ਗੁਪਤ ਪੱਤਰ 
                                  ਮਾਰਕਫੈੱਡ ਵਿੱਚ ਉੱਠਿਆ ਘਪਲੇ ਦਾ ਧੂੰਆਂ
                                                           ਚਰਨਜੀਤ ਭੁੱਲਰ                 

ਚੰਡੀਗੜ੍ਹ : ਮਾਰਕਫੈੱਡ ’ਚ ਹੁਣ ਘਪਲੇ ਦਾ ਧੂੰਆਂ ਉੱਠਿਆ ਹੈ। ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਗੁਪਤ ਪੱਤਰ ਮਿਲਣ ਮਗਰੋਂ ਮਾਮਲੇ ਦੀ ਜਾਂਚ ਦੇ ਹੁਕਮ ਜਾਰੀ ਕਰ ਦਿੱਤੇ ਹਨ। ਮਾਰਕਫੈੱਡ ਦੇ ਮੌਜੂਦਾ ਚੇਅਰਮੈਨ ਵੱਲੋਂ ਹੀ ਸਹਿਕਾਰੀ ਅਦਾਰੇ ’ਚ ਘਪਲਾ ਹੋਣ ’ਤੇ ਉਂਗਲ ਉਠਾਈ ਗਈ ਹੈ, ਜਿਸ ਦੀ ਗੁਪਤ ਰਿਪੋਰਟ ਉਨ੍ਹਾਂ ਨੇ ਮੁੱਖ ਮੰਤਰੀ ਨੂੰ ਭੇਜੀ ਸੀ। ਮਾਰਕਫੈੱਡ ਵਿੱਚ ਕੀਟਨਾਸ਼ਕਾਂ ਦੀ ਖਰੀਦ ਅਤੇ ਇੱਕ ਅਮਲਾ ਅਫ਼ਸਰ ਦੇ ਭੱਤਿਆਂ ਤੋਂ ਇਲਾਵਾ ਨਿਯਕੁਤੀਆਂ ਅਤੇ ਤਬਾਦਲਿਆਂ ’ਤੇ ਉਂਗਲ ਉੱਠੀ ਹੈ।ਪੰਜਾਬੀ ਟ੍ਰਿਬਿਊਨ ਕੋਲ ਮੌਜੂਦ ਦਸਤਾਵੇਜ਼ਾਂ ਅਨੁਸਾਰ ਮੁੱਖ ਮੰਤਰੀ ਨੇ 28 ਦਸੰਬਰ, 2020 ਨੂੰ ਵਿੱਤ ਕਮਿਸ਼ਨਰ (ਸਹਿਕਾਰਤਾ) ਨੂੰ ਇਸ ਮਾਮਲੇ ਦੀ ਜਾਂਚ ਕਰਨ ਦੇ ਹੁਕਮ ਜਾਰੀ ਕੀਤੇ ਅਤੇ ਹਫ਼ਤੇ ਵਿੱਚ ਰਿਪੋਰਟ ਦੇਣ ਲਈ ਆਖਿਆ। ਪੜਤਾਲ ਰਿਪੋਰਟ ਦੀ ਇੱਕ ਕਾਪੀ ਮੁੱਖ ਸਕੱਤਰ ਪੰਜਾਬ ਨੂੰ ਭੇਜਣ ਦੀ ਹਦਾਇਤ ਕੀਤੀ ਗਈ ਹੈ। ਮਾਰਕਫੈੱਡ ਦੇ ਚੇਅਰਮੈਨ ਅਮਰਜੀਤ ਸਿੰਘ ਸਮਰਾ ਵੱਲੋਂ 30 ਜੁਲਾਈ, 2020 ਨੂੰ ਇਸ ਬਾਰੇ ਗੁਪਤ ਨੋਟ ਵੀ ਲਿਖਿਆ ਗਿਆ ਸੀ।

              ਮੁੱਖ ਮੰਤਰੀ ਨੇ ਚੇਅਰਮੈਨ ਵੱਲੋਂ ਉਠਾਏ ਤੱਥਾਂ ਦੀ ਜਾਂਚ ਲਈ ਆਖਿਆ ਹੈ। ਚੇਅਰਮੈਨ ਵੱਲੋਂ ਭੇਜੀ ਗੁਪਤ ਰਿਪੋਰਟ ਅਨੁਸਾਰ ਮਾਰਕਫੈੱਡ ਐਗਰੋ ਕੈਮੀਕਲਜ਼ ਮੁਹਾਲੀ ਦੇ ਇੱਕ ਪੁਰਾਣੇ ਡਿਪਟੀ ਜਨਰਲ ਮੈਨੇਜਰ ਵੱਲੋਂ ਮਾਰਕੀਟ ਤੋਂ ਵੱਧ ਭਾਅ ’ਤੇ ਕੀਟਨਾਸ਼ਕ ਖਰੀਦਣ ਦੀ ਗੱਲ ਆਖੀ ਗਈ ਹੈ। ਮੀਤਰੀਬੁਜ਼ਿਨ ਨਾਮ ਦੇ ਕੀਟਨਾਸ਼ਕ ਦੇ 40 ਹਜ਼ਾਰ ਪੈਕੇਟਾਂ ਦੀ ਖਰੀਦ ਕੀਤੀ ਗਈ ਸੀ, ਜਿਸ ਦਾ ਬਾਜ਼ਾਰੂ ਭਾਅ ਪ੍ਰਤੀ ਪੈਕੇਟ 40 ਰੁਪਏ ਸੀ, ਜਦਕਿ ਖਰੀਦ 72 ਰੁਪਏ ਪ੍ਰਤੀ ਪੈਕੇਟ ਕੀਤੀ ਗਈ। ਇਸੇ ਤਰ੍ਹਾਂ ਮਾਰਕਗੋਲਡ ਮਾਰਕਫੋਸ ਨਾਮ ਦੇ ਕੀਟਨਾਸ਼ਕ ਨੂੰ ਇਸ ਅਧਿਕਾਰੀ ਵੱਲੋਂ 9.30 ਲੱਖ ਵਿੱਚ ਵੇਚਿਆ ਗਿਆ ਸੀ, ਜਦਕਿ ਇਸ ਦੀ ਕੀਮਤ 41.50 ਲੱਖ ਰੁਪਏ ਸੀ। ਮਾਰਕਫੈੱਡ ਦੇ ਇੱਕ ਅਮਲਾ ਅਫ਼ਸਰ ਵੱਲੋਂ ਗ਼ਲਤ ਟੀ.ਏ ਬਿੱਲ ਵਸੂਲੇ ਜਾਣ ਦਾ ਮਸਲਾ ਵੀ ਹੈਰਾਨੀ ਵਾਲਾ ਹੈ। ਰਿਪੋਰਟ ਅਨੁਸਾਰ ਇਸ ਅਧਿਕਾਰੀ ਨੇ 29 ਜੁਲਾਈ, 2017 ਤੋਂ 31 ਜੁਲਾਈ, 2017 ਤਕ ਡਲਹੌਜ਼ੀ ਯਾਤਰਾ ਲਈ ਟੈਕਸੀ ਦਾ ਬਿੱਲ 13,430 ਰੁਪਏ ਕਲੇਮ ਕੀਤਾ ਹੈ ਜਦਕਿ ਇਸ ਅਧਿਕਾਰੀ ਨੇ ਅਸਲ ਵਿੱਚ ਅਦਾਰੇ ਦੇ ਇੱਕ ਕਲਰਕ ਦੀ ਗੱਡੀ ਵਿੱਚ ਸਫ਼ਰ ਕੀਤਾ ਸੀ।

             ਇਸੇ ਤਰ੍ਹਾਂ ਇਸ ਅਮਲਾ ਅਫ਼ਸਰ ਨੇ 25 ਸਤੰਬਰ 2017 ਨੂੰ ਉੱਤਰ ਪ੍ਰਦੇਸ਼ ਦੀ ਯਾਤਰਾ ਕੀਤੀ ਅਤੇ ਕਾਰ ਨੰਬਰ ਪੀਬੀ65ਐਕਸ 7065 ਦਾ 19,600 ਰੁਪਏ ਕਲੇਮ ਵਸੂਲ ਕਰ ਲਿਆ ਜਦਕਿ ਇਸ ਟੈਕਸੀ ਦੇ ਮਾਲਕ ਨੇ ਤਾਂ ਪਹਿਲਾਂ ਹੀ ਹੁਸ਼ਿਆਰਪੁਰ ਦੇ ਇੱਕ ਵਿਅਕਤੀ ਨੂੰ ਆਪਣੀ ਕਾਰ ਵੇਚ ਦਿੱਤੀ ਸੀ। ਚੇਅਰਮੈਨ ਨੇ ਇਸ ਅਧਿਕਾਰੀ ਵੱਲੋਂ ਵਸੀਲਿਆਂ ਤੋਂ ਵੱਧ ਸੰਪਤੀ ਬਣਾਏ ਜਾਣ ’ਤੇ ਉਂਗਲ ਧਰੀ ਹੈ। ਗੁਪਤ ਪੱਤਰ ’ਚ ਮਾਰਕਫੈੱਡ ਵਿੱਚ ਸੀਨੀਅਰ ਸਹਾਇਕਾਂ ਦੀ ਭਰਤੀ ਵਿੱਚ ਘਪਲਾ ਹੋਣ ਦੀ ਗੱਲ ਵੀ ਆਖੀ ਗਈ ਹੈ ਅਤੇ ਮਾਰਕਫੈੱਡ ਦਾ ਇੱਕ ਕਰਮਚਾਰੀ ਇਸ ਘਪਲੇ ਵਿੱਚ ਮੁਅੱਤਲ ਵੀ ਕੀਤਾ ਜਾ ਚੁੱਕਾ ਹੈ। ਮਾਰਕਫੈੱਡ ਵਿੱਚ ਪੰਜਾਬ ਐਗਰੋ ਦੇ ਕਰੀਬ 50 ਅਧਿਕਾਰੀ ਡੈਪੂਟੇਸ਼ਨ ’ਤੇ ਕੰਮ ਕਰ ਰਹੇ ਹਨ। ਚੇਅਰਮੈਨ ਨੇ ਨੁਕਤਾ ਉਠਾਇਆ ਕਿ ਡੈਪੂਟੇਸ਼ਨ ਵਾਲਿਆਂ ’ਚੋਂ ਦੋ ਅਧਿਕਾਰੀਆਂ ਨੂੰ ਜ਼ਲ੍ਹਿਾ ਮੈਨੇਜਰ ਲਾਇਆ ਗਿਆ ਹੈ, ਜਿਸ ਕਰਕੇ ਮਾਰਕਫੈੱਡ ਦੇ ਆਪਣੇ ਅਧਿਕਾਰੀਆਂ ’ਚ ਰੋਸ ਹੈ।

             ਚੇਅਰਮੈਨ ਨੇ ਕਿਹਾ ਹੈ ਕਿ ਮਾਰਕਫੈੱਡ ਵਿੱਚ ਕਰਮਚਾਰੀਆਂ ਦਾ ਗੁੱਸਾ ਭੜਕਣ ਤੋਂ ਪਹਿਲਾਂ ਐੱਮ.ਡੀ ਨੂੰ ਲੋੜੀਂਦੀਆਂ ਹਦਾਇਤਾਂ ਵੀ ਕੀਤੀਆਂ ਜਾਣ। ਸੂਤਰ ਆਖਦੇ ਹਨ ਕਿ ਅਸਲ ਵਿੱਚ ਅੰਦਰਖਾਤੇ ਮਾਰਕਫੈੱਡ ਦੇ ਚੇਅਰਮੈਨ ਅਤੇ ਸਹਿਕਾਰਤਾ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਦਰਮਿਆਨ ਖੜਕੀ ਹੋਈ ਹੈ, ਜਿਸ ਕਾਰਨ ਇਹ ਸ਼ਿਕਾਇਤ ਮੁੱਖ ਮੰਤਰੀ ਤਕ ਪੁੱਜੀ ਹੈ। ਜਾਣਕਾਰੀ ਅਨੁਸਾਰ ਮਾਰਕਫੈੱਡ ਦੇ ਅਧਿਕਾਰੀ ਹੁਣ ਮੁੱਖ ਮੰਤਰੀ ਵੱਲੋਂ ਮੰਗੀ ਰਿਪੋਰਟ ਦਾ ਜੁਆਬ ਤਿਆਰ ਕਰਨ ’ਚ ਉਲਝੇ ਹੋਏ ਹਨ।ਚੇਅਰਮੈਨ ਅਮਰਜੀਤ ਸਮਰਾ ਦਾ ਕਹਿਣਾ ਸੀ ਕਿ ਪੜਤਾਲ ਨੂੰ ਮੁਕੰਮਲ ਹੋ ਲੈਣ ਦਿਓ ਅਤੇ ਮੰਤਰੀ ਨੂੰ ਇਸ ਬਾਰੇ ਪਤਾ ਹੀ ਹੈ ਪਰ ਉਨ੍ਹਾਂ ਦੀ ਕਿਸੇ ਨਾਲ ਰੱਫੜ ਹੋਣ ਵਾਲੀ ਕੋਈ ਗੱਲ ਨਹੀਂ।

                                        ਮਾਮਲਾ ਧਿਆਨ ’ਚ ਨਹੀਂ: ਰੰਧਾਵਾ

ਸਹਿਕਾਰਤਾ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ ਧਿਆਨ ਵਿੱਚ ਅਜਿਹਾ ਕੋਈ ਮਾਮਲਾ ਨਹੀਂ ਆਇਆ। ਜੇ ਕੋਈ ਸ਼ਿਕਾਇਤ ਆਵੇਗੀ ਤਾਂ ਉਹ ਪੜਤਾਲ ਕਰਾ ਲੈਣਗੇ। ਜੋ ਜ਼ਿੰਮੇਵਾਰ ਹੋਇਆ, ਉਸ ਖ਼ਿਲਾਫ਼ ਕਾਰਵਾਈ ਕਰਨਗੇ। ਬਤੌਰ ਮੰਤਰੀ ਉਹ ਫੰਡਾਂ ਦਾ ਪ੍ਰਬੰਧ ਕਰਦੇ ਹਨ ਅਤੇ ਅਦਾਰਿਆਂ ਦੀ ਸਥਿਤੀ ਬਿਹਤਰ ਬਣਾਉਣ ਲਈ ਕੰਮ ਕਰਦੇ ਹਨ। ਉਨ੍ਹਾਂ ਦਾ ਕਿਸੇ ਨਾਲ ਕੋਈ ਨਿੱਜੀ ਵਿਗਾੜ ਨਹੀਂ ਹੈ।