ਬਾਦਲਾਂ ਦਾ ਬਠਿੰਡਾ ’ਚ ਗੇੜੇ ’ਤੇ ਗੇੜਾ

Posted On February - 13 - 2011

ਚਰਨਜੀਤ ਭੁੱਲਰ
ਬਠਿੰਡਾ, 12 ਫਰਵਰੀ
ਬਾਦਲ ਪਰਿਵਾਰ ਦੀ ਬਠਿੰਡਾ ਵਿੱਚ ਪੰਜਾਬ ਦੇ ਬਾਕੀ ਹਿੱਸਿਆਂ ਨਾਲੋਂ ਸਭ ਤੋਂ ਵੱਧ ਸਰਗਰਮੀ ਹੈ। ਬਾਦਲ ਪਰਿਵਾਰ ਦੇ ਸਭ ਤੋਂ ਵੱਧ ਗੇੜੇ ਬਠਿੰਡਾ ਦੇ ਹਨ।
ਸੂਚਨਾ ਦੇ ਅਧਿਕਾਰ ਤਹਿਤ ਜੋ ਵੇਰਵੇ ਪ੍ਰਾਪਤ ਹੋਏ ਹਨ, ਉਨ੍ਹਾਂ ਅਨੁਸਾਰ ਅਕਾਲੀ ਹਕੂਮਤ ਬਣਨ ਮਗਰੋਂ ਹੁਣ ਤੱਕ 45 ਮਹੀਨਿਆਂ ਵਿੱਚ ‘ਬਾਦਲ ਪਰਿਵਾਰ’ ਵੱਲੋਂ ਔਸਤਨ ਹਰ ਚੌਥੇ ਦਿਨ ਬਠਿੰਡਾ ਦਾ ਗੇੜਾ ਲਾਇਆ ਗਿਆ ਹੈ। ਮੁੱਖ ਮੰਤਰੀ ਪੰਜਾਬ ਪ੍ਰਕਾਸ਼ ਸਿੰਘ ਬਾਦਲ ਦੇ ਬਠਿੰਡਾ ਵਿਚਲੇ ਵੀ.ਆਈ.ਪੀ. ਦੌਰੇ ਦੀ ਗੱਲ ਕਰੀਏ ਤਾਂ ਮੁੱਖ ਮੰਤਰੀ ਨੇ ਔਸਤਨ ਹਰ ਅੱਠਵੇਂ ਦਿਨ ਬਠਿੰਡਾ ਦਾ ਫੇਰਾ ਪਾਇਆ ਹੈ ਜਦੋਂ ਕਿ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੇ ਔਸਤਨ ਹਰ ਨੌਵੇਂ ਦਿਨ ਬਠਿੰਡਾ ਦਾ ਚੱਕਰ ਕੱਟਿਆ ਹੈ। ਡਿਪਟੀ ਕਮਿਸ਼ਨਰ ਬਠਿੰਡਾ ਨੇ 9 ਫਰਵਰੀ, 2011 ਨੂੰ ਪੱਤਰ ਨੰਬਰ 309/ ਆਰ.ਟੀ.ਆਈ ਤਹਿਤ ਵੀ.ਆਈ.ਪੀ ਦੌਰਿਆਂ ਦੇ ਵੇਰਵੇ ਦਿੱਤੇ ਹਨ। ਮੁੱਖ ਮੰਤਰੀ ਪੰਜਾਬ ਨੇ ਪਿਛਲੇ ਕਰੀਬ ਪੌਣੇ ਚਾਰ ਸਾਲਾਂ ਵਿੱਚ 153 ਦਿਨ ਬਠਿੰਡਾ ਜ਼ਿਲ੍ਹੇ ਦਾ ਦੌਰਾ ਕੀਤਾ ਹੈ ਜਦੋਂ ਕਿ ਬਾਕੀ ਪੰਜਾਬ ਦੇ ਹਰ ਜ਼ਿਲ੍ਹੇ ਦੇ ਹਿੱਸੇ ਔਸਤਨ 63 ਦਿਨ ਹੀ ਆਏ ਹਨ। ਮੁੱਖ ਮੰਤਰੀ ਨੇ ਬਾਕੀ ਪੰਜਾਬ ਦੇ ਹਰ ਜ਼ਿਲ੍ਹੇ ’ਚ ਔਸਤਨ 22 ਦਿਨ ਦੇ ਗੇੜਾ ਲਾਇਆ ਹੈ ਜਦੋਂ ਕਿ ਬਠਿੰਡਾ ਜ਼ਿਲ੍ਹੇ ’ਚ ਹਰ ਅੱਠਵੇਂ ਦਿਨ।
‘ਬਾਦਲ ਪਰਿਵਾਰ’ ਦੀ ਗੱਲ ਕਰੀਏ ਤਾਂ ਹਰ ਜ਼ਿਲ੍ਹੇ ਦੇ ਹਿੱਸੇ ਔਸਤਨ ਇਸ ਪਰਿਵਾਰ ਦੇ 53 ਦਿਨ ਆਏ ਹਨ ਜਦੋਂ ਕਿ ਇਕੱਲੇ ਜ਼ਿਲ੍ਹਾ ਬਠਿੰਡਾ ਦੇ ਹਿੱਸੇ ਇਸ ਪਰਿਵਾਰ ਦੇ 337 ਦਿਨ ਆਏ ਹਨ। ਲੋਕ ਸਭਾ ਚੋਣਾਂ ਵਾਲੇ ਸਾਲ 2009 ’ਚ ‘ਬਾਦਲ ਪਰਿਵਾਰ’ ਦਾ ਸਭ ਤੋਂ ਜ਼ਿਆਦਾ ਗੇੜਾ ਬਠਿੰਡਾ ’ਚ ਰਿਹਾ ਹੈ ਕਿਉਂਕਿ ਇੱਥੋਂ ਬੀਬੀ ਹਰਸਿਮਰਤ ਕੌਰ ਬਾਦਲ ਚੋਣ ਮੈਦਾਨ ’ਚ ਸਨ। ਮੁੱਖ ਮੰਤਰੀ ਪੰਜਾਬ ਵੱਲੋਂ ਸਾਲ 2007 ’ਚ ਜ਼ਿਲ੍ਹਾ ਬਠਿੰਡਾ ’ਚ 20 ਵੀ.ਆਈ.ਪੀ. ਗੇੜ੍ਹੇ ਲਾਏ ਗਏ ਜਦੋਂ ਕਿ ਸਾਲ 2008 ’ਚ ਮੁੱਖ ਮੰਤਰੀ ਨੇ ਦੁਗਣੇ ਤੋਂ ਵੱਧ ਭਾਵ 46 ਗੇੜੇ ਲਾਏ। ਤੀਸਰੇ ਸਾਲ 2009 ’ਚ ਇਨ੍ਹਾਂ ਗੇੜਿਆਂ ਦੀ ਗਿਣਤੀ ਤਿੰਨ ਗੁਣਾ ਕਰੀਬ 59 ਹੋ ਗਈ ਸੀ। ਲੰਘੇ ਸਾਲ 2010 ’ਚ ਮੁੱਖ ਮੰਤਰੀ ਪੰਜਾਬ ਨੇ ਜ਼ਿਲ੍ਹਾ ਬਠਿੰਡਾ ’ਚ 28 ਦੌਰੇ ਕੀਤੇ ਹਨ। ਮੁੱਖ ਮੰਤਰੀ ਨੇ ਜ਼ਿਲ੍ਹਾ ਬਠਿੰਡਾ ’ਚ ਕੁੱਲ 153 ਗੇੜੇ ਲਾਏ ਹਨ। ਸੂਤਰ ਆਖਦੇ ਹਨ ਕਿ ਮੁੱਖ ਮੰਤਰੀ ਦਾ ਜ਼ਿਲ੍ਹਾ ਬਠਿੰਡਾ ਦਾ ਇਕ ਦੌਰਾ ਤਿੰਨ ਲੱਖ ਰੁਪਏ ’ਚ ਪੈਂਦਾ ਹੈ। ਪੰਜਾਬ ਸਰਕਾਰ ਦਾ ਇਸ ਹਿਸਾਬ ਨਾਲ ਇਕੱਲੇ ਜ਼ਿਲ੍ਹਾ ਬਠਿੰਡਾ ਦੇ ਦੌਰਿਆਂ ’ਤੇ 4.50 ਕਰੋੜ ਰੁਪਏ ਖਰਚ ਆਇਆ ਹੈ। ਸਾਲ 2010 ’ਚ ਮੁੱਖ ਮੰਤਰੀ ਦੇ ਬਠਿੰਡਾ ਜ਼ਿਲ੍ਹੇ ’ਚ ਗੇੜੇ ਘਟੇ ਹਨ ਜਦੋਂ ਕਿ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਸਾਲ 2010 ’ਚ ਜ਼ਿਲ੍ਹਾ ਬਠਿੰਡਾ ਦੇ ਗੇੜੇ ਵਧੇ ਹਨ।
ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਨੇ ਲੰਘੇ 45 ਮਹੀਨਿਆਂ ’ਚ ਜ਼ਿਲ੍ਹਾ ਬਠਿੰਡਾ ਵਿੱਚ 144 ਵੀ.ਆਈ.ਪੀ. ਦੌਰੇ ਕੀਤੇ ਹਨ। ਸਾਲ 2007 ਵਿੱਚ ਉਪ ਮੁੱਖ ਮੰਤਰੀ ਦੇ ਇਸ ਜ਼ਿਲ੍ਹੇ ’ਚ ਸੱਤ ਵੀ.ਆਈ.ਪੀ. ਦੌਰੇ ਸਨ ਜਦੋਂ ਕਿ ਸਾਲ 2008 ਵਿੱਚ ਇਹ ਦੌਰੇ 35 ਹੋ ਗਏ। ਸਾਲ 2009 ’ਚ ਸੁਖਬੀਰ ਸਿੰਘ ਬਾਦਲ ਦੇ ਬਠਿੰਡਾ ਜ਼ਿਲ੍ਹੇ ਦੇ ਗੇੜੇ 43 ਹੋ ਗਏ। ਸਾਲ 2009 ’ਚ ਉਪ ਮੁੱਖ ਮੰਤਰੀ ਨੇ ਜ਼ਿਲ੍ਹਾ ਬਠਿੰਡਾ ’ਚ 144 ਗੇੜੇ ਲਾਏ। ਔਸਤਨ ਹਰ ਨੌਵੇਂ ਦਿਨ ਸੁਖਬੀਰ ਬਾਦਲ ਬਠਿੰਡਾ ਜ਼ਿਲ੍ਹੇ ’ਚ ਆਏ। ਮੈਂਬਰ ਪਾਰਲੀਮੈਂਟ ਬੀਬੀ ਹਰਸਿਮਰਤ ਕੌਰ ਬਾਦਲ ਦੇ ਬਠਿੰਡਾ ਜ਼ਿਲ੍ਹੇ ’ਚ ਦੌਰੇ ਮਾਰਚ 2009 ਤੋਂ ਮਗਰੋਂ ਹੀ ਸ਼ੁਰੂ ਹੋਏ ਹਨ। ਹਰਸਿਮਰਤ ਕੌਰ ਬਾਦਲ ਨੇ ਸਾਲ 2009 ’ਚ 13 ਦੌਰੇ ਕੀਤੇ ਜਦੋਂ ਕਿ ਸਾਲ 2010 ’ਚ 27 ਦੌਰੇ ਕੀਤੇ ਹਨ। ਬੀਬੀ ਸÇੁਰੰਦਰ ਕੌਰ ਬਾਦਲ ਤੇ ਸਾਬਕਾ ਐਮ.ਪੀ. ਗੁਰਦਾਸ ਸਿੰਘ ਬਾਦਲ ਦੇ ਦੌਰਿਆਂ ਨੂੰ ਇਸ ਗਿਣਤੀ-ਮਿਣਤੀ ’ਚ ਸ਼ਾਮਲ ਨਹੀਂ ਕੀਤਾ ਗਿਆ। ਦਿਲਚਸਪ ਗੱਲ ਇਹ ਹੈ ਕਿ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ  ਅਪਰੈਲ, 2009 ਦੇ ਮਹੀਨੇ ਦੇ 30 ਦਿਨਾਂ ’ਚੋਂ 18 ਦਿਨ ਇਕੱਲੇ ਜ਼ਿਲ੍ਹਾ ਬਠਿੰਡਾ ’ਚ ਰਹੇ। ਬਾਦਲ ਪਰਿਵਾਰ ਵੱਲੋਂ ਬਠਿੰਡਾ ਨੂੰ ਨਵੀਂ ਹੱਦਬੰਦੀ ਹੋਣ ਮਗਰੋਂ ਅਪਣਾ ਲਿਆ ਗਿਆ ਸੀ। ਪ੍ਰਾਜੈਕਟਾਂ ਤੇ ਗਰਾਂਟਾਂ ਦੇ ਗੱਫੇ ਹੀ ਇਕੱਲੇ ਬਠਿੰਡਾ ਜ਼ਿਲ੍ਹੇ ਨੂੰ ਨਹੀਂ ਮਿਲੇ ਬਲਕਿ ਹਰ ਚੌਥੇ ਦਿਨ ਬਾਦਲ ਪਰਿਵਾਰ ਜ਼ਿਲ੍ਹਾ ਬਠਿੰਡਾ ’ਚ ਆਇਆ ਵੀ ਹੈ। ਦੂਸਰੇ ਪਾਸੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਜ਼ਿਲ੍ਹਾ ਬਠਿੰਡਾ ’ਚ ਅੱਠ ਦੌਰੇ ਕੀਤੇ ਹਨ। ਸਾਲ 2007 ’ਚ ਸਾਬਕਾ ਮੁੱਖ ਮੰਤਰੀ ਨੇ ਦੋ ਗੇੜੇ ਅਤੇ ਸਾਲ 2009 ’ਚ ਸਾਬਕਾ ਮੁੱਖ ਮੰਤਰੀ ਨੇ ਜ਼ਿਲ੍ਹਾ ਬਠਿੰਡਾ ਦੇ ਅੱਧੀ ਦਰਜਨ ਦੌਰੇ ਕੀਤੇ ਹਨ। ਸਾਲ 2008 ਅਤੇ ਸਾਲ 2010 ਦੌਰਾਨ ਕੈਪਟਨ ਅਮਰਿੰਦਰ ਸਿੰਘ ਜ਼ਿਲ੍ਹਾ ਬਠਿੰਡਾ ’ਚ ਆਏ ਹੀ ਨਹੀਂ। ਯੁਵਰਾਜ ਰਣਇੰਦਰ ਸਿੰਘ ਨੇ ਜ਼ਿਲ੍ਹਾ ਬਠਿੰਡਾ ਦੇ ਪਿਛਲੇ ਪੌਣੇ ਚਾਰ ਸਾਲਾਂ ’ਚ 21 ਗੇੜੇ ਲਾਏ ਹਨ ਜਦੋਂ ਕਿ ਕੇਂਦਰੀ ਮੰਤਰੀ ਪਰਨੀਤ ਕੌਰ ਨੇ ਸਾਲ 2009 ’ਚ ਜ਼ਿਲ੍ਹਾ ਬਠਿੰਡਾ ਦੇ ਦੋ ਚੱਕਰ ਲਾਏ ਹਨ।

ਪੁਲੀਸ ਨਿੱਤ ਦੇ ਗੇੜਿਆਂ ਤੋਂ ਔਖੀ

ਬਠਿੰਡਾ ਪੁਲੀਸ ਦੇ ਮੁਲਾਜ਼ਮਾਂ ਨੂੰ ਵੀ.ਆਈ.ਪੀ. ਗੇੜੇ ਬੜੇ ਮਹਿੰਗੇ ਪੈ ਰਹੇ ਹਨ। ਪੁਲੀਸ ਮੁਲਾਜ਼ਮ ਇਸ ਗੱਲੋਂ ਕਾਫੀ ਤੰਗ ਹਨ ਕਿ ਉਨ੍ਹਾਂ ਦਾ ਜ਼ਿਆਦਾ ਸਮਾਂ ਬਾਦਲ ਪਰਿਵਾਰ ਦੀ ਸੁਰੱਖਿਆ ’ਚ ਹੀ ਲੰਘਦਾ ਹੈ। ਜਦੋਂ ਕਾਂਗਰਸੀ ਰਾਜ ਭਾਗ ਸੀ ਤਾਂ ਉਦੋਂ ਬਠਿੰਡਾ ਪੁਲੀਸ ਨੂੰ ਟਾਵੀਂ ਹੀ ਵੀ.ਆਈ.ਪੀ. ਡਿਊਟੀ ਪਈ ਸੀ। ਹੁਣ ਅਕਾਲੀ ਰਾਜ ਭਾਗ ਆਉਣ ਮਗਰੋਂ ਵੀ.ਆਈ.ਪੀ. ਡਿਊਟੀ ’ਚ ਹੀ ਮੁਲਾਜ਼ਮ ਉਲਝੇ ਰਹਿੰਦੇ ਹਨ। ਬਹੁਤੇ ਮੁਲਾਜ਼ਮ ਤਾਂ ਸਰਦੀ ਦੇ ਦਿਨਾਂ ’ਚ ਬਿਮਾਰ ਵੀ ਰਹੇ ਹਨ। ਕਾਫੀ ਮੁਲਾਜ਼ਮ ਆਪਣੀ ਬਦਲੀ ਹੀ ਦੂਸਰੇ ਜ਼ਿਲ੍ਹਿਆਂ ’ਚ ਕਰਾ ਗਏ ਹਨ।