ਸਿੱਧੀ ਸੜਕ 'ਬਾਦਲ' ਨੂੰ ਜਾਵੇ....।
ਚਰਨਜੀਤ ਭੁੱਲਰ
ਬਠਿੰਡਾ  :ਮੁੱਖ ਮੰਤਰੀ ਪੰਜਾਬ ਦੇ ਪਿੰਡ ਬਾਦਲ ਲਈ ਚਹੁਮਾਰਗੀ ਵੀ.ਆਈ.ਪੀ ਸੜਕ ਬਣ ਰਹੀ ਹੈ। ਖਰਚਾ ਆਏਗਾ 40 ਕਰੋੜ ਰੁਪਏ। ਵੀ.ਆਈ.ਪੀ ਪਿੰਡ ਲਈ ਪਹਿਲਾਂ ਇੱਕ ਓਵਰ ਬਰਿੱਜ ਬਣ ਰਿਹਾ ਹੈ ਜਿਸ 'ਤੇ 23 ਕਰੋੜ ਖਰਚੇ ਜਾ ਰਹੇ ਹਨ । ਜਦੋਂ ਕਿ ਪਵਿੱਤਰ ਸ਼ਹਿਰਾਂ ਵਾਲੀ ਸੜਕ ਨੂੰ ਏਜੰਡੇ ਚੋਂ ਬਾਹਰ ਕਰ ਦਿੱਤਾ ਗਿਆ ਹੈ। ਪਿੰਡ ਬਾਦਲ ਲਈ ਵੀ.ਆਈ.ਪੀ ਓਵਰ ਬਰਿੱਜ ਬਠਿੰਡਾ-ਬੀਕਾਨੇਰ ਰੇਲ ਮਾਰਗ 'ਤੇ ਬਣ ਰਿਹਾ ਹੈ । ਲੋਕ ਨਿਰਮਾਣ ਵਿਭਾਗ ਵਲੋਂ ਜੋ ਕੇਂਦਰ ਸਰਕਾਰ ਨੂੰ 'ਕੇਂਦਰੀ ਸੜਕ ਫੰਡ' ਲਈ ਤਜਵੀਜ਼ ਭੇਜੀ ਸੀ, ਉਸ 'ਚ ਰਾਮਪੁਰਾ ਤੋਂ ਪਵਿੱਤਰ ਸ਼ਹਿਰ ਤਖਤ ਦਮਦਮਾ ਸਾਹਿਬ ਵਾਲੀ ਸੜਕ ਨੂੰ ਇੱਕ ਨੰਬਰ 'ਤੇ ਰੱਖਿਆ ਗਿਆ ਸੀ। ਹੁਣ ਕੇਂਦਰ ਤੋਂ 'ਕੇਂਦਰੀ ਸੜਕ ਫੰਡ' ਤਹਿਤ ਸੜਕਾਂ ਨੂੰ ਹਰੀ ਝੰਡੀ ਮਿਲੀ ਹੈ,ਉਸ ਚੋਂ ਰਾਮਪੁਰਾ-ਤਲਵੰਡੀ ਵਾਇਆ ਮੌੜ ਮੰਡੀ ਵਾਲੀ ਸੜਕ ਨੂੰ ਬਾਹਰ ਕਰ ਦਿੱਤਾ ਗਿਆ ਹੈ। ਹਾਲਾਂਕਿ ਇਸ ਸੜਕ ਦਾ ਬੁਰਾ ਹਾਲ ਹੈ ਅਤੇ ਵੱਡੇ ਵੱਡੇ ਖੱਡੇ ਵੀ ਪਏ ਹੋਏ ਹਨ। ਬਠਿੰਡਾ-ਮੁਕਤਸਰ ਸੜਕ ਨੂੰ ਵੀ ਇਸੇ ਤਰ੍ਹਾਂ 'ਕੇਂਦਰੀ ਸੜਕ ਫੰਡ' ਨੂੰ ਭੇਜੀ ਤਜਵੀਜ਼ 'ਚ ਤਰਜੀਹੀ ਅਧਾਰ 'ਤੇ ਪਾਇਆ ਗਿਆ ਸੀ, ਉਸ ਸੜਕ ਨੂੰ ਵੀ ਬਾਹਰ ਕਰ ਦਿੱਤਾ ਗਿਆ ਹੈ। ਇਨ੍ਹਾਂ ਦੀ ਥਾਂ 'ਤੇ ਬਠਿੰਡਾ-ਬਾਦਲ ਸੜਕ ਨੂੰ ਪਾ ਦਿੱਤਾ ਗਿਆ ਹੈ ਜਿਸ ਨੂੰ ਪ੍ਰਵਾਨਗੀ ਮਿਲ ਗਈ ਹੈ।
'ਕੇਂਦਰੀ ਸੜਕ ਫੰਡ' ਦੇ ਫੰਡਾਂ ਨਾਲ ਬਠਿੰਡਾ-ਬਾਦਲ ਸੜਕ 'ਤੇ ਪੈਂਦੇ ਪਿੰਡ ਘੁੱਦਾ ਤੱਕ ਚਹੁਮਾਰਗੀ ਸੜਕ ਬਣਾਈ ਜਾਣੀ ਦੀ ਪਹਿਲਾਂ ਯੋਜਨਾ ਸੀ ਕਿਉਂਕਿ ਪਿੰਡ ਘੁੱਦਾ 'ਚ ਕੇਂਦਰੀ 'ਵਰਸਿਟੀ ਹੈ। ਇਹ ਸੜਕ 7 ਮੀਟਰ ਚੌੜੀ ਹੈ ਜਿਸ ਨੂੰ ਹੁਣ 14 ਮੀਟਰ ਕੀਤਾ ਜਾਣਾ ਹੈ। ਬਠਿੰਡਾ ਤੋਂ ਪਿੰਡ ਘੁੱਦਾ ਤੱਕ ਇਹ ਸੜਕ 12 ਕਿਲੋਮੀਟਰ ਤੱਕ ਹੈ ਜਿਸ ਨੂੰ ਚਹੁਮਾਰਗੀ ਕਰਨ  'ਤੇ 18.60 ਕਰੋੜ ਰੁਪਏ ਖਰਚ ਆਉਣੇ ਹਨ। ਪੰਜਾਬ ਸਰਕਾਰ ਵਲੋਂ ਹੁਣ ਪਿੰਡ ਘੁੱਦਾ ਤੋਂ ਪਿੰਡ ਬਾਦਲ ਤੱਕ ਵੀ ਸੜਕ ਨੂੰ  ਚਹੁਮਾਰਗੀ ਬਣਾਇਆ ਜਾਣਾ ਹੈ ਜਿਸ ਦੀ ਲੰਬਾਈ 9.80 ਕਿਲੋਮੀਟਰ ਹੈ ਜਿਸ 'ਤੇ 16.41 ਕਰੋੜ ਰੁਪਏ ਖਰਚ ਆਉਣਗੇ।  ਜਿਥੋਂ ਬਠਿੰਡਾ ਜ਼ਿਲ੍ਹੇ ਦੀ ਹਦੂਦ ਖਤਮ ਹੁੰਦੀ ਹੈ, ਉਸ ਤੋਂ ਲੈ ਕੇ ਪਿੰਡ ਬਾਦਲ ਵਿਚਦੀ ਕੌਮੀ ਹਾਈਵੇ 10 ਤੱਕ ਜੋ  ਸੜਕ ਬਣਾਈ ਜਾਣੀ ਹੈ,ਉਹ ਜ਼ਿਲ੍ਹਾ ਮੁਕਤਸਰ ਵਲੋਂ ਬਣਾਈ ਜਾਣੀ ਹੈ। ਮੁਕਤਸਰ ਜ਼ਿਲ੍ਹੇ ਵਲੋਂ 6.61 ਕਿਲੋਮੀਟਰ ਸੜਕ ਬਣਾਈ ਜਾਣੀ ਹੈ ਜਿਸ 'ਤੇ 4.83 ਕਰੋੜ ਰੁਪਏ ਖਰਚ ਆਉਣਗੇ। ਹਾਲਾਂਕਿ ਮੁਕਤਸਰ ਪ੍ਰਸ਼ਾਸਨ ਤਰਫੋਂ ਹੋਰ ਬਠਿੰਡਾ ਮੁਕਤਸਰ ਸੜਕ ਤੋਂ ਇਲਾਵਾ ਹੋਰ ਸੜਕਾਂ ਦੀ ਤਜਵੀਜ਼ ਭੇਜੀ ਗਈ ਸੀ ਪ੍ਰੰਤੂ ਉਪਰੋਂ ਕੇਵਲ ਵੀ.ਆਈ.ਪੀ ਸੜਕ ਨੂੰ ਹੀ ਪ੍ਰਵਾਨਗੀ ਮਿਲੀ ਹੈ। ਬਠਿੰਡਾ ਬਾਦਲ ਸੜਕ 'ਤੇ ਹਾਲਾਂਕਿ ਟਰੈਫਿਕ ਕੋਈ ਜਿਆਦਾ ਨਹੀਂ ਹੈ।
ਦੂਸਰੀ ਤਰਫ ਰਾਮਪੁਰਾ-ਤਲਵੰਡੀ ਸਾਬੋ ਸੜਕ ਦਾ ਬੁਰਾ ਹਾਲ ਹੈ ਜਿਸ ਨੂੰ ਚੌੜਾ ਅਤੇ ਮਜ਼ਬੂਤ ਕਰਨ ਦਾ 45 ਕਰੋੜ ਰੁਪਏ ਦਾ ਪ੍ਰੋਜੈਕਟ ਤਿਆਰ ਕਰਕੇ ਭੇਜਿਆ ਗਿਆ ਸੀ। ਇਸ ਸੜਕ ਦੀ ਲੰਬਾਈ 39.40 ਕਿਲੋਮੀਟਰ ਹੈ। ਕਾਫੀ ਮਹੀਨਿਆਂ ਤੋਂ ਇਸ ਸੜਕ 'ਤੇ ਹਾਦਸੇ ਵੀ ਵਾਪਰ ਰਹੇ ਹਨ। ਦਰਜ਼ਨਾਂ ਪਿੰਡਾਂ ਦੇ ਲੋਕਾਂ ਨੂੰ ਕਾਫੀ ਤੰਗੀ ਵੀ ਝੱਲਣੀ ਪੈਂਦੀ ਹੈ। ਤੇਲ ਸੋਧਕ ਕਾਰਖਾਨੇ ਵਾਲਾ ਟਰੈਫਿਕ ਵੀ ਇਸੇ ਸੜਕ ਉਪਰੋਂ ਗੁਜਰਦਾ ਹੈ। ਇਸ ਦੇ ਬਾਵਜੂਦ ਇਸ ਸੜਕ ਨੂੰ 'ਕੇਂਦਰੀ ਸੜਕ ਫੰਡ' ਚੋਂ ਬਾਹਰ ਕੱਢ ਦਿੱਤਾ ਗਿਆ ਅਤੇ ਇਸ ਦੀ ਥਾਂ 'ਤੇ ਬਠਿੰਡਾ ਬਾਦਲ ਵੀ.ਆਈ.ਪੀ ਸੜਕ ਨੂੰ ਪਾ ਦਿੱਤਾ ਗਿਆ ਹੈ। ਗਿੱਦੜਬਹਾ ਸਬ ਡਵੀਜ਼ਨ ਵਲੋਂ ਬਠਿੰਡਾ ਤੋਂ ਮੁਕਤਸਰ ਵਾਲੀ ਸੜਕ ਦੇ ਕਰੀਬ 18 ਕਿਲੋਮੀਟਰ ਹਿੱਸੇ ਨੂੰ ਚੌੜਾ ਕਰਨ ਦੀ ਤਜਵੀਜ਼ ਭੇਜੀ ਸੀ ਪ੍ਰੰਤੂ ਮੁਕਤਸਰ ਦੀ ਇਕੱਲੀ ਪਿੰਡ ਬਾਦਲ ਵਾਲੀ ਸੜਕ ਤੋਂ ਬਿਨ੍ਹਾਂ ਕਿਸੇ ਵੀ ਸੜਕ ਨੂੰ ਕੇਂਦਰ ਸਰਕਾਰ ਵਲੋਂ ਪ੍ਰਵਾਨਗੀ ਨਹੀਂ ਦਿੱਤੀ ਗਈ ਹੈ। ਨਾਗਰਿਕ ਚੇਤਨਾ ਮੰਚ ਦੇ ਸ੍ਰੀ ਬੱਗਾ ਸਿੰਘ ਅਤੇ ਜਗਮੋਹਨ ਕੌਸਲ ਦਾ ਕਹਿਣਾ ਸੀ ਕਿ ਵੀ.ਆਈ.ਪੀ ਲੋਕ ਆਪਣੀ ਸੁੱਖ ਸੁਵਿਧਾ ਲਈ ਲੋੜਬੰਦ ਪ੍ਰੋਜੈਕਟਾਂ ਨੂੰ ਤਜਵੀਜ਼ਾਂ ਚੋਂ ਕਿਵੇਂ ਬਾਹਰ ਕਰਾ ਦਿੰਦੇ ਹਨ, ਉਸ ਦੀ ਇਹ ਮਿਸਾਲ ਹੈ। ਉਨ੍ਹਾਂ ਆਖਿਆ ਕਿ ਸਰਕਾਰ ਲੋਕਾਂ ਦੀਆਂ ਮੁਸ਼ਕਲਾਂ ਨੂੰ ਦੇਖ ਕੇ ਤਰਜੀਹਾਂ ਬਣਾਏ। ਉਨ੍ਹਾਂ ਆਖਿਆ ਕਿ ਟੁੱਟੀਆਂ ਸੜਕਾਂ ਦੀ ਮੁਰੰਮਤ ਸਰਕਾਰ ਦੀ ਪਹਿਲ ਹੋਣੀ ਚਾਹੀਦੀ ਹੈ।
   ਸਰਕਾਰ ਨੇ ਪੂਰੀ ਵਾਹ ਲਾਈ ਸੀ- ਐਕਸੀਅਨ।
ਲੋਕ ਨਿਰਮਾਣ ਵਿਭਾਗ ਦੇ ਐਕਸੀਅਨ ਸ੍ਰੀ ਕੁਲਬੀਰ ਸਿੰਘ ਸੰਧੂ ਦਾ ਕਹਿਣਾ ਸੀ ਕਿ 'ਕੇਂਦਰੀ ਸੜਕ ਫੰਡ' ਨੂੰ ਭੇਜੀ ਤਜਵੀਜ਼ 'ਚ  ਰਾਮਪੁਰਾ  ਤਲਵੰਡੀ ਸੜਕ ਨੂੰ ਪ੍ਰਵਾਨਗੀ ਨਹੀਂ ਮਿਲ ਸਕੀ ਹੈ ਕਿਉਂਕਿ 'ਕੇਂਦਰੀ ਸੜਕ ਫੰਡ' ਦੇ ਐਲੋਕੇਸ਼ਨ ਪਲਾਨ 'ਚ ਇਹ ਪੂਰੀ ਸੜਕ ਆ ਨਹੀਂ ਰਹੀ ਸੀ ਜਦੋਂ ਕਿ ਸਰਕਾਰ ਤਰਫੋਂ ਇਸ ਨੂੰ ਪ੍ਰਵਾਨ ਕਰਾਉਣ ਲਈ ਪੂਰਾ ਜ਼ੋਰ ਲਗਾਇਆ ਗਿਆ ਸੀ। ਉਨ੍ਹਾਂ ਦੱਸਿਆ ਕਿ ਘੁੱਦਾ ਤੋਂ ਪਿੰਡ ਬਾਦਲ ਤੱਕ ਚਹੁਮਾਰਗੀ ਸੜਕ ਬਣਾਈ ਜਾ ਰਹੀ ਹੈ ਜਿਸ ਨੂੰ ਇਸ ਪਲਾਟ 'ਚ ਪ੍ਰਵਾਨਗੀ ਮਿਲ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਸਰਕਾਰ ਹੁਣ ਰਾਮਪੁਰਾ ਤਲਵੰਡੀ ਸੜਕ ਨੂੰ ਕਿਸੇ ਹੋਰ ਫੰਡਾਂ ਨਾਲ ਬਣਾਉਣ ਦੀ ਯੋਜਨਾ ਬਣਾ ਰਹੀ ਹੈ।