‘ਆਪਣਿਆਂ’ ਦੇ ਹੀ ਦਰਸ਼ਨ ਕਰਵਾਉਂਦੇ ਰਹੇ ਅਕਾਲੀ ਕੌਂਸਲਰ

Posted On February - 20 - 2011

ਕਾਂਗਰਸੀ ਕੌਂਸਲਰਾਂ ਨੂੰ ਨਾ ਸੱਦਿਆ

ਬਠਿੰਡਾ ਵਿੱਚ ਸੰਗਤ ਦਰਸ਼ਨ ਪ੍ਰੋਗਰਾਮ ਦੌਰਾਨ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਤੇ ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਮੀਡੀਆ ਨੂੰ ਸੰਬੋਧਨ ਕਰਦੇ ਹੋਏ (ਫੋਟੋ:ਪਵਨ ਸ਼ਰਮਾ)

ਨਿੱਜੀ ਪੱਤਰ ਪ੍ਰੇਰਕ
ਬਠਿੰਡਾ ,19 ਫਰਵਰੀ
ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਤੇ ਮੈਂਬਰ ਪਾਰਲੀਮੈਂਟ ਬੀਬੀ ਹਰਸਿਮਰਤ ਕੌਰ ਬਾਦਲ ਨੇ ਅੱਜ ਬਠਿੰਡਾ ਸ਼ਹਿਰ ’ਚ ਸਾਂਝਾ ਸੰਗਤ ਦਰਸ਼ਨ ਕਰਕੇ ‘ਆਪਣਿਆਂ’ ਦੇ ਦਰਸ਼ਨ ਕੀਤੇ। ਸ਼ਹਿਰ ਦੇ ਖਾਲਸਾ ਸਕੂਲ ਦੇ ਕੈਂਪਸ ਵਿੱਚ ਅੱਜ ਸੰਗਤ ਦਰਸ਼ਨ ਪ੍ਰੋਗਰਾਮਾਂ ਵਿੱਚ ਅਕਾਲੀ ਕੌਂਸਲਰ ਆਪਣੇ ‘ਖਾਸ’ ਆਦਮੀਆਂ ਸਮੇਤ ਆਪੋ-ਆਪਣੇ ਵਾਰਡ ਦੀ ਮੁਸ਼ਕਲ ਦੱਸਣ ਲਈ ਪੁੱਜੇ। ਸ਼ਹਿਰ ਦੇ 50 ਵਾਰਡ ਹਨ। ਜਿਨ੍ਹਾਂ ਵਾਰਡਾਂ ’ਚ ਕਾਂਗਰਸੀ ਕੌਂਸਲਰ ਜਿੱਤੇ ਹੋਏ ਹਨ, ਉਨ੍ਹਾਂ ਕੌਂਸਲਰਾਂ ਨੂੰ ਸੱਦਿਆ ਨਹੀਂ ਗਿਆ ਬਲਕਿ ਉਨ੍ਹਾਂ ਚੁਣੇ ਪ੍ਰਤੀਨਿਧਾਂ ਦੀ ਥਾਂ ਹਾਰੇ ਹੋਏ ਪਾਰਟੀ ਉਮੀਦਵਾਰਾਂ ਨੂੰ ਸੰਗਤ ਦਰਸ਼ਨਾਂ ’ਚ ਬੁਲਾਇਆ ਗਿਆ। ਸਕੂਲ ਕੈਂਪਸ ਵਿੱਚ ਸੰਗਤ ਦਰਸ਼ਨ ਪ੍ਰੋਗਰਾਮ ਵਿੱਚ ਪੁੱਜਣ ਲਈ ਚਾਰ ਥਾਵਾਂ ’ਤੇ ਪੁਲੀਸ ਰੋਕਾਂ ਸਨ ਅਤੇ ਆਖਰੀ ਰੋਕਾਂ ਤੋਂ ਲੰਘਣ ਵਾਸਤੇ ਕੌਂਸਲਰ ਦੀ ਸਹਿਮਤੀ ਜ਼ਰੂਰੀ ਹੁੰਦੀ ਸੀ। ਵਾਰਡ ਨੰਬਰ ਅੱਠ ਦੀ ਆਸ਼ਾ ਰਾਣੀ ਜੋ ਤਿੰਨ ਦਿਨ ਪਹਿਲਾਂ ਉਪ ਮੁੱਖ ਮੰਤਰੀ ਨੂੰ ਮਿਲਣ ਦੀ ਕੋਸ਼ਿਸ਼ ਕਰਦਿਆਂ ਪੁਲੀਸ ਦੀ ਖਿੱਚ ਧੂਹ ਦਾ ਸ਼ਿਕਾਰ ਹੋ ਚੁੱਕੀ ਹੈ, ਅੱਜ ਪੂਰਾ ਦਿਨ ਸੰਗਤ ਦਰਸ਼ਨ ’ਚ ਪੇਸ਼ ਹੋਣ ਵਾਸਤੇ ਬੈਠੀ ਰਹੀ। ਉਸ ਨੂੰ ਮਿਲਾਉਣਾ ਤਾਂ ਦੂਰ ਦੀ ਗੱਲ, ਪੁਲੀਸ ਨੇ ਉਸ ’ਤੇ ਦੋ ਮਹਿਲਾ ਮੁਲਾਜ਼ਮਾਂ ਦਾ ਪਹਿਰਾ ਲਾ ਦਿੱਤਾ। ਪਤਾ ਲੱਗਾ ਹੈ ਕਿ ਮਗਰੋਂ ਉਹ ਮਹਿਲਾ ਗੋਨਿਆਣਾ ਮੰਡੀ ’ਚ ਉਪ ਮੁੱਖ ਮੰਤਰੀ ਨੂੰ ਮਿਲਣ ’ਚ ਕਾਮਯਾਬ ਹੋ ਸਕੀ।
ਸ੍ਰੀ ਬਾਦਲ ਦਾ ਕਹਿਣਾ ਸੀ ਕਿ ਲੋਕ ਜਨਤਕ ਮੁਸ਼ਕਲਾਂ ਉਨ੍ਹਾਂ ਕੋਲ ਰੱਖ ਰਹੇ ਹਨ ਅਤੇ ਉਹ ਸਬੰਧਤ ਅਫਸਰਾਂ ਨੂੰ ਫੌਰੀ ਹੱਲ ਕਰਨ ਦੀ ਹਦਾਇਤ ਕਰ ਰਹੇ ਹਨ। ਬਹੁਤੇ ਲੋਕਾਂ ਵੱਲੋਂ ਸੀਵਰੇਜ, ਪੀਣ ਵਾਲੇ ਪਾਣੀ, ਨਿਕਾਸੀ ਤੇ ਸੜਕਾਂ ਆਦਿ ਦੇ ਮਸਲੇ ਸੰਗਤ ਦਰਸ਼ਨ ’ਚ ਰੱਖੇ ਗਏ। ਕਾਫੀ ਲੋਕਾਂ ਨੇ ਆਪਣੇ ਨਿੱਜੀ ਮਸਲੇ ਵੀ ਰੱਖੇ। ਅੱਜ ਦੇ ਪ੍ਰੋਗਰਾਮਾਂ ਦੌਰਾਨ ਜ਼ਿਲ੍ਹੇ ਦੇ ਸਾਰੇ ਅਧਿਕਾਰੀ ਹਾਜ਼ਰ ਰਹੇ। ਅੱਜ ਸਵੇਰ ਵੇਲੇ ਮੈਂਬਰ ਪਾਰਲੀਮੈਂਟ ਬੀਬਾ ਬਾਦਲ ਨੇ ਸੰਗਤ ਦਰਸ਼ਨ ਪ੍ਰੋਗਰਾਮ ਸ਼ੁਰੂ ਕੀਤਾ ਅਤੇ ਦੁਪਹਿਰ ਤੋਂ ਪਹਿਲਾਂ ਉਪ ਮੁੱਖ ਮੰਤਰੀ ਵੀ ਪੁੱਜ ਗਏ ਸਨ। ਮਿਲਣ ਵਾਲੇ ਜ਼ਿਆਦਾ ਲੋਕ ਅਕਾਲੀ-ਭਾਜਪਾ ਨਾਲ ਸਬੰਧ ਰੱਖਣ ਵਾਲੇ ਹੀ ਸਨ।
ਨਗਰ ਨਿਗਮ ਦੇ ਸੀਨੀਅਰ ਡਿਪਟੀ ਮੇਅਰ ਤਰਸੇਮ ਗੋਇਲ ਜੋ ਭਾਜਪਾ ਆਗੂ ਹਨ, ਨੂੰ ਵੀ ਪੁਲੀਸ ਨੇ ਇਕ ਦਫ਼ਾ ਰੋਕ ਲਿਆ ਸੀ। ਜੋ ਸ਼ਹਿਰੋਂ ਬਾਹਰ ਦੇ ਲੋਕ ਆਏ ਹੋਏ ਸਨ, ਉਨ੍ਹਾਂ ਨੂੰ ਵੀ ਮਿਲਣ ਨਾ ਦਿੱਤਾ ਗਿਆ।
ਪਿੰਡ ਪੂਹਲੀ ਤੋਂ ਆਏ ਇਕ ਮਜ਼ਦੂਰ ਨੂੰ ਆਪਣੀ ਧੀ ਸਮੇਤ ਖਾਲੀ ਹੱਥ ਵਾਪਸ ਪਰਤਣਾ ਪਿਆ। ਪ੍ਰੋਗਰਾਮਾਂ ਮੌਕੇ ਅਕਾਲੀ ਦਲ ਦੇ ਹਲਕਾ ਇੰਚਾਰਜ ਸਰੂਪ ਚੰਦ ਸਿੰਗਲਾ, ਨਗਰ ਨਿਗਮ ਦੇ ਮੇਅਰ ਬਲਜੀਤ ਸਿੰਘ ਬੀੜ ਬਹਿਮਣ, ਅਕਾਲੀ ਦਲ ਦੇ ਜ਼ਿਲ੍ਹਾ ਪ੍ਰਧਾਨ ਤੇ ਸਾਬਕਾ ਮੰਤਰੀ ਸਿਕੰਦਰ ਸਿੰਘ ਮਲੂਕਾ, ਸਾਬਕਾ ਮੰਤਰੀ ਚਿਰੰਜੀ ਲਾਲ ਗਰਗ, ਓ.ਐਸ.ਡੀ. ਮੁਨੀਸ਼ ਕੁਮਾਰ, ਭਾਜਪਾ ਦਿਹਾਤੀ ਦੇ ਪ੍ਰਧਾਨ ਦਿਆਲ ਸੋਢੀ, ਨਿਗਮ ਦੇ ਸੀਨੀਅਰ ਡਿਪਟੀ ਮੇਅਰ ਤਰਸੇਮ ਗੋਇਲ, ਸ਼ਹਿਰੀ ਪ੍ਰਧਾਨ ਦਲਜੀਤ ਸਿੰਘ ਬਰਾੜ, ਕੌਂਸਲਰ ਨਿਰਮਲ ਸਿੰਘ ਸੰਧੂ, ਆਈ.ਜੀ. ਨਿਰਮਲ ਸਿੰਘ ਢਿੱਲੋਂ ਮੌਜੂਦ ਸਨ। ਕਾਂਗਰਸੀ ਕੌਂਸਲਰ ਤੇ ਨਗਰ ਸੁਧਾਰ ਟਰੱਸਟ ਦੇ ਸਾਬਕਾ ਚੇਅਰਮੈਨ ਜਗਰੂਪ ਸਿੰਘ ਗਿੱਲ ਦਾ ਕਹਿਣਾ ਸੀ ਕਿ ਸਰਕਾਰ ਵੱਲੋਂ ਵੋਟਾਂ ਖਾਤਰ ਸੰਗਤ ਦਰਸ਼ਨ ਕੀਤੇ ਗਏ ਹਨ ਜਿਸ ’ਚ ਆਮ ਲੋਕਾਂ ਨੂੰ ਤਾਂ ਦੂਰ ਹੀ ਰੱਖਿਆ ਗਿਆ ਹੈ।

ਕੇਂਦਰੀ ਸਹਾਇਤਾ ਚੈੱਕ ਸੌਂਪਣ ਲਈ ਬੱਚਿਆਂ ਨੂੰ ਸੱਦਿਆ

ਬਠਿੰਡਾ ਜ਼ਿਲ੍ਹੇ ਦੇ ਦੋ ਸਰਕਾਰੀ ਸਕੂਲਾਂ ਦੇ ਛੋਟੇ ਛੋਟੇ ਬੱਚਿਆਂ ਨੂੰ ਵੀ ‘ਸੰਗਤ ਦਰਸ਼ਨ’ ਪ੍ਰੋਗਰਾਮਾਂ ’ਚ ਲਿਆਂਦਾ ਗਿਆ। ਪਿੰਡ ਬੱਜੋਆਣਾ ਦੇ ਪ੍ਰਾਇਮਰੀ ਸਕੂਲ ’ਚੋਂ ਪੰਜ ਤੇ ਸ਼ਹਿਰ ਦੇ ਪਰਸ ਰਾਮ ਨਗਰ ਦੇ ਪ੍ਰਾਇਮਰੀ ਸਕੂਲ ’ਚੋਂ 23 ਬੱਚਿਆਂ ਨੂੰ ਪ੍ਰੋਗਰਾਮਾਂ ’ਚ ਅਧਿਆਪਕਾਂ ਵੱਲੋਂ ਲਿਆਂਦਾ ਗਿਆ। ਇਨ੍ਹਾਂ ਬੱਚਿਆਂ ਦੇ ਸਕੂਲਾਂ ’ਚ ਕੇਂਦਰ ਸਰਕਾਰ ਦੀ ਘੱਟ ਗਿਣਤੀ ਸਕੀਮ ਦੇ ਵਜ਼ੀਫੇ ਵਾਲੇ ਚੈੱਕ ਪਹਿਲਾਂ ਹੀ ਪੁੱਜ ਗਏ ਸਨ। ਅੱਜ ਅਧਿਆਪਕ ਨਾਲ ਹੀ ਚੈੱਕ ਲੈ ਕੇ ਆਏ ਅਤੇ ਉਨ੍ਹਾਂ ਨੇ ਇਹ ਚੈੱਕ ਬੀਬੀ ਹਰਸਿਮਰਤ ਕੌਰ ਬਾਦਲ ਨੂੰ ਫੜਾ ਦਿੱਤੇ ਜਿਨ੍ਹਾਂ ਨੇ ਮੋੜਵੇਂ ਰੂਪ ’ਚ ਬੱਚਿਆਂ ਨੂੰ ਵੰਡ ਦਿੱਤੇ। ਜ਼ਿਲ੍ਹਾ ਸਿੱਖਿਆ ਅਫਸਰ (ਐਲੀਮੈਂਟਰੀ) ਮਲਕੀਤ ਕੌਰ ਦਾ ਕਹਿਣਾ ਸੀ ਕਿ ਚੈੱਕ ਦਿਵਾਉਣ ਨਾਲ ਬੱਚਿਆਂ ਦਾ ਮਾਣ ਹੋ ਜਾਂਦਾ ਹੈ।