੋਂ ਪਹਿਲੀ ਦਫਾ ਸਾਲ 2009 ਵਿਚ ਲੋਕ ਸਭਾ ਚੋਣ ਲੜੀ ਸੀ ਤਾਂ ਉਦੋਂ ਉਨ•ਾਂ ਕੋਲ ਤੋਹਫੇ ਵਿਚ ਮਿਲੇ ਅਤੇ ਖਰੀਦ ਕੀਤੇ 1.94 ਕਰੋੜ ਦੇ ਗਹਿਣੇ ਸਨ ਜਿਨ•ਾਂ ਦਾ ਵਜ਼ਨ 14.93 ਕਿਲੋ ਸੀ। ਤਾਜਾ ਰਿਟਰਨ ਅਨੁਸਾਰ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਕੋਲ ਇਸ ਰਿਟਰਨ ਮੁਤਾਬਿਕ 9 ਲੱਖ ਰੁਪਏ ਦੇ 'ਗਹਿਣੇ' ਹਨ। ਸੂਤਰ ਆਖਦੇ ਹਨ ਕਿ ਬੀਬਾ ਬਾਦਲ ਦੀ ਜਵੈਲਰੀ ਦੀ ਕੀਮਤ ਮਾਰਕੀਟ ਦੇ ਹਿਸਾਬ ਨਾਲ ਪਿਛਲੇ ਇੱਕ ਵਰ•ੇਂ ਦੌਰਾਨ ਵਧੀ ਹੈ ਤਾਜ਼ਾ ਵੇਰਵਿਆਂ ਅਨੁਸਾਰ ਕੇਂਦਰੀ ਮੰਤਰੀ ਮੇਨਕਾ ਗਾਂਧੀ ਕੋਲ 1.24 ਕਰੋੜ ਰੁਪਏ ਦੇ ਗਹਿਣੇ ਹਨ ਜਿਨ•ਾਂ ਵਿਚ 3.41 ਕਿਲੋ ਸੋਨਾ,85 ਕਿਲੋ ਸਿਲਵਰ ਅਤੇ ਛੇ ਗਰਾਮ ਦੇ ਕੀਮਤੀ ਸਟੋਨ ਵਗੈਰਾ ਹਨ। ਉਨ•ਾਂ ਕੋਲ ਕੁੱਲ ਸੰਪਤੀ 45.10 ਕਰੋੜ ਦੀ ਹੈ। ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਇਸ ਮਾਮਲੇ ਵਿਚ ਪਿਛੇ ਹਨ ਅਤੇ ਉਨ•ਾਂ ਕੋਲ ਸਿਰਫ਼ 30.48 ਲੱਖ ਦੇ ਗਹਿਣੇ ਹਨ ਜਦੋਂ ਕਿ ਉਨ•ਾਂ ਦੇ ਪਤੀ ਕੋਲ ਕੋਈ ਗਹਿਣਾ ਨਹੀਂ ਹੈ। ਉਂਜ, ਸੁਸਮਾ ਸਵਰਾਜ ਦੀ ਕੁੱਲ ਸੰਪਤੀ 26.18 ਕਰੋੜ ਦੀ ਹੈ। ਕੇਂਦਰੀ ਮੰਤਰੀ ਸਿਮਰਤੀ ਇਰਾਨੀ ਕੋਲ ਸਿਰਫ਼ 12.36 ਲੱਖ ਦੀ ਜਵੈਲਰੀ ਹੈ ਜਿਸ ਵਿਚ ਡਾਇਮੰਡ, ਸੋਨਾ ਅਤੇ ਕੀਮਤੀ ਸਟੋਨ ਸ਼ਾਮਿਲ ਹਨ ਜਦੋਂ ਕਿ ਉਨ•ਾਂ ਦੇ ਪਤੀ ਕੋਲ 23,171 ਦੇ ਗਹਿਣੇ ਹਨ।
                     ਇਵੇਂ ਕੇਂਦਰੀ ਮੰਤਰੀ ਉਮਾ ਭਾਰਤੀ ਕੋਲ 35 ਲੱਖ ਦੀ ਜਵੈਲਰੀ ਹੈ ਜਿਸ ਵਿਚ ਸੋਨੇ ਚਾਂਦੀ ਦੇ ਗਹਿਣੇ ਅਤੇ ਭਗਵਾਨ ਦੇ ਗਹਿਣੇ ਸ਼ਾਮਿਲ ਹਨ ਜਦੋਂ ਕਿ ਉਸ ਕੋਲ ਕੁੱਲ 1.72 ਕਰੋੜ ਦੀ ਸੰਪਤੀ ਹੈ। ਇਸੇ ਤਰ•ਾਂ ਮਹਿਲਾ ਕੇਂਦਰੀ ਮੰਤਰੀ ਨਿਰਮਲਾ ਸੀਥਾਰਮਨ ਕੋਲ ਵੀ 7.87 ਲੱਖ ਦੀ ਜਵੈਲਰੀ ਹੈ ਜਦੋਂ ਕਿ ਉਨ•ਾਂ ਦੇ ਪਤੀ ਕੋਲ 75 ਹਜ਼ਾਰ ਦੇ ਗਹਿਣੇ ਹਨ। ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਜਦੋਂ ਹਲਕੇ ਵਿਚ ਵਿਚਰਦੇ ਹਨ ਤਾਂ ਉਦੋਂ ਇਨ•ਾਂ ਗਹਿਣਿਆਂ ਦੀ ਚਮਕ ਬਹੁਤੀ ਨਜ਼ਰ ਨਹੀਂ ਪੈਂਦੀ ਹੈ ਪ੍ਰੰਤੂ ਉਨ•ਾਂ ਕੋਲ ਹਰ ਤਰ•ਾਂ ਦੇ ਗਹਿਣੇ ਮੌਜੂਦ ਹਨ। ਤਿੰਨ ਹੋਰ ਮਹਿਲਾ ਕੇਂਦਰੀ ਮੰਤਰੀ ਹਨ ਜੋ ਗਹਿਣਿਆਂ ਦੇ ਮਾਮਲੇ ਵਿਚ ਬੀਬਾ ਬਾਦਲ ਤੋਂ ਕਾਫ਼ੀ ਪਿਛੇ ਹਨ।
                                  ਏਨਾ ਤਾਂ ਗਰੀਬ ਦੇ ਘਰ ਆਟਾ ਨਹੀਂ ਹੁੰਦਾ : ਭਗਵੰਤ ਮਾਨ
ਮੈਂਬਰ ਪਾਰਲੀਮੈਂਟ ਭਗਵੰਤ ਮਾਨ ਦਾ ਪ੍ਰਤੀਕਰਮ ਹੈ ਕਿ ਗਰੀਬ ਦੇ ਘਰ ਵਿਚ ਏਨਾ ਆਟਾ ਨਹੀਂ ਹੁੰਦਾ ਜਿਨ•ੇ ਗਹਿਣੇ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਕੋਲ ਹਨ। ਉਨ•ਾਂ ਆਖਿਆ ਜੋ ਨੇਤਾ ਆਪਣੀ ਪਬਲਿਕ ਚੋਂ ਸਾਹ ਲੈਂਦੇ ਹਨ, ਉਨ•ਾਂ ਦੇ ਘਰਾਂ ਦੀ ਦੌਲਤ ਅਸਮਾਨੀ ਨਹੀਂ ਚੜ•ਦੀ। ਉਨ•ਾਂ ਆਖਿਆ ਕਿ ਅਗਾਮੀ ਚੋਣਾਂ ਵਿਚ ਪੰਜਾਬ ਦੇ ਆਮ ਲੋਕ ਹਰ ਮਾਮਲੇ ਦਾ ਲੇਖਾ ਜੋਖਾ ਕਰਨਗੇ। 

Monday, October 24, 2016

                                 ਸ਼੍ਰੋਮਣੀ ਕਮੇਟੀ ਨੇ
             ਅਸਥੀਆਂ 'ਕਬਾੜ' ਵਿਚ ਵੇਚੀਆਂ !
                                  ਚਰਨਜੀਤ ਭੁੱਲਰ
ਬਠਿੰਡਾ :  ਪੰਜਾਬੀ ਸੂਬਾ ਮੋਰਚਾ ਦੇ ਅਸਲ ਨਾਇਕ ਅੱਜ ਠੱਗੇ ਮਹਿਸੂਸ ਕਰ ਰਹੇ ਹਨ। ਸ਼ਹੀਦਾਂ ਦੇ ਪਰਿਵਾਰ ਆਖਦੇ ਹਨ ਕਿ ਸ਼੍ਰੋਮਣੀ ਕਮੇਟੀ ਨੇ ਤਾਂ ਉਨ•ਾਂ ਦੇ ਸ਼ਹੀਦਾਂ ਦੀਆਂ ਅਸਥੀਆਂ ਵਾਲੇ ਲਾਕਰ ਵੀ ਕਬਾੜ ਵਿਚ ਵੇਚ ਦਿੱਤੇ ਹਨ। ਪੰਜਾਬੀ ਸੂਬਾ ਸਮਾਰੋਹਾਂ ਦੇ 50 ਸਾਲਾਂ ਜਸ਼ਨਾਂ ਵਿਚੋਂ ਵੀ ਉਹ ਨਾਇਕ 'ਆਊਟ' ਹਨ ਜਿਨ•ਾਂ ਨੇ ਸੰਘਰਸ਼ਾਂ ਵਿਚ ਬੁਰੇ ਦਿਨ ਵੀ ਵੇਖੇ। ਪੰਜਾਬੀ ਸੂਬਾ ਮੋਰਚੇ ਦੌਰਾਨ ਬਠਿੰਡਾ ਜ਼ੇਲ• ਵਿਚ ਪੁਲੀਸ ਦੀ ਗੋਲੀ ਚੱਲੀ ਤਾਂ ਅੰਮ੍ਰਿਤਸਰ ਜ਼ਿਲ•ੇ ਦੇ ਚੈਂਚਲ ਸਿੰਘ,ਨਾਜ਼ਰ ਸਿੰਘ,ਜਸਵੰਤ ਸਿੰਘ ਤੇ ਰਣਜੀਤ ਸਿੰਘ ਸ਼ਹੀਦ ਹੋ ਗਏ। ਸ਼੍ਰੋਮਣੀ ਕਮੇਟੀ ਦੇ ਤਤਕਾਲੀ ਮਰਹੂਮ ਪ੍ਰਧਾਨ ਜਥੇਦਾਰ ਗੁਰਚਰਨ ਸਿੰਘ ਟੌਹੜਾ ਨੇ ਇਨ•ਾਂ ਚਾਰੋਂ ਸ਼ਹੀਦਾਂ ਦੀ ਬਠਿੰਡਾ ਵਿਚ ਯਾਦਗਾਰ ਬਣਾਉਣ ਦਾ ਮਤਾ ਪਾਸ ਕੀਤਾ। ਅੱਜ ਤੱਕ ਇਹ ਯਾਦਗਾਰ ਉਸਰ ਨਹੀਂ ਸਕੀ ਹੈ। ਪਰਿਵਾਰ ਆਖਦੇ ਹਨ ਕਿ ਸ਼੍ਰੋਮਣੀ ਕਮੇਟੀ ਬਜਟ ਨਾ ਹੋਣ ਦੀ ਗੱਲ ਆਖ ਰਹੀ ਹੈ। ਪਰਿਵਾਰਾਂ ਨੇ ਦੱਸਿਆ ਕਿ ਉਨ•ਾਂ ਨੇ ਸ਼ਹੀਦਾਂ ਦੀਆਂ ਅਸਥੀਆਂ ਸ਼੍ਰੋਮਣੀ ਕਮੇਟੀ ਦੇ ਅੰਮ੍ਰਿਤਸਰ ਵਿਚਲੇ ਲਾਕਰਾਂ ਵਿਚ ਲੰਮਾ ਅਰਸਾ ਪਹਿਲਾਂ ਰੱਖੀਆਂ ਸਨ ਪ੍ਰੰਤੂ ਹੁਣ ਪਤਾ ਲੱਗਾ ਹੈ ਕਿ ਸ਼੍ਰੋਮਣੀ ਕਮੇਟੀ ਨੇ ਇਹ ਲਾਕਰ ਹੀ ਕਬਾੜ ਵਿਚ ਵੇਚ ਦਿੱਤੇ ਹਨ। ਸ਼ਹੀਦ ਚੈਂਚਲ ਸਿੰਘ ਦੇ ਲੜਕੇ ਅਜੈਬ ਸਿੰਘ ਦਾ ਪ੍ਰਤੀਕਰਮ ਸੀ ਕਿ ਕਿਸੇ ਨੇਤਾ ਨੇ ਸ਼ਹੀਦਾਂ ਦੀ ਕੁਰਬਾਨੀ ਦਾ ਮੁੱਲ ਨਹੀਂ ਪਾਇਆ ਜਿਸ ਕਰਕੇ ਅੱਜ ਪਛਤਾਵਾਂ ਹੈ ਕਿ ਉਨ•ਾਂ ਦੇ ਮਾਪੇ ਪੰਜਾਬੀ ਸੂਬੇ ਦੀ ਲੜਾਈ ਕਿਉਂ ਲੜੇ।
                   ਸ਼੍ਰੋਮਣੀ ਕਮੇਟੀ ਨੇ ਸ਼ਹੀਦਾਂ ਦੀਆਂ ਅਸਥੀਆਂ ਵਾਲੇ ਲਾਕਰ ਤੱਕ ਵੇਚ ਦਿੱਤੇ ਹਨ। ਉਨ•ਾਂ ਆਖਿਆ ਕਿ ਸਰਕਾਰ ਵਲੋਂ ਮਨਾਏ ਜਾ ਰਹੇ ਪੰਜਾਹ ਸਾਲਾਂ ਜ਼ਸਨ ਫੋਕੇ ਹਨ ਜਿਨ•ਾਂ ਵਾਸਤੇ ਸ਼ਹੀਦਾਂ ਦੇ ਪਰਿਵਾਰਾਂ ਨੂੰ ਕੋਈ ਸੱਦਾ ਪੱਤਰ ਹੀ ਨਹੀਂ ਦਿੱਤਾ ਗਿਆ ਹੈ। ਜਦੋਂ ਪੰਜਾਬੀ ਸੂਬਾ ਮੋਰਚੇ ਵਿਚ ਰਣਜੀਤ ਸਿੰਘ ਸ਼ਹੀਦ ਹੋਇਆ ਤਾਂ ਉਦੋਂ ਉਸ ਦੀ ਲੜਕੀ ਜਸਵੀਰ ਕੌਰ ਸਿਰਫ ਛੇ ਮਹੀਨਿਆਂ ਦੀ ਸੀ। ਜਸਵੀਰ ਕੌਰ ਦੱਸਦੀ ਹੈ ਕਿ ਉਸ ਨੇ ਤਾਂ ਸਿਰਫ ਬਾਪ ਦੀ ਤਸਵੀਰ ਹੀ ਵੇਖੀ ਹੈ। ਉਸ ਦਾ ਕਹਿਣਾ ਸੀ ਕਿ ਸਰਕਾਰ ਨੇ ਕਦੇ ਬਾਤ ਨਹੀਂ ਪੁੱਛੀ। ਘਰੇਲੂ ਹਾਲਾਤ ਮਾੜੇ ਹਨ ਅਤੇ ਉਸ ਨੂੰ ਤਾਂ ਸਰਕਾਰ ਨੇ ਪੈਨਸ਼ਨ ਵੀ ਨਹੀਂ ਲਾਈ। ਉਸ ਨੇ ਭਰੇ ਮਨ ਨਾਲ ਆਖਿਆ ਕਿ ਬਹੁਤ ਮਹਿਸੂਸ ਹੁੰਦਾ ਹੈ ਜਿਨ•ਾਂ ਲਈ ਮਾਪੇ ਜਾਨਾਂ ਵਾਰ ਗਏ, ਉਨ•ਾਂ ਨੂੰ ਸ਼ਹੀਦਾਂ ਦੇ ਵਾਰਸਾਂ ਦਾ ਚੇਤਾ ਵੀ ਨਹੀਂ। ਇਵੇਂ ਇਸੇ ਮੋਰਚੇ ਵਿਚ ਸ਼ਹੀਦ ਹੋਏ ਨਾਜ਼ਰ ਸਿੰਘ ਦੇ ਲੜਕੇ ਕੜਾਕਾ ਸਿੰਘ ਦਾ ਕਹਿਣਾ ਸੀ ਕਿ ਉਨ•ਾਂ ਨੂੰ ਸ੍ਰੋਮਣੀ ਕਮੇਟੀ ਵਾਲੇ ਸਾਲ ਵਿਚ ਇੱਕ ਵਾਰ ਬਠਿੰਡਾ ਵਿਖੇ ਬੁਲਾਉਂਦੇ ਹਨ ਪ੍ਰੰਤੂ ਹੁਣ ਕੋਈ ਸਰਕਾਰੀ ਸੱਦਾ ਪੱਤਰ ਨਹੀਂ ਆਇਆ। ਇਹ ਪਰਿਵਾਰ ਹੁਣ ਸ਼ਹੀਦਾਂ ਦੀ ਇੱਕ ਯਾਦਗਾਰ ਵੇਖਣ ਨੂੰ ਤਰਸੇ ਪਏ ਹਨ।  ਵੇਰਵਿਆਂ ਅਨੁਸਾਰ ਪੰਜਾਬੀ ਸੂਬਾ ਮੋਰਚਾ ਵਿਚ 43 ਸ਼ਹੀਦ ਹੋਏ ਸਨ ਜਿਨ•ਾਂ ਚੋਂ 12 ਪਰਿਵਾਰਾਂ ਦੀ ਅੱਜ ਤੱਕ ਸਨਾਖਤ ਹੋ ਸਕੀ ਹੈ।
                      ਕਰੀਬ 69 ਹਜ਼ਾਰ ਵਿਅਕਤੀ ਉਦੋਂ ਮੋਰਚੇ ਵਿਚ ਕੁੱਦੇ ਸਨ। ਪੰਜਾਬੀ ਸੂਬੇ ਦੇ ਨਿਰਮਾਤਾ ਸੰਤ ਫਤਹਿ ਸਿੰਘ ਦੇ ਪਿੰਡ ਬਦਿਆਲਾ ਵਿਚ ਸੰਤਾਂ ਦੀ ਕੋਈ ਯਾਦਗਾਰ ਅੱਜ ਤੱਕ ਨਹੀਂ ਬਣੀ  ਹੈ। ਇੱਕ ਪੇਂਡੂ ਹਸਪਤਾਲ ਸੰਤਾਂ ਦੀ ਯਾਦ ਵਿਚ ਜੋ ਬਣਾਇਆ ਸੀ, ਉਸ ਦਾ ਹਾਲ ਬੁਰਾ ਹੈ। ਲੋਕ ਨਿਰਮਾਣ ਮੰਤਰੀ ਜਨਮੇਜਾ ਸਿੰਘ ਸੇਖੋਂ ਨੇ ਕੁਝ ਦਿਨ ਪਹਿਲਾਂ ਸੰਤ ਫਤਹਿ ਸਿੰਘ ਯਾਦ ਵਿਚ ਇੱਕ ਗੇਟ ਬਣਾਏ ਜਾਣ ਦਾ ਨੀਂਹ ਪੱਥਰ ਰੱਖਿਆ ਹੈ। ਅਕਾਲੀ ਸਰਕਾਰ ਹੁਣ ਪੰਜਾਬੀ ਸੂਬੇ ਦੇ ਪੰਜਾਹ ਸਾਲਾਂ ਸਮਾਗਮ ਕਰ ਰਹੀ ਹੈ ਪ੍ਰੰਤੂ ਇਸ ਸਰਕਾਰ ਨੇ ਇਸ ਤੋਂ ਪਹਿਲਾਂ ਅਸਲ ਨਾਇਕਾਂ ਨੂੰ ਵਿਸਾਰੀ ਰੱਖਿਆ। ਪੰਜਾਬੀ ਸੂਬਾ ਮੋਰਚੇ ਵਿਚ ਮੋਹਰੀ ਰਹੇ ਪਿੰਡ ਮੰਡੀ ਕਲਾਂ ਦੇ 94 ਵਰਿ•ਆਂ ਦੇ ਭਾਈ ਵੀਰ ਸਿੰਘ ਨਿਰਵੈਰ ਦਾ ਪ੍ਰਤੀਕਰਮ ਸੀ ਕਿ ਕਿਸੇ ਸੰਘਰਸ਼ੀ ਯੋਧੇ ਦੀ ਸਰਕਾਰ ਨੇ ਕੋਈ ਕਦਰ ਨਹੀਂ ਪਾਈ। ਉਸ ਨੇ ਪੂਰੇ ਪਰਿਵਾਰ ਸਮੇਤ ਜੇਲ• ਕੱਟੀ ਸੀ। ਜਸ਼ਨਾਂ ਦੀ ਥਾਂ ਸਰਕਾਰ ਮੋਰਚਿਆਂ ਵਿਚ ਡਟਣ ਵਾਲਿਆਂ ਦੀ ਸਾਰ ਲਵੇ। ਦੱਸਣਯੋਗ ਹੈ ਕਿ ਬਹੁਤੇ ਸੰਘਰਸ਼ੀ ਯੋਧੇ ਤਾਂ ਅੱਜ ਇਸ ਜਹਾਨ ਚੋਂ ਤੁਰ ਗਏ ਹਨ। ਨਜ਼ਰ ਮਾਰੀਏ ਤਾਂ ਅਕਾਲੀ ਸਰਕਾਰ ਨੇ ਐਨ ਅਸੈਂਬਲੀ ਚੋਣਾਂ ਤੋਂ ਪਹਿਲਾਂ 21 ਜੁਲਾਈ 2000 ਨੂੰ ਮੋਰਚੇ ਵਿਚ ਜੇਲ•ਾਂ ਕੱਟਣ ਵਾਲਿਆਂ ਨੂੰ 300 ਰੁਪਏ ਪੈਨਸ਼ਨ ਦੇਣ ਦਾ ਫੈਸਲਾ ਕੀਤਾ ਅਤੇ 5 ਅਕਤੂਬਰ 2001 ਨੂੰ 14 ਲੱਖ ਰੁਪਏ ਵੀ ਜਾਰੀ ਕੀਤੇ ਸਨ।
                        ਇਹ ਪੈਨਸ਼ਨ ਸਿਰਫ ਦੋ ਤਿੰਨ ਮਹੀਨੇ ਹੀ ਮਿਲੀ। ਸਾਲ 2000-01 ਵਿਚ 157 ਸੰਘਰਸ਼ੀ ਯੋਧਿਆਂ ਦੀ ਸਨਾਖਤ ਹੋਈ ਸੀ ਜਦੋਂ ਕਿ ਸਾਲ 2001-02 ਵਿਚ 610 ਯੋਧਿਆਂ ਨੂੰ ਇਹ ਪੈਨਸ਼ਨ ਚਾਲੂ ਕੀਤੀ ਗਈ ਸੀ। ਕਾਂਗਰਸੀ ਸਰਕਾਰ ਬਣਨ ਮਗਰੋਂ 10 ਮਈ 2002 ਨੂੰ ਇਹ ਪੈਨਸ਼ਨ ਸਕੀਮ ਹੀ ਬੰਦ ਕਰ ਦਿੱਤੀ ਗਈ ਸੀ। ਗਠਜੋੜ ਸਰਕਾਰ ਨੇ ਮਾਰਚ 2007 ਵਿਚ ਸੱਤਾ ਮੁੜ ਸੰਭਾਲੀ ਪ੍ਰੰਤੂ ਮੋਰਚੇ ਦੇ ਨਾਇਕਾਂ ਦਾ ਚੇਤਾ ਨਹੀਂ ਰਿਹਾ। ਹੁਣ ਕਰੀਬ ਨੌ ਵਰਿ•ਆਂ ਮਗਰੋਂ ਅਕਾਲੀ ਸਰਕਾਰ ਨੇ 8 ਦਸੰਬਰ 2015 ਪੰਜਾਬੀ ਸੂਬਾ ਮੋਰਚੇ ਦੇ ਯੋਧਿਆਂ ਅਤੇ ਉਨ•ਾਂ ਦੇ ਪਰਿਵਾਰਾਂ ਨੂੰ ਇੱਕ ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਪੈਨਸ਼ਨ ਦੇਣ ਦਾ ਫੈਸਲਾ ਕੀਤਾ ਹੈ। ਲੰਘੇ ਡੇਢ ਦਹਾਕੇ ਦੌਰਾਨ 25 ਫੀਸਦੀ ਨਾਇਕ ਤਾਂ ਦੁਨੀਆਂ ਚੋਂ ਹੀ ਤੁਰ ਗਏ ਹਨ। ਪਿੰਡ ਤਿਉਣਾ ਦੇ ਅੱਠ ਯੋਧਿਆਂ ਚੋਂ ਤਿੰਨ ਦੀ ਮੌਤ ਹੋ ਚੁੱਕੀ ਹੈ। ਬਠਿੰਡਾ ਦੇ ਸਾਬਕਾ ਐਮ.ਐਲ.ਏ ਸੁਰਜੀਤ ਸਿੰਘ ਨੂੰ ਵੀ ਇਹ ਪੈਨਸ਼ਨ ਲੱਗੀ ਸੀ ਪ੍ਰੰਤੂ ਹੁਣ ਸਾਬਕਾ ਵਿਧਾਇਕ ਦੀ ਮੌਤ ਹੋ ਚੁੱਕੀ ਹੈ। ਫਤਹਿਗੜ• ਨੌ ਅਬਾਦ ਦੇ ਚਾਰ ਜਣਿਆਂ ਚੋਂ ਗੁਲਜ਼ਾਰ ਸਿੰਘ ਦੀ ਮੌਤ ਹੋ ਚੁੱਕੀ ਹੈ।

Wednesday, October 19, 2016

                             ਕਾਨੂੰਨ ਤੋੜ ਕੇ 
          ਧੂੜਾਂ ਪੱਟ ਰਹੀ ਹੈ ਕੈਪਟਨ ਦੀ ਬੱਸ
                              ਚਰਨਜੀਤ ਭੁੱਲਰ
ਬਠਿੰਡਾ : ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਕਿਸਾਨ ਯਾਤਰਾ ਲਈ ਜਿਹੜੀ ਬੱਸ ਵਰਤ ਰਹੇ ਹਨ, ਉਹ ਬਿਨਾਂ ਨੰਬਰ ਤੋਂ ਹੀ ਚੱਲ ਰਹੀ ਹੈ। ਮੋਟਰ ਵਾਹਨ ਐਕਟ ਮੁਤਾਬਕ ਹਰ ਵਾਹਨ ਦੇ ਅੱਗੇ ਤੇ ਪਿੱਛੇ ਰਜਿਸਟਰੇਸ਼ਨ ਨੰਬਰ ਹੋਣਾ ਲਾਜ਼ਮੀ ਹੈ। ਇਸ ਬੱਸ 'ਤੇ ਰਜਿਸਟਰੇਸ਼ਨ ਨੰਬਰ ਦੀ ਥਾਂ ਕੈਪਟਨ ਦੀ 'ਉਸਤਤ' ਵਾਲੇ ਨਾਅਰੇ ਅਤੇ ਤਸਵੀਰਾਂ ਛਾਪੀਆਂ ਗਈਆਂ ਹਨ। ਪਤਾ ਲੱਗਿਆ ਹੈ ਕਿ ਇਹ ਬੱਸ ਜ਼ਿਲ•ਾ ਮੁਕਤਸਰ ਦੇ ਕੈਪਟਨ ਅਮਰਿੰਦਰ ਸਿੰਘ ਦੇ ਨੇੜਲੇ ਸ਼ਖ਼ਸ ਦੇ ਰਿਸ਼ਤੇਦਾਰਾਂ ਦੇ ਨਾਮ 'ਤੇ ਹੀ ਰਜਿਸਟਰਡ ਹੈ। ਇਹ ਬੱਸ 'ਕੈਂਪਰ ਵੈਨ' ਦੀ ਸ਼੍ਰੇਣੀ ਵਿੱਚ ਹੈ ਜਿਸ ਦਾ ਉੱਕਾ ਪੁੱਕਾ 75 ਹਜ਼ਾਰ ਟੈਕਸ ਭਰਿਆ ਹੋਇਆ ਹੈ।    ਪ੍ਰਾਪਤ ਜਾਣਕਾਰੀ ਅਨੁਸਾਰ ਜਿਸ ਬੱਸ 'ਤੇ ਹੁਣ ਕਿਸਾਨ ਯਾਤਰਾ ਕੀਤੀ ਜਾ ਰਹੀ ਹੈ, ਸਾਲ 2007 ਵਿੱਚ ਇਹੋ ਬੱਸ ਵਿਕਾਸ ਯਾਤਰਾ ਲਈ ਵਰਤੀ ਗਈ ਸੀ। ਪ੍ਰਸ਼ਾਂਤ ਕਿਸ਼ੋਰ ਦੀ ਟੀਮ ਦੇ ਆਗੂ ਨਵਕਰਨ ਨੇ ਦੱਸਿਆ ਕਿ ਸਾਲ 2007 ਵਾਲੀ ਪੁਰਾਣੀ ਬੱਸ ਵਿੱਚ ਤਬਦੀਲੀਆਂ ਕਰ ਕੇ ਹੁਣ ਵਰਤਿਆ ਜਾ ਰਿਹਾ ਹੈ। ਨਵਕਰਨ ਨੇ ਆਖਿਆ ਕਿ ਹੋਰਨਾਂ ਗੱਲਾਂ ਬਾਰੇ ਕਾਂਗਰਸੀ ਟੀਮ ਹੀ ਦੱਸ ਸਕਦੀ ਹੈ ਜਦਕਿ ਕਾਂਗਰਸੀ ਟੀਮ ਦਾ ਕਹਿਣਾ ਸੀ ਕਿ ਪ੍ਰਸ਼ਾਤ ਕਿਸ਼ੋਰ ਦੀ ਟੀਮ ਨੂੰ ਇਸ ਬਾਰੇ ਪਤਾ ਹੈ।
                      ਸਟੇਟ ਟਰਾਂਸਪੋਰਟ ਕਮਿਸ਼ਨਰ, ਪੰਜਾਬ ਹਰਮੇਲ ਸਿੰਘ ਦਾ ਕਹਿਣਾ ਸੀ ਕਿ ਜੇ ਵਾਹਨ 'ਤੇ ਰਜਿਸਟਰੇਸ਼ਨ ਨੰਬਰ ਪਲੇਟ ਨਹੀਂ ਹੈ ਤਾਂ ਇਹ ਮੋਟਰ ਵਾਹਨ ਐਕਟ ਦੀ ਉਲੰਘਣਾ ਹੈ, ਜਿਸ ਤਹਿਤ ਵਾਹਨ ਦਾ ਫੌਰੀ ਚਾਲਾਨ ਕੱਟਿਆ ਜਾਂਦਾ ਹੈ। ਟਰਾਂਸਪੋਰਟ ਮੰਤਰੀ ਅਜੀਤ ਸਿੰਘ ਕੋਹਾੜ ਨੇ ਕਿਹਾ ਕਿ ਸਿਆਸੀ ਤੌਰ 'ਤੇ ਅਕਾਲੀ ਦਲ ਲਈ ਕੈਪਟਨ ਅਮਰਿੰਦਰ ਸਿੰਘ ਦੀ ਬੱਸ ਯਾਤਰਾ ਕਾਫੀ ਲਾਹੇ ਵਾਲੀ ਹੈ। ਕੈਪਟਨ ਨੂੰ ਤਾਂ ਉਹ ਖ਼ੁਦ ਹੀ ਅਜਿਹੀ ਇੱਕ ਹੋਰ ਬੱਸ ਦੇਣ ਨੂੰ ਤਿਆਰ ਹਨ ਕਿਉਂਕਿ ਇਹ ਬੱਸ ਜਿੱਥੇ ਜਾ ਰਹੀ ਹੈ, ਉਥੇ ਕਾਂਗਰਸ ਦਾ ਨੁਕਸਾਨ ਹੀ ਕਰ ਰਹੀ ਹੈ। ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਮਾਲਵਾ ਦੇ ਅੱਠ ਜ਼ਿਲਿ•ਆਂ ਲਈ ਕਿਸਾਨ ਯਾਤਰਾ ਸ਼ੁਰੂ ਕੀਤੀ ਹੈ, ਜੋ ਅੱਜ ਦੇਰ ਸ਼ਾਮ ਬਠਿੰਡਾ ਪੁੱਜੀ। ਇਹ ਯਾਤਰਾ ਮੋਗਾ ਤੋਂ ਸ਼ੁਰੂ ਹੋਈ ਸੀ ਅਤੇ 19 ਅਕਤੂਬਰ ਨੂੰ ਫਿਰੋਜ਼ਪੁਰ ਵਿੱਚ ਸਮਾਪਤ ਹੋਵੇਗੀ। ਕੈਪਟਨ ਅਮਰਿੰਦਰ ਸਿੰਘ ਦਾ ਅੱਜ ਬਠਿੰਡਾ ਪੁੱਜਣ 'ਤੇ ਕਾਂਗਰਸੀ ਆਗੂਆਂ ਤੇ ਵਰਕਰਾਂ ਨੇ ਸ਼ਾਹੀ ਸਵਾਗਤ ਕੀਤਾ ਪਰ ਤਿਉਹਾਰਾਂ ਮੌਕੇ ਸ਼ਹਿਰ ਵਿੱਚ ਸ਼ਾਮ ਨੂੰ ਦਾਖ਼ਲ ਹੋਣ ਕਰ ਕੇ ਇਸ ਯਾਤਰਾ ਨਾਲ ਲੋਕਾਂ ਦੇ ਰੰਗ ਵਿੱਚ ਵੀ ਭੰਗ ਪਾਈ ਤੇ ਟਰੈਫਿਕ ਵਿੱਚ ਵਿਘਨ ਪਿਆ।
                       ਬਠਿੰਡਾ (ਸ਼ਹਿਰੀ) ਅਸੈਂਬਲੀ ਹਲਕੇ ਵਿਚ 'ਕਿਸਾਨ ਰੱਥ ਯਾਤਰਾ' ਮੌਕੇ ਕੈਪਟਨ ਅਮਰਿੰਦਰ ਸਿੰਘ ਦਾ ਪੁਰਾਣਾ ਜਲੌਅ ਗਾਇਬ ਰਿਹਾ। ਜੋ ਸ਼ਹਿਰੀ ਲੋਕ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਨੂੰ ਇੱਕ ਨਾਇਕ ਵਜੋਂ ਦੇਖਦੇ ਸਨ, ਉਹ ਭੱਲ ਅੱਜ ਬਠਿੰਡਾ ਸ਼ਹਿਰ ਵਿਚ ਗੁਆਚੀ ਨਜ਼ਰ ਆਈ। ਕੈਪਟਨ ਅਮਰਿੰਦਰ ਸਿੰਘ ਦਾ ਕਾਂਗਰਸੀ ਆਗੂਆਂ ਤੇ ਵਰਕਰਾਂ ਨੇ ਤਾਂ ਸਾਹੀ ਸਵਾਗਤ ਕੀਤਾ ਪ੍ਰੰਤੂ ਆਮ ਸ਼ਹਿਰੀਆਂ ਤੇ ਕੈਪਟਨ ਅਮਰਿੰਦਰ ਸਿੰਘ ਦਰਮਿਆਨ 'ਕਿਸਾਨ ਰੱਥ' ਅੜਿੱਕਾ ਬਣਿਆ। ਕੈਪਟਨ ਅਮਰਿੰਦਰ ਸਿੰਘ ਕਰੀਬ ਡੇਢ ਘੰਟਾ ਪਛੜ ਕੇ ਬਠਿੰਡਾ ਦੇ ਰੋਜ਼ ਗਾਰਡਨ ਕੋਲ ਪੁੱਜੇ ਜਿਥੇ ਕਾਂਗਰਸੀ ਵਰਕਰਾਂ ਨੇ ਕੈਪਟਨ ਅਮਰਿੰਦਰ ਸਿੰਘ ਤੇ ਫੁੱਲਾਂ ਦੀ ਵਰਖਾ ਕੀਤੀ। ਬਠਿੰਡਾ ਸ਼ਹਿਰੀ ਹਲਕੇ ਤੋਂ ਟਿਕਟਾਂ ਦੇ ਦੋ ਪ੍ਰਮੁੱਖ ਦਾਅਵੇਦਾਰ ਮਨਪ੍ਰੀਤ ਸਿੰਘ ਬਾਦਲ ਅਤੇ ਹਰਮਿੰਦਰ ਸਿੰਘ ਜੱਸੀ ਨੇ ਕੈਪਟਨ ਦਾ ਸਵਾਗਤ ਕੀਤਾ। ਕਾਂਗਰਸ ਸ਼ਹਿਰੀ ਦੇ ਬਾਕੀ ਧੜਿਆਂ ਵਲੋਂ ਵੀ ਵੱਖ ਵੱਖ ਥਾਂਵਾਂ ਤੇ ਸਵਾਗਤੀ ਬੋਰਡ ਲਾਏ ਹੋਏ ਸਨ। ਏਨਾ ਜਰੂਰ ਹੈ ਕਿ ਕਾਫੀ ਅਰਸੇ ਮਗਰੋਂ ਕਾਂਗਰਸ ਵਿਚ ਗਹਿਮਾ ਗਹਿਮੀ ਦੇਖਣ ਨੂੰ ਮਿਲੀ ਹੈ ਅਤੇ ਖੰਭਿਆਂ ਤੇ ਕਾਂਗਰਸੀ ਝੰਡੇ ਨਜ਼ਰ ਪਏ ਹਨ।
                       ਕੈਪਟਨ ਦਾ ਕਿਸਾਨ ਰੱਥ ਅਮਰੀਕ ਸਿੰਘ ਰੋਡ ਤੋਂ ਹੁੰਦਾ ਹੋਇਆ ਗੋਲ ਡਿੱਗੀ ਤੱਕ ਆਇਆ। ਉਸ ਮਗਰੋਂ ਮਾਲ ਰੋਡ ਹੁੰਦਾ ਹੋਇਆ ਫੌਜੀ ਚੌਂਕ ਤੱਕ ਪੁੱਜਾ। ਕਾਂਗਰਸੀ ਵਰਕਰਾਂ ਨੇ ਕਿਸਾਨ ਰੱਥ ਦੇ ਅੱਗੇ ਅੱਗੇ ਚੱਲ ਕੇ ਕੈਪਟਨ ਦੀ ਹਮਾਇਤ ਵਿਚ ਨਾਅਰੇ ਵੀ ਲਾਏ। ਏਨਾ ਫਰਕ ਨਜ਼ਰ ਆਇਆ ਕਿ ਜਿਥੋਂ ਦੀ ਕਿਸਾਨ ਰੱਥ ਲੰਘਿਆ, ਉਥੋਂ ਦੇ ਦੁਕਾਨਦਾਰ ਭੱਜ ਭੱਜ ਕੇ ਦੁਕਾਨਾਂ ਚੋਂ ਨਿਕਲਦੇ ਨਹੀਂ ਵੇਖੇ ਗਏ। ਸਾਲ 2007 ਵਿਚ ਏਦਾ ਹੁੰਦਾ ਰਿਹਾ ਹੈ। ਹਾਲਾਂਕਿ ਵਪਾਰੀ ਵਰਗ ਅੰਦਰੋਂ ਅੰਦਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਚਾਹੁੰਦਾ ਹੈ ਪ੍ਰੰਤੂ ਅੱਜ ਦੀ ਯਾਤਰਾ ਮੌਕੇ ਆਮ ਸ਼ਹਿਰੀ ਹਿੰਦੂ ਲੋਕ ਕਿਧਰੇ ਨਜ਼ਰ ਨਾ ਪਏ। ਪਿੰਡਾਂ ਤੋਂ ਆਏ ਲੋਕ ਅੱਜ ਇਸ ਯਾਤਰਾ ਮੌਕੇ ਫਾਈਰ ਬ੍ਰੀਗੇਡ ਕੋਲ ਪੁੱਜੇ ਹੋਏ ਸਨ।
                                     ਖੇਤਾਂ ਦੇ ਚੰਨ
                    ਮੇਰਾ ਲੁੱਟਿਆ ਗਿਆ ਸੁਹਾਗ...
                                   ਚਰਨਜੀਤ ਭੁੱਲਰ
ਬਠਿੰਡਾ : ਜਿਨ•ਾਂ ਦੇ ਖੇਤਾਂ ਦੇ ਚੰਨ ਸਦਾ ਲਈ ਜ਼ਿੰਦਗੀ ਚੋਂ ਰੁਖਸਤ ਹੋ ਗਏ ਹਨ, ਉਨ•ਾਂ ਤੋਂ ਜ਼ਿੰਦਗੀ ਦਾ ਚਾਣਨ ਕੋਹਾਂ ਦੂਰ ਹੈ। ਤਾਹੀਂਓ ਗਗਨਦੀਪ ਕੌਰ ਐਤਕੀਂ ਚੰਦ ਦੀ ਉਡੀਕ ਨਹੀਂ ਕਰੇਗੀ ਕਿਉਂਕਿ ਖੇਤਾਂ ਦੇ ਕਾਲੇ ਦਿਨਾਂ ਨੇ ਉਸ ਦੀ ਜ਼ਿੰਦਗੀ ਵਿਚ ਸਦਾ ਲਈ ਹਨੇਰਾ ਭਰ ਦਿੱਤਾ ਹੈ। ਉਸ ਨੇ ਪੂਰੇ 20 ਵਰੇ ਆਪਣੇ ਸੁਹਾਗ ਦੀ ਲੰਮੀ ਉਮਰ ਮੰਗੀ ਪ੍ਰੰਤੂ ਕਰਜ਼ੇ ਦੀਆਂ ਗੰਢਾਂ ਤੇ ਗੁੰਝਲਾਂ ਨੇ ਆਖਰ ਉਸ ਨੂੰ ਹਰਾ ਦਿੱਤਾ। ਜਦੋਂ ਭਲਕੇ ਹਰ ਸੁਹਾਗਣ ਕਰਵਾ ਚੌਥ ਦਾ ਤਿਉਹਾਰ ਮਨਾ ਰਹੀ ਹੋਵੇਗੀ ਤਾਂ ਠੀਕ ਉਦੋਂ ਵਿਧਵਾ ਇਹ ਆਪਣੀ ਜ਼ਿੰਦਗੀ ਦੇ ਵਹੀ ਖਾਤੇ ਫਰੋਲ ਰਹੀ ਹੋਵੇਗੀ। ਨਰਮਾ ਪੱਟੀ ਦੇ ਹਜ਼ਾਰਾਂ ਘਰਾਂ ਤੋਂ ਪੈਲੀ ਦੇ ਸੰਕਟ ਨੇ ਕਰਵਾ ਚੌਥ ਦੀ ਖੁਸ਼ੀ ਖੋਹ ਲਈ ਹੈ। ਇਨ•ਾਂ ਘਰਾਂ ਵਿਚ ਕਰਵਾ ਚੌਥ ਵਾਲੇ ਦਿਨ ਸਿਰਫ਼ ਖੇਤਾਂ ਦੇ ਭਲੇ ਦਿਨਾਂ ਲਈ ਅਰਦਾਸਾਂ ਹੁੰਦੀਆਂ ਹਨ। ਮਾਨਸਾ ਦੇ ਪਿੰਡ ਖਾਰਾ ਦੇ ਕਿਸਾਨ ਰੇਸ਼ਮ ਸਿੰਘ ਨੇ ਚਿੱਟੀ ਮੱਖੀ ਦੀ ਮਾਰ ਨਾ ਝੱਲਦੇ ਹੋਏ ਆਪਣੀ ਜ਼ਿੰਦਗੀ ਨੂੰ ਅਲਵਿਦਾ ਆਖ ਦਿੱਤਾ। ਵਿਧਵਾ ਗਗਨਦੀਪ ਕੌਰ ਨੇ ਦੱਸਿਆ ਕਿ ਉਨ•ਾਂ ਨੇ ਹਰ ਕਰਵਾ ਚੌਥ ਬਹੁਤ ਰੂਹ ਨਾਲ ਮਨਾਇਆ ਪ੍ਰੰਤੂ ਐਤਕੀਂ 20 ਵਰਿ•ਆਂ ਪਹਿਲਾਂ ਕਰਵਾ ਚੌਥ ਆਇਆ ਹੈ, ਜਿਸ ਤੋਂ ਪਹਿਲਾਂ ਉਸ ਦੇ ਹੱਥ ਖਾਲੀ ਹਨ। ਉਸ ਨੇ ਆਖਿਆ ਕਿ 'ਮੈਂ ਤਾਂ ਇਹੋ ਸੁੱਖ ਮੰਗਦੀ ਹਾਂ ਕਿ ਖੇਤ ਕਿਸੇ ਘਰ ਦਾ ਸੁਹਾਗ ਨਾ ਉਜਾੜਨ।'
                      ਇਵੇਂ ਪਿੰਡ ਸਾਹਨੇਵਾਲੀ ਦੀ ਜਸਵਿੰਦਰ ਕੌਰ ਲਈ ਕਰਵਾ ਚੌਥ ਹੁਣ ਬੋਝ ਬਣ ਗਿਆ ਹੈ। ਉਹ ਆਪਣੇ ਸੁਹਾਗ ਤੋਂ ਹੱਥ ਧੋ ਬੈਠੀ ਹੈ। ਸਾਢੇ ਸੱਤ ਲੱਖ ਦੇ ਕਰਜ਼ ਨੇ ਉਸ ਤੋਂ ਚੰਦ ਵੇਖਣ ਦਾ ਹੱਕ ਹੀ ਖੋਹ ਲਿਆ ਹੈ। ਉਹ ਆਖਦੀ ਹੈ ਕਿ ਉਸ ਨੇ ਤਾਂ ਹਰ ਕਰਵਾ ਚੌਥ ਤੇ ਕਾਮਨਾ ਕੀਤੀ ਪ੍ਰੰਤੂ ਖੇਤਾਂ ਨੂੰ ਇਹ ਮਨਜ਼ੂਰ ਨਹੀਂ ਸੀ। ਉਸ ਦੇ ਨਸੀਬ ਵਿਚ ਹੁਣ ਦੁੱਖ ਤੇ ਹੰਝੂ ਬਚੇ ਹਨ, ਕਰਵਾ ਚੌਥ ਸਦਾ ਲਈ ਵਿਦਾ ਹੋ ਗਿਆ ਹੈ। ਪਿੰਡ ਸਿਰਸੀਵਾਲਾ ਦੀ ਵਿਧਵਾ ਜਸਵੀਰ ਕੌਰ ਹੁਣ ਕਿਸ ਲਈ ਕਾਮਨਾ ਕਰੇ। ਉਸ ਕੋਲ ਸਿਰਫ਼ ਪਤੀ ਦੀ ਤਸਵੀਰ ਬਚੀ ਹੈ ਜਾਂ ਫਿਰ ਆੜ•ਤੀਏ ਦਾ ਕਰਜ਼ਾ। ਜਸਵੀਰ ਕੌਰ ਆਖਦੀ ਹੈ ਕਿ ਉਹ ਹਰ ਸਾਲ ਕਰਵਾ ਚੌਥ ਤੇ ਸੁਹਾਗ ਤੇ ਖੇਤਾਂ ਦੀ ਸੁੱਖ ਦੀ ਮੰਗਦੀ ਪ੍ਰੰਤੂ ਚਿੱਟੀ ਮੱਖੀ ਦੀ ਮਾਰ ਨੇ ਉਸ ਦੀ ਜ਼ਿੰਦਗੀ ਹੀ ਠੱਗ ਲਈ। ਉਸ ਲਈ ਚੰਗੇ ਦਿਨਾਂ ਦੀ ਆਸ ਸਦਾ ਲਈ ਖਤਮ ਹੋ ਗਈ ਹੈ। ਉਸ ਦਾ ਪਤੀ ਪ੍ਰਿਤਪਾਲ ਕਰੀਬ ਛੇ ਮਹੀਨੇ ਪਹਿਲਾਂ ਖੁਦਕੁਸ਼ੀ ਕਰ ਗਿਆ ਸੀ। ਹੁਣ ਸਿਰ ਚਾਰ ਲੱਖ ਦਾ ਕਰਜ਼ਾ ਹੈ। ਪਿੰਡ ਗਿੱਦੜ ਦੀ ਵੀਰਾਂ ਕੌਰ ਦੀ ਹਰ ਕਰਵਾ ਚੌਥ ਨੇ ਪ੍ਰੀਖਿਆ ਲਈ। ਉਸ ਦਾ ਵਾਰ ਵਾਰ ਸੁਹਾਗ ਉਜੜਿਆ।
                   ਜਦੋਂ ਉਸ ਦਾ ਪਤੀ ਬਿੰਦਰ ਸਿੰਘ ਖੁਦਕੁਸ਼ੀ ਕਰ ਗਿਆ ਤਾਂ ਉਸ ਨੂੰ ਮਾਪਿਆਂ ਨੇ ਮ੍ਰਿਤਕ ਪਤੀ ਦੇ ਛੋਟੇ ਭਰਾ ਦੇ ਲੜ ਲਾ ਦਿੱਤਾ। ਜ਼ਿੰਦਗੀ ਸੰਭਲਣ ਤੋਂ ਪਹਿਲਾਂ ਉਹ ਵੀ ਖੁਦਕੁਸ਼ੀ ਕਰ ਗਿਆ। ਵੀਰਾਂ ਕੌਰ ਦੀ ਕੋਈ ਕਾਮਨਾ ਵੀ ਰਿਸ਼ਤੇ ਦੀ ਉਮਰ ਲੰਮੀ ਨਾ ਕਰ ਸਕੀ। ਇਨ•ਾਂ ਵਿਧਵਾਂ ਔਰਤਾਂ ਨੂੰ ਮੁੱਖ ਮੰਤਰੀ ਦੇ 'ਸੰਗਤ ਦਰਸ਼ਨਾਂ' ਅਤੇ ਕੈਪਟਨ ਦੀ ਰੱਥ ਯਾਤਰਾ ਚੋਂ ਬੈਂਕਾਂ ਦੇ ਨੋਟਿਸ ਅਤੇ ਆੜ•ਤੀਆਂ ਦੇ ਚਿਹਰੇ ਹੀ ਨਜ਼ਰ ਪੈਂਦੇ ਹਨ। ਇਹ ਔਰਤਾਂ ਨੂੰ ਹੁਣ ਇਕੱਲਤਾ ਦਾ ਸੰਤਾਪ ਭੋਗ ਰਹੀਆਂ ਹਨ। ਵੀਰਾਂ ਕੌਰ ਸਿਰਫ਼ ਆਪਣੇ ਅਪਾਹਜ ਇਕਲੌਤੇ ਲੜਕੇ ਸਿਕੰਦਰ ਚੋਂ ਹੀ ਦੁਨੀਆਂ ਵੇਖਦੀ ਹੈ। ਨਰਮਾ ਪੱਟੀ ਵਿਚ ਪਿਛਲੇ ਵਰੇ• ਚਿੱਟੀ ਮੱਖੀ ਦੀ ਸੱਟ ਨੇ ਹਜ਼ਾਰਾਂ ਔਰਤਾਂ ਨੂੰ ਵਿਧਵਾ ਬਣਾ ਦਿੱਤਾ ਹੈ ਜਿਨ•ਾਂ ਕੋਲ ਹੁਣ ਵਿਗੋਚਾ ਤੇ ਹੌਲ ਬਚੇ ਹਨ। ਇਨ•ਾਂ ਔਰਤਾਂ ਵਲੋਂ ਹੁਣ ਆਪਣੇ ਬੱਚਿਆਂ ਦੀ ਸੁੱਖ ਮੰਗੀ ਜਾ ਰਹੀ ਹੈ ਤਾਂ ਜੋ ਉਨ•ਾਂ ਦੀਆਂ ਨੂੰਹਾਂ ਸਦਾ ਸੁਹਾਗਣ ਰਹਿ ਸਕਣ।

Sunday, October 16, 2016

                            ਅਕਾਲੀ ਸਰਵੇ
            ਆਂਧਰਾ ਤੋਂ ਬੁਲਾਏ 'ਮਾਸਟਰ'
                            ਚਰਨਜੀਤ ਭੁੱਲਰ
ਬਠਿੰਡਾ  : ਪੰਜਾਬ ਸਰਕਾਰ ਭਲਾਈ ਸਕੀਮਾਂ ਦੀ ਫੀਡ ਬੈਕ ਬਹਾਨੇ ਪੰਜਾਬ ਦੀ ਸਿਆਸੀ ਨਬਜ਼ ਟਟੋਲਨ ਵਿਚ ਜੁਟੀ ਹੈ। ਆਂਧਰਾ ਪ੍ਰਦੇਸ਼ ਤੋਂ ਬੁਲਾਏ ਵਿਸ਼ੇਸ਼ ਮਾਹਿਰ ਤਰਫ਼ੋਂ ਇਸ ਫੀਡ ਬੈਕ ਪ੍ਰੋਜੈਕਟ ਦਾ ਸੰਚਾਲਨ ਕੀਤਾ ਜਾ ਰਿਹਾ ਹੈ। ਠੀਕ ਉਵੇਂ ਜਿਵੇਂ ਕਾਂਗਰਸ ਤਰਫ਼ੋਂ ਪ੍ਰਸ਼ਾਤ ਕਿਸ਼ੋਰ ਦੀਆਂ ਸੇਵਾਵਾਂ ਲਈਆਂ ਜਾ ਰਹੀਆਂ ਹਨ। ਸਰਕਾਰੀ ਪ੍ਰੋਜੈਕਟ ਕਰੀਬ 20 ਕਰੋੜ ਦਾ ਹੈ ਜਿਸ ਤਹਿਤ ਫੋਨ, ਵੁਆਇੰਸ ਸੁਨੇਹਾ ਅਤੇ ਫੀਲਡ ਵਿਚ ਸਰਵੇ ਕੀਤਾ ਜਾ ਰਿਹਾ ਹੈ। ਦੂਸਰੀ ਤਰਫ਼ ਪੰਜਾਬ ਵਿਚ ਕਰੀਬ ਢਾਈ ਸੌ ਸਾਬਕਾ ਸੈਨਿਕ ਵੀ ਗੁਪਤ ਸਰਵੇ ਲਈ ਮੋਰਚੇ ਵਿਚ ਉੱਤਰੇ ਹਨ ਜਿਨ•ਾਂ ਦਾ ਹਾਲੇ ਭੇਤ ਬਣਿਆ ਹੋਇਆ ਹੈ। ਭਾਵੇਂ ਇਹ ਸਾਬਕਾ ਸੈਨਿਕ ਕਿਸੇ ਕੰਨੜ ਟੀ.ਵੀ ਲਈ ਸਰਵੇ ਕਰਨ ਦੀ ਗੱਲ ਕਰ ਰਹੇ ਹਨ ਪ੍ਰੰਤੂ ਇਨ•ਾਂ ਦੀ ਗੁਪਤਤਾ ਤੋਂ ਕਈ ਸ਼ੰਕੇ ਖੜ•ੇ ਹੁੰਦੇ ਹਨ। ਵੇਰਵਿਆਂ ਅਨੁਸਾਰ ਪੰਜਾਬ ਕੈਬਨਿਟ ਨੇ 25 ਫਰਵਰੀ 2016 ਨੂੰ ਸਰਕਾਰੀ ਸਕੀਮਾਂ ਦੇ ਲੋਕਾਂ ਤੇ ਪੈ ਰਹੇ ਪ੍ਰਭਾਵ ਦਾ ਅਧਿਐਨ ਕਰਾਉਣ ਲਈ ਇੱਕ ਪ੍ਰੋਜੈਕਟ ਨੂੰ ਪ੍ਰਵਾਨਗੀ ਦਿੱਤੀ ਸੀ। ਇਸ ਪ੍ਰੋਜੈਕਟ ਲਈ ਇੱਕ ਪ੍ਰਾਈਵੇਟ ਫਰਮ ਨੇ 35 ਕਰੋੜ ਰੁਪਏ ਮੰਗੇ ਸਨ ਪ੍ਰੰਤੂ ਸਰਕਾਰ ਤੇ ਹੱਥ ਖੜ•ੇ ਕਰ ਦਿੱਤੇ। ਮਗਰੋਂ ਸਰਕਾਰ ਨੇ ਆਪਣੇ ਪੱਧਰ ਤੇ ਕਾਲ ਸੈਂਟਰ/ਆਈ.ਵੀ.ਆਰ.ਐਸ  ਫੈਸਿਲਿਟੀ ਸਥਾਪਿਤ ਕਰਕੇ ਸਰਕਾਰੀ ਏਜੰਸੀਆਂ ਤੋਂ ਫੀਡ ਬੈਕ/ਸਰਵੇ ਦਾ ਕੰਮ ਕਰਾਉਣ ਦਾ ਫੈਸਲਾ ਕੀਤਾ।
                       ਇਹ ਪ੍ਰੋਜੈਕਟ ਕਰੀਬ 6 ਮਹੀਨੇ ਲਈ ਹੀ ਤਿਆਰ ਕੀਤਾ ਗਿਆ ਅਤੇ ਲੋੜ ਪੈਣ ਤੇ ਹੋਰ ਛੇ ਮਹੀਨੇ ਦਾ ਵਾਧਾ ਹੋ ਸਕਦਾ ਹੈ। ਛੇ ਮਹੀਨੇ ਵਿਚ ਇੱਕ ਕਰੋੜ ਲੋਕਾਂ ਤੱਕ ਪਹੁੰਚ ਕਰਨ ਦਾ ਟੀਚਾ ਹੈ ਅਤੇ 31 ਜੁਲਾਈ ਤੱਕ ਕਰੀਬ 32 ਲੱਖ ਲੋਕਾਂ ਤੱਕ ਪਹੁੰਚ ਕੀਤੀ ਜਾ ਚੁੱਕੀ ਹੈ। ਇਸ ਪ੍ਰੋਜੈਕਟ ਵਾਸਤੇ ਹੈਦਰਾਬਾਦ ਦੇ ਸ੍ਰੀ ਸਤਿਆ ਨਾਰਾਇਣਾ ਮਾਰੀਸੈਟੀ ਦੀ ਬਤੌਰ ਵਿਸ਼ੇਸ਼ ਕਾਰਜ ਅਫਸਰ/ਮੁੱਖ ਮੰਤਰੀ ਪੰਜਾਬ ਨਿਯੁਕਤੀ ਕੀਤੀ ਗਈ  ਹੈ ਜਿਸ ਨੂੰ ਦਫ਼ਤਰ,ਰਿਹਾਇਸ਼,ਟੈਲੀਫੂਨ ਅਤੇ ਸਟਾਫ ਕਾਰ ਆਦਿ ਦੀ ਸਹੂਲਤ ਦਿੱਤੀ ਗਈ ਹੈ। ਪੰਜਾਬ ਦੇ ਸਾਰੇ ਵਿਭਾਗਾਂ ਵਲੋਂ ਲਾਭਪਾਤਰੀਆਂ ਦੀਆਂ ਸਮੇਤ ਫੋਨ ਨੰਬਰ ਸੂਚੀਆਂ ਇਸ ਵਿਸ਼ੇਸ਼ ਕਾਰਜ ਅਫਸਰ ਹਵਾਲੇ ਕੀਤੀਆਂ ਗਈਆਂ ਹਨ। ਬੀ.ਐਸ.ਐਨ.ਐਲ ਅਤੇ ਨੈਸ਼ਨਲ ਇਨਫੋਟਿਕਸ ਸੈਂਟਰ ਇਸ ਪ੍ਰੋਜੈਕਟ ਵਿਚ ਭਾਗੀਦਾਰ ਹਨ। ਪ੍ਰੋਜੈਕਟ ਵਿਚ 125 ਫੀਡ ਬੈਕ ਅਫਸਰ ਅਤੇ ਕਾਲ ਸੈਂਟਰ ਵਿਚ 500 ਕਾਲ ਅਪਰੇਟਰ ਰੱਖਣ ਦੀ ਵਿਵਸਥਾ ਕੀਤੀ ਗਈ। ਫੀਡ ਬੈਕ ਅਫਸਰ ਦੀ ਤਨਖਾਹ ਪ੍ਰਤੀ ਮਹੀਨਾ 35 ਹਜ਼ਾਰ ਰੱਖੀ ਗਈ ਹੈ।ਪੰਜਾਬ ਭਰ ਵਿਚ ਲੋਕਾਂ ਦੇ ਘਰਾਂ ਵਿਚ ਫੀਡ ਬੈਕ ਵਾਲੇ ਫੋਨ ਪਿਛਲੇ ਕੁਝ ਸਮੇਂ ਤੋਂ ਖੜਕ ਰਹੇ ਹਨ। ਪ੍ਰੋਜੈਕਟ ਦੇ ਸ਼ੁਰੂ ਵਿਚ ਮੁੱਖ ਮੰਤਰੀ ਪੰਜਾਬ ਨੇ ਖੁਦ ਵੀ ਕੁਝ ਲਾਭਪਾਤਰੀਆਂ ਨੂੰ ਫੋਨ ਕੀਤੇ ਸਨ। ਫੀਡ ਬੈਕ ਅਫਸਰਾਂ ਵਲੋਂ ਪੰਜਾਬ ਵਿਚ ਮੈਨੂਅਲੀ ਵੀ ਸਰਵੇ ਕੀਤਾ ਜਾ ਰਿਹਾ ਹੈ।
                       ਸੂਤਰ ਆਖਦੇ ਹਨ ਕਿ ਫੀਡ ਬੈਕ ਤਾਂ ਬਹਾਨਾ ਹੈ ਅਤੇ ਸਰਕਾਰ ਇਸ ਬਹਾਨੇ ਲੋਕਾਂ ਦਾ ਸਿਆਸੀ ਮੂਡ ਜਾਣਨਾ ਚਾਹੁੰਦੀ ਹੈ। ਸਰਕਾਰ ਸੱਚਮੁੱਚ ਸੰਜੀਦਾ ਹੈ ਤਾਂ ਇਸ ਫੀਡ ਬੈਕ ਜਾਣਨ ਦੀ ਲੋੜ 9 ਵਰਿ•ਆਂ ਮਗਰੋਂ ਕਿਉਂ ਪਈ ਹੈ ਅਤੇ ਉਹ ਵੀ ਸਿਰਫ਼ ਛੇ ਮਹੀਨੇ ਲਈ। ਸੂਚਨਾ ਤੇ ਲੋਕ ਸੰਪਰਕ ਵਿਭਾਗ ਦੇ ਸਕੱਤਰ ਸ੍ਰੀ ਰਾਹੁਲ ਤਿਵਾੜੀ ਅਤੇ ਡਾਇਰੈਕਟਰ ਨਾਲ ਵਾਰ ਵਾਰ ਸੰਪਰਕ ਕੀਤਾ ਪ੍ਰੰਤੂ ਉਨ•ਾਂ ਫੋਨ ਅਟੈਂਡ ਨਹੀਂ ਕੀਤਾ। ਇਵੇਂ ਹੀ ਪੰਜਾਬ ਵਿਚ ਪਿਛਲੇ ਦਿਨਾਂ ਵਿਚ ਜਲੰਧਰ ਤੇ ਮੋਹਾਲੀ ਵਿਚ ਕਰੀਬ 250 ਸਾਬਕਾ ਸੈਨਿਕਾਂ ਦੀ ਗੁਪਤ ਸਰਵੇ ਲਈ ਟਰੇਨਿੰਗ ਹੋਈ ਹੈ ਜਿਨ•ਾਂ ਵਲੋਂ ਕੁਝ ਜ਼ਿਲਿ•ਆਂ ਵਿਚ ਸਰਵੇ ਸ਼ੁਰੂ ਕਰ ਦਿੱਤਾ ਗਿਆ ਹੈ। ਬਠਿੰਡਾ ਜ਼ਿਲ•ੇ ਵਿਚ 20 ਅਕਤੂਬਰ ਤੋਂ ਇਹ ਕੰਮ ਸ਼ੁਰੂ ਹੋਣਾ ਹੈ। ਹਰ ਸਾਬਕਾ ਸੈਨਿਕ ਨੂੰ ਪ੍ਰਤੀ ਦਿਨ ਦੋ ਹਜ਼ਾਰ ਰੁਪਏ ਮਿਹਨਤਾਨਾ ਅਤੇ 500 ਰੁਪਏ ਦਾ ਤੇਲ ਖਰਚ ਦਿੱਤਾ ਜਾਣਾ ਹੈ। ਹਰ ਪਿੰਡ ਚੋਂ 45 ਲੋਕਾਂ ਤੋਂ 17 ਸੁਆਲ ਪੁੱਛੇ ਜਾਣੇ ਹਨ ਜੋ ਨਿਰੋਲ ਸਿਆਸੀ ਹਨ। ਸਰਵੇ ਲਈ ਤਿਆਰ ਪ੍ਰੋਫਾਰਮਾ ਮੋਬਾਇਲ ਟੈਬ ਵਿਚ ਹੀ ਹੈ ਜੋ ਹਰ ਸਾਬਕਾ ਸੈਨਿਕ ਨੂੰ ਦਿੱਤਾ ਗਿਆ ਹੈ। ਇਸ ਗੁਪਤ ਸਰਵੇ ਦਾ ਹਾਲੇ ਭੇਤ ਬਣਿਆ ਹੋਇਆ ਹੈ ਕਿ ਇਹ ਕਿਸ ਤਰਫ਼ੋਂ ਕਰਾਇਆ ਜਾ ਰਿਹਾ ਹੈ। ਕੁਝ ਸਾਬਕਾ ਸੈਨਿਕਾਂ ਦਾ ਕਹਿਣਾ ਸੀ ਕਿ ਕਰਨਾਟਕਾ ਦਾ ਇੱਕ ਟੀ.ਵੀ ਚੈੱਨਲ ਇਹ ਸਰਵੇ ਕਰਾ ਰਿਹਾ ਹੈ ਪ੍ਰੰਤੂ ਗੱਲ ਸਪੱਸ਼ਟ ਨਹੀਂ ਹੋ ਰਹੀ ਹੈ। 

Thursday, October 13, 2016

                                       ਕੌਣ ਰੋਕੂ 
              ਠੇਕੇਦਾਰਾਂ ਨੇ ਬਣਾਏ 'ਨਾਈਟ ਗੈਂਗ'
                                  ਚਰਨਜੀਤ ਭੁੱਲਰ
ਬਠਿੰਡਾ : ਸ਼ਰਾਬ ਠੇਕੇਦਾਰਾਂ ਦੇ ਹੁਣ ਗ਼ੈਰਕਨੂੰਨੀ ਤੌਰ ਤੇ 'ਨਾਈਟ ਗੈਂਗ' ਬਣਾ ਲਏ ਹਨ ਜੋ ਪੱਛਮੀ ਪੰਜਾਬ ਵਿਚ ਮੌਤ ਦੇ ਦੂਤ ਬਣ ਗਏ ਹਨ। ਤਾਜ਼ਾ ਨਿਸ਼ਾਨਾ ਮਾਨਸਾ ਦੇ ਪਿੰਡ ਘਰਾਂਗਣਾ ਦੇ ਦਲਿਤ ਨੌਜਵਾਨ ਨੂੰ ਬਣਾਇਆ ਗਿਆ ਹੈ ਬਠਿੰਡਾ, ਮਾਨਸਾ, ਫਰੀਦਕੋਟ ਤੇ ਫਾਜਿਲਕਾ ਵਿਚ ਏਦਾ ਦੇ 'ਨਾਈਟ ਗੈਂਗ' ਚੱਲ ਰਹੇ ਹਨ ਜੋ ਨਾਜਾਇਜ਼ ਸ਼ਰਾਬ ਦੀ ਵਿਕਰੀ ਰੋਕਣ ਦੇ ਨਾਮ ਹੇਠ ਖੁਦ ਸਿੱਧੀ ਕਾਰਵਾਈ ਕਰਦੇ ਹਨ। ਫਾਜਿਲਕਾ ਕਾਂਡ ਸਮੇਤ ਮਾਲਵੇ ਵਿਚ ਦਰਜਨਾਂ ਦਲਿਤ ਲੋਕ ਇਨ•ਾਂ ਦਾ ਨਿਸ਼ਾਨਾ ਬਣ ਚੁੱਕੇ ਹਨ। ਠੇਕੇਦਾਰਾਂ ਵਲੋਂ ਜੇਲ•ਾਂ ਚੋਂ ਆਏ ਨੌਜਵਾਨਾਂ ਅਤੇ ਬੇਰੁਜ਼ਗਾਰਾਂ ਨੂੰ ਹਾਇਰ ਕਰਕੇ 'ਨਾਈਟ ਗੈਂਗ' ਬਣਾਏ ਹੋਏ ਹਨ ਜੋ ਆਪਣੇ ਤੌਰ ਤੇ ਸਿੱਧਾ ਹਮਲਾ ਕਰਦੇ ਹਨ।ਐਤਕੀਂ ਤਾਂ ਸਰਕਾਰ ਵੀ ਆਪਣੇ ਚਿਹੇਤੇ ਠੇਕੇਦਾਰਾਂ ਦੀ ਮਦਦ ਲਈ ਨਾਜਾਇਜ਼ ਸ਼ਰਾਬ ਦੇ ਧੜਾਧੜ ਪੁਲੀਸ ਕੇਸ ਦਰਜ ਕਰ ਰਹੀ ਹੈ। ਕਰ ਅਤੇ ਆਬਕਾਰੀ ਵਿਭਾਗ ਨੇ ਬਠਿੰਡਾ ਮਾਨਸਾ ਵਿਚ 1 ਅਪਰੈਲ ਤੋਂ 30 ਸਤੰਬਰ 2016 ਤੱਕ ਐਕਸਾਈਜ ਐਕਟ ਤਹਿਤ 520 ਪੁਲੀਸ ਕੇਸ ਦਰਜ ਕਰਾਏ ਹਨ ਜੋ ਹੁਣ ਤੱਕ ਦਾ ਰਿਕਾਰਡ ਹੈ। ਬਠਿੰਡਾ ਵਿਚ ਇਸ ਸਮੇਂ ਦੌਰਾਨ 310 ਕੇਸ ਦਰਜ ਕਰਾਏ ਗਏ ਅਤੇ ਲੰਘੇ ਚਾਰ ਮਹੀਨਿਆਂ ਤੋਂ ਤਾਂ ਔਸਤਨ ਰੋਜ਼ਾਨਾ ਦੋ ਪੁਲੀਸ ਕੇਸ ਦਰਜ ਹੋਏ ਹਨ। ਮਾਨਸਾ ਵਿਚ ਛੇ ਮਹੀਨਿਆਂ ਦੌਰਾਨ ਐਕਸਾਈਜ ਐਕਟ ਤਹਿਤ 210 ਕੇਸ ਦਰਜ ਹੋਏ ਹਨ।
                          ਅਹਿਮ ਸੂਤਰਾਂ ਅਨੁਸਾਰ ਠੇਕੇਦਾਰਾਂ ਦੇ ਇੱਕ 'ਨਾਈਟ ਗੈਂਗ' ਵਿਚ ਦਰਜਨ ਦੇ ਕਰੀਬ ਨੌਜਵਾਨ ਕੰਮ ਕਰਦੇ ਹਨ ਜਿਨ•ਾਂ ਨੂੰ ਬਕਾਇਦਾ ਅਸਲੇ ਸਮੇਤ ਤਿੰਨ ਤਿੰਨ ਚਾਰ ਚਾਰ ਗੱਡੀਆਂ ਦਿੱਤੀਆਂ ਹੋਈਆਂ ਹਨ ਅਤੇ ਰਾਤ ਵਕਤ ਇਹ ਗੈਂਗ ਗ਼ੈਰਕਨੂੰਨੀ ਤੌਰ ਤੇ ਨਾਕੇ ਵੀ ਲਾਉਂਦੇ ਹਨ। ਤਲਵੰਡੀ ਸਾਬੋ ਇਲਾਕੇ ਵਿਚ 'ਨਾਈਟ ਗੈਂਗ' ਵਲੋਂ ਇੱਕ ਵਾਹਨ ਸਵਾਰ ਨੂੰ ਨਾਜਾਇਜ਼ ਸ਼ਰਾਬ ਦੇ ਸ਼ੱਕ ਵਿਚ ਗੋਲੀ ਦਾ ਸ਼ਿਕਾਰ ਬਣਾਇਆ ਗਿਆ। ਮਗਰੋਂ ਠੇਕੇਦਾਰਾਂ ਨੇ ਪਰਿਵਾਰ ਨਾਲ ਸਮਝੌਤਾ ਕਰ ਲਿਆ। ਹੁਣ ਘਰਾਂਗਣਾ ਵਿਚ ਦਲਿਤ ਨੌਜਵਾਨ ਨੂੰ ਮਾਰ ਮੁਕਾਇਆ ਹੈ, ਉਨ•ਾਂ ਹਮਲਾਵਰਾਂ ਵਿਚ ਇੱਕ ਸ਼ਰਾਬ ਠੇਕੇਦਾਰ ਦੇ ਠੇਕੇਦਾਰ ਦਾ ਡਰਾਈਵਰ ਵੀ ਹੈ। 'ਨਾਈਟ ਗੈਂਗ' ਰਾਤ ਬਰਾਤੇ ਲੋਕਾਂ ਦੇ ਘਰਾਂ ਵਿਚ ਛਾਪੇਮਾਰੀ ਵੀ ਕਰਦੇ ਹਨ। ਜੋਗਾ ਪੁਲੀਸ ਨੇ 22 ਅਗਸਤ ਨੂੰ ਹੈਪੀ ਠੇਕੇਦਾਰ ਤੇ ਬੰਟੀ ਠੇਕੇਦਾਰ ਤੇ ਕੇਸ ਵੀ ਦਰਜ ਕੀਤਾ ਸੀ ਜਿਨ•ਾਂ ਨੇ ਭਾਈ ਦੇਸਾ ਦੇ ਢਾਬੇ ਤੇ ਕੁਲਵੰਤ ਸਿੰਘ ਤੇ ਹਮਲਾ ਕਰ ਦਿੱਤਾ ਸੀ। ਜ਼ਖਮੀ ਕੁਲਵੰਤ ਸਿੰਘ ਦਾ ਕਹਿਣਾ ਸੀ ਕਿ ਉਨ•ਾਂ ਨੂੰ ਠੇਕੇਦਾਰਾਂ ਨੇ ਨਾਜਾਇਜ਼ ਸਰਾਬ ਦੇ ਮਾਮਲੇ ਵਿਚ ਨਿਸ਼ਾਨਾ ਬਣਾਇਆ।
                       ਦੱਸਣਯੋਗ ਹੈ ਕਿ ਦੋ ਕੁ ਮਹੀਨੇ ਪਹਿਲਾਂ ਹੀ 'ਨਾਈਟ ਗੈਂਗ' ਨੇ ਪਿੰਡ ਜਵਾਹਕੇ ਵਿਚ ਇੱਕ ਦਲਿਤ ਨੂੰ ਨਿਸ਼ਾਨਾ ਬਣਾਇਆ ਅਤੇ ਮਗਰੋਂ ਸਮਝੌਤਾ ਹੋਇਆ। ਪਿਛਲੇ ਵਰੇ• ਵੀ ਇਸੇ ਪਿੰਡ ਵਿਚ ਏਦਾ ਦੀ ਵਾਰਦਾਤ ਹੋਈ ਸੀ। ਸ਼ਰਾਬ ਦੇ ਠੇਕੇਦਾਰ ਆਖਦੇ ਹਨ ਕਿ ਉਨ•ਾਂ ਨੇ ਤਾਂ ਆਪਣੇ ਸੂਹੀਏ ਰੱਖੇ ਹੋਏ ਹਨ ਜੋ ਪੁਲੀਸ ਅਤੇ ਐਕਸਾਈਜ ਵਿਭਾਗ ਦੇ ਨੂੰ ਸਿਰਫ਼ ਨਾਜਾਇਜ਼ ਸ਼ਰਾਬ ਦੀ ਸੂਹ ਹੀ ਦਿੰਦੇ ਹਨ। ਉਨ•ਾਂ ਵਲੋਂ ਕਿਤੇ ਵੀ ਕਾਨੂੰਨ ਨੂੰ ਹੱਥ ਵਿਚ ਨਹੀਂ ਲਿਆ ਜਾਂਦਾ ਹੈ। ਜੈਤੋ ਥਾਣੇ ਵਿਚ ਕੁਝ ਹਫਤੇ ਪਹਿਲਾਂ ਇੱਕ ਠੇਕੇਦਾਰ ਤੇ ਇਸੇ ਤਰ•ਾਂ ਦਾ ਕੇਸ ਦਰਜ ਹੋਇਆ ਹੈ। ਗੋਨਿਆਣਾ ਇਲਾਕੇ ਵਿਚ ਤਾਂ 'ਨਾਈਟ ਗੈਂਗ' ਨਾਲ ਪੁਲੀਸ ਦਾ ਹੀ ਮੁਕਾਬਲਾ ਹੋ ਗਿਆ ਸੀ। ਠੇਕੇਦਾਰਾਂ ਵਲੋਂ ਪੁਲੀਸ ਥਾਣੇਦਾਰਾਂ ਨੂੰ ਵੀ ਪ੍ਰਾਈਵੇਟ ਗੱਡੀਆਂ ਦਿੱਤੇ ਜਾਣ ਦਾ ਮਾਮਲਾ ਉਦੋਂ ਉਭਰਿਆ ਸੀ। ਕੋਟਕਪੂਰਾ ਵਿਚ ਵੀ 'ਨਾਈਟ ਗੈਂਗ' ਦੀ ਕਾਰਵਾਈ ਤੋਂ ਰੌਲਾ ਪੈ ਚੁੱਕਾ ਹੈ। ਪੁਲੀਸ ਵੀ  ਇਨ•ਾਂ ਨੂੰ ਹੱਥ ਪਾਉਣ ਤੋਂ ਤ੍ਰਿਭਕਦੀ ਹੈ। ਮਾਨਸਾ ਦੇ ਈ.ਟੀ.ਓ ਪਿਆਰਾ ਸਿੰਘ ਦਾ ਕਹਿਣਾ ਸੀ ਕਿ ਠੇਕੇਦਾਰਾਂ ਦੇ ਆਦਮੀ ਨਾਕਾ ਵਗੈਰਾ ਤਾਂ ਨਹੀਂ ਲਾਉਂਦੇ ਹਨ ਪ੍ਰੰਤੂ ਉਹ ਪੁਲੀਸ ਨੂੰ ਨਾਲ ਲੈ ਕੇ ਰੇਡ ਜਰੂਰ ਕਰਾਉਂਦੇ ਹਨ।
                       ਸੂਤਰ ਦੱਸਦੇ ਹਨ ਕਿ ਵੱਡੇ ਗਰੁੱਪਾਂ ਵਾਲੇ ਜ਼ਿਲਿ•ਆਂ ਵਿਚ ਇਹ 'ਨਾਈਟ ਗੈਂਗ' ਚੱਲ ਰਹੇ ਹਨ। ਬਠਿੰਡਾ ਦੇ ਵਿਧਾਇਕ ਸਰੂਪ ਚੰਦ ਸਿੰਗਲਾ ਦਾ ਕਹਿਣਾ ਸੀ ਕਿ ਸਰਾਬ ਠੇਕੇਦਾਰ ਆਪਣੇ ਕੋਲ ਪ੍ਰਾਈਵੇਟ ਆਦਮੀ ਤਾਂ ਰੱਖਦੇ ਹਨ ਪ੍ਰੰਤੂ ਉਨ•ਾਂ ਦੀ ਕੋਈ ਗੈਰਕਾਨੂੰਨੀ ਕਾਰਵਾਈ ਦੀ ਜਾਣਕਾਰੀ ਨਹੀਂ। ਅਗਰ ਕੋਈ ਏਦਾ ਦੇ ਗੈਂਗ ਹਨ ਤਾਂ ਸਰਕਾਰ ਸਖ਼ਤੀ ਨਾਲ ਰੋਕੇਗੀ। ਉਨ•ਾਂ ਘਰਾਂਗਣਾ ਕਾਂਡ ਦੀ ਉਚ ਪੱਧਰੀ ਜਾਂਚ ਹੋਣ ਦੀ ਗੱਲ ਵੀ ਆਖੀ। ਦੂਸਰੀ ਤਰਫ਼ 'ਆਪ' ਦੇ ਬੁਲਾਰੇ ਕੁਲਤਾਰ ਸੰਧਵਾਂ ਦਾ ਕਹਿਣ ਸੀ ਕਿ ਸਰਕਾਰੀ ਸਰਪ੍ਰਸਤੀ ਹੇਠ 'ਨਾਈਟ ਗੈਂਗ' ਸ਼ਰਾਬ ਦੇ ਕਾਰੋਬਾਰ ਦੇ ਵਾਧੇ ਲਈ ਆਮ ਲੋਕਾਂ ਨੂੰ ਮੌਤ ਦੇ ਘਾਟ ਉਤਾਰ ਰਹੇ ਹਨ। ਇਹ ਗੈਂਗ ਹੁਣ ਬਹੁਤੀ ਦੇਰ ਨਹੀਂ ਚੱਲਣਗੇ।
                                     ਮਾੜੇ ਅਨਸਰ ਬਖ਼ਸ਼ੇ ਨਹੀਂ ਜਾਣਗੇ : ਆਈ.ਜੀ
ਬਠਿੰਡਾ ਜ਼ੋਨ ਦੇ ਆਈ.ਜੀ ਸ੍ਰੀ ਐਸ.ਕੇ.ਅਸਥਾਨਾ ਦਾ ਕਹਿਣਾ ਸੀ ਕਿ ਉਹ ਠੇਕੇਦਾਰਾਂ ਨੂੰ ਏਦਾ ਦਾ ਮਾਮਲਾ ਧਿਆਨ ਵਿਚ ਆਉਣ ਤੇ ਤਾੜਦੇ ਹਨ। ਜਿਥੇ ਕਿਤੇ ਏਦਾ ਦਾ ਕੋਈ ਮਾਮਲਾ ਨੋਟਿਸ ਵਿਚ ਆਉਂਦਾ ਹੈ ਤਾਂ ਫੌਰੀ ਪੁਲੀਸ ਕਾਰਵਾਈ ਕੀਤੀ ਜਾਂਦੀ ਹੈ। ਉਨ•ਾਂ ਆਖਿਆ ਕਿ ਥੋੜੀ ਬਹੁਤੀ ਗੜਬੜ ਤਾਂ ਇਹ ਲੋਕ ਕਰਦੇ ਹਨ ਪ੍ਰੰਤੂ ਕੋਈ ਵੀ ਗੈਰਕਾਨੂੰਨੀ ਕਾਰਵਾਈ ਬਰਦਾਸ਼ਿਤ ਨਹੀਂ ਕੀਤੀ ਜਾਵੇਗੀ।

Monday, October 10, 2016

                                ਸਿਆਸੀ ਮੋਹ   
           ਹੁਣ 'ਅਕਾਲੀ' ਬਣੇ ਡੇਰਾ 'ਪਰੇਮੀ'
                               ਚਰਨਜੀਤ ਭੁੱਲਰ
ਬਠਿੰਡਾ : ਗਠਜੋੜ ਸਰਕਾਰ ਨੂੰ ਹੁਣ ਅਗਾਮੀ ਚੋਣਾਂ ਤੋਂ ਪਹਿਲਾਂ ਡੇਰਾ ਸਿਰਸਾ ਦਾ ਹੇਜ ਜਾਗਿਆ ਹੈ ਤਾਂ ਜੋ ਡੇਰਾ ਪੈਰੋਕਾਰਾਂ ਨੂੰ 'ਤੱਕੜੀ' ਦੇ ਨੇੜੇ ਕੀਤਾ ਜਾ ਸਕੇ। ਪਿਛਲੇ ਕੁਝ ਸਮੇਂ ਤੋਂ ਸਿਆਸੀ ਰਿਊੜੀਆਂ ਦੀ ਵੰਡ ਵਿਚ ਡੇਰਾ ਸਿਰਸਾ ਨੂੰ ਗੁਪਤ ਤੌਰ ਤੇ ਵੱਖਰਾ ਕੋਟਾ ਦਿੱਤਾ ਜਾਣ ਲੱਗਾ ਹੈ। ਭਾਵੇਂ ਇਹ ਸਭ ਕੁਝ ਜ਼ੁਬਾਨੀ ਹੁਕਮਾਂ ਤੇ ਹੈ ਪ੍ਰੰਤੂ ਪਿੰਡਾਂ ਵਿਚ ਇਸ ਦੇ ਚਰਚੇ ਜ਼ੋਰ ਫੜ ਗਏ ਹਨ। ਦੱਸਣਯੋਗ ਹੈ ਕਿ ਸ੍ਰੀ ਅਕਾਲ ਤਖਤ ਸਾਹਿਬ ਤਰਫੋਂ ਡੇਰਾ ਸਿਰਸਾ ਦੇ ਸਮਾਜਿਕ ਬਾਈਕਾਟ ਦਾ ਹੁਕਮਨਾਮਾ ਜਾਰੀ ਕੀਤਾ ਹੋਇਆ ਹੈ ਪ੍ਰੰਤੂ ਅਕਾਲੀ ਦਲ ਕਿਵੇਂ ਨਾ ਕਿਵੇਂ ਡੇਰਾ ਪੈਰੋਕਾਰਾਂ ਤੇ ਵੀ 'ਸੰਕਟ' ਦੀ ਘੜੀ ਵਿਚ ਟੇਕ ਰੱਖ ਰਿਹਾ ਹੈ। ਮਾਲਵੇ ਵਿਚ ਡੇਰਾ ਸਿਰਸਾ ਦਾ ਤਕੜਾ ਵੋਟ ਬੈਂਕ ਹੈ। ਸ਼੍ਰੋਮਣੀ ਅਕਾਲੀ ਦਲ ਵਲੋਂ ਰਾਖਵੀਆਂ ਸੀਟਾਂ ਤੇ ਧਿਆਨ ਕੇਂਦਰਿਤ ਕੀਤਾ ਜਾ ਰਿਹਾ ਹੈ ਅਤੇ ਇਸੇ ਵਰਗ ਵਿਚ ਡੇਰਾ ਸਿਰਸਾ ਦਾ ਵੱਡਾ ਵੋਟ ਬੈਂਕ ਹੈ। ਅਹਿਮ ਸੂਤਰਾਂ ਅਨੁਸਾਰ ਗਠਜੋੜ ਸਰਕਾਰ ਨੇ ਪਿਛਲੇ ਦਿਨਾਂ ਵਿਚ ਡੇਰਾ ਸਿਰਸਾ ਦੇ ਸਿਆਸੀ ਵਿੰਗ ਦੇ ਮੈਂਬਰਾਂ ਨੂੰ ਨਵੇਂ ਟਿਊਬਵੈਲ ਕੁਨੈਕਸ਼ਨਾਂ ਦੀ ਵੰਡ ਵਿਚ ਵੱਖਰਾ ਕੋਟਾ ਦਿੱਤਾ ਹੈ। ਉਂਜ, ਹਰ ਹਲਕੇ ਵਾਸਤੇ ਵੱਖਰਾ ਕੋਟਾ ਨਿਰਧਾਰਤ ਕੀਤਾ ਗਿਆ ਸੀ ਅਤੇ ਇਸ ਵਾਸਤੇ ਹਲਕਾ ਵਿਧਾਇਕ ਤੇ ਹਲਕਾ ਇੰਚਾਰਜ ਦੀ ਸਿਫਾਰਸ਼ ਤੇ ਹੀ ਟਿਊਬਵੈਲ ਕੁਨੈਕਸ਼ਨ ਦਿੱਤਾ ਜਾਂਦਾ ਹੈ।
                     ਸੂਤਰ ਦੱਸਦੇ ਹਨ ਕਿ ਡੇਰਾ ਸਿਰਸਾ ਦੇ ਸਿਆਸੀ ਵਿੰਗ ਦੇ ਹਰ ਮੈਂਬਰ ਵਲੋਂ ਪਿੰਡਾਂ ਵਿਚਲੇ ਡੇਰਾ ਪੈਰੋਕਾਰਾਂ ਨੂੰ ਨਵੇਂ ਟਿਊਬਵੈਲ ਕੁਨੈਕਸ਼ਨ ਦਿਵਾਉਣ ਲਈ ਵੱਖਰੀਆਂ ਸੂਚੀਆਂ ਤਿਆਰ ਕੀਤੀਆਂ ਅਤੇ ਸਰਕਾਰ ਨੂੰ ਭੇਜੀਆਂ। ਹੁਣ ਜਦੋਂ ਡੇਰਾ ਪੈਰੋਕਾਰਾਂ ਦੇ ਧੜਾਧੜ ਕੁਨੈਕਸ਼ਨ ਲੱਗੇ ਤਾਂ ਡੇਰਾ ਸਿਰਸਾ ਲਈ ਵੱਖਰਾ ਕੋਟਾ ਹੋਣ ਦੀ ਗੱਲ ਖੁੱਲ•ੀ ਹੈ। ਪਾਵਰਕੌਮ ਦੇ ਅਫਸਰ 'ਆਫ ਰਿਕਾਰਡ' ਤਾਂ ਇਸ ਗੱਲ ਨੂੰ ਸਵੀਕਾਰ ਕਰ ਰਹੇ ਹਨ ਪ੍ਰੰਤੂ ਖੁੱਲ•ੇਆਮ ਕਹਿਣ ਤੋਂ ਡਰ ਰਹੇ ਹਨ। ਬਠਿੰਡਾ,ਮਾਨਸਾ ਤੇ ਮੁਕਤਸਰ ਵਿਚ ਜੋ ਡੇਰਾ ਸਿਰਸਾ ਦੇ ਜਿਆਦਾ ਪ੍ਰਭਾਵ ਵਾਲੇ ਪਿੰਡ ਹਨ, ਉਨ•ਾਂ ਵਿਚ ਇਹ ਕੁਨੈਕਸ਼ਨ ਆਏ ਹਨ। ਬਲਾਕ ਸੰਗਤ ਵਿਚ ਡੇਰਾ ਸਿਰਸਾ ਦੇ ਪੈਰੋਕਾਰਾਂ ਨੂੰ ਕਾਫੀ ਕੁਨੈਕਸ਼ਨ ਵੰਡੇ ਗਏ ਹਨ। ਇਵੇਂ ਹੀ ਬਠਿੰਡਾ ਜ਼ਿਲ•ੇ ਵਿਚ ਅਸਲਾ ਲਾਇਸੈਂਸ ਬਣਾਉਣ ਵਿਚ ਵੀ ਡੇਰਾ ਸਿਰਸਾ ਦੇ ਇੱਕ ਆਗੂ ਨੂੰ ਵੱਖਰਾ ਕੋਟਾ ਦਿੱਤਾ ਗਿਆ ਹੈ। ਸੂਤਰ ਦੱਸਦੇ ਹਨ ਕਿ ਹਲਕਾ ਰਾਮਪੁਰਾ ਵਿਚਲੇ ਇਸ ਡੇਰਾ ਆਗੂ ਦੀ ਸਰਕਾਰੀ ਦਰਬਾਰੇ ਤੂਤੀ ਬੋਲਦੀ ਹੈ ਅਤੇ ਉਸ ਦਾ ਕੋਈ ਕੰਮ ਰੁਕਦਾ ਨਹੀਂ ਹੈ। ਬਹੁਤੇ ਡੇਰਾ ਪੈਰੋਕਾਰਾਂ ਦੇ ਅਸਲਾ ਲਾਇਸੈਂਸ ਡੇਰਾ ਸਿਰਸਾ ਦੇ ਇਸ ਆਗੂ ਦੇ ਰਾਹੀਂ ਬਣ ਰਹੇ ਹਨ।
                     ਪਿਛਾਂਹ ਨਜ਼ਰ ਮਾਰੀਏ ਤਾਂ ਪੰਜਾਬ ਸਰਕਾਰ ਨੇ 17 ਜਨਵਰੀ 2015 ਨੂੰ ਡੇਰਾ ਸਿਰਸਾ ਦੇ ਮੁਖੀ ਦੀ ਫਿਲਮ ਨੂੰ ਪੰਜਾਬ ਵਿਚ ਦਿਖਾਏ ਜਾਣ ਤੇ ਪਾਬੰਦੀ ਲਗਾ ਦਿੱਤੀ ਸੀ। ਉਦੋਂ ਹੋਰਨਾਂ ਪੰਥਕ ਧਿਰਾਂ ਨੇ ਇਸ ਫਿਲਮ ਦਾ ਵਿਰੋਧ ਕੀਤਾ ਸੀ। ਹੁਣ ਡੇਰਾ ਮੁਖੀ ਦੀ ਨਵੀਂ ਫਿਲਮ 'ਲਾਇਨ ਹਰਟ' 7 ਅਕਤੂਬਰ ਨੂੰ ਰਲੀਜ਼ ਹੋਈ ਹੈ ਜਿਸ ਵਾਸਤੇ ਸਰਕਾਰ ਨੇ ਸਭ ਰਾਹ ਖੋਲ• ਦਿੱਤੇ ਹਨ। ਸੂਤਰ ਦੱਸਦੇ ਹਨ ਕਿ ਅਫਸਰਾਂ ਨੂੰ ਗੁਪਤ ਹਦਾਇਤਾਂ ਹਨ ਕਿ ਡੇਰਾ ਆਗੂਆਂ ਦੇ ਕੰਮ ਤਰਜੀਹੀ ਅਧਾਰ ਤੇ ਕੀਤੇ ਜਾਣ। ਪੁਲੀਸ ਥਾਣਿਆਂ ਵਿਚ ਡੇਰਾ ਪੈਰੋਕਾਰਾਂ ਦੀ ਸ਼ਿਕਾਇਤ ਤੇ ਹੱਥੋਂ ਹੱਥ ਸੁਣਵਾਈ ਹੋ ਰਹੀ ਹੈ।
                                   ਡਿਪਟੀ ਕਮਿਸ਼ਨਰਾਂ ਨੂੰ ਸੂਚੀ ਦਿੱਤੀ : ਡੇਰਾ ਸਿਰਸਾ
ਡੇਰਾ ਸਿਰਸਾ ਦੇ ਸਿਆਸੀ ਵਿੰਗ ਦੇ ਸੀਨੀਅਰ ਮੈਂਬਰ ਬਲਰਾਜ ਸਿੰਘ ਨੇ ਪੁਸ਼ਟੀ ਕਰਦਿਆਂ ਆਖਿਆ ਕਿ ਪਿੰਡਾਂ ਦੇ ਲੋੜਵੰਦ ਡੇਰਾ ਪੈਰੋਕਾਰਾਂ ਨੂੰ ਨਵੇਂ ਟਿਊਬਵੈਲ ਕੁਨੈਕਸ਼ਨ ਦਿਵਾਉਣ ਲਈ ਡਿਪਟੀ ਕਮਿਸ਼ਨਰਾਂ ਨੂੰ ਸੂਚੀਆਂ ਸੌਂਪੀਆਂ ਹਨ ਅਤੇ ਪ੍ਰਸ਼ਾਸਨ ਨੇ ਇੱਕ ਦੋ ਇਤਰਾਜ਼ ਲਗਾਏ ਸਨ, ਜੋ ਦੂਰ ਕਰ ਦਿੱਤੇ ਗਏ ਹਨ। ਸਿਆਸੀ ਵਿੰਗ ਦੇ ਚੇਅਰਮੈਨ ਰਾਮ ਸਿੰਘ ਦਾ ਕਹਿਣਾ ਸੀ ਕਿ ਬਲਾਕ ਪੱਧਰ ਤੇ ਅਜਿਹੀ ਸੂਚਨਾ ਹੋਵੇਗੀ, ਉਨ•ਾਂ ਕੋਲ ਕੋਈ ਜਾਣਕਾਰੀ ਨਹੀਂ ਹੈ।

Thursday, October 6, 2016

                             ਸ਼ਰਾਬ ਤੋਂ ਕਮਾਈ
          'ਪੰਥਕ ਸਰਕਾਰ' ਦਾ ਖਜ਼ਾਨਾ ਟੱਲੀ
                             ਚਰਨਜੀਤ ਭੁੱਲਰ
ਬਠਿੰਡਾ  : ਪੰਜਾਬ ਦੇ ਲੋਕ ਪੰਦਰਾਂ ਵਰਿ•ਆਂ ਵਿਚ 36 ਹਜ਼ਾਰ ਕਰੋੜ ਦੀ ਸ਼ਰਾਬ ਪੀ ਗਏ ਹਨ। ਠੇਕਿਆਂ ਦੀ ਕਮਾਈ ਨੇ ਸਰਕਾਰੀ ਖ਼ਜ਼ਾਨੇ ਨੂੰ ਤਾਂ ਟੱਲੀ ਕਰ ਦਿੱਤਾ ਹੈ ਜਦੋਂ ਕਿ ਲੋਕਾਂ ਦੇ ਬੋਝੇ ਖਾਲੀ ਹੋਏ ਹਨ। ਗਠਜੋੜ ਸਰਕਾਰ ਦੇ ਨੌਂ ਵਰਿ•ਆਂ ਵਿਚ ਲੋਕਾਂ ਨੇ ਕਰੀਬ 27 ਹਜ਼ਾਰ ਕਰੋੜ ਸ਼ਰਾਬ ਤੇ ਖਰਚ ਕੀਤੇ ਹਨ। ਪੰਜਾਬ ਸਰਕਾਰ ਸ਼ਰਾਬ ਦੀ ਕਮਾਈ ਨਾਲ ਵਿਕਾਸ ਕਰਨ ਵਿਚ ਜੁਟੀ ਹੋਈ ਹੈ। ਨੌਂ ਵਰਿ•ਆਂ ਦੀ ਔਸਤਨ ਵੇਖੀਏ ਤਾਂ ਪੰਜਾਬ ਦੇ ਲੋਕ ਰੋਜ਼ਾਨਾ ਔਸਤਨ 8.43 ਕਰੋੜ ਰੁਪਏ ਠੇਕਿਆਂ ਦੀ ਸ਼ਰਾਬ ਤੇ ਖਰਚ ਕਰ ਰਹੇ ਹਨ। ਚਾਲੂ ਮਾਲੀ ਵਰੇ• ਦੌਰਾਨ ਪੰਜਾਬ ਸਰਕਾਰ ਨੇ ਸ਼ਰਾਬ ਤੋਂ 5348.22 ਕਰੋੜ ਰੁਪਏ ਕਮਾਉਣ ਦਾ ਟੀਚਾ ਮਿਥਿਆ ਹੈ। ਵੇਰਵਿਆਂ ਅਨੁਸਾਰ ਪੰਜਾਬ ਸਰਕਾਰ ਨੇ ਸਾਲ 2002-03 ਤੋਂ 2015-16 ਤੱਕ ਠੇਕਿਆਂ ਦੀ ਸ਼ਰਾਬ ਵੇਚ ਕੇ 36,373 ਕਰੋੜ ਰੁਪਏ ਕਮਾਏ ਹਨ। ਅਕਾਲੀ ਭਾਜਪਾ ਗਠਜੋੜ ਸਰਕਾਰ ਦੇ ਕਾਰਜਕਾਲ ਦੌਰਾਨ ਸਾਲ 2007-08 ਤੋਂ ਸਾਲ 2015-16 ਤੱਕ ਠੇਕਿਆਂ ਤੋਂ ਆਮਦਨ 27697 ਕਰੋੜ ਰੁਪਏ ਰਹੀ ਹੈ। ਕੈਪਟਨ ਸਰਕਾਰ ਨੇ ਪੰਜ ਵਰਿ•ਆਂ ਵਿਚ ਸ਼ਰਾਬ ਤੋਂ 7326.25 ਕਰੋੜ ਰੁਪਏ ਕਮਾਏ ਸਨ ਜਦੋਂ ਕਿ ਗਠਜੋੜ ਸਰਕਾਰ ਨੇ ਪਹਿਲੇ ਕਾਰਜਕਾਲ ਦੌਰਾਨ 10,808 ਕਰੋੜ ਦੀ ਆਮਦਨ ਇਕੱਲੀ ਸਰਕਾਰ ਤੋਂ ਕੀਤੀ।
                        ਗਠਜੋੜ ਸਰਕਾਰ ਨੇ ਦੂਸਰੇ ਕਾਰਜਕਾਲ ਦੇ ਚਾਰ ਵਰਿ•ਆਂ ਦੌਰਾਨ ਹੀ 16,888 ਕਰੋੜ ਰੁਪਏ ਕਮਾ ਲਏ ਦੇਸ਼ ਦੇ ਕਈ ਸੂਬੇ ਸ਼ਰਾਬ ਬੰਦੀ ਦੇ ਰਾਹ ਪਏ ਹਨ ਅਤੇ ਪੰਜਾਬ ਦੇ ਨਸ਼ਿਆਂ ਦਾ ਮੁੱਦਾ ਪੂਰੇ ਦੇਸ਼ ਵਿਚ ਛਾਇਆ ਹੋਇਆ ਹੈ। ਮਾਲਵੇ ਦੇ ਪਿੰਡਾਂ ਵਿਚ ਇਹ ਹਾਲ ਹੈ ਕਿ ਪੀਣ ਵਾਲਾ ਸੁੱਧ ਪਾਣੀ ਮਿਲਦਾ ਨਹੀਂ ਜਦੋਂ ਕਿ ਠੰਢੀ ਬੀਅਰ ਪਿੰਡ ਪਿੰਡ ਮਿਲ ਰਹੀ ਹੈ। ਬਠਿੰਡਾ ਤੇ ਮਾਨਸਾ ਦੇ ਕਰੀਬ ਚਾਰ ਦਰਜਨ ਪਿੰਡਾਂ ਵਿਚ ਸਰਕਾਰੀ ਆਰ.ਓ ਪਲਾਂਟਾਂ ਨੂੰ ਜਿੰਦਰੇ ਵੱਜ ਗਏ ਹਨ ਪ੍ਰੰਤੂ ਠੇਕਿਆਂ ਦੇ ਬੂਹੇ ਖੁੱਲ•ੇ ਹੋਏ ਹਨ। ਸਾਇੰਟੈਫਿਕ ਅਵੇਅਰਨੈਸ ਐਂਡ ਸੋਸ਼ਲ ਵੈਲਫੇਅਰ ਫੋਰਮ ਪੰਜਾਬ ਦੇ ਪ੍ਰਧਾਨ ਡਾ.ਏ.ਐਸ.ਮਾਨ ਦਾ ਪ੍ਰਤੀਕਰਮ ਹੈ ਕਿ ਸਰਕਾਰ ਲੋਕਾਂ ਨੂੰ ਸ਼ਰਾਬ ਪਿਲਾ ਕੇ ਸਰਕਾਰੀ ਬੋਝਾ ਭਰ ਰਹੀ ਹੈ ਅਤੇ ਸ਼ਰਾਬ ਦਾ ਕੋਟਾ ਹਰ ਸਾਲ ਵਧਾ ਰਹੀ ਹੈ। ਉਨ•ਾਂ ਆਖਿਆ ਕਿ ਸਰਕਾਰ ਪਿੰਡਾਂ ਦੇ ਹਰ ਗਲੀ ਮਹੱਲੇ ਸ਼ਰਾਬ ਪੁੱਜਦੀ ਕਰ ਦਿੱਤੀ ਹੈ। ਸਰਕਾਰ ਸੰਜੀਦਾ ਹੈ ਤਾਂ ਸਰਾਬ ਦਾ ਕੋਟਾ ਘਟਾਵੇ। ਉਨ•ਾਂ ਆਖਿਆ ਕਿ ਸ਼ਰਾਬ ਬੰਦੀ ਬਿਹਾਰ ਵਿਚ ਲਾਗੂ ਹੋ ਸਕਦੀ ਹੈ ਤਾਂ ਪੰਜਾਬ ਵਿਚ ਕਿਉਂ ਨਹੀਂ। ਵੇਰਵਿਆਂ ਅਨੁਸਾਰ ਸਾਲ 2002-03 ਵਿਚ ਪੰਜਾਬ ਵਿਚ ਰੋਜ਼ਾਨਾ ਔਸਤਨ ਠੇਕਿਆਂ ਦੀ ਸਰਾਬ ਤੋਂ ਕਮਾਈ 3.92 ਕਰੋੜ ਰੁਪਏ ਹੁੰਦੀ ਸੀ ਜਦੋਂ ਕਿ ਸਾਲ 2015-16 ਵਿਚ ਇਹੋ ਕਮਾਈ ਰੋਜ਼ਾਨਾ ਦੀ ਔਸਤਨ 13.26 ਕਰੋੜ ਰੁਪਏ ਹੋ ਗਈ ਹੈ।
                    ਪੰਜਾਬ ਸਰਕਾਰ ਨੇ ਸਪੋਰਟਸ, ਸਭਿਆਚਾਰ ਅਤੇ ਆਟਾ ਦਾਲ ਖਾਤਰ ਸ਼ਰਾਬ ਤੇ ਸੈੱਸ ਲਗਾਇਆ ਹੋਇਆ ਹੈ। ਇਨਕਲਾਬੀ ਗੀਤਕਾਰ ਜਗਸੀਰ ਜੀਦਾ ਨੇ ਇਕੋ ਪ੍ਰਤੀਕਰਮ ਦਿੱਤਾ ਕਿ ਸਰਕਾਰ ਠੇਕਿਆਂ ਦੀ ਸ਼ਰਾਬ ਵੇਚ ਕੇ ਖਿਡਾਰੀ ਪੈਦਾ ਕਰ ਰਹੀ ਹੈ। ਚਾਲੂ ਮਾਲੀ ਵਰੇ• ਦੀ ਕਮਾਈ ਦਾ ਟੀਚਾ ਐਤਕੀਂ ਸਰਾਬ ਤੋਂ ਪੂਰਾ ਹੁੰਦਾ ਨਜ਼ਰ ਨਹੀਂ ਆ ਰਿਹਾ ਹੈ। ਪੰਜਾਬ ਦੀ ਕੋਈ ਵੀ ਸਿਆਸੀ ਧਿਰ ਸ਼ਰਾਬ ਦੇ ਠੇਕੇ ਬੰਦ ਕਰਨ ਨੂੰ ਤਿਆਰ ਨਹੀਂ ਹੈ। ਪੰਜਾਬ ਕਈ ਤਰ•ਾਂ ਦੇ ਸੰਕਟਾਂ ਵਿਚ ਫਸਿਆ ਹੋਇਆ ਅਤੇ ਸਰਕਾਰ ਨੇ ਨਸ਼ਿਆਂ ਖ਼ਿਲਾਫ਼ ਬਿਗਲ ਵਜਾਇਆ ਹੋਇਆ ਹੈ। ਕਾਂਗਰਸ ਸਰਕਾਰ ਦੇ ਸਮੇਂ ਦੌਰਾਨ ਔਸਤਨ ਪ੍ਰਤੀ ਦਿਨ ਸਰਕਾਰ ਸ਼ਰਾਬ ਤੋਂ 4.01 ਕਰੋੜ ਰੁਪਏ ਕਮਾ ਰਹੀ ਸੀ ਜਦੋਂ ਕਿ ਗਠਜੋੜ ਸਰਕਾਰ ਦੇ ਦੂਸਰੇ ਕਾਰਜਕਾਲ ਦੌਰਾਨ ਪ੍ਰਤੀ ਦਿਨ ਔਸਤਨ 9.25 ਕਰੋੜ ਰੁਪਏ ਦੀ ਕਮਾਈ ਸਰਕਾਰ ਨੂੰ ਸ਼ਰਾਬ ਤੋਂ ਹੋ ਰਹੀ ਹੈ। ਵੱਡੇ ਪਿੰਡਾਂ ਵਿਚ ਤਾਂ ਹੁਣ ਦੋ ਦੋ ਠੇਕੇ ਖੁੱਲ• ਗਏ ਹਨ। ਬਹੁਤੇ ਪਿੰਡਾਂ ਵਿਚ ਸਰਕਾਰ ਨੇ ਅੰਗਰੇਜ਼ੀ ਸਰਾਬ ਦੇ ਠੇਕੇ ਵੀ ਖੋਲੇ ਹਨ।