ਨਵਾਂ ਖ਼ੁਲਾਸਾ
          ਜ਼ਮਾਨਤਾਂ ਜ਼ਬਤ ਹੋਣੋ ਬਚਾਏਗਾ ਡੇਰਾ
                                ਚਰਨਜੀਤ ਭੁੱਲਰ
ਬਠਿੰਡਾ : ਡੇਰਾ ਸੱਚਾ ਸੌਦਾ ਸਿਰਸਾ ਦੇ ਸਿਆਸੀ ਵਿੰਗ ਨੇ ਵੋਟਾਂ ਪੈਣ ਮਗਰੋਂ ਭਵਿੱਖਬਾਣੀ ਕੀਤੀ ਹੈ ਕਿ ਐਤਕੀਂ ਡੇਰਾ ਸਿਰਸਾ ਇਨ•ਾਂ ਚੋਣਾਂ 'ਚ ਸ਼੍ਰੋਮਣੀ ਅਕਾਲੀ ਦਲ ਨੂੰ ਨਮੋਸ਼ੀ ਵਾਲੀ ਹਾਰ ਤੋਂ ਬਚਾ ਲਵੇਗਾ। ਜਦੋਂ ਹੁਣ ਸ਼੍ਰੋਮਣੀ ਕਮੇਟੀ ਨੇ ਡੇਰਾ ਸਿਰਸਾ 'ਚ ਵੋਟਾਂ ਖਾਤਰ ਗਏ ਉਮੀਦਵਾਰਾਂ ਖਿਲਾਫ ਜਾਂਚ ਕਮੇਟੀ ਬਣਾ ਦਿੱਤੀ ਹੈ ਤਾਂ ਡੇਰਾ ਸਿਰਸਾ ਨੇ ਵੀ ਇਸੇ ਦੌਰਾਨ ਆਪਣੀ ਅਹਿਮੀਅਤ ਦਾ ਖੁਲਾਸਾ ਕੀਤਾ ਹੈ। ਦੱਸਣਯੋਗ ਹੈ ਕਿ ਮੁੱਖ ਮੰਤਰੀ ਪੰਜਾਬ ਪ੍ਰਕਾਸ਼ ਸਿੰਘ ਬਾਦਲ ਤਾਂ ਇਹ ਵੀ ਆਖ ਚੁੱਕੇ ਹਨ ਕਿ ਉਨ•ਾਂ ਨੇ ਤਾਂ ਡੇਰਾ ਸਿਰਸਾ ਤੋਂ ਕੋਈ ਸਿਆਸੀ ਹਮਾਇਤ ਮੰਗੀ ਹੀ ਨਹੀਂ ਹੈ ਜਦੋਂ ਕਿ ਸਿਆਸੀ ਵਿੰਗ ਇਸ ਨਾਲ ਸਹਿਮਤ ਨਹੀਂ ਹੈ। ਡੇਰਾ ਸਿਰਸਾ ਦੇ ਸਿਆਸੀ ਵਿੰਗ ਦੇ ਚੇਅਰਮੈਨ ਰਾਮ ਸਿੰਘ ਨੇ ਪੰਜਾਬੀ ਟ੍ਰਿਬਿਊਨ ਨਾਲ ਵਿਸ਼ੇਸ਼ ਗੱਲਬਾਤ 'ਚ ਆਖਿਆ ਕਿ ਪੰਜਾਬ ਚੋਣਾਂ ਵਿਚ ਡੇਰਾ ਸਿਰਸਾ ਦੇ ਪੈਰੋਕਾਰਾਂ ਵਲੋਂ ਡਟ ਕੇ ਸ਼੍ਰੋਮਣੀ ਅਕਾਲੀ ਦਲ ਦੇ ਉਮੀਦਵਾਰਾਂ ਦੀ ਹਮਾਇਤ ਵਿਚ ਵੋਟਾਂ ਪਾਈਆਂ ਗਈਆਂ ਹਨ ਅਤੇ ਇਨ•ਾਂ ਵੋਟਾਂ ਸਦਕਾ ਅਕਾਲੀ ਦਲ ਦੇ ਉਮੀਦਵਾਰ ਨਮੋਸ਼ੀ ਭਰੀ ਹਾਰ ਤੋਂ ਬਚ ਜਾਣਗੇ। ਚੇਅਰਮੈਨ ਨੇ ਇਹ ਤਾਂ ਨਹੀਂ ਦੱਸਿਆ ਕਿ ਡੇਰੇ ਦੀ ਹਮਾਇਤ ਨਾਲ ਕਿੰਨੇ ਅਕਾਲੀ ਉਮੀਦਵਾਰ ਜਿੱਤ ਪ੍ਰਾਪਤ ਕਰਨਗੇ ਪਰ ਏਨਾ ਜ਼ਰੂਰ ਆਖਿਆ ਕਿ ਹੁਣ ਵੱਡੀ ਹਾਰ ਤੋਂ ਅਕਾਲੀ ਬਚ ਜਾਣਗੇ।
                         ਉਨ•ਾਂ ਆਖਿਆ ਕਿ ਸਿਆਸੀ ਵਿੰਗ ਦੀ ਅਪੀਲ ਮਗਰੋਂ 80 ਫੀਸਦੀ ਡੇਰਾ ਪੈਰੋਕਾਰਾਂ ਨੇ ਅਕਾਲੀ ਉਮੀਦਵਾਰਾਂ ਨੂੰ ਵੋਟ ਪਾਈ ਹੈ। ਚੇਅਰਮੈਨ ਰਾਮ ਸਿੰਘ ਦਾ ਧਿਆਨ ਜਦੋਂ ਮੁੱਖ ਮੰਤਰੀ ਪੰਜਾਬ ਦੀ ਹਮਾਇਤ ਨਾ ਮੰਗਣ ਦੀ ਟਿੱਪਣੀ ਵੱਲ ਦਿਵਾਇਆ ਤਾਂ ਉਨ•ਾਂ ਆਖਿਆ ਕਿ ਬਿਨ•ਾਂ ਮੰਗੇ ਤੋਂ ਕੁਝ ਨਹੀਂ ਮਿਲਦਾ, ਸਮੁੱਚੇ ਅਕਾਲੀ ਦਲ ਨੇ ਹਮਾਇਤ ਮੰਗੀ, ਤਾਹੀਂ ਹੀ ਡੇਰਾ ਸਿਰਸਾ ਨੇ ਸਾਰੇ ਅਕਾਲੀ ਉਮੀਦਵਾਰਾਂ ਨੂੰ ਸਿਆਸੀ ਹਮਾਇਤ ਦਾ ਫੈਸਲਾ ਕੀਤਾ। ਉਨ•ਾਂ ਆਖਿਆ ਕਿ ਡੇਰਾ ਸਿਰਸਾ ਅਕਾਲੀ ਦਲ ਤੋਂ ਇਲਾਵਾ ਕਾਂਗਰਸ ਅਤੇ 'ਆਪ' ਦੇ ਉਮੀਦਵਾਰ ਵੀ ਹਮਾਇਤ ਮੰਗਣ ਆਏ ਸਨ। ਸਾਰੇ ਅਕਾਲੀ ਉਮੀਦਵਾਰ ਨੂੰ ਸਿਆਸੀ ਹਮਾਇਤ ਦੇਣ ਦਾ ਮਤਲਬ ਹੀ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ ਨੇ ਹਮਾਇਤ ਮੰਗੀ ਹੈ। ਰਾਮ ਸਿੰਘ ਨੇ ਆਖਿਆ ਕਿ ਜੋ ਮੰਗੇਗਾ, ਉਸ ਨੂੰ ਹੀ ਹਮਾਇਤ ਮਿਲੇਗੀ। ਜਦੋਂ ਇਹ ਆਖਿਆ ਕਿ ਹੁਣ ਮੁੱਖ ਮੰਤਰੀ ਇਸ ਗੱਲੋਂ ਮੁੱਕਰ ਰਹੇ ਹਨ ਤਾਂ ਉਨ•ਾਂ ਆਖਿਆ ਕਿ ਹੁਣ ਕੀ ਕਹਿ ਸਕਦੇ ਹਾਂ। ਰਾਮ ਸਿੰਘ ਨੇ ਦਾਅਵਾ ਕੀਤਾ ਕਿ ਡੇਰਾ ਪੈਰੋਕਾਰ ਇੱਕਜੁੱਟ ਰਹੇ ਹਨ ਅਤੇ ਡੇਰਾ ਪੈਰੋਕਾਰਾਂ ਨੇ ਸਿਆਸੀ ਵਿੰਗ ਦੀ ਹਦਾਇਤ ਤੇ ਫੁੱਲ ਚੜਾਏ ਹਨ।
                         ਦੱਸਣਯੋਗ ਹੈ ਕਿ ਸਿਆਸੀ ਹਮਾਇਤ ਦੇ ਫੈਸਲੇ ਮਗਰੋਂ ਕੁਝ ਥਾਵਾਂ ਤੇ ਡੇਰਾ ਪੈਰੋਕਾਰਾਂ ਨੇ ਬਾਗੀ ਸੁਰ ਵੀ ਦਿਖਾਏ ਸਨ। ਡੇਰਾ ਸਿਰਸਾ ਦੇ ਇੱਕ ਹੋਰ ਆਗੂ ਨੇ ਮੰਨਿਆ ਕਿ ਕਰੀਬ 35 ਫੀਸਦੀ ਡੇਰਾ ਪੈਰੋਕਾਰਾਂ ਨੇ ਹਾਕਮ ਧਿਰ ਦੀ ਥਾਂ ਦੂਸਰੀ ਸਿਆਸੀ ਧਿਰਾਂ ਦੇ ਉਮੀਦਵਾਰਾਂ ਨੂੰ ਵੋਟਾਂ ਪਾਈਆਂ ਹਨ। ਜ਼ਿਕਰਯੋਗ ਹੈ ਕਿ ਬਠਿੰਡਾ ਮਾਨਸਾ ਦੇ ਉੁਮੀਦਵਾਰਾਂ ਦੀ ਤਰਫੋਂ ਤਾਂ ਅਕਾਲੀ ਉਮੀਦਵਾਰ ਜੀਤਮਹਿੰਦਰ ਸਿੰਘ ਸਿੱਧੂ ਨੇ ਤਾਂ ਬਠਿੰਡਾ ਵਿਚ ਚੋਣਾਂ ਤੋਂ ਐਨ ਪਹਿਲਾਂ ਐਲਾਨ ਹੀ ਕਰ ਦਿੱਤਾ ਸੀ ਕਿ ਹਾਲਾਤ ਬਣੇ ਤਾਂ ਉਹ ਪੰਜਾਬ ਵਿਚ ਡੇਰਾ ਸਿਰਸਾ ਦੀ ਸਤਿਸੰਗ ਕਰਾਉਣਗੇ ਜਦੋਂ ਕਿ ਸ੍ਰੀ ਅਕਾਲ ਤਖਤ ਸਾਹਿਬ ਤੋਂ ਡੇਰਾ ਮੁਖੀ ਖਿਲਾਫ ਹੁਕਮਨਾਮਾ ਜਾਰੀ ਹੋਇਆ ਹੈ।
                                                                         (ਡੇਰਾ ਸਿਰਸਾ ਗਏ ਉਮੀਦਵਾਰਾਂ ਦੀ ਫਾਈਲ ਤਸਵੀਰ)